$40請大學畢業生補幫半山IB生補習
講明拜金主義免問！兼可24小時問功課

之前政府統計處數據都話大學畢業生仲低過25年前，但估唔到時薪只係比最低工資多$2.5！話說有網民出post請上門導師，要大學畢業嘅，係幫國際學校中五生補IB課程全科。私補地點係半山區獨立屋，不過時薪就只有40蚊，「如表現好和守時可以食埋飯先走同有$5獎勵」，有飯食仲又有獎勵，真係多謝晒！帖文仲講明「只接受有教學熱誠的導師，只顧學費多少的拜金主意（義）者免問」，唔通真係有熱誠就要被壓搾？

要求未完㗎！除咗要大學畢業、有教學熱誠，唔貪錢、守時之外，全英教學、提供練習都算合理，但仲要可以「24小時WhatsApp問功課」，會唔會太chur呀？

睇返最近郵政署招聘總務助理職位，負責檢查出入郵局人士有冇用「安心出行」，同埋為公眾使用「安心出行」app提供技術支援，時薪就有72蚊，而入職條件只需中四學歷。就算係外判嘅「安心出行」大使，以北區嘅街市為例，替更都有300蚊一更，每更6至7小時。

唔少網民都留言話希望呢個post係「曲線」，只係呃Like或者畀大家開心吓；都有人問「係咪英鎊」，話現職IB教師私補Year 13學生，都有40蚊美金一個鐘，「24小時on call的好老師，真係cheap到連狗都不如？只值$40／小時？」有網民都話上兩星期喺街聽到個「判頭想搵個掃街清潔嬸嬸有7×時薪，都係要熱誠，返工準時。」雖然疫情下有份工做可能都要感恩，但大學畢業生真係多到咁唔值錢？

#channelchk #大學生 #私人補習 #人工 #上門導師 #拜金 #大學畢業 #安心出行