በክርስቶስ ( in christ)

ከቆላስይስ መልዕክት ጥናታችን ሁለት ቁጥሮችን አንስተን እንመልከት:-

“በእርሱ የመለኮት ሙላት ሁሉ በሰውነት ተገልጦ ይኖራልና። ለአለቅነትና ለሥልጣንም ሁሉ ራስ በሆነ በእርሱ ሆናችሁ ተሞልታችኋል።” (ቆላ. 2:9-10)

1. “በእርሱ (በክርስቶስ) የመለኮት ሙላት ሁሉ በሰውነት ተገልጦ ይኖራል” ይላል።

ሐዋርያው ጳውሎስ ስለ ክርስቶስ ማንነት በጥልቀት ካስተማረባቸው ክፍሎች አንዱ ይህ ክፍል ነው። የቤተልሄሙ ሕጻን የናዝሬቱ ኢየሱስ በኢየሩሳሌም በገሊላና በቅፍርናሆም አካባቢዎች በእግሩ እየተመላለሰ በመቅደስና በምኩራቦች ሁሉ ሲያገለግል የነበረ ሰው ማን መሆኑን በደንብ ያብራራበት ክፍል ነው። ክርስቶስ በሥጋው ሰውነት የተገለጠ መለኮት ነው የሚል ትምህርት ነው። ክርስቶስ the true embodiment of the invisible God መሆኑን “እርሱ የማይታይ አምላክ ምሳሌ” ነው በማለት ከላይ በሚገኙ ክፍሎች ሲናገር ነበር “እርሱም የማይታይ አምላክ ምሳሌ ነው። … በሰማይና በምድር ያሉት ሁሉ በእርሱ ተፈጥረዋልና ከፍጥረት ሁሉ በፊት በኵር ነው። ሁሉ በእርሱና ለእርሱ ተፈጥሮአል።” (1:15-16)። መንፈስ የሆነውን አምላክ በሰው ሰውነት የገለጠ አምላክ ነው ይለዋል ክርስቶስን።

ይህንን እግዚአብሔር በክርስቶስ ሆኖ ራሱን በሙላት ለሰው ልጆች የገለጠበትን መንፈሳዊ ምስጢር መረዳት ለክርስትና እምነታችን አምድና መሠረት ነው። In Christ we find the fullness of God - ክርስቶስ የተገለጠለት ሰው ሌላ መገለጥ አያስፈልገውም ምክንያቱም ሐዋርያው ጳውሎስ እንደሚለው “የተሰወረ የጥበብና የእውቀት መዝገብ ሁሉ በእርሱ (በክርስቶስ) ነውና።” (ቆላ. 2:3) የሰውን ልጅ ለማዳን ክርስቶስ ብቻውን በቂ አለመሆኑን ለማስረዳት ለሚጋጋጠው የዘመኑ ከንቱ ፍልስፍና የሐዋርያው ጳውሎስ መልስ “በእርሱ የመለኮት ሙላት ሁሉ በሰውነት ተገልጦአል” የሚል ነው። ክርስቶስ በሥጋ የመጣ እግዚአብሔር (አምላክ) መሆኑን ማወጁ ሐሰተኞች ለሚያራምዱት ከንቱ ፍልስፍና ራስ ምታት ነው። ክርስቶስ የሰውን ዘር ከጨለማ ሥልጣን ማዳኑ፥ የኃጢአትን ስርየት ማስገኘቱ ሁሉ በዚህ ማንነቱ ላይ የተመሠረተ ነው። ሰው ብቻ ቢሆን ሰውን ማዳን (መዋጀት) አይችልም ነበርና።

የርሱን አምላክነት አሳንሰው ሲያቀርቡ የነበሩ እነዚያ የሐሰት መምህራን የቆላስይስ አማኞች በክርስቶስ ብቻ እንዳይረኩ (እንዳያርፉ) ሊያደርጉ ተጨማሪ ነገሮችን በማቅረብ ሊያስቱ ይሞክሩ ነበር። ጳውሎስ ግን “ማንም በሚያባብል ቃል እንዳያስታችሁ ይህን እላለሁ።” በማለት ክርስቶስ በቂ ሊሆን የቻለበትን ሁኔታ ሲያቀርብ እርሱ ሰው ብቻ ሳይሆን አምላክን በሙላት የገለጠ ሰው ነው ይላቸዋል። አንዳንድ ጊዜ ጉዳት የሌለባቸው የሚመስሉ የሰው ወጎችና ልምምዶች (ትምህርቶችና ፍልስፍናዎች) የክርስትና እምነት ዋና የሆነውን ነገር ለመናድ ሲሞክሩ ይስተዋላሉ። ይህ ዓይነት ሁኔታ ሲከሰት እንደ ጳውሎስ ግንባርን ሳያጥፉ ፈርጠም ብለው በመውጣት ይህንን ልምምድና ፍልስፍና ወግድ ማለት የወንጌሉን እውነት ከፍ አድርጎ ማሰማት ተገቢ ይሆናል። ሐዋርያው ይህንን የክርስቶስን እውነት በከንቱ ፍልስፍና ላለማስደፈር ካሳየው ብርቱ ጥረት ብዙ የምንማረው ነገር አለ። እርሱ የመለኮት ሙላት ሁሉ በሰውነት ተገልጦ የሚኖርበት አምላክ መሆኑን ለመናገር አንዳች አላመነታም። ይህ ትምህርት ቸል መባል የሌለበት የክርስቲያን ዶክትሪኖች ሁሉ ቁንጮ ነው ባይ ነኝ።

