မကြည်ပြာအမှုမှာ NUGရဲ့ထုတ်ပြန်ချက်ကြောင့် တက္ကသိုလ်၀င်ခွင့် ခေါ်ယူမှုတွေ ယာယီရပ်ဆိုင်း

🟥အဆိုပါပြဿနာ ကျေလည်မှုမရမချင်း ရပ်ဆိုင်းမည်ဖြစ်ပြီး CDM၀န်ထမ်းများနှင့်အတူ တသားတည်းရပ်တည်

BBM-ဖေဖော်ဝါရီ၁၉
သတင်း-မင်းသော်

မကြည်ပြာအမှုအပေါ် NUG ရဲ့ထုတ်ပြန်ပြောဆိုချက်တွေဟာ ယုံကြည်ဖွယ်ရာ မရှိတာကြောင့် တက္ကသိုလ်ဝင်ခွင့်ခေါ်ယူမှုတွေကို အဆိုပါပြဿနာ ကျေလည်မှုမရမချင်း ရပ်ဆိုင်းမည်
ဖြစ်ပြီး CDM၀န်ထမ်းများနဲ့အတူ တသားတည်းရပ်တည်တယ်လို့ NUG ပညာရေးဝန်ကြီးဌာန၊ တက္ကသိုလ်ဝင်ခွင့်လမ်းညွှန် ဖြစ်မြောက်ရေးအဖွဲ့က အသိပေးထုတ်ပြန်ထားပါတယ်။

NUG ဝန်ကြီးချုပ်ရုံးက မကြည်ပြာအမှုနဲ့ပတ်သတ်ပြီး ဖေဖော်ဝါရီလ ၁၈ရက် ရက်စွဲပါ အမိန့်အမှတ်(၁၅/၂၀၂၆)နဲ့ထုတ်ပြန်တဲ့ထုတ်ပြန်ချက်ဟာ အလွန်တာဝန်ယူမှု၊ တာဝန်ခံမှုမရှိတဲ့အပြင် အားကိုးယုံကြည်ရတဲ့ အစိုးရအပေါ် စိတ်ပျက်စေတဲ့အခြေအနေမျိုးဖြစ်ပေါ်စေတယ်လို့လည်း ဆိုပါတယ်။

အဆိုပါအမှုနဲ့ပတ်သတ်ပြီး သက်ဆိုင်ရာစုံစမ်းစစ်ဆေးရေးအဖွဲ့ရဲ့ထုတ်ပြန်ချက်ဟာ ယုံကြည်စရာမရှိတာကြောင့် ကျူးလွန်ခံရတဲ့ CDM ဝန်ထမ်းများနဲ့အတူရပ်တည်ပြီး NUG အစိုးရခေါင်းစဥ်အောက်က ဆောင်ရွက်နေတဲ့ တက္ကသိုလ်ဝင်ခွင့် (စတုတ္တအကြိမ်)ခေါ်ဆိုခြင်းကို တစ်စုံတစ်ရာကျေလည်မှုမရမချင်းရပ်ဆိုင်းလိုက်တယ်လို့ သိရပါတယ်။

NUG အနေဖြင့် တိုင်တန်းချက်အတွက် စုံစမ်းစစ်ဆေးခဲ့တဲ့ စစ်ဆေးချက်တွေ၊ သက်သေခံချက်တွေကို အများပြည်သူထံ ပွင့်လင်းမြင်သာစွာ ထုတ်ပြန်ပေးရန်၊ စုံစမ်းစစ်ဆေးမှုဖြစ်စဉ်မှာလိုအပ်ချက်များရှိရင်လည်း တရားသဖြင့် ပြန်လည်စစ်ဆေးပေးရန်အတွက်လည်း တောင်းဆိုတယ်လို့ ဆိုပါတယ်။

ဒီဆုံးဖြတ်ချက်ကြောင့် တက္ကသိုလ်ဝင်ခွင့်လျှောက်ထားကြတဲ့ ကျောင်းသား/သူများအကြား
နစ်နာမှုဖြစ်နိုင်ကြောင်းကို သိရှိပေမဲ့ မတရားမှုကို ဆန့်ကျင်နေတဲ့ CDM ဝန်ထမ်းရပ်ဝန်း ဖြစ်
တဲ့အတွက်၎င်းတို့၏ရပ်တည်ချက်ကို နားလည်ပေးစေလိုတယ်လို့ NUG ပညာရေးဝန်ကြီးဌာန၊ တက္ကသိုလ်ဝင်ခွင့်လမ်းညွှန် ဖြစ်မြောက်ရေးအဖွဲ့က အသိပေးထုတ်ပြန်ထားပါတယ်။
https://www.facebook.com/share/p/1GGdmMRhBB/

ပုလောမြို့နယ်၊ တောင်ခေါင်းလောင်းရွာမှာရှိတဲ့စစ်ကောင်စီစခန်းကို တော်လှန်ရေးတပ်ဖွဲ့တွေ သိမ်းပိုက်

BBM - ဖေဖော်ဝါရီ ၂၀
သတင်း - ကိုဘုဏ်း

တနင်္သာရီတိုင်း၊ပုလောမြို့နယ် ၊တောင်ခေါင်းလောင်းရွာမှာရှိတဲ့ စစ်ကောင်စီစခန်းကို တော်လှန်ရေးတပ်ဖွဲ့တွေက သိမ်းပိုက်လိုက်တယ်လို့ KNLA တပ်မဟာ ၄ အထူးတပ်ဖွဲ့က ထုတ်ပြန် ကြေငြာထားပါတယ်။

ဖေဖော်ဝါရီလ ၁၉ရက်နေ့ မနက် ၅နာရီခွဲမှာ စစ်ကောင်စီတပ်ဖွဲ့နဲ့ ပြည်သူ့စစ်အင်အား ၂၇ယောက် တပ်စွဲထားတဲ့ အဆိုပါစခန်းကို ဒရုန်းနဲ့ 8kg ဗုံး ၃ လုံးကြဲချတိုက်ခိုက်မှုအပြီးမှာ စစ်ကောင်စီတပ်တွေ စခန်းကိုစွန့်ခွာ ထွက်ပြေးသွားခဲ့ကြတယ်လို့ သိရပါတယ်။

အဲ့ဒီနောက် စစ်ကောင်စီရေတပ်မှလည်း မနက် ၇နာရီခန့်မှာ လက်နက်ကြီး ၇ လုံးခန့်ပစ်ကူပေးခဲ့ပေမဲ့ တော်လှန်ရေးတပ်ဖွဲ့တွေဘက်က အထိအခိုက်မရှိခဲ့ဘူးလို့လည်း သိရပါတယ်။

ဒါ့အပြင် စစ်ကောင်စီရဲ့လေတပ်မှလည်း Jet fighter နဲ့ နှစ်ကြိမ်တိုင် လေကြောင်းတိုက်ခိုက်မှု ပြုလုပ်ခဲ့ပေမဲ့ အထိအခိုက်မရှိလို့ သိရပါတယ်။

တောင်ခေါင်းလောင်းရွာစခန်းသိမ်းတိုက်ပွဲမှာ စစ်ကောင်စီဘက်က ၃ဦးသေဆုံးပြီး ၂ဦး ထိခိုက်ဒဏ်ရာရရှိခဲ့ကြတယ်လို့ သိရပါတယ်။

လက်နက်ပစ္စည်းတွေ သိမ်းဆည်းရရှိမှုအနေနဲ့ ၆၀ မမ တာဝေးပစ် ဗုံးသီး ၁၀လုံးနဲ့ အီနာဂါ ၂လုံး သိမ်းဆည်းရမိခဲ့တယ်လို့သိရပါတယ်။

အဆိုပါ တောင်ခေါင်းလောင်း ရွာစခန်းသိမ်းတိုက်ပွဲကို ကေအဲန်ယူ တပ်မဟာ ၄ရဲ့ အထူးတပ်ဖွဲ့နဲ့အတူ DNLA ရဲ့ ပူးပေါင်းတပ်တွေက တိုက်ခိုက်ခဲ့ကြတယ်လို့ လည်းသိရပါတယ်။

တော်လှန်ရေးအောင်မြင်ဖို့ အတွက် စစ်ကောင်စီကို အခွင့်ရေးရတိုင်းတိုက်ခိုက်မှု တွေ ပြုလုပ်နေမှာဖြစ်တာကြောင့် စစ်ကောင်စီတပ်တွေရဲ့အနီးအနားမှာ မနေကြရန် ကေအဲန်ယူ တပ်မဟာ ၄
အထူးတပ်ဖွဲ့က ထုတ်ပြန်ကြေငြာထားပါတယ်။

ပုံ - ကေအဲန်ယူ တပ်မဟာ ၄
အထူးတပ်ဖွဲ့

#bbmnews #bbm #bbmtv #pulaw #KNU #DNLA
https://www.facebook.com/share/v/1C3R8CjWZt/

အမေရိကန်စစ်တပ်က အခုသီတင်းပတ်ကုန်မှာ အီရန်ကို တိုက်ခိုက်ရန် ပြင်ဆင်နေသော်လည်း ထရမ့်က နောက်ဆုံးဆုံးဖြတ်ချက် မချရသေးဟု သတင်းရင်းမြစ်များ ပြောကြား

BBM - ဖေဖော်ဝါရီ ၂၀
သတင်း - Richard

အမေရိကန်စစ်တပ်က အခုသီတင်းပတ်ကုန်မှာ အီရန်ကို တိုက်ခိုက်ဖို့ အသင့်ဖြစ်နေပေမဲ့ သမ္မတဒေါ်နယ်ထရမ့်က နောက်ဆုံးဆုံးဖြတ်ချက် မချရသေးကြောင်း နီးစပ်တဲ့ သတင်းရင်းမြစ်တွေက CNN ကို ပြောကြားခဲ့ပါတယ်။

မကြာသေးမီရက်တွေအတွင်းက အမေရိကန် စစ်တပ်ဟာ အရှေ့အလယ်ပိုင်းမှာ လေကြောင်းနဲ့ ရေတပ်စစ်ရေးအင်အားတွေ သိသိသာသာ စုဆောင်းပြီးနောက် အခုသီတင်းပတ်ကုန်မှာ စစ်ရေးအရ အရေးယူဖို့ အသင့်ဖြစ်နေနိုင်ကြောင်း အိမ်ဖြူတော်ကို အသိပေးခဲ့ကြောင်း
သတင်းရင်းမြစ်တွေက ပြောကြားခဲ့ပါတယ်။

ဒါပေမဲ့ ထရမ့်ဟာ အဆိုပါလုပ်ရပ်ကို ထောက်ခံသူနဲ့ ကန့်ကွက်သူတွေကြောင့် အကြံပေးတွေနဲ့ မဟာမိတ်တွေကို အကြံဥာဏ်တောင်း မေးမြန်းခဲ့ကြောင်း သတင်းရင်းမြစ်တစ်ခုက ဆိုပါတယ်။

