အတိုက်အခံခေါင်းဆောင် နာဗယ်နီကို ဖားအဆိပ်နဲ့ သတ်ခဲ့တယ်ဆိုတဲ့ စွပ်စွဲချက်တွေကို ရုရှားငြင်းဆို

BBM - ဖေဖော်ဝါရီ ၁၇
သတင်း - Richard

ရုရှားနိုင်ငံမှာ ထောင်ချခံထားရတဲ့ အတိုက်အခံခေါင်းဆောင် အက်လက်ဇီ နာဗယ်နီ(Alexey Navalny) ကို အဆိပ်ခတ်သတ်ခဲ့တယ်ဆိုတဲ့ ဥရောပနိုင်ငံ ၅ နိုင်ငံရဲ့ အကဲဖြတ်ချက်ကို ရုရှားဘက်မှ "ပြင်းပြင်းထန်ထန်" ပယ်ချခဲ့ကြောင်း အယ်လ်ဂျားဇီးယား သတင်းဌာနမှာ ဖော်ပြထားပါတယ်။

လွန်ခဲ့တဲ့ နှစ်ပေါင်းများစွာကတည်းက သမ္မတ ဗလာဒီမာ ပူတင်(Vladimir Putin)ရဲ့ အပြင်းထန်ဆုံး ပြည်တွင်းပြိုင်ဘက်ဖြစ်တဲ့ နာဗယ်နီဟာ "အစွန်းရောက်ဝါဒ" နဲ့ ထောင်ဒဏ် ၁၉ နှစ်ကျခံနေစဉ် ၂၀၂၄ ခုနှစ် ဖေဖော်ဝါရီလ ၁၆ ရက်နေ့မှာ အာတိတ်အကျဉ်းထောင်မှာ သေဆုံးသွားခဲ့ပါတယ်။

ဖေဖော်ဝါရီလ ၁၄ရက် စနေနေ့မှာ ယူနိုက်တက်ကင်းဒမ်း၊ ပြင်သစ်၊ ဂျာမနီ၊ နယ်သာလန်နဲ့ ဆွီဒင်နိုင်ငံတို့က ပူးတွဲကြေညာချက်တစ်စောင် ထုတ်ပြန်ခဲ့ပြီး အဆိပ်သင့်ဖားတွေမှာ တွေ့ရှိရတဲ့ အဆိပ်တစ်မျိုးဖြစ်တဲ့ epibatidine နဲ့ အဆိပ်ခတ်ခံခဲ့ရတယ်လို့ ယုံကြည်ကြောင်းဆိုကြပါတယ်။

ရုရှားနိုင်ငံကသာ အဆိုပါ အဆိပ်ကို အသုံးပြုဖို့ “နည်းလမ်း၊ ရည်ရွယ်ချက်နဲ့ အခွင့်အလမ်း” ရှိကြောင်း ပြောကြားခဲ့ပါတယ်။

“ကျွန်တော်တို့အနေနဲ့ အဲ့ဒီလို စွပ်စွဲချက်တွေကို လက်မခံပါဘူး၊ သဘောမတူပါဘူး၊ ဒါတွေဟာ ဘက်လိုက်ပြီး အခြေအမြစ်မရှိဘူးလို့ ယူဆပါတယ်” လို့ ရုရှား ပြောရေးဆိုခွင့်ရှိသူ ဒီမစ်ထရီ ပက်စ‌ကော့ဗ်(Dmitry Peskov)က ဖေဖော်ဝါရီလ ၁၆ရက် တနင်္လာနေ့မှာ နေ့စဉ်သတင်းစာရှင်းလင်းပွဲတစ်ခုအတွင်း သတင်းထောက်တွေကို ပြောကြားခဲ့ပါတယ်။

“ကျွန်တော််တို့ သူတို့ရဲ့ ပြင်းပြင်းထန်ထန် စွပ်စွဲချက်တွေကို ငြင်းပယ်ပါတယ်” လို့ သူက ထပ်လောင်းပြောကြားခဲ့ပါတယ်။

ပက်စကော့ဗ်ရဲ့ မှတ်ချက်တွေဟာ နာဗယ်နီရဲ့ ကွယ်လွန်ခြင်း နှစ်ပတ်လည်နေ့ အထိမ်းအမှတ်ဖြစ်တဲ့ ဖေဖော်ဝါရီလ ၁၆ရက် တနင်္လာနေ့မှာ မော်စကိုရှိ သူရဲ့အုတ်ဂူကို လာရောက်လည်ပတ်စဉ် ထွက်ပေါ်လာခဲ့တာပဲဖြစ်ပါတယ်။

တက်ရောက်လာသူအချို့က မျက်နှာဖုံးတွေနဲ့
ပုဝါတွေ ဝတ်ဆင်ထားခဲ့ကြပါတယ်။

ရုရှားအာဏာပိုင်တွေက နာဗယ်နီ နဲ့ သူ့အဖွဲ့အစည်းကို နာဗယ်နီ မကွယ်လွန်ခြင်းမှီ "အစွန်းရောက်သမား"တွေ အဖြစ် သတ်မှတ်ခဲ့ပါတယ်။

Epibatidine အဆိပ်ကို တောင်အမေရိကရှိ မိုးသစ်တောတွေထဲမှာ နေထိုင်လေ့ရှိတဲ့ သေးငယ်ပြီး အရောင်ရှိတဲ့ ဖား(Dart Frog)တွေထဲမှာ သဘာဝအတိုင်းတွေ့ရှိရပါတယ်။

အဆိုပါ အဆိပ်ဟာ အသက်ရှူမဝခြင်း၊ တက်ခြင်းနဲ့ နှလုံးခုန်နှုန်းနှေးကွေးခြင်းတို့ဖြစ်ပြီး နောက်ဆုံးမှာ သေဆုံးခြင်းတို့ကို ဖြစ်စေပါတယ်။

#bbmnews #bbm #bbmtv #dartfrog #russia

Reference - Al Jazeera
Photo - Al Jazeera
https://www.facebook.com/share/p/1AasSChk5u/

စစ်ကောင်စီက တီမောလက်စတေးသံတမန်ကို နှင်ထုတ်တဲ့အ‌ပေါ် NUG ရှုတ်ချ

BBM - ဖေဖော်ဝါရီ ၁၇
သတင်း - Richard

စစ်ကောင်စီက တီမောလက်စတေးသံတမန်ကို နှင်ထုတ်တဲ့အ‌ပေါ် NUG ရှုတ်ချကြောင်း အမျိူသားညီညွတ်ရေး အစိုးရ ( NUG)က ဖော်ပြထားပါတယ်။

ဖေဖော်ဝါရီလ ၁၆ရက်နေ့က စစ်ကောင်စီတပ်ဟာ တီမောလက်စတဲနိုင်ငံခြားရေးရုံးနဲ့ သံတမန်ကို နှင်ထုတ်တဲ့အပေါ် အမျိုးသားညီညွတ်ရေးအစိုးရ(NUG)က ရှုတ်ချကြောင်းဖော်ပြထားတာ ပဲဖြစ်ပါတယ်။

အမျိုးသားညီညွတ်ရေးအစိုးရအနေနဲ့ စစ်ကောင်စီတပ်က တီမောလက်စတေးသံတမန်ကို မြန်မာနိုင်ငံမှ (၇) ရက်အတွင်း ထွက်ခွာဖို့ ခြိမ်းခြောက်ဖိအားပေးမှုကို ပြင်းထန်စွာ ရှုတ်ချတယ်လို့ ဆိုပါတယ်။

အခုလို ခြိမ်းခြောက်ဖိအားပေးမှုတွေဟာ သံတမန်ဆက်ဆံရေးနဲ့ စပ်လျဉ်းတဲ့ ဗီယင်နာ ကွန်ဗင်းရှင်းအောက်ရှိ သံတမန်ဆက်ဆံရေးဆိုင်ရာ သတ်မှတ်မူဘောင်တွေကို ပျက်စီးစေခဲ့ပြီး အပိုဒ် (၉) အရ လက်ခံနိုင်ငံဟာ သံတမန်တစ်ဦးကို persona non grata အဖြစ် ကြေညာနိုင်ပေမဲ့ သတ်မှတ်ထားရှိတဲ့ သံတမန်ရေးရာ လုပ်ထုံးလုပ်နည်းတွေ၊ နိုင်ငံတကာဥပဒေတွေနဲ့အညီ လိုက်နာ ကျင့်သုံးဆောင်ရွက်ရမှာ ဖြစ်တယ်လို့ ဆိုပါတယ်။

စစ်ကောင်စီရဲ့ ဖိအားပေးအကျပ်ကိုင်မှု၊ ခြိမ်းခြောက်မှုဆွေဟာ ဗီယင်နာ ကွန်ဗင်းရှင်းရဲ့ အနှစ်သာရ၊ ငြိမ်းချမ်းတဲ့ သံတမန်ဆက်ဆံမှု အခြေခံသဘောတရားတွေနဲ့ ဆန့်ကျင်လျက်ရှိတယ်လို့ ဆိုပါတယ်။

အမျိုးသားညီညွတ်ရေးအစိုးရ(NUG)အနေနဲ့ တီမောလက်စတေးနိုင်ငံအပါအဝင် အာဆီယံအဖွဲ့ဝင် နိုင်ငံတွေနဲ့ ပုံမှန်ဆက်သွယ်ဆောင်ရွက်လျက်ရှိ‌ကြောင်းကိုလည်း ဖော်ပြထားပါတယ်။

စစ်ကောင်စီတပ်ဟာ တီမောလက်စတေးနိုင်ငံကို ရွေးချယ်ပြီး အရေးယူဆောင်ရွက်တဲ့ ဆုံးဖြတ်ချက်ဟာ နိုင်ငံတကာ သံတမန်စံနှုန်းတွေနဲ့ လုပ်ထုံးလုပ်နည်းတွေအပေါ် လေးစားလိုက်နာမှု ရှိ-မရှိနဲ့ စပ်လျဉ်းပြီး အလွန် စိုးရိမ်ဖွယ်ရာရှိကြောင်းကိုလည်း ဆိုပါတယ်။

အမျိုးသားညီညွတ်ရေးအစိုးရဟာ မြန်မာနိုင်ငံအတွင်းရှိ တာဝန်ခံမှု ရှိစေရေး၊ ထိခိုက်ခံစားခဲ့ရသူတွေအတွက် တရားမျှတမှုရရှိစေရေးနဲ့ ပြစ်ဒဏ်ကင်းလွတ်ခွင့်ရရှိနေတဲ့ အလေ့အထတွေကို အဆုံးသတ်ရေးတို့အတွက် အမြဲမပြတ်ကူညီပံ့ပိုးပေးနေတဲ့ တီမောလက်စတေးအပါအဝင် အခြားနိုင်ငံအားလုံးကို အထူးကျေးဇူးတင်ရှိကြောင်းလည်း ဆိုထားပါတယ်။

