《造星IV》女團心水10人內 被foul亦考慮
咖喱阿妹拍MV Ash燒賣密接廣告

《全民造星IV》總決賽將會喺呢個星期六聖誕節（25日）晚上8點半，喺九展Star Hall舉行，20強參賽者將以個人應戰。嚟緊擔任女團經理人嘅Wing（戴穎）日前就話女團人數心水係10人之內，除咗三甲直入女團，其他人選就喺決賽後，由台前幕後再開會傾成團名單，20強係優先考慮，但亦考慮已被out嘅參賽者。換言之，其實係96強都有機會成為女團一員。如果參賽就有份，大家又想女團有邊幾位呢？（歡迎留言討論心水名單～）

睇返部份已被淘汰嘅參賽者，雖然未知有無份加入女團，但都已經有唔少曝光。譬如靚女醫生咖喱同阿妹，就分別為林欣彤新歌《修養動物》及《造星IV》參賽者Sinnie今晚首播歌曲《失眠時我會呆望窗外等待你的來電》做MV女主角；至於Ash已先後為品牌Hogan、謝瑞麟出廣告post，燒賣就為屈臣氏網店等出po，有fans都留言話「燒賣賣廣告我就買」添！

至於選女團會考慮乜嘢條件，Wing都有話過會視乎佢哋人氣同表現決定，唔會側重某一方面，要取得平衡，希望可以代表到香港，而且多變、有實力嘅成員，最終目標係每位成員都可以solo。

而家距離總決賽仲有3日，提提大家記我投心水冠軍一票喇！喺度再代旁白師呼籲，票投1號Ivy So呀～！

#channelchk #全民造星IV #造星IV #總決賽 #投票 #女團 #心水名單 #Wing #咖喱 #阿妹 #Ivy