လက်နက်ကိုင်ပဋိပက္ခချုပ်ငြိမ်းဖို့ ချင်းတိုင်းရင်းသားတွေအပါ ပြည်သူအကုန် ၎င်းတို့အစိုးရနဲ့ပူးပေါင်းရန် မင်းအောင်လှိုင်ပြော

🟥ချင်းပြည်နယ်အပါ နိုင်ငံအတွင်းအဖျက်လုပ်ငန်းများရှိနေပြီး နိုင်ငံတော်အတွက် အလွန်အန္တရာယ်ကြီးမားလို့လည်းဆို

BBM-ဖေဖော်ဝါရီ၂၀
သတင်း-မင်းသော်

လက်နက်ကိုင်ပဋိပက္ခချုပ်ငြိမ်းဖို့ ချင်းတိုင်းရင်းသားတွေသာမက အခြားတိုင်းရင်းသား ပြည်သူတွေအကုန်၎င်းတို့အစိုးရနဲ့ပူးပေါင်းရန်နဲ့ချင်းပြည်နယ်အပါ နိုင်ငံအတွင်းအဖျက်လုပ်ငန်းများ များစွာရှိနေတာကြောင့် နိုင်ငံတော်အတွက် အလွန်အန္တရာယ်ကြီးမားနေတယ်လို့ စစ်ခေါင်းဆောင်မင်းအောင်လှိုင်က ဆိုပါတယ်။

ဒီနေ့ကျရောက်တဲ့ ၇၈ နှစ်မြောက် ချင်းအမျိုးသားနေ့ အခမ်းအနားအတွက် သဝဏ်လွှာပေးပို့ရာမှာ အထက်ပါအတိုင်း စစ်ခေါင်းဆောင် မင်းအောင်လှိုင်က ပြောထားပါတယ်။

နိုင်ငံတော်တည်ငြိမ်အေးချမ်းမှု၊ တရားဥပဒေစိုးမိုးမှုတွေဟာ နိုင်ငံဖွံ့ဖြိုးတိုးတက်မှုနဲ့ နိုင်ငံတည်ဆောက်ရေးတွေအတွက် အရေးပါတာကြောင့် လက်နက်ကိုင်ပဋိပက္ခချုပ်ငြိမ်းရေးကို ချင်းတိုင်းရင်းသားတွေအပါ အခြားတိုင်းရင်းသားပြည်သူအားလုံးက နိုင်ငံတော်အစိုးရနဲ့အတူ လက်တွဲကြိုးပမ်းဖော်ဆောင်ကြရန် အလေးအနက်ထား တိုက်တွန်းတယ်လို့ အဆိုပါသဝဏ်လွှာအတွင်းပါရှိပါတယ်။

ဒါတင်မက အခုချိန်မှာ ချင်းပြည်နယ်ရဲ့ နေရာဒေသအချို့အပါ နိုင်ငံအတွင်း ဆူပူအကြမ်းဖက်မှုတွေ၊ တရားဥပဒေကို ဖောက်ဖျက်ကျူးလွန်မှုတွေ၊ နိုင်ငံကို ပြိုကွဲပျက်စီးစေမဲ့ အဖျက်လုပ်ရပ်များစွာရှိနေပြီး နိုင်ငံတော်အတွက် အလွန်အန္တရာယ်ကြီးမားလှတာကြောင့် ပြည်ထောင်စုဖွား တိုင်းရင်းသားညီအစ်ကိုမောင်နှမများအကြား နှစ်ပေါင်းထောင်ချီနေတဲ့ သံယောဇဉ်နဲ့ ချစ်ကြည်ရင်းနှီးမှုတွေကို ဖြိုခွဲဖျက်ဆီးနေတဲ့ ပြည်တွင်းပြည်ပအဖျက်အင်အားစုတွေရဲ့ သွေးခွဲရန်တိုက်ပေးမှု၊ ကျဉ်းမြောင်းတဲ့ လူမျိုးရေးအယူဝါဒ သွတ်သွင်းနေမှုတွေကို အထူးသတိပြုကာကွယ်ကြရန်လိုအပ်တယ်လို့လည်း ၎င်းကဆိုပါတယ်။

ဒါ့အပြင် ချင်းတိုင်းရင်းသားတွေအနေနဲ့ သမိုင်းစဉ်ဆက် ရှိရင်းစွဲဖြစ်တဲ့ ပြည်ထောင်စုစိတ်ဓာတ်၊ မျိုးချစ်စိတ်ဓာတ်ကို အရင်းတည်ပြီး ချင်းပြည် နယ်အကျိုး၊ ပြည်ထောင်စုအကျိုးကို ဆက်လက် ထမ်းဆောင်နိုင်ကြစေကြောင်းလည်း ဆုမွန်ကောင်းတောင်းတယ်လို့ မင်းအောင်လှိုင်က ပြောဆိုထားပါတယ်။

Photo-စစ်ခေါင်းဆောင်မင်းအောင်လှိုင်
https://www.facebook.com/share/p/187eggdKCm/

လေကြောင်းတိုက်ခိုက်မှုအကြိမ်ကြိမ်ပြုလုပ်တဲ့ကြားမှ သရက်ခရိုင် အမှတ်(၄)တပ်ရင်းရဲ့ စစ်သင်တန်းပြီးဆုံး

BBM-ဖေဖော်ဝါရီ ၂၀
သတင်း-မင်းသော်

စစ်ကောင်စီမှ လေကြောင်းတိုက်ခိုက်မှုတွေ၊ လေကြောင်းဗုံးကြဲမှုတွေ အကြိမ်ကြိမ်ပြုလုပ်ရုံသာမက မြေပြင်က စစ်ကြောင်းထိုးတာတွေပြုလုပ်ခဲ့တဲ့ကြားမှ သရက်ခရိုင် အမှတ်(၄) တပ်ရင်းရဲ့ စစ်သင်တန်းပြီးဆုံးအောင်သင်ကြားနိုင်ခဲ့တဲ့အပြင် သင်တန်းဆင်းပွဲလည်း ပြုလုပ်
နိုင်ခဲ့တယ်လို့ အဆိုပါတပ်ရင်းရဲ့ထုတ်ပြန်ချက်
အရ သိရပါတယ်။

စစ်ကောင်စီအနေနဲ့ လေကြောင်းမှ ဂျက်ဖိုက်တာနဲ့ ၁၂ ကြိမ်၊ Y12 နဲ့ ဗုံးသီးအလုံး ၂၀ ခန့်ထိ ကြဲချတိုက်ခိုက်ခဲ့ရုံသာမက မြေပြင်မှလည်း စစ်ကြောင်းထိုးဝင်ရောက်ခဲ့တာတွေ ပြုလုပ်ခဲ့ပေမဲ့ အခြေခံစစ်ပညာသင်တန်း အပတ်စဥ် (၁၂)ရဲ့ လေ့ကျင့်ရေးတွေကို ပြီးဆုံးအောင် သင်ကြားနိုင်ခဲ့တယ်လို့ သိရပါတယ်။

ဒါ့အပြင် ပြီးခဲ့တဲ့ဖေဖော်ဝါရီလ ၁၇ ရက်နေ့ကလည်း အဆိုပါသင်တန်းရဲ့ သင်တန်းဆင်းပွဲကို အလံတော်အလေးပြုခြင်း၊ သင်တန်းဆင်းရဲဘော်များက အလံကိုင်ကတိသစ္စာသီဆိုခြင်းများ အကျဥ်းချုပ်ပြုလုပ်ပြီး အခမ်းအနားကိုအောင်မြင်စွာကျင်းပနိုင်ခဲ့တယ်လို့လည်း သိရပါတယ်။

ဒါတင်မက အခက်အခဲတွေကြားက စည်းလုံးညီညွတ်စွာနဲ့ သင်တန်းပြီးဆုံးတဲ့အထိ ကျရာတာဝန်တွေကို ကျေပွန်စွာထမ်းဆောင်ခဲ့ကြတဲ့ ရဲဘော်တွေအားလုံးကို လေးနက်စွာဂုဏ်ပြုကြောင်းလည်း သရက်ခရိုင် အမှတ်(၄)တပ်ရင်း က သတင်းထုတ်ပြန်ထားပါတယ်။

Video-သရက်ခရိုင် အမှတ်(၄)တပ်ရင်း
https://www.facebook.com/share/r/1AaryCrMpg/

မကြည်ပြာနဲ့လသူ့ခင်ပွန်းအမှုကိစ္စတို့မှ တွေ့ရှိချက်များကို NUG မှ အွန်လိုင်းသတင်းစာရှင်းလင်းပွဲပြုလုပ်မည်

BBM-ဖေဖော်ဝါရီ၂၀
သတင်း-မင်းသော်

အမျိုးသားညီညွှတ်ရေးအစိုးရ (NUG )ရဲ့ အမြဲတမ်းအတွင်းဝန် မကြည်ပြာနဲ့ ၎င်းရဲ့ခင်ပွန်းဖြစ်သူတို့ရဲ့ အမှုကိစ္စနဲ့ပတ်သတ်ပြီး အွန်လိုင်းသတင်းစာရှင်းလင်းပွဲတစ်ခုပြုလုပ်မယ်လို့ NUG မှ ဒီနေ့မှာ ထုတ်ပြန်ကြေငြာထားပါတယ်။

မကြည်ပြာနဲ့ ၎င်းခင်ပွန်းတို့ တိုင်ကြားမှုနဲ့ပတ်သတ်ပြီး စုံစမ်းစစ်ဆေးရေးအဖွဲ့ရဲ့တွေ့ရှိချက်တွေ၊ သုံးသပ်ချက်တွေနဲ့ ပြည်ထောင်စုဝန်ကြီးချုပ်တွေရဲ့ ဆောင်ရွက်ချက်တွေကို ပြည်သူလူထုကို အစီရင်ခံတင်ပြနိုင်ဖို့ သတင်းစာရှင်းလင်းပွဲပြုလုပ်သွားမယ်လို့ သိရပါတယ်။

အဆိုပါသတင်းစာရှင်းလင်းပွဲကို ဖေဖော်ဝါရီလ ၂၁ ရက်နေ့ (မနက်ဖြန်) နေ့လယ်(၁)နာရီမှာ စတင်မှာဖြစ်ပြီး အမျိုးသားညီညွှတ်ရေးအစိုးရ၊ PVTV(Public Voice Television)နဲ့ သတင်းမီဒီယာတချို့ရဲ့ လူမှုကွန်ယက်စာမျက်နှာတွေကတဆင့် တိုက်ရိုက်ထုတ်လွှင့်ပြသသွားမယ်လို့လည်း NUG အစိုးရက ဆိုထားပါတယ်။