ဖေဖော်ဝါရီလ ၁၈ရက်နေ့က အီရန်နိုင်ငံရဲ့ အခြေအနေကို ဆွေးနွေးဖို့ ထိပ်တန်းအစိုးရရဲ့ အမျိုးသားလုံခြုံရေးအရာရှိတွေက အိမ်ဖြူတော်မှာ တွေ့ဆုံခဲ့ကြောင်း နီးစပ်တဲ့ ပုဂ္ဂိုလ်တစ်ဦးက ပြောကြားခဲ့ပါတယ်။

ထရမ့်ကို အထူးသံတမန် Steve Witkoff နဲ့ ထရမ့်ရဲ့ သားမက် Jared Kushner တို့က ဖေဖော်ဝါရီလ ၁၈ရက်နေ့က အီရန်နဲ့ ပြုလုပ်ခဲ့တဲ့ ဆွေးနွေးမှုတွေ အကြောင်း ပြောကြားခဲ့ပါတယ်။

ထရမ့်က လာမယ့် သီတင်းပတ်ကုန်မှာ ဘယ်လိုဆုံးဖြတ်မယ်ဆိုတာကို ရှင်းရှင်းလင်းလင်း မသိရသေးပါဘူး။

အမေရိကန်ဟာ လာမယ့် သီတင်းပတ်ကုန်မှာ အီရန်ကို တိုက်ခိုက်ဖို့ အသင့်ဖြစ်နေပြီဆိုတဲ့ သတင်းကို BBCရဲ့ မိတ်ဖက်သတင်းဌာန CBS News မှ ပထမဆုံး ဖော်ပြခဲ့တာပါ။

ဖေဖော်ဝါရီလ ၁၇ရက် အင်္ဂါနေ့က ဂျီနီဗာမှာပြုလုပ်ခဲ့တဲ့ သွယ်ဝိုက်ဆွေးနွေးမှုတွေအတွင်း အီရန်နဲ့ အမေရိကန် ညှိနှိုင်းရေးမှူးတွေဟာ သုံးနာရီခွဲကြာ ဆွေးနွေခဲ့ကြပေမဲ့ ရှင်းလင်းတဲ့ ဆုံးဖြတ်ချက်တွေ မချနိုင်ခဲ့ဘူးလို့ သိရပါတယ်။

အီရန်ရဲ့ ထိပ်တန်းညှိနှိုင်းရေးမှူးက နှစ်ဖက်စလုံးဟာ ဆွေးနွေးမှုကို သဘောတူညီခဲ့ကြတယ်လို့ ပြောကြားခဲ့ပေမဲ့ အမေရိကန်အရာရှိတစ်ဦးက “ဆွေးနွေးဖို့ အသေးစိတ်အချက်အလက်များစွာ ရှိနေသေးတယ်” လို့ ပြောကြားခဲ့ပါတယ်။

အိမ်ဖြူတော်ပြောရေးဆိုခွင့်ရှိသူ Karoline Leavitt က အီရန်ဟာ ညှိနှိုင်းမှုနဲ့ပတ်သက်တဲ့ အသေးစိတ်အချက်အလက်တွေကို “လာမယ့် ရက်သတ္တပတ်အနည်းငယ်အတွင်း” ပေးအပ်ဖို့ မျှော်လင့်ရကြောင်း ဖေဖော်ဝါရီဘ ၈ရက် ဗုဒ္ဓဟူးနေ့က ပြောကြားခဲ့ပေမဲ့ ထရမ့်ဟာ အဆိုပါ ကာလအတွင်း စစ်ရေးအရအရေးယူမှုကို ရွှေ့ဆိုင်းမယ်၊ မရွှေ့ဆိုင်းဘူးဆိုတာကို ပြောကြားခဲ့တာမျိုး မရှိခဲ့ပါဘူး။

အမေရိကန်နိုင်ငံခြားရေးဝန်ကြီး Marco Rubio က အစ္စရေးဝန်ကြီးချုပ် Benjamin Netanyahu နဲ့တွေ့ဆုံပြီး အီရန်ဆွေးနွေးပွဲ တွေအကြောင်း အသိပေးရန်အတွက် ဖေဖော်ဝါရီ ၂၈ ရက်မှာ အစ္စရေးသို့ သွားရောက်ဖို့ မျှော်လင့်ရကြောင်း နိုင်ငံခြားရေးဌာနအရာရှိတစ်ဦးက CNN ကို ဖေဖော်ဝါရီလ ၁၈ရက် ဗုဒ္ဓဟူးနေ့မှာ ပြောကြားခဲ့ပါတယ်။

Reference - CNN World

#bbmnews #bbm #bbmtv #CNN #MarcoRubio #BenjaminNetanyahu
https://www.facebook.com/share/p/1JT9GKxE3i/

ဂန့်ဂေါမြို့ စစ်ကောင်စီအမြောက်တပ်မှ တပ်သား ၁ ဦးလက်နက်ခဲယမ်းများနဲ့ အလင်းဝင်

BBM - ဖေဖော်ဝါရီ ၂၀
သတင်း - ခက်ဆစ်

မကွေးတိုင်း၊ ယောဒေသ၊ ဂန့်ဂေါမြို့ရှိ စစ်ကောင်စီရဲ့ အမှတ် ၃၇၁ အမြောက်တပ်မှ တပ်သား တစ်ဦးက ယောတော်လှန်ရေးတပ်-YRA ထီးလင်းထံသို့ လက်နက်နဲ့အတူ အလင်းဝင်ရောက်ခဲ့တယ်လို့ ယောအလင်းတန်းက ယမန်နေ့ ညပိုင်းမှာ ထုတ်ပြန်ထားပါတယ်။

ဖေဖော်ဝါရီလ ၁၇ ရက်မှာ အမတ ၃၇၁ မှ တပ်သား သန့်ဇင်အောင် ဟာ MA1 ၁ လက်၊ ကျည်ဘောက် ၃ ခု၊ ကျည် ၇၀ ‌တောင့်တို့နဲ့အတူ ထွက်ပြေးလာပြီး YRA ထီးလင်းထံသို့ အလင်းဝင်ခဲ့တယ်လို့ သိရပါတယ်။

အဆိုပါ တပ်သား သန့်ဇင်အောင်ဟာ အလင်းဝင်ရောက်နိုင်ဖို့ ပြည်သူ့တော်လှန်ရေးအဖွဲ့များနဲ့ ကြိုတင်ချိတ်ဆက်မှု မရှိခဲ့ဘဲ ဖေဖော်ဝါရီလ ၁၂ ရက်နေ့မှာ ပြည့်ဝ အမြောက်တပ်(၃၇၁)မှ စထွက်လာတာဖြစ်တယ်လို့ ဆိုပါတယ်။

ကြိုတင်ချိတ်ဆက်မှု မရှိတာကြောင့် လမ်းခရီးမှာ ၅ ရက်ကြာမြင့်ခဲ့ပြီး ဖေဖော်ဝါရီလ ၁၇ ရက်နေ့ မနက်ပိုင်းမှာမှ ပြည်သူ့တော်လှန်ရေး ခရိုင်တပ်ရင်းတခုဖြစ်တဲ့ YRA ထီးလင်းအဖွဲ့ရဲ့ တပ်စခန်းတခုကို ရောက်ရှိအလင်းဝင်ခဲ့တာဖြစ်တယ်လို့ သိရပါတယ်။

Photo - ယောအလင်းတန်း

#bbmnews #bbm #bbmtv #Magway #Gangaw
https://www.facebook.com/share/p/1B7xwuKuJb/

နဂါး စကစနဲ့ ပူးပေါင်းသွားပြီးနောက် ပုလဲမြို့နယ်မှာ စစ်ကြောင်း ၂ ကြောင်း အင်အား ၃၀၀ ကျော်နဲ့ စစ်တပ်စစ်ကြောင်းထိုးနေ

BBM - ဖေဖော်ဝါရီ ၂၀
သတင်း - နိုင်နိုင်

နဂါး စစ်ကောင်စီတပ်နဲ့ ပူးပေါင်းသွားပြီးနောက် စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်းကို စစ်ကြောင်း ၂ ကြောင်းခွဲကာ အင်အား ၃၀၀ ကျော်နဲ့ စစ်ကောင်စီတပ်က စစ်ကြောင်းထိုးနေတယ်လို့ ဒေသခံစစ်ရေးသတင်းရင်းမြစ်တွေဆီက သိရပါတယ်။

စစ်ကောင်စီတပ်ဟာ မနေ့က ဖေဖော်ဝါရီလ ၁၉ ရက်နေ့၊ မနက်ပိုင်းက မုံရွာမြို့အခြေစိုက် အနောက်မြောက်တိုင်း စစ်ဌာနချုပ် - နမခ ကနေ ပုလဲမြို့နယ်၊ ကုက္ကိုလ်ကုန်းကျေးရွာကို MI-17 ရဟတ်ယာဉ်နဲ့ ၁၀ ကြိမ် အင်အား ၂၀၀ ခန့် ပို့ဆောင်လိုက်တာဖြစ်တယ်လို့ ယင်းမာပင်ခရိုင် ပြည်သူကာကွယ်ရေးတပ်ဖွဲ့ဝင် တစ်ဦးက BBM ကို ပြောပါတယ်။

အလားတူ စစ်ကောင်စီတပ်ဟာ စစ်ကိုင်းတိုင်း၊ ဆားလင်းကြီးမြို့နယ်ကနေ ဝမ်ပေါင်ကြေးနီစီမံကိန်းအနီးကိုလည်း ခြောက်ဘီးကား ၆ စီးနဲ့ အင်အား ၁၀၀ ကျော် ထပ်မံပို့ဆောင်လိုက်တာဖြစ်ပြီး အဲဒီစစ်ကောင်စီ စစ်ကြောင်း ၂ ကြောင်းဟာ ပုလဲမြို့ပေါ်ကို ဦးတည်ကာ စစ်ကြောင်းထိုးနေတယ်လို့လည်း သိရပါတယ်။

"ပုလဲမြို့နယ်အတွင်းကို အင်အား ၂၀၀ ခန့် ပို့လိုက်ပါတယ်၊ MI - 17 ရဟတ်ယာဥ်နဲ့ ၁၀ ကြိမ်ပို့လိုက်တာပါ၊ ဆားလင်းကြီးမြို့နယ်အတွင်းက ဝမ်ပေါင်ကိုတော့ ခြောက်ဘီးကား ၆ စီးနဲ့ အင်အား ၁၀၀ ကျော်ခန့် ပို့လိုက်ပါတယ်ဗျ၊ အဲဒီစစ်ကြောင်း ၂ ကြောင်းလုံးက ပုလဲမြို့နယ်အတွင်းကို ဦးတည်ပြီးတော့ ထိုးနေပါတယ်၊ ပြည်သူတွေကတော့ ဘေးလွတ်ရာနေရာတွေကို ရှောင်ရှားနေရပါတယ်" လို့ ယင်းမာပင်ခရိုင် ပြည်သူကာကွယ်ရေးတပ်ဖွဲ့ဝင် တစ်ဦးက BBM ကို ပြောပါတယ်။

