脆香雞翼將停供應震驚連登仔
247分店周一早上仍有售 被質疑「marketing嚟」

自從連鎖快餐店麥當勞前日（11日）宣佈脆香雞翼因為船期未嚟到香港，存貨呢幾日會陸續賣晒之後，唔少連登仔同網民都崩潰，擔心好快冇得食。所以麥記就提供咗脆香雞翼供應表畀大家參考，等大家可以睇到邊間分店仲有得賣。而截至今朝10點半，全港247間分店都顯示仍然有售，想食脆香雞翼嘅朋友暫時仲有機會食到呀。

麥當勞前日喺facebook發帖解釋，因為全球供應鏈受到不穩定嘅國際航運影響，脆香雞翼要遲啲先可以到香港，佢嘅存貨都會陸續賣晒。但同時叫大家放心，因為脆香雞翼再返貨之前，麥炸雞會加入超值選，滿足大家食雞嘅慾望；就算單買一件雞都有優惠。

雖然有連登仔同網民對就快無脆香雞翼食表示「震驚」，「世界末日了」、「脆香雞翼係無可代替架」、「無脆香雞翼可以唔食老麥了」，但亦有人認為係麥記嘅宣傳手法，「marketing嚟嘅啫，想谷麥炸雞，個excel咁X多間都有都叫暫停供應」。

#channelchk #脆香雞翼 #麥炸雞 #麥當勞 #老麥 #麥記 #連登 #航運

驚鏡粉要卡唔要雞
大嘥鬼抽水自製「鬼仔卡」、「鬼鬼盒」

政府部門嘅吉祥物，你認得幾多隻？除咗清潔龍阿德同任何仁，相信最多人識嘅應該就係大嘥鬼啦！ 大嘥鬼 Big Waster （鬼鬼）可謂係最勤力嘅「公務員」，每逢有啲咩新話題，佢都總會趁機出Post宣傳佢嘅環保理念。今次 MIRROR x麥當勞炸雞嘅推廣活動Hit爆全城，好多人食炸雞食到厭，仲要諗埋唔同雞料理轉換口味。口號係「食得晒先至好嗌」嘅大嘥鬼，好驚大家要卡唔要雞，所以今次佢特登整咗4張「鬼仔卡」同「鬼鬼概念版食物盒」送畀鬼粉，滿足大家嘅換卡欲，都真係幾有鏡仔們嘅神緒㗎～

IG限定嘅「鬼仔卡」有四張，除咗叫人「最緊要惜食」嘅大字，「鬼仔卡」好多細節都跟返原版嘅麥當勞卡，例如顏色、鏡仔們嘅髮型同Pose等。所以Channel絲大膽推測，藍色嘅應該係姜濤、粉紅色嘅係Anson Lo、綠色嘅係大表哥Stanley、最尾深粉紅嘅就係Jeremy。而鬼鬼好似最偏愛Anson Lo嘅心型瀏海同耳環造型，因為喺FB限定嘅「鬼鬼概念版食物盒」Post，除咗寫住「勿嘥雞」，仲見到梳住心型瀏海嘅鬼鬼，食咗好多嚿炸雞先換到後面12個盒～

Channel絲嘗試唔睇原圖，睇吓認唔認得返12子個炸雞盒，發現鏡仔們啲髮型其實都幾唔同，所以挑戰都算成功，唔知大家又認唔認得晒呢？

#channelchk #麥炸雞 #麥當勞 #MIRROR #環保署 #鬼仔卡 #惜食 #鬼鬼概念版食物盒