မကြည်ပြာကို ပြီးခဲ့တဲ့ ၂၀၂၅ ခုနှစ် နိုဝင်ဘာလ ၁၉ရက်နေ့ကတည်းက ကိုဖြိုးအပါ လူပုဂ္ဂိုလ်၁၂ ဦးက အဂတိလိုက်စားမှု၊လူ့အခွင့်အရေးချိုးဖောက်မှုတွေအတွက် အရေးယူပေးဖို့ နိုင်ငံတော်သမ္မတ၊ ပြည်ထောင်စုလွှတ်တော် ကိုယ်စားပြု ကော်မတီ(CRPH) ဥက္ကဌနဲ့ ပြည်ထောင်စုဝန်ကြီးချုပ်တို့ကို လိပ်မူပြီးတိုင်ကြားခဲ့ပေမဲ့ NUGစုံစမ်းရေးအဖွဲ့က မကြည်ပြာအပေါ် တရားစွဲဆို အရေးယူရန်နဲ့ ရာထူးမှ ထုတ်ပယ်ရန် လုံလောက်တဲ့ အချက်အလက်မတွေ့တာကြောင့် ဝန်ထမ်းတွေအပေါ် ချိုသာစွာဆက်ဆံရန်သာ သတိပေးကြောင်းထုတ်ပြန်ခဲ့ပါတယ်။

အဆိုပါထုတ်ပြန်ချက်နဲ့ပတ်သတ်ပြီး ပြည်သူလူ ထုကြား ပြင်းထန်စွာဝေဖန်မှုတွေရှိခဲ့သလို NUG ပညာရေးဝန်ကြီးဌာန တက္ကသိုလ်ဝင်ခွင့်လမ်းညွှန်ဖြစ်မြောက်ရေးအဖွဲ့ ၊ လွတ်လပ်သောCDM နိုင်ငံဝန်ထမ်းထုအဖွဲ့နဲ့ အခြားတော်လှန်ရေးအဖွဲ့အစည်းများစွာက NUGအနေနဲ့ စုံစမ်းစစ်ဆေးရေးဆိုင်ရာ သက်သေခံတွေကို ပြည်သူရှေ့ ပွင့်လင်းစွာချပြပြီး စစ်ဆေးမှုအတွင်း လိုအပ်ချက်ရှိပါကလည်း ပြန်လည်သုံးသပ်ရန် တိုက်တွန်းကြောင်းထုတ်ပြန်တာတွေပြုလုပ်ခဲ့ပြီးနောက် NUG အစိုးရက အဆိုပါအမှုကို သတင်းစာရှင်းလင်းပွဲလုပ်မယ်ဖြစ်ကြောင်း ယခုကဲ့သို့ ကြေငြာခဲ့ခြင်းဖြစ်ပါတယ်။

Photo-မကြည်ပြာ
https://www.facebook.com/share/p/17y9vq2QAR/

🟥 မြစ်ကြီးနားလေဆိပ်မှ စကစ လူကြီးပိုင်းလိုက်ပါမဲ့ လေယာဥ်တစ်စီး ဒရုန်းမှန်ပြီး အမြီးပိုင်းထိ

BBM-ဖေဖော်ဝါရီ၂၀
သတင်း-မင်းသော်

ကချင်ပြည်နယ်၊ မြစ်ကြီးနားလေဆိပ်မှ စစ်ကောင်စီရဲ့ လူကြီးပိုင်းလိုက်ပါမဲ့ လေယာဥ်တစ်စီး ဒရုန်းမှန်ပြီးတဲ့နောက် အမြီးပိုင်းထိခဲ့တယ်လို့ သိရပါတယ်။

ဖေဖော်ဝါရီလ ၂၀ရက် (ဒီနေ့)ည ၈ နာရီအကျော်မှာ မြစ်ကြီးနားလေဆိပ်မှ ထွက်ခွါရန် ပြင်ဆင်ထားတဲ့ MNA လေကြောင်းလိုင်းမှ ခရီးသည်လေယာဥ်တစ်စီး ဒရုန်းထိမှန်ခြင်းဖြစ်တယ်လို့လည်း ကနဦးသိရှိရပါတယ်။

အဆိုပါလေယာဥ်အတွင်း စစ်ကောင်စီဘက်မှ လူကြီးပိုင်းတစ်ဦး လိုက်ပါမှာသေချာပေမဲ့ မည်သည့်အဆင့်နဲ့ ရာထူးဆိုတာကို အတည်ပြုလို့မရသေးဘူးဟု မြေပြင်သတင်းရင်းမြစ်တစ်ဦးက BBM ကိုပြောပါတယ်။

"မြစ်ကြီးနားမှာ အကောင်ကြီးတစ်ကောင်ပြန်ပါသွားမဲ့ MNA လေယာဥ်ကိုပစ်ချတာ၊ မပျက်ကျပေမဲ့ တော်တော်ထိသွားတယ်ကြားတယ်၊ အကောင်ကြီးက ဘယ်သူလဲတော့ တိတိကျကျမသိပေမဲ့ တော်တော်တော့ ကြီးမယ်၊ လုံခြုံရေးကြပ်ပြီး ကလေးတွေကို တိုင်းရင်းသားဝတ်စုံနဲ့ကြိုခိုင်းတာဆိုတော့"

ဒါ့အပြင် မြစ်ကြီးနားမြို့အတွင်း ပြီးခဲ့တဲ့ ဖေဖော် ဝါရီ ၁၈ ရက်နေ့ကတည်းက လူကြီးလမ်းကြောင်းရှိတာကြောင့် လုံခြုံရေးတင်းကြပ်ထားတဲ့အပြင် ယနေ့ညပိုင်းမှာ ပြန်ဖို့ရှိတယ်ဆိုတဲ့သတင်းလည်းထွက်ပေါ်နေတာကြောင့် အခုကဲ့သို့ ဒရုန်းနဲ့တိုက်ခိုက်ခံရခြင်းဖြစ်ပုံရတယ်လို့လည်း အဆိုပါ သတင်းရင်းမြစ်က ဆက်ပြောပါတယ်။

"မြစ်ကြီးနားမှာက နှစ်ရက်ရှိပြီ လူကြီးလာမှာမို့ လုံခြုံရေးကြပ်ထားတာ ဒီနေ့ညပြန်မှာကြားတာ အဲ့ဒါမို့ Drone နဲ့ဆော်ပုံရတယ်"

အဆိုပါဒရုန်းတိုက်ခိုက်မှုနဲ့ပတ်သတ်ပြီး မည်သည့် အဖွဲ့အစည်းက လုပ်ဆောင်တယ်ဆိုတာကို အခုချိန်ထိ မသိရှိရသေးဘဲ မြစ်ကြီးနားလေဆိပ်တစ်ဝိုက် လက်နက်ကြီး၊ လက်နက်ငယ် ပစ်ခတ်သံတွေကို လက်ရှိအချိန်ထိ ကြားနေရတယ်လို့လည်း ဒေသခံတွေရဲ့အဆိုအရ သိရပါတယ်။

Photo-ဒရုန်းထိမှန်ထားတဲ့ လေယာဥ်အမြီးပိုင်း
https://www.facebook.com/share/p/1N3mCAC4RN/

အီရန်မှာ ဗြိတိန်စုံတွဲကို ထောင်ဒဏ် ၁၀ နှစ်ထောင်ဒဏ်ချမှတ်မှု ဗြိတိန်ရှုတ်ချ

BBM - ဖေဖော်ဝါရီ ၂၁
သတင်း - Richard

ဗြိတိန်နိုင်ငံခြားရေးဝန်ကြီး Yvette Cooper က အီရန်နိုင်ငံက ဗြိတိသျှစုံတွဲတစ်တွဲကို Spyလုပ်မှုနဲ့ ထောက်ဒဏ် ၁၀ နှစ်ပြစ်ဒဏ်ချမှတ်တာကို “လုံးဝတရားမျှတမှုမရှိ” လိို့ ဖေဖော်ဝါရီလ ၁၉ရက်‌နေ့က ရှုတ်ချခဲ့ပါတယ်လို့ CNN Worldမှာ ဖော်ပြထားပါတယ်။

ဒါ့အပြင် ဗြိတိန်အစိုးရအနေနဲ့ အဆိုပါ စုံတွဲ လွတ်မြောက်ရေးအတွက် ဆက်လက်ဖိအားပေးသွားမယ်လို့လည်း ပြောကြားခဲ့ပါတယ်။

Craig နဲ့ Lindsay Foreman တို့စုံတွဲဟ။ အီရန် နိုင်ငံရဲ့ နေရာအတော်များများမှာ သတင်းအချက်အလက်တွေ စုဆောင်းနေတယ်လို့ အီရန်ကစွပ်စွဲပြီးနောက် သူလျှိုမှုနဲ့ တရားစွဲဆိုခံခဲ့ရတာပါ။

“Craig နဲ့ Lindsay Foreman တို့စုံတွဲကို UKနိုင်ငံကို ဘေးကင်းကင်းနဲ့ ပြန်ရောက်ပြီး သူတို့ရဲ့ မိသားစုနဲ့ ပြန်လည်ပေါင်းစည်းနိုင်တဲ့အထိ အီရန်အစိုးရနဲ့အတူ အဆိုပါ အမှုကို အဆက်မပြတ်ဆက်လက်ဆောင်ရွက်သွားပါမယ်” လို့ Cooper က ကြေညာချက်တစ်စောင်မှာ ပြောကြားခဲ့ပါတယ်။

အဆိုပါ Foremanစုံတွဲဟာ ပြီးခဲ့တဲ့နှစ် ဇန်နဝါရီလ ၃ ရက်နေ့မှာ ကမ္ဘာတစ်ဝှမ်း မော်တော်ဆိုင်ကယ်ခရီးစဉ်နဲ့ အီရန်နိုင်ငံကိုဖြတ်ပြီး ခရီးသွားနေစဉ် ဖမ်းဆီးခံခဲ့ရတာပါ။

နောက်တစ်လမှာ အီရန်နိုင်ငံပိုင်မီဒီယာက သူတို့ကို သူလျှိုလုပ်မှု စွဲချက်တွေနဲ့ ဖမ်းဆီးထားကြောင်း ကြေညာခဲ့ပါတယ်။

အခုအခါ ထိန်းသိမ်းထံထားရတာ ၁၃ လကျော်ထဲ ရောက်ရှိလို့‌လာနေပါပြီ။

အဆိုပါ စုံတွဲရဲ့ သားဖြစ်သူ ဂျိုးဘန်နက်က အောက်တိုဘာ ၂၇ ရက်နေ့ကပြုလုပ်တဲ့ ၃နာရီကြာ ရုံးတင်စစ်ဆေးမှုအတွင်း သူ့မိဘတွေဟာ ခုခံကာကွယ်ခွင့်မရှိခဲ့ဘူးလို့ သီးခြားကြေညာချက်တစ်ခုမှာ ပြောကြားခဲ့ပါတယ်။