စစ်ကောင်စီတပ်ရဲ့ စစ်ကြောင်းထိုးမှုတွေကြောင့် ပုလဲမြို့နယ်က မြကုန်း၊ ကုက္ကိုကုန်း၊ စေတီယုံ၊ နွယ်ရှောက်၊ ဇောင်ချမ်းကုန်း စတဲ့ ကျေးရွာတွေက ဒေသခံ ပြည်သူတွေမှာ နီးစပ်ရာနေရာတွေကို စစ်ဘေးတိမ်းရှောင် ထွက်ပြေးနေရတယ်လို့လည်း ဒေသခံတွေဆီက သိရပါတယ်။

"စစ်ကောင်စီ စစ်ကြောင်းနဲ့ ထိတွေ့တိုက်ပွဲတွေ ဖြစ်ပွားတာတွေ မရှိသေးဘူးဗျ၊ အဲဒီစစ်ကြောင်းတွေကြောင့်ပဲ ပုလဲမြို့အနီးက ကျေးရွာပေါင်း ၁၀ ကျော်က ဒေသခံတွေ စစ်ဘေးတိမ်းရှောင်နေကြရပါတယ်" လို့ ဒေသခံကာကွယ်ရေး တပ်ဖွဲ့ဝင်တစ်ဦးက ဆက်ပြောပါတယ်။

အခုနှစ် ပြီးခဲ့တဲ့ ဇန်နဝါရီလ ၁၇ ရက်နေ့၊ မနက်ပိုင်းက အမျိုးသားညီညွှတ်ရေးအစိုးရ (NUG) လက်အောက်ခံ ယင်းမာပင်ခရိုင် ပြည်သူ့ ကာကွယ်ရေးတပ် (PDF) ဟာ BNRA စခန်းတွေကို ဝင်ရောက်ကာ တိုက်ပွဲတွေဖြစ်ပွားခဲ့ပြီး နဂါးဦးဆောင်တဲ့ BNRA တပ်က တပ်ဖွဲ့ဝင်အင်အား ၁၅၀ ခန့် NUG လက်အောက်ခံ ပြည်သူ့ကာကွယ်ရေးတပ်ဆီမှာ လက်နက်ချ ပူးပေါင်းခဲ့ပါတယ်။

ပြည်သူ့ကာကွယ်ရေးတပ်တွေက နဂါးကို ဖမ်းဆီးဖို့ ပြုလုပ်နေချိန်အတွင်းမှာပဲ စစ်ကောင်စီတပ်က နဂါးနဲ့ သူရဲ့မိသားစုဝင် ၂၀ ခန့်ကို ပုလဲမြို့အနီးရှိ သေတ္တရာကျေးရွာကနေ MI - 17 ရဟတ်ယာဥ် ၂ စီးနဲ့ ခေါ်ထုတ်သွားတာလည်း ဖြစ်ပါတယ်။

လက်ရှိမှာတော့ ယင်းမာပင်ခရိုင် ပြည်သူ့ကာကွယ်ရေးတပ် (PDF) က BNRA တပ်စခန်းတွေ အကုန်လုံးနီးပါးကို သိမ်းပိုက်ထိန်းချုပ်ထားပြီး ထွက်ပြေးလွတ်မြောက်နေတဲ့ ရဲဘော်တွေအနေနဲ့ ကိုင်ဆောင်ထားတဲ့ လက်နက်ခဲယမ်းတွေကို လာရောက်အပ်နှံကြဖို့ ယင်းမာပင်ခရိုင် ပြည်သူ့ ကာကွယ်ရေးတပ်အဖွဲ့ (ပကဖ) က မနေ့က ဖေဖော်ဝါရီ ၁၉ ရက်နေ့မှာ ပြောဆိုထားပါတယ်။

အလားတူ ပြစ်မှုကျူးလွန်သူတွေကိုလည်း ဥပဒေအရ အရေးယူသွားမှာဖြစ်သလို ပြစ်မှုကျူးလွန်တာမရှိသူတွေအနေနဲ့လည်း စိတ်ဆန္ဒရှိပါက ပြည်သူ့ကာကွယ်ရေးတပ်မတော်မှာ ဖြစ်စေ၊ ပြည်သူ့ကာကွယ်ရေးအဖွဲ့တွေမှာဖြစ်စေ တော်လှန်ရေးမှာ ဆက်လက်ပါဝင်ကာ တိုက်ပွဲဝင်နိုင်ဖို့အတွက် စီစဉ်ဆောင်ရွက်ပေးသွားမှာဖြစ်တယ်လို့ အမျိုးသားညီညွတ်ရေးအစိုးရ (NUG) ရဲ့ ကာကွယ်ရေးဝန်ကြီးဌာနက မနေ့က ဖေဖော်ဝါရီလ ၁၉ ရက်နေ့ နေလည်ပိုင်းမှာ သတင်းထုတ်ပြန်ထားပါတယ်။

ပုံစာ - ပုံဟောင်း

#bbmnews #bbm #bbmtv #BoNagar #Pale
https://www.facebook.com/share/p/1BmQMAQHKK/

ကလေးမြို့ကို စစ်ကောင်စီတပ်က လေကြောင်းနဲ့ အင်အား ဆက်တိုက်ဖြည့်တင်း

BBM - ဖေဖော်ဝါရီ ၂၀
သတင်း - ကိုအိုက်

စစ်ကိုင်းတိုင်း၊ ကလေးမြို့ကို စစ်ကောင်စီတပ်က ဖေဖော်ဝါရီလ ဒုတိယအပတ်မှစ၍ လေကြောင်းနဲ့ အင်အား ဆက်တိုက်ဖြည့်တင်းနေတယ်လို့ မြို့ခံတွေက BBM ကို ပြောပါတယ်။

ကလေးမြို့၊ လေ့ကျင့်ရေးတပ်ကို စစ်ကောင်စီတပ်က ပြီးခဲ့တဲ့ ဖေဖော်ဝါရီ ၁၅ ရက်နေ့မှာ မန္တလေးတိုင်း၊ တံတားဦး လေတပ်မှ ဆင်းသက်လာတဲ့ ရဟတ်ယာဥ်နဲ့ တပ်အင်အား (၁၀၀) နီးပါးကို ဖြည့်တင်းသွားတယ်လို့ သိရပါတယ်။

"လေဆိပ်မှာ အင်အား ၁၀၀ လောက်ချသွားပြီး Sinotruck ကား (၃)စီးစာ အပြည့်နဲ့ စစ်ကောင်စီတပ်တွေက လေ့ကျင့်ရေးကျောင်းကို ခေါ်သွားပါတယ်၊ သင်တန်းဆင်း ရဲဘော်တွေလို့ ကြားတယ်"လို့ ကလေးမြို့ခံတစ်ဦးက BBM ကို ပြောပါတယ်။

ဒါ့အပြင် စစ်ကောင်စီတပ်ဟာ အခုရက်ပိုင်း လေယာဥ်နဲ့ လူအင်အားတွေအပြင် လက်နက်ခဲယမ်းတွေကိုလည်း ဆက်တိုက်ဖြည်းတင်းနေတယ်လို့ သိရပါတယ်။

"ညဘက် လေယာဥ်ဆင်းပြီးဆိုရင် စစ်တပ် လေယာဥ်ပဲ၊ သူတို့က ညဘက်မှ လာတာများတယ်၊ တခါလာပြီဆိုရင် စစ်ကား ၃ စီး၊ ၄ စီးနဲ့ သယ်သယ်သွားတယ်၊ စစ်ကားအပြည့်ပဲ၊ ဒစက၊ လေ့ကျင့်ရေးတပ်ဘက်ကို မောင်းမောင်းသွားတယ်"လို့ နောက်ထပ် ကလေးမြို့ခံတစ်ဦးက BBM ကို ပြောပါတယ်။

စစ်ကောင်စီဟာ ချင်းပြည်နယ်မြောက်ပိုင်းကို ထိုးစစ်ဆင်တဲ့ စစ်ကြောင်းမှာ ကလေးမြို့ကနေ အသုံးပြုတာကြောင့် အခုလို တပ်အင်အားတွေ ဖြည့်တင်းနေတာဖြစ်တယ်လို့ ကလေးစစ်ရေးစောင့်ကြည့်သူတွေက သုံးသပ်ကြပါတယ်။

"တီးတိန်၊ ဖလမ်းဘက် စစ်ကြောင်းမှာ အသုံးပြုဖို့ ကလေးမြို့မှာ အင်အားဖြည့်တင်းတဲ့ သဘောပါ၊ လက်ရှိ ချင်းပြည်မြောက်ပိုင်းမှာ စစ်ကြောင်းထိုးတဲ့ စစစ်ကောင်စီတပ်ဟာ ကလေးမြို့ကဖြစ်ပါတယ်၊ ချင်းမြောက်ပိုင်းမှာ အရေးနိမ့် ထိခိုက်သေဆုံးမှုများပြီး ထပ်မံ အင်အားဖြည့်တင်းနိုင်ဖို့ ကလေးမှာ အင်အားချသွားတာပါ"လို့ ကလေးမြို့နယ်စစ်ရေးစောင့်ကြည့်သူတစ်ဦးက BBM ကို ပြောပါတယ်။

စစ်ကောင်စီတပ်ဟာ ချင်းပြည်နယ်မြောက်ပိုင်း ဖလမ်းမြို့နဲ့ ကလေး-သိုင်းငင်း လမ်းတို့ကို ပြန်လည်သိမ်းပိုက်ရေး ၂၀၂၅ ခုနှစ် အောက်တိုဘာမှစပြီး ကလေးမြို့ကနေ ကလေး-ဝေဘူလ- ဖလမ်းနဲ့ ကလေး-သိုင်းငင်း-ဖလမ်း စစ်ကြောင်းထိုးနေတာပါ။

ကလေး-သိုင်းငင်း လမ်းပိုင်းကို ပြန်လည်ထိန်းချုပ်နိုင်ပေမဲ့ ဖလမ်းမြို့ကို ထိုးစစ်ဆင်ရာ လမ်းတလျှောက် စစ်ကောင်စီတပ်ဟာ ချင်းတော်လှန်ရေးတပ်တွေရဲ့ တိုက်ခိုက်မှုကြောင့် ထိခိုက်သေဆုံးမှုများပြီး ၅ လနီးပါးကြာထိ မသိမ်းနိုင်သေးပါဘူး။