အခုလို အရေးကြီးကာလအတွင်း မြန်မာပြည်သူတွေအတွက် အကူအညီတွေ ဆက်လက်ပြီး တိုးမြှင့်ပံ့ပိုးပေးဖို့အတွက်လည်း နိုင်ငံတကာအသိုင်းအဝိုင်းကို လေးစားစွာနဲ့ အမျိုးသားညီညွတ်‌ရေးအစိုးရ (NUG)က တိုက်တွန်းထားပါတယ်။
https://www.facebook.com/share/p/17wbP3MMhg/

လယ်ဒိုမြို့မှာ စစ်မှုထမ်းတပ်သား ၉ ဦး KNDO ထံ လက်နက်ချအလင်းဝင်

BBM - ဖေဖော်ဝါရီ ၁၇
သတင်း -ကိုဘုဏ်း

ကော်သူးလေ ထိန်းချုပ်နယ်မြေအတွင်းရှိ ၊ လယ်ဒိုမြို့မှာ စစ်ကောင်စီရဲ့စစ်မှုထမ်းတပ်သား ၉ဦးဟာ KNDO တပ်ရင်း ၃ထံလက်နက်ချ အလင်းဝင်ခဲ့တယ်လို့ ကေအဲန်ယူက ထုတ်ပြန်ထားပါတယ်။

ဖေဖော်ဝါရီ ၁၂ရက်နေ့မှာ အဆိုပါ အလင်းဝင်လာတဲ့ တပ်သား ၉ဦး ဖြစ်ကြတဲ့ ကျော်ဇေယျ၊သက်ပိုင်စိုးစောကာဘီ၊မင်းထက်၊အောင်စိုးဝင်း၊ ခလရ - ၅၉၈ တပ်ရင်းမှ တပ်သား ကိုမျိုး၊ခလရ - ၆၀ တပ်ရင်းမှ ဝင်းမြထူး၊ခလရ - ၃၅၁ မှ အာကာကျော် ဝင်း၊ခမရ - ၅၃ မှ အောင်မင်းစိုး တို့ဖြစ်ကြပါတယ်။

အဆိုပါစစ်ကောင်စီ စစ်မှုထမ်းတပ်သားတွေဟာ KNU တပ်မဟာ ၃ လက်အောက်ခံ KNDO တပ်ရင်း ၃ ထံမှာ လက်နက်ချ အလင်းဝင်ခဲ့ကြခြင်းဖြစ်တယ်လို့ သိရပါတယ်။

အလင်းဝင်လာတဲ့ စစ်မှုထမ်းတပ်သားတွေဟာ သူတို့ရဲ့ ဆန္ဒမပါပဲ အတင်းအဓမ္မ စစ်မှုထမ်းခိုင်းခြင်းဖြစ်တယ်လို့လည်းသိရပြီး ကေအဲန်ယူမှ ထိန်းသိမ်းစောင့်ရှောက်ပေးထားကြောင်းလည်းသိရပါတယ်။

စစ်ကောင်စီတပ်အတွင်းမှာရှိတဲ့ အဓမ္မ စစ်မှုထမ်းစေခိုင်းခြင်းခံရတဲ့ တပ်သားတွေအနေနဲ့ အလင်းဝင်လိုပါက နီးစပ်ရာတော်လှန်ရေးတပ်ဖွဲ့များထံ ဆက်သွယ်အလင်းဝင်ရောက်ကြရန် ကေအဲန်ယူ ၊ကရင်အမျိူးသားအစည်းအရုံးက ထုတ်ပြန်ကြေငြာထားပါတယ်။

ပုံ - KNU

#bbmnews #bbm #bbmtv #KNU #karen
https://www.facebook.com/share/p/1AhdzneHhX/

AA ဖမ်းဆီးထိန်းသိမ်းထားတဲ့ ဘင်္ဂလားဒေ့ရှ်ရေလုပ်သား ၇၃ ဦးကို ဘင်္ဂလားဒေ့ရှ်နယ်ခြားစောင့်တပ်ထံပြန်လည်လွှဲအပ်

BBM - ဖေဖော်ဝါရီ ၁၇
သတင်း - နိုင်နိုင်

အာရက္ခတပ်တော် AA က ဖမ်းဆီးထိန်းသိမ်းထားတဲ့ ဘင်္ဂလားဒေ့ရှ်ရေလုပ်သား (၇၃) ဦးကို ဘင်္ဂလားဒေ့ရှ် နယ်ခြားစောင့်တပ်ထံ AA ကနေ ပြန်လည်လွှဲအပ်ပေးခဲ့တယ်လို့ သိရပါတယ်။

အာရက္ခတပ်တော် AA ဟာ ရခိုင်ရေပိုင်နက်အတွင်းကို တရားမဝင်ကျူးကျော်ဝင်ရောက် ငါးခိုးဖမ်းတဲ့သူတွေကို ဖမ်းဆီးတာ ဥပဒေနဲ့အညီ အရေးယူပြစ်ဒဏ်ချမှတ်တာတွေ လုပ်ဆောင်နေတာဖြစ်ပြီး အဲဒီထဲကနေ ဘင်္ဂလားဒေ့ရှ်ရေလုပ်သား (၇၃) ဦးကို မနေ့က ဖေဖော်ဝါရီ ၁၆ ရက်နေ့မှာ ပြန်လည်လွှဲပြောင်းပေးခဲ့တာလည်း ဖြစ်ပါတယ်။

အာရက္ခတပ်တော် AA ဟာ အဆိုပါ ရေလုပ်သား (၇၃) ဦးကို ဘင်္ဂလားဒေ့ရှ်နယ်ခြားစောင့်တပ်နဲ့ အဆက်အသွယ်ပြုလုပ်ကာ အထောက်အထားအချက်အလက်တွေကို စစ်ဆေးမှုတွေပြုလုပ်ခဲ့ပြီးနောက် မနေ့က ဖေဖော်ဝါရီလ ၁၆ ရက်၊ ညနေပိုင်းမှာ လွှဲပြောင်းပေးခဲ့တာဖြစ်တယ်လို့လည်း သိရပါတယ်။

လက်ရှိ AA ကနေ ဘင်္ဂလားဒေ့ရှ်နယ်ခြားစောင့်တပ်ဆီ လွှဲပြောင်းပေးအပ်ခဲ့တဲ့ အဆိုပါရေလုပ်သား (၇၃) ဦးကို ရခိုင်ရေပိုင်နက်အတွင်း ကျူးကျော်ဝင်ရောက်ကာ ငါးခိုးမဖမ်းတော့ကြောင်း ခံဝန်ကတိလက်မှတ် ရေးထိုးပြီးမှလွှတ်ပေးခဲ့တာဖြစ်တယ်လို့လည်း သိရပါတယ်။

AA ထိန်းချုပ်ထားတဲ့ မောင်တောမြို့နယ်နဲ့ ရသေ့တောင်မြို့နယ် ရေပိုင်နက်အတွင်းကို ပြီးခဲ့တဲ့ အောက်တိုဘာလ ၂၇ ရက်နေ့ကနေ ဒီဇင်ဘာလ ၂၃ ရက်နေ့အထိ တစ်ဖက်ဘင်္ဂလားဒေ့ရှ်နိုင်ငံမှ တရားမဝင်ကျူးကျော် ဝင်ရောက်ငါးခိုးဖမ်းတဲ့ ငါးဖမ်းသမား ၇၉ ဦးကို အာရက္ခတပ်တော် AA က ဖမ်းဆီးထိန်းသိမ်းခဲ့တာလည်း ဖြစ်ပါတယ်။

ရခိုင်ရေပိုင်နက်အတွင်းကို တရားမဝင်ကျူးကျော်ဝင်ရောက် ငါးခိုးဖမ်းတဲ့သူတွေကို အာရက္ခတပ်တော် AA ကမ်းခြေစောင့်တပ်ဖွဲ့က အချိန်နဲ့တပြေးညီစောင့်ကြည့် ဖမ်းဆီးဆောင်ရွက်မှုတွေ ရှိနေတာလည်း ဖြစ်ပါတယ်။

#bbmnews #bbm #bbmtv #AA #rakhine
https://www.facebook.com/share/p/16SAes8bsM/

အနိုင်ဂိုးပေးခဲ့ရမှုအပေါ် ဆင်ခြေပေးမှာမဟုတ်ကြောင်း ဘာစီလိုနာနည်းပြ ပြောကြား

BBM - ဖေ‌ဖော်ဝါရီ ၁၇
သတင်း - David

ဘာစီလိုနာအသင်းနည်းပြ ဟန်ဆီဖလစ်ခ်က ဂျီရိုနာကို ၁-၂ ဂိုးနဲ့ အရေးနိမ့်ခဲ့တဲ့ပွဲမှာ အနိုင်ဂိုးပေးခဲ့ရမှုအပေါ် ဆင်ခြေပေးမှာမဟုတ်ကြောင်း
ပြောကြားခဲ့ပါတယ်။

၈၆ မိနစ်မှာ ဘာထရန် အနိုင်ဂိုးမသွင်းခင် build up မှာ အယ်ချယ်ဗယ်ရီက ဘာစီလိုနာနောက်ခံလူ ခွန်ဒဲကို သိသိသာသာ ပြစ်ဒဏ်ကျူးလွန်
ခဲ့တာဖြစ်တယ်။

ဘာစီလိုနာအသင်းက ကူဘာဆီ ဦးဆောင်ဂိုးသွင်းခဲ့ပေမဲ့ ဂျီရိုနာဘက်က လူမာ ပြန်လည်ချေပခဲ့ပြီးနောက် ဒီအငြင်းပွားဖွယ် အနိုင်ဂိုး
ပေးခဲ့ရတာပါ။

ဒီရလဒ်ကြောင့် ဘာစီလိုနာအသင်းဟာ ဇယားထိပ်ဆုံးနေရာကို ရီးယဲလ်အသင်းထံ လွှဲပြောင်းပေးခဲ့ရပြီး နှစ်မှတ်ကွာသွားခဲ့ရပါတယ်။

''ဒါနဲ့ပတ်သက်ပြီး ကျွန်တော် မပြောချင်ပါဘူး။ ဒုတိယဂိုးမတိုင်ခင် လူတိုင်း ဒီအခြေအနေကို မြင်တွေ့ခဲ့ရတယ်။ ဒါပေမဲ့ ဂျီရိုနာက အနိုင်ရလဒ်နဲ့
ထိုက်တန်ပါတယ်။ ကျွန်တော်တို့ ကာကွယ်မှုက အလွန်ဆိုးရွားခဲ့တယ်။ အထူးသဖြင့် အကူးအပြောင်းတွေမှာပေါ့။ ကျွန်တော်တို့ ဖွင့်ကစား
လွန်းခဲ့တယ်။ ကွင်းလယ်ကလည်း ပုံမှန်အနေအထား မရှိခဲ့ပါဘူး။ တကယ်တော့ ပြစ်ဒဏ်ဘောက သိသာထင်ရှားပါတယ်။ ဒါက ဒီလိုပါပဲ။
ကျွန်တော့်အဖို့တော့ အသင်းကောင်းကောင်းကစားနိုင်ရင်တော့ ဒီထက်ပိုပြောနိုင်မှာပါ။ ဒါပေမဲ့ ကျွန်တော်တို့ ကောင်းကောင်း မကစားနိုင်
ခဲ့ပါဘူး။ ဒါက ဆင်ခြေပေးသလိုပါပဲ။ ကျွန်တော် ဒါမျိုး မလုပ်ချင်ပါဘူး။ ကျွန်တော်တို့ ပိုကောင်းအောင်ကစားရမယ်။ ဒီအဆင့်ကို ပြန်လာ
နိုင်ရမယ်''လို့ ဟန်ဆီဖလစ်ခ်က ပြောခဲ့ပါတယ်။