“သူလျှိုလုပ်မှုစွဲချက်ကို သက်သေပြနိုင်တဲ့ အထောက်အထားတစ်စုံတစ်ရာ မတွေ့ရပါ”လို့ ဂျိုးက ပြောကြားခဲ့ပြီး သူ့မိဘတွေရဲ့ ကျန်းမာရေးနဲ့ တရားစီရင်ရေးလုပ်ငန်းစဉ်တွေမှာ ပွင့်လင်းမြင်သာမှု မရှိတဲ့အပေါ် အလွန်စိုးရိမ်မိကြောင်း ဖြည့်စွက်ပြောကြားခဲ့ပါတယ်။

သူ့မိဘတွေ လွတ်မြောက်ရေးအတွက် “ပြတ်ပြတ်သားသားလုပ်ဆောင်ပြီး ရနိုင်တဲ့နည်းလမ်းအကုန် အသုံးပြဖို့” ဗြိတိသျှအစိုးရကို ဘန်းနက် က တောင်းဆိုခဲ့ပါတယ်။

Reference - CNN World
Photos - CNN World

#bbmnews #bbm #bbmtv #Iren #YvetteCooper
https://www.facebook.com/share/p/16txfARGU7/

ငြိမ်းချမ်းရေး လမ်းလျှောက်တဲ့ ဆရာတော်များနှင့် ပြည်တွင်းက စကစရဲ့ ဘုန်းကြီးများကို နှိုင်းယှဉ်ပြောဆိုနေကြသည့် အပေါ် ခင်ရီ ၀မ်းနည်းဟုဆို

BBM - ဖေဖော်ဝါရီ ၂၁
သတင်း - Richard

မြန်မာပြည်သူတွေက ငြိမ်းချမ်းရေးအတွက် လမ်းလျှောက်ခြင်း(Walk For Peace)ဆရာတော်တွေကို ချီးမွမ်းပြီး ပြည်တွင်းက အစွန်းရောက် မဘသဘုန်းကြီးတွေ၊ ဝီရသူ၊ သီတဂူတို့လို ဘုန်းကြီးတွေကို အဆိုးမြင်တဲ့အပေါ် စိတ်မကောင်းဖြစ်မိလို့ ကြံ့ဖွံ့ ဥက္ကဋ္ဌခင်ရီက ပြောဆိုခဲ့ပါတယ်။

ဖေဖော်‌ဝါရီလ ၂၀ရက်နေ့မှာ အဆိုပါ ပြောဆိုချက်ကို USDPနဲ့ Khin Yiဆိုတဲ့ လူမှုကွန်ရက်မှာ တင်ခဲ့တာပဲ ဖြစ်ပါတယ်။

ပြီးခဲ့တဲ့နှစ် အောက်တိုဘာလ ၂၆ရက်နေ့ကနေ ၂၀၂၁၆ခုနှစ် ဖေဖော်ဝါရီလ ဒုတိယပတ်အထိ ဆရာ‌တော် ဦးပညာကာရ ဦးဆောင်တဲ့ သံဃာတော်တွေဟာ အမေရိကန်နိုင်ငံရဲ့ တောင်ပိုင်းပြည်နယ်ဖြစ်တဲ့ တက္ကဆက်ကနေ မြို့တော် ဝါရှင်တန် ဒီစီအထိ ငြိမ်းချမ်းရေးလမ်းလျှောက်ပွဲ ပြုလုပ်ခဲ့ကြတာပါ။

အဆိုပါ ဆရာတော်ကြီးတွေနဲ့နှိုင်းယှဉ်ပြီး ပြည်တွင်းက စစ်ကောင်စီရဲ့ ဘက်တော်သား မဘသဘုန်းကြီးတွေ၊ သီတဂူ၊ ဝီရသူတို့လို ဘုန်းကြီးတွေကို ပြောဆိုတဲ့အပေါ် စိတ်မကောင်းဖြစ်မိတယ်လို့ ခင်ရီက အခုလိုဆိုထားတာပါ။

“Walk For Peace ဆရာတော်ကြီးတွေနဲ့ ပြည်တွင်းမှာရှိတဲ့ ဆရာတော်ကြီးတွေကို လွဲမှားစွာ နှိုင်းယှဉ်သုံးသပ်ပြီးတော့ မလိုတမာပြောကြားတာတွေကို ကျွန်တော်အတော်ပဲ ၀မ်းနည်းပါတယ်”လို့ ခင်ရီက သူ့ရဲ့ လူမှုကွန်ရက်မှာ ပြောဆိုထားတာပါ။

အဆိုပါ မဘသဘုန်းကြီး၊ ဝီရသူ၊ သီတဂူတို့လို ဘုန်းကြီးတွေဆိုတာ အပြည်ပြည်ဆိုင်ရာ တရားရုံး(ICJ)မှာ ဂမ်ဘီယာနိုင်ငံက တရားစွဲဆိုထားတဲ့ ရိုဟင်ဂျာ‌တွေအပေါ် လူမျိုးတုံး သတ်ဖြတ်တဲ့အမှုမှာ မြန်မာစစ်တပ်ရဲ့ ကြံရာပါ၊ လော်ဘီတွေအတွက် တရားစွဲဆိုခံထားရတဲ့ ဘုန်းကြီးတွေပါ။

ဒါ့အပြင် ခင်ရီဟာ အခုလို ဗုဒ္ဓဘာသာ ဘုန်းတော်ကြီးတွေရဲ့ ငြိမ်းချမ်းရေးအတွက် လမ်းလျှောက်ခြင်းဟာ အနောက်နိုင်ငံလို ခရစ်ယာန်သာသနာထွန်ကားတဲ့ နိုင်ငံတွေမှာ ဗုဒ္ဓဘာသာက ထိုးဖောက်နိုင်တယ်ဆိုတဲ့ အချက်ကိုလည်း ပြောကြားသွားခဲ့ပါသေးတယ်။

Photo - Social Media

#bbmnews #bbmtv #bbm #khinyi #USDP
https://www.facebook.com/share/p/15hYd7Hdpo/

ချင်းအမျိုးသားနေ့ အခမ်းအနားကို ULA/AA မှ တက်ရောက်ဂုဏ်ပြုခဲ့

BBM - ဖေဖော်ဝါရီ ၂၁
သတင်း - နိုင်နိုင်

ရခိုင်ပြည်၊ မင်းပြားခရိုင်အတွင်း ကျင်းပတဲ့ ၇၈ ကြိမ်မြောက် ချင်းအမျိုးသားနေ့ အခမ်းအနားကို ရက္ခိုင်အမျိုးသားအဖွဲ့ချုပ်/ အာရက္ခတပ်တော် (ULA/AA) မှ တက်ရောက်ဂုဏ်ပြုခဲ့တယ်လို့ သိရပါတယ်။

မနေ့က ဖေဖော်ဝါရီလ ၂၀ ရက်နေ့မှာ ကျရောက်တဲ့ (၇၈) ကြိမ်မြောက် ချင်းအမျိုးသားနေ့ အခမ်းအနားကို မနက် ၈ နာရီကနေ စတင်ကာ ကျင်းပပြုလုပ်ခဲ့တာဖြစ်ပြီး အာရက္ခတပ်တော်ရဲ့ စစ်ဘက်ဆိုင်ရာ အရာရှိတွေ၊ ပါတီရုံးမှ တာဝန်ရှိသူတွေ၊ အုပ်ချုပ်ရေးဌာနမှ တာဝန်ရှိသူတွေ၊ ဌာနဆိုင်ရာဝန်ထမ်းတွေနဲ့ ဒေသခံတွေတက်ရောက် ဂုဏ်ပြုပေးခဲ့ကြတယ်လို့ ပွဲတက်ရောက်ခဲ့သူတွေဆီက သိရပါတယ်။

အခမ်းအနားကို တက်ရောက်လာခဲ့ကြတဲ့သူတွေကိုလည်း ချင်း၊ သက္ကမလူမျိုးတွေနဲ့ အာရက္ခတပ်တော် AA ရဲ့ စစ်သည်တော်တွေက အဆို၊ အကတွေနဲ့ ဖျော်ဖြေပေးတဲ့အပြင် ရက္ခိုင်အမျိုးသားအဖွဲ့ချုပ်/ အာရက္ခတပ်တော် (ULA/AA) ကလည်း အဲဒီအခမ်းအနားမှာ ထောက်ပံ့ငွေ သိန်း ၁၀၀ ကျော် ဂုဏ်ပြုချီးမြှင့်ခဲ့တယ်လို့လည်း သိရပါတယ်။

အဲဒီအခမ်းအနားမှာ ULA / AA ရဲ့ တာဝန်ရှိပုဂ္ဂိုလ်တွေက ချင်းလူမျိုးတွေရဲ့ အမျိုးသားနေ့ကို ဂုဏ်ပြုကြိုဆိုကြောင်း သဝဏ်လွှာဖတ်ကြားခဲ့တဲ့အပြင် ချီးကျူးဂုဏ်ပြုစကားတွေ ပြောကြားခဲ့တယ်လို့လည်း သိရပါတယ်။

လက်ရှိကျင်းပခဲ့တဲ့ (၇၈) ကြိမ်မြောက် ချင်းအမျိုးသားနေ့ကို ပလက်ဝအပါအဝင် ရခိုင်ပြည်အတွင်းရှိ မင်းပြားခရိုင်၊ ကျောက်ဖြူခရိုင်နဲ့ တခြားသောခရိုင်တွေမှာလည်း စည်ကားသိုက်မြိုက်စွာ ကျင်းပခဲ့တာဖြစ်ပြီး ULA/AA ရဲ့ ဒေသဆိုင်ရာ တာဝန်ရှိသူတွေက တက်ရောက်ဂုဏ်ပြုပေးခဲ့တယ်လို့လည်း သိရပါတယ်။

#bbmnews #bbm #bbmtv #ChinNationalDay #AA #ULA

Photo - AA info Desk / Arakan Princess Media
https://www.facebook.com/share/p/1DiHe3aza9/

ဘင်္ဂလားဒေ့ရှ်ရှိ ရိုဟင်ဂျာဒုက္ခသည်စခန်းတွေကို အိုဇေးလ် သွားရောက်လည်ပတ်

BBM - ဖေဖော်ဝါရီ ၂၁
သတင်း - David

ဂျာမန်ဘောလုံးသမားဟောင်း မတ်ဆုအိုဇေးလ်ဟာ ဘင်္ဂလားဒေ့ရှ်ရှိ ရိုဟင်ဂျာဒုက္ခသည်စခန်းတွေကို သွားရောက်လည်ပတ်ခဲ့တယ်လို့ သိရပါတယ်။

အိုဇေးလ်ဟာ တူရကီသမ္မတ အာဒိုဂန်ရဲ့သားဖြစ်သူ ဘီလားအာဒိုဂန်နဲ့အတူ သွားရောက်ခဲ့တာဖြစ်တယ်။

