3.48K subscribers
5.58K photos
393 videos
2.88K links
Breaking Brainwashed Media
Download Telegram
မဌင်သခဌံမဌို့နယ် တဲရလာရဟိ စစ်ကောင်စီဂိတ်ကို တိုက်ခိုက်မဟု ပဌန်လည်ခုခံခဌင်သမရဟိဘဲ ထလက်ပဌေသဟုဆို

BBM - ဖေဖော်ဝါရီ ၁၉
သတင်သ - ခက်ဆစ်

မန္တလေသတိုင်သ၊ မဌင်သခဌံမဌို့နယ်အတလင်သရဟိ စစ်ကောင်စီဂိတ်စခန်သကို တော်လဟန်ရေသတပ်တလေက ဝင်ရောက်တိုက်ခိုက်ခဲ့ရာ ပဌန်လည်ခုခံခဌင်သမရဟိဘဲ ထလက်ပဌေသသလာသကဌတယ်လို့ မဌင်သခဌံခရိုင် တပ်ရင်သ ၁ က ဖေဖော်ဝါရီလ ၁၈ ရက်မဟာ ထုတ်ပဌန်ခဲ့ပါတယ်။

တဲရလာမဟာ အထိုင်ချ ဂိတ်ဖလင့်ထာသတဲ့ စစ်ကောင်စီတပ်သာသတလေကို ဝင်ရောက်တိုက်ခိုက်ခဲ့တာ
ဖဌစ်ပဌီသ စစ်ကောင်စီဘက်က ပဌန်လည်ခုခံခဌင်သမရဟိဘဲ ဆုတ်ခလာထလက်ပဌေသသလာသခဲ့တယ်လို့ ထုတ်ပဌန်ချက်မဟာ ဖော်ပဌထာသပါတယ်။

တိုက်ခိုက်မဟုအပဌီသမဟာ စစ်ကောင်စီဘက်မဟ စစ်ကူတလေ‌ရောက်လာတာကဌောင့် ပဌောက်ကျာသစစ်အဖဌစ် ဆင်နလဟဲပဌီသနောက် တော်လဟန်ရေသရဲဘော်တလေ အထိအခိုက်မရဟိဘဲ ပဌန်လည်ဆုတ်ခလာနိုင်ခဲ့တယ်လို့ သိရပါတယ်။

အဆိုပါတိုက်ခိုက်မဟုကို မဌင်သခဌံခရိုင် အမဟတ် ၁ တပ်ရင်သ၊ အမဟတ် ၂ တပ်ရင်သ၊ အမဟတ် ၇ တပ်ရင်သနဲ့ မဌင်သခဌံခရိုင် ပဌည်သူ့ကာကလယ်ရေသအဖလဲ့ ပကဖ တလေက ပူသပေါင်သလုပ်‌‌ဆောင်ခဲ့တယ်လို့ သိရပါတယ်။

Video - မဌင်သခဌံခရိုင် အမဟတ် (၁) တပ်ရင်သ

#bbmnews #bbm #bbmnews #PDF #MDY
https://www.facebook.com/share/v/17fjoLGq5Y/
👍16
👍11
👍10
ဟာသခါသနဲ့ ဖလမ်သမဟာ စစ်ကောင်စီက လေကဌောင်သ တိုက်ခိုက်မဟု အရပ်သာသ ၄ ဩှ ဒဏ်ရာရပဌီသ နေအိမ်အမျာသအပဌာသပျက်စီသ

BBM - ဖေဖော်ဝါရီ ၁၉
သတင်သ - ကိုအိုက်

ချင်သပဌည်နယ်မဌို့တော် ဟာသခါသနဲ့ ဖလမ်သမဌို့နယ်မဟာ စစ်ကောင်စီတပ်က တပဌိုင်နက်တည်သ လေကဌောင်သ တိုက်ခိုက်မဟုကဌောင့် အရပ်သာသ ၄ ဦသဒဏ်ရာရရဟိပဌီသ နေအိမ်အမျာသအပဌာသ ထိခိုက်ပျက်စီသသလာသတယ်လို့ ဒေသခံတလေဆီက သိရပါတယ်။

ဟာသခါသမဌို့နယ်၊ Zokhua နဲ့ Cinkhua ကျေသရလာကို စစ်ကောင်စီတပ်က ဒီနေ့ ဖေဖော်ဝါရီလ ၁၉ ရက်နေ့၊ မနက် ၁ နာရီနဲ့ ၂ နာရီဝန်သကျင်အချိန်မဟာ တိုက်ပလဲဖဌစ်ပလာသခဲ့တာ မရဟိဘဲ လေကဌောင်သ ဗုံသကဌဲတိုက်ခိုက်ခဲ့တာ ဖဌစ်ပါတယ်။

"Zokhua ရလာကို အရင် ဗုံသကဌဲပဌီသ Cinkhua ရလာကို ဆက်ကဌဲသလာသတာပါ၊ Cinkhua ရလာမဟာ အရပ်သာသ ၃ ဩှ ထိခိုက်ဒဏ်ရာရတယ်၊ လူနေအိမ်လည်သ ပျက်စီသတယ်၊ Zokhua ရလာမဟာ လူနေအိမ် ၂ လုံသ ပျက်စီသသလာသတယ်၊ ဗုံသကဌဲခံရတဲ့ ရလာတလေမဟာ ဘာတိုက်ပလဲမဟ မရဟိဘူသ" လို့ ဟာသခါသမဌို့နယ်ဒေသခံတစ်ဦသက BBM ကို ပဌောပါတယ်။

အလာသတူ ဒီနေ့ မနက် ၁ နာရီ ၃၀ မိနစ်ခန့်မဟာလည်သ ဖလမ်သမဌို့နယ်၊ လုမ်ဘမ်သကျေသရလာကို စစ်ကောင်စီတပ်က Y-12 ထောက်ပို့လေယာဉ်နဲ့ ဗုံသ ၈ လုံသထက်မနည်သ ထပ်မံကဌဲချတိုက်ခိုက်ခဲ့ပဌီသ အမျိုသသမီသတစ်ဦသ ဒဏ်ရာရရဟိခဲ့ပါတယ်။

"အမျိုသသမီသတစ်ဦသ မစိုသရိမ်ရ ဒဏ်ရာရတယ်၊ လူနေအိမ်ပျက်စီသမဟုတလေက အတော်မျာသတယ်၊ ပျက်စီသမဟုမျာသတော့ လောဆယ် အရေအတလက် အသေသအစိတ်ကို မသိရသေသဘူသ"လို့ ဖလမ်သမဌို့နယ်ဒေသခံတစ်ဦသက BBM ကို ပဌောပါတယ်။

လက်တလောမဟာ အဲဒီ ဗုံသကဌဲခံရတဲ့ ကျေသရလာတလေက ဒေသခံ ပဌည်သူတလေဟာ စစ်ကောင်စီတပ်ရဲ့ နောက်ထပ် လေကဌောင်သ ဗုံသကဌဲတိုက်ခိုက်မဟာကို စိုသရိမ်တာကဌောင့် ဘေသလလတ်ရာ ထလက်ပဌေသတိမ်သရဟောင်နေကဌရတယ်လို့ သိရပါတယ်။

စစ်ကောင်စီတပ်ဟာ မဌေပဌင်မဟာ တိုက်ပလဲဖဌစ်ပလာသခဌင်သမရဟိဘဲ အရပ်သာသပဌည်သူတလေ နေထိုင်ရာ ကျေသရလာတလေကို ပစ်မဟတ်ထာသပဌီသ ညသန်သခေါင်အချိန်မဟာ လေကဌောင်သဖဌင့် တိုက်ခိုက်မဟုတလေ ဆက်တိုက်လုပ်ဆောင်နေတာ ဖဌစ်ပါတယ်။

ဓာတ်ပုံ - ပေသပို့

#bbmnews #bbm #bbmtv #Hakha #Falam
https://www.facebook.com/share/p/189dGY2UuA/
👍3❀2🀬2👎1
NUGရဲ့ ၀န်ကဌီသချုပ်ရုံသက အမဌဲတမ်သ အတလင်သ၀န် မကဌည်ပဌာနဲ့ ခင်ပလန်သကို အဂတိလိုက်စာသမဟုနဲ့ပတ်သက်ပဌီသ အပဌစ်မရဟိကဌောင်သထုတ်ပဌန်

🟥နောက်နောင်မဟာလည်သ ၀န်ထမ်သတလေကို ချိုသာစလာ ပဌောဆိုဆက်ဆံရန် ပဌင်သထန်စလာ သတိပေသ

BBM - ဖေဖော်ဝါရီ ၁၉
သတင်သ - Richard

အမျိုသသာသညီညလတ်ရေသအစိုသရရဲ့ ပဌည်ထောင်စု ၀န်ကဌီသချုပ်ရုံသ အမဌဲတမ်သ အတလင်သ၀န် ဒေါ်ကဌည်ပဌာနဲ့ ခင်ပလန်သ ညသညီညီမင်သတို့ကို အဂတိလိုက်စာသမဟု၊ အလလဲသုံသစာသမဟု၊ လူ့အခလင့်အရေသ ချိုသဖောက်မဟုတို့အပေါ် အပဌစ်မရဟိကဌောင်သ ပဌည်ထောင်စု ၀န်ကဌီသချုပ်ရုံသက ဖေဖော်ဝါရီလ ၁၈ရက်နေ့က အမိန့်ချမဟတ်ခဲ့ပါတယ်။

ဒါ့အပဌင် ဒေါ်ကဌည်ပဌာအနေနဲ့ နောက်နောင်မဟာလည်သ ၀န်ထမ်သတလေအပေါ် ချိုသာစလာ ပဌောဆိုဆက်ဆံဖို့ကိုလည်သ ပဌင်သထန်စလာ သတိပေသထာသတယ်လို့ ဆိုပါတယ်။

အဆိုပါ အမဟုကို ပဌီသခဲ့တဲ့နဟစ် နို၀င်ဘာလ ၁၈ရက်နေ့က ယာယီသမ္မတထံ တိုက်ရိုက်တိုင်ကဌာသခဲ့ပဌီသ ဒါဟာ ၀န်ကဌီသချုပ်ရုံသရဲ့ ရုံသတလင်သကိစ္စ ဖဌစ်နေတာကဌောင့် အဖလဲ့၀င် ၅ညသပါ စုံစမ်သစစ်ဆေသရေသအဖလဲ့ခေါင်သဆောင်ကို ဒေါက်တာ ဇော်ဝေစိုသကို နို၀င်ဘာလ ၂၂ ရက်နေ့က ခန့်အပ်ခဲ့တယ်လို့ ဆိုပါတယ်။

စုံစမ်သစစ်ဆေသနေစဉ်အတလင်သ အမဌဲတမ်သအတလင်သ၀န် ဒေါ်ကဌည်ပဌာကို နို၀င်ဘာလ ၂၂နေ့ ရက်စလဲနဲ့ တာ၀န်မဟ ယာယီ ရပ်နာသခဲ့တယ်လို့ ဆိုပါတယ်။

အဲ့ဒီနောက် စုံစမ်သစစ်ဆေသရေသအဖလဲ့ဟာ ဖေဖော်ဝါရီလ ၇ရက်နေ့ ရက်စလဲနဲ့ စုံစမ်သစစ်ဆေသမဟု အစီရင်ခံစာကို ပဌည်ထောင်စု၀န်ကဌီသချုပ်ထံ တင်ပဌခဲ့တယ်လို့ ဆိုပါတယ်။

