Initial中國爆公關災難
員工新年訂清明花圈畀客 天貓店被投訴至關閉

喺香港擁有多間分店嘅服裝牌子Initial，近日喺內地爆發一場「公關災難」。事源一位網民喺「小紅書」上控訴，因為一啲溝通誤會，Initial嘅一位天貓客服竟然幫佢訂咗個清明節花圈，新年流流真係大吉利是囉～

事源Initial網店寄錯咗件衫畀呢位網民，於是客服就Send短訊叫佢寄返件衫畀鋪頭，但唔知咩事嘅網民以為客服係騙子，所以開頭就無理到件事。直到後來開返個App，竟然發現個Initial客服訂咗個花圈俾佢。網民再向Initial客服細問多次之下，發現其實係職員咁啱又填錯電話、地址，所以佢根本無收到件衫，而客服傾傾吓亦都承認訂咗花圈，但而家已經退咗貨，為事件同網民道歉。

不過道歉平息唔到位網民嘅怒火，件事喺網上傳開去之後，更加惹起咗公憤。Initial上海一位高層急急親自打畀網民道歉補鑊，但就話涉事員工「情緒激動」唔敢炒咗佢⋯⋯補鑊失敗，最後間天貓店就俾人投訴到要關閉。

雖然Channel絲無用淘寶呀天貓呀呢啲好耐，但原來可以幫人訂花圈又真係幾過癮，唔知各位有無仇人嘅淘寶Account？

#channelchk #Initial #天貓 #淘寶 #公關災難