🇮🇶🇺🇸🇮🇱Ироқдаги мухолиф кучлар АҚШ ва Исроил объектларига қарши жанговар амалиётларни икки ҳафтага тўхтатишини эълон қилди.

🔥 @burchakostida

🇮🇱🇺🇸🇮🇷🇱🇧Нетаняху АҚШ ва Эрон ўртасидаги сулҳ Ливандаги можарога тааллуқли эмаслигини маълум қилди – CBS News

Сешанба куни кечқурун Исроил Бош вазири Бинямин Нетаняху идораси баёнот берди. Унга кўра, Исроил АҚШ томонидан Эронга нисбатан эълон қилинган икки ҳафталик ўт очишни тўхтатиш режимини қўллаб-қувватласа-да, ушбу келишув Исроил армияси ва Ливанда жойлашган, Эрон томонидан қўллаб-қувватланувчи "Ҳизбуллоҳ" террорчилик гуруҳи ўртасидаги ҳарбий ҳаракатларни ўз ичига олмайди.

Нетаняху идораси баёнотида икки ҳафталик сулҳ "Ливанга тааллуқли эмаслиги" айтилган. Бу ҳолат Покистон Бош вазири Шаҳбоз Шарифнинг ўт очишни тўхтатиш режими Ливандаги жангларга ҳам тааллуқли бўлиши ҳақидаги аввалроқ берган баёнотига зид келади. Шундай бўлса-да, Нетаняху идораси Исроил ўт очишни тўхтатиш ҳақидаги умумий келишувни қўллаб-қувватлашини билдирган.

"Исроил президент Трампнинг Эронга зарбаларни икки ҳафтага тўхтатиш қарорини қўллаб-қувватлайди, бунинг шарти — Эроннинг бўғозни зудлик билан очиши ҳамда АҚШ, Исроил ва минтақа мамлакатларига қарши барча ҳужумларни тўхтатишидир", — дея маълум қилинади баёнотда.

Associated Press маълумотларига кўра, Ливан Соғлиқни сақлаш вазирлиги Исроил зарбалари оқибатида 1500 дан ортиқ киши ҳалок бўлганини хабар қилмоқда, дейилади телеканал хабарида.

🔥 @burchakostida

🇮🇷🇺🇸Bloomberg: Эроннинг Ҳўрмуз бўғозидаги назорати АҚШни қийин аҳволга солиб қўймоқда

Агентликнинг ёзишича, Эроннинг Ҳўрмуз бўғози устидан ўрнатган назорати Теҳронга катта таъсир кучини бермоқда, Вашингтон эса ҳозирча низони тезкор ҳал қилиш имкониятига эга эмас. Бўғознинг ёпилиши, айниқса, Осиё минтақасига қаттиқ зарба берди — кўплаб мамлакатларда ёқилғи тақчиллиги кузатиляпти, айрим давлатлар эса ҳатто тўрт кунлик иш ҳафтасига ўтган.

Вазият АҚШ иқтисодиётига ҳам таъсир қилмай қолмади: нефт нархи кўтарилиши фонида бензин нархи бир тахминан 3,8 литр учун 4 доллардан ошди ва ўсишда давом этмоқда.

Агентликнинг таъкидлашича, Эрон бўғоз орқали фақат маълум миқдордаги кемаларни ҳақ эвазига ўтказаётган бир пайтда, Вашингтонда бу муаммони ҳал қилиш учун осон ечим йўқ. Ҳатто Қўшма Штатларнинг иттифоқчиси ҳисобланган Япония ҳам Эрон ва АҚШ билан алоҳида келишиш режаларини эълон қилди.

Эксперт Вэйлун Суннинг фикрича, Вашингтон дипломатик ечим топишни қанчалик кечиктирса, бошқа давлатлар шунчалик кўп ўз мустақил йўлларини излашга мажбур бўлади. Бу эса на Трампнинг шиддатини, на нефт нархини тушира олади.

🔥 @burchakostida

🇺🇸🇮🇷🇨🇳AP: Вашингтон ва Теҳрон ўртасидаги икки ҳафталик сулҳда Пекин муҳим рол ўйнади

Associated Press агентлигининг хабар беришича, АҚШ ва Эрон ўртасидаги икки ҳафталик сулҳ келишувига эришилишида Хитойнинг саъй-ҳаракатлари муҳим омил бўлган. Эроннинг энг йирик савдо шериги ҳисобланган Пекин музокаралар давомида Теҳронни ўт очишни тўхтатиш йўлларини излашга "ундовчи" куч бўлиб хизмат қилган.

