郵局時薪72元聘總務助理
要檢查同教人用「安心出行」

市民周一（1日）起出入政府場地必須使用「安心出行」，呢幾日好多新聞都講長者出入街市、公立醫院時嘅不便，但仲有一個地方其實好多人都會去，就係郵局。唔知係咪因為呢幾日執行起上嚟有困難，郵政署喺今日（3日）刊登咗一個職位空缺，就係總務助理，時薪72元。職責包括檢查訪客有無用「安心出行」、教公眾用「安心出行」等。繼「探熱師」之後，政府又幫大家新增職位啦，係「安心師」呀！

呢份工星期一至五返朝9晚6，星期六就朝早9點至晏晝1點，一般每周工作27至44小時，地點就遍佈港九新界。時薪72元，有人覺得荀、有人覺得出面啲炒散都係咁上下，但睇返同樣係政府部門嘅康文署，佢哋嘅兼職帶位員，時薪都只係57元，而要識埋北印度語嘅兼職警察社區聯絡助理，時薪都係87元，咁呢份只需教吓人點用「安心出行」嘅總務助理，其實望落又真係算唔錯嘅。不過，之前入食肆要強制用安心時，飲食業已經出聲話門口帶位畀人鬧，而早幾日食環工會又話前線變咗出氣袋⋯⋯咁嘅話，呢份「荀」工可能要加多樣職責，就係要俾人「安心出氣」喇～

#channelchk #安心出行 #總務助理 #郵局 #郵政署 #政府 #前線員工 #兼職 #時薪