🇮🇷FT: Европада Эроннинг "гибрид уруши" бошлангани белгилари кузатиляпти

​Европа шаҳарларидаги синагогалар, яҳудий хайрия ташкилотлари ва АҚШ банкларига уюштирилаётган ҳужумларнинг кўпайиши бунга далолат бериши мумкин.

Financial Times нашри Гаагадаги Халқаро терроризмга қарши кураш маркази (ICCT) эксперти Жулиан Ланчеснинг фикрларини келтирмоқда.

"​Буюк Британия, Белгия ва Франциядаги қатор жиноятлар учун жавобгарликни "Асҳоб ал-Ясмин" гуруҳи ўз зиммасига олди. Ушбу гуруҳ бир ойдан камроқ вақт аввал пайдо бўлган: 9 мартга қадар "Асҳоб ал-Ясмин" на интернетда ва на унинг ташқарисида бирон-бир из қолдирган", – деди Ланчес.
​
"Улар гўёки йўқ жойдан бирдан пайдо бўлган гуруҳ — бу ғайритабиий ҳолат", — дея таъкидлади Ланчес нашрга берган интервьюсида.

Унинг фикрича, "Асҳоб ал-Ясмин" Эрон разведкасининг лойиҳаси бўлиши мумкин. Бундан кўзланган мақсад — "Европа мамлакатларида тартибсизлик келтириб чиқариш ва жамиятни беқарорлаштиришдир".

Шу билан бирга, гуруҳ ҳужумларни амалга ошириш учун уларнинг асл мақсадидан бехабар бўлган учинчи шахслардан фойдаланаётган бўлиши эҳтимоли юқори, дейилади хабарда.

🔥 @burchakostida

ОПЕК+ мамлакатлари Яқин Шарқдаги уруш фонида май ойида нефт қазиб олишни кўпайтиришга келишиб олдилар

​Тегишли баёнот бирлашманинг саккиз иштирокчи давлати: Россия, Саудия Арабистони, Ироқ, БАА, Кувайт, Қозоғистон, Жазоир ва Ўмон иштирокидаги видеоконференция якунлари бўйича эълон қилинди.

Баёнотда айтилишича, нефт қазиб олишни кўпайтириш тўғрисидаги қарор "бозордаги барқарорликни таъминлаш" мақсадида қабул қилинган.

​ОПЕК+ нинг март ойида бўлиб ўтган аввалги йиғилишида бирлашма аъзолари лимитларни кунига 206 минг баррелга оширган эди.

Reuters агентлигининг қайд этишича, ОПЕК+ нинг бундай хатти-ҳаракатлари жаҳон бозори учун нефт ишлаб чиқаришни янада кенгайтиришга тайёрлик ҳақидаги сигнал бўлиши ҳамда Ҳўрмуз бўғозининг тўсиб қўйилиши фонида вазиятни барқарорлаштириши керак.

Умуман олганда, ОПЕК+ давлатлари 2025 йил октябр ойидан бошлаб нефт қазиб олишни босқичма-босқич ошириб бормоқда — унгача эса хомашё нархини юқори даражада сақлаб қолиш мақсадида чекловлар жорий этилган эди.
​
🔥 @burchakostida

🇨🇳🇷🇺Пекин Москвага Россия фуқаролари учун визасиз тартиб муддатини бир йилга узайтиришга тайёрлигини маълум қилди

Бу ҳақда Россия Ташқи ишлар вазирлигига таяниб "Известия" нашри хабар бермоқда.

🔥 @burchakostida

🇷🇺Россия Болтиқ портлари орқали дизель экспортини оширди

Москва март ойида Болтиқбўйи портлари орқали дизель ёқилғиси экспортини феврал ойига нисбатан 22 фоизга, 2025 йилнинг март ойига нисбатан эса 34 фоизга ошириб, 1,78 млн тоннага етказди.

Бу ҳақда "РБК" нашри танишган Нарх индекслари маркази (ЦИИ) шарҳида келтирилган.

Экспортнинг асосий қисми — тахминан 1,16 млн тоннаси — авариялардан камроқ зарар кўрган Приморск порти орқали жўнатилган. Усть-Луга порти орқали эса 400 минг тонна ёнилғи экспорт қилинган бўлиб, бу ўтган ойга нисбатан 80 фоизга, йиллик ҳисобда эса 100 фоизга кўп демакдир, дейилади хабарда.