Нашрнинг исмини ошкор қилмаган икки нафар мулозимга таяниб ёзишича, Хитой дипломатик муваффақиятга эришиш учун Покистон, Туркия ва Миср каби воситачи давлатлар орқали ҳаракат қилган. Пекин томонидан яратилган ушбу шароитлар томонларнинг келишувга эришишига замин яратган, дейилади хабарда.

🔥 @burchakostida

🇭🇺🇺🇸Politico: Трамп Венгрия ва Орбанни қўллаб қувватлади

АҚШ вице-президенти Жей Ди Вэнс Будапештда Виктор Орбанни қўллаб-қувватлаш учун ўтказилаётган сайловолди митингида чиқиш қилаётган вақтда Доналд Трамп унга қўнғироқ қилди.

Вэнснинг сўзларига кўра, қўнғироқ давомида АҚШ президенти Венгрия ва Орбан тарафдорларини яхши кўришини айтган.

Шу тариқа АҚШ раҳбарияти Венгрия парламентига бўлиб ўтадиган сайловлар олдидан Орбанни қўллаб-қувватлашга ҳаракат қилди, дейилади хабарда.

🔥 @burchakostida

🇺🇸🇮🇷Доналд Трамп Яқин Шарқда "олтин давр" келаётганини эълон қилди

АҚШ Президенти Яқин Шарқдаги вазият бўйича баёнот бериб, минтақа учун янги давр бошланганини таъкидлади.

"Бу бутун дунё тинчлиги учун буюк кун! Эрон буни хоҳламоқда — уларнинг жонига тегди! Худди бошқалар каби. Қўшма Штатлар Ҳўрмуз бўғозидаги транспорт коллапсини ҳал қилишга ёрдам беради. Бизни кўплаб ижобий ўзгаришлар кутмоқда! Улкан бойликлар ишлаб топилади. Эрон қайта тикланишга кириша олади. Биз барча турдаги заҳираларни тўплашни бошлаймиз ва ҳаммаси жойида эканига ишонч ҳосил қилиш учун шу яқин атрофда бўламиз. Бу худди АҚШдаги каби, Яқин Шарқнинг "Олтин даври" бўлиши мумкин!", — деди Трамп.

Эслатиб ўтамиз, Эрон томони сулҳ эълон қилинганига қарамасдан, Ҳўрмуз бўғози устидан назоратни ўзида сақлаб қолишини аввалроқ билдирган эди.

🔥 @burchakostida

🇮🇷Теҳрон Ҳўрмуз бўғози устидан назоратни сақлаб қолишини маълум қилди

​Эрон Ташқи ишлар вазири Аббос Ароқчи икки ҳафталик сулҳ даврида Теҳрон Ҳўрмуз бўғози устидан назоратни ўзида сақлаб қолишига шаъма қилди.

​Унинг расмий баёнотига кўра, ушбу икки ҳафта давомида бўғоз орқали хавфсиз ўтиш фақатгина "Эрон қуролли кучлари билан биргаликда мувофиқлаштирилади ва техник чекловларни инобатга олган ҳолда" амалга оширилиши мумкин.

🔥 @burchakostida

🇺🇸🇮🇷Трамп Эрон билан келишувни АҚШнинг мутлақ ғалабаси деб атади – DW

АҚШ Президенти AFP агентлигига берган телефон орқали интервьюсида икки ҳафталик ўт очишни тўхтатиш ва Ҳўрмуз бўғозининг шу муддатга очилишини Вашингтон учун "тўлиқ ва мутлақ ғалаба" деб эълон қилди. Унинг сўзларига кўра, бу "шубҳасиз 100 фоизлик ғалабадир".

Эроннинг табиий бойликлари
ҳақидаги саволга Трамп: "Бу ҳақда энг яхши тарзда ғамхўрлик қилинади, акс ҳолда мен келишувга рози бўлмаган бўлардим", — деб жавоб берди у.

Шу билан бирга, Эрон давлат оммавий ахборот воситаларига кўра, Теҳроннинг 10 бандлик таклифи Ислом Республикасига уранни бойитиш ҳуқуқи берилишини назарда тутади.