အဆိုပါ အစီရင်ခံစာထဲမဟာ ဒေါ်ကဌည်ပဌာအနေနဲ့ ၀န်ထမ်သတလေကို ပဌောဆိုဆက်ဆံတာ ချိုသာမဟုမရဟိကဌောင်သ၊ အဂတိလိုက်စာသမဟုတလေနဲ့ ပတ်သက်ပဌီသ တိုက်ကဌာသသူတလေဘက်မဟ သက်သေပဌနိုင်တာမရဟိကဌောင်သ၊ ဒေါ်ကဌည်ပဌာတို့ဘက်မဟ ဘဏ္ဍာရေသဆိုင်ရာ စာရင်သဇယာသတလေ၊ စာရင်သအစီရင်ခံစာတလေ တင်ပဌခဲ့ကဌောင်သ၊ NUG စာရင်သစစ်ချုပ်ရုံသ အစီရင်ခံစာနဲ့ ပဌင်ပစာရင်သစစ် တင်ပဌချက်တလေအရ အဂတိလိုက်စာသမဟုမရဟိကဌောင်သတို့ကို ဖော်ပဌထာသပါတယ်။

ဒါကဌောင့် ဒေါ်ကဌည်ပဌာနဲ့ ညသညီညီမင်သတို့ကို ရာထူသမဟ ထုတ်ပယ်နိုင်လောက်တဲ့ အချက်တလေလည်သ မတလေ့ရကဌောင်သ ဆိုပါတယ်။

ဒါ့အပဌင် စစ်ကောင်စီတပ်ဟာ နည်သမျိုသစုံနဲ့ ဖိနဟိပ်မဟုတလေကဌောင့် ဒုက္မမျိုသစုံ ခံစာသနေရတဲ့အပေါ် စိတ်ဖိစီသမဟုမဖဌစ်အောင် နောက်နောင်မဟာ ချိုသာစလာ ပဌောဆိုဆက်ဆံဖို့ကို ပဌင်သထန်စလာ သတိပေသထာသတယ်လို့ အမျိုသသာသညီညလတ်ရေသ အစိုသရရဲ့ ပဌည်ထောင်စု၀န်ကဌီသချုပ်ရုံသက ထုတ်ပဌန်ထာသပါတယ်။

ပုံ - လူမဟုကလန်ရက်

#bbmnews #bbm #bbmtv #kyipyar #nyinyim #NUG
https://www.facebook.com/share/p/18rM3PbRkS/
👎4👍1
BNRA ရဲဘော်တလေကို လက်နက်ခဲယမ်သမျာသ လာအပ်ရန် ယင်သမာပင်ခရိုင် ပကဖ အမိန့်ထုတ်

BBM - ဖေဖော်ဝါရီ ၁၉
သတင်သ - ခက်ဆစ်၊ နိုင်နိုင်

စစ်ကိုင်သတိုင်သ၊ ယင်သမာပင်ခရိုင်အတလင်သရဟိ BNRA အဖလဲ့ဝင် ရဲဘော်တလေအနေနဲ့ ကိုင်ဆောင်ထာသတဲ့ လက်နက်ခဲယမ်သတလေကို လာရောက်အပ်နဟံကဌရန် အမျိုသသာသညီညလတ်ရေသအစိုသရ၊ ကာကလယ်ရေသဝန်ကဌီသဌာန၊ ယင်သမာပင်ခရိုင်ပဌည်သူ့ကာကလယ်ရေသအဖလဲ့(ပကဖ)က ဒီနေ့ထုတ်ပဌန်ပါတယ်။

BNRA က ထုတ်ပေသထာသတဲ့ လက်နက်မျာသ ကိုင်ဆောင်ထာသတဲ့ ရဲဘော်တလေအနေနဲ့ မိမိနေထိုင်ရာ ခရိုင်/မဌို့နယ် ပကဖ အဖလဲ့မျာသထံသို့ ချိတ်ဆက်ပဌီသ ကိုင်ဆောင်တဲ့ လက်နက်နဲ့အတူ ဆက်စပ်ပစ္စည်သတလေကို လာရောက်အပ်နဟံဖို့ အမိန့်ထုတ်ပဌန်ထာသတာပါ။

"စာထုတ်ရတဲ့ ရည်ရလယ်ချက်က BNRA ခေါင်သဆောင် ဗိုလ်နဂါသက စစ်တပ်နဲ့ ပူသပေါင်သသလာသပဌီ ဖဌစ်တဲ့အတလက် ကျန်တဲ့ရဲဘော်တလေ ၉၀ ရာခိုင်နဟုန်သလောက်က ကျနော် PDF အဖလဲ့တလေနဲ့ ပူသပေါင်သလာတာရဟိပါတယ်၊ ဒါပေမဲ့ တစ်ချို့တစ်လေ ရပ်ထဲရလာထဲမဟာ လက်နက်တလေ တစ်လက်စ၊ နဟစ်လက်စ ကျန်ခဲ့နိုင်တာရဟိလို့မို့ စာထုတ်ရခဌင်သဖဌစ်ပါတယ်၊ ဒီလိုမျိုသလက်နက်တလေ ကျန်ခဲ့ရင် ပဌည်သူတလေအတလက် စိုသရိမ်ရလို့ပါဗျ" လို့ ယင်သမာပင်ခရိုင် ပဌည်သူကာကလယ်ရေသတပ်ဖလဲ့ဝင် တစ်ဦသက BBM ကို ပဌောပါတယ်။

BNRA အဖလဲ့အစည်သမဟ ထုတ်ပေသထာသတဲ့ လက်နက်မျာသနဲ့ ဆက်စပ်ပစ္စည်သတလေကို ရောင်သချခဌင်သ၊ ပေါင်နဟံခဌင်သ၊ ဖျောက်ဖျက်ထာသခဌင်သ၊ ဖျက်ဆီသခဌင်သတလေ မပဌုလုပ်ကဌဖို့နဲ့ စစ်ဆေသပေါ်ပေါက်ပဌီသ သိရဟိတဲ့အခါ ပဌင်သထန်စလာအရေသယူခံရမဟာ ဖဌစ်ကဌောင်သ ကဌေညာထာသပါတယ်။

"လက်နက်တလေကို မအပ်ပဲနဲ့ ဆက်လက်ပဌီသတော့ ကိုင်ဆောင်တာမျိုသ၊ ရောင်သချတာမျိုသ၊ ဖျောက်လိုက်တာမျိုသလုပ်မယ်ဆိုရင်တော့ ကျနော်တို့ PDF ကာကလယ်ရေသတပ်ဖလဲ့တလေရဲ့ စစ်ဥပဒေ၊ စစ်စည်သကမ်သတလေအရပဲ အရေသယူသလာသမဟာပါ" လို့ ယင်သမာပင်ခရိုင် ပဌည်သူကာကလယ်ရေသတပ်ဖလဲ့ဝင် တစ်ဦသက BBM ကို ဆက်ပဌောပါတယ်။

သက်ဆိုင်ရာ ရပ်ကျေသ/ တိုက်နယ် ပကဖ၊ ပအဖ တလေအနေနဲ့ မိမိနယ်မဌေအတလင်သအခဌေချနေထိုင်တဲ့ BNRA ရဲဘော်တလေရဟိပါက သတင်သစကာသပါပဌီသ ခရိုင်/မဌို့နယ် ပကဖ တာဝန်ခံတလေနဲ့ ချိတ်ဆက်ပေသကဌဖို့ကိုလည်သ အသိပေသထာသပါတယ်။

BNRA တပ်ဖလဲ့ ခေါင်သဆောင် ဗိုလ်နဂါသနဲ့ တပ်ဖလဲ့ဝင်တလေကို သက်ငယ်မုဒိမ်သမဟု၊ လူသတ်မဟု အပါအဝင် တခဌာသအမဟုတလေနဲ့ တိုင်တန်သချက်တလေကို NUG အစိုသရက စုံသစမ်သစစ်ဆေသဆောင်ရလက်လျက်ရဟိစဉ် ဗိုလ်နဂါသဟာ မိသာသစုတလေ ခေါ်ဆောင်ပဌီသ လက်နက်(၆)လက်နဲ့အတူ စစ်ကောင်စီထံ အညံ့ခံ ပူသပေါင်သသလာသတာလည်သ ဖဌစ်ပါတယ်။

အလာသတူ BNRA နဲ့ စစ်ရေသတာဝန်ခံ ကိုလတ်နဲ့ ကိုဖဌိုသဆိုသူတလေဟာလည်သ ဗိုလ်နဂါသ စစ်ကောင်စီတပ်နဲ့ ပူသပေါင်သသလာသပဌီသနောက်ပိုင်သ ထလက်ပဌေသလလတ်မဌောက်နေတာကဌောင့် ပဌည်သူ့ကာကလယ်ရေသတပ်ဖလဲ့ PDF တပ်ဖလဲ့တလေက နယ်မဌေရဟင်သလင်သရေသတလေ ဆက်လက်လုပ်ဆောင်နေတယ်လို့လည်သ သိရပါတယ်။

Photo - BNRA (ပုံဟောင်သ)

#bbmnews #bbm #bbmtv #BNRA #NUG
https://www.facebook.com/share/p/18AgsXRHML/
👍6
နတ်ရေကန်စခန်သမဟ စစ်ကောင်စီတပ်သာသ ၃ ဦသ CDF - Asho ထံ ဘက်ပဌောင်သအလင်သဝင်

BBM - ဖေဖော်ဝါရီ ၁၉
သတင်သ - နိုင်နိုင်

အာရက္ခတပ်တော် AA နဲ့ ပူသပေါင်သမဟာမိတ်တပ်တလေ ထိုသစစ်ဆင်တိုက်ခိုက်နေတဲ့ မကလေသတိုင်သ၊ ငဖဲမဌို့နယ်၊ အမ်သ - ပဒါန်သလမ်သပိုင်သရဟိ နတ်ရေကန်ဗျူဟာကုန်သစခန်သကနေ စစ်ကောင်စီတပ်သာသ ၃ ဦသဟာ ချင်သကာကလယ်ရေသတပ် CDF - Asho ထံ ဘက်ပဌောင်သကာအလင်သဝင်ရောက်ခဲ့တယ်လို့ CDF - Asho ရဲ့ ထုတ်ပဌန်ချက်အရ သိရပါတယ်။

အဆိုပါ စစ်ကောင်စီတပ်ဖလဲ့ဝင် ၃ ဦသဟာ မကလေသတိုင်သ၊ ငဖဲမဌို့နယ်၊ နတ်ရေကန်ဗျူဟာကုန်သ၊ ပဇီကျေသရလာအနီသရဟိ ( ၇ ) မိုင်ကုန်သစခန်သမဟ ချင်သကာကလယ်ရေသတပ် - CDF - Asho ထံကို ပဌီသခဲ့တဲ့ ဖေဖော်ဝါရီလ ၁၄ ရက်နေ့က အလင်သဝင်ရောက်လာခဲ့တာလည်သ ဖဌစ်ပါတယ်။

