睇大局！林鄭開方便之門 鬆綁新界鄉紳賣阿公地

行政長官林鄭月娥在任期間最後一份施政報告終於出爐，一個字——睇大局，向北望。大局係融入國家發展大局，《文匯》有個term係非常「到位」——新界北釋潛力。學林鄭話齋，管治需要新思維。

林鄭話，為加快土地供應，同意可考慮修訂《新界條例》，在尊重祖堂傳統同保障祖堂成員合理權益大前提下，處理目前祖堂地難以發展嘅困局。第一步就係，由民政事務局局長同鄉議局成立工作小組，聯同發展局和其他部門，一年內完成檢討、制訂具體修訂建議。

祖堂地，俗稱「阿公地」，泛指由家族或堂而非個人擁有嘅新界鄉村土地。要賣，唔易㗎葉師傅，門檻好高，祖堂嘅註冊司理須取得民政事務局局長同意書，而大前提仲要係所有持分者同意下，先獲發同意書。

鄉議局一直都想鬆綁，18年仲同民政事務總署成立工作小組，研究點樣「便利」賣阿公地，以促進新界發展及增加香港整體可供發展用地的供應。

翻查資料，《新界條例》第15條係無訂明出售祖堂地門檻，就連政府處理同意出售祖堂地申請程序都係無列明；但又得意喎，前任民政事務局局長劉江華去年回覆議員查詢時話過，雖然民政專員有法定權力就出售祖堂地發同意書，但因為祖堂地係私人地，所以專員喺議決過程中係冇任何角色。劉江華仲話，政府係唔知全港有幾多祖堂地；就算同意賣地，政府亦唔知有關申請涉及嘅土地面積同售後用途。

事隔一年，林鄭今日話，仲係「未掌握」阿公地正式數字。

靜靜雞講吖，其實鄉議局早兩個月，已經見咗林鄭，交咗份建議書，要求政府鬆綁賣祖堂地。鄉議局提出建議，希望政府准祖堂（即新界宗氏族群）同私人機構合作開發土地；如政府要收番阿公地發展，就要提供現金以外嘅補償，例如，將部份單位預留俾祖堂。

新界鄉議局主席劉業強當時話，香港落實《國安法》同完善選舉制度後，行政立法關係轉趨理性，相信鄉議局所提交嘅建議係「適時」、有助香港處理「老大難」問題。份建議書主題叫做「完善祖堂制度 活用新界土地」。班鄉紳真係偉大，為解決香港土地缺乏嘅問題，連阿公地都可以犧牲，起來！讓我哋一齊共同富裕吧！

#施政報告 #阿公地 #祖堂地 #林鄭 #睇大局 #鄉議局 #channelC