ဓာတ်ပုံ-လူမှုကွန်ရက်

#bbmnews #bbm #bbmtv #Kalay #Sagaing
https://www.facebook.com/share/p/18GbbLRkvf/

တောင်ခေါင်းလောင်းရွာ စခန်းသိမ်းနေစဉ် အာရုံလွှဲဖို့ တောင်ယာကမ်းရွာမှာ တပ်စွဲထားတဲ့ စကစ စခန်းကို တိုက်ခိုက်

BBM - ဖေဖော်ဝါရီ ၂၀
သတင်း - Richard

တနင်္သာရီတိုင်း၊ ပုလောမြို့နယ်၊ တောင်ခေါင်းလောင်းရွာစခန်းသိမ်းနေစဉ် အာရုံလွှဲဖို့ တောင်ယာကမ်းကျေးရွာမှာ စစ်ကောင်စီ အင်အား ၄၀ တပ်စွဲထားတဲ့ တပ်စခန်းကို တိုက်ခိုက်ရာ ၃ဦး သေဆုံးခဲ့တယ်လို့ KNLA တပ်မဟာ ၄ အထူးတပ်ဖွဲ့က ထုတ်ပြန်ထားပါတယ်။

ဖေဖော်ဝါရီလ ၁၇ရက် မနက် ၅နာရီ ၄၀မိနစ်မှာ အဆိုပါ တောင်ယာကမ်းကျေးရွာရှိ တပ် တိုက်ခိုက်ခဲ့တာဖြစ်ပြီးတော့ မိနစ် ၂၀အကြာမှာ ပွိုင့်5 သေနတ် တင်ဆောင်လာတဲ့ အင်အား ၈ဦးပါ Vigoကားတစ်စီးမှ စစ်ကူလာပေးတယ်လို့ ဆိုပါတယ်။

ဒါ့အပြင် စစ်ကောင်စီဘက်က ဒရုန်းနဲ့ ၃ကြိမ်တိုင်တိုင် ဗုံးကြဲတိုက်ခိုက်ခဲ့သေးတယ်လို့ ဆိုပါတယ်။

တော်လှန်ရေးတပ်ဖွဲ့တွေဘက်က မနက် ၇နာရီခန့်မှာ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။

အဆိုပါ တိုက်ခိုက်မှုကို KNLA Special Forcesအဖွဲ့က တိုက်ခိုက်ခဲ့တာဖြစ်ကြောင်း သိရပါတာ်။

Video - KNLA Task Force

#bbmnews #bbm #bbmtv #KNLA #SpecialForces
https://www.facebook.com/share/v/18BXx1cSbv/

နဂါးရဲ့ BNRA အဖွဲ့မှ သုဘရာဇာနဲ့ ဒေါင်းညိုတို့ကို ဖမ်းမိထိန်းသိမ်းထားကြောင်း ဓါးမဆိုင်းတပ်ဖွဲ့မှ ဗိုလ်စွမ်းထုတ်ပြ

BBM - ဖေဖော်ဝါရီ ၂၀
သတင်း - Richard

စစ်ကောင်စီတပ်ဆီ အညံ့ခံ ပူးပေါင်းသွားတဲ့ နဂါးရဲ့ BNRA အဖွဲ့မှ တကိုယ်တော် သုဘရာဇာနဲ့ ဒေါင်းညိုတို့ကို ဖမ်းမိထားပြီး ကောင်းမွန်စွာထိန်းသိမ်းထားကြောင်း ဓါးမဆိုင်းတပ်ဖွဲ့မှ ဗိုလ်စွမ်းက လူမှုကွန်ရက်မှာ Video File နဲ့တကွ ဖော်ပြထားပါတယ်၊၊

ဒီကနေ့ ဖေဖော်ဝါရီ ၂၀ ရက်နေ့မှာ တကိုယ်တော် သုဘရာဇာနဲ့ ဒေါင်းညိုတို့ကို ဖမ်းဆီးရမိကြောင်း ဓါးမဆိုင်းတပ်ဖွဲ့မှ ဗိုလ်စွမ်းက သူ့ရဲ့ လူမှုကွန်ရက်မှာ Video File နဲ့တကွ ဖော်ပြထားတာပါ၊၊

“သုဘရာဇာ နဲ့ဒေါင်းညို အကောင်းပကတိအတိုင်းပါ၊ အကြောက်တရားနဲ့ သွေးမခွဲပါနဲ့၊
ဖြူစင်တဲ့နှလုံးသားနဲ့ လူလိုဆက်ဆံထားပါတယ်” လို့ ဓါးမဆိုင်းအဖွဲ့မှ ဗိုလ်စွမ်းက ဆိုပါတယ်။

အဆိုပါ တကိုယ်တော် သုဘရာဇာနဲ့ ဒေါင်းညိုတို့ကို မဖမ်းမိခင်က အမျိုးသားညီညွတ်ရေးအစိုးရရဲ့ PDF တပ်ရင်း၊ တပ်ဖွဲ့တွေက ရှင်းလင်းလိုက်ပြီဆိုတဲ့ သတင်းတွေလည်း ထွက်ပေါ်ခဲ့ပါတယ်၊၊

အဆိုပါသတင်းထွက်ပေါ်နေတဲ့အ‌ပေါ် ဓါးမဆိုင်းတပ်ဖွဲ့မှ ဗိုလ်စွမ်းနဲ့ ပုလဲသားတို့က သူတို့ သေဆုံးခြင်းမရှိကြောင်း ရုပ်သံမှတ်တမ်းနဲ့ စာများရေးသားပြီး ဖေ့ခ်ဘွတ်ခ် စာမျက်နှာမှတဆင့် အသိ‌ပေးထားကြပါတယ်။

လက်ရှိမှာ BNRA တပ်ဖွဲ့ ခေါင်းဆောင် နဂါးဟာ ဖေဖော်ဝါရီလ ၁၈ ရက်နေ့မှာ မိသားစုတွေ ခေါ်ဆောင်ပြီးတော့ လက်နက် (၆) လက်နဲ့အတူ စစ်ကောင်စီထံ အညံ့ခံ ပူးပေါင်းသွားတာဖြစ်ပြီး သူရဲ့ တပ်ဖွဲ့၀င် ၁၅၀ ကျော်ဟာလည်း PDF နဲ့ ပကဖ တွေဆီကို လာရောက်အဖမ်းခံတာတွေ၊ ပူးပေါင်း ဆောင်ရွက်တာတွေနဲ့ လက်နက်အပ်နှံတာတွေ ပြုလုပ်ခဲ့တာလည်း ရှိပါတယ်။

အလားတူ BNRA နဲ့ စစ်ရေးတာဝန်ခံ ကိုလတ်နဲ့ ကိုဖြိုးဆိုသူတွေဟာလည်း ဗိုလ်နဂါး စစ်ကောင်စီတပ်နဲ့ ပူးပေါင်းသွားပြီးနောက်ပိုင်း ထွက်ပြေးလွတ်မြောက်နေတာကြောင့် ပြည်သူ့ကာကွယ်ရေးတပ်ဖွဲ့ PDF တပ်ဖွဲ့တွေက နယ်မြေရှင်းလင်းရေးတွေ ဆက်လက်လုပ်ဆောင်နေတယ်လို့လည်း သိရပါတယ်။

Video - ဗိုလ်စွမ်း
https://www.facebook.com/share/v/1AW95ewbSK/

AA သိမ်းထားတဲ့ ပွိုင့် ၆၆၆ စခန်းကုန်းကို စစ်ကောင်စီက ကပစ စက်ရုံတွေကနေ စစ်အင်အားဖြည့်တင်းပြီး ထိုးစစ်ဆင်နေ

BBM - ဖေဖော်ဝါရီ ၂၀
သတင်း - နိုင်နိုင်

အာရက္ခတပ်တော် AA သိမ်းထားတဲ့ ပဲခူးတိုင်း၊ ပန်းတောင်းမြို့နယ်၊ ဥသျှစ်ပင်တပ်နယ်ရှိ ပွိုင့် ၆၆၆ စခန်းကုန်းကို ပြန်လည်သိမ်းပိုက်ရရှိရေးအတွက် စစ်ကောင်စီတပ်က ကပစ စက်ရုံတွေကနေ အင်အားတွေဖြည့်တင်းကာ စစ်ကြောင်းထိုး ထိုးစစ်ဆင်တိုက်ခိုက်လာနေတယ်လို့ AA နဲ့ နီးစပ်တဲ့ စစ်ရေးသတင်းရင်းမြစ်တွေဆီက သိရပါတယ်။

ဥသျှစ်ပင်မြို့နယ်၊ ညောင်ခြေထောက်ကျေးရွာအခြေစိုက် ကပစ ၆ စက်ရုံကနေ စစ်ကောင်စီတပ် အင်အား ၁၀၀ ကျော်ပါတဲ့ စစ်ကြောင်းဟာ AA သိမ်းထားတဲ့ ညောင်ကျိုးနဲ့ ပွိုင့် ၆၆၆ စခန်းကို ထိုးစစ်ဆင်လာနေတာဖြစ်ပြီး မသုန်ကျေးရွာအနီးရှိ ကပစ ၁၆ စက်ရုံကလည်း စစ်ကောင်စီအင်အား အများအပြားပါ စစ်ကြောင်းဟာ ပွိုင့် ၆၆၆ စခန်းကို ပြန်လည်ရရှိဖို့အတွက် စစ်ကြောင်းထိုး ထိုးစစ်ဆင်တိုက်ခိုက်လာနေတယ်လို့ စစ်ရေးအခြေအနေကို သိရှိတဲ့ AA စစ်ရေးသတင်းရင်းမြစ်တစ်ဦးက ပြောပါတယ်။

" AA သိမ်းထားတဲ့ ပွိုင့် ၆၆၆ တို့ ညောင်ကျိုးဖက်တွေကိုတော့ စစ်ကောင်စီတပ်က စစ်ကြောင်းထိုးတာရှိပါတယ်၊ ကပစ စက်ရုံတွေကပဲ စစ်ကြောင်းထိုးနေတာပါ၊ ကပစ ၆ က ဆိုရင်တော့ ညောင်ကျိုးဘက်ရယ်၊ ပွိုင့် ၆၆၆ ဘက်တွေကိုတော့ ထိုးနေတာရှိပါတယ်၊ ကပစ ၁၆ စက်ရုံကတော့ ပွိုင့် ၆၆၆ စခန်းကုန်းကို ဦးတည်ပြီး ထိုးနေတာပါ၊ အခုတော့ လက်နက်ကြီးတွေနဲ့ အပြန်အလှန်ပစ်ခတ်နေပြီး တိုက်ပွဲတွေ ပြင်းထန်နေတာရှိပါတယ် " လို့ အဆိုပါ စစ်ရေးသတင်းရင်းမြစ်က ဆိုပါတယ်။