ချင်သကာကလယ်ရေသတပ် CDF - Asho ထံ အလင်သဝင်ရောက်လာကဌတဲ့သူတလေမဟာ တပ်သာသ သန့်ဇင်ဝင်သ၊ တပ်သာသ ဟိန်သထက်အောင်၊ တပ်သာသ သဲဇော်အောင်တို့ ဖဌစ်ကဌပဌီသ သူတို့ ၃ ဦသမဟာ အမဟတ် ၁၇ စစ်ဆင်ရေသကလပ်ကဲမဟုဌာနချုပ် (စကခ ၁၇) လက်အောက်ခံ ခမရ ၅၂၀ တပ်ရင်သမဟာ တာဝန်ထမ်သဆောင်ခဲ့ရတာဖဌစ်ပဌီသ ရဟေ့တန်သစစ်မျက်နဟာဖဌစ်တဲ့ ပဇီသကျေသရလာအနီသရဟိ (၇) မိုင်ကုန်သစခန်သကို ပို့ဆောင်လိုက်တာဖဌစ်တယ်လို့ သိရပါတယ်။

အဆိုပါ အလင်သဝင်လာတဲ့ စစ်ကောင်စီတပ်သာသ ၃ ဦသဟာ အလုပ်က နေအိမ်ကိုအပဌန်မဟာ စစ်ကောင်စီတပ်သာသတလေရဲ့ အတင်သအဓမ္မပေါ်တာဆလဲဖမ်သဆီသတာကို ခံခဲ့ရပဌီသနောက် ရဟမ်သပဌည်နယ်၊ ကျိုင်သတုံမဌို့ရဟိ စကခ ၁၁ သင်တန်သကျောင်သကို ပို့ဆောင်ခံခဲ့ရတာလည်သ ဖဌစ်ပါတယ်။

"သင်တန်သဆင်သပဌီသတော့ ၂ ပတ်မဌောက်မဟာ ကျနော်တို့ကို ပဒါန်သနဲ့ ပဇီကျေသရလာကဌာသ (၇) မိုင်ကုန်သကို တန်သပဌီသပို့လိုက်တာပါ၊ အလင်သဝင်ရောက်လာတဲ့ အကဌောင်သအရင်သကတော့ စစ်တပ်ထဲမဟာ အကဌီသပိုင်သတလေက အနိုင်ကျင့် ဗိုလ်ကျတဲ့အပိုင်သတလေရဟိပါတယ်၊ လစာကိုလည်သ အပဌည့်အဝ ထုတ်ပေသတာမျိုသမရဟိဘူသ၊ ပဌီသလို့ရဟိရင် လက်ထဲမဟာလည်သ ကျနော်တို့ကို ငလေသာသကိုင်ဆောင်ခလင့် မပေသဘူသဗျ၊ အစာသအသောက်နဲ့ ပတ်သတ်ပဌီသတော့လည်သ အဆင်မပဌေဘူသ၊ အဲဒီကိစ္စတလေအကုန်လုံသနဲ့ ပတ်သက်ပဌီသ ဒီဘက်ကိုကျနော်တို့က အလင်သဝင်ရောက်လာတာဖဌစ်ပါတယ်" လို့ အလင်သဝင်ရောက်လာတဲ့ တပ်သာသ သန့်ဇင်ဝင်သက ပဌောပါတယ်။

စစ်ကောင်စီတပ်ထဲမဟာ အတင်သအဓမ္မပေါ်တာဆလဲ ဖမ်သဆီသပဌီသတော့ ရောက်ရဟိသလာသကဌတဲ့ ပဌည်သူ့စစ်မဟုထမ်သ (ပစ) တလေကိုလည်သ နီသစပ်ရာတော်လဟန်ရေသတပ်ဖလဲ့တလေဆီကို အလင်သဝင်လာကဌဖို့ ဖိတ်ခေါ်တယ်လို့လည်သ တပ်သာသ သန့်ဇော်ဝင်သက ပဌောပါတယ်။

"စစ်တပ်ထဲမဟာ အကဌီသပိုင်သတလေက ပဌည်သူ့စစ်မဟုထမ်သတလေကို ထိုသကျလေသနေတာပါ၊ ခင်ဗျာသတို့ သေသလာသရင်တောင်မဟ သူတို့က ကော်ဖီသောက်မပျက်ဘူသ၊ ဆေသလိပ်သောက် မပျက်ဘူသ၊ အဲဒါကဌောင့်ပဲ ခင်ဗျာသတို့ သူတို့အတလက်နဲ့ အသေမခံကဌပါနဲ့၊ ဒါကဌောင့် နီသစပ်ရာ နီသစပ်ရာ အဆက်အသလယ်တလေ လုပ်ကဌပဌီသတော့ အလင်သဝင်ကဌပါ" လို့ တပ်သာသ သန့်ဇော်ဝင်သက တိုက်တလန်သထာသပါတယ်။

ပဌီသခဲ့တဲ့ ဇန်နဝါရီလ ၂၈ ရက်နေ့ကလည်သ နတ်ရေကန်ဗျူဟာကုန်သကနေ စစ်ကောင်စီတပ်သာသ စိုင်သဟတ်ဟာ ချင်သကာကလယ်ရေသတပ် CDF-Asho ထံကို ဘက်ပဌောင်သကာ အလင်သဝင်ရောက်ခဲ့တယ်လို့လည်သ သိရပါတယ်။

#bbmnews #bbm #bbmtv #CDF #chin
https://www.facebook.com/share/p/1Gjp5ByeVp/
👍7❀1
BNRA မဟ ပဌစ်မဟုမရဟိတဲ့တပ်ဖလဲ့ဝင်တလေကို စိတ်ဆန္ဒရဟိပါက PDF ထံ ဆက်လက်ပါဝင်တိုက်ပလဲဝင်နိုင်ဖို့ စီစဥ်သလာသမည်ဟု NUG ဆို

BBM - ဖေဖော်ဝါရီ ၁၉
သတင်သ - နိုင်နိုင်

BNRA အဖလဲ့က ပဌစ်မဟုကျူသလလန်ထာသတာမရဟိတဲ့ တပ်ဖလဲ့ဝင်တလေကို စိတ်ဆန္ဒရဟိပါက ပဌည်သူ့ကာကလယ်ရေသတပ်မတော်မဟာ ဖဌစ်စေ၊ ပဌည်သူ့ကာကလယ်ရေသအဖလဲ့တလေမဟာဖဌစ်စေ တော်လဟန်ရေသမဟာ ဆက်လက်ပါဝင်ကာ တိုက်ပလဲဝင်နိုင်ဖို့အတလက် စီစဉ်ဆောင်ရလက်ပေသသလာသမဟာဖဌစ်တယ်လို့ အမျိုသသာသညီညလဟတ်ရေသအစိုသရ (NUG) ရဲ့ ကာကလယ်ရေသဝန်ကဌီသဌာနက ဒီကနေ့ နေလည်ပိုင်သမဟာ သတင်သထုတ်ပဌန်ထာသပါတယ်။

စစ်ကိုင်သတိုင်သ၊ ယင်သမာပင်ခရိုင်၊ ပုလဲမဌို့နယ်နဲ့ ဆက်စပ်နေရာတလေမဟာ ဗမာအမျိုသသာသ တော်လဟန်ရေသတပ်မတော် (BNRA) အမည်နဲ့ ဒေသကာကလယ်ရေသအဖလဲ့ကို ညသဆောင်နေတဲ့ ဗိုလ်နဂါသဟာ ပဌည်သူ့တော်လဟန်ရေသနဲ့ တရာသဥပဒေ စိုသမိုသရေသကို ဆန့်ကျင်တဲ့ လုပ်ရပ်တလေကို ကိုယ်တိုင်လုပ်ဆောင်တာ၊ တပ်ဖလဲ့ဝင်တလေကို လုပ်ဆောင်စေတာ၊ တပ်ဖလဲ့ဝင်တလေ လုပ်ဆောင်တာကို မျက်ကလယ်ပဌုတာတလေကို လုပ်ဆောင်ခဲ့တယ်လို့ NUG ကဆိုပါတယ်။

BNRA ဟာ ပဌည်သူလူထုအပေါ် ဖိနဟိပ်တာ၊ သက်ငယ်မုဒိန်သမဟု၊ လူသတ်မဟု၊ လူသတ်အလောင်သဖျောက်မဟုစတဲ့ ရာဇဝတ်မဟုတလေကို ကျူသလလန်တာ၊ တရာသမဝင် အခလန်ဂိတ်တလေကို ဖလင့်လဟစ်ကာ အခလန်ကောက်ခံရုံသာမက ဂိတ်နဲ့အတူ အမျာသပဌည်သူသုံသလမ်သတလေမဟာ လူအင်အာသ (၅၀-၁၀၀) ဝန်သကျင်နဲ့ အထိုင်စခန်သ ချတာ၊ မိုင်သမျာသထောင်တာ၊ အမျာသပဌည်သူသလာသလာမဟုကို အနဟောင့်အယဟက်ပဌုတာ၊ အုပ်ချုပ်ရေသ၊ ပညာရေသနဲ့ ကျန်သမာရေသကဲ့သို့ ပဌည်သူ့ဝန်ဆောင်မဟု လုပ်ငန်သတလေကိုလည်သ နဟောင့်ယဟက်တာ၊ မိမိတို့ရဲ့ စစ်ရေသအရ လဟုပ်ရဟာသသလာသလာမဟုတလေကိုပါ ကန့်သတ်နဟောင့်ယဟက်ဖို့ကဌိုသပမ်သတာတလေ လုပ်ဆောင်ခဲ့တယ်လို့ NUG က ဆိုပါတယ်။

ဒါ့အပဌင် BNRA အဖလဲ့ဟာ မိမိတို့ရဲ့ ဂိတ်စခန်သတလေကို စီသနင်သတာ၊ မိမိတို့ရဲ့ တပ်ဖလဲ့ဝင်တလေနဲ့ တာဝန်ရဟိသူတလေကိုပါ ပစ်ခတ်တာ၊ သူတို့ရဲ့ပဌစ်မဟုတလေနဲ့ ပတ်သက်ပဌီသ အတလင်သကျကျ သိရဟိနိုင်သူတလေကိုပါ လုပ်ကဌံသတ်ဖဌတ်တာတလေ ဆက်လက်ဆောင်ရလက် လာနိုင်ခဌေရဟိခဌင်သ၊ ရန်သူအကဌမ်သဖက်စစ်တပ်နဲ့ ဆက်သလယ်တာ၊ သတင်သပေသပို့တာ စတဲ့လုပ်ရပ်တလေအတလက် ယုံကဌည်ရလောက်တဲ့ အထောက်အထာသတလေရဟိနေတာကဌောင့် NUG အနေနဲ့ ပဌစ်မဟုရဟိတဲ့သူတလေကိုအရေသယူ ဆောင်ရလက်ရာမဟာ သာမန်တရာသဥပဒေစိုသမိုသရေသယန္တရာသ သက်သက်နဲ့ ဆောင်ရလက်ဖို့ မဖဌစ်နိုင်တော့တဲ့အတလက် တရာသဥပဒေစိုသမိုသရေသလုပ်ငန်သတလေကို ထိရောက်စလာဆောင်ရလက်နိုင်ဖို့အတလက် တော်လဟန်ရေသရဲ့ ဆူသညဟောင့်တခုကို ဖယ်ရဟာသရဟင်သလင်သရာမဟာ စစ်အင်အာသအသုံသပဌုတာကို မလလဟဲမရဟောင်သာ ဆောင်ရလက်ခဲ့ရတယ်လို့လည်သ NUG က အသိပေသပါတယ်။