ဖေဖော်ဝါရီလ ၁၉ ရက်မှာ တစ်ရက်တာ လည်ပတ်ခဲ့ပြီး အိုဇေးလ်က ဖေဖော်ဝါရီ ၂၀ ရက်မှာ ဒီလည်ပတ်မှုကို သူ့ရဲ့လူမှုကွန်ရက်ကနေ
မျှဝေခဲ့ပါတယ်။

အိုဇေးလ်နဲ့ ဘီလားတို့ဦးဆောင်တဲ့အဖွဲ့ဟာ အူခီးယားရှိ ဒုက္ခသည်စခန်းတွေကို သွားရောက်ခဲ့ပါတယ်။

ဒါ့အပြင် တူရကီနိုင်ငံက အကူအညီထောက်ပံ့ပေးထားတဲ့ ဆေးရုံတစ်ရုံနဲ့ ပညာရေးဆိုင်ရာလုပ်ငန်းစဉ်တွေကိုလည်း ကြည့်ရှုခဲ့ကြပါတယ်။

အိုဇေးလ်ဟာ ရိုဟင်ဂျာဒုက္ခသည်တွေနဲ့ ခေတ္တခဏ ဘောလုံးကစားခဲ့တယ်လို့လည်း သိရပါတယ်။

ဓာတ်ပုံ - အိုဇေးလ်

#bbmnews #bbm #bbmtv #အိုဇေးလ် #SportsNews #Bangladesh
https://www.facebook.com/share/p/1QAEigkFSv/

ချင်းအမျိုးသားနေ့ပွဲမှာ ဒုဗိုလ်ချုပ်ကြီး ရာပြည့် ရောက်နေစဉ် CDF - Hakha က အသေခံဒရုန်းနဲ့တိုက်ခိုက်

BBM - ဖေဖော်ဝါရီ ၂၁
သတင်း - နိုင်နိုင်

ချင်းပြည်နယ်၊ ဟားခါးမြို့မှာ စစ်ကောင်စီတပ်က ဦးဆောင်ကာ ကျင်းပပြုလုပ်နေတဲ့ ချင်းအမျိုးသားနေ့အခမ်းအနားကို အသေခံဒရုန်းနဲ့ တိုက်ခိုက်ခဲ့ရာ အဲဒီအခမ်းအနားကို တက်ရောက်နေတဲ့ စစ်ကောင်စီရဲ့ ဝန်ကြီး ဒုဗိုလ်ချုပ်ကြီး ရာပြည့်ဟာ ခွေးပြေးဝက်ပြေး ထွက်ပြေးတိမ်းရှောင်ကာ ချက်ချင်းပြန်လှည့် သွားခဲ့ရတယ်လို့ ချင်းဒေသကာကွယ်ရေးတပ် CDF - Hakha က မနေ့က ဖေဖော်ဝါရီလ ၂၀ ရက်နေ့မှာ ရုပ်သံဖိုင်နဲ့အတူ ထုတ်ပြန်ပါတယ်။

ဟားခါးမြို့ပေါ်ရှိ မြိုနယ်စုပေါင်းရုံးနဲ့ ခရိုင်စု ပေါင်းရုံးရှေ့မှာ ကျင်းပနေတဲ့ (၇၈) နှစ်မြောက်နေ့ ချင်းအမျိုးသားနေ့ပွဲကို စစ်ကောင်စီခန့် ဝန်ကြီး ဒုတိယဗိုလ်ချုပ်ကြီး ရာပြည့်နဲ့ လက်အောက်တပ်ဖွဲ့ဝင်တွေ တက်ရောက်နေစဥ် CDF - Hakha ရဲ့ ဒရုန်းတပ်ဖွဲ့က တိုက်ခိုက်ခဲ့ရာ မရှုမလှ ပွဲပျက်သွားခဲ့တယ်လို့ CDF - Hakha အဖွဲ့က ဆိုပါတယ်။

"အကြမ်းဖက်သမား ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်နဲ့ အခြားပြည်ထောင်စုအဆင့် အကြမ်းဖက်လူကြီး (၁၇) ဦး၊ အကြမ်းဖက် ချင်းပြည်နယ်ဝန်ကြီးချုပ်မှ မြို့နယ်အဆင့် စစ်ကျွန်ဝန်ထမ်းများနဲ့ ဝန်ကြီး ဦးကောလ်လျန်ထန်းရဲ့ တင်ဒါအခွင့်ထူးခံ ကုမ္ပဏီ (၄၂) ခုတို့ အပါအဝင် (၇၈) နှစ်မြောက်နေ့ ချင်းအမျိုးသားနေ့ကို ဟားခါးမြို့၊ မြို့နယ်စုပေါင်းရုံးနဲ့ ခရိုင်စုပေါင်းရုံးရှေ့မှာ ကျင်းပနေသော အကြမ်းဖက်အဖွဲ့ကို CDF-Hakha ရဲ့ ဒရုန်းတပ်ဖွဲ့မှ တိုက်ခိုက်ရာ မရှုမလှပွဲပျက်သွားခဲ့ရပါတယ်" လို့ CDF - Hakha က ဆိုပါတယ်။

အဆိုပါ အခမ်းအနားကျင်းပနိုင်ဖို့အတွက် ပြီးခဲ့တဲ့ သုံးရက်ခန့်ကတည်းက နည်းမျိုးစုံ ညွှန်ကြား ပြင်ဆင်ခဲ့တာဖြစ်တယ်လို့လည်း သိရပါတယ်။

CDF - Hakha ဒရုန်းတပ်ဖွဲ့ဟာ မနေ့က ဖေဖော်ဝါရီလ ၂၀ ရက်မှာ ချင်းအမျိုးသားနေ့ ကျင်းပနေတဲ့ အခမ်းအနားကိုသာမက စစ်ကောင်စီတပ်က တပ်စွဲထားတဲ့နေရာတော်တော်များများကိုလည်း ဒရုန်းနဲ့ဗုံးကြဲချတိုက်ခိုက်ခဲ့တာဖြစ်ပြီး အဲဒီတိုက်ခိုက်မှုအခြေအနေကြောင့် ထိခိုက်သေဆုံး ရှိ၊ မရှိကို သိရှိနိုင်ဖို့အတွက် BBM အနေနဲ့ စုံစမ်းမေးမြန်းဆဲ ဖြစ်ပါတယ်။

နောက်နောင်မှာလည်း အကြမ်းဖက်စစ်တပ်ရဲ့ လုပ်ငန်းလည်ပတ်မှုတွေမှာ ကျောထောက်နောက်ခံပြုနေတဲ့ ဘယ်သူမဆို စစ်ရေးအရ ထိရောက်စွာအရေးယူဆောင်ရွက်သွာမှာ ဖြစ်ကြောင်း CDF - Hakha က ဆိုထားပါတယ်။

မနေ့က ဖေဖော်ဝါရီ ၂၀ ရက်နေ့ ချင်းအမျိုးသားနေ့မှာ စစ်ကောင်စီတပ်ဟာ ချင်းပြည်နယ်၊ ဖလမ်းမြို့နယ်ရှိ ကျေးရွာ ၆ ရွာကို ဗုံးသီး ၅၀ ကျော်နဲ့ လေကြောင်းတိုက်ခိုက်ခဲ့တယ်လို့လည်း ဒေသခံတွေဆီက သိရပါတယ်။

Video - CDF - Hakha

#bbmnews #bbm #bbmtv #ChinNationalNews #CDF #Hakha
https://www.facebook.com/share/v/1AXwjzSZqh/

ကွတ်ခိုင်နဲ့ တာမိုးညဲကြား တရုတ်လူမျိုးတွေကို TNLA ဘက်က စစ်ဆေးရေးတင်းကျပ်ပြီး အသွားအလာကန့်သတ်

BBM - ဖေဖော်ဝါရီ ၂၁
သတင်း - PJ

ရှမ်းပြည်နယ်မြောက်ပိုင်း၊ ကွတ်ခိုင်နဲ့ တာမိုးညဲကြားမှာ တရုတ်လူမျိုးတွေကို TNLA ဘက်က ဖေဖော်ဝါရီလ ၂၀ ရက်နေ့ကစ စစ်ဆေးရေးတင်းကျပ်ပြီး အသွားအလာကန့်သတ်လာကြောင်း ဒေသခံတွေဆီက သိရပါတယ်။

"တရုတ်တွေကိုပဲ ပေးမဖြတ်ဘူး၊ တခြားလူမျိုးဆိုရင် ပေးဖြတ်တယ်" လို့ ဒေသခံတစ်ဦးက ပြောပါတယ်။

ကွတ်ခိုင်ကနေ တာမိုးညဲသွားတဲ့ လမ်းဘက် ရပ်ကွက် ၇ အကျော် ရွာတစ်ရွာမှာ TNLA ဂိတ်လုပ်ထားတဲ့ နေရာမှာ စစ်ဆေးနေတာလို့ သူကပြောပါတယ်။

"ခက်ပြီ၊ တာမိုးညဲလမ်းက ပိတ်သွားသလိုတောင်ကြားတယ်၊ TNLA ဘက်ကလည်း တင်းကျပ်ထားတယ်၊ MNDAA တွေဘက်ကလည်း တင်းကျပ်ထားတယ်" လို့ ယာဉ်မောင်းတစ်ဦးကလည်း ပြောပါတယ်။

လောက်ကိုင်လမ်းဘက်မှာတော့ ကွတ်ခိုင်ဘက် ပြန်တယ်ဆိုရင် MNDAA တပ်ဖွဲ့ဝင်တွေက သိပ်ပြီး ပေးမပြန်ချင်တော့ဘူးလို့လည်း သူကဆက်ပြောပါတယ်။

"ဘာလူမျိုးလဲလို့ မေးတယ်၊ ကွတ်ခိုင်ဆို ပေးမသွားချင်ဘူး၊ ကွတ်ခိုင်ကျော်သွားမှာလို့ ပြောမှပဲ ပြန်လို့ရတော့တယ်" လို့ သူကရှင်းပြပါတယ်။

ပြီးခဲ့တဲ့ နှစ်က နမ့်စလပ်နဲ့ သိန္နီကြားမှာလည်း SSPP နဲ့ MNDAA နှစ်ဘက်စစ်ကြောင်းပဲထိုးကြမယ်ထင်နေတာ နှစ်ဘက်ညှိနေတဲ့ကြားက တိုက်ပွဲဖြစ်လာတာ လမ်းတောင် ဖြတ်လို့မရဘဲ ပိတ်သွားတဲ့အထိ ဖြစ်သွားတယ်လို့ သူ့အတွေ့အကြုံကို ဆက်ပြောပါတယ်။