ဥသျှစ်ပင်တိုက်နယ်အတွင်းမှာ အာရက္ခတပ်တော် AA နဲ့ စစ်ကောင်စီတပ်တို့ဟာ ပွိုင့် ၆၆၆ စခန်းကုန်းနဲ့ ပွိုင့် ၅၀၈ စခန်းကုန်းကြားတွေမှာ နှစ်ဘက်အပြန်အလှန် စစ်ဆင်ရေးတွေပြင်ဆင်ကာ စစ်ရေးတွေတင်းမာနေကြတယ်လို့လည်း သိရပါတယ်။

ပွိုင့် ၆၆၆ စခန်းကုန်းအနီးမှာ နှစ်ဘက်တိုက်ပွဲတွေကြောင့်ပဲ စစ်ကောင်စီတပ်ဟာ လေကြောင်းကို အဓိကအသုံးပြုကာ တိုက်ခိုက်လာနေတာကြောင့် ရခိုင်ရိုးမပေါ်ရှိတောင်ကုန်းတစ်ချို့မှာ တောမီးလောင်မှုတွေ ဖြစ်ပွားနေကြတယ်လို့လည်း သိရပါတယ်။

"ပွိုင့် ၆၆၆ နဲ့ ပွိုင့် ၅၀၈ ကြားမှာ အာရက္ခတပ်တော် AA နဲ့ စစ်ကောင်စီတပ်တို့ နေရာဖြန့်ပြီးတော့ စစ်ဆင်ရေးတွေ ပြင်ဆင်နေတာရှိပါတယ်၊ အခုကတိုက်ပွဲတွေကြောင့် ရိုးပေါ်မှာ တောမီးတွေတော်တော်များများ မီးလောင်နေတာရှိပါတယ်" လို့ အဆိုပါ စစ်ရေးအခြေအနေကို သိရှိသူတစ်ဦးက BBM ကို ပြောပါတယ်။

အလားတူ စစ်ကောင်စီတပ်ဟာ မကွေးတိုင်း၊ သရက်ခရိုင်၊ မင်းတုန်းမြို့ကနေလည်း ကားကြီးတွေနဲ့ လက်ရှိတိုက်ပွဲတွေပြင်းထန်နေတဲ့ ကပစ စက်ရုံတွေဘက်ကို စစ်အင်အား ဖြည့်တင်းမှုတွေ ရှိနေတယ်လို့လည်း သိရပါတယ်။

စစ်ကောင်စီတပ်ဟာ ဥသျှစ်ပင်တပ်နယ်ရှိ တိုက်ပွဲအတွင်း ထိခိုက်ဒဏ်ရာရရှိသွားကြတဲ့သူတွေကိုလည်း ရွှေတောင်မြို့ရှိ ကုတင် ၁၀၀ ဆံ့ ဆေးရုံကြီးကို ဆေးကုသဖို့ခံယူဖို့အတွက် ပို့ဆောင်နေပြီး ပြင်းထန်ဒဏ်ရာရရှိတဲ့သူတွေကိုတော့ ရန်ကုန်မြို့ကို ထပ်မံပို့ဆောင်နေကြတယ်လို့လည်း စစ်ရေးသတင်းရင်းမြစ်တွေဆီက သိရပါတယ်။

ပဲခူးတိုင်း၊ ပန်းတောင်းမြို့နယ်၊ ဥသျှစ်ပင်တပ်နယ်အတွင်း အာရက္ခတပ်တော် AA နဲ့ ပူးပေါင်းတပ်တွေရဲ့ ထိုးစစ်ဟာ ကစပ ၆ စက်ရုံနဲ့ ၇ မိုင်အကွာ၊ ကစပ ၁၆ စက်ရုံနဲ့ ၆ မိုင်ခန့်အကွာအထိကို ရောက်ရှိလာနေတာလည်း ဖြစ်ပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေ ထိုးစစ်ဆင်တိုက်ခိုက်နေတဲ့ ပဲခူးတိုင်းမှာ ကပစ စက်ရုံ ၇ ရုံ ရှိနေတာဖြစ်ပြီး ပြည်မြို့နယ်မှာ ကစပ ၃၊ ၇၊ ၁၉ စက်ရုံတို့ရှိနေသလို ဥသျှစ်ပင်မြို့နယ်မှာတော့ ကပစ ၅၊ ၆၊ ၉ နဲ့ ၁၆ စက်ရုံတို့ တည်ရှိနေတာလည်း ဖြစ်ပါတယ်။

ပုံစာ - ပုံဟောင်း

#bbmnews #bbm #bbmtv #AA #Bago
https://www.facebook.com/share/p/1DjCzofNXT/

NUG ထိန်းချုပ်ထားတဲ့ ခမ်းပတ်မြို့မှာ လူနေအိမ်မီးလောင်မှုဖြစ်ပွားပြီး အမျိုးသမီး ၂ ဦး သေဆုံး

BBM - ဖေဖော်ဝါရီ ၂၀
သတင်း - ကိုအိုက်

အမျိုးသားညီညွတ်ရေးအစိုးရ (NUG) ထိန်းချုပ်ထားတဲ့ စစ်ကိုင်းတိုင်း၊ တမူးမြို့နယ်၊ ခမ်းပတ်မြို့မှာ လူနေအိမ်တစ်လုံး မီးလောင်မှုဖြစ်ပွားခဲ့ပြီး အသက် (၈၀) ကျော်အရွယ် အိမ်ရှင်အမျိုးသမီးကြီးအပါအဝင် အမျိုးသမီး ၂ ဦး မီးထဲပိတ်မိကာ သေဆုံးသွားခဲ့တယ်လို့ မြို့ခံတွေက BBM ကို ပြောပါတယ်။

မီးလောင်မှုဟာ မနေ့က ဖေဖော်ဝါရီလ ၁၉ ရက်နေ့၊ ည ၈ နာရီခန့်အချိန်မှာ ခမ်းပတ်မြို့၊ အမှတ် (၃) ရပ်ကွက်ရှိ လူနေအိမ်တစ်လုံးမှာ စတင်ဖြစ်ပွားခဲ့တာ ဖြစ်ပါတယ်။

အဲဒီမီးလောင်ကျွမ်းမှုကြောင့် နေအိမ်အတွင်းရှိနေတဲ့ အိမ်ရှင်အမျိုးသမီးနှစ်ဦးစလုံး အပြင်သို့ ထွက်ခွာနိုင်ခြင်းမရှိဘဲ သေဆုံးခဲ့ရခြင်းဖြစ်တယ်လို့ သိရပါတယ်။

မီးလောင်မှုအတွင်း သေဆုံးသွားသူတွေမှာ အသက် (၈၀) ကျော် ဒေါ်ဟွေ့နဲမ်နဲ့ ယောင်းမဖြစ်သူ ဒေါ်ဆွန့်ညင်းတို့ ဖြစ်ကြပါတယ်။

"မီးလောင်မှုက သူတို့နှစ်ယောက်နေတဲ့ အိမ်တစ်လုံးတည်းမှာ လောင်ကျွမ်းခဲ့တာဖြစ်ပါတယ်၊ အနီးနားရှိ အခြားနေအိမ်တွေ ကူးစက်လောင်ကျွမ်းခြင်းမရှိခင် ငြိမ်းသတ်နိုင်ခဲ့တယ်"လို့ ခမ်းပတ်မြို့ခံတစ်ဦးက BBM ကို ပြောပါတယ်။

မီးလောင်မှုဖြစ်ပွားချိန်မှာ ရပ်ကွက်နေပြည်သူတွေက ဝိုင်းဝန်းငြိမ်းသတ်ခဲ့ကြပြီး အိမ်အတွင်း ပိတ်မိနေတဲ့ အမျိုးသမီးကြီးနှစ်ဦးကို ကယ်ထုတ်ဖို့ ကြိုးပမ်းခဲ့ကြပေမဲ့ မီးဟုန်ပြင်းထန်မှုကြောင့် ကယ်ထုတ်နိုင်ခြင်းမရှိဘဲ မီးငြိမ်းသွားချိန်မှာ ရုပ်အလောင်းတွေကိုသာ ပြန်လည်တွေ့ရှိခဲ့ရတာ ဖြစ်ပါတယ်။

အဆိုပါ မီးလောင်မှုဖြစ်ပွားရတဲ့ အကြောင်းရင်းနဲ့ပတ်သက်ပြီး လက်ရှိအချိန်ထိ အသေးစိတ် မသိရှိရသေးဘဲ တာဝန်ရှိသူတွေက စုံစမ်းစစ်ဆေးဆဲ ဖြစ်ပါတယ်။

Photo - ပေးပို့

#bbmnews #bbm #bbmtv #NUG #sagaing
https://www.facebook.com/share/p/1CMACP1fQJ/

ဂါဇာမှာ ဘောလုံးနဲ့ပတ်သက်တဲ့ စီမံကိန်းများအတွက် FIFA ဒေါ်လာ သန်း ၅၀ ထောက်ပံ့မယ်

ကမ္ဘာ့ဘောလုံးအဖွဲ့ချုပ်(FIFA)ဟာ ဂါဇာမှာ ဘောလုံးနဲ့ပတ်သက်တဲ့ စီမံကိန်းများအတွက် ဒေါ်လာ သန်း ၅၀ ထောက်ပံ့လှူဒါန်းပေးမယ်လို့ ကတိပြုခဲ့ပါတယ်။

အစ္စရေး-ဟားမက်စ် နှစ်နှစ်ကျော်ကြာ စစ်ပွဲအတွင်း ဂါဇာမှာ အခြေခံအဆောက်အဦ အတော်များများ ပျက်စီးခဲ့ရပါတယ်။

အမေရိကန်သမ္မတ ဒေါ်နယ်ထရမ့် ဦးဆောင်တဲ့ ဂါဇာငြိမ်းချမ်းရေးဆွေးနွေးပွဲကို ကြာသပတေးနေ့က ပြုလုပ်ခဲ့ပြီး FIFA ဥက္ကဋ္ဌ အင်ဖန်တီနိုလည်း တက်ရောက်ခဲ့တာပါ။

အင်ဖန်တီနိုက ''ကျွန်တော်တို့ဟာ နေအိမ်တွေ၊ စာသင်ကျောင်းတွေ၊ ဆေးရုံတွေနဲ့ လမ်းတွေကို ပြန်မတည်ဆောက်နိုင်သေးပါဘူး။ ဒါပေမဲ့ လူတွေ၊ စိတ်ခံစားမှု၊ မျှော်လင့်ချက်နဲ့ ယုံကြည်ချက်ကို ပြန်တည်ဆောက်ပေးရမယ်။ ဒါဟာ ကျွန်တော့်အားကစားဖြစ်တဲ့ ဘောလုံးဆိုတဲ့
အကြောင်းပဲဖြစ်ပါတယ်''လို့ ပြောကြားခဲ့ပါတယ်။