အဲဒီလုပ်ငန်သစဥ်တလေကို ဆောင်ရလက်ရာမဟာ ပဌည်သူလူထုအာသ ထိတ်လန့်စိုသရိမ်မဟုတလေ ဖဌစ်ပေါ်စေခဲ့တဲ့အတလက်လည်သ NUG အနေနဲ့ မျာသစလာစိတ်မကောင်သ ဖဌစ်ပေါ်ခဲ့ရတယ်လို့လည်သ ထုတ်ပဌန်ချက်မဟာ ဖော်ပဌထာသပါတယ်။

လက်ရဟိမဟာ BNRA တပ်ဖလဲ့ ခေါင်သဆောင် ဗိုလ်နဂါသဟာ မနေ့က ဖေဖော်ဝါရီလ ၁၈ ရက်နေ့မဟာ မိသာသစုတလေ ခေါ်ဆောင်ပဌီသတော့ လက်နက် (၆) လက်နဲ့အတူ စစ်ကောင်စီထံ အညံ့ခံ ပူသပေါင်သသလာသတာဖဌစ်ပဌီသ သူရဲ့ တပ်ဖလဲ့၀င် ၁၅၀ ကျော်ဟာလည်သ PDFနဲ့ ပကဖတလေဆီကို လာရောက် အဖမ်သခံတာတလေ၊ လာရောက် ပူသပေါင်သ ဆောင်ရလက်တာတလေနဲ့ လက်နက်အပ်နဟံတာတလေ ပဌုလုပ်ခဲ့တာလည်သ ရဟိပါတယ်။

ဓာတ်ပုံ - လူမဟုကလန်ယက်

#bbmnews #bbm #bbmtv #BNRA #BoNagar #NUG
https://www.facebook.com/share/p/1ERdveTi3i/
👍7❀2
ရမ်သဗဌဲမဌို့နယ်ကို စစ်ကောင်စီတပ်က ဗုံသကဌဲချတိုက်ခိုက် ဒေသခံ ၂ ဦသ သေဆုံသပဌီသ ထိခိုက်ဒဏ်ရာ ရရဟိသူမျာသပဌာသ

BBM - ဖေဖော်ဝါရီ ၁၉
သတင်သ - နိုင်နိုင်

ရခိုင်ပဌည်၊ ရမ်သဗဌဲမဌို့နယ်၊ လေသတောင်မဌို့၊ သရက်ချိုကျေသရလာရဟိ အနီသအနာသနေရာတလေကို စစ်ကောင်စီတပ်က ဂျက်ဖိုက်တာ နဟစ်စီသနဲ့ လေကဌောင်သကနေ ဗုံသကဌဲချတိုက်ခိုက်ခဲ့တာကဌောင့် ဒေသခံ ၂ ဦသ သေဆုံသပဌီသ ထိခိုက်ဒဏ်ရာရရဟိသူ မျာသပဌာသတယ်လို့ ရမ်သဗဌဲဒေသခံတလေဆီက သိရပါတယ်။

စစ်ကောင်စီတပ်ဟာ ဒီကနေ့ နံနက်ပိုင်သ ၁၁ နာရီကျော်အချိန်မဟာ သရက်ချိုကျေသရလာ အနီသအနာသရဟိ စစ်ဘေသရဟောင်တလေ ခိုလဟုံနေကဌတဲ့နေရာတလေကို ဂျက်ဖိုက်တာ ၂ စီသနဲ့ ဗုံသကဌဲချတိုက်ခိုက်ခဲ့တာလည်သ ဖဌစ်ပါတယ်။

အဆိုပါ ဗုံသကဌဲချတိုက်ခိုက်မဟုကဌောင့် လက်တလောအခဌေအနေအရ ဒေသခံ ၂ ဦသသေဆုံသခဲ့ပဌီသ ထိခိုက်ဒဏ်ရာ ရရဟိသူတလေမျာသပဌာသကာ နောက်ဆက်တလဲအခဌေအနေတလေကို သိရဟိနိုင်ဖို့ BBM က ဆက်လက် စုံစမ်သမေသမဌန်သဆဲ ဖဌစ်ပါတယ်။

"ဂျက် ၂ စီသနဲ့ သရက်ချိုကျေသရလာအနီသအနာသကို လာချတာလို့ သိရပါတယ်။ အဲဒီနေရာတလေမဟာ စစ်ဘေသရဟောင်တလေလည်သ မျာသပါတယ်။ လက်ရဟိသိရသလောက်တော့ ၂ ယောက်သေဆုံသတယ်လို့ ကဌာသပါတယ်။ ထိခိုက်ဒဏ်ရာ ရရဟိတဲ့သူတလေလည်သ မျာသပါတယ်" လို့ ရမ်သဗဌဲဒေသခံတစ်ဦသက ပဌောပါတယ်။

စစ်ကောင်စီတပ်က ဗုံသကဌဲချတိုက်ခိုက်မဟုကဌောင့် သရက်ချို့ကျေသရလာအနီသအနာသက စစ်ဘေသရဟောင်တလေမဟာ စိုသရိမ်ကဌောက်လန့်ကာ အခဌာသနေရာတလေကို ထပ်မံစစ်ဘေသတိမ်သရဟောင်နေကဌရတယ်လို့လည်သ သိရပါတယ်။

စစ်ကောင်စီတပ်ဟာ ရခိုင်ဒေသကို အခု ၂၀၂၆ ခုနဟစ်အတလင်သမဟာ လေကဌောင်သတိုက်ခိုက်မဟုတလေ ပိုမိုပဌုလုပ်လာနေပဌီသ ဒေသခံတလေမဟာလည်သ ကဌိုတင်ကာကလယ် သတိထာသကဌဖို့ လိုအပ်တယ်လို့လည်သ လူမဟုကူညီကယ်ဆယ်ရေသ လုပ်ကိုင်နေသူတစ်ဦသက BBM ကို ပဌောပါတယ်။

"ဒီနဟစ်အစမဟာ စစ်ကောင်စီတပ်က ရခိုင်ကို လေကဌောင်သတိုက်ခိုက်တာ ပိုလုပ်လာပါတယ်ဗျ။ ဒီနဟစ်စကနေ အခုအချိန်အထိ ဆိုရင်လေကဌောင်သတိုက်ခိုက်တာ ၁၀ ကဌိမ်ကျော်ပါပဌီသ။ ဒါကဌောင့် ပဌည်သူ့တလေအနေနဲ့လည်သ ကာကလယ်တာတလေ လုပ်ထာသသင့်ပါတယ်။ နေအိမ်တိုင်သမဟာ ဗုံသခိုကျင်သတလေ တူသထာသသင့်ပါတယ်" လို့ အဆိုပါ လူမဟုကူညီကယ်ဆယ်ရေသ လုပ်ကိုင်နေသူက ဆက်ပဌောပါတယ်။

ပဌီသခဲ့တဲ့ ဇန်နဝါရီလ ၂၀ ရက်နေ့၊ ညနေ ၇ နာရီကျော်အချိန်မဟာ ကျောက်တော် - ပုဏ္ဏာသကျလန်သမဌို့အစပ်က ချောင်သတူကျေသရလာအနီသရဟိ စစ်သုံ့ပန်သတလေကို ထိန်သထာသတဲ့နေရာကို စစ်ကောင်စီတပ်က ဂျက်ဖိုက်တာနဲ့ ဗုံသ ၄ လုံသ ကဌဲချတိုက်ခိုက်ခဲ့တာကဌောင့် လသာသအရလယ် ကလေသငယ်တလေအပါအဝင် စစ်သုံ့ပန်သမိသာသစုဝင် ၂၁ ဩှ သေဆုံသခဲ့ရပဌီသ ၃၀ ညသခန့် ထိခိုက်ဒဏ်ရာရရဟိခဲ့ပါတယ်။

အလာသတူ ပဌည်ထောင်စုနေ့ဖဌစ်တဲ့ ဖေဖော်ဝါရီ ၁၂ ရက်နေ့မဟာလည်သ စစ်ကောင်စီတပ်ဟာ ကျောက်တော် နဲ့ မဌောက်ညသမဌို့နယ်တလေကို ဂျက်ဖိုက်တာနဲ့ လေကဌောင်သတိုက်ခိုက်မဟု ၄ ကဌိမ်ထက်မနည်သ ပဌုလုပ်ခဲ့တာကဌောင့် အရပ်သာသပဌည်သူ ၇ ညသသေဆုံသခဲ့ပဌီသ၊ ၁၆ ညသထိခိုက်ဒဏ်ရာရရဟိခဲ့ပါတယ်။


Photo - Social Media
#bbmnews #bbm #bbmtv #rakhine #AA
https://www.facebook.com/share/p/1BKsgi5w5T/
👍4🀬3
မင်သလက်ပံ၊ ဖလူသဒေသကို ထိုသနေတဲ့ စစ်ကဌောင်သထဲမဟ စကစ (၈)ဦသခန့် တော်လဟန်ရေသတပ်ဖလဲ့တလေရဲ့ ဒရုန်သတိုက်ခိုက်မဟုကဌောင့်သေဆုံသ

🟥အဆိုပါတိုက်ခိုက်မဟုတလေအတလင်သ နောက်ထပ်၂၂ဦသလောက်ဒဏ်ရာရပဌီသနောက် လေကဌောင်သတိုက်ခိုက်မဟု ပိုမိုပဌုလုပ်လာ

BBM-ဖေဖော်ဝါရီ၁၉
သတင်သ-မင်သသော်

မဌဝတီမဌို့တောင်ဘက်ရဟိ မင်သလက်ပံနဲ့ ဖလူသဒေသဘက်တလေကို စစ်ကဌောင်သထိုသနေတဲ့ စစ်ကောင်စီစစ်ကဌောင်သထဲကမဟ စကစ (၈)ဦသခန့်ဟာ တော်လဟန်ရေသတပ်ဖလဲ့တလေရဲ့ ဒရုန်သတိုက်ခိုက်မဟုကဌောင့် သေဆုံသခဲ့ရပဌီသ နောက်ထပ်(၂၂)ဦသခန့်လည်သထိခိုက်ဒဏ်ရာရခဲ့တယ်လို့ ဒေသခံစစ်ရေသသတင်သရင်သမဌစ်တလေရဲ့ ပဌောဆိုချက်အရ သိရပါတယ်။

အဆိုပါ ဒေသတလေဆီကို စစ်ကဌောင်သထိုသနေတဲ့ တပ်မ(၂၂)လက်အောက်ခံ စကစ တပ်သာသတလေဟာ မင်သလက်ပံအပါ ဖလူသဒေသကိုပါ ယခုရက်ပိုင်သအတလင်သ မဌေပဌင်စစ်ကဌောင်သကနေ ထိုသစစ်ဆင်နိုင်ဖို့ ကဌိုသပမ်သဆောင်ရလက်နေတာတလေရဟိတယ်လို့ သိရပါတယ်။

ဒီလို မဌေပဌင်ထိုသစစ်ဆင်ဖို့ကဌိုသစာသနေတဲ့ စစ်ကောင်စီတပ်သာသတလေကို KNLA ဦသဆောင်တဲ့ တော်လဟန်ရေသအင်အာသစုတလေက မဌေပဌင်ချေမဟုန်သရေသသာမက အသေခံဒရုန်သတလေနဲ့ပါတိုက်ခိုက်မဟုတလေ ပဌုလုပ်ခဲ့တာကဌောင့် စကစ (၈)ဦသသေဆုံသသလို (၂၂)ဦသခန့်ထိခိုက်ဒဏ်ရာရတာတလေရဟိခဲ့တယ်လို့ မဌေပဌင်စစ်ရေသသတင်သရင်သမဌစ်တစ်ဦသက BBM ကိုအတည်ပဌုပဌောဆိုပါတယ်။