ဘာစီလိုနာအသင်းဟာ ပထမပိုင်းနာကျင်အချိန်ပိုမှာ ယမားလ် ပယ်နယ်တီကန်ခွင့်ရပေမဲ့ ဂိုးမဝင်ခဲ့ပါဘူး။

Credit - Bleacher Report Football and La Liga

#bbmnews #bbm #bbmtv #sportsnews #Bleacher #LaLiga
https://www.facebook.com/share/p/1DeqJUKazJ/

ဗန်းမက်ရွာကို မီးရှို့ရာမှာ ဦးဆောင်သူ PNO ဗိုလ်ကြီး တိုက်ပွဲတွင်း စနိုက်ပါထိမှန်သေဆုံး

BBM - ဖေဖော်ဝါရီ ၁၇
သတင်း - ခွန်း

ရှမ်းပြည်နယ်တောင်ပိုင်း၊ မောက်မယ်မြို့နယ် ကဒူးကြီးဒေသ၊ ဗန်းမက်‌ဒေသမှာ ဖြစ်ပွားခဲ့တဲ့ တိုက်ပွဲအတွင်း PNO ပြည်သူ့စစ် ဗိုလ်ကြီး တစ်ဦး စနိုက်ပါနဲ့ ပစ်ခတ်ခံရပြီး သေဆုံးသွားတယ်လို့ ဒေသခံသတင်းရင်းမြစ်တွေက ပြောပါတယ်။

ပြီးခဲ့တဲ့ ဖေဖော်ဝါရီလ ၁၄ ရက်နေ့မှာ ထိမှန်သေဆုံးခဲ့တာဖြစ်ပြီး သေဆုံးသွားသူကတော့ စစ်ကောင်စီလက်အောက်ခံ PNO ပြည်သူ့စစ်မှ ဗိုလ်ကြီး ခွန်မောင်ကွိ (ခ) လရောင် ဖြစ်ပါတယ်။

“အဲဒီဗိုလ်ကြီးက စစ်ဘေးရှောင်တွေ နေထိုင်နေတဲ့ ဗန်းမက်ရွာသစ်ကို မီးရှို့ရာမှာ ကိုယ်တိုင်ဦးဆောင်ခဲ့သူပါ၊ ဖေဖော်ဝါရီ ၁၃ ရက်နေ့မှာ ရွာကို မီးရှို့ပြီး နောက်တစ်နေ့ ၁၄ ရက်နေ့မှာတော့ စနိုက်ပါထိမှန်ပြီး သေဆုံးသွားတာပါ” လို့ သတင်းရင်းမြစ်က ပြောပါတယ်။

သေဆုံးသွားတဲ့ ဗိုလ်ကြီး ခွန်မောင်ကွိဟာ တောင်ကြီးမြို့နယ် မူးယားကျေးရွာအုပ်စု၊ ကန်လောင်းကျေးရွာမှာ နေထိုင်သူဖြစ်ပြီး သေဆုံးချိန်မှာ ဇနီးနှင့် သားတစ်ဦး ကျန်ရစ်ခဲ့တယ်လို့ လည်းသိရပါတယ်။

သေဆုံးချိန်မှာ အသက် ၂၉ နှစ်သာရှိသေးပြီး ဖေဖော်ဝါရီလ ၁၆ ရက်၊ ညနေပိုင်းမှာ မီးသင်္ဂြိုဟ်ခဲ့တယ်လို့ ပြောပါတယ်။

ဒေသခံရွာသားများအဆိုအရ ဗိုလ်ကြီး ခွန်မောင်ကွိဟာ ပအိုဝ်းဒေသအတွင်း လူငယ်တွေကို စစ်ကောင်စီနဲ့ PNO အတွက် အတင်းအဓမ္မ စစ်သားစုဆောင်းပေးတာ၊ ကျေးရွာတွေမှာ ငွေကြေးကောက်ခံမှုတွေ လုပ်ဆောင်တာ စစ်ကောင်စီအလိုကျ လုပ်ရပ်တွေကို ဦးဆောင်လုပ်ကိုင်နေသူ ဖြစ်တယ်လို့ သိရပါတယ်။

အခု ဖေဖော်ဝါရီလအတွင်း ဗန်းမက်ဒေသမှာ ဖြစ်ပွားခဲ့တဲ့ တိုက်ပွဲတွေကြောင့် PNO ပြည်သူ့စစ်ဘက်က စစ်သား ၂၀၀ နီးပါး သေဆုံးခဲ့ပြီး အလောင်းတွေကို မှန်လုံကားတွေနဲ့ သယ်ဆောင်ခဲ့ရတယ်လို့ ဒေသခံသတင်းရင်းမြစ်များထံမှ သိရပါတယ်။

Photo - Social Media

#bbmnews #bbm #bbmtv #PNO #စနိုက်ပါ
https://www.facebook.com/share/p/17WJbvSAaL/

ကျောက်ဖြူမှာ လေကြောင်းတိုက်ခိုက်ခံရပြီး ထိခိုက်ဒဏ်ရာရသူများ ဆေးကုသဖို့ အခက်အခဲရှိနေ

BBM - ဖေဖော်ဝါရီ ၁၇
သတင်း - နိုင်နိုင်

ရခိုင်ပြည်၊ ကျောက်ဖြူမြို့နယ်မှာ စစ်ကောင်စီတပ်က လေကြောင်းတိုက်ခိုက်မှုကြောင့် ထိခိုက်ဒဏ်ရာရရှိတဲ့သူတွေမှာ ဆေးကုသမှုခံယူဖို့အတွက် ငွေကြေးအခက်အခဲတွေ ရှိနေကြတယ်လို့ ကျောက်ဖြူမြို့နယ်ရှိ လူမှုကူညီရေးဆောင်ရွက်နေသူတွေဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၅ ရက်၊ ညနေပိုင်းမှာ စစ်ကောင်စီတပ်က ကျောက်ဖြူမြို့နယ်၊ ဝမျှောင်ကျေးရွာနဲ့ ငအုပ်ကျေးရွာကို ဒရုန်းနဲ့ဗုံးကြဲချတိုက်ခိုက်ခဲ့တာကြောင့် ကလေးငယ် ၁ ဦးနဲ့ အမျိုးသမီး ၁ ဦးတို့ သေဆုံးခဲ့ရတာလည်း ဖြစ်ပါတယ်။

သေဆုံးသွားတဲ့သူတွေမှာ ကျောက်ဖြူမြို့နယ်၊ ဝမျှောင်ကျေးရွာမှ မခင်ထက်ထက်စိုး (၇ နှစ်)နဲ့ ဒေါ်ခင်ဆန်းဝေ (၄၃ နှစ်) တို့ဖြစ်ပြီး ထိခိုက်ဒဏ်ရာရရှိတဲ့သူတွေမှာ ဝမျှောင်ကျေးရွာနဲ့ ငအုပ်ကျေးရွာမှ ၁၀ ဦး ရှိတယ်လို့ ကျောက်ဖြူမြို့နယ်မှ လူမှုကူညီကယ်ဆယ်ရေးလုပ်နေသူတစ်ဦးက BBM ကို ပြောပါတယ်။

"လက်ရှိအခြေအနေက ဒဏ်ရာပြင်းထန်တဲ့ လူနာ ၃ ဦး ရှိပါတယ်၊ သူတို့ကိုတော့ ဆေးကုသမှု အဆင်အပြေဆုံးနေရာကို လွှဲပြောင်းပေးထားရပါတယ်၊ လက်ရှိ ဆေးကုသနေတာဆိုရင် ၁၀ ယောက်ပါ၊ ဆုံးသွားတာကကျရင် ၂ ယောက်ပါ၊ ဆေးဝါးကုသဖို့အတွက်တော့ ငွေးကြေး အခက်အခဲတွေဖြစ်နေကြပါတယ်" လို့ သူကဆက်ပြောပါတယ်။

အလားတူ စစ်ကောင်စီတပ်ဟာ ပြီးခဲ့တဲ့ ဖေဖော်ဝါရီလ ၁၅ ရက်နေ့အတွင်းမှာပဲ ကျောက်ဖြူမြို့နယ်၊ မင်းပြင်းကျေးရွာကိုလည်း လေကြောင်းကနေ ဂျက်ဖိုက်တာနဲ့ ဗုံးကြဲချတိုက်ခိုက်ခဲ့တာကြောင့် နေအိမ်တစ်ချို့ပျက်စီးမှုတွေရှိခဲ့တယ်လို့ ကျောက်ဖြူဒေသခံတွေဆီက သိရပါတယ်။

ကျောက်ဖြူမြို့နယ်မှာ စစ်ကောင်စီတပ်နဲ့ အာရက္ခတပ်တော် AA တို့ဟာ ဓညဝတီရေတပ်ဌာနချုပ်ရှိတဲ့ သစ်ပုတ်တောင်လမ်းတစ်လျှောက်မှာ တိုက်ပွဲတွေဖြစ်ပွားနေကြတာဖြစ်ပြီး အနီးအနားရှိကျေးရွာတွေက ဒေသခံထောင်ချီမှာ ဘေးလွတ်ရာနေရာတွေကို စစ်ဘေးတိမ်းရှောင်နေကြရတာလည်း ဖြစ်ပါတယ်။

စစ်ကောင်စီတပ်ဟာ ကျောက်ဖြူတိုက်ပွဲအတွင်းမှာ လေကြောင်း၊ ရေကြောင်းနဲ့ လက်နက်ကြီးပစ်ကူတွေ အဆက်မပြတ်အသုံးပြုနေတာကြောင့် ဒေသခံတွေဟာ လက်နက်ကြီးအန္တရာယ်တွေကို နေစဥ်နဲ့အမျှ ရင်ဆိုင်နေကြရပါတယ်။

"ကျောက်ဖြူမြို့နယ်ရှိ ကျေးရွာတွေက ဒေသခံတွေမှာ လက်နက်ကြီးအန္တရာယ်တွေ နိစ္စဓူဝ ကြုံနေရပါတယ်၊ အခုနောက်ပိုင်း စစ်ကောင်စီတပ်က အရပ်သားတွေကိုပဲ ပစ်မှတ်ထားတိုက်ခိုက်လာနေပါတယ်" လို့ ကျောက်ဖြူဒေသခံတစ်ဦးက BBM ကို ပြောပါတယ်။

ပြီးခဲ့တဲ့ ဖေဖော်ဝါရီလ ၁၄ ရက်ကလည်း ကျောက်ဖြူမြို့နယ်၊ ကျောက်ကလေးကျေးရွာ အောက်ဘက်ရှိ စစ်ကောင်စီရေတပ်သင်္ဘောကနေ ကျောက်ပြောက်ကျေးရွာဘက်ကို လက်နက်ကြီး ပစ်ခတ်တိုက်ခိုက်ခဲ့တာကြောင့် ကျေးရွာနေ ဒေါ်စောဖြူမ (၈၀) နှစ်ဟာ ကျည်ထိမှန်သေဆုံးခဲ့ပါတယ်။