FIFA ဟာ ပရိသတ် ၂၀၀၀၀နဲ့ ၂၅၀၀၀ ဝင်ဆံ့တဲ့ အမျိုးသားအားကစားကွင်းတစ်ကွင်း၊ ဘောလုံးအကယ်ဒမီတစ်ခု တည်ဆောက်ပေးဖို့ လျာထားပါတယ်။

ဒါ့အပြင် ဘောလုံးကွင်းအသေး ကွင်း ၅၀ အတွက် ဒေါ်လာ ၂.၅ သန်း၊ ကွင်းကြီး ၅ ကွင်းအတွက် ဒေါ်လာ ၁ သန်းစီ ထပ်မံထည့်ဝင်မှာ ဖြစ်ပါတယ်။

Photo - Social Media

#bbmnews #bbm #bbmtv #FIFA #SportsNews #Trump
https://www.facebook.com/share/p/1FQVoh6wqb/

ချင်းအမျိုးသားနေ့မှာ ဖလမ်းမြို့နယ်ကို စစ်ကောင်စီ ဗုံးသီးအလုံး ၅၀ ကျော်နဲ့ တိုက်ခိုက်

BBM - ဖေဖော်ဝါရီ ၂၀
သတင်း - ကိုအိုက်

ချင်းလူမျိုးတို့ရဲ့ နေ့ထူးနေ့မြတ်ဖြစ်တဲ့ ချင်းအမျိုးသားနေ့ ကျရောက်တဲ့ ဒီနေ့မှာ ချင်းပြည်နယ်၊ ဖလမ်းမြို့နယ်ရှိ ကျေးရွာ ၆ ရွာကို စစ်ကောင်စီက ဗုံးသီး ၅၀ ကျော်နဲ့ လေကြောင်းတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

ဒီနေ့ ဖေဖော်ဝါရီလ ၂၀ ရက်၊ မနက် ၁၀ နာရီ ၄၀ မိနစ်ဝန်းကျင်မှ စတင်ပြီး စစ်ကောင်စီတပ်ဟာ ဖလမ်းမြို့နယ်အတွင်းရှိ တိုက်ပွဲမရှိတဲ့ ကျေးရွာတွေကို L-410 UVP-E20 လေယာဉ်နဲ့ တပြိုင်နက်တည်း ဗုံးကြဲတိုက်ခိုက်ခဲ့တာဖြစ်ပါတယ်။

လေကြောင်း တိုက်ခိုက်ခံရတဲ့ ကျေးရွာတွေမှာ ဖလမ်းမြို့နယ်၊ ဇာလိုင်၊ လိုင်ကွာ၊ ရမ်ထလို၊ တလန်ရောန်၊ တလန်ဇာ၊ တားလ် စတဲ့ကျေးရွာတွေဖြစ်ကြပါတယ်။

"ဗုံးကြဲခံရတဲ့ ရွာတွေက ဖလမ်းမြို့အရှေ့ဘက်နဲ့ တောင်ဘက်မှာရှိတဲ့ ရွာတွေပါ၊ တစ်ရွာပြီး တစ်ရွာ တပြိုင်နက် တိုက်ခိုက်သွားတာပါ၊ ဗုံးသီး ၅၀ ကျော်နဲ့ တိုက်ခိုက်သွားပါတယ်၊ တချို့ရွာတွေက စစ်ကောင်စီ စစ်ကြောင်းထိုးလို့ လူမရှိဘူး၊ တချို့ရွာမှာက လူနည်းနည်းရှိတယ်"လို့ ဒေသခံတစ်ဦးက BBM ကို ပြောပါတယ်။

အဆိုပါ လေကြောင်းဗုံးကြဲမှုကြောင့် ကျေးရွာတွေအတွင်း ထိခိုက်ပျက်စီးမှုတွေ ရှိနေပေမဲ့ လက်ရှိမှာ ဆက်သွယ်ရေး ခက်ခဲမှုနဲ့ မြေပြင်အခြေအနေတွေကြောင့် လူထိခိုက်မှုနဲ့ နေအိမ်ပျက်စီးမှု အသေးစိတ်ကို အတည်မပြုနိုင်သေးပါဘူး။

စစ်ကောင်စီတပ်ဟာ ချင်းအမျိုးသားနေ့ မတိုင်မီ မနေ့က ဖေဖော်ဝါရီလ ၁၉ ရက်နေ့မှာလည်း ဟားခါးမြို့နယ်နဲ့ ဖလမ်းမြို့နယ်အတွင်းရှိ ကျေးရွာတွေကို လေကြောင်းနဲ့ ဗုံးကြဲတိုက်ခိုက်လို့ အရပ်သား ၄ ဦး ထိခိုက်ဒဏ်ရာရရှိခဲ့ပါတယ်။

Photo - ပုံအဟောင်း

#bbmnews #bbm #bbmtv #ChinNationalDay #Falam
https://www.facebook.com/share/p/1GyhQ3KNcP/

လက်နက်ကိုင်ပဋိပက္ခချုပ်ငြိမ်းဖို့ ချင်းတိုင်းရင်းသားတွေအပါ ပြည်သူအကုန် ၎င်းတို့အစိုးရနဲ့ပူးပေါင်းရန် မင်းအောင်လှိုင်ပြော

🟥ချင်းပြည်နယ်အပါ နိုင်ငံအတွင်းအဖျက်လုပ်ငန်းများရှိနေပြီး နိုင်ငံတော်အတွက် အလွန်အန္တရာယ်ကြီးမားလို့လည်းဆို

BBM-ဖေဖော်ဝါရီ၂၀
သတင်း-မင်းသော်

လက်နက်ကိုင်ပဋိပက္ခချုပ်ငြိမ်းဖို့ ချင်းတိုင်းရင်းသားတွေသာမက အခြားတိုင်းရင်းသား ပြည်သူတွေအကုန်၎င်းတို့အစိုးရနဲ့ပူးပေါင်းရန်နဲ့ချင်းပြည်နယ်အပါ နိုင်ငံအတွင်းအဖျက်လုပ်ငန်းများ များစွာရှိနေတာကြောင့် နိုင်ငံတော်အတွက် အလွန်အန္တရာယ်ကြီးမားနေတယ်လို့ စစ်ခေါင်းဆောင်မင်းအောင်လှိုင်က ဆိုပါတယ်။

ဒီနေ့ကျရောက်တဲ့ ၇၈ နှစ်မြောက် ချင်းအမျိုးသားနေ့ အခမ်းအနားအတွက် သဝဏ်လွှာပေးပို့ရာမှာ အထက်ပါအတိုင်း စစ်ခေါင်းဆောင် မင်းအောင်လှိုင်က ပြောထားပါတယ်။

နိုင်ငံတော်တည်ငြိမ်အေးချမ်းမှု၊ တရားဥပဒေစိုးမိုးမှုတွေဟာ နိုင်ငံဖွံ့ဖြိုးတိုးတက်မှုနဲ့ နိုင်ငံတည်ဆောက်ရေးတွေအတွက် အရေးပါတာကြောင့် လက်နက်ကိုင်ပဋိပက္ခချုပ်ငြိမ်းရေးကို ချင်းတိုင်းရင်းသားတွေအပါ အခြားတိုင်းရင်းသားပြည်သူအားလုံးက နိုင်ငံတော်အစိုးရနဲ့အတူ လက်တွဲကြိုးပမ်းဖော်ဆောင်ကြရန် အလေးအနက်ထား တိုက်တွန်းတယ်လို့ အဆိုပါသဝဏ်လွှာအတွင်းပါရှိပါတယ်။

ဒါတင်မက အခုချိန်မှာ ချင်းပြည်နယ်ရဲ့ နေရာဒေသအချို့အပါ နိုင်ငံအတွင်း ဆူပူအကြမ်းဖက်မှုတွေ၊ တရားဥပဒေကို ဖောက်ဖျက်ကျူးလွန်မှုတွေ၊ နိုင်ငံကို ပြိုကွဲပျက်စီးစေမဲ့ အဖျက်လုပ်ရပ်များစွာရှိနေပြီး နိုင်ငံတော်အတွက် အလွန်အန္တရာယ်ကြီးမားလှတာကြောင့် ပြည်ထောင်စုဖွား တိုင်းရင်းသားညီအစ်ကိုမောင်နှမများအကြား နှစ်ပေါင်းထောင်ချီနေတဲ့ သံယောဇဉ်နဲ့ ချစ်ကြည်ရင်းနှီးမှုတွေကို ဖြိုခွဲဖျက်ဆီးနေတဲ့ ပြည်တွင်းပြည်ပအဖျက်အင်အားစုတွေရဲ့ သွေးခွဲရန်တိုက်ပေးမှု၊ ကျဉ်းမြောင်းတဲ့ လူမျိုးရေးအယူဝါဒ သွတ်သွင်းနေမှုတွေကို အထူးသတိပြုကာကွယ်ကြရန်လိုအပ်တယ်လို့လည်း ၎င်းကဆိုပါတယ်။

ဒါ့အပြင် ချင်းတိုင်းရင်းသားတွေအနေနဲ့ သမိုင်းစဉ်ဆက် ရှိရင်းစွဲဖြစ်တဲ့ ပြည်ထောင်စုစိတ်ဓာတ်၊ မျိုးချစ်စိတ်ဓာတ်ကို အရင်းတည်ပြီး ချင်းပြည် နယ်အကျိုး၊ ပြည်ထောင်စုအကျိုးကို ဆက်လက် ထမ်းဆောင်နိုင်ကြစေကြောင်းလည်း ဆုမွန်ကောင်းတောင်းတယ်လို့ မင်းအောင်လှိုင်က ပြောဆိုထားပါတယ်။

Photo-စစ်ခေါင်းဆောင်မင်းအောင်လှိုင်
https://www.facebook.com/share/p/187eggdKCm/

လေကြောင်းတိုက်ခိုက်မှုအကြိမ်ကြိမ်ပြုလုပ်တဲ့ကြားမှ သရက်ခရိုင် အမှတ်(၄)တပ်ရင်းရဲ့ စစ်သင်တန်းပြီးဆုံး

BBM-ဖေဖော်ဝါရီ ၂၀
သတင်း-မင်းသော်

စစ်ကောင်စီမှ လေကြောင်းတိုက်ခိုက်မှုတွေ၊ လေကြောင်းဗုံးကြဲမှုတွေ အကြိမ်ကြိမ်ပြုလုပ်ရုံသာမက မြေပြင်က စစ်ကြောင်းထိုးတာတွေပြုလုပ်ခဲ့တဲ့ကြားမှ သရက်ခရိုင် အမှတ်(၄) တပ်ရင်းရဲ့ စစ်သင်တန်းပြီးဆုံးအောင်သင်ကြားနိုင်ခဲ့တဲ့အပြင် သင်တန်းဆင်းပွဲလည်း ပြုလုပ်
နိုင်ခဲ့တယ်လို့ အဆိုပါတပ်ရင်းရဲ့ထုတ်ပြန်ချက်
အရ သိရပါတယ်။