🔥 @burchakostida

🇺🇸Марко Рубио позициясининг ўзгариши Европада "мотам кайфиятини" келтириб чиқарди — The Economist

АҚШ Давлат котибининг NATO'га нисбатан қарашлари ўзгариши Европа пойтахтларида хавотир ва "мотам кайфиятини" уйғотди.

Бу ҳақда The Economist нашри хабар бермоқда.

Мақолада ёзилишича, 2023 йилда Рубио сенатор сифатида Қўшма Штатларнинг NATO'дан бир томонлама чиқиб кетишига йўл қўймаслик тўғрисидаги икки партиявий қонун ҳаммуаллифи бўлган эди. Ушбу қонунга кўра, АҚШ президенти Сенат розилигисиз мамлакатни Шимолий Атлантика альянсидан чиқара олмайди ёки ундаги иштирокини тўхтата олмайди.

Аввалроқ президент Доналд Трамп атрофидаги "энг мулоҳазали сиёсатчи" сифатида кўрилган ва NATO билан алоқаларни барқарорлаштиришга ҳамда АҚШнинг Украинадан воз кечишига йўл қўймасликка интилган Рубио, эндиликда ўз позициясини ўзгартирган кўринади, дейилади мақолада.

🔥 @burchakostida

🇺🇸🇮🇷АҚШ ва Эрон 45 кунлик сулҳ тузиш имкониятларини муҳокама қилмоқда — Axios

Вашингтон ва Теҳрон минтақавий воситачилар гуруҳи билан биргаликда урушнинг тугашига олиб келиши мумкин бўлган 45 кунлик эҳтимолий ҳужум шартларини муҳокама қиляпти.

Бу ҳақда нашр АҚШ, Исроил ва яна бир қанча давлатлардаги тўртта манбага таяниб хабар бермоқда.

Нашр суҳбатдошларининг сўзларига кўра, қисман келишувга эришиш имконияти паст, бироқ бу урушнинг кескин авж олишини олдини олиш учун "сўнгги уриниш" ҳисобланади.

Шунингдек, икки манбанинг маълумот беришича, Қўшма Штатлар ва Исроил Эроннинг энергетика объектларига ҳужум қилиш бўйича кампания режасини тайёрлаб қўйган. Трамп Ислом Республикасига келишувга эришиш учун сўнгги имкониятни бериш мақсадида ултиматум муддатини узайтирган, дейилади мақолада.

🔥 @burchakostida

Bloomberg: Saudi Aramco Осиё мамлакатлари учун май ойидаги нефт нархларини рекорд даражага кўтарди

Saudi Aramco нефт компанияси Осиё учун май ойидаги нефт нархларини минтақавий базавий даражадан 19,5 долларга юқори қилиб белгилади. Бу рекорд кўрсаткич ҳисобланади.

Бу ҳақда агентлик ўз манбасига таяниб хабар бермоқда.

🔥 @burchakostida

🇮🇷Ислом инқилоби қўриқчилари корпуси разведка раҳбари Мажид Хадеми Эрондаги ҳарбий ҳаракатлар чоғида ҳалок бўлди

Бу ҳақда Ислом инқилоби қўриқчилари корпусининг (ИИҚК) матбуот хизмати ўз баёнотида маълум қилди.

Генерал Хадеми разведка раҳбари этиб тайинлангани 2025 йил июн ойида эълон қилинганди. Ундан олдинги раҳбар — Муҳаммад Козимий Исроил зарбалари натижасида ҳалок бўлган эди.

🔥 @burchakostida

🇮🇷🇺🇸Эрон АҚШ билан вақтинчалик ўт очишни тўхтатиш эвазига Ҳўрмуз бўғозини очиш ниятида эмас – Reuters

Бу ҳақда Эроннинг юқори мартабали мулозими агентликга маълум қилди.

Мулозимнинг сўзларига кўра,Теҳрон америкаликлар томонидан таклифни кўриб чиқиш учун белгиланган ҳеч қандай муддатларни қабул қилмайди. Шунга қарамай, музокаралар давом этмоқда.

Покистон армияси бошлиғи фельдмаршал Осим Мунир "тун бўйи" Вэнс, Уиткофф ва Эрон ташқи ишлар вазири Аббос Ароқчи билан мулоқотда бўлиб турган, дейилади хабарда.