၂၀၂၆ ခုနှစ်အတွင်းမှာ ရခိုင်ဒေသကို စစ်ကောင်စီ လက်နက်ကြီး၊ လေကြောင်းတွေနဲ့ ပစ်ခတ်တိုက်ခိုက်မှုကြောင့် အရပ်သားပြည်သူတွေနဲ့ စစ်သုံ့ပန်း သေဆုံးသူဦးရေ ၃၀ ကျော်အထိရှိလာတဲ့အပြင် ထိခိုက်ဒဏ်ရာရရှိသူ ၅၀ ကျော် ရှိလာပြီ ဖြစ်ပါတယ်။

ပုံစာ - ဇင်ချောင်းလူငယ်ပရဟိတအသင်း

#bbmnews #bbm #bbmtv #kyaukphyu #airstrike
https://www.facebook.com/share/p/1B4GbDQEcY/

အမေရိကန်နဲ့ ဆွေးနွေးမှုတွေအတွင်း စွမ်းအင်၊ သတ္တုတူးဖော်ရေးနဲ့ လေယာဉ် အရောင်းအဝယ်တွေ ပါဝင်နိုင်ကြောင်း အီရန်ပြောကြား

BBM - ဖေဖော်ဝါရီ ၁၇
သတင်း - Richard

အီရန်နိုင်ငံက အမေရိကန်နဲ့ နှစ်ဖက်စလုံး စီးပွားရေးအကျိုးအမြတ်တွေ ရရှိစေမယ့် နျူကလီးယားသဘောတူညီချက်တစ်ရပ်ကို ကြိုးပမ်းဆောင်ရွက်နေကြောင်း အီရန်သံတမန်တစ်ဦးက ဖေဖော်ဝါရီလ ၁၅ရက် တနင်္ဂနွေနေ့က ပြောကြားခဲ့တယ်လို့ သတင်းတွေထွက်ပေါ်ခဲ့ပါတယ်။

အီရန်နဲ့ အမေရိကန်တို့က အီရန်ရဲ့ နျူကလီးယားအစီအစဉ်နဲ့ ပတ်သက်ပြီး ဆယ်စုနှစ်များစွာကြာ အငြင်းပွားမှုကို ဖြေရှင်းဖို့နဲ့ စစ်ရေးအရ ရင်ဆိုင်မှုအသစ်တစ်ခုကို ရှောင်ရှားဖို့အတွက် အခုလအစောပိုင်းမှာ ဆွေးနွေးပွဲတွေကို ပြန်လည်စတင်ခဲ့ကြပါတယ်။

ဒေသတွင်းကို အမေရိကန်က ဒုတိယမြောက် လေယာဉ်တင်သင်္ဘောတစ်စင်း စေလွှတ်ခဲ့ပြီး ဆွေးနွေးပွဲတွေ မအောင်မြင်ပါက ရေရှည်စစ်ရေးလှုပ်ရှားမှုတစ်ခု ဖြစ်နိုင်ခြေအတွက် ပြင်ဆင်နေကြောင်း အမေရိကန်အရာရှိများက ရိုက်တာသတင်းဌာနကို ပြောကြားခဲ့ပါတယ်။

အမေရိကန် နိုင်ငံခြားရေးဝန်ကြီး မာကို ရူဘီယိုက ဘရာတစ်စလာဗာမှာ ပြုလုပ်ခဲ့တဲ့ သတင်းစာရှင်းလင်းပွဲမှာ ပြောကြားရာမှာ သမ္မတ ဒေါ်နယ်ထရမ့်က သံတမန်ရေးနဲ့ ညှိနှိုင်းဖြေရှင်းရေးကို ပိုမိုနှစ်သက်ကြောင်း ရှင်းရှင်းလင်းလင်း ပြောကြားခဲ့ပြီး ဒါဟာ မဖြစ်နိုင်ကြောင်း ရှင်းရှင်းလင်းလင်း ပြောကြားခဲ့ပါတယ်။

“အီရန်နဲ့ အောင်မြင်တဲ့ သဘောတူညီချက်တစ်ခု မရရှိသေူပေမဲ့ ကျွန်တော်တို့ ကြိုးစားသွားပါမယ်” လို့ ရူဘီယိုက ပြောကြားခဲ့ပါတယ်။

အီရန်က အမေရိကန်တပ်ဖွဲ့တွေရဲ့ အတိုက်ခိုက်ခံရပါက အရှေ့အလယ်ပိုင်းရှိ အမေရိကန်စခန်းတွေကို တိုက်ခိုက်မယ်လို့ ခြိမ်းခြောက်ခဲ့ပေမဲ့ ဖေဖော်ဝါရီလ ၁၅ရက် တနင်္ဂနွေနေ့မှာ ပြေလည်ရေးလမ်းကြောင်းကို ကျင့်သုံးခဲ့ပါတယ်။

"သဘောတူညီချက်တစ်ခု ရေရှည်တည်တံ့မှုအတွက် အမေရိကန်အ‌နေနဲ့ စီးပွားရေးအကျိုးအမြတ်ရှိတဲ့ နေရာတွေမှာလည်း အကျိုးကျေးဇူးရရှိဖို့ အရေးကြီးပါတယ်" လို့ နိုင်ငံခြားရေးဝန်ကြီးဌာနရဲ့ စီးပွားရေးသံတမန်ရေးရာ ဒုတိယညွှန်ကြားရေးမှူး ဟာမစ် ဂန်ဘာရီက Fars သတင်းဌာနရဲ့ အဆိုအရ ပြောကြားခဲ့ပါတယ်။

"ရေနံနဲ့ သဘာဝဓာတ်ငွေ့မြေတွေ၊ ပူးတွဲမြေတွေ၊ သတ္တုတူးဖော်ရေး ရင်းနှီးမြှုပ်နှံမှုတွေနဲ့ လေယာဉ်ဝယ်ယူမှုတွေမှာ ဘုံအကျိုးစီးပွားတူ ညှိနှိုင်းမှုတွေ ထည့်သွင်းထားတယ်" လို့ ဂန်ဘာရီက ပြောကြားခဲ့ပါတယ်။

၂၀၁၈ ခုနှစ်တုန်းက ထရမ့်ဟာ အီရန်ရဲ့ နျူကလီးယားအစီအစဉ်ကို ထိန်းချုပ်ဖို့ အီရန်အပေါ် ပိတ်ဆို့မှုတွေကို ဖြေလျှော့ပေးတဲ့ သဘောတူညီချက်မှ အမေရိကန်က နှုတ်ထွက်ခဲ့ပြီး တီဟီရန်အပေါ် ပြင်းထန်တဲ့ စီးပွားရေးပိတ်ဆို့မှုတွေကို ပြန်လည်ချမှတ်ခဲ့ပါတယ်။

ဖေဖော်ဝါရီလ ၁၃ရက်နေ့က သတင်းရင်းမြစ်တစ်ခုက ရိုက်တာသတင်းဌာနသို့ ပြောကြားရာမှာ သံတမန် Steve Witkoff နဲ့ Jared Kushner အပါအဝင် အမေရိကန်ကိုယ်စားလှယ်အဖွဲ့ဟာ ဖေဖော်ဝါရီလ ၁၇ရက် အင်္ဂါနေ့မှာ ဂျီနီဗာမှာ အီရန်အရာရှိ တွေနဲ့ တွေ့ဆုံမှာ ဖြစ်ကြောင်း‌ ပြောကြားခဲ့ပါတယ်။

အဆိုပါအစည်းအဝေးကို ဖေဖော်ဝါရီလ ၁၅ရက် တနင်္ဂနွေနေ့တုန်းက အီရန်အကြီးတန်းအရာရှိတစ်ဦးက ရိုက်တာသတင်းဌာနကို အတည်ပြုခဲ့ပါတယ်။

Reference - Reuters
Photo - Reuters

#bbmnews #bbm #bbmtv #USA #Iren #InternationalNews
https://www.facebook.com/share/p/18EoScpEuf/

ဖားကန့် ကုဋေမှော်မှာ မြေစာပုံပြိုပြီး ထိခိုက်ဒဏ်ရာရသူများပြား

BBM - ဖေဖော်ဝါရီ ၁၇
သတင်း - PJ

ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ လုံးခင်းကျေးရွာအုပ်စုရှိ ကုဋေမှော် အဲဗားကုမ္ပဏီမှာ ဖေဖော်ဝါရီလ ၁၆ ရက်၊ ည ၉ နာရီခွဲဝန်းကျင်က ကျောက်စိမ်း တူဖော်ထားတဲ့ စွန့်ပစ်မြေစာပုံပြိုပြီး ရေမဆေးကျောက်ရှာသူတချို့ ထိခိုက်ဒဏ်ရာရသူတွေရှိကြောင်း ဒေသခံတွေဆီက သိရပါတယ်။

“မြေစာပြိုပြီး လက်ကျိုးသွားတဲ့သူတွေ ပြောတာကတော့ ၇ ယောက်လောက်ပဲ ကျန်တာ၊ ကျန်တာ သူတို့ အကုန် ပြန်တက်ခဲ့တယ်လို့ ပြောတယ်” လို့ ဒေသခံ အမျိုးသား တစ်ဦးက ပြောပါတယ်။

ယမန်နေ့ ဖေဖော်ဝါရီလ ၁၆ ရက်နေ့ည မြေစာပြိုချိန် ည ၉ နာရီနဲ့ ၂၅ မိနစ်မှာ ကုဋေမှော် အဲဗားဝင်းမှာ မြေပြိုချိန် လူဦးရေ ၂၀ ခန့် ပါသွားပေမယ့် ရေကူးပြီး ပြန်တက်လာခဲ့ကြပြီး တချို့ထိခိုက် ဒဏ်ရာရသူတွေလည်းပါတယ်လို့ သူကပြောပါတယ်။

“ဒေသခံ ပရဟိတအသင်းတွေနဲ့ အုပ်ချုပ်ရေးကို လူပျောက်အကြောင်းကြားတာ၊ အကူအညီတောင်းတာ မရှိဘူးလို့ သိရတယ်၊ မနေ့က ဖြစ်စဉ်မှာ ရှိနေတဲ့သူတွေ ပြောပြချက်အရ ထိခိုက်ဒဏ်ရာရသူ အချို့ရှိခဲ့တယ် ဆိုတာပဲ အတည်ပြုနိုင်တယ်” လို့ နောက်ထပ် ဒေသခံ တစ်ဦးကလည်း ပြောပါတယ်။

သက်ဆိုင်ရာကို ပျောက်ဆုံးစာရင်းလာတိုင်တာတွေ၊ ပျောက်ဆုံးစာရင်းထွက်လာတာတွေ မရှိသလို ကုမ္ပဏီကလည်း လုပ်ငန်းတွေ ပုံမှန်ပြန်လုပ်နေတယ်လို့ သူက ပြောပါတယ်။