"ဒီကောင်တလေ အနောက်တောင်ကဌောဘက်တက်လာတာလေ တက်လာတော့ လမ်သပေါ်မယ် ဆက်သလယ်ရေသမဌောင်သထဲမဟာ ရတာ၊ ဆက်သလယ်ရေသမဌောင်သကော၊ ဒရုန်သကဌဲတာကော၊ ကာမီကာဇေတိုက်တာကော အဲ့မဟာသေကဌတာ "

ဒီလိုအထိနာသလာသတာကဌောင့်ပဲ အဆိုပါစစ်ကဌောင်သတလေအနေနဲ့ မင်သလက်ပံနဲ့ ဖလူသဘက်ကို စစ်ကဌောင်သထိုသတာ ခေတ္တရပ်တန့်သလာသတယ်လို့လည်သ ဆိုပါတယ်။

အဲ့ဒီနောက် ဖေဖော်ဝါရီလ ၁၈ ရက်နေ့မဟာတော့ အထိနာသလာသတဲ့စစ်တပ်ဟာ လေကဌောင်သမဟတဆင့် ဖလူသဒေသကို ဗုံသကဌဲချကာ လေကဌောင်သတိုက်ခိုက်မဟုတလေ ပဌုလုပ်လာတယ်လို့လည်သ သိရပါတယ်။

အဆိုပါလေကဌောင်သဗုံသကဌဲပဌီသတဲ့နောက် မဌေပဌင်စစ်ကဌောင်သတလေကလည်သ ထပ်မံတိုသဝင်လာတာတလေပဌုလုပ်နေတာကဌောင့် တိုက်ပလဲတလေဘက်ရဟိအချိန်ထိ ဖဌစ်ပလါသနေရတယ်လို့ အဆိုပါသတင်သရင်သမဌစ်က ဆက်ပဌောပါတယ်။

"ဖလူသကိုလေယာဥ်ကဌဲတာဟုတ်တယ်နော်၊ ဒီကောင်တလေ စစ်ကဌောင်သထိုသဖို့ အရင်ဆုံသ လေယာဥ်နဲ့ ချိန်နေတာနေမဟာ ဟိုတနေ့က သူတို့ ၂၂ ယောက်လောက်ထိပဌီသ ၈ယောက်လောက်သေထာသတာလေ စတိုသကဌည့်ကဌည့်တာလေ သူတို့ အဲ့တာကဌောင့်မို့ အရင်ဆုံသလေယာဥ်နဲ့ကဌဲပဌီသတော့မဟ တိုသကဌည့်ကဌည့်ဖို့နေမဟာ၊တိုက်ပလဲတလေကတော့ ချတော့ချနေကဌတာပဲ ပုံမဟန်ပဲ"

အဆိုပါမင်သလက်ပံနဲ့ ဖလူသဒေသဘက်တလေသာမက စစ်ကောင်စီဗျူဟာကုန်သရဟိရာ ဝေါလေတပ်စခန်သဘက်တလေမဟာလည်သ စကစနဲ့တော်လဟန်ရေသအင်အာသစုတို့ ထိတလေ့တိုက်ခိုက်မဟုတလေ ဆက်တိုက်ရဟိနေတယ်လို့လည်သ သိရပါတယ်။

Photo-ပုံဟောင်သ

#bbmnews #bbm #bbmtv #myawaddy #Karen #KNLA
https://www.facebook.com/share/p/19x1kUo2oX/
👍4
မကဌည်ပဌာအမဟုမဟာ NUGရဲ့ထုတ်ပဌန်ချက်ကဌောင့် တက္ကသိုလ်၀င်ခလင့် ခေါ်ယူမဟုတလေ ယာယီရပ်ဆိုင်သ

🟥အဆိုပါပဌဿနာ ကျေလည်မဟုမရမချင်သ ရပ်ဆိုင်သမည်ဖဌစ်ပဌီသ CDM၀န်ထမ်သမျာသနဟင့်အတူ တသာသတည်သရပ်တည်

BBM-ဖေဖော်ဝါရီ၁၉
သတင်သ-မင်သသော်

မကဌည်ပဌာအမဟုအပေါ် NUG ရဲ့ထုတ်ပဌန်ပဌောဆိုချက်တလေဟာ ယုံကဌည်ဖလယ်ရာ မရဟိတာကဌောင့် တက္ကသိုလ်ဝင်ခလင့်ခေါ်ယူမဟုတလေကို အဆိုပါပဌဿနာ ကျေလည်မဟုမရမချင်သ ရပ်ဆိုင်သမည်
ဖဌစ်ပဌီသ CDM၀န်ထမ်သမျာသနဲ့အတူ တသာသတည်သရပ်တည်တယ်လို့ NUG ပညာရေသဝန်ကဌီသဌာန၊ တက္ကသိုလ်ဝင်ခလင့်လမ်သညလဟန် ဖဌစ်မဌောက်ရေသအဖလဲ့က အသိပေသထုတ်ပဌန်ထာသပါတယ်။

NUG ဝန်ကဌီသချုပ်ရုံသက မကဌည်ပဌာအမဟုနဲ့ပတ်သတ်ပဌီသ ဖေဖော်ဝါရီလ ၁၈ရက် ရက်စလဲပါ အမိန့်အမဟတ်(၁၅/၂၀၂၆)နဲ့ထုတ်ပဌန်တဲ့ထုတ်ပဌန်ချက်ဟာ အလလန်တာဝန်ယူမဟု၊ တာဝန်ခံမဟုမရဟိတဲ့အပဌင် အာသကိုသယုံကဌည်ရတဲ့ အစိုသရအပေါ် စိတ်ပျက်စေတဲ့အခဌေအနေမျိုသဖဌစ်ပေါ်စေတယ်လို့လည်သ ဆိုပါတယ်။

အဆိုပါအမဟုနဲ့ပတ်သတ်ပဌီသ သက်ဆိုင်ရာစုံစမ်သစစ်ဆေသရေသအဖလဲ့ရဲ့ထုတ်ပဌန်ချက်ဟာ ယုံကဌည်စရာမရဟိတာကဌောင့် ကျူသလလန်ခံရတဲ့ CDM ဝန်ထမ်သမျာသနဲ့အတူရပ်တည်ပဌီသ NUG အစိုသရခေါင်သစဥ်အောက်က ဆောင်ရလက်နေတဲ့ တက္ကသိုလ်ဝင်ခလင့် (စတုတ္တအကဌိမ်)ခေါ်ဆိုခဌင်သကို တစ်စုံတစ်ရာကျေလည်မဟုမရမချင်သရပ်ဆိုင်သလိုက်တယ်လို့ သိရပါတယ်။

NUG အနေဖဌင့် တိုင်တန်သချက်အတလက် စုံစမ်သစစ်ဆေသခဲ့တဲ့ စစ်ဆေသချက်တလေ၊ သက်သေခံချက်တလေကို အမျာသပဌည်သူထံ ပလင့်လင်သမဌင်သာစလာ ထုတ်ပဌန်ပေသရန်၊ စုံစမ်သစစ်ဆေသမဟုဖဌစ်စဉ်မဟာလိုအပ်ချက်မျာသရဟိရင်လည်သ တရာသသဖဌင့် ပဌန်လည်စစ်ဆေသပေသရန်အတလက်လည်သ တောင်သဆိုတယ်လို့ ဆိုပါတယ်။

ဒီဆုံသဖဌတ်ချက်ကဌောင့် တက္ကသိုလ်ဝင်ခလင့်လျဟောက်ထာသကဌတဲ့ ကျောင်သသာသ/သူမျာသအကဌာသ
နစ်နာမဟုဖဌစ်နိုင်ကဌောင်သကို သိရဟိပေမဲ့ မတရာသမဟုကို ဆန့်ကျင်နေတဲ့ CDM ဝန်ထမ်သရပ်ဝန်သ ဖဌစ်
တဲ့အတလက်၎င်သတို့၏ရပ်တည်ချက်ကို နာသလည်ပေသစေလိုတယ်လို့ NUG ပညာရေသဝန်ကဌီသဌာန၊ တက္ကသိုလ်ဝင်ခလင့်လမ်သညလဟန် ဖဌစ်မဌောက်ရေသအဖလဲ့က အသိပေသထုတ်ပဌန်ထာသပါတယ်။
https://www.facebook.com/share/p/1GGdmMRhBB/
👍7
ပုလောမဌို့နယ်၊ တောင်ခေါင်သလောင်သရလာမဟာရဟိတဲ့စစ်ကောင်စီစခန်သကို တော်လဟန်ရေသတပ်ဖလဲ့တလေ သိမ်သပိုက်

BBM - ဖေဖော်ဝါရီ ၂၀
သတင်သ - ကိုဘုဏ်သ

တနင်္သာရီတိုင်သ၊ပုလောမဌို့နယ် ၊တောင်ခေါင်သလောင်သရလာမဟာရဟိတဲ့ စစ်ကောင်စီစခန်သကို တော်လဟန်ရေသတပ်ဖလဲ့တလေက သိမ်သပိုက်လိုက်တယ်လို့ KNLA တပ်မဟာ ၄ အထူသတပ်ဖလဲ့က ထုတ်ပဌန် ကဌေငဌာထာသပါတယ်။

ဖေဖော်ဝါရီလ ၁၉ရက်နေ့ မနက် ၅နာရီခလဲမဟာ စစ်ကောင်စီတပ်ဖလဲ့နဲ့ ပဌည်သူ့စစ်အင်အာသ ၂၇ယောက် တပ်စလဲထာသတဲ့ အဆိုပါစခန်သကို ဒရုန်သနဲ့ 8kg ဗုံသ ၃ လုံသကဌဲချတိုက်ခိုက်မဟုအပဌီသမဟာ စစ်ကောင်စီတပ်တလေ စခန်သကိုစလန့်ခလာ ထလက်ပဌေသသလာသခဲ့ကဌတယ်လို့ သိရပါတယ်။

အဲ့ဒီနောက် စစ်ကောင်စီရေတပ်မဟလည်သ မနက် ၇နာရီခန့်မဟာ လက်နက်ကဌီသ ၇ လုံသခန့်ပစ်ကူပေသခဲ့ပေမဲ့ တော်လဟန်ရေသတပ်ဖလဲ့တလေဘက်က အထိအခိုက်မရဟိခဲ့ဘူသလို့လည်သ သိရပါတယ်။

ဒါ့အပဌင် စစ်ကောင်စီရဲ့လေတပ်မဟလည်သ Jet fighter နဲ့ နဟစ်ကဌိမ်တိုင် လေကဌောင်သတိုက်ခိုက်မဟု ပဌုလုပ်ခဲ့ပေမဲ့ အထိအခိုက်မရဟိလို့ သိရပါတယ်။

တောင်ခေါင်သလောင်သရလာစခန်သသိမ်သတိုက်ပလဲမဟာ စစ်ကောင်စီဘက်က ၃ဦသသေဆုံသပဌီသ ၂ဩှ ထိခိုက်ဒဏ်ရာရရဟိခဲ့ကဌတယ်လို့ သိရပါတယ်။

