🫂ሰው ሁን ከሰውም ሰው🫂

አምስቱ ፍቅር-መሳይ ስሜት የሚሰጡን ሁኔታዎች

የትክክለኛ ፍቅርን ስሜትና እውነታዎች በሚገባ ያልተገነዘቡ ሰዎች በውስጣቸው ካላቸው ፍቅርን የማግኘት ጥማት የተነሳ የመጀመሪያውን ፍቅር መሳይ ስሜት ጊዜ ወስደው ሳያጣሩ በመከተል የኋላ ኋላ የሚጸጸቱበት ግንኙነት ውስጥ ራሳቸውን ያገኙታል፡፡ ከዚህ አይነቱ ስህተት ለመጠበቅ የሚከተሉትን ነጥቦች እናስተውላቸው፡፡

1. በብቸኝነት ጊዜ የምናገኘው ሰው

ብቸኝነት በሚሰማን ጊዜና የብቸኝነቱ ስሜት ከርሞብንና ገዝግዞን ከዚህ ስሜት በቅርቡ የምንወጣበት ጭላንጭል አልታይ ሲለን የቀረበንና ትኩረት የሰጠን ሰው የሚሰጠን ስሜት ይህ ነው አይባልም፡፡ በዚህ ሁኔታ ውስጥ ሆነን ለመጀመሪያ ጊዜ ትኩረት ስናገኝ የሚሰማን ስሜትና ከአንድ ሰው ጋር ፍቅር ሲይዘን የሚሰማንን ስሜት ሊመስል ይችላል፡፡ ይህ ከብቸኝነት ስሜት ያወጣን ግንኙነት የሰጠን ስሜት ከትክክለኛው የፍቅር ስሜት ጋር ከመመሳሰሉ የተነሳ እውነቱ የሚገባን ከብቸኝነት ስሜትና ስሜቱም አምጥቶብን ከነበረው ተጽእኖ ከወጣን በኋላ ነው፡፡ ከዙሪችን ሰው ጠፍቶ ምንም አይነት የጓደኝነት ምርጫ ባልነበረን ጊዜ የነበረን ስሜት አልፎ አሁን በሰዎች ስንከበብ ከዚህ በብቸኝነት ጊዜ ብቸኛ ትኩረት ከሰጠን ሰው ጋር የነበረን ስሜት እውነትም የፍቅር ይሁን አይሁን እየታየን ይመጣል፡፡

2. ከአንድ ሰው ጋር የሚፈጠር የመላመድ ስሜት

ቀደም ሲል እንደጠቀሰንው በአንዳንድ ሰዎች አመለካከት ትክክለኛ ፍቅር የሚመነጨው ከአንድ ሰው ጋር ብዙ ስናሳልፍና ስንላመድ ነው፡፡ ከአንድ ሰው ጋር ስንላመድ የምናገኘው ስሜት ትክክለኛ የፍቅር አጋር ስናገኝ ከሚሰማን ስሜት ጋር ሊመሳሰል ስለሚችል ሁኔታውን በሚገባ ማጤን አስፈላጊ ነው፡፡ እዚህ ላይ ከዚህ በፊት አንዳንድ ሰዎች ከመላመዳቸው የተነሳ ወደተዋጣለትና ወደዘለቀ የፍቅር ግንኙነት ውስጥ እንደገቡ ምንም ጥርጥር ባይኖረውም፣ ከአንድን ሰው ከመላመዳቸው የተነሳ የመጣውን ጊዜያዊ ስሜት ብቻ ተንተርሰው እስከወዲያኛው የሚዘልቅ ግኙነት ውስጥ ለመግባት የሞከሩና ምክንያቱ ግር እስኪላቸው ድረስ የተበላሸባቸው ሰዎች ቁጥር ከዚያ ይልቃል፡፡

3. አንድን ሰው ስናደንቀው የሚመጣ ስሜት

አንድ ሰው በእውቀቱ፣ በአርት ተሰጥኦው፣ በማሕበራዊ ተጽእኖው፣ በዝነኛነቱና በመሳሰሉት ሁኔታዎች ምክንያት ስናደንቀው ፍቅር መሳይ ስሜት ሊሰጠን እንደሚችል ምንም ጥርጥር የለውም፡፡ በተዘረዘሩት መስኮች አካባቢ ዝነኛ ከሆኑ ሰዎች አካባቢ የሚያንዣብቡ ሰዎችን ስንመለከት ዚህ ስሜት ሰለባዎች እንደሆኑ ግልጽ ነው፡፡ አንድ ሰው በአንድ ሁኔታው ስላደነቅነው ብቻ የቀረውን ዘመናችንን ከእርሱ ጋር ለማሳለፍ ስንወስን በእርግጥም የወደድነው እርሱን ሳይሆን ለመደነቅ ያበቃውን ነገር እንደሆነ መገመት አያስቸግርም፡፡

4. የአንድ ሰው መልክና ቁመና ሲስበን የሚመጣ ስሜት

ስለመመጣጠን በምናወራበት ክፍላችን ውስጥ “አካላዊ መመጣጠን” በሚለው ሃሳብ ስር በሚገባ እንደምንመለከተው፣ የአንድን ሰው መልክና ቁመና ሳንቀበለውና በዚያ ሳንሳብ ወደግንኙነት መግባት አስቸጋሪ ነው፡፡ ነገር ግን በአንድ ሰው የውጭ አካል ሁኔታ፣ አንዲሁም መልክና ቁመና ስንሳብ ፍቅር የያዘን ሊመስለን ይችላል፡፡ ሆኖም፣ አንድ ሰው መልኩና ቁመናው ቀልብን የሚስብ ስለሆነ ፍቅር ሲይዘን ሊሰጠን የሚችለውን ስሜት ስለሰጠን ብቻ ወደዚያ መቸኮል በኋላ የምንጸጸትበትን ውሳኔ እንድንወስን አሳልፎ ሊሰጠን ይችላል፡፡

5. ለአንድ ሰው ስንራራለት የሚመጣ ስሜት

ለአንድ ሰው በጣም ስንራራለትና ካለልክ ስናዝንለት ፍቅር የያዘን የሚመስልን ስሜት ሊሰጠን ይችላል፡፡ ይህ ስህተት በብዙ ሰዎች የሚሰራ ስህተት ነው፡፡ የሚያዝኑለት ሰው በተለያዩ ችግሮች በሚያልፍበት ጊዜ ለዚያ ሁኔታ ምላሽ ሲሰጡና የስሜትና የቁሳቁስ ጉድለቱን ሲያሟሉለት የሚሰማቸውን ስሜት ከፍቅር ስሜት ጋር ይደባለቅባቸዋል፡፡ ይህ የሚንበት ዋነኛው ምክንያት አንዱ ለአንዱ የመራራትና የመደጋገፍ ሁኔታ ስሜት ትስስርንና መፈላለግን ስለመያነሳሳ ነው፡፡

ከአንድ ሰው ጋር መቀራረብ ስንጀምር ገና ለገና ከእነዚህ ሁኔታዎች አንዱ ሆኖብኝ ይሆናል በሚል ፍርሃት እንድንጨናነቅ ሳይሆን ማንኛውንም የተቃራኒ ጾታ መሳሳብ በሕይወታችን ሲከሰት በተረጋጋ መንፈስ ሆነን እንድናጤነው ለማድረግ ልንጠቀምባቸው ይገባል፡፡

(“የፍቅር ሕይወት” ከተሰኘው የዶ/ር ኢዮብ መጽሐፍ የተወሰደ)፡፡

✍ታዚ

756 views06:22