Signal設廣東話介面獲讚夠貼地
建立群組變「開個新谷」

廣東話係港人嘅母語，除咗歌曲、電影、電視劇接觸會經常聽到之外，亦可以喺通訊軟件Signal睇得到。港語學今日發帖分享，Signal嘅介面語言原來已加入廣東話選擇，譬如「建立新群組」寫成「開個新谷（group）」；「全部標記為已讀」就變咗「冚唪唥剔低話睇咗」，「限時訊息」就係「過眼雲煙訊息」，群組管理員成為「話事人」，認為十分有親切感，讚Signal識做。

但呢個模式暫時只係Android機先有得選擇。用戶只要喺Signal嘅功能列揀「設定」，再揀「外觀」或「介面設定」，之後喺「語言選項」揀「Cantonese（traditional）粵語」就得。

唔少網民認為Signal此舉好有心，覺得好正，「係讓世界看見廣東話嘅一步」，希望日後更多企業為廣東話普及出一分力。不過，亦有人認為部份句子太累贅，「『冚唪唥剔低話睇咗』真係搞到我閱讀障礙」，認為「全部睇晒」已簡單易明，質疑「係咪有咁口語得咁口語就叫廣東話？」

廣東話係香港多年來嘅文化產物，對港人來說有多重意義；即使有人認為好難學，但仍有唔少人堅持學好廣東話。而近年亦越來越多人以行動將廣東話文化普及，例如年初上映嘅港產片《狂舞派3》，就用上全廣東話字幕；Disney+部份原創節目亦有得揀廣東話配音及字幕；NETFLIX亦提供粵語電影選擇。

#channelchk #廣東話 #Signal #母語 #捍衞廣東話 #文化產物 #港語學

＝＝＝＝＝＝＝＝＝＝＝＝＝
🔥出氣師登場！「谷鬼氣、搵我哋」🔥
如果大家有咩疑難「谷鬼氣」，不妨搵我哋「出氣師」，等我哋幫手出返口氣！
出氣WhatsApp： https://wa.me/85263544742