စစ်ကောင်စီအနေနဲ့ လေကြောင်းမှ ဂျက်ဖိုက်တာနဲ့ ၁၂ ကြိမ်၊ Y12 နဲ့ ဗုံးသီးအလုံး ၂၀ ခန့်ထိ ကြဲချတိုက်ခိုက်ခဲ့ရုံသာမက မြေပြင်မှလည်း စစ်ကြောင်းထိုးဝင်ရောက်ခဲ့တာတွေ ပြုလုပ်ခဲ့ပေမဲ့ အခြေခံစစ်ပညာသင်တန်း အပတ်စဥ် (၁၂)ရဲ့ လေ့ကျင့်ရေးတွေကို ပြီးဆုံးအောင် သင်ကြားနိုင်ခဲ့တယ်လို့ သိရပါတယ်။

ဒါ့အပြင် ပြီးခဲ့တဲ့ဖေဖော်ဝါရီလ ၁၇ ရက်နေ့ကလည်း အဆိုပါသင်တန်းရဲ့ သင်တန်းဆင်းပွဲကို အလံတော်အလေးပြုခြင်း၊ သင်တန်းဆင်းရဲဘော်များက အလံကိုင်ကတိသစ္စာသီဆိုခြင်းများ အကျဥ်းချုပ်ပြုလုပ်ပြီး အခမ်းအနားကိုအောင်မြင်စွာကျင်းပနိုင်ခဲ့တယ်လို့လည်း သိရပါတယ်။

ဒါတင်မက အခက်အခဲတွေကြားက စည်းလုံးညီညွတ်စွာနဲ့ သင်တန်းပြီးဆုံးတဲ့အထိ ကျရာတာဝန်တွေကို ကျေပွန်စွာထမ်းဆောင်ခဲ့ကြတဲ့ ရဲဘော်တွေအားလုံးကို လေးနက်စွာဂုဏ်ပြုကြောင်းလည်း သရက်ခရိုင် အမှတ်(၄)တပ်ရင်း က သတင်းထုတ်ပြန်ထားပါတယ်။

Video-သရက်ခရိုင် အမှတ်(၄)တပ်ရင်း
https://www.facebook.com/share/r/1AaryCrMpg/

မကြည်ပြာနဲ့လသူ့ခင်ပွန်းအမှုကိစ္စတို့မှ တွေ့ရှိချက်များကို NUG မှ အွန်လိုင်းသတင်းစာရှင်းလင်းပွဲပြုလုပ်မည်

BBM-ဖေဖော်ဝါရီ၂၀
သတင်း-မင်းသော်

အမျိုးသားညီညွှတ်ရေးအစိုးရ (NUG )ရဲ့ အမြဲတမ်းအတွင်းဝန် မကြည်ပြာနဲ့ ၎င်းရဲ့ခင်ပွန်းဖြစ်သူတို့ရဲ့ အမှုကိစ္စနဲ့ပတ်သတ်ပြီး အွန်လိုင်းသတင်းစာရှင်းလင်းပွဲတစ်ခုပြုလုပ်မယ်လို့ NUG မှ ဒီနေ့မှာ ထုတ်ပြန်ကြေငြာထားပါတယ်။

မကြည်ပြာနဲ့ ၎င်းခင်ပွန်းတို့ တိုင်ကြားမှုနဲ့ပတ်သတ်ပြီး စုံစမ်းစစ်ဆေးရေးအဖွဲ့ရဲ့တွေ့ရှိချက်တွေ၊ သုံးသပ်ချက်တွေနဲ့ ပြည်ထောင်စုဝန်ကြီးချုပ်တွေရဲ့ ဆောင်ရွက်ချက်တွေကို ပြည်သူလူထုကို အစီရင်ခံတင်ပြနိုင်ဖို့ သတင်းစာရှင်းလင်းပွဲပြုလုပ်သွားမယ်လို့ သိရပါတယ်။

အဆိုပါသတင်းစာရှင်းလင်းပွဲကို ဖေဖော်ဝါရီလ ၂၁ ရက်နေ့ (မနက်ဖြန်) နေ့လယ်(၁)နာရီမှာ စတင်မှာဖြစ်ပြီး အမျိုးသားညီညွှတ်ရေးအစိုးရ၊ PVTV(Public Voice Television)နဲ့ သတင်းမီဒီယာတချို့ရဲ့ လူမှုကွန်ယက်စာမျက်နှာတွေကတဆင့် တိုက်ရိုက်ထုတ်လွှင့်ပြသသွားမယ်လို့လည်း NUG အစိုးရက ဆိုထားပါတယ်။

မကြည်ပြာကို ပြီးခဲ့တဲ့ ၂၀၂၅ ခုနှစ် နိုဝင်ဘာလ ၁၉ရက်နေ့ကတည်းက ကိုဖြိုးအပါ လူပုဂ္ဂိုလ်၁၂ ဦးက အဂတိလိုက်စားမှု၊လူ့အခွင့်အရေးချိုးဖောက်မှုတွေအတွက် အရေးယူပေးဖို့ နိုင်ငံတော်သမ္မတ၊ ပြည်ထောင်စုလွှတ်တော် ကိုယ်စားပြု ကော်မတီ(CRPH) ဥက္ကဌနဲ့ ပြည်ထောင်စုဝန်ကြီးချုပ်တို့ကို လိပ်မူပြီးတိုင်ကြားခဲ့ပေမဲ့ NUGစုံစမ်းရေးအဖွဲ့က မကြည်ပြာအပေါ် တရားစွဲဆို အရေးယူရန်နဲ့ ရာထူးမှ ထုတ်ပယ်ရန် လုံလောက်တဲ့ အချက်အလက်မတွေ့တာကြောင့် ဝန်ထမ်းတွေအပေါ် ချိုသာစွာဆက်ဆံရန်သာ သတိပေးကြောင်းထုတ်ပြန်ခဲ့ပါတယ်။

အဆိုပါထုတ်ပြန်ချက်နဲ့ပတ်သတ်ပြီး ပြည်သူလူ ထုကြား ပြင်းထန်စွာဝေဖန်မှုတွေရှိခဲ့သလို NUG ပညာရေးဝန်ကြီးဌာန တက္ကသိုလ်ဝင်ခွင့်လမ်းညွှန်ဖြစ်မြောက်ရေးအဖွဲ့ ၊ လွတ်လပ်သောCDM နိုင်ငံဝန်ထမ်းထုအဖွဲ့နဲ့ အခြားတော်လှန်ရေးအဖွဲ့အစည်းများစွာက NUGအနေနဲ့ စုံစမ်းစစ်ဆေးရေးဆိုင်ရာ သက်သေခံတွေကို ပြည်သူရှေ့ ပွင့်လင်းစွာချပြပြီး စစ်ဆေးမှုအတွင်း လိုအပ်ချက်ရှိပါကလည်း ပြန်လည်သုံးသပ်ရန် တိုက်တွန်းကြောင်းထုတ်ပြန်တာတွေပြုလုပ်ခဲ့ပြီးနောက် NUG အစိုးရက အဆိုပါအမှုကို သတင်းစာရှင်းလင်းပွဲလုပ်မယ်ဖြစ်ကြောင်း ယခုကဲ့သို့ ကြေငြာခဲ့ခြင်းဖြစ်ပါတယ်။

Photo-မကြည်ပြာ
https://www.facebook.com/share/p/17y9vq2QAR/

🟥 မြစ်ကြီးနားလေဆိပ်မှ စကစ လူကြီးပိုင်းလိုက်ပါမဲ့ လေယာဥ်တစ်စီး ဒရုန်းမှန်ပြီး အမြီးပိုင်းထိ

BBM-ဖေဖော်ဝါရီ၂၀
သတင်း-မင်းသော်

ကချင်ပြည်နယ်၊ မြစ်ကြီးနားလေဆိပ်မှ စစ်ကောင်စီရဲ့ လူကြီးပိုင်းလိုက်ပါမဲ့ လေယာဥ်တစ်စီး ဒရုန်းမှန်ပြီးတဲ့နောက် အမြီးပိုင်းထိခဲ့တယ်လို့ သိရပါတယ်။

ဖေဖော်ဝါရီလ ၂၀ရက် (ဒီနေ့)ည ၈ နာရီအကျော်မှာ မြစ်ကြီးနားလေဆိပ်မှ ထွက်ခွါရန် ပြင်ဆင်ထားတဲ့ MNA လေကြောင်းလိုင်းမှ ခရီးသည်လေယာဥ်တစ်စီး ဒရုန်းထိမှန်ခြင်းဖြစ်တယ်လို့လည်း ကနဦးသိရှိရပါတယ်။

အဆိုပါလေယာဥ်အတွင်း စစ်ကောင်စီဘက်မှ လူကြီးပိုင်းတစ်ဦး လိုက်ပါမှာသေချာပေမဲ့ မည်သည့်အဆင့်နဲ့ ရာထူးဆိုတာကို အတည်ပြုလို့မရသေးဘူးဟု မြေပြင်သတင်းရင်းမြစ်တစ်ဦးက BBM ကိုပြောပါတယ်။

"မြစ်ကြီးနားမှာ အကောင်ကြီးတစ်ကောင်ပြန်ပါသွားမဲ့ MNA လေယာဥ်ကိုပစ်ချတာ၊ မပျက်ကျပေမဲ့ တော်တော်ထိသွားတယ်ကြားတယ်၊ အကောင်ကြီးက ဘယ်သူလဲတော့ တိတိကျကျမသိပေမဲ့ တော်တော်တော့ ကြီးမယ်၊ လုံခြုံရေးကြပ်ပြီး ကလေးတွေကို တိုင်းရင်းသားဝတ်စုံနဲ့ကြိုခိုင်းတာဆိုတော့"

ဒါ့အပြင် မြစ်ကြီးနားမြို့အတွင်း ပြီးခဲ့တဲ့ ဖေဖော် ဝါရီ ၁၈ ရက်နေ့ကတည်းက လူကြီးလမ်းကြောင်းရှိတာကြောင့် လုံခြုံရေးတင်းကြပ်ထားတဲ့အပြင် ယနေ့ညပိုင်းမှာ ပြန်ဖို့ရှိတယ်ဆိုတဲ့သတင်းလည်းထွက်ပေါ်နေတာကြောင့် အခုကဲ့သို့ ဒရုန်းနဲ့တိုက်ခိုက်ခံရခြင်းဖြစ်ပုံရတယ်လို့လည်း အဆိုပါ သတင်းရင်းမြစ်က ဆက်ပြောပါတယ်။