ပြီးခဲ့တဲ့နှစ်က ရွှေတူးတာနဲ့ ပတ်သက်ပြီး မုံးစီးမှာလည်း ဒေသခံ အများအပြား ပစ်သတ်လိုက်တာကို ကြည့်ရင် MNDAA ဘက်က ရှည်ရှည်ဝေးဝေးမတွေးဘဲ တိုက်ပွဲဖော်ဆောင်လာနိုင်တယ်လို့ ဒေသခံတွေက သုံးသပ်ပြောဆိုနေကြပါတယ်။
https://www.facebook.com/share/p/1B2rouBBN5/

ဟားခါးမြို့မှာ လျှပ်စစ်ဝန်ထမ်းတစ်ဦးကို စစ်ကောင်စီက အကြောင်းမဲ့ ပစ်သတ်

BBM - ဖေဖော်ဝါရီ ၂၁
သတင်း - ကိုအိုက်

ချင်းပြည်နယ်ရဲ့ မြို့တော် ဟားခါးမှာ လျှပ်စစ်ဝန်ထမ်းတစ်ဦးကို လုံခြုံရေးဆောင်ရွက်နေတဲ့ စစ်ကောင်စီတပ်ဖွဲ့ဝင်တွေက မည်သည့် စစ်ဆေးမေးမြန်းခြင်း မလုပ်ဘဲ အကြောင်းမဲ့ ပစ်သတ်သွားတယ်လို့ မြို့ခံတွေက BBM ကို ပြောပါတယ်။

သေဆုံးသူဟာ ဖလမ်းမြို့ဇာတိ အသက် (၃၁) နှစ်အရွယ် ဦးဗန်ဆွီးအုပ်လာလ် ဖြစ်ပါတယ်။

ဦးဗန်ဆွီးအုပ်လာလ် ဟာ မနေ့က ဖေဖော်ဝါရီ ၂၀ ရက်၊ မနက် ၁၀ နာရီခွဲခန့်မှာ ဟားခါးမြို့၊ ချင်းဦးစီးရပ်ကွက်အတွင်းရှိ လျှပ်စစ်ရုံးမှာ တာဝန်ထမ်းဆောင်ပြီးနောက် နေအိမ်သို့ ဆိုင်ကယ်တစ်စီးနဲ့ ပြန်လာစဥ် ပစ်ခတ်ခံရတာပါ။

"လျှပ်စစ်ရုံးကနေ နေအိမ်ကို ပြန်လာကြတာပါ၊ အမျိုးသား ၃ ယောက်ပါ၊ လုခြုံရေးယူတဲ့ စစ်သားတွေက သူတို့ကို ဘာမှမမေးဘဲ ဒီအတိုင်း လှည့်ပစ်သွားတာပါ၊ အဲမှာ ဦးဗန်ဆွီးအုပ်လာလ်က ကျည်ထိမှန်သွားတာဖြစ်ပါတယ်၊ ကျန်တဲ့နှစ်ယောက်က ဘာမှမဖြစ်ဘူး"လို့ ဟားခါးမြို့ခံတစ်ဦးက BBM ကို ပြောပါတယ်။

ပစ်ခတ်မှုကြောင့် ဦးဗန်ဆွီးအုပ်လာလ်ဟာ ဦးခေါင်းမှာ ကျည်ဆံထိမှန်ပြီး အခင်းဖြစ်ပွားရာ နေရာမှာပင် ပွဲချင်းပြီး သေဆုံးသွားခဲ့ပါတယ်။ သူဟာ ဖလမ်းမြို့ကနေ ဟားခါးမြို့မှာ စစ်ဘေးရှောင်ရင်း လျှပ်စစ်ရုံးမှာ အလုပ်လုပ်ကိုင်သူ ဖြစ်ပါတယ်။

အဲဒီပစ်သတ်သွားတဲ့ စစ်ကောင်စီတပ်ဖွဲ့ဝင်တွေဟာ ဟားခါးမြို့ အခြေစိုက် ခလရ (၂၆၆) မှ စစ်ကောင်စီတပ်ဖွဲ့ဝင်တွေဖြစ်တယ်လို့ မြို့ခံတွေ ပြောကြပါတယ်။

"ဖလမ်းမြို့ တိုက်ပွဲတွေကြောင့် ဟားခါးမြို့ကို စစ်ဘေးရှောင်တာပါ၊ ဟားခါး ရောက်လာတော့ လျှပ်စစ်ရုံးမှာ အလုပ်ဝင်လုပ်ရင်း အသက်မွေးနေတာ ကြာပါပြီ၊ အခုလို အကြောင်းမဲ့ အပစ်သတ်ခံလိုက်ရတာ တော်တော်လေးကို စိတ်မကောင်းစရာပါပဲ" လို့ သူနဲ့ နီးစပ်သူတစ်ဦးက BBM ကို ပြောပါတယ်။

အခုလို နေ့ခင်းအချိန်မှာတောင် အရပ်သား ဝန်ထမ်းတစ်ဦးကို အကြောင်းမဲ့ ပစ်သတ်ခဲ့တဲ့အပေါ် ဟားခါးမြို့ခံတွေကြား ထိတ်လန့်တုန်လှုပ်မှုတွေ ဖြစ်ပွားလျက်ရှိပါတယ်။

စစ်ကောင်စီတပ်ဖွဲ့ဝင်တွေဟာ မြို့တွင်းလုံခြုံရေး အကြောင်းပြချက်နဲ့ ဟားခါးမြို့ နေရာအနှံ့မှာ တပ်စွဲထားပြီး သွားလာနေတဲ့ ပြည်သူတွေကို မကြာခဏဆိုသလို ရန်ပြုပစ်ခတ်မှုတွေ ရှိနေတယ်လို့ ဒေသခံတွေက ဆိုကြပါတယ်။

ဓာတ်ပုံ-ပေးပို့

#bbmnews #bbm #bbmtv #Chin #Hakha
https://www.facebook.com/share/p/176pNMSa9h/

BNRA ဒုဥက္ကဋ္ဌ ကိုဖြိုးနဲ့ စစ်ဆင်ရေးတာဝန်ခံ ကိုလတ် အပါအဝင် တပ်ဖွဲ့ဝင်ငါးဦး စစ်ကောင်စီထံ ပူးပေါင်းသွား

BBM - ဖေဖော်ဝါရီ ၂၁
သတင်း - နိုင်နိုင်

ဗိုလ်နဂါး စစ်ကောင်စီတပ်နဲ့ ပူးပေါင်းသွားပြီးနောက် ၂ ရက်အကြာမှာပဲ (BNRA) ဒုဥက္ကဋ္ဌ ကိုဖြိုးနဲ့ စစ်ရေးတာဝန်ခံ ကိုလတ် အပါအဝင်တပ်ဖွဲ့ဝင် ငါးဦးဟာ မနေ့က ဖေဖော်ဝါရီလ ၂၀ ရက်နေ့မှာပဲ စစ်ကောင်စီထံ ထပ်မံလက်နက်ချ အလင်းဝင် ပူးပေါင်းလာတယ်လို့ စစ်ကောင်စီတပ်ရဲ့ ဝါဒဖြန့်တယ်လီဂရန်ချန်နယ်တွေမှာ ဖော်ပြထားပါတယ်။

စစ်ကောင်စီတပ်ထံ ပူးပေါင်းသွားသူ BNRA တပ်ဖွဲ့ဝင် ငါးဦးထဲမှာ ဗိုလ်နဂါးရဲ့ ယောက်ဖတော်စပ်သူဖြစ်တဲ့ ဒု-ဥက္ကဌ ကိုဖြိုးနဲ့ စစ်ဆင်းရေးတာဝန်ခံ စစ်ကြောင်းမှူး ကိုလတ်တို့ပါဝင်ပြီး တပ်ဖွဲ့ဝင်တွေဖြစ်တဲ့ မင်းထွန်း၊ ငထက်နဲ့ စာကလေးတို့ ပါဝင်ကြတယ်လို့ ပြည်သူ့ကာကွယ်ရေးတပ်ဖွဲ့ဝင် PDF ရဲဘော် တစ်ဦးက BBM ကို ပြောပါတယ်။

"မနေ့က စစ်အုပ်နဲ့ ပူးပေါင်းသွားတဲ့အထဲမှာ ကိုဖြိုးတို့ ကိုလတ်တို့ ပါပါတယ်။ နောက်ထပ်တပ်ဖွဲ့ဝင် သုံးဦးလည်း ပါတာတွေ့ရပါတယ်။ သူတို့ ၅ ဦးကိုလည်း စစ်အုပ်စုက ရဟတ်ယာဥ်ခေါ်ဆောင်သွားတယ်လို့ သိရပါတယ်။ ဗိုလ်နဂါးနဲ့ အတူ ၁၈ ရက်နေ့ကတည်းပါသွားတာလည်း ဖြစ်နိုင်ပါတယ် " လို့ အဆိုပါ ရဲဘော်က ဆက်ပြောပါတယ်။

မနေ့က ဖေဖော်ဝါရီလ ၂၀ ရက်နေ့ စစ်အုပ်စုရဲ့ လော်ဘီချန်နယ်တွေမှာတော့ BNRA တပ်ဖွဲ့ဝင် ငါးဦးဟာလက်နက် ၅ လက်နဲ့အတူ ဘက်ပြောင်းခိုလှုံကာ အလင်းဝင်ရောက်ခဲ့တယ်လို့ ဆိုထားပါတယ်။

အလားတူ မနေ့က ဖေဖော်ဝါရီလ ၂၀ ရက်နေ့မှာပဲ စစ်ကောင်စီတပ်ဆီအညံ့ခံ ပူးပေါင်းသွားတဲ့ နဂါးရဲ့ BNRA အဖွဲ့က တကိုယ်တော် သုဘရာဇာနဲ့ ဒေါင်းညိုတို့ကို ဖမ်းဆီးရမိထားပြီး ကောင်းမွန်စွာထိန်းသိမ်းထားကြောင်း ဓါးမဆိုင်းတပ်ဖွဲ့မှ ဗိုလ်စွမ်းက လူမှုကွန်ရက်မှာ Video File နဲ့တကွ ဖော်ပြထားပါတယ်၊၊

"သုဘရာဇာ နဲ့ဒေါင်းညို အကောင်းပကတိအတိုင်းပါ၊ အကြောက်တရားနဲ့ သွေးမခွဲပါနဲ့၊ ဖြူစင်တဲ့နှလုံးသားနဲ့ လူလိုဆက်ဆံထားပါတယ်" လို့ ဓါးမဆိုင်းအဖွဲ့မှ ဗိုလ်စွမ်းက မနေ့က ပြောဆိုထားပါတယ်။

