聖誕樹no bud佳作 搭起綠色樽蓋 衣架加LED燈夠搶眼
網民籲「用最窮精神過心靈富足嘅聖誕」

又到聖誕～又到聖誕～！嚟到聖誕月聖誕樹又係時候出動，香港做設計慘過食屎協會 @hkddwtesa fb專頁今年繼續搞咗個「香港最窮聖誕裝飾比賽」，目的係揸緊no budget信念鼓勵大家發揮小宇宙，結果唔少會員嘅作品都吸睛得嚟又相當環保。

其中會員Nicky Chau就將蒸餾水嘅綠色樽蓋「搭膠膠」，喺頂加返個汽水蓋，再搭番幾條橡筋，即刻變成mini聖誕樹。出post短短兩日就吸引咗過萬人讚好，香港做設計慘過食屎協會會長都話呢位會員冒住膀胱爆炸嘅風險去完成作品，仲提大家普天同慶嘅日子情況之下珍惜一下環境，「今年試下用最窮嘅精神去過心靈富足嘅聖誕節。」

另外會員Kelly Chow就因為阿媽唔想嘥錢買聖誕樹，所以自己就用衣架砌咗棵5層高聖誕樹，加啲絲帶同LED燈做裝飾，仲即刻豪華咗。有人留言都大讚作品係心目中嘅三甲，「好實用，仲可以掛下socks同bra，連聖誕波波球果類飾物都慳返」；會長亦覺得裝飾呢豐儉由人，留返啲錢同媽媽食聖誕大餐亦得。Channel絲都想講呢兩棵聖誕樹唔單止可以話零成本，仲要夠慳位，啱晒啲想趁聖誕節點綴下，但又唔想搞大龍鳳嘅大家。

不過就算想低成本做棵大啲嘅聖誕樹，其實都一樣有方法！有學校早前就喺外牆掛上大型綠布，由學校3樓延伸到6樓，布上掛有裝飾，樹頂仲有粒星星，絕對不失聖誕氣氛。如果咁啱屋企有大型紙皮，仲可以將幾塊紙皮𠝹成聖誕樹嘅形狀，剪剪貼貼砌出紙皮聖誕樹，最後加啲舊聖誕裝飾，一樣咁靚！

#channelchk #聖誕樹 #聖誕節 #環保 #零成本 #香港最窮聖誕裝飾比賽