Трамп, шунингдек, Хитой Эронга келишув тузиш учун босим ўтказганини айтди. Хитой Эрон нефтининг асосий харидори ҳисобланади. AFP'нинг эслатишича, Трамп май ойида Пекинга ташриф буюришни режалаштирган.

Доналд Трамп Эрон билан музокаралар 15 банд бўйича олиб борилаётганини ва уларнинг аксарияти аллақачон келишиб олинганини қўшимча қилди.

"Кўрамиз, энди нима бўлади. Бунга эриша оламизми ёки йўқми, вақт кўрсатади", — дея хулоса қилди Трамп.

🔥 @burchakostida

🇺🇸🇮🇷Пентагон раҳбари Пит Ҳегсет Трампга Эронга қарши операция ҳақида нотўғри маълумот бермоқда — WP

The Washington Post нашрининг ўз манбаларига таяниб хабар беришича, АҚШ Мудофаа вазири Пит Ҳегсет Трампга Эрондаги ҳарбий ҳаракатлари ҳақида нотўғри маълумотларни тақдим этяпти.

Манбаларнинг сўзларига кўра, АҚШ маъмуриятида вазирнинг ҳисоботлари "ҳаддан ташқари оптимистик" экани ва бу давлат раҳбари ҳамда аҳолини чалғитиши мумкинлигидан хавотирлар билдирилди.

🔥 @burchakostida

🇮🇷🇺🇸DW: Эрондаги сулҳ ҳақидаги хабарлардан сўнг нефт нархи кескин тушиб кетди

8 апрел тонгига келиб, Brent маркали нефтнинг муддатли битимлари нархи бир баррел учун 95 доллар атрофида фарқ қилди ва ўз қийматининг қарийб 13 фоизини йўқотди. Бир кун аввал баррел нархи тахминан 110 долларни ташкил этаётган эди. Жаҳон бозорларида хом нефт бир кеча-кундузда 14 фоизга арзонлашиб, бир баррели 96 доллардан сотилди.

Trading Economics платформаси маълумотларига кўра, Қўшма Штатларда иситиш ёқилғиси сифатида кенг тарқалган мазут нархи сутка давомида 17 фоизга, бензин эса қарийб 10 фоизга пастлаган.

Кеча оқшом Доналд Трамп кутилмаганда Эрон Ҳўрмуз бўғозида кемаларга ҳужум қилишни тўхтатса, АҚШ ҳам Эронга зарба беришни бас қилиш ниятида эканини айтганди.

Трампнинг сўзларига кўра, буни Вашингтон ва Теҳрон ўртасида воситачилик қилаётган Покистон илтимос қилган. Эрон "икки ҳафта давомида Ҳўрмуз бўғози орқали кемаларнинг хавфсиз ўтиши имконли бўлишини" тасдиқлади. Исроил ҳам сулҳни қўллаб-қувватлаган эди, дейилади хабарда.

🔥 @burchakostida

🇺🇸Билл Гейтс Эпштейн билан алоқалари бўйича АҚШ Конгрессида кўрсатма беради

Конгрессменлар 3 март куни Гейтсдан Эпштейн билан бўлган дўстлиги ҳақида гапириб беришни талаб қилганликларини тасдиқладилар. Бунгача комиссия олдида бир қанча бошқа таниқли шахслар, жумладан, Қўшма Штатларнинг собиқ президенти Билл Клинтон ва унинг рафиқаси, собиқ Давлат котиби Хиллари Клинтон чиқиш қилган эди.

Эпштейн жиноятлари қурбонлари Гейтсга қарши ҳеч қачон айблов қўймаган. Унинг исми АҚШ Адлия вазирлиги томонидан эълон қилинган "Эпштейн досьеси"даги миллионлаб ҳужжатларда кўп бор учрайди, бироқ бунинг ўзи ҳеч қандай ноқонуний ёки ноўрин ҳаракатлардан далолат бермайди.

Адлия вазирлиги Эпштейн иши бўйича уч миллионга яқин ҳужжатни очиқлади, яна бир неча миллион ҳужжат эса эълон қилинмаган ҳолда қолмоқда.

🔥 @burchakostida

🇮🇱🇵🇸🇪🇬ЖССТ Исроил ҳарбийлари билан боғлиқ ҳодисадан сўнг Ғазодаги эвакуация жараёнларини тўхтатди – BBC

​Жаҳон соғлиқни сақлаш ташкилоти (ЖССТ) душанба куни Исроил қўшинлари иштирокидаги ҳодиса оқибатида ташкилот ходимларига ҳамроҳлик қилувчи вакил ҳалок бўлганидан сўнг Ғазо секторидан Рафаҳ назорат-ўтказиш пункти орқали Мисрга тиббий эвакуация жараёнларини тўхтатди.

