花姐捱摑大犧牲
全女班《全民造星IV》11.1首播 大台推男男配對真人騷

ViuTV節目巡禮因為8號風球改為閉門錄影，今晚播出。節目由《全民造星IV》全女班跳唱全新Remix版本的《前傳》打頭陣。壓軸有ViuTV吉祥物生啤帶埋新吉祥物「生菜」亮相。

據ViuTV「歷史記載」，生菜係去參加《造星IV》時被花姐直接招手邀請加入高層之列，節目巡禮尾聲仲同Mirror一齊跳《Boss》。至於上任感言，係無嘅。生啤唔講嘢，你問生菜都冇用。

《造星IV》將於11月1日推出。節目預告真係嚇咗Channel絲一跳——至高無上監製花姐俾人追問：

「你又話唔搞女團嘅？」
「我冇講過。」
「你又話今屆女仔質素好差嘅？」
「邊有呀？你係咪黐咗線呀？」

花姐講完呢句，鏡頭前有人伸手向花姐「啪」一聲兜巴車埋去……

花姐咁樣「犧牲」，原來為咗呢句「大巴大巴打低昨日的我」…

嘩……

ViuTV推全女版《全民造星》，無綫就推出由王賢誌（Vinci）擔任監製兼節目主持嘅「男男配對」真人騷《仔仔一堂》，英文名叫"Boyscation"，下月初推出。

消息指節目有10位男士參與，包括IG粉絲逾十萬的藍源偉（Juzco）、台灣游泳教練Kevin Tsai、型男主廚楊平（Kenny）等。王賢誌接受傳媒訪問時就話，ViuTV嘅《大叔的愛》的確令人好多人接受LGBT，但始終係童話化，佢係想將真實情況畀大家睇，用多角度探討新一代嘅Gay，以個人經歷幫助社群，仲話預咗會有人鬧咗先。

節目巡禮上，人氣爆燈嘅七師傅七仙羽夥P1X3L跳唱〈Oh My 7 God〉，七師傅仲事先張揚會開拍第二輯《七救星》為藝人轉運，但今次轉運對象有啲唔同，計劃中全部都係邀請巨星上陣，張敬軒已經應承咗拍喇！

#ViuTV #節目巡禮 #生啤 #生菜 #花姐 #全民造星 #仔仔一堂 #Mirror #七仙羽 #七福星 #channelchk

《七福星》下周首播 主題曲MV勁膠
七師傅獻身扮醜飾演「狼辣度」

七仙羽（七師傅）去年主持的節目《七救星》大獲好評，早前宣佈會「添食」第二輯《七福星》，又透露張敬軒答應擔任嘉賓。節目最近塵埃落定會於下周一（24日）播出，Viu昨日更公開主題曲MV，見到一眾《七救星》主持及嘉賓一齊換上古裝勁Hyper！

出演MV嘅有《七救星》嘉賓J.Arie、P1X3L、小肥、郭奕芯，主持Brian及Kathy仔，仲有唔少得嘅七師傅。為咗MV，七師傅仲不惜獻身扮醜，戴上禿頭頭套及扮哨牙飾演「香港嘅狼辣度」。

除咗MV，由J.Arie同七師傅合作一齊填嘅主題曲歌詞，亦都有貫穿上輯節目內容，好似「不貪心 不能淫邪 到處貼金」、「狼辣度 佢係黃金」，令人一聽就知首歌咩料呀～淨係首MV已經咁好笑，唔知《七福星》播出後會唔會破到上輯嘅收視紀錄呢？

#channelchk #JArie #P1X3L #郭奕芯 #小肥 #Brian #Kathy仔 #七師傅 #七救星 #七福星

欣宜《七福星》擁抱黑歷史 談「死亡之吻」事件
夥七師傅拍新版惡搞片：保證呢條片令人笑 之前嗰條抹咗佢

香港歌手鄭欣宜喺ViuTV節目《七福星》入面竟然講返起當年同吳卓羲嘅一段「黑歷史」？！

「嗰陣時應該啱啱滿18歲，咁就同一個男人發生咗一啲事啦…」七師傅直問：「嗰個王子係咪叫吳卓羲（with七師傅口音）啊」 ，眾人就即刻話係叫做「吳唱K」，不過七師傅就冇理，雙眼直視鏡頭同呢位吳卓羲講「對唔住，我講嘢發音唔正，此……非彼（翻譯失敗）」，搞到欣宜同埋主持們都笑到失控。

不過欣宜都好坦率咁講返成件事，就話佢錫吳卓羲一事被封為「死亡之吻」，之後令到欣宜唔開心咗好耐，話網民整咗一條惡搞片，就係扔欣宜落山。

面對黑歷史其中一個好方法就係惡搞返個黑歷史轉頭，鍛練自己強大嘅心臟。所以七師傅就話會幫欣宜拍返一條現代版惡搞片，「又係公主同王子嘅嗰壇嘢，保證呢條片令人笑，之前嗰條抹咗佢」。欣宜作為一個咁鍾意帶開心畀大家嘅人，大叫一句「好！」之餘都仲多謝七師傅。原來Chinese culture入面「以毒攻毒」仲可以有呢個意思！

欣宜之後就話，If it’s funny, then it doens’t hurt.（如果係搞笑嘅，就無傷大雅）仲好豁達咁話，如果當初冇呢件事發生，而家就唔會有呢個項目出嚟添，Channel 絲真係好欣賞欣宜嘅正能量🔥🌞🌻

#channelchk #viuTV #princejoyce #欣宜 #七仙羽 #七師傅 #七福星 #吳卓羲