ဖားကန့်မှာတော့ မြေစာပုံတွေ ပြိုကျတာ မကြာခဏ ကြုံတွေ့ရတာဖြစ်ပြီး လက်ရှိ ထိခိုက် ဒဏ်ရာရသူ အရေအတွက် အတိအကျ မသိထားဘူးလို့ ဆိုပါတယ်။

ပြီးခဲ့တဲ့ ၂၀၂၃ ခုနှစ်၊ ဖေဖော်ဝါရီလတုန်းကလည်း အဲဒီ ကုဋေမှော် အဲဗားဝင်း အနီးမှာ မြေစာပုံပြိုကျလို့ ရေမဆေးရှာဖွေသူ ၃ ဦး သေဆုံးပြီး ၅ ဦးထိခိုက် ဒဏ်ရာရရှိခဲ့တာ ဖြစ်ပါတယ်။

Video - ဒေသခံ

#bbmnews #bbm #bbmtv #hpakant #kachin
https://www.facebook.com/share/r/1BuMnK8YSQ/

ဖားဆောင်းမြို့ကို စကစ ပြန်စိုးမိုးချိန် သံလွင်
မြစ်ကူးတံတား မိုင်းခွဲခံရပြီး ပြိုကျ

BBM-ဖေဖော်ဝါရီ၁၇
သတင်း-မင်းသော်

ကရင်နီပြည်နယ် ဖားဆောင်းမြို့ကို စစ်ကောင်စီဘက်က ပြန်လည်စိုးမိုးလာပြီးတဲ့နောက် ဖားဆောင်းမြို့ရှိ သံလွင်မြစ်ကူးတံတား မိုင်းခွဲခံရပြီး ပြိုကျခဲ့တယ်လို့ သိရပါတယ်။

ဖေဖော်ဝါရီလ ၁၇ ရက်နေ့(ဒီနေ့) မနက် အစောပိုင်းမှာ လမ်းပန်းဆက်သွယ်ရေးအတွက်အရေးပါတဲ့ ဖားဆောင်းမြို့အနောက်ဘက်ရှိ အဆိုပါမြစ်ကူးတံတားမိုင်းခွဲခံရပြီး ပြိုကျခဲ့ခြင်းဖြစ်တယ်လို့ သိရပါတယ်။

မြေပြင်သတင်းရင်းမြစ်တွေနဲ့ ဒေသခံတွေရဲ့ပြောဆိုချက်အရ ဖားဆောင်းမြို့နေရာအတော်များများကို စစ်ကောင်စီဘက်မှ ပြန်လည်ရရှိသွားပြီးတဲ့နောက် သံလွင်မြစ်တစ်ဖက်ကမ်းရှိ တော်လှန်ရေးစိုးမိုးရာနေရာများကို စကစ စစ်ကြောင်းတွေမရောက်ရှိလာစေဖို့အတွက် တော်လှန်ရေးအင်အားစုတွေဘက်က မိုင်းခွဲခဲ့ခြင်းဖြစ်တယ်လို့ ကနဦး သိရပါတယ်။

"ဒီမနက်က ဖားဆောင်းတံတားမိုင်းခွဲခံရတာဟုတ်ပါတယ်၊ စစ်ခွေး စစ်ကြောင်းတွေမရောက်လာဖို့အတွက် ရဲဘော်တွေက မဖြစ်မနေခွဲရတာလို့လည်း သိထားရတယ်"ဟု ဒေသခံသတင်းရင်းမြစ်တစ်ဦးက BBM ကိုပြောပါတယ်။

အဆိုပါ ဖားဆောင်းမြို့တံတား မိုင်းခွဲတာနဲ့ပတ်သတ်ပြီး မေးမြန်းရန် မြေပြင်တော်လှန်ရေးသတင်းရင်းမြစ်တွေထံ ဆက်သွယ်နေပေမဲ့ BBM အနေနဲ့ ခုချိန်ထိ အဆက်အသွယ်ရရှိခြင်းမရှိသေးပါဘူး။

၂၀၂၅ခုနှစ်အတွင်း တော်လှန်ရေးအင်အားစုတွေ အဓိကစိုးမိုးထားနိုင်ပြီး စစ်ကောင်စီရဲ့ ခလရ(၁၃၅)တပ်တစ်ခုတည်းသာ ကျန်တော့တဲ့ ဖားဆောင်းမြို့ကို စစ်တပ်က ဘောလခဲဒေသမှ အဓိက စစ်ကူတွေစေလွှတ်ပြီး ပြန်လည်ထိုးစစ်ဆင်လာတာကြောင့် တော်လှန်ရေးအင်အားစုတွေက ဖားဆောင်းရှိနယ်မြေတချို့ကို လက်လွှတ်ခဲ့ရခြင်းဖြစ်ပြီး တိုက်ပွဲတွေပြင်းထန်နေတယ်လို့လည်း သိရပါတယ်။

#bbmnews #bbm #bbmtv #hpasawng #Thanlwin
https://www.facebook.com/share/p/17YWAKtv1p/

ပုလဲမြို့နယ်မှာ NUG တပ်နဲ့ ဗိုလ်နဂါးဦးဆောင်တဲ့ BNRA တပ်တို့ တိုက်ပွဲဖြစ်ပွား

🟥BNRA ကျူးလွန်ခဲ့တဲ့ ရာဇဝတ်မှု၊ အမှုအခင်းတွေနဲ့ပတ်သက်ပြီး ဖမ်းဆီးထိန်းသိမ်းစစ်ဆေးနိုင်ဖို့ ဆောင်ရွက်နေဟု NUG အသိပေး

BBM - ဖေဖော်ဝါရီ ၁၇
သတင်း - နိုင်နိုင်၊ ခက်ဆစ်

စစ်ကိုင်းတိုင်း၊ ပုလဲမြို့နယ်မှာ အမျိုးသားညီညွှတ်ရေးအစိုးရ (NUG) လက်အောက်ခံတပ်ဖွဲ့တွေနဲ့ ဗမာအမျိုးသားတော်လှန်ရေးတပ်မတော် (BNRA) တပ်တို့ တိုက်ပွဲတွေအပြန်အလှန် ဖြစ်ပွားနေကြတယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

ဒီကနေ့ မနက်ပိုင်းမှစတင်ကာ ပုလဲမြို့နယ်အတွင်းရှိ ကျေးရွာ ၂ ရွာမှာ အမျိုးသားညီညွှတ်ရေးအစိုးရ NUG ၊ လက်အောက်ခံတပ်ဖွဲ့တွေနဲ့ BNRA တပ်ဖွဲ့တွေ နှစ်ဘက်တိုက်ပွဲတွေ ဖြစ်ပွားနေကြတယ်လို့ တော်လှန်ရေးတပ်ဖွဲ့ဝင်တွေရဲ့ ပြောဆိုချက်အရ သိရပါတယ်။

"ဟုတ်ပါတယ်၊ အခုလိုမျိုး ၂ ဘက်စလုံးဖြစ်တာကတော့ ကျနော်တို့ သိရသလောက်ဆိုရင် ကျနော်မသိတာတွေလဲ ရှိကောင်းရှိနိုင်တယ်၊ ကျနော်သိရသလောက်ဆိုရင် ကျနော်တို့ ဒီဘက်အညာဘက်မှာ ဒါပထမဦးဆုံး အချင်းချင်းဖြစ်ကြတဲ့ ပွဲလို့ပြောတယ်၊ အချင်းချင်းဖြစ်ကြတာတောင်မှ အစိုးရတပ်ဦးလို့ ကျနော်တို့ခေါ်ခဲ့တဲ့ ကျနော်တို့ရဲ့ မိခင်ဗဟိုတပ်ကြီးနဲ့ ဖြစ်ကြတယ်ဆိုတော့ အရမ်းကိုမှ လှိုင်းလုံးကြီးက အရမ်းကြီးမားတယ်ပေါ့" လို့ အညာမြေမှ တော်လှန်ရေးတပ်ဖွဲ့ဝင် တစ်ဦးက BBM ကိုပြောပါတယ်။

ပြီးခဲ့တဲ့ ဇန်နဝါရီလ ၁၂ ရက်နေ့မှာ ဗိုလ်နဂါး ဦးဆောင်တဲ့ ဗမာအမျိုးသားတော်လှန်ရေးတပ်မတော် (BNRA) ရဲ့ တပ်ရင်း (၃) မှ ရဲဘော်နှစ်ဦးရဲ့ ပစ်ခတ်မှုကြောင့် ယင်းမာပင်ခရိုင်၊ တပ်ရင်း (၄) မှ ထောက်လှမ်းရေးအရာရှိ ရဲဘော် ဝင်းမင်းဌေး (ခ) ရဲဘော် ကတုံး သေဆုံးသွားခဲ့ရတာ ဖြစ်ပါတယ်။

အဆိုပါ ဖြစ်စဥ်ဖြစ်ပွားပြီးနောက် ဒီကနေ့မှာ နှစ်ဘက်တပ်တွေ အပြန်အလှန်ပစ်ခတ်တိုက်ခိုက်မှု ပေါ်ပေါက်လာတာဖြစ်ပြီး ထိခိုက်ကျဆုံးမှုအခြေအနေတွေကို BBM အနေနဲ့ သီးခြားအတည်ပြုနိုင်တာ မရှိသေးပါဘူး။

"အခုကကျတော့ ကျနော့်အမြင်ကတော့ ရန်သူကိုရှေ့မှာထားပြီး အချင်းချင်းဗျူဟာပျောက်နေကြတဲ့ ပုံစံမျိုးတွေ ဖြစ်နေတာပေါ့ ရန်သူကိုရှေ့မှာထားပြီး အချင်းချင်းတိုက်ခိုက်နေရတဲ့ ဗျူဟာတွေနဲ့ပဲ ရန်သူကိုတိုက်ဖို့ ဗျူဟာမရှိတော့ဘူး၊ ဒီလိုမျိုးတွေမြင်နေရတာပေါ့"လို့ အထက်ပါတော်လှန်ရေးတပ်ဖွဲ့ဝင် တစ်ဦးက ဆက်ပြောပါတယ်။

လက်ရှိ နှစ်ဘက်ပစ်ခတ်မှု ဖြစ်စဥ်နဲ့ပတ်သက်ပြီးတော့ NUG ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်က "BNRA က သူတွေ ကျူးလွန်ခဲ့တဲ့ ရာဇဝတ်မှုတွေ၊ အမှုအခင်းတွေနဲ့ ပတ်သက်ပြီး ဖမ်းဆီးထိန်းသိမ်းစစ်ဆေးနိုင်ဖို့ ပြည်ထဲရေးဝန်ကြီးဌာနနဲ့ ကာကွယ်ရေးဝန်ကြီးဌာန ပူးပေါင်းဆောင်ရွက်ဖို့ ရှိတယ်လို့တော့ သိထားပါတယ်" လို့ BBM ကို ပြောပါတယ်။

