「韋家幫」再現！ 老爆3人組偷渡來港
2星期潛入逾10村屋擸百萬財物

沉寂一時嘅內地廣西爆竊集團「韋家幫」近日捲土重來，喺新界多區犯案，近2星期至少爆竊逾10間村屋，狂擸約100萬元財物！Channel絲收到最新片段，該集團「老爆3人組」今日（19日）凌晨疑潛入大埔蘆慈田村一間村屋進行爆竊，潛行過程被附近鄰居閉路電視拍下，據知村民人心惶惶，有人決定組成自衛隊自保。

「韋家幫」老爆3人組近日在新界區犯案纍纍，事件已在村屋群組廣泛流傳，根據Channel絲收到的其中3片段，分別發生喺今日（19日）凌晨及上周六（16日）深夜4時，片中匪黨不論裝扮、衣著及鞋等，幾乎一樣，估計為同一幫人所為。從片段可見，3人包着頭巾及面巾，手持鐵筆等爆竊工具，鬼鬼崇崇從村屋後園潛入，再撬開窗戶犯案。

消息稱，警方已接手調查案件，並鎖定「韋家幫」老爆3人組資料，相信佢哋經山路偷渡來港，再沿山路在新界區作案，在過去兩星期，分別喺沙頭角、上水、粉嶺、元朗及大埔村屋發現佢哋嘅行蹤，當中至少有10多間村屋被爆竊，合共損失逾百萬財物。

「韋家幫」再現事件已在新界區村屋群組瘋傳，各區村民人心惶惶，有村民透露已在村內組織自衛隊，通宵輪流巡邏，亦有村民將鐵閘加固，以及加強防盜設施，以減低損失。

#韋家幫 #廣西 #老爆3人組 #偷渡 #村屋 #爆竊 #自衛隊 #蘆慈田村 #channelchk