လက်ရှိမှာ BNRA တပ်ဖွဲ့ ခေါင်းဆောင် နဂါးဟာ ပြီးခဲ့တဲ့ ဖေဖော်ဝါရီလ ၁၈ ရက်နေ့မှာ မိသားစုတွေ ခေါ်ဆောင်ပြီးတော့ လက်နက် (၆) လက်နဲ့အတူ စစ်ကောင်စီထံအညံ့ခံ ပူးပေါင်းသွားတာဖြစ်ပြီး သူရဲ့ တပ်ဖွဲ့၀င် ၁၅၀ ကျော်ဟာလည်း PDF နဲ့ ပကဖ တွေဆီကို လာရောက်အဖမ်းခံတာတွေ၊ ပူးပေါင်း ဆောင်ရွက်တာတွေနဲ့ လက်နက်အပ်နှံတာတွေ ပြုလုပ်ခဲ့တာလည်း ရှိပါတယ်။

စစ်ကိုင်းတိုင်း၊ ယင်းမာပင်ခရိုင်အတွင်းရှိ BNRA အဖွဲ့ဝင် ရဲဘော်တွေအနေနဲ့ ကိုင်ဆောင်ထားတဲ့ လက်နက်ခဲယမ်းတွေကို မိမိနေထိုင်ရာ ခရိုင်/မြို့နယ် ပကဖ အဖွဲ့များထံကို ချိတ်ဆက်ပြီး လာရောက်အပ်နှံကြဖို့နဲ့ လာရောက်အပ်နှံ့တာမရှိပါက PDF ကာကွယ်ရေးတပ်ဖွဲ့တွေရဲ့ စစ်ဥပဒေ၊ စစ်စည်းကမ်းတွေအရပဲ အရေးယူသွားမှာ ဖြစ်တယ်လို့ ယင်းမာပင်ခရိုင်ပြည်သူ့ကာကွယ်ရေးအဖွဲ့(ပကဖ)အဖွဲ့က ပြီးခဲ့တဲ့ ဖေဖော်ဝါရီလ ၁၉ ရက်နေ့မှာ ပြောဆိုထားပါတယ်။

ဗိုလ်နဂါး စစ်ကောင်စီတပ်နဲ့ ပူးပေါင်းသွားပြီးနောက် ၂ ရက်အကြာမှာပဲ စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်းကို စစ်ကြောင်း ၂ ကြောင်းခွဲကာ အင်အား ၃၀၀ ကျော်နဲ့ စစ်ကောင်စီတပ်က စစ်ကြောင်းထိုးနေပြီး ဒေသခံထောင်နဲ့ချီမှာလည်း ဘေးလွတ်ရာနေရာတွေ ထွက်ပြေးတိမ်းရှောင်နေကြတယ်လို့ သိရပါတယ်။

ဓာတ်ပုံ-စကစ တယ်လီဂရမ်
https://www.facebook.com/share/p/1C8jiNhFtt/

NUG ဝန်ကြီးချုပ်ရုံးအတွင်းဝန် ဒေါ်ကြည်ပြာရဲ့ အမျိုးသားနဲ့ ဆွေမျိုးအချို့ ခန့်အပ်ထားခဲ့မှု ဝန်ကြီးဌာနရဲ့ ဆုံးဖြတ်ချက်ထဲပါနိုင်ဟုဆို

🟥ဒေါ်ကြည်ပြာရဲ့ အမျိုးသား ဦးညီညီမင်းနဲ့ မိသားစုဝင် ၂ ဦးကို တာဝန်မှရပ်ဆိုင်း

BBM - ဖေဖော်ဝါရီ ၂၁
သတင်း - ခက်ဆစ်

NUG အစိုးရ ဝန်ကြီးချုပ်ရုံး အမြဲတမ်းအတွင်းဝန် ဒေါ်ကြည်ပြာရဲ့ အမျိုးသားနဲ့ ဆွေမျိုးအချို့ကို ရာထူးတာဝန်ပေးအပ်ထားတာနဲ့ ပတ်သက်ပြီး တာဝန်ရှိမှုဟာ ဝန်ကြီးဌာနနဲ့ ဆုံးဖြတ်တာဝန်ပေးမှုမှာသာ ပါနိုင်ကြောင်း ဝန်ကြီးချုပ်ရုံး ဝန်ကြီး ဒေါက်တာ ဇော်ဝေစိုးက ပြောကြားခဲ့ပါတယ်။

ဒီနေ့ ဖေဖော်ဝါရီလ ၂၁ ရက်မှာပြုလုပ်တဲ့ ပြည်ထောင်စုဝန်ကြီးချုပ်ရုံး အမြဲတမ်းအတွင်းဝန် နှင့် ခင်ပွန်းဖြစ်သူတို့အား တိုင်ကြားမှုနဲ့ပက်သက်ပြီး စုံစမ်းစစ်ဆေးရေးအဖွဲ့ရဲ့ တွေ့ရှိချက်၊သုံးသပ်ချက်တွေနဲ့ ပြည်ထောင်စုဝန်ကြီးချုပ်ရုံးရဲ့ ဆောင်ရွက်ချက်တွေကို ပြည်သူလူထုထံသို့ တင်ပြအစီရင်ခံခြင်းနဲ့ သတင်းစာရှင်းလင်းပွဲအတွင်း သတင်းမီဒီယာတွေရဲ့ မေးမြန်းမှုမှာ ပြောကြားခဲ့တာပါ။

"Decision Making လုပ်တဲ့ဟာပေါ့ ဒီဇန်နဝါရီ ၁ ရက်နေ့ကနေ စပြီးလုပ်တာ ဖြစ်တယ်ဆိုတဲ့အကြောင်း ကျနော်ဟာ ရှေ့ပိုင်းမှာ ပညာရေးနဲ့ ကျန်းမာရေးကိုသာ Decision Making အနေနဲ့ပေါ့ ဒါ EC ကျနော်တို့က Decision Making ဆိုတာ စုပေါင်းခေါင်းဆောင်မှုနဲ့ သွားတာဖြစ်တဲ့အတွက် စုပေါင်းခေါင်းဆောင်မှုအတိုင်းပဲ ဝန်ကြီးဌာနအသီးသီးမှာ Executive Committee တွေ Admin တွေမှာပဲ ဆုံးဖြတ်ပြီးသွားတော့ ဝန်ကြီးဌာနရဲ့ Decision Making ထဲမှာသာ ပါနိုင်ခဲ့တာဖြစ်တယ်" လို့ ဝန်ကြီး ဒေါက်တာ ဇော်ဝေစိုးက ပြောကြားခဲ့ပါတယ်။

ဝန်ကြီးချုပ်ရုံးအတွင်းဝန် ဒေါ်ကြည်ပြာနဲ့ ပတ်သက်ပြီး အဂတိလိုက်စားမှုနဲ့ အစိုးရအတွင်း လွှမ်းမိုးချယ်လှယ်မှုဆိုင်ရာတွေမှာ စွပ်စွဲပြစ်တင်ဖို့ လုံလောက်တဲ့အကြောင်းမတွေ့ရှိသော်လည်း ဆက်ဆံရေးအားနည်းချက်နဲ့ မိသားစုဝန်တွေကို ခန့်အပ်ဆောင်ရွက်ခြင်း အားနည်းချက်များတွေ့ရှိရသဖြင့် ပြင်းထန်စွာ သတိပေးသွားရန် ဟု စုံစမ်းစစ်ဆေးရေးအဖွဲ့ရဲ့ အစီရင်ခံစာမှာ အရေးယူဆောင်ရွက်ထားတာ တွေ့ရပါတယ်။

ဒါ့အပြင် ဦးညီညီမင်းအနေနဲ့ ကိုယ်ထိလက်ရောက်ကျူးလွန်မှု မဟုတ်သော်လည်း အစိုးရရဲ့ မူဝါဒနဲ့ ကျင့်ဝတ်များအပေါ် ဖောက်ဖျက်သဖြင့် ပြင်းထန်စွာသတိပေးသွားရန်နဲ့ ဦးညီညီမင်းနဲ့ မိသားစုဝင် (တူတော်စပ်သူ) ၂ ဦးကို တာဝန်မှရပ်ဆိုင်းသွားဖို့ အရေးယူဆောင်ရွက်ထားပါတယ်။

တိုင်ကြားသူတွေဟာ အစိုးရဌာနတွင်း တိုင်ကြားမှုနဲ့ စုံစမ်းစစ်ဆေးရေးကာလအတွင်း လိုက်နာစောင့်စည်းရမယ့် ကျင့်ဝတ်ကို အကြိမ်ကြိမ်ဖောက်ဖျက်ခဲ့တာကြောင့် NUG အစိုးရရဲ့ ဌာနအသီးသီးမှာ လက်ရှိတာဝန်ထမ်းဆောင်နေတဲ့ ဝန်ထမ်း ၄ ဦးကို စာဖြင့် သတိပေးဖို့ကိုလည်း အမျိုးသားညီညွတ်ရေးအစိုးရက အသိပေးထုတ်ပြန်ထားပါတယ်။

Photo - Social Media

#bbmnews #bbm #bbmtv #NUG #kyipyar #nyinyimin
https://www.facebook.com/share/p/18DNGJi7Nx/

⁨မြစ်ကြီးနားလေဆိပ်မှာ MNA လေယာဉ် ဗုံးထိမှန်မီးလောင်ပြီး ပြည်တွင်းလေကြောင်းခရီးစဉ်အားလုံး ရပ်နားလိုက်ရ

BBM-ဖေဖော်ဝါရီ ၂၁
သတင်း-ကိုအိုက်

ကချင်ပြည်နယ်၊ မြစ်ကြီးနားလေဆိပ်မှာ ရပ်နားထားတဲ့ မြန်မာအမျိုးသားလေကြောင်းလိုင်း (MNA) ပိုင် ခရီးသည်တင်လေယာဉ်တစ်စင်း ဗုံးထိမှန်မီးလောင်ခဲ့ပြီး လေကြောင်းခရီးစဉ် အားလုံးကို ရပ်ဆိုင်းလိုက်တယ်လို့ မြို့ခံတွေက BBM ကို ပြောပါတယ်။

မနေ့ ဖေဖော်ဝါရီလ ၂၀ ရက် ည ၈ နာရီဝန်းကျင်မှာ မြစ်ကြီးနားမှ မန္တလေးသို့ ပျံသန်းနေတဲ့ ATR-72-600 အမျိုးအစား လေယာဉ်ဟာ အမြီးပိုင်း ခေါင်းပိုင်းနဲ့ ကိုယ်ထည်ပိုင်းတို့ ဒရုန်း ဗုံးသီး ပစ်ခတ်တိုက်ခိုက်ခံရတာ ဖြစ်ပါတယ်။

အဲဒီဒရုန်း ဗုံးသီး ထိမှန်မှုကြောင့် လေယာဥ်မှာ မီးလောင်ပျက်စီးသွားသလို အရေးပေါ် ဆင်းသက်ရပြီး မြစ်ကြားနားသို့ ပြေးဆွဲနေတဲ့ ခရီးစဉ်အားလုံးကို ဒီနေ့ ဖေဖော်ဝါရီ ၂၁ ရက်နေ့မှစ၍ ရက်အကန့်အသတ်မရှိ ရပ်နားထားတယ်လို့ သိရပါတယ်။