BNRA တပ်ဖွဲ့ခေါင်းဆောင် ဗိုလ်နဂါးက " NUG ရဲ့ MOD တပ်ရင်းတွေဟာ ဒီနေ့နံနက် ၇ နာရီခွဲမှစ BNRA ဂိတ်စခန်းများအား လက်နက်ကြီးပစ်ခတ်ခြင်းနှင့် ဒရုန်းဗုံးသီးများဖြင့်ပါ ကိုလာရောက်တိုက်ခိုက်နေပြီဖြစ်ပါတယ်" လို့ ဒီနေ့မနက်ပိုင်းမှာ လူမှုကွန်ရက်ကနေ အသိပေး ပြောဆိုထားပါတယ်။

ပြီးခဲ့တဲ့ ဇန်နဝါရီလ ၉ ရက်နေ့မှာ ပုလဲမြို့နယ်ရှိ ဗမာအမျိုးသားတော်လှန်ရေးတပ်မတော် (BNRA)ရဲ့ အ‌ကောက်ခွန်ဂိတ် ၂ ခုကို ပြည်သူ့ကာကွယ်ရေးတပ်မတော် PDF ရဲဘော်တွေက ဝင်ရောက်စီးနင်းပြီး ပိတ်သိမ်းခဲ့ပါသေးတယ်။

Photo - BNRA (ပုံဟောင်း)

#bbmnews #bbm #bbmtv #BNRA #NUG #PDF
https://www.facebook.com/share/p/17u4v9wsmf/

လားရှိုးမှာ စစ်ကောင်စီက အင်အားဖြည့် လုံခြုံရေး ထပ်တိုးထား

BBM-ဖေဖော်ဝါရီ ၁၇
သတင်း-PJ

တရုတ်နိုင်ငံရဲ့ အကူအညီနဲ့ စစ်ကောင်စီ ပြန်လည် ရယူ ထိန်းချုပ်ထားတဲ့ လားရှိုးမှာ ဖေဖော်ဝါရီလ ၇ ရက်နေ့ကစတင်ပြီး စစ်ကောင်စီတွေ အင်အားဖြည့် လုံခြုံရေး ထပ်တိုးထားကြောင်း ဒေသခံတွေဆီက သိရပါတယ်။

ဒါ့အပြင် မြို့တွင်းရှိ လေဆိပ်မှ ပြေးလမ်းတွေ၊ မျှော်စင်တွေကိုလည်း ပြုပြင်မွမ်းမံခဲ့တာတွေရှိပြီး အခုအခါမှာတော့ ပြီးသလောက်ပင်ရှိနေပြီလို့လည်း သိရပါတယ်။

"လားရှိုးမှာက ထိုးစစ်ထက် လုံခြုံရေး တိုးချတာလောက်ပါ။ လေဆိပ် မျှော်စင်၊ ပြေးလမ်း‌တွေ ပြင်ဆင် ပြီးသလောက် ဖြစ်သွားပြီ" လို့ ဒေသခံ အမျိုးသား တစ်ဦးက BBMကိုပြောပါတယ်။

အခု ဖေဖော်ဝါရီလ ၇ ရက်နေ့ကစ စစ်ကောင်စီဘက်က အင်အားဖြည့် လုံခြုံရေး ထပ်တိုးချလာတာလို့ လားရှိုးမြို့ခံ အမျိုးသား တစ်ဦးကလည်း ပြောပါတယ်။

လားရှိုး မြို့အဝင်အထွက်ကိုလည်း စစ်ကောင်စီက စစ်ဆေးရေး တင်းကြပ်ထားတဲ့အပြင် စစ်မေးရာမှာ ရပ်ကွက်အုပ်ချုပ်ရေးမှူးတွေရဲ့နာမည်တွေကိုပါ ပြောရတာတွေရှိတယ်လို့ လူငယ်တစ်ဦးက ပြောပါတယ်။

"တနေ့ကရှန်ခိုက်သွားတာ လားရှိုးအ၀င်အထွက် အရမ်းစစ်နေတယ်။ ရပ်ကွက် လူကြီးနာမည်ပါ ပြောရတယ်" လို့ သူက ပြောပါတယ်။

စစ်ကောင်စီက လားရှိုးမြို့ပြင်ထိ ထွက်စစ်နေတာဖြစ်ပြီး အင်အားလည်း ဖြည့်နေတယ်လို့တော့ကြားတယ်လို့ သူက ပြောပါတယ်။

အခုလ ဖေဖော်ဝါရီလ ၇ ရက်နေ့ မနက် ၈ နာရီ ဝန်းကျင်ခန့်က လားရှိုးမြို့ထဲ ရပ်ကွက် ၁၁ နယ်မြေ ၉ ဘက် ရှော့တိုက်ဒုံး ပစ်ထည့်ခံရပြီး နေအိမ်တစ်အိမ် ထိခိုက်ပြီး လူထိခိုက်မှု မရှိခဲ့ပေမယ့် မြို့ထဲ ရှော့တိုက်ဒုံး ပစ်ထည့်ခံရပြီးနောက် စစ်ကောင်စီဘက်က လုံခြုံရေး ထပ်တိုးလာတာ လို့ဒေသခံတွေက ပြောပါတယ်။

Photo Crd# ဒေသခံ

#bbmnews #bbm #bbmtv #lashio #shan
https://www.facebook.com/share/p/1S9dVGh79m/

ကလေးမြို့မှာ စစ်ကောင်စီက လူငယ်တွေကို တစ်ရက် ၁၀ ဦးထက်မနည်း စစ်မှုထမ်းဖို့ ဖမ်းဆီးနေ

BBM - ဖေဖော်ဝါရီ ၁၇
သတင်း - ကိုအိုက်

စစ်ကိုင်းတိုင်း၊ ကလေးမြို့ လူစည်ကားရာနေရာတွေမှာ စစ်ကောင်စီတပ်က ရွေ့လျားစစ်ဆေးမှုတွေ ပြုလုပ်ကာ လူငယ်တွေကို တစ်ရက်လျှင် ၁၀ ဦးထက်မနည်း စစ်မှုထမ်းဖို့အတွက် ဖမ်းဆီးနေတယ်လို့ ဒေသခံတွေက BBM ကို ပြောပါတယ်။

ကလေးမြို့မှာ စစ်ကောင်စီက အခုရက်ပိုင်း လမ်းဆုံလမ်းခွတွေ၊ ဈေးဆိုင်တွေ၊ လက်ဖက်ရည်ဆိုင် စတဲ့ လူစည်ကားတဲ့ နေရာတွေမှာ ကားတွေ၊ ဆိုင်ကယ်တွေနဲ့ လူငယ်တွေကို စစ်မှုထမ်းဖို့ အတင်းအဓမ္မ ဖမ်းဆီးနေတာ ဖြစ်ပါတယ်။

"တစ်နေရာတည်းမှာ အကြာကြီး မဖမ်းဘူး၊ ၁၀ မိနစ်လောက်ပဲ နေတယ်၊ နေရာ ထပ်ရွှေ့ပြီး ဖမ်းဆီးတယ်၊ အဲလိုတွေ ဖမ်းဆီးနေကြတယ်၊ မနေ့ကဆိုရင် လူငယ် ၁၁ ယောက်လောက် အဖမ်းခံရတယ်၊ ၁၅ ရက်နေ့ကလည်း လူငယ် ၃၀ ကျော်ပါသွားတယ်"လို့ ကလေးမြို့ခံတစ်ဦးက BBM ကို ပြောပါတယ်။

စစ်ကောင်စီတပ်က အသက် (၁၈) နှစ်မှ (၃၅) နှစ်အတွင်းရှိ လူငယ်တွေကို ပစ်မှတ်ထားပြီး ဖမ်းဆီးနေတာဖြစ်ပါတယ်။

အဲဒီဖမ်းဆီးခံရတဲ့ လူငယ်တွေကို စစ်ကောင်စီတပ်က ကလေးမြို့ စုပေါင်းရုံးမှာ ခေတ္တထိန်းသိမ်းထားလေ့ရှိပြီး သူတို့ကို စစ်သင်တန်းပေးဖို့အတွက် Y-8 လေယာဥ်တွေနဲ့ တခြားမြို့နယ်တွေကို ပို့ဆောင်နေတယ်လို့ သိရပါတယ်။

"အရင်က စစ်မှုထမ်းဖို့ ဖမ်းဆီးခံရတဲ့ လူငယ်တွေကို ကလေးမြို့က လေ့ကျင့်ရေးကျောင်းမှာ စစ်သင်တန်း တက်ခိုင်းတယ်၊ အခုကျတော့ စုပေါင်းရုံးမှာ တစ်ပတ်၊ နှစ်ပတ် လောက်ထားတယ်၊ ပြီးမှ လေယာဥ်တွေနဲ့ တခြားမြို့နယ်တွေက စစ်သင်တန်းကို ပို့တယ်"လို့ နောက်ထပ် ကလေးမြို့ခံတစ်ဦးက BBM ကို ပြောပါတယ်။

အခုလို စစ်ကောင်စီက လူငယ်တွေကို စစ်မှုထမ်းဖို့ ဖမ်းဆီးမှုတွေကြောင့် လူငယ်မိဘတွေက သူတို့ သားသမီးတွေ ဖမ်းဆီးခံရမှာ စိုးရိမ်နေကြသလို လူငယ်တွေကလည်း အိမ်အပြင်ထွက်ဖို့ စိုးရိမ်နေကြပြီး တချို့မှာ ဘေးလွတ်ရာ တိမ်းရှောင်နေကြပါတယ်။

ကလေးမြို့တွင်း သွားလာနေကြတဲ့ မိဘပြည်သူတွေနဲ့ လူငယ်တွေအနေနဲ့ စစ်ကောင်စီတပ်ဖွဲ့ဝင်တွေရဲ့ ရွေ့လျားစစ်ဆေးရေးဂိတ်တွေနဲ့ ကင်းလှည့်ယာဉ်တွေကို အထူးသတိပြုရှောင်ရှားကြဖို့ ကလေးလူထုသပိတ်အဖွဲ့ကလည်း ဖေဖော်ဝါရီလ ၁၄ ရက်နေ့က အရေးပေါ် သတိပေး ထုတ်ပြန်ထားပါတယ်။

ဓာတ်ပုံ-လူမှုကွန်ရက်
https://www.facebook.com/share/p/1AoUxPYAjT/

တနင်္သာရီတိုင်းရှိ မြို့နယ်နှစ်ခုကို စစ်တပ်က လေယာဉ်ဗုံးကြဲသလို မြေပြင်တိုက်ပွဲများလည်း ပြင်းထန်နေ

BBM-ဖေဖော်ဝါရီ၁၇
သတင်း - ကိုဟန်

တနင်္သာရီတိုင်း၊ ထားဝယ်နည်းပညာတက္ကသိုလ်တဝိုက်မှာ တိုက်ပွဲပြင်းထန်နေပြီး စစ်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ တော်လှန်ရေးတပ်တွေနဲ့ ဒေသခံတွေထံကနေ သိရပါတယ်။

ထားဝယ်မြို့နယ် မောင်မယ်ရှောင်ကျေးရွာမှာ ရှိတဲ့ ထားဝယ်နည်းပညာတက္ကသိုလ်မှာ တပ်စွဲထားတဲ့ စစ်ကောင်စီတပ်ဖွဲ့တွေကို ဖေဖော်ဝါရီလ ၁၆ ရက် မနက်ပိုင်းမှာ တော်လှန်ရေးတပ်တွေက ဝင်ရောက်တိုက်ခိုက်ခဲ့တယ်လို့ သိရပါတယ်။