🔥 @burchakostida

🇪🇺🇮🇷FT: Евроиттифоқ Эрондаги уруш фонида молиявий инқироз хавфидан огоҳлантирди

ЕИ миллий ҳукуматларни Эрондаги низо туфайли юзага келган энергетика муаммолари иқтисодий инқирозга айланиб кетиши мумкинлигидан огоҳлантирди.

Бу ҳақда Financial Times нашри хабар бермоқда.

Газета манбаларига кўра, Еврокомиссия субсидиялар бериш, солиқларни камайтириш ва нархларнинг юқори чегарасини белгилаш каби чораларни чеклашга чақирмоқда. Брюссел 2022 йилдаги ҳолат такрорланишидан хавотирда, чунки ўшанда бу жиловлаб бўлмас инфляция ва бюджет тақчиллигига олиб келган эди.

ЕИ ва миллий молия вазирликлари ўртасидаги музокараларда энергия ресурслари нархи ошишини юмшатишга қаратилган ҳар қандай қадамлар бўйича "мувофиқлашув ва эҳтиёткорлик" зарурлиги таъкидланди.

🔥 @burchakostida

🇰🇵🇮🇷🇺🇸🇰🇷Шимолий Корея Эрон масаласида эҳтиёткорлик қилмоқда

Бу ҳақда CBS News телеканали Жанубий Корея разведкаси маълумотларига таяниб хабар берди.

Жанубий Корея Миллий разведка хизмати маълумотларига кўра, Шимолий Корея Эрон билан муносабатларда ўзини "суғурталаётган" бўлиши мумкин. Ҳозирча Пхеньян Эронга уруш учун зарур бўлган қурол-яроғ ёки бошқа қуроллар етказиб бераётгани ҳақида ҳеч қандай маълумотлар йўқ.

Разведка вакилларининг душанба куни бўлиб ўтган ёпиқ брифингда маълум қилишича, Пхеньян Трамп маъмурияти билан келажакдаги мулоқот имкониятини сақлаб қолиш мақсадида эҳтиёткор позицияни эгаллаяпти.

Шимолий Корея Ташқи ишлар вазирлиги АҚШ ва Исроилнинг Эронга ҳужумларини ноқонуний деб атаган бўлса-да, разведка хизмати Пхеньян Эроннинг олий раҳнамоси оятуллоҳ Али Хоминаийнинг вафоти муносабати билан расмий таъзия билдирмаганини қайд этди.

Сўнгги йилларда Ким Чен Ин "янги совуқ уруш" ғоясини қўллаб-қувватлаб, Қўшма Штатларга қарши давлатлар билан ҳамкорликни кенгайтиришга интилганди, жумладан, 2024 йил апрел ойида Эронга иқтисодий делегация юборган эди, дейилади хабарда.

🔥 @burchakostida

🇺🇸🇮🇷АҚШ ва Эрон ҳарбий ҳаракатларни тўхтатиш режасини қабул қилиб олди

Ушбу ҳужжат бўйича бугуннинг ўзидаёқ келишилиши мумкин ва у Ҳўрмуз бўғозини очишни ўз ичига олади, деб хабар бермоқда агентлик музокаралардан хабардор манбага таяниб.

Манбанинг сўзларига кўра, келишув лойиҳаси Покистон томонидан тайёрланган ва 6 апрелга ўтар кечаси томонларга топширилган. Ҳужжат икки босқичли ёндашувни кўзда тутади: зудлик билан ўт очишни тўхтатиш ва кейинчалик кенг кўламли битим тузиш. Дастлабки келишувларни Покистон воситачилигида электрон шаклдаги меморандум кўринишида расмийлаштириш режалаштирилган.

Таклифга биноан, сулҳ зудлик билан кучга кириши керак, бу эса Ҳўрмуз бўғозини очиш имконини беради. Шундан сўнг, агентлик маълумотига кўра, томонларга янада кенгроқ келишувни мувофиқлаштириш учун 15–20 кун вақт берилади.

Шу билан бирга, якуний келишув Теҳроннинг ядровий қурол ишлаб чиқишдан воз кечиш мажбуриятини ҳамда бунинг эвазига санкциялар юмшатилиши ва активлар музлаткичдан чиқарилишини ўз ичига олиши мумкин. Юзма-юз ўтказиладиган якуний музокаралар Исломободда бўлиб ўтиши кутиляпти, келишувнинг ўзи эса норасмий равишда "Исломобод пакти" деб аталмоқда.