2. “… በእርሱ ሆናችሁ ተሞልታችኋል” ይላል።

ሐዋርያው ጳውሎስ የክርስቶስን ማንነት በሚመለከት በሥጋው መለኮትን በሙላት ለሰው ልጆች የገለጠ መሆኑን በማንሳት አላቆመም አማኞቹም በርሱ ምሉዕ መሆናቸውን አስከትሎ ተናግሯል። የቆላስይስ አማኞች ጉድለት (ባዶነት) እንዳይሰማቸው ከዚህም የተነሳ በክርስቶስ ላይ ሌላ ነገር ለመጨመር ሲንከራተቱ እንዳይገኙ ክርስቶስ በቂያቸው መሆኑን ለማስረዳት ይህንን ብሏል። በርሱ መሆን መሞላት ነው። ክርስትና ልዩ ጣዕም ያለው የመርካ (የማረፍ) ሕይወት የሚሆነው በክርስቶስ በቂነት ማመንና መተማመን ሲቻል ብቻ ነው። አንዳንድ ክርስቲያኖች በአይሁድ በኩል ለሚመጣው ኃይማኖታዊ ወግና ሥርዓት እንዲሁም ደግሞ በግሪክ በኩል ለሚመጣው ጥበብና ምርምር፣ ሌሎችም ከሌላ አቅጣጫ ለሚያመጡት መንፈሳዊ መሳይ ምስጢራዊ ልምምድ ሁሉ ልባቸውን ሰጥተው እንዳይዋከቡ ሐዋርያው ጳውሎስ በክርስቶስ መሆን ማለት መሞላት ማለት ነው ይላቸዋል። ይህ የዘላለም እውነት ነው።

እነዚያ ሐሰተኞች በትምህርታቸው ክርስቶስ የተወሰነውን አንተ ደግሞ ቀሪውን ስትፈጽም ነው ድነትህ ፍጹም የሚሆነው የሚል ዓይነት ጎዶሎ ወንጌል ነበር የሚሰብኩት። ለመዳን ያንንና ይህንን ማድረግ መሆን ይኖርባችኋል ይሏቸው ነበር። ሐዋርያው ጳውሎስ ግን ምን ይላቸዋል? “you are complete in Christ” ነው የሚላቸው። ፍጽምና ምሉዕነት በሰው ሥራ የሚገኝ አይደለም። ማንም የማንንም ጉድለት ሊሞላ አይችልም። በቀራኒዮ ስለ ሰዎች ልጆች ብሎ በመስቀል ላይ የሞተው ክርስቶስ በሠራው ሥራ ስናምን ያን ጊዜ በክርስቶስ ጉድለታችን ይሞላል fullness and completeness ይሆንልናል። ይህ የዘላለም እውነት ነው። መርጋትም መረጋጋትም የሚመጣው በክርስቶስ በመሆን ብቻ ነው። ምንም ማንም ሊሞላ የማይችለውን የሰውን ልጆች ክፍተት የሚሞላው በሥጋው መለኮትን በሙላት ገልጦ የሚኖረው ክርስቶስ ብቻ ነው። እርሱ የበላይ (supreme) ነው እርሱ በቂ (sufficient) ነው።

አንዳንድ ጊዜ በክርስቶስ ስላለን ማንነት በደንብ የማንረዳው በቅድሚያ ስለ ክርስቶስ ያለን መረዳት የተዛባ ስለሚሆን ነው። ክርስቶስን በማንነቱ በሙላት ቃሉ እንደሚለው ስንረዳ በክርስቶስ ያገኘነው ማንነት ከቶ አይጠፋንም መቼም አይቀልብንም። ለዚህ ይመስለኛል ሐዋርያው ጳውሎስ ክርስቶስ የእግዚአብሔር ሙላት መሆኑን ከተናገረ በኋላ ወዲያው እናንተም በርሱ ተሞልታችኋል የሚለው። ክርስቲያኖች ስለራሳችን ያለን እይታ በእኛ በሚኖረው በክርስቶስ ማንነት ላይ ሳንመሠርት ስንቀርና (ስለራሳችን ያለን ግምት ዝቅ ሲል) ጉድለት ሲሰማን እረፍት የማይኖረን ያም ይህም እንደ ገለባ ተሸክሞ የሚወስደን ቀላሎች እንሆናለን። ለሐሰት ልምምዶችና ፍልስፍናዎች የተጋለጥን የሁሉንም ማታለያ የምናምን መዝነን አመዛዝነን ማየት ወደማንችልበት ደረጃ የወረድን እንሆናለን። “በእርሱ ሆናችሁ ተሞልታችኋል” የሚለው ለአማኝ ሁሉ የሚሠራ የክርስቲያን ማንነትና ትርጉም ነው። እርሱ ለአለቅነትና ለሥልጣንም ሁሉ ራስ ነው እኛም የተሞላነው በርሱ ነው።

Hallelujah….
የክርስትናን እምነት ልዩ የሚያደርገው ምንድነው? በክርስቶስ መሆናችንና ክርስቶስ በእኛ መሆኑ ነው።

ይህ እውነት ነው።

ክርስቶስ በኔ ሙሉ ነው።

ክርስቶስ በኔ ፍጹም ነው።

ጉድለት አይሰማኝም። ሌላ አልሻም።

አምኜዋለሁ ከቶ አልናወጥም።

workneh

349 viewsFilimon Nega, 05:32