Anson Kong10.16牛一
自家品牌KYUBI同日誕生做老闆

Happy Birthday to me！Happy Birthday to KYUBI！

作為Mirror頭腦擔當（句句都押韻純屬巧合），Anson Kong江熚生有重要事要宣佈——聽日生日，自家品牌日系街頭服KYUBI同日誕生！佢做老闆喇！

AK今午於社交網正式宣佈：「今年終於完成宏願之一、親手育成一個自家品牌誕生，正式成為江！老！闆！」#KYUBI （キュウビ, 九尾）係咩呢？AK嘅解釋係：象徵圓夢及保護，仲有口號：「保持初心 堅守夢想 型住努力 潮住成功」，巧型！

根據由KFC成員開嘅「ak_dictionary」介紹，KYUBI，「亦為kyuubi，是有九條尾巴的妖怪狐狸。九尾狐在多國傳說中均有記載，日本動漫《火影忍者》中主角渦卷鳴門體內就封忍著九尾的卓羅。」

「Kyubi玖」官網 ( https://www.mmxxonline.com/ )多張AK做model嘅大圖，"Have a young heart"（保持初心）。老闆穿戴自家品牌產品，由Mirror成員最愛嘅漁夫帽、到AK成日著嘅hoodie，以至毛巾、遮都有得賣。明日開售，大約1月發貨。

唔記得講番，老闆呢個生日，係佢最後一個二字頭生日。佢哋之前玩「全民造星1問答大會」（ https://bit.ly/3lGaJRl ），同Tiger仔合稱「30歲以下群組」，做MC嘅皮皮Frankie一聽到個名就話：「好針對性喎你呢個…」就連Lokman都唔幫佢：「全民造星么潤第一屆！」老闆呀，出年你都30喇……

好期待有日IANSON各自著住個人brand拍新片呀！預祝老闆生日快樂！Kyubi玖生意興隆！

有用資訊：AK正式做老闆之前，已經有個朵叫「老闆」，何解？因為KFC成立之初，生粉各司其職，有人負責設計、有人負責剪片，分工合作；頭腦擔當AK就幫生粉們「分部門」 ，有設計部、IT部，人材濟濟；AK亦因為咁，多咗個身份，就係「老闆」喇。

#AK生日 #Mirror #老闆 #老闆生日 #IANSON #Kyubi玖 #火影忍者 #channelchk

Anson Kong 29歲生日 生粉全員出動賀壽
曹永廉同日57歲牛一 留言冷清

「陳卓賢我警告你，呢題如果你唔識或者諗多過一秒，即刻絕交！」鍾意嗌人全名嘅有幾多個？咪就係老闆 Anson Kong 江𤒹生AK囉。

「10月！」都未問，陳仔已經答。
「咦我都未問。等我問埋我個問題先。問題你Anson Kong嘅生日月份係幾月？」
「10月！」

IANSON係講默契嘅。10月16號，老闆29歲生日喇！今日亦係其日系街頭服品牌KYUBI誕生日，簡稱KYUBI誕。Happy Birthday呀老闆！祝KYUBI大賣！

AK生日，六壯士之一皮皮 陳瑞輝Frankie Chan貼圖祝「大鼻妹」生日快樂，花姐（黃慧君）噚日就喺IG出生日post，留言："Happy birthday my dear dear dear dear"，AK留言笑指：「聽（今）日再出多個post，Thanks mom﹗」

到正日凌晨花姐再於IG貼短片，片中AK捧住生日蛋糕，花姐問AK：「你可唔可以對住我講一個生日願望或一個承諾？」AK就笑笑口話：「生日願望係希望我下一年生日，花姐係16號先同我出Post。（承諾？）我乖啲啦，唔好激你咁多啦，快啲買樓畀你啦！」

至於KFC精心準備一系列慶生行動正式開始。生日都要開工㗎，AK一大早就同隊長Lokman正副分明咁去中環出席Versace嘅活動，生粉迫塞店舖門外，就連對面馬路都企滿生粉。AK話，今年最大嘅生日願望，就係家人、朋友同貓貓身體健康。至於慶祝活動，當然係同屋企人食飯慶祝！

今日AK牛一，其實仲有一位藝人同佢同日生日，不過年份就相差28年，差唔多一個double——愛國愛港藝人曹永廉。今年5月曹公因為心臟問題，秘密入院通波仔，之前又生腎石，似乎流年健康運麻麻。

曹公生日，有愛國愛港人士透過微博向佢祝福，大讚曹公係佢一位非常敬重嘅演員，曹公亦回謝對方，讚佢係「一個非常愛國愛港的英雄，支持您」。多麼熱血。不 過排隊賀壽嘅人唔太多，微博加埋fb暫時都唔過100，仲有其中一部份係祝福同日生日嘅張達倫Happy Bday。

#AK生日 #曹永廉 #AnsonKong #KFC #生粉 #花姐 #channelchk