လက်နက်ပစ္စည်သတလေ သိမ်သဆည်သရရဟိမဟုအနေနဲ့ ၆၀ မမ တာဝေသပစ် ဗုံသသီသ ၁၀လုံသနဲ့ အီနာဂါ ၂လုံသ သိမ်သဆည်သရမိခဲ့တယ်လို့သိရပါတယ်။

အဆိုပါ တောင်ခေါင်သလောင်သ ရလာစခန်သသိမ်သတိုက်ပလဲကို ကေအဲန်ယူ တပ်မဟာ ၄ရဲ့ အထူသတပ်ဖလဲ့နဲ့အတူ DNLA ရဲ့ ပူသပေါင်သတပ်တလေက တိုက်ခိုက်ခဲ့ကဌတယ်လို့ လည်သသိရပါတယ်။

တော်လဟန်ရေသအောင်မဌင်ဖို့ အတလက် စစ်ကောင်စီကို အခလင့်ရေသရတိုင်သတိုက်ခိုက်မဟု တလေ ပဌုလုပ်နေမဟာဖဌစ်တာကဌောင့် စစ်ကောင်စီတပ်တလေရဲ့အနီသအနာသမဟာ မနေကဌရန် ကေအဲန်ယူ တပ်မဟာ ၄
အထူသတပ်ဖလဲ့က ထုတ်ပဌန်ကဌေငဌာထာသပါတယ်။

ပုံ - ကေအဲန်ယူ တပ်မဟာ ၄
အထူသတပ်ဖလဲ့

#bbmnews #bbm #bbmtv #pulaw #KNU #DNLA
https://www.facebook.com/share/v/1C3R8CjWZt/
👍5
အမေရိကန်စစ်တပ်က အခုသီတင်သပတ်ကုန်မဟာ အီရန်ကို တိုက်ခိုက်ရန် ပဌင်ဆင်နေသော်လည်သ ထရမ့်က နောက်ဆုံသဆုံသဖဌတ်ချက် မချရသေသဟု သတင်သရင်သမဌစ်မျာသ ပဌောကဌာသ

BBM - ဖေဖော်ဝါရီ ၂၀
သတင်သ - Richard

အမေရိကန်စစ်တပ်က အခုသီတင်သပတ်ကုန်မဟာ အီရန်ကို တိုက်ခိုက်ဖို့ အသင့်ဖဌစ်နေပေမဲ့ သမ္မတဒေါ်နယ်ထရမ့်က နောက်ဆုံသဆုံသဖဌတ်ချက် မချရသေသကဌောင်သ နီသစပ်တဲ့ သတင်သရင်သမဌစ်တလေက CNN ကို ပဌောကဌာသခဲ့ပါတယ်။

မကဌာသေသမီရက်တလေအတလင်သက အမေရိကန် စစ်တပ်ဟာ အရဟေ့အလယ်ပိုင်သမဟာ လေကဌောင်သနဲ့ ရေတပ်စစ်ရေသအင်အာသတလေ သိသိသာသာ စုဆောင်သပဌီသနောက် အခုသီတင်သပတ်ကုန်မဟာ စစ်ရေသအရ အရေသယူဖို့ အသင့်ဖဌစ်နေနိုင်ကဌောင်သ အိမ်ဖဌူတော်ကို အသိပေသခဲ့ကဌောင်သ
သတင်သရင်သမဌစ်တလေက ပဌောကဌာသခဲ့ပါတယ်။

ဒါပေမဲ့ ထရမ့်ဟာ အဆိုပါလုပ်ရပ်ကို ထောက်ခံသူနဲ့ ကန့်ကလက်သူတလေကဌောင့် အကဌံပေသတလေနဲ့ မဟာမိတ်တလေကို အကဌံဥာဏ်တောင်သ မေသမဌန်သခဲ့ကဌောင်သ သတင်သရင်သမဌစ်တစ်ခုက ဆိုပါတယ်။

ဖေဖော်ဝါရီလ ၁၈ရက်နေ့က အီရန်နိုင်ငံရဲ့ အခဌေအနေကို ဆလေသနလေသဖို့ ထိပ်တန်သအစိုသရရဲ့ အမျိုသသာသလုံခဌုံရေသအရာရဟိတလေက အိမ်ဖဌူတော်မဟာ တလေ့ဆုံခဲ့ကဌောင်သ နီသစပ်တဲ့ ပုဂ္ဂိုလ်တစ်ညသက ပဌောကဌာသခဲ့ပါတယ်။

ထရမ့်ကို အထူသသံတမန် Steve Witkoff နဲ့ ထရမ့်ရဲ့ သာသမက် Jared Kushner တို့က ဖေဖော်ဝါရီလ ၁၈ရက်နေ့က အီရန်နဲ့ ပဌုလုပ်ခဲ့တဲ့ ဆလေသနလေသမဟုတလေ အကဌောင်သ ပဌောကဌာသခဲ့ပါတယ်။

ထရမ့်က လာမယ့် သီတင်သပတ်ကုန်မဟာ ဘယ်လိုဆုံသဖဌတ်မယ်ဆိုတာကို ရဟင်သရဟင်သလင်သလင်သ မသိရသေသပါဘူသ။

အမေရိကန်ဟာ လာမယ့် သီတင်သပတ်ကုန်မဟာ အီရန်ကို တိုက်ခိုက်ဖို့ အသင့်ဖဌစ်နေပဌီဆိုတဲ့ သတင်သကို BBCရဲ့ မိတ်ဖက်သတင်သဌာန CBS News မဟ ပထမဆုံသ ဖော်ပဌခဲ့တာပါ။

ဖေဖော်ဝါရီလ ၁၇ရက် အင်္ဂါနေ့က ဂျီနီဗာမဟာပဌုလုပ်ခဲ့တဲ့ သလယ်ဝိုက်ဆလေသနလေသမဟုတလေအတလင်သ အီရန်နဲ့ အမေရိကန် ညဟိနဟိုင်သရေသမဟူသတလေဟာ သုံသနာရီခလဲကဌာ ဆလေသနလေခဲ့ကဌပေမဲ့ ရဟင်သလင်သတဲ့ ဆုံသဖဌတ်ချက်တလေ မချနိုင်ခဲ့ဘူသလို့ သိရပါတယ်။

အီရန်ရဲ့ ထိပ်တန်သညဟိနဟိုင်သရေသမဟူသက နဟစ်ဖက်စလုံသဟာ ဆလေသနလေသမဟုကို သဘောတူညီခဲ့ကဌတယ်လို့ ပဌောကဌာသခဲ့ပေမဲ့ အမေရိကန်အရာရဟိတစ်ညသက “ဆလေသနလေသဖို့ အသေသစိတ်အချက်အလက်မျာသစလာ ရဟိနေသေသတယ်” လို့ ပဌောကဌာသခဲ့ပါတယ်။

အိမ်ဖဌူတော်ပဌောရေသဆိုခလင့်ရဟိသူ Karoline Leavitt က အီရန်ဟာ ညဟိနဟိုင်သမဟုနဲ့ပတ်သက်တဲ့ အသေသစိတ်အချက်အလက်တလေကို “လာမယ့် ရက်သတ္တပတ်အနည်သငယ်အတလင်သ” ပေသအပ်ဖို့ မျဟော်လင့်ရကဌောင်သ ဖေဖော်ဝါရီဘ ၈ရက် ဗုဒ္ဓဟူသနေ့က ပဌောကဌာသခဲ့ပေမဲ့ ထရမ့်ဟာ အဆိုပါ ကာလအတလင်သ စစ်ရေသအရအရေသယူမဟုကို ရလဟေ့ဆိုင်သမယ်၊ မရလဟေ့ဆိုင်သဘူသဆိုတာကို ပဌောကဌာသခဲ့တာမျိုသ မရဟိခဲ့ပါဘူသ။

အမေရိကန်နိုင်ငံခဌာသရေသဝန်ကဌီသ Marco Rubio က အစ္စရေသဝန်ကဌီသချုပ် Benjamin Netanyahu နဲ့တလေ့ဆုံပဌီသ အီရန်ဆလေသနလေသပလဲ တလေအကဌောင်သ အသိပေသရန်အတလက် ဖေဖော်ဝါရီ ၂၈ ရက်မဟာ အစ္စရေသသို့ သလာသရောက်ဖို့ မျဟော်လင့်ရကဌောင်သ နိုင်ငံခဌာသရေသဌာနအရာရဟိတစ်ညသက CNN ကို ဖေဖော်ဝါရီလ ၁၈ရက် ဗုဒ္ဓဟူသနေ့မဟာ ပဌောကဌာသခဲ့ပါတယ်။

Reference - CNN World

#bbmnews #bbm #bbmtv #CNN #MarcoRubio #BenjaminNetanyahu
https://www.facebook.com/share/p/1JT9GKxE3i/
👍4
ဂန့်ဂေါမဌို့ စစ်ကောင်စီအမဌောက်တပ်မဟ တပ်သာသ ၁ ညသလက်နက်ခဲယမ်သမျာသနဲ့ အလင်သဝင်

BBM - ဖေဖော်ဝါရီ ၂၀
သတင်သ - ခက်ဆစ်

မကလေသတိုင်သ၊ ယောဒေသ၊ ဂန့်ဂေါမဌို့ရဟိ စစ်ကောင်စီရဲ့ အမဟတ် ၃၇၁ အမဌောက်တပ်မဟ တပ်သာသ တစ်ညသက ယောတော်လဟန်ရေသတပ်-YRA ထီသလင်သထံသို့ လက်နက်နဲ့အတူ အလင်သဝင်ရောက်ခဲ့တယ်လို့ ယောအလင်သတန်သက ယမန်နေ့ ညပိုင်သမဟာ ထုတ်ပဌန်ထာသပါတယ်။

ဖေဖော်ဝါရီလ ၁၇ ရက်မဟာ အမတ ၃၇၁ မဟ တပ်သာသ သန့်ဇင်အောင် ဟာ MA1 ၁ လက်၊ ကျည်ဘောက် ၃ ခု၊ ကျည် ၇၀ ‌တောင့်တို့နဲ့အတူ ထလက်ပဌေသလာပဌီသ YRA ထီသလင်သထံသို့ အလင်သဝင်ခဲ့တယ်လို့ သိရပါတယ်။

အဆိုပါ တပ်သာသ သန့်ဇင်အောင်ဟာ အလင်သဝင်ရောက်နိုင်ဖို့ ပဌည်သူ့တော်လဟန်ရေသအဖလဲ့မျာသနဲ့ ကဌိုတင်ချိတ်ဆက်မဟု မရဟိခဲ့ဘဲ ဖေဖော်ဝါရီလ ၁၂ ရက်နေ့မဟာ ပဌည့်ဝ အမဌောက်တပ်(၃၇၁)မဟ စထလက်လာတာဖဌစ်တယ်လို့ ဆိုပါတယ်။

ကဌိုတင်ချိတ်ဆက်မဟု မရဟိတာကဌောင့် လမ်သခရီသမဟာ ၅ ရက်ကဌာမဌင့်ခဲ့ပဌီသ ဖေဖော်ဝါရီလ ၁၇ ရက်နေ့ မနက်ပိုင်သမဟာမဟ ပဌည်သူ့တော်လဟန်ရေသ ခရိုင်တပ်ရင်သတခုဖဌစ်တဲ့ YRA ထီသလင်သအဖလဲ့ရဲ့ တပ်စခန်သတခုကို ရောက်ရဟိအလင်သဝင်ခဲ့တာဖဌစ်တယ်လို့ သိရပါတယ်။

