全城集氣！專訪急性白血病前南華女排
劉韵琳：原來好多人同我一齊打仗
https://youtu.be/-UUD2i2_A18

患上急性骨髓性白血病（AML）而急需尋找合適骨髓的前南華女排運動員劉韵琳（Harriet Liu），接受Channel C訪問。她指喺IG出po後，收到大批素未謀面的市民、奧運運動員、藝人嘅打氣和祝福，更有大學教授、醫生分享其訊息，連未夠18歲的青少年都主動問她有甚麼幫到手，令她深受感動及感到香港人嘅溫暖。

同時，有不少同患血科病嘅患者向她分享經歷，Harriet直言感到自己原來並不孤單：「有些患者同大佬打咗幾年，有些做咗6次，甚至9次化療，原來好多人同我一齊打緊仗」。

Harriet稱，6年前因手腳出現不尋常瘀腫、體重急降而發現患上慢性骨髓白血病，多年來靠服食標靶藥控制病情，情況一直穩定，但今年7月底突然發高燒，揭發自己同患急性骨髓白血病，留院至今，她形容今次「打的大佬有啲棘手」。

8月中，她接受為期7日的化療，更猶如由地獄折返人間，「打完化療後幾日，藥力開始做嘢，當時最辛苦，試過頭暈，10幾秒間眼前影像顏色變白，試過中性白血球跌至零，冇任何能力抵抗細菌而導致細菌入血，發高燒幾日。」加上血小板低，她更要隔幾日就輸血一次。

惟她憑着意志一一捱過，現時已完成首次化療20多天，中性白血球、血小板，血色素等指數漸回升，精神漸回復，但找到合適骨髓進行移植仍是最有效治療嘅方法。

留院一個多月，雖然她戴上帽子來遮掩化療後的脫髮，但訪問中，她仍流露一貫樂天的笑容，以免大家擔心，「我唔想同人講，我要去打癌症呢啲字眼，用打大佬來形容，唔想畀人哋太大壓力。」

她慶幸自己是一個運動員，由細到大嘅運動訓練反而有助她面對今次逆境，「比賽唔係每次都贏，總有低潮、有挫敗，但會不停搵其他方法解決，調整心態，今次呢個病都係一樣。」她呼籲大家登記捐骨髓，希望為給她及其他白血病同路人帶來一線曙光。

現時Harriet除了最希望外出呼吸新鮮空氣同做運動外，就是想大吃一頓，至於最想食咩呢？她一下子也難一一細數，笑言：「雖然都唔係可以食到啲咩嘢，但係我想食返啲⋯⋯好嘢！」

特別一提，根據紅十字會資料，骨髓登記只需抽血，作白血球組織型檢驗。若發現白血球組織型與某一位病人脗合，才需進一步的檢驗。骨髓幹細胞捐贈抽取的部位為「在骨盆旁邊的腸骨內抽取骨髓細胞」，非一般人認知的「脊椎中的尾龍骨水」，因此會避開人體中重要中樞神經系統，並不會造成嚴重的神經傷害。

#骨髓 #紅十字會 #運動員 #南華 #白血病 #劉韵琳 #AML #急性骨髓性白血病 #HarrietLiu #化療 #channelchk