​ЖССТ раҳбари Тедрос Адханом Гебрейесус 54 ёшли Мажди Аслан "хавфсизлик билан боғлиқ ҳодиса" оқибатида ҳаётдан кўз юмганини маълум қилди.

Ғазо Соғлиқни сақлаш вазирлигининг билдиришича, Исроил кучлари ЖССТ томонидан ижарага олинган ва ташкилот вакили бошқариб кетаётган автомобилни нишонга олган. ​Исроил ҳарбийлари эса ўз навбатида, хавфсизлик ҳудуди яқинида "белгиланмаган ва хавф туғдирган" автомобиль аниқланганини даъво қилмоқда. Уларнинг сўзларига кўра, огоҳлантирувчи ўқлардан сўнг машина тўхтамай, тезликни оширган, ундан кейин ҳарбийлар ўт очган. Ҳозирда ҳодиса юзасидан текширув ишлари олиб борилмоқда.

​ЖССТнинг минтақавий директори Ҳанан Балхи эвакуация тўхтатилиши беморлар учун ўта муҳим бўлган ёрдам йўлини ёпиб қўйишидан огоҳлантирди. Тиббий эвакуация кейинги билдиришномагача тўхтатилган, дейилади хабарда.

🔥 @burchakostida

🇦🇪🇮🇷🇴🇲🇵🇰BBC: БАА урушда "ғалаба" қозонганини эълон қилди

Бирлашган Араб Амирликлари президенти маслаҳатчиси уруш бошидан бери давом этаётган мунтазам Эрон ҳужумларидан сўнг мамлакат "ғалаба қозонганини" маълум қилди.

"Биз суверенитет ва қадр-қимматимизни ҳимоя қилган, хоинлик билан қилинган тажовуз қаршисида ютуқларимизни асраб қолган миллий мудофаамиз туфайли ғалаба қозондик", — деди Анвар Гаргаш.

"Бугун биз минтақадаги мураккаб вазиятни бошқариш, каттароқ таъсир кучига, вазиятни чуқурроқ англашга ҳамда келажакка таъсир кўрсатиш ва уни шакллантириш учун мустаҳкамроқ имкониятларга эга бўлган ҳолда олдинга интилмоқдамиз", – дея қўшимча қилди Гаргаш.

Мамлакат Мудофаа вазирлиги уруш бошланганидан бери қайтарилган Эрон ҳужумлари ҳақида мунтазам равишда ҳисобот бериб келади. Сешанба куни эълон қилинган янгиланган маълумотларда қуйидаги рақамлар келтирилган: 2221 та дрон, 26 та қанотли ракета ва 520 та баллистик ракета, дейилади хабарда.

Маълумотларга кўра, Ўмон Ташқи ишлар вазири ҳам ўт очишни тўхтатиш қарорини олқишлади.

Покистон ТИВ ўзининг саъй-ҳаракатларини юқори баҳолади, бироқ доимий ўт очишни тўхтатишга эришиш учун "ҳаракатларни фаоллаштириш" муҳимлигини таъкидлади.

🔥 @burchakostida

🇧🇭🇮🇷Баҳрайн Эрон дрони ҳужуми оқибатида икки киши жароҳатланганини маълум қилди

Баҳрайн Ички ишлар вазирлиги Теҳрон дрони ҳужуми натижасида икки киши "енгил тан жароҳати" олганини хабар қилди.

Маълумотларга кўра, Ситра туманида дрон парчалари тушиши оқибатида "бир қатор уйларга" шикаст етган. Ҳукумат ушбу дрон АҚШ ва Эрон ўртасида икки ҳафталик сулҳ эълон қилинишидан олдин ёки кейин учирилганига аниқлик киритмади, дейилади баёнотда.