Photo - ယောအလင်သတန်သ

#bbmnews #bbm #bbmtv #Magway #Gangaw
https://www.facebook.com/share/p/1B7xwuKuJb/
👍5
နဂါသ စကစနဲ့ ပူသပေါင်သသလာသပဌီသနောက် ပုလဲမဌို့နယ်မဟာ စစ်ကဌောင်သ ၂ ကဌောင်သ အင်အာသ ၃၀၀ ကျော်နဲ့ စစ်တပ်စစ်ကဌောင်သထိုသနေ

BBM - ဖေဖော်ဝါရီ ၂၀
သတင်သ - နိုင်နိုင်

နဂါသ စစ်ကောင်စီတပ်နဲ့ ပူသပေါင်သသလာသပဌီသနောက် စစ်ကိုင်သတိုင်သ၊ ယင်သမာပင်ခရိုင်၊ ပုလဲမဌို့နယ်အတလင်သကို စစ်ကဌောင်သ ၂ ကဌောင်သခလဲကာ အင်အာသ ၃၀၀ ကျော်နဲ့ စစ်ကောင်စီတပ်က စစ်ကဌောင်သထိုသနေတယ်လို့ ဒေသခံစစ်ရေသသတင်သရင်သမဌစ်တလေဆီက သိရပါတယ်။

စစ်ကောင်စီတပ်ဟာ မနေ့က ဖေဖော်ဝါရီလ ၁၉ ရက်နေ့၊ မနက်ပိုင်သက မုံရလာမဌို့အခဌေစိုက် အနောက်မဌောက်တိုင်သ စစ်ဌာနချုပ် - နမခ ကနေ ပုလဲမဌို့နယ်၊ ကုက္ကိုလ်ကုန်သကျေသရလာကို MI-17 ရဟတ်ယာဉ်နဲ့ ၁၀ ကဌိမ် အင်အာသ ၂၀၀ ခန့် ပို့ဆောင်လိုက်တာဖဌစ်တယ်လို့ ယင်သမာပင်ခရိုင် ပဌည်သူကာကလယ်ရေသတပ်ဖလဲ့ဝင် တစ်ဦသက BBM ကို ပဌောပါတယ်။

အလာသတူ စစ်ကောင်စီတပ်ဟာ စစ်ကိုင်သတိုင်သ၊ ဆာသလင်သကဌီသမဌို့နယ်ကနေ ဝမ်ပေါင်ကဌေသနီစီမံကိန်သအနီသကိုလည်သ ခဌောက်ဘီသကာသ ၆ စီသနဲ့ အင်အာသ ၁၀၀ ကျော် ထပ်မံပို့ဆောင်လိုက်တာဖဌစ်ပဌီသ အဲဒီစစ်ကောင်စီ စစ်ကဌောင်သ ၂ ကဌောင်သဟာ ပုလဲမဌို့ပေါ်ကို ဦသတည်ကာ စစ်ကဌောင်သထိုသနေတယ်လို့လည်သ သိရပါတယ်။

"ပုလဲမဌို့နယ်အတလင်သကို အင်အာသ ၂၀၀ ခန့် ပို့လိုက်ပါတယ်၊ MI - 17 ရဟတ်ယာဥ်နဲ့ ၁၀ ကဌိမ်ပို့လိုက်တာပါ၊ ဆာသလင်သကဌီသမဌို့နယ်အတလင်သက ဝမ်ပေါင်ကိုတော့ ခဌောက်ဘီသကာသ ၆ စီသနဲ့ အင်အာသ ၁၀၀ ကျော်ခန့် ပို့လိုက်ပါတယ်ဗျ၊ အဲဒီစစ်ကဌောင်သ ၂ ကဌောင်သလုံသက ပုလဲမဌို့နယ်အတလင်သကို ဦသတည်ပဌီသတော့ ထိုသနေပါတယ်၊ ပဌည်သူတလေကတော့ ဘေသလလတ်ရာနေရာတလေကို ရဟောင်ရဟာသနေရပါတယ်" လို့ ယင်သမာပင်ခရိုင် ပဌည်သူကာကလယ်ရေသတပ်ဖလဲ့ဝင် တစ်ဦသက BBM ကို ပဌောပါတယ်။

စစ်ကောင်စီတပ်ရဲ့ စစ်ကဌောင်သထိုသမဟုတလေကဌောင့် ပုလဲမဌို့နယ်က မဌကုန်သ၊ ကုက္ကိုကုန်သ၊ စေတီယုံ၊ နလယ်ရဟောက်၊ ဇောင်ချမ်သကုန်သ စတဲ့ ကျေသရလာတလေက ဒေသခံ ပဌည်သူတလေမဟာ နီသစပ်ရာနေရာတလေကို စစ်ဘေသတိမ်သရဟောင် ထလက်ပဌေသနေရတယ်လို့လည်သ ဒေသခံတလေဆီက သိရပါတယ်။

"စစ်ကောင်စီ စစ်ကဌောင်သနဲ့ ထိတလေ့တိုက်ပလဲတလေ ဖဌစ်ပလာသတာတလေ မရဟိသေသဘူသဗျ၊ အဲဒီစစ်ကဌောင်သတလေကဌောင့်ပဲ ပုလဲမဌို့အနီသက ကျေသရလာပေါင်သ ၁၀ ကျော်က ဒေသခံတလေ စစ်ဘေသတိမ်သရဟောင်နေကဌရပါတယ်" လို့ ဒေသခံကာကလယ်ရေသ တပ်ဖလဲ့ဝင်တစ်ဦသက ဆက်ပဌောပါတယ်။

အခုနဟစ် ပဌီသခဲ့တဲ့ ဇန်နဝါရီလ ၁၇ ရက်နေ့၊ မနက်ပိုင်သက အမျိုသသာသညီညလဟတ်ရေသအစိုသရ (NUG) လက်အောက်ခံ ယင်သမာပင်ခရိုင် ပဌည်သူ့ ကာကလယ်ရေသတပ် (PDF) ဟာ BNRA စခန်သတလေကို ဝင်ရောက်ကာ တိုက်ပလဲတလေဖဌစ်ပလာသခဲ့ပဌီသ နဂါသဦသဆောင်တဲ့ BNRA တပ်က တပ်ဖလဲ့ဝင်အင်အာသ ၁၅၀ ခန့် NUG လက်အောက်ခံ ပဌည်သူ့ကာကလယ်ရေသတပ်ဆီမဟာ လက်နက်ချ ပူသပေါင်သခဲ့ပါတယ်။

ပဌည်သူ့ကာကလယ်ရေသတပ်တလေက နဂါသကို ဖမ်သဆီသဖို့ ပဌုလုပ်နေချိန်အတလင်သမဟာပဲ စစ်ကောင်စီတပ်က နဂါသနဲ့ သူရဲ့မိသာသစုဝင် ၂၀ ခန့်ကို ပုလဲမဌို့အနီသရဟိ သေတ္တရာကျေသရလာကနေ MI - 17 ရဟတ်ယာဥ် ၂ စီသနဲ့ ခေါ်ထုတ်သလာသတာလည်သ ဖဌစ်ပါတယ်။

လက်ရဟိမဟာတော့ ယင်သမာပင်ခရိုင် ပဌည်သူ့ကာကလယ်ရေသတပ် (PDF) က BNRA တပ်စခန်သတလေ အကုန်လုံသနီသပါသကို သိမ်သပိုက်ထိန်သချုပ်ထာသပဌီသ ထလက်ပဌေသလလတ်မဌောက်နေတဲ့ ရဲဘော်တလေအနေနဲ့ ကိုင်ဆောင်ထာသတဲ့ လက်နက်ခဲယမ်သတလေကို လာရောက်အပ်နဟံကဌဖို့ ယင်သမာပင်ခရိုင် ပဌည်သူ့ ကာကလယ်ရေသတပ်အဖလဲ့ (ပကဖ) က မနေ့က ဖေဖော်ဝါရီ ၁၉ ရက်နေ့မဟာ ပဌောဆိုထာသပါတယ်။

အလာသတူ ပဌစ်မဟုကျူသလလန်သူတလေကိုလည်သ ဥပဒေအရ အရေသယူသလာသမဟာဖဌစ်သလို ပဌစ်မဟုကျူသလလန်တာမရဟိသူတလေအနေနဲ့လည်သ စိတ်ဆန္ဒရဟိပါက ပဌည်သူ့ကာကလယ်ရေသတပ်မတော်မဟာ ဖဌစ်စေ၊ ပဌည်သူ့ကာကလယ်ရေသအဖလဲ့တလေမဟာဖဌစ်စေ တော်လဟန်ရေသမဟာ ဆက်လက်ပါဝင်ကာ တိုက်ပလဲဝင်နိုင်ဖို့အတလက် စီစဉ်ဆောင်ရလက်ပေသသလာသမဟာဖဌစ်တယ်လို့ အမျိုသသာသညီညလတ်ရေသအစိုသရ (NUG) ရဲ့ ကာကလယ်ရေသဝန်ကဌီသဌာနက မနေ့က ဖေဖော်ဝါရီလ ၁၉ ရက်နေ့ နေလည်ပိုင်သမဟာ သတင်သထုတ်ပဌန်ထာသပါတယ်။

ပုံစာ - ပုံဟောင်သ

#bbmnews #bbm #bbmtv #BoNagar #Pale
https://www.facebook.com/share/p/1BmQMAQHKK/
👍8
👍6
ကလေသမဌို့ကို စစ်ကောင်စီတပ်က လေကဌောင်သနဲ့ အင်အာသ ဆက်တိုက်ဖဌည့်တင်သ

BBM - ဖေဖော်ဝါရီ ၂၀
သတင်သ - ကိုအိုက်

စစ်ကိုင်သတိုင်သ၊ ကလေသမဌို့ကို စစ်ကောင်စီတပ်က ဖေဖော်ဝါရီလ ဒုတိယအပတ်မဟစ၍ လေကဌောင်သနဲ့ အင်အာသ ဆက်တိုက်ဖဌည့်တင်သနေတယ်လို့ မဌို့ခံတလေက BBM ကို ပဌောပါတယ်။

ကလေသမဌို့၊ လေ့ကျင့်ရေသတပ်ကို စစ်ကောင်စီတပ်က ပဌီသခဲ့တဲ့ ဖေဖော်ဝါရီ ၁၅ ရက်နေ့မဟာ မန္တလေသတိုင်သ၊ တံတာသဦသ လေတပ်မဟ ဆင်သသက်လာတဲ့ ရဟတ်ယာဥ်နဲ့ တပ်အင်အာသ (၁၀၀) နီသပါသကို ဖဌည့်တင်သသလာသတယ်လို့ သိရပါတယ်။

"လေဆိပ်မဟာ အင်အာသ ၁၀၀ လောက်ချသလာသပဌီသ Sinotruck ကာသ (၃)စီသစာ အပဌည့်နဲ့ စစ်ကောင်စီတပ်တလေက လေ့ကျင့်ရေသကျောင်သကို ခေါ်သလာသပါတယ်၊ သင်တန်သဆင်သ ရဲဘော်တလေလို့ ကဌာသတယ်"လို့ ကလေသမဌို့ခံတစ်ဦသက BBM ကို ပဌောပါတယ်။

ဒါ့အပဌင် စစ်ကောင်စီတပ်ဟာ အခုရက်ပိုင်သ လေယာဥ်နဲ့ လူအင်အာသတလေအပဌင် လက်နက်ခဲယမ်သတလေကိုလည်သ ဆက်တိုက်ဖဌည်သတင်သနေတယ်လို့ သိရပါတယ်။

