松鼠狗葵芳港鐵站外 慘被車撞死
司機疑不顧而去 狗主尋車cam求助

有網民在車cam Facebook群組出po，指昨晚（11日）7時40分，一隻白色松鼠狗在港鐵葵芳站門外被車撞死。肇事車輛未遵守交通法例停車，意外後疑不顧而去。網民收到狗主求助，代為出po，呼籲當時在場的車主提供車cam片段，還原真相（電話 46112661 ）。

不少網民對狗狗離世感惋惜，同時質疑狗主沒有幫狗狗戴上狗繩。狗主在Channel C IG留言澄清及交代事發經過，指狗狗每次外出一定會戴狗帶，昨晚亦不例外，但事發前牠突然衝前，更「縮頸」掙脫狗繩，「我好驚佢會走失，所以我第一時間追上去，想幫佢戴返狗帶先。但佢1歲，大個女啦，跑得好快，我喺後面好努力追，都追唔上佢」。追逐接近20秒，主人與愛犬相隔兩步之距，但狗狗突然衝出馬路，被車撞飛。

主人指，自己當時腦袋一片空白，一心只想知道愛犬生死，沒有留意車輛外形，「我無怪個司機撞到佢，因為事發突然，可能真係反應唔切，但我只係想問吓佢，點解明知撞到唔停低？」主人難以接受愛犬突然離開，認為若當時涉事車輛停下，愛犬可能仍然有救，「可能佢今日已經無事出院，繼續追住我、黐住我」。

#車cam #交通意外 #車禍 #松鼠狗 #葵芳 #港鐵