"မနေ့ည ခရီးသည် ၁၀၀ ခန့်ပါတဲ့ လေယာဥ် အတက်မှာ ဒရုန်းဗုံးသီး ထိမှန်ပြီး အမြီးပိုင်း မီးလောင်လို့ အရေးပေါ် ဆင်းသက်လိုက်ရတယ်။ ခရီးသည်တွေက စိုးရိတ်ထိတ်လန့်တာကလွဲပြီး ထိခိုက်မှုမရှိဘူး။ ဒီမနက် လေယာဥ်လက်မှတ်အရောင်းဌာနက ဝန်ထမ်းတွေ ပြောပြတာ ရက်အကန့်အသတ်မရှိ ပိတ်လိုက်ပြီလို့ ပြောတယ်"လို့ မြစ်ကြီးနားမြို့ခံတစ်ဦးက BBM ကို ပြောပါတယ်။

အဲဒီလေယာဥ် ပစ်ခတ်ခံရတဲ့ ဖြစ်စဥ်နဲ့ပတ်သက်၍ စစ်ကောင်စီနဲ့ ကချင်လွတ်လပ်ရေးတပ်မတော် (KIA) တို့အကြား အပြန်အလှန် စွပ်စွဲခါးကြပါတယ်။

KIA နဲ့ PDF တွေက အရပ်ဘက် ခရီးတင် လေယာဥ်ကို ဒရုန်းတွေနဲ့ လာရောက်တိုက်ခိုက်ခဲ့ပြီး လေယဥ်မှာ ပျက်စီးသွားတယ်လို့ မနေ့ ဖေဖော်ဝါရီ ၂၀ ရက်နေ့၊ ညပိုင်းမှာ စစ်ကောင်စီတပ်က စွပ်စွဲသတင်းထုတ်ပြန်ထားပါတယ်။

KIO/KIA အနေနဲ့ အရပ်ဘက်ပစ်မှတ်နဲ့ လေယာဉ်တွေ တိုက်ခိုက်စရာအကြောင်း မရှိသလို မြစ်ဆုံစီမံကိန်းအတွက် လူထုတွေ့ဆုံပွဲလုပ်နေတဲ့အချိန်မှာ ပြည်သူတွေ အထင်လွဲစေဖို့ စစ်ကောင်စီက လုပ်ကြံဖန်တီးထားတာဖြစ်တယ်လို့ KIA ဘက်က သတင်းဌာနတချို့မှာ ပြောဆိုတုံ့ပြန်ထားပါတယ်။

မနေ့ညက စစ်ကောင်စီ လက်အောက်ခံ မြစ်ကြားနားမြို့ (၂၉) ရဲတပ်ရင်းမှာ လက်နက်ကြီးကျည်တွေ ပစ်ခတ်တာ၊ လက်နက်ငယ်တွေ ပစ်ခတ်တာတွေ ဆက်တိုက်ရှိပြီး တဆက်တည်း လေဆိပ်မှာ ပေါက်ကွဲမှု နှစ်ကြိမ်ဖြစ်တာလို့ သိရပါတယ်။

"လေယာဥ်ထိမှန်တဲ့ ဒရုန်းဗုံးသီးက ဘယ်အဖွဲ့အစည်းဟာဆိုတာ သေချာမသိဘူး။ မနေ့ညက ၂၉ ရဲတပ်ရင်းမှာ လက်နက်ကြီးကျည်၊ လက်နက်ငယ်တွေ ပစ်ခတ်တာရှိတယ်။ တဆက်တည်းပဲ ပေါက်ကွဲမှု နှစ်ကြိမ်ဖြစ်တယ်။ အဒါလေဆိပ်မှာ ဖြစ်သွားတာပါ။"မြစ်ကြီးနားမြို့ခံတစ်ဦးက BBM ကို ပြောတယ်။

ပြီးခဲ့တဲ့ ဖေဖော်ဝါရီလ ၁၂ ရက်နေ့ကလည်း မြစ်ကြီးနားလေဆိပ်အတွင်းသို့ FPV Suicide Drone တွေ ကျရောက်ခဲ့တဲ့ ဖြစ်စဉ်တစ်ခု ရှိခဲ့ဖူးပြီး စစ်ကောင်စီတပ်က KIA ရဲ့ လက်ချက်ကြောင့်ဖြစ်တယ်လို့ စွပ်စွဲထားပါတယ်။⁩

ဓာတ်ပုံ-လူမှုကွန်ရက်
https://www.facebook.com/share/p/186ggrNXVz/

ခမရ (၅၁၃) တပ်က ပင်လုံမြို့အဝင်အထွက်
ဂိတ်များမှ လစဥ်သိန်းရာကျော်ရရှိနေပြီး အဆိုပါဂိတ်တာဝန်များကို တပ်ရင်းမှူးမိန်းမက စီမံခန့်ခွဲ

🟥ရရှိငွေများကို ပြန်ခွဲရာမှာ အဆင့်ဆင့်ခေါင်းပုံဖြတ်နေတာကြောင့် တပ်သားအချင်းချင်းမကျေလည်မှုတွေဖြစ်နေ

BBM-ဖေဖော်ဝါရီ၂၁
သတင်း-မင်းသော်

ပင်လုံမြို့အခြေစိုက် တပ်တစ်ခုဖြစ်တဲ့ ခမရ (၅၁၃)တပ်ဟာ မြို့အဝင်အထွက် ဂိတ်စခန်းများမှ လစဥ် သိန်းရာကျော်ရရှိနေပြီး အဆိုပါဂိတ်တာဝန်များကို တပ်ရင်းမှူးရဲ့မိန်းမက အဓိကစီမံခန့်ခွဲနေတယ်လို့ တပ်တွင်းသတင်းရင်းမြစ်တွေရဲ့ပြောဆိုချက်အရသိရပါတယ်။

အဆိုပါ ခမရ (၅၁၃)တပ်ဟာ ရလခ တိုင်းစစ်ဌာနချုပ်ရှိ စကခ(၂)လက်အောက်ခံ တပ်ရင်းတစ်ရင်းဖြစ်ပြီး ပင်လုံ-လဲချားအဝင်အထွက်လမ်းနဲ့ ပင်လုံ-လွိုင်လင် အဝင်အထွက်လမ်းတို့မှာ ဂိတ်စခန်းဖွင့်ကာ ဒုအရာခံဗိုလ်တစ်ဦးခေါင်းဆောင်ပြီး အခြားစစ်ကောင်စီတပ်သားလေးယောက်အထိအင်အားချကာ ဂိတ်ဖွင့်ငွေတောင်းခံတာတွေပြုလုပ်နေတယ်လို့ သိရပါတယ်။

အဆိုပါဂိတ်စခန်းတွေမှ တစ်လလျှင် သိန်းငါးရာနီးပါးအထိ ဝင်ငွေရရှိနေပြီး အဆိုပါနေရာတွေကို တာဝန်ထမ်းဆောင်ဖို့ လူရွေးချယ်ရာမှာ ယာယီတပ်ရင်းမှူး ဗိုလ်မှူးဝင်းမင်းသူရဲ့ မိန်းမဖြစ်သူက အဓိက စီမံညွှန်ကြားနေတယ်လို့ တပ်တွင်းသတင်းရင်းမြစ်တစ်ဦးက BBM ကိုပြောပါတယ်။

" ခမရ(၅၁၃)က ပင်လုံ-လဲချား၊ ပင်လုံ-လွိုင်လင် အဝင် / အထွက် ဂိတ်တွေကို လုံခြုံရေးလုပ်နေရတာပါ၊ အဲ့မှာက ဒုအရာခံဗိုလ်တွေက အလှည့်ကျခေါင်းဆောင်ရတာ တစ်လတစ်လကို သိန်း၄၅၀လောက်ရတယ်၊ အဲ့လိုငွေဝင်တဲ့နေရာမှာ တာဝန်ချပေးဖို့ကိုက တပ်ရင်းမှူး မိန်းမကအဓိကစီမံတာပဲ သူနဲ့တည့်တဲ့ သူတွေကိုပဲ အဓိက ချပေးတာ"

အဆိုပါဂိတ်စခန်းတွေကို ခေါင်းဆောင်အဖြစ်တာဝန်ပေးရာမှာ တပ်ရင်းမှူးမိန်းမနဲ့သင့်မြတ်တဲ့ ဒုအရာခံဗိုလ်ခင်မောင်ညွှန့်၊ ဒုအရာခံဗိုလ် မင်းအောင်နဲ့ ဒုအရာခံဗိုလ် ဆန်းကျော်တို့ကိုသာ အလှည့်ကျနေရာပေးတာတွေပြုလုပ်တယ်လို့လည်း သိရပါတယ်။

ဒါ့အပြင် ရရှိလာတဲ့ငွေတွေကို တပ်ရင်းမှူးနဲ့ ဌာနချုပ်တပ်ခွဲမှူးတို့ကို သိန်းရာကျော် ပြန်ပေးပြီးနောပ် ကျန်ရှိတဲ့ ပိုက်ဆံတွေကို ခေါင်းဆောင်အဖြစ် တာဝန်ထမ်းဆောင်သူ အဆိုပါဒုအရာခံဗိုလ် တွေကသာ အဓိကယူပြီး ကျန်စစ်သားတွေကို ခွဲဝေပေးမှုတွေ မရှိတာကြောင့် တပ်တွင်း မကျေနပ်မှုတွေ လက်အောက်မှာ ဖြစ်နေတယ်လို့လည်း အဆိုပါ တပ်တွင်းသတင်းရင်းမြစ်ကဆက်ပြောပါတယ်။

" တပ်ရင်းမှူးနဲ့ ဌာနချုပ်တပ်ခွဲမှူးတို့ကိုပေးပြီး ကျန်ပိုက်ဆံတွေကို ဒုအရာခံဗိုလ်တွေကပဲ ယူတာ အောက်ကိုက တစ်ရက် ၁ သောင်းလောက်ပဲပေးတယ်၊ ယူချင်ယူ မယူချင်နေဆိုတဲ့ပုံမျိုးနဲ့ပေးတာ၊ တကယ်လို့ အထက်ကသိလို့ ထောင်ကျရင် သူတို့ပဲထောင်ကျမှာ ဒါကြောင့် သူတို့ပဲယူမယ်ဆိုပြီးတောင် တရားဝင်ပြောသေးတယ်"

ခမရ (၅၁၃) တပ်ရင်းအတွင်း အဆိုပါဂိတ်စခန်းကိစ္စသာမက အခြားတပ်တွင်းဖိနှိပ်မှုတွေ၊ အထက်အောက် အနိုင်ကျင့်ဖိနှိပ်ချုပ်ချယ်မှုတွေနဲ့ ခွင့်ကိစ္စ မကျေလည်မှုတွေပါ အမြောက်အများရှိနေပြီး အထက်ကိုသတင်းပို့တိုင်ကြားပေမဲ့လည်း အကြောင်းတစ်စုံတစ်ရာထူးခြင်းမရှိဘူးဟုလည်း သိရပါတယ်။