နှစ်ဖက်တိုက်ပွဲပြင်းထန်နေတဲ့ မနက် ၁၀ နာရီဝန်းကျင်မှာ စစ်တပ်က လေကြောင်းကနေ ဗုံးကြဲတိုက်ခိုက်ခဲ့ တယ်လို့ ထားဝယ်အခြေစိုက်တော်လှန်ရေးရဲဘော်တဦးက BBM ကို ပြောပါတယ်။

“ဒီတက္ကသိုလ်အနား တိုက်ပွဲဖြစ်နေတဲ့ ရွာတဝိုက်ကို ကြဲချတာပါ၊ လက်နက်ကြီးတွေလည်း တောက်လျှောက်ပစ် တယ်” လို့ ပြောပါတယ်။

လေကြောင်းဗုံးကြဲမှုနဲ့ပတ်သက်ပြီး ထိခိုက်မှုအခြေအနေကို မသိရသေးပေမဲ့ လက်ရှိအချိန်ထိ နှစ်ဖက်စစ်ရေး တင်းမာနေဆဲဖြစ်တယ်လို့ သူက ဆက်ပြောပါတယ်။

အဆိုပါ ထားဝယ်နည်းပညာတက္ကသိုလ်မှာ ပြီးခဲ့တဲ့ ၂၀၂၄ ခုနှစ် အစောပိုင်းကတည်းက စစ်ကောင်စီတပ်က အင်အားရာချီ တပ်စွဲထားတယ်လို့ ဆိုပါတယ်။

အသေးစိတ်အချက်အလက်ကို သိရှိနိုင်ဖို့ တိုက်ပွဲမှာ ပါဝင်တဲ့တော်လှန်ရေးအဖွဲ့တချို့ကို ဆက်
သွယ်မေးမြန်းထားပေမဲ့ လက်ခံဖြေကြားပေးခြင်း မရှိသေးပါဘူး။

အလားတူ ဖေဖော်ဝါရီလ ၁၆ ရက် မွန်းလွဲ ၁ နာရီခွဲခန့်ကလည်း စစ်ရေးတင်းမာနေတဲ့ တနင်္သာရီမြို့နယ် လယ်သစ်ရွာအနားကို စစ်တပ်က လေယာဉ်နဲ့ ဗုံးကြဲတိုက်ခိုက်ခဲ့သေးတယ်လို့ ဒေသခံအချို့က ပြောပါတယ်။

“ကြားထားရသလောက်တော့ လူထိခိုက်မှု မရှိဘူး၊ အဲဒီက ရွာခံတွေနဲ့ အဆက်အသွယ်မရသေးတော့ သေချာ မသိရသေးဘူး၊ အဲဒီမှာက အရင်နေ့က တိုက်ပွဲဖြစ်တာရှိတယ်၊ ဒီနေ့ လာမကြဲခင် ပစ်ခတ်သံတော့ မကြားရဘူး၊ တိုက်ပွဲမဖြစ်ဘူးထင်တယ်” လို့ တနင်္သာရီဒေသခံတစ်ဦးက ပြောပါတယ်။

ဒီလိုမျိုး လေကြောင်းတိုက်ခိုက်မှုနဲ့ တိုက်ပွဲကြောင့် အရပ်သားထောင်ချီထွက်ပြေးတိမ်းရှောင်နေရပြီး အကူအညီ တွေ လိုအပ်နေတယ်လို့ သူက ဆက်ပြောပါတယ်။

စစ်တပ်ဟာ ရွေးကောက်ပွဲကျင်းပပြီးတဲ့နောက် တနင်္သာရီတိုင်းရှိ လက်လွတ်ထားတဲ့ နယ်မြေအချို့ကို ပြန်လည် ရယူဖို့ စစ်ကြောင်းထိုးနေတာကြောင့် တကျော့ပြန်တိုက်ပွဲပြင်းထန်လာခဲ့ခြင်းဖြစ်တယ်လို့ သိရပါတယ်။

ဒီလိုမျိုး စစ်ကြောင်းထိုးနေတဲ့ စစ်တပ်ဟာ လေကြောင်းအကူအညီရယူနေသလို မြေပြင်စစ်ကြောင်းထိုးရာ တလျှောက်ရှိ ဒေသခံနေအိမ်အများအပြားကိုလည်း မီးရှို့ဖျက်ဆီးတာတွေ လုပ်ဆောင်ခဲ့တယ်လို့ ဒေသခံတွေက ပြောပါတယ်။

ဓါတ်ပုံ - Social Media ၊ DGRF
ပုံစာ - ထားဝယ်နည်းပညာတက္ကသိုလ်၊ တော်လှန်ရေးတပ်ဖွဲ့ဝင်များ
https://www.facebook.com/share/p/1QTYqFnZtF/

အမှတ်(၁)ရွှေဘိုခရိုင် စစ်ဌာန နယ်မြေမှတော်လှန်ရေးဂိတ်အားလုံး ပိတ်ရန် ခရိုင်ကွပ်ကဲရေးအဖွဲ့ အမိန့်ပေး

BBM-ဖေဖော်ဝါရီ ၁၇
သတင်း-မင်းသော်

စစ်ကိုင်းတိုင်း၊ အမှတ်(၁) ရွှေဘိုခရိုင်စစ်ဌာနနယ်မြေအတွင်းရှိ တော်လှန်ရေးတပ်တွေ ဖွင့်လှစ်ထားတဲ့ ဂိတ်အားလုံးကို ဖေဖော်ဝါရီလ ၁၇ရက် နောက်ဆုံးထား ပိတ်သိမ်းရန် အမှတ်(၁) ရွှေဘိုခရိုင် ကွပ်ကဲရေးအဖွဲ့က ညွှန်ကြားချက် ထုတ်ပြန်ထားတယ်လို့ သိရပါတယ်။

အမှတ် (၁) ရွှေဘိုခရိုင်စစ်ဌာနနဲ့ ရွှေဘိုခရိုင် ပြည်သူ့ကာကွယ်ရေးအဖွဲ့တွေပါဝင်တဲ့ ခရိုင်ကွပ်ကဲရေးအဖွဲ့က ပြုလုပ်ခဲ့တဲ့ (၁/၂၀၂၆) အစည်းအဝေးဆုံးဖြတ်ချက်အရ အဆိုပါညွှန်ကြားချက်ကို ထုတ်ပြန်ခဲ့တာဖြစ်ပြီးဖေဖော်ဝါရီလ ၁၀ ရက်နေ့ကတည်းက အမိန့်စာထွက်ရှိလာခဲ့တာ ဖြစ်တယ်လို့ သိရပါတယ်။

အမှတ်(၁)ရွှေဘိုခရိုင်စစ်ဌာနအတွင်းက PDF တပ်ရင်းတွေ၊ Local PDF တွေနဲ့ ပြည်သူ့ကာကွယ်ရေးအဖွဲ့ (ပကဖ)တွေ ဖွင့်လှစ်ထားတဲ့ အလှူခံဂိတ်၊ မဲရောင်းဂိတ်၊ လမ်းပြုပြင်ရေးရန်ပုံငွေဂိတ်နဲ့ စစ်ဆေးရေးဂိတ် စတဲ့ဂိတ်အားလုံးကို စနစ်တကျ စိစစ်ဆောင်ရွက်နိုင်ဖို့စစ်ဌာနမှ ပိတ်သိမ်းခိုင်းတာဖြစ်တယ်လို့ သိရပါတယ်။

ဒါ့အပြင် ပြည်သူ့ကာကွယ်ရေးတပ်ဖွဲ့-ပကဖတွေ၊ PDF တပ်ရင်းတွေနဲ့ Local PDF တပ်ရင်းတွေအနေနဲ့ လက်နက်ခဲယမ်း လိုအပ်ချက်တွေရှိပါကသက်ဆိုင်ရာ အထက်အဆင့်ဆင့်ကို တင်ပြတောင်းခံရမှာဖြစ်ပြီး ပြည်သူလူထုကို ဝန်ထုပ်ဝန်ပိုးဖြစ်စေတဲ့ တရားမဝင်ဂိတ်ဖွင့်ပြီး ငွေကြေးကောက်တာတွေ၊ ရပ်ရွာပြည်သူထံမှ ခွဲတမ်းပစ်တာတွေ ပြုလုပ်ပြီး ရန်ပုံငွေရှာဖွေခြင်းတွေကို ရှောင်ကျဥ်ရန်နဲ့ ညွှန်ကြားချက်ကိုမလိုက်နာပါက ထိရောက်စွာ အရေးယူသွားမယ်လို့လည်းအမှတ်(၁)ရွှေဘိုခရိုင် ခရိုင်ကွပ်ကဲရေးအဖွဲ့က ထုတ်ပြန်ထားပါတယ်။

ဓါတ်ပုံ-ခရိုင်အတွင်းရှိ pdfများ
https://www.facebook.com/share/p/18EeSePQ4g/

ထားဝယ်မြို့မှာ စစ်ကောင်စီစခန်း ၂ ခုကို DNLA တပ်ဖွဲ့တွေ ဝင်ရောက်တိုက်ခိုက်

🟥စစ်ကူလာတဲ့ စကစ ဗိုလ်မှူး အေးလွင်အပါ ၂၄ ဦးသေဆုံး

BBM - ဖေဖော်ဝါရီ ၁၈
သတင်း - ကိုဘုဏ်း

တနင်္သာရီတိုင်း ၊ထားဝယ်မြို့နယ်မှာရှိတဲ့ မောင်မယ်ရှောင်ကျေးရွာရှိ (GTC)တပ်စခန်းနဲ့ ဘုရားမဲ့ စစ်ဆေးရေးဂိတ်တို့ကို DNLA တပ်တွေက တပြိုင်နက်တည်း ဝင်‌ရောက် တိုက်ခိုက်ခဲ့တယ်ရာ စစ်ကူလာတဲ့ စကစ ဗိုလ်မှူး အေးလွင်အပါ ၂၄ ဦးသေဆုံးခဲ့တယ်လို့ ဓ၀ယ်အမျိုးသား လွတ်မြောက်ရေးတပ်တော်က ထုတ်ပြန်ထားပါတယ်။

ဖေဖော်ဝါရီလ ၁၆ရက်နေ့က မနက် ၆ နာရီကျော်မှာ အဆိုပါ တပ်စခန်း ၂ ခုကို တိုက်ခိုက်ရင်း ၄နာရီကြာ အပြန်အလှန်ပစ်ခတ်ခဲ့ကြတယ်လို့ ဆိုပါတယ်။

တိုက်ပွဲအပြီးမှာ စစ်ကောင်စီဘက်မှ ဗိုလ်ကြီး တစ်ဦး ၊ အခြားအဆင့် ၁၉ဦး သေခဲ့တယ်လို့လည်းသိရပါတယ်။

အဲ့ဒီနောက် စစ်ကူလာတဲ့ စစ်ကောင်စီ ဗိုလ်မှူး အေးလွင်အပါ ၅ဦး ထပ်မံသေဆုံးခဲ့တယ်လို့ ဆိုပါတယ်။

