海洋公園萬豪酒店盆菜「真空碎上」
網民：我以為自己訂咗一堆凍肉

原來新年要食一個正正常常嘅盆菜，都唔係一件易事。

繼之前永年士多嘅冰封盆菜後，有網民年初二（2日）係FB香港盆菜關注組出Post，話喺海洋公園萬豪酒店訂咗個$1688/4位嘅盆菜，點知呢個「盆菜」竟然係「真空碎上」，將丸、菜、雞之類嘅食材分開抽真空包裝，十足十平時啲冷凍餸包，嬲到佢話「第一次收到盤菜係一袋袋急凍食物，我以為自己係凍肉店訂左一堆凍肉」、「好多人屋企無廚房，新年訂左個咁既盤菜，成家企係到食西北風」。

呢位網民話，除咗呢啲一包包嘅食材，其實仲「包咗」一隻細細哋嘅盆，但根本裝唔晒啲食物，要自己開鑊煮。個Post引嚟其他關注組組員嘩然，有啲人話「買得就預咗」，但其實學位網民話齋，如果一開始講明係「真空碎上」，佢根本就唔會買。唔知呢個盆菜又無違反商品說明條例呢？

#channelchk #盆菜 #永年 #海洋公園萬豪酒店 #香港盆菜關注組