🔥 @burchakostida

🇮🇷🇫🇷Эрон уч йилдан бери ҳибсда ушлаб турилган франциялик жуфтликни озод қилди – BBC

Маълумотларга кўра, Теҳронда айғоқчиликда айбланиб, уч йилдан ортиқ қамоқда ўтирган франциялик эр-хотин — Сесиль Колер ва Жак Пари ниҳоят озодликка чиқди. Улар 2022 йилда Эронга саёҳатга борган вақтида қўлга олинган ва узоқ муддатли қамоқ жазосига ҳукм қилинган эди. Сешанба куни тонгда улар дипломатлар ҳамроҳлигида Теҳронни тарк этиб, Озарбайжон орқали Францияга йўл олишди.

​Бу озодлик ўзаро келишув асосида амалга ошгани айтилмоқда. Эрон томонининг билдиришича, франциялик жуфтлик озод қилиниши фонида Францияда террорни тарғиб қилишда айбланиб ҳибсга олинган Эрон фуқароси Махдие Исфандиёр ҳам қамоқ жазосидан озод этилгани маълум бўлди.

​Франция Президенти Эммануэл Макрон бу воқеани "катта енгиллик" деб атади ва музокараларда воситачилик қилган Ўмон давлатига алоҳида миннатдорчилик билдирди. Франция ҳукумати алмашинув шартларини расман очиқламаган бўлса-да, ҳар икки томондаги маҳбуслар бир вақтда озод этилди, дейилади мақолада.

🔥 @burchakostida

🇮🇶🇺🇸Ироқда ўғирлаб кетилган америкалик журналист Шелли Киттлсон озод қилинди

АҚШ Давлат котиби Марко Рубио бир ҳафта олдин Бағдодда ўғирлаб кетилган мустақил журналист Шелли Киттлсоннинг озод этилганини маълум қилди.

Эрон томонидан қўллаб-қувватланувчи "Ҳизбуллоҳ" гуруҳи 31 март куни асирга олинган журналистни Ироқни зудлик билан тарк этиш шарти билан қўйиб юборишга рози бўлди.

Рубио журналистни озод қилишда кўрсатган ёрдами учун Ироқ расмийларига миннатдорчилик билдирди ва Вашингтон маъмурияти ҳозирда унинг мамлакатдан хавфсиз чиқиб кетишини таъминлаш устида ишлаётганини таъкидлади.

49 ёшли Киттлсоннинг ўғирланиши минтақада АҚШ ва Исроилнинг Эрон билан тўқнашувлари кескинлашган бир пайтда юз берган эди. Журналист асирга олинган вақтда Ироқ хавфсизлик кучлари ўғриларни таъқиб қилган ва натижада гумонланувчилардан бири қўлга олинган.

🔥 @burchakostida

🇪🇸🇺🇸Дунёга ўт қўйиб, кейин челак билан келганларни олқишламаймиз – Испания Бош вазири

​Педро Санчес Яқин Шарқдаги сулҳ ҳақидаги хабарларга кескин муносабат билдириб, АҚШ Президенти Доналд Трампнинг Эрондаги ҳаракатларини танқид қилди. Вазирнинг таъкидлашича, мамлакат "дунёга ўт қўйиб, сўнгра қўлида челак билан пайдо бўлганларни" олқишлаш ниятида эмас.

​Испания ҳукумати раҳбари ўт очишни тўхтатиш ҳар доим яхши янгилик эканини, айниқса у адолатли ва барқарор тинчликка олиб келса, буни қўллаб-қувватлашини айтди. Бироқ у бу вақтинчалик енгиллик юзага келган тартибсизлик, вайронагарчиликлар ва бой берилган инсон ҳаётларини унутишга асос бўла олмаслигини таъкидлади.

Санчеснинг сўзларига кўра, ҳозирда вазиятни ўнглаш учун шунчаки вақтинчалик чоралар эмас, балки дипломатия, халқаро қонунийлик ва ҳақиқий тинчлик зарур.

🔥 @burchakostida

🇴🇲🇺🇸🇮🇷Ўмон ТИВ томонларни музокаралар столига қайтишга чақирди

Ўмон Ташқи ишлар вазири Бадр Албусаиди урушга қадар Эрон ва АҚШ ўртасидаги билвосита ядровий музокараларда воситачилик қилган эди. Унинг таъкидлашича, ўт очишни тўхтатиш келишуви ҳозирги босқичда дунёнинг фалокатдан чекинганини англатади.

Бироқ, Албусаиди хотиржамликка берилишга ҳали эрта эканлигини айтди. У ўзининг Х ижтимоий тармоғидаги саҳифасида барқарор тинчликка эришиш учун жиддий музокаралар зарурлигини ёзиб қолдирди.