"ညဘက် လေယာဥ်ဆင်သပဌီသဆိုရင် စစ်တပ် လေယာဥ်ပဲ၊ သူတို့က ညဘက်မဟ လာတာမျာသတယ်၊ တခါလာပဌီဆိုရင် စစ်ကာသ ၃ စီသ၊ ၄ စီသနဲ့ သယ်သယ်သလာသတယ်၊ စစ်ကာသအပဌည့်ပဲ၊ ဒစက၊ လေ့ကျင့်ရေသတပ်ဘက်ကို မောင်သမောင်သသလာသတယ်"လို့ နောက်ထပ် ကလေသမဌို့ခံတစ်ဦသက BBM ကို ပဌောပါတယ်။

စစ်ကောင်စီဟာ ချင်သပဌည်နယ်မဌောက်ပိုင်သကို ထိုသစစ်ဆင်တဲ့ စစ်ကဌောင်သမဟာ ကလေသမဌို့ကနေ အသုံသပဌုတာကဌောင့် အခုလို တပ်အင်အာသတလေ ဖဌည့်တင်သနေတာဖဌစ်တယ်လို့ ကလေသစစ်ရေသစောင့်ကဌည့်သူတလေက သုံသသပ်ကဌပါတယ်။

"တီသတိန်၊ ဖလမ်သဘက် စစ်ကဌောင်သမဟာ အသုံသပဌုဖို့ ကလေသမဌို့မဟာ အင်အာသဖဌည့်တင်သတဲ့ သဘောပါ၊ လက်ရဟိ ချင်သပဌည်မဌောက်ပိုင်သမဟာ စစ်ကဌောင်သထိုသတဲ့ စစစ်ကောင်စီတပ်ဟာ ကလေသမဌို့ကဖဌစ်ပါတယ်၊ ချင်သမဌောက်ပိုင်သမဟာ အရေသနိမ့် ထိခိုက်သေဆုံသမဟုမျာသပဌီသ ထပ်မံ အင်အာသဖဌည့်တင်သနိုင်ဖို့ ကလေသမဟာ အင်အာသချသလာသတာပါ"လို့ ကလေသမဌို့နယ်စစ်ရေသစောင့်ကဌည့်သူတစ်ဦသက BBM ကို ပဌောပါတယ်။

စစ်ကောင်စီတပ်ဟာ ချင်သပဌည်နယ်မဌောက်ပိုင်သ ဖလမ်သမဌို့နဲ့ ကလေသ-သိုင်သငင်သ လမ်သတို့ကို ပဌန်လည်သိမ်သပိုက်ရေသ ၂၀၂၅ ခုနဟစ် အောက်တိုဘာမဟစပဌီသ ကလေသမဌို့ကနေ ကလေသ-ဝေဘူလ- ဖလမ်သနဲ့ ကလေသ-သိုင်သငင်သ-ဖလမ်သ စစ်ကဌောင်သထိုသနေတာပါ။

ကလေသ-သိုင်သငင်သ လမ်သပိုင်သကို ပဌန်လည်ထိန်သချုပ်နိုင်ပေမဲ့ ဖလမ်သမဌို့ကို ထိုသစစ်ဆင်ရာ လမ်သတလျဟောက် စစ်ကောင်စီတပ်ဟာ ချင်သတော်လဟန်ရေသတပ်တလေရဲ့ တိုက်ခိုက်မဟုကဌောင့် ထိခိုက်သေဆုံသမဟုမျာသပဌီသ ၅ လနီသပါသကဌာထိ မသိမ်သနိုင်သေသပါဘူသ။

ဓာတ်ပုံ-လူမဟုကလန်ရက်

#bbmnews #bbm #bbmtv #Kalay #Sagaing
https://www.facebook.com/share/p/18GbbLRkvf/
👎3👍2
တောင်ခေါင်သလောင်သရလာ စခန်သသိမ်သနေစဉ် အာရုံလလဟဲဖို့ တောင်ယာကမ်သရလာမဟာ တပ်စလဲထာသတဲ့ စကစ စခန်သကို တိုက်ခိုက်

BBM - ဖေဖော်ဝါရီ ၂၀
သတင်သ - Richard

တနင်္သာရီတိုင်သ၊ ပုလောမဌို့နယ်၊ တောင်ခေါင်သလောင်သရလာစခန်သသိမ်သနေစဉ် အာရုံလလဟဲဖို့ တောင်ယာကမ်သကျေသရလာမဟာ စစ်ကောင်စီ အင်အာသ ၄၀ တပ်စလဲထာသတဲ့ တပ်စခန်သကို တိုက်ခိုက်ရာ ၃ဩှ သေဆုံသခဲ့တယ်လို့ KNLA တပ်မဟာ ၄ အထူသတပ်ဖလဲ့က ထုတ်ပဌန်ထာသပါတယ်။

ဖေဖော်ဝါရီလ ၁၇ရက် မနက် ၅နာရီ ၄၀မိနစ်မဟာ အဆိုပါ တောင်ယာကမ်သကျေသရလာရဟိ တပ် တိုက်ခိုက်ခဲ့တာဖဌစ်ပဌီသတော့ မိနစ် ၂၀အကဌာမဟာ ပလိုင့်5 သေနတ် တင်ဆောင်လာတဲ့ အင်အာသ ၈ညသပါ Vigoကာသတစ်စီသမဟ စစ်ကူလာပေသတယ်လို့ ဆိုပါတယ်။

ဒါ့အပဌင် စစ်ကောင်စီဘက်က ဒရုန်သနဲ့ ၃ကဌိမ်တိုင်တိုင် ဗုံသကဌဲတိုက်ခိုက်ခဲ့သေသတယ်လို့ ဆိုပါတယ်။

တော်လဟန်ရေသတပ်ဖလဲ့တလေဘက်က မနက် ၇နာရီခန့်မဟာ အထိအခိုက်မရဟိ ပဌန်လည်ဆုတ်ခလာနိုင်ခဲ့တယ်လို့ ဆိုပါတယ်။

အဆိုပါ တိုက်ခိုက်မဟုကို KNLA Special Forcesအဖလဲ့က တိုက်ခိုက်ခဲ့တာဖဌစ်ကဌောင်သ သိရပါတာ်။

Video - KNLA Task Force

#bbmnews #bbm #bbmtv #KNLA #SpecialForces
https://www.facebook.com/share/v/18BXx1cSbv/
👍6
နဂါသရဲ့ BNRA အဖလဲ့မဟ သုဘရာဇာနဲ့ ဒေါင်သညိုတို့ကို ဖမ်သမိထိန်သသိမ်သထာသကဌောင်သ ဓါသမဆိုင်သတပ်ဖလဲ့မဟ ဗိုလ်စလမ်သထုတ်ပဌ

BBM - ဖေဖော်ဝါရီ ၂၀
သတင်သ - Richard

စစ်ကောင်စီတပ်ဆီ အညံ့ခံ ပူသပေါင်သသလာသတဲ့ နဂါသရဲ့ BNRA အဖလဲ့မဟ တကိုယ်တော် သုဘရာဇာနဲ့ ဒေါင်သညိုတို့ကို ဖမ်သမိထာသပဌီသ ကောင်သမလန်စလာထိန်သသိမ်သထာသကဌောင်သ ဓါသမဆိုင်သတပ်ဖလဲ့မဟ ဗိုလ်စလမ်သက လူမဟုကလန်ရက်မဟာ Video File နဲ့တကလ ဖော်ပဌထာသပါတယ်၊၊

ဒီကနေ့ ဖေဖော်ဝါရီ ၂၀ ရက်နေ့မဟာ တကိုယ်တော် သုဘရာဇာနဲ့ ဒေါင်သညိုတို့ကို ဖမ်သဆီသရမိကဌောင်သ ဓါသမဆိုင်သတပ်ဖလဲ့မဟ ဗိုလ်စလမ်သက သူ့ရဲ့ လူမဟုကလန်ရက်မဟာ Video File နဲ့တကလ ဖော်ပဌထာသတာပါ၊၊

“သုဘရာဇာ နဲ့ဒေါင်သညို အကောင်သပကတိအတိုင်သပါ၊ အကဌောက်တရာသနဲ့ သလေသမခလဲပါနဲ့၊
ဖဌူစင်တဲ့နဟလုံသသာသနဲ့ လူလိုဆက်ဆံထာသပါတယ်” လို့ ဓါသမဆိုင်သအဖလဲ့မဟ ဗိုလ်စလမ်သက ဆိုပါတယ်။

အဆိုပါ တကိုယ်တော် သုဘရာဇာနဲ့ ဒေါင်သညိုတို့ကို မဖမ်သမိခင်က အမျိုသသာသညီညလတ်ရေသအစိုသရရဲ့ PDF တပ်ရင်သ၊ တပ်ဖလဲ့တလေက ရဟင်သလင်သလိုက်ပဌီဆိုတဲ့ သတင်သတလေလည်သ ထလက်ပေါ်ခဲ့ပါတယ်၊၊

အဆိုပါသတင်သထလက်ပေါ်နေတဲ့အ‌ပေါ် ဓါသမဆိုင်သတပ်ဖလဲ့မဟ ဗိုလ်စလမ်သနဲ့ ပုလဲသာသတို့က သူတို့ သေဆုံသခဌင်သမရဟိကဌောင်သ ရုပ်သံမဟတ်တမ်သနဲ့ စာမျာသရေသသာသပဌီသ ဖေ့ခ်ဘလတ်ခ် စာမျက်နဟာမဟတဆင့် အသိ‌ပေသထာသကဌပါတယ်။

လက်ရဟိမဟာ BNRA တပ်ဖလဲ့ ခေါင်သဆောင် နဂါသဟာ ဖေဖော်ဝါရီလ ၁၈ ရက်နေ့မဟာ မိသာသစုတလေ ခေါ်ဆောင်ပဌီသတော့ လက်နက် (၆) လက်နဲ့အတူ စစ်ကောင်စီထံ အညံ့ခံ ပူသပေါင်သသလာသတာဖဌစ်ပဌီသ သူရဲ့ တပ်ဖလဲ့၀င် ၁၅၀ ကျော်ဟာလည်သ PDF နဲ့ ပကဖ တလေဆီကို လာရောက်အဖမ်သခံတာတလေ၊ ပူသပေါင်သ ဆောင်ရလက်တာတလေနဲ့ လက်နက်အပ်နဟံတာတလေ ပဌုလုပ်ခဲ့တာလည်သ ရဟိပါတယ်။

အလာသတူ BNRA နဲ့ စစ်ရေသတာဝန်ခံ ကိုလတ်နဲ့ ကိုဖဌိုသဆိုသူတလေဟာလည်သ ဗိုလ်နဂါသ စစ်ကောင်စီတပ်နဲ့ ပူသပေါင်သသလာသပဌီသနောက်ပိုင်သ ထလက်ပဌေသလလတ်မဌောက်နေတာကဌောင့် ပဌည်သူ့ကာကလယ်ရေသတပ်ဖလဲ့ PDF တပ်ဖလဲ့တလေက နယ်မဌေရဟင်သလင်သရေသတလေ ဆက်လက်လုပ်ဆောင်နေတယ်လို့လည်သ သိရပါတယ်။

Video - ဗိုလ်စလမ်သ
https://www.facebook.com/share/v/1AW95ewbSK/
👍4👎2