父母疑畀小朋友坐大髀揸「大膽車」
網民直斥馬路炸彈、「生仔要考牌」

好多小朋友都鍾意玩賽車，但為人父母，千祈唔好教佢揸「大膽車」呀！網上近日流傳一段短片，影到一架私家車入面，有位小朋友坐咗係司機位嘅爸爸大髀，隻手就不時伸出嚟搞個軚盤，而坐喺副駕位嘅媽媽，見到此情此景就一啲反應都無。

唔少網民睇到片段後都直呼「牙煙」，又話佢哋唔止教壞緊個仔，仲害緊其他道路駕駛者，有人就話如果唔小心發生車禍，安全氣袋好可能會整親小朋友，直斥「生仔要考牌」。

其實10年前都曾經發生類似事件，當年一對父母將2歲小朋友揸「大膽車」嘅片擺上YouTube，引來網民聲討及報案，最後要去警局自首。佢哋被控危險駕駛及慫恿他人危險駕駛罪，各被判160小時社會服務令及停牌半年。睇嚟今次阿寶又要出動了，唔知今次片中嘅父母知道錯未呢？

#channelchk #私家車 #阿寶 #人類總要重複相同的錯誤 #大膽車 #揸車