ከአፍሪካና በዓለም አቀፍ ደረጃ የተውጣጡ ወጣቶች፣ ዲፕሎማቶችና ፖሊሲ አውጪዎች የተሳተፉበት 6ኛው የአፍሪካ ወጣቶች የዲፕሎማሲ መድረክ በአዲስ አበባ መካሄድ ጀመረ።

“ከፖሊሲ ወደ ትግበራ ለቀጠናዊ ሰላምና መረጋጋት አፍሪካዊ መፍትሔዎችን በአፍሪካውያን መሪነት ማረጋገጥ” በሚል መሪ ሀሳብ የሚካሄደው ይህ ጉባኤ፣ ወጣቶች በአህጉሪቱ የሰላምና የልማት አጀንዳዎች ላይ ያላቸውን ተሳትፎ ማሳደግ ላይ ትኩረት እንደሚያደርግ ተገልጿል ።

የጉባኤው ዋና ዓላማ ወጣቶች በአህጉራዊ የሰላም ግንባታ፣ በኢኮኖሚ ውህደትና በፈጠራ ሥራዎች ላይ ያላቸውን ሚና ወደ ላቀ ተግባራዊ ደረጃ ማሸጋገር እንደሆነ ተመላክቷል።

በመድረኩ ላይ ንግግር ያደረጉት የሴቶችና ማህበራዊ ጉዳይ ሚኒስትር ኤርጎጌ ተስፋዬ ወጣቶች ለዛሬውም ሆነ ለነገው የአህጉሪቱ ብልጽግና የማይተኩ አጋሮች መሆናቸውን ገልጸዋል።

አክለውም አፍሪካ የ21ኛው ክፍለ ዘመን ተወዳዳሪ እንድትሆን የዲጂታል ፈጠራ፣ ሰው ሰራሽ አስተውሎትና አረንጓዴ ኢኮኖሚ ላይ ትኩረት ማድረግ እንደሚያስፈልግ አጽንኦት ሰጥተዋል።

አጀንዳ 2063ትም ይሁን ሌሎች የዘላቂ የልማት ግቦች የወጣቶች ጉልበትና ራዕይ ከሌለበት ስኬታማ ሊሆኑ አይችሉም ያሉት ሚኒስትሯ፣ ወጣቶች የቀደሙ ትውልዶችን ጥበብ በመጠቀም የምንመኛት አፍሪካን የመገንባት ታሪካዊ ኃላፊነት እንዳለባቸው አስገንዝበዋል።

ጉባኤው ከመጋቢት 16-20 ቀን 2018 ዓ.ም ድረስ ይዘልቃል።

ዘንድሮ በሐረሪ ክልል የሚከበረው የሹዋሊድ በአል "ሹዋሊድ ለሕብረብሄራዊ አንድነታችንና ለቱሪዝም እድገታችን" በሚል መሪ ሀሳብ መጋቢት 17ና 18 በታሪካዊቷ ሐረር ከተማ በድምቀት እንደሚከበር የክልሉ ባህል ቅርሰና ቱሪዝም ቢሮ አስታወቀ፡፡

የሹዋሊድ በዓል አከባበር በተባበሩት መንግስታት የትምህርት፣ የሳይንስ የባህል ድርጅት (ዩኔስኮ) የማይዳሰስ አለም አቀፍ ቅርስ ሆኖ የተመዘገበ ነው፡፡

እስራኤል የኢራን የባህር ኃይል አዛዥን ገደልኩ አለች፡፡

የእስራኤሉ መከላከያ ሚኒስትር እስራኤል ካትዝ፤ ዓሊረዛ ታንግሲሪ የሆርሙዝ ወሽመጥ መዘጋትን በበላይነት የሚመራ ሰው ነበር ብላለች፡፡

ዓሊረዛ የኢራን አብዮታዊ ዘብ የባህር ኃይል አዛዥ ሆነው የተሾሙት በ2018 ሲሆን ከ2010 ጀምሮ ምክትል አዛዥ ነበሩ፡፡

አልጃዚራ እንደዘገበው ኢራን ጦርነቱ ከተጀመረ ጊዜ አንስቶ በተከታታይ በርካታ ልምድ ያላቸው የጦር መሪዎች ተገድለውባታል የዓሊረዛ ግድያ ሌላው የኢራን ትልቅ ኪሳራ ነው ብሏል::

ኬንያ ለመጀመሪያ ጊዜ የኒውክሌር ጣቢያ ልትገነባ እንደሆነ ተገለፀ።


የኬንያው ፕሬዝዳንት ዊሊያም ሩቶ በናይሮቢ በተካሄደው አለም አቀፍ የኒውክሌር ኢነርጂ ኮንፈረንስ ላይ ኬንያ የመጀመሪያውን የኒውክሌር ሀይል ማመንጫ ጣቢያ እንደምትገነባ ገልፀዋል።

ሀገሪቱ የመጀመሪያውን የኒውክሌር ኃይል ማመንጫ ጣቢያ በሲያያ ካውንቲ በ2027 መገንባት ትጀምራለች።


ይህ 2,000 ሜጋ ዋት የማመንጨት አቅም የሚኖረው ግዙፍ ፕሮጀክት በ2034 ሥራ ይጀምራል ተብሎ የሚጠበቅ ሲሆን፣ የኬንያን የኤሌክትሪክ ኃይል አቅርቦት አሁን ካለበት 3,300 ሜጋ ዋት በሚቀጥሉት ጥቂት ዓመታት ውስጥ ወደ 10,000 ሜጋ ዋት ለማሳደግ ለተያዘው ስትራቴጂካዊ ዕቅድ መሳካት ወሳኝ ሚና ይጫወታል ተብሏል።