"မြစ်ကြီးနားမှာက နှစ်ရက်ရှိပြီ လူကြီးလာမှာမို့ လုံခြုံရေးကြပ်ထားတာ ဒီနေ့ညပြန်မှာကြားတာ အဲ့ဒါမို့ Drone နဲ့ဆော်ပုံရတယ်"

အဆိုပါဒရုန်းတိုက်ခိုက်မှုနဲ့ပတ်သတ်ပြီး မည်သည့် အဖွဲ့အစည်းက လုပ်ဆောင်တယ်ဆိုတာကို အခုချိန်ထိ မသိရှိရသေးဘဲ မြစ်ကြီးနားလေဆိပ်တစ်ဝိုက် လက်နက်ကြီး၊ လက်နက်ငယ် ပစ်ခတ်သံတွေကို လက်ရှိအချိန်ထိ ကြားနေရတယ်လို့လည်း ဒေသခံတွေရဲ့အဆိုအရ သိရပါတယ်။

Photo-ဒရုန်းထိမှန်ထားတဲ့ လေယာဥ်အမြီးပိုင်း
https://www.facebook.com/share/p/1N3mCAC4RN/

အီရန်မှာ ဗြိတိန်စုံတွဲကို ထောင်ဒဏ် ၁၀ နှစ်ထောင်ဒဏ်ချမှတ်မှု ဗြိတိန်ရှုတ်ချ

BBM - ဖေဖော်ဝါရီ ၂၁
သတင်း - Richard

ဗြိတိန်နိုင်ငံခြားရေးဝန်ကြီး Yvette Cooper က အီရန်နိုင်ငံက ဗြိတိသျှစုံတွဲတစ်တွဲကို Spyလုပ်မှုနဲ့ ထောက်ဒဏ် ၁၀ နှစ်ပြစ်ဒဏ်ချမှတ်တာကို “လုံးဝတရားမျှတမှုမရှိ” လိို့ ဖေဖော်ဝါရီလ ၁၉ရက်‌နေ့က ရှုတ်ချခဲ့ပါတယ်လို့ CNN Worldမှာ ဖော်ပြထားပါတယ်။

ဒါ့အပြင် ဗြိတိန်အစိုးရအနေနဲ့ အဆိုပါ စုံတွဲ လွတ်မြောက်ရေးအတွက် ဆက်လက်ဖိအားပေးသွားမယ်လို့လည်း ပြောကြားခဲ့ပါတယ်။

Craig နဲ့ Lindsay Foreman တို့စုံတွဲဟ။ အီရန် နိုင်ငံရဲ့ နေရာအတော်များများမှာ သတင်းအချက်အလက်တွေ စုဆောင်းနေတယ်လို့ အီရန်ကစွပ်စွဲပြီးနောက် သူလျှိုမှုနဲ့ တရားစွဲဆိုခံခဲ့ရတာပါ။

“Craig နဲ့ Lindsay Foreman တို့စုံတွဲကို UKနိုင်ငံကို ဘေးကင်းကင်းနဲ့ ပြန်ရောက်ပြီး သူတို့ရဲ့ မိသားစုနဲ့ ပြန်လည်ပေါင်းစည်းနိုင်တဲ့အထိ အီရန်အစိုးရနဲ့အတူ အဆိုပါ အမှုကို အဆက်မပြတ်ဆက်လက်ဆောင်ရွက်သွားပါမယ်” လို့ Cooper က ကြေညာချက်တစ်စောင်မှာ ပြောကြားခဲ့ပါတယ်။

အဆိုပါ Foremanစုံတွဲဟာ ပြီးခဲ့တဲ့နှစ် ဇန်နဝါရီလ ၃ ရက်နေ့မှာ ကမ္ဘာတစ်ဝှမ်း မော်တော်ဆိုင်ကယ်ခရီးစဉ်နဲ့ အီရန်နိုင်ငံကိုဖြတ်ပြီး ခရီးသွားနေစဉ် ဖမ်းဆီးခံခဲ့ရတာပါ။

နောက်တစ်လမှာ အီရန်နိုင်ငံပိုင်မီဒီယာက သူတို့ကို သူလျှိုလုပ်မှု စွဲချက်တွေနဲ့ ဖမ်းဆီးထားကြောင်း ကြေညာခဲ့ပါတယ်။

အခုအခါ ထိန်းသိမ်းထံထားရတာ ၁၃ လကျော်ထဲ ရောက်ရှိလို့‌လာနေပါပြီ။

အဆိုပါ စုံတွဲရဲ့ သားဖြစ်သူ ဂျိုးဘန်နက်က အောက်တိုဘာ ၂၇ ရက်နေ့ကပြုလုပ်တဲ့ ၃နာရီကြာ ရုံးတင်စစ်ဆေးမှုအတွင်း သူ့မိဘတွေဟာ ခုခံကာကွယ်ခွင့်မရှိခဲ့ဘူးလို့ သီးခြားကြေညာချက်တစ်ခုမှာ ပြောကြားခဲ့ပါတယ်။

“သူလျှိုလုပ်မှုစွဲချက်ကို သက်သေပြနိုင်တဲ့ အထောက်အထားတစ်စုံတစ်ရာ မတွေ့ရပါ”လို့ ဂျိုးက ပြောကြားခဲ့ပြီး သူ့မိဘတွေရဲ့ ကျန်းမာရေးနဲ့ တရားစီရင်ရေးလုပ်ငန်းစဉ်တွေမှာ ပွင့်လင်းမြင်သာမှု မရှိတဲ့အပေါ် အလွန်စိုးရိမ်မိကြောင်း ဖြည့်စွက်ပြောကြားခဲ့ပါတယ်။

သူ့မိဘတွေ လွတ်မြောက်ရေးအတွက် “ပြတ်ပြတ်သားသားလုပ်ဆောင်ပြီး ရနိုင်တဲ့နည်းလမ်းအကုန် အသုံးပြဖို့” ဗြိတိသျှအစိုးရကို ဘန်းနက် က တောင်းဆိုခဲ့ပါတယ်။

Reference - CNN World
Photos - CNN World

#bbmnews #bbm #bbmtv #Iren #YvetteCooper
https://www.facebook.com/share/p/16txfARGU7/

ငြိမ်းချမ်းရေး လမ်းလျှောက်တဲ့ ဆရာတော်များနှင့် ပြည်တွင်းက စကစရဲ့ ဘုန်းကြီးများကို နှိုင်းယှဉ်ပြောဆိုနေကြသည့် အပေါ် ခင်ရီ ၀မ်းနည်းဟုဆို

BBM - ဖေဖော်ဝါရီ ၂၁
သတင်း - Richard

မြန်မာပြည်သူတွေက ငြိမ်းချမ်းရေးအတွက် လမ်းလျှောက်ခြင်း(Walk For Peace)ဆရာတော်တွေကို ချီးမွမ်းပြီး ပြည်တွင်းက အစွန်းရောက် မဘသဘုန်းကြီးတွေ၊ ဝီရသူ၊ သီတဂူတို့လို ဘုန်းကြီးတွေကို အဆိုးမြင်တဲ့အပေါ် စိတ်မကောင်းဖြစ်မိလို့ ကြံ့ဖွံ့ ဥက္ကဋ္ဌခင်ရီက ပြောဆိုခဲ့ပါတယ်။

ဖေဖော်‌ဝါရီလ ၂၀ရက်နေ့မှာ အဆိုပါ ပြောဆိုချက်ကို USDPနဲ့ Khin Yiဆိုတဲ့ လူမှုကွန်ရက်မှာ တင်ခဲ့တာပဲ ဖြစ်ပါတယ်။

ပြီးခဲ့တဲ့နှစ် အောက်တိုဘာလ ၂၆ရက်နေ့ကနေ ၂၀၂၁၆ခုနှစ် ဖေဖော်ဝါရီလ ဒုတိယပတ်အထိ ဆရာ‌တော် ဦးပညာကာရ ဦးဆောင်တဲ့ သံဃာတော်တွေဟာ အမေရိကန်နိုင်ငံရဲ့ တောင်ပိုင်းပြည်နယ်ဖြစ်တဲ့ တက္ကဆက်ကနေ မြို့တော် ဝါရှင်တန် ဒီစီအထိ ငြိမ်းချမ်းရေးလမ်းလျှောက်ပွဲ ပြုလုပ်ခဲ့ကြတာပါ။

အဆိုပါ ဆရာတော်ကြီးတွေနဲ့နှိုင်းယှဉ်ပြီး ပြည်တွင်းက စစ်ကောင်စီရဲ့ ဘက်တော်သား မဘသဘုန်းကြီးတွေ၊ သီတဂူ၊ ဝီရသူတို့လို ဘုန်းကြီးတွေကို ပြောဆိုတဲ့အပေါ် စိတ်မကောင်းဖြစ်မိတယ်လို့ ခင်ရီက အခုလိုဆိုထားတာပါ။

“Walk For Peace ဆရာတော်ကြီးတွေနဲ့ ပြည်တွင်းမှာရှိတဲ့ ဆရာတော်ကြီးတွေကို လွဲမှားစွာ နှိုင်းယှဉ်သုံးသပ်ပြီးတော့ မလိုတမာပြောကြားတာတွေကို ကျွန်တော်အတော်ပဲ ၀မ်းနည်းပါတယ်”လို့ ခင်ရီက သူ့ရဲ့ လူမှုကွန်ရက်မှာ ပြောဆိုထားတာပါ။

အဆိုပါ မဘသဘုန်းကြီး၊ ဝီရသူ၊ သီတဂူတို့လို ဘုန်းကြီးတွေဆိုတာ အပြည်ပြည်ဆိုင်ရာ တရားရုံး(ICJ)မှာ ဂမ်ဘီယာနိုင်ငံက တရားစွဲဆိုထားတဲ့ ရိုဟင်ဂျာ‌တွေအပေါ် လူမျိုးတုံး သတ်ဖြတ်တဲ့အမှုမှာ မြန်မာစစ်တပ်ရဲ့ ကြံရာပါ၊ လော်ဘီတွေအတွက် တရားစွဲဆိုခံထားရတဲ့ ဘုန်းကြီးတွေပါ။

ဒါ့အပြင် ခင်ရီဟာ အခုလို ဗုဒ္ဓဘာသာ ဘုန်းတော်ကြီးတွေရဲ့ ငြိမ်းချမ်းရေးအတွက် လမ်းလျှောက်ခြင်းဟာ အနောက်နိုင်ငံလို ခရစ်ယာန်သာသနာထွန်ကားတဲ့ နိုင်ငံတွေမှာ ဗုဒ္ဓဘာသာက ထိုးဖောက်နိုင်တယ်ဆိုတဲ့ အချက်ကိုလည်း ပြောကြားသွားခဲ့ပါသေးတယ်။

Photo - Social Media

#bbmnews #bbmtv #bbm #khinyi #USDP
https://www.facebook.com/share/p/15hYd7Hdpo/