တိုက်ပွဲအတွင်း တော်လှန်ရေးတပ်ဖွဲ့ဝင်တွေက Type 81 စက်လက် (၁)လက်၊ G3 (၁၃)လက်၊G4 (၂)လက်၊AK 47 (၁)လက်၊MSA (၁)လက်၊G3 ကျည်ဘောက်(၇၃)ဘောက် Type 81 ကျည်ဘောက်အဝိုင်း (၁)ဘောက်၊AK47 ကျည်ဘောက် (၁)ဘောက်၊ G3 ကျည်(၃၀၀၀)၊AK47ကျည်(၁၀၀)၊ လက်ပစ်ဗုံး (၁၂)လုံး၊စကားပြောစက် (၅)လုံး နဲ့အခြားဆက်စပ်ပစ္စည်းများသိမ်းဆည်းရမိခဲ့တယ်လို့ ဆိုပါတယ်။

တော်လှန်ရေးတပ်ဖွဲ့တွေဟာ GTC တပ်စခန်းကို ယာယီထိန်းထားနိုင်ခဲ့ပြီး ဘုရားမဲ စခန်းကို ရလာအချိန်တွင် စစ်ကောင်စီဘက်က စစ်ကူများရောက်လာတာကြောင့် ရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့ကြတယ်လို့ ဆိုပါတယ်။

အဆိုပါတိုက်ခိုက်မှုကို ထားဝယ်အမျိုးသားလွတ်မြောက်ရေးတပ်မတော် (DNLA)ရဲ့ ဒူရကစစ်ကြောင်းနဲ့အတူ (DGRF)ထားဝယ် - ပကဖ တို့က ပူးပေါင်းတိုက်ခိုက်ခဲ့ကြတာဖြစ်ကြောင်းလည်းသိရပါတယ်။

တစ်နိုင်ငံလုံးအတိုင်းအတာနဲ့ စစ်ရေးအရှိန်အဟုန်မြှင့်တင်နေတဲ့ကာလဖြစ်တာကြောင့် မိဘပြည်သူတွေအနေနဲ့ စစ်ရေးသတိ အမြဲရှိကြဖို့နဲ့ စစ်ကောင်စီရဲ့ လေကြောင်းရန်ကိုအမြဲသတိရှိကြရန်ကိုလည်းတိုက်တွန်းထားပါတယ်။

စစ်ကောင်စီနဲ့ ရဲတပ်ဖွဲ့ဝင်တွေလည်း ပြည်သူ့နဲ့အမြန်ဆုံးပူးပေါင်းကြရန်၊အမှန်တရားအတွက် ရပ်တည်ကြရန်ကိုလည်း ထားဝယ် အမျိူးသားလွတ်မြောက်ရေးတပ်မတော်(DNLA)က ထုတ်ပြန်ကြေငြာထားပါတယ်။

ပုံ - DNLA

#bbmnews #bbm #bbmtv #DNLA #Htawal
https://www.facebook.com/share/p/18Dqjot6tr/

ဘန်ကောက်မှာ မြန်မာအမျိုးသား ၄ဦးက အမေရိကန်နိုင်ငံသားကို တုတ်၊ဓားတွေနဲ့ သေဆုံးတဲ့အထိ ရိုက်နှက်

BBM - ဖေဖော်ဝါရီ ၁၈
သတင်း - Richard

ထိုင်းနိုင်ငံ၊ ဘန်ကောက်မြို့မှာ အမေရိကန်ခရီးသွားတစ်ဦး ရိုက်နှက်ခံရပြီး သေဆုံးသွားပြီးနောက် မြန်မာအမျိုးသား၄ဦး ရဲတပ်ဖွဲ့ဆီကို လာရောက်အဖမ်းခံခဲ့ကြတယ်လို့ ဖေ‌ဖော်ဝါရီလ ၁၇ရက်နေ့ရက်စွဲနဲ့ Bangkok Post မှာရေးသားထားပါတယ်။

အဆိုပါ အမေရိကန် အမျိုးသားဟာ မြန်မာအမျိုးသမီး ၁ဦးနဲ့ သမီးရည်းစား ဆက်ဆံ‌ရေး ပြန်လည် စတင်ဖို့ ကြိုးစားစဉ် အခုလို ရိုက်နှက်ခံရပြီး သေဆုံးခဲ့ရတာပါ။

ဖေဖော်၀ါရီလ ၁၆ရက် တနင်္လာနေ့ ညနေ ၅ နာရီခန့်မှာ ချွမ်သောင်ခရိုင်၊ Phuttha Bucha ၃၉ လမ်းဘေးရှိ ရာဇဝတ်မှုဖြစ်ပွားရာနေရာမှာ ရဲတွေရောက်ရှိလာချိန် ဓားရှည်တစ်ချောင်းနဲ့ သံပိုက်တစ်ချောင်းကိုင်ဆောင်ထားတဲ့ အမျိုးသား ၄ ဦးမှာ စောင့်ဆိုင်းနေခဲ့ကြတယ်လို့ ဆိုပါတယ်။

အခင်းဖြစ်ပွာရာ အနီးအနားမှာ ဓားဒဏ်ရာ ၅ ချက်နှင့် ခြေထောက်နှစ်ချောင်းကျိုးနေတဲ့ အသက် ၅၅ နှစ်အရွယ် Cole Stein Heath ရဲ့ အလောင်းတွေ့ရှိခဲ့ရတယ်လို့ ရဲတပ်ဖွဲက ဆိုပါတယ်။

ဘန်မော့ဒ်ရဲတပ်ဖွဲ့မှူး ရဲမှူးကြီး ဆွန်ချိုင်း ပွန်ပိုလ်က သံသယရှိသူတွေက စုံစမ်းစစ်ဆေးသူတွေကို အဆိုပါ တရားခံတွေထဲက တစ်ဦးဖြစ်တဲ့ ညီမဖြစ်သူ မြန်မာအမျိုးသမီးတစ်ဦးဟာ Healthနဲ့ ဆက်ဆံရေးကို အဆုံးသတ်ပြီး သူတို့နဲ့အတူ ပြောင်းရွှေ့နေထိုင်ခဲ့ကြောင်း ပြောကြားခဲ့ပါတယ်။

အဆိုပါ ကိစ္စကို အမေရိကန်နိုင်ငံသားက မကျေမနပ်ဖြစ်ပြီး ဆက်ဆံရေးကို ပြန်လည်တည်ဆောက်ဖို့ အကြိမ်ကြိမ်ကြိုးစားခဲ့ပြီး သံသယရှိသူတွေနဲ့ အငြင်းပွားခဲ့တယ်လို့ ဆိုပါတယ်။

ဖေဖော်ဝါရီလ ၁၆ရက်နေ့ ညနေပိုင်းက အမေရိကန်အမျိုးသားဟာ ဓားတစ်ချောင်းကိုင်ဆောင်ကာ ပြန်လာခဲ့ပြီး သူတို့အလုပ်လုပ်တဲ့ နေရာအနီးရှိ အမှိုက်ပုံထဲနားမှာ အဆိုပါ အမျိုးသား ၄ဦးနဲ့ ရင်ဆိုင်ခဲ့ရတယ်လို့ ဆိုပါတယ်။

ဓားကိုမြင်တဲ့အခါ အဆိုပါ အမျိုးသား ၄ဦးဟာ ဓားတစ်ချောင်းနဲ့ သံပိုက်တွေကို ဆွဲယူကာ ရန်ဖြစ်ခဲ့ကြတယ်လို့ ဆိုပါတယ်။

အမေရိကန်လူမျိုးဟယ အင်အားအလွန်အကျွံသုံးစွဲခံရပြီး သေဆုံးသွားခဲ့ရပါတယ်။

သံသယရှိသူတစ်ဦးဟာလည်း ဓားဒဏ်ရာရရှိခဲ့ကြောင်း ရဲမှူးကြီး ဆွန်ချိုင်းက ပြောကြားခဲ့ပါတယ်။

ရဲတပ်ဖွဲ့ အနေနဲ့ စုံစမ်းစစ်ဆေးမှုတွေ ဆက်လက်လုပ်ဆောင်နေဆဲဖြစ်တယ်လို့ ဆိုပါတယ်။

Reference - Bangkok Post

#bbmnews #bbm #bbmtv #usa #thaibangkok #myanmar
Photo - Bangkok Post
https://www.facebook.com/share/p/1JCxsBq3mU/

ဆာကာကို ၂၀၃၁ ခုနှစ်အထိ အာဆင်နယ် သက်တမ်းတိုး

BBM - ဖေဖော်ဝါရီ ၁၈
သတင်း- David

အာဆင်နယ်အသင်းဟာ တောင်ပံတိုက်စစ်ကစားသမား ဘူကာယိုဆာကာကို ၂၀၃၁ ခုနှစ်အထိ စာချုပ်သက်တမ်းတိုးခဲ့တယ်လို့ သိရပါတယ်။

အာဆင်နယ်အသင်းဘက်က တရားဝင်မကြေညာသေးပေမဲ့ ဆာကာဟာ ကလပ်ရဲ့လစာအများဆုံးအဖြစ် တစ်ပတ် ပေါင် သုံးသိန်း ရရှိသွား
မှာပါ။

စာချုပ်သစ်ကိစ္စ ဆွေးနွေးမှုမှာ တစ်နှစ်နီးပါး ကြာမြင့်ခဲ့ပြီး ဆာကာက ပြီးခဲ့တဲ့ ဇန်နဝါရီလထဲမှာ အသင်းမှာ ဆက်ရှိနေမယ်လို့ ပြောခဲ့ပါတယ်။

၂၀၂၃ ခုနှစ်က ဆာကာ လက်မှတ်ရေးထိုးခဲ့တဲ့ မူလစာချုပ်မှာ ၂၀၂၇ ခုနှစ်မှာ သက်တမ်းကုန်ဆုံးမှာဖြစ်တယ်။

ဆာကာဟာ အခုရာသီမှာ အသင်းအတွက် ပြိုင်ပွဲစုံ ၃၃ ပွဲကစား ခုနစ်ဂိုးသွင်းကာ ခြောက်ဂိုး ဖန်တီးပေးခဲ့ပါတယ်။

၎င်းဟာ ၂၀၁၈ ခုနှစ်က ၁၇ နှစ်သားအရွယ်မှာပဲ အာဆင်နယ်နဲ့ ပွဲဦးထွက်ခဲ့ပြီး ပရီးမီးယားလိဂ် ၂၁၇ ပွဲကစားကာ ၅၇ ဂိုး သွင်းယူခဲ့ပါတယ်။

အာဆင်နယ်အသင်းဟာ ပြီးခဲ့တဲ့နွေရာသီက ဆာလီဘာ၊ ဂါဘရီရယ်လ်၊ နွမ်နယ်ရီ၊ လူးဝစ်ဆကယ်လီတို့ကိုလည်း စာချုပ်သက်တမ်း နှစ်ရှည်တိုးထား
ခဲ့ပါတယ်။

Photo - Arsenal

#bbmnews #bbm #bbmtv #Arsenal #SportsNews
https://www.facebook.com/share/p/186RLgknoy/