英國IKEA出年停產BLÅHAJ鯊魚公仔
香港沙田分店仲有90隻

《Baby Shark》呢首歌好多小朋友都識唱，而IKEA都有一隻鯊魚公仔好受歡迎，可能你屋企都有一隻添。呢隻公仔原名叫BLÅHAJ，佢喺世界各地都有唔少Fans，喺台灣甚至有一個坐擁6萬幾個會員嘅「鯊魚俱樂部」。而佢喺IKEA香港嘅FB都有唔少曝光率㗎，好多時Admin仲會叫佢做鯊鯊，好似IKEA嘅大埔分店開幕咁，鯊鯊都有份幫手宣傳㗎～

不過，關於可愛嘅鯊鯊，Channel絲有一個壞消息同好消息同大家講，壞消息就係英國IKEA喺Twitter話，由於供應問題，BLÅHAJ喺當地已經缺貨，又話佢會喺2022年嘅4月停產。呢個消息一出，即刻引起唔少網民心碎，有唔少人都驚BLÅHAJ會「絕種」，喺網上發起「Save the Blahaj from Extinction!」聯署，希望當局唔好滅絕鯊鯊。而由於收到太多查詢，美國IKEA就已經講明，佢哋暫時未有計劃停售鯊鯊。

鯊鯊命危嘅消息好快傳遍網絡，香港IKEA嘅FB專頁已經有Fans問鯊鯊係咪會停產，但Admin都只係答咗句「真係......唔知」。Channel絲畀悲傷沖昏頭腦，差啲講漏好消息，就係我哋已經打咗去IKEA嘅查詢熱線問，CS哥哥都話而家暫時未收到佢會停產嘅消息，但就未check到下批貨嘅船期，而目前沙田分店仲有90隻，大家可以去帶鯊鯊返屋企。至於另一隻都好受歡迎，um…...係好受貓貓歡迎嘅$9.9間條衫熊仔FABLER BJÖRN，就暫時未出現缺貨同絕種危機，各位貓奴可以唔洗驚。

#channelchk #IKEA #宜家家居 #BLÅHAJ #鯊鯊

IKEA鯊鯊昨傳停產 港澳門市今全線斷貨

產品編號103.735.89，名字叫BLÅHAJ嘅鯊鯊，你同我講全線斷貨？！ IKEA WHY ？！

全線姨媽都冇貨？103.735.89喎！鯊鯊喎！噚日職員先至同Channel絲講，話BLÅHAJ鯊鯊雖然係開始缺貨，但係仍有小量門市有現貨，仲話沙田分店有90隻。（昨日報道： shorturl.at/afpBQ ）

今日Channel絲狗衝去搵姨媽買鯊鯊，全線斷貨？？？？貨倉冇，銅鑼灣冇，九龍灣冇，沙田冇，荃灣冇。過大海去澳門氹仔撲鯊鯊？對唔住，都係冇！

鯊鯊變咗瀕危絕種動物！！

職員見Channel絲好崩潰，安慰話部份門市聽日會返貨。生產商幾時有新貨返，答唔到。嗚~
好崩潰好崩潰。

Channel絲點解急撲鯊鯊，係因為噚日IKEA英國同部份歐洲國家嘅IKEA都話BLÅHAJ鯊鯊明年4月起停產；噚日，係噚日呀，仲話美國不受影響，香港未必會冇㗎喎！24小時之後，鯊鯊絕咗種？

再睇番$9.9嘅貓奴恩物FABLER BJÖRN熊，沙田荃灣都斷貨！貨倉得番35隻，但九龍灣就仲有大把。不過消息就話，供應商似乎有少少問題，貨源可能會唔穩定……

如果大家知道邊度有鯊鯊返貨，留個愛心留言俾Channel絲吖！跪！

（補充：有好熱心嘅讀者話畀Channel絲知，鯊鯊之前船期出現延誤，嚟緊都會陸續返貨，不過可能只得少量，但就無消息話停賣！）

#channelchk #IKEA #宜家家居 #BLÅHAJ #鯊鯊