🔥 @burchakostida

🇺🇸Мичиган штатидаги сайловлар: Яқин Шарқ низоси Демократлар партиясини иккига бўлиб қўйди — The Guardian

Мичиган штатида Сенат учун кечаётган сайловолди курашлар Яқин Шарқдаги уруш ва Исроилга бўлган муносабат сабабли Демократлар партиясини иккига бўлиб қўйди.

Газетанинг ёзишича, прогрессив номзод Абдул Ал-Сайид ва Исроилпараст лобби томонидан қўллаб-қувватланаётган Мэллори Макморроу ўртасидаги рақобат кескин тус олди. Зиддиятнинг асосий сабаби — Ал-Сайиднинг 3 миллионлик аудиторияга эга машҳур стример Ҳасан Пайкер билан қўшма митинг ўтказиш режаси бўлди. Ҳукмрон доиралар ва марказчи демократлар Пайкерни антисемитизмда айблаб, Ал-Сайидни у билан алоқаси борлиги учун кескин қораламоқда.

Штатдаги араб ва мусулмон жамоаси етакчилари эса бу айбловларни Исроил сиёсатига нисбатан танқидларни бўғишга уриниш деб баҳолаяпти.

Уларнинг фикрича, партия раҳбарияти Камала Харриснинг 2024 йилги мағлубиятига сабаб бўлган хатоларни такрорлади. Ўшанда Исроилни қўллаб-қувватлаш Мичигандаги араб сайловчиларининг овозини йўқотишга олиб келган эди. Демократик партия ичидаги бу ички инқироз 2028 йилги сайловлар олдидан партиянинг штатдаги мавқеига жиддий хавф туғдириши мумкин, дейилади мақолада.

🔥 @burchakostida

🇹🇼🇨🇳Reuters: Тайван мухолифати етакчиси Пекиннинг "қайта бирлашиш" ҳаракатлари фонида Хитойга ташриф буюради

Агентлик маълумотларига кўра, Тайваннинг энг йирик мухолифат партияси — Гоминдан (Хитой Миллий партияси) раиси Чэн Ли-вун сешанба куни Хитойга ташриф буюради. 7-12 апрел кунларига режалаштирилган ушбу "тинчлик миссияси" доирасида унинг Хитой раиси Си Жинпин билан музокаралар ўтказиши кутиляпти. Ташриф Пекин томонидан оролни "қайта бирлаштириш" бўйича тарғибот ва ҳарбий босим кучайган бир пайтда амалга оширилмоқда.

Айни вақтда Тайван парламентида устунликка эга бўлган мухолифат ҳукуматнинг мудофаа харажатлари учун қўшимча 40 миллиард доллар ажратиш режасини тўсиб қўйган.

Ҳукмрон Демократик прогрессив партия Гоминданни "Хитойнинг Тайван мудофаасини заифлаштириш режасига шерик бўлишда" айбламоқда. Ўз навбатида, Хитой Миллий партияси вакиллари тинчлик орол фаровонлигининг ягона асоси эканини таъкидлашди. Бу Гоминдан етакчисининг охирги ўн йилликдаги Хитойга илк ташрифи бўлади.

"Ҳозирча "қайта бирлашиш" ҳақида гапиришга эрта ва асосий эътибор Тайван бўғозида барқарор муносабатларни ўрнатишга қаратилиши лозим", – дейди Чэн Ли-вун.

🔥 @burchakostida

🇺🇦🇷🇺Украина дронлари Новороссийскда "Адмирал Григорович" фрегатига ҳужум қилди — мамлакат Қуролли Кучлари

Бугун тунда Украина дронлари Новороссийск портида Россиянинг "Калибр" қанотли ракеталари ташувчиси бўлган "Адмирал Григорович" фрегатини нишонга олди.

Бу ҳақда Украина Қуролли Кучларининг дрон тизимлар кучлари қўмондони Мадьяр маълум қилди.

Қўмондон эълон қилган видеода дроннинг кемага яқинлашаётгани акс этган, бироқ бевосита зарба вақти кўринмаган. Шунингдек, кадрларда "Сиваш" сузувчи платформасига берилган зарбалар ҳам акс этган. Ҳозирча Россия томони ушбу ҳужум ва кеманинг ҳолати бўйича расмий маълумот бермади, дейилади хабарда.

🔥 @burchakostida