Вазир, шунингдек, минтақада хавфсизликни таъминлаш йўлидаги ушбу муҳим ва кечиктириб бўлмайдиган жараёнда Ўмон бор имконияти билан кўмаклашишга тайёрлигини қўшимча қилди.

🔥 @burchakostida

🇮🇱🇱🇧🇮🇷The Guardian: Исроил ҳарбийлари Ливандаги "Ҳизбуллоҳга" қарши қуруқликдаги амалиётларни давом эттирмоқда

Газетанинг ёзишича, Исроил мудофаа армияси (ЦАХАЛ) Эрон томонидан қўллаб-қувватланувчи Ҳизбуллоҳ гуруҳига қарши Ливан ҳудудида жанговар ва қуруқликдаги амалиётлар давом этаётганини маълум қилди.

Исроил армиясининг ижтимоий тармоқларда тарқатилган баёнотига кўра, кечаси Эрон бўйлаб ракета учириш қурилмаларига кенг кўламли зарбалар берилган ва сулҳ эълон қилинганидан сўнг Эрон йўналишидаги фаол жанговар ҳаракатлар тўхтатилган. Бироқ "ЦАХАЛ" сиёсий кўрсатмаларга мувофиқ Эрон кампанияси доирасидаги ҳаракатларни тийиб турган бўлса-да, ҳар қандай қоидабузарликка жавоб бериш учун юқори шайлик ҳолатида қолмоқда.

Шу билан бирга, баёнотда
Ливан йўналишида "Ҳизбуллоҳга" қарши ҳарбий ҳаракатлар ва қуруқликдаги амалиётлар тўхтатилмагани алоҳида қайд этилган.

🔥 @burchakostida

🇮🇱🇱🇧Исроил армияси Байрут жанубидаги аҳолини уйларини тарк этишга чақирди

Исроил мудофаа армияси (ЦАХАЛ) Ливандаги "Ҳизбуллоҳ" гуруҳига қарши жанговар ва қуруқликдаги амалиётлар давом этишини эълон қилгач, Байрутнинг жанубий туманлари аҳолисига зудлик билан эвакуация қилиниш бўйича кўрсатма берди.

Эслатиб ўтамиз, бу АҚШ ва Эрон ўртасида икки ҳафталик сулҳ эълон қилинганидан бери Исроилнинг ливанликларга қилган учинчи шундай чақириғидир.

Эвакуация ҳақидаги буйруқ Ливан пойтахтининг катта қисмини қамраб олган бўлиб, у ерда юз минглаб одамлар доимий зарбалар хавфи туфайли уйларини ташлаб кетишга мажбур бўлишган.

Исроил армияси вакили Авичай Адраининг таъкидлашича, ҳарбийлар "Ҳизбуллоҳнинг" ҳарбий инфратузилмасига зарба беришда давом этади ва аҳоли хавфсизлигини таъминлаш мақсадида ҳудудни тарк этиши зарур.

Исроил ҳукумати Эрон билан эришилган сулҳ Ливан ҳудудига тааллуқли эмаслигини билдирган эди. "Ҳизбуллоҳ" эса ҳозирча ушбу вазият бўйича расмий баёнот бергани йўқ, дейилади хабарда.

🔥 @burchakostida

🇬🇧🇮🇷🇺🇸Ўт очишни тўхтатиш минтақа ва дунё учун енгиллик бўлади – Кир Стармер

​Буюк Британия Бош вазири Эрон ва АҚШ ўртасидаги ўт очишни тўхтатиш ҳақидаги келишувни олқишлаган дунё етакчилари сафига қўшилди. Ушбу келишув минтақа ва бутун дунё учун маълум маънода енгиллик олиб келишини таъкидлади.
​
"Биз ҳамкорларимиз билан биргаликда ушбу сулҳни қўллаб-қувватлаш ва сақлаб қолиш, уни узоқ муддатли келишувга айлантириш ҳамда Ҳўрмуз бўғозини қайта очиш учун қўлимиздан келган барча ишни қилишимиз керак", — деди Стармер.

​Бош вазир матбуот хизматининг хабар беришича, Стармер бугун Форс кўрфази мамлакатлари етакчилари билан учрашиш ва сулҳ режимини қўллаб-қувватлаш бўйича дипломатик саъй-ҳаракатларни муҳокама қилиш учун Яқин Шарққа йўл олади.

🔥 @burchakostida