Photo-social media
https://www.facebook.com/share/p/18DFY2RiAX/

ရွေးကောက်ပွဲပြီးလို့ တကျော့ပြန်တိုက်ပွဲပြင်းထန်လာတဲ့ တနင်္သာရီတိုင်းမှာ လေကြောင်းနဲ့ပိုတိုက်ခိုက်နေ

BBM-ဖေဖော်ဝါရီ၂၁
သတင်း - ကိုဟန်

တနင်္သာရီတိုင်းရှိ မြို့နယ်အချို့မှာ စစ်တပ်က တကျော့ပြန်ထိုးစစ်ဆင်တာတွေ လုပ်ဆောင်နေတဲ့အတွက် တော်လှန်ရေးတပ်တွေနဲ့ စစ်ရေးတင်းမာနေပြီး လေကြောင်းတိုက်ခိုက်မှု ပိုမိုလုပ်ဆောင်နေတယ်လို့ သိရပါတယ်။

မြေပြင်စစ်ကြောင်းအတွက် အင်အားထောင်ချီအသုံးပြုထားတဲ့ စစ်တပ်ဟာ သရက်ချောင်း၊ ပုလော၊ ထားဝယ်၊ တနင်္သာရီ၊ ရေဖြူမြို့နယ်တို့မှာ စစ်ကြောင်းထိုးနေတာ ဖြစ်ပါတယ်။

ဒီလိုစစ်ကြောင်းမထိုးခင် စစ်တပ်ဟာ တော်လှန်ရေးတပ်တွေ ရှိနိုင်တဲ့နေရာကို ကြိုတင်ကင်းထောက်တာတွေ ပြုလုပ်ပြီး လေကြောင်းကနေ ပစ်ခတ်တိုက်ခိုက်မှုတွေ လုပ်ဆောင်ပြီးမှသာ မြေပြင် စစ်ကြောင်းက အချိန်ကိုက် ဝင်လာတာလို့ ထားဝယ်အခြေစိုက်တော်လှန်ရေးတပ်ဖွဲ့တွေက ပြောပါတယ်။

“စစ်ရေးအရှိန်မြှင့်ထားတာ ဒီလိုမမြှင့်ခင်မှာ တော်လှန်ရေးတပ်တွေရဲ့ နေရာအတည်တကျကို ကြိုတင်ပြုစုထား တဲ့ ပုံစံပဲ၊ ဒါပေမဲ့ တကယ်တမ်းတိုက်ခိုက်တဲ့အခါမှာ အရပ်သားတွေ နေထိုင်တဲ့နေရာပဲ တိုက်ခိုက်နေတာ” လို့ ထားဝယ်အခြေစိုက်တော်လှန်ရေးရဲဘော်တဦးက BBM ကို ပြောပါတယ်။

ဒါဟာ ရွေးကောက်ပွဲပြီးတဲ့ကာလနောက်ပိုင်း စစ်တပ်ဘက်က စစ်ရေးအရှိန်မြှင့်တင်လာတာဖြစ်ပြီး ဖေဖော်ဝါရီလ သုံးပတ်တာအတွင်း လေကြောင်းတိုက်ခိုက်မှု ၁၂ ကြိမ်အထက်မှာ ရှိခဲ့တာ တွေ့ရှိရပါတယ်။

လက်ရှိ စစ်တပ်ရဲ့ မြေပြင်စစ်ကြောင်းနဲ့ တော်လှန်ရေးပူးပေါင်းတပ်တို့ဟာ ထားဝယ်အရှေ့တောဒေသ၊ အမှတ်(၈)ပြည်ထောင်စုလမ်းပိုင်းနဲ့ မြို့နယ်နေရာအချို့မှာ တိုက်ပွဲဖြစ်ပွားနေတယ်လို့ တော်လှန်ရေးတပ်တွေက ပြောပါတယ်။

တိုက်ပွဲအများစုဟာ စစ်တပ်စစ်ကြောင်းကို တော်လှန်ရေးတပ်က ကြားဖြတ်တိုက်ခိုက်တာ၊ ဒရုန်းနဲ့ တိုက်ခိုက်တဲ့ အတွက် ပစ်ခတ်ချိန်က မိနစ်ပိုင်းမျှသာ ရှိခဲ့ပေမဲ့ အချို့တိုက်ပွဲတွေဟာ နာရီနဲ့ချီကြာမြင့်ပြီး စစ်တပ်အခြေစိုက် တပ်စခန်းကို တော်လှန်ရေးပူးပေါင်းတပ်တွေက ယာယီထိန်းချုပ်နိုင်ခဲ့တာ ရှိနေပါတယ်။

အနီးစပ်ဖြစ်စဉ်တခုမှာ ဖေဖော်ဝါရီလတတိယအပတ်ထဲမှာပင် ထားဝယ်မြို့နယ် မောင်မယ်ရှောင်ကျေးရွာ GTC တပ်စခန်းနဲ့ ပုလောမြို့နယ် တောင်ခေါင်းလောင်းရွာ စစ်တပ်စခန်းကို ကရင်တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့ပါတယ်။

“ဖြစ်နေတာက နေရာအများကြီးပေါ့နော်၊ သူတို့(စစ်တပ်)ဘက်က သူတို့အရှိန်ပဲ မြှင့်မြှင့်ပေါ့၊ ကျွန်တော်တို့လည်း ကျွန်တော်တို့လုပ်နေပါတယ်၊ တခုခုဆို အခုတိုက်ပွဲဖြစ်နေတဲ့နေရာကို ကျွန်တော်တို့ မပြောချင်သေးဘူး၊ ဘာလို့ဆိုတော့ အခုတောင်တခုခုဆို သူတို့လေကြောင်းအားသာချက်ရှိနေတယ်၊ အဲဒီတော့ ဘယ်နေရာ ဖြစ်နေသလဲဆိုတာ မပြောပါရစေနဲ့ အခြေအနေက ပိုပြီးကြမ်းနေတဲ့သဘောတော့ ရှိတယ်” လို့ ပုလောမြို့နယ် အခြေစိုက်တော်လှန်ရေးရဲဘော်တဦးက ပြောပါတယ်။

ဒီလိုမျိုး လက်လွှတ်ထားတဲ့နယ်မြေကို ပြန်လည်ရရှိဖို့နဲ့ နယ်မြေချဲ့ထွင်းနေတဲ့ စစ်တပ်ဟာ အရပ်သားပစ်မှတ်ကို တိုက်ခိုက်နေသလို ဒေသခံနေအိမ် မီးရှို့ဖျက်ဆီးတာ၊ ဖမ်းဆီးသတ်ဖြတ်တာ၊ ပေါ်တာဆွဲတာတွေ လုပ်ဆောင်နေ တယ်လို့ ဒေသခံအချို့က ပြောပါတယ်။

ဒါ့အပြင် စစ်တပ်ဟာ လေကြောင်းတိုက်ခိုက်မှုသာမက လက်နက်ကြီးပစ်ခတ်မှုတွေ အဆက်မပြတ်ရှိနေတဲ့ အတွက် ဒေသခံတွေ ထိခိုက်သေဆုံးတာ ရှိနေသလို အချို့ဆို ရွာလုံးကျွတ်ထွက်ပြေးတိမ်းရှောင်နေရတယ်လို့ စစ်ရှောင်ကူညီသူအချို့က ပြောပါတယ်။

“နေရာတိုင်းကို စာရင်းလိုက်ကောက်တာ လက်လှမ်းမမီသေးဘူး၊ ဒီတလော ဖြစ်တဲ့တိုက်ပွဲကြောင့် ဒီလေးမြို့နယ်၊ ငါးမြို့နယ်မှာ အရပ်သားထောင်ချီလောက်က ထွက်ပြေးနေရတယ်၊ အခုအခြေအနေက စစ်ရေးတင်းမာနေတုန်းကာလဆိုတော့ ရေရှည်တိမ်းရှောင်ရမဲ့သဘောရှိတယ်” ဟု ရေဖြူမြို့နယ်မှာ စစ်ဘေးရှောင်ကူညီနေသူတဦးက ပြောပါတယ်။

အခုတိုက်ပွဲကြောင့် ထွက်ပြေးနေရတဲ့ ပြည်သူတွေဟာ တောတောင်၊ ဥယျာဉ်ခြံမြေနဲ့ စစ်ရှောင်စခန်းအချို့မှာ တိမ်းရှောင်နေရပြီး သူတို့အတွက် သောက်သုံးရေ၊ စားနပ်ရိက္ခာနဲ့ အမိုးအကာ၊ ဆေးဝါးလိုအပ်ချက်တွေ ရှိနေတယ်လို့ သူကဆက်ပြောပါတယ်။

“ကျွန်တော်တို့ ရေးနဲ့ ရေဖြူအစပ်ကြားဆို စစ်ကြောင်းက နေတိုင်းတိုးနေတယ်၊ ပြီးတော့ ထားဝယ် ရေနက်ဆိပ်ကမ်းဘက်ဆို အင်အားဖြည့်ထားတော့ အဲဒီဘက်လည်း ထိတွေ့မှု ရှိတယ်၊ အဓိက ဒရုန်းနဲ့ လက်နက်ကြီးကို ပစ်တယ်၊ ဒီမြေပြင်စစ်ကြောင်းက အရမ်းမတိုးလာရဲဘူး” လို့ ရေဖြူအခြေစိုက်တော်လှန်ရေး ရဲဘော်တဦးက ပြောပါတယ်။

တနင်္သာရီတိုင်းမှာ ယခုနှစ်အစောပိုင်းကာလအတွင်း ဖြစ်ပွားခဲ့တဲ့တိုက်ပွဲမှာ KNU ပူးပေါင်းတပ်ဘက်က ထိခိုက်သေဆုံးမှု ရှိခဲ့သလို စစ်တပ်ဘက်က ဗိုလ်မှူးအဆင့်ရှိသူ အပါအဝင် အများအပြားသေဆုံးထားပြီး စစ်သုံ့ပန်း၊ လက်နက်ခဲယမ်းနဲ့ စစ်တပ်အချို့ကို တော်လှန်ရေးပူးပေါင်း တပ်ဘက်က သိမ်းဆည်းရခဲ့တယ်လို့ ထုတ်ပြန်ချက်တွေအရ သိရပါတယ်။

ဓါတ်ပုံ - KNU ၊ ဒူရကစစ်ကြောင်း
ပုံစာ - တနင်္သာရီတိုင်းတိုက်ပွဲအတွင်း သိမ်းဆည်းရမိတဲ့ လက်နက်ခဲယမ်းနဲ့ စစ်သုံ့ပန်းများ
https://www.facebook.com/share/p/1GLUxw5NXo/