ကျောက်ဖြူမှာ စစ်ကောင်စီရေတပ်က လက်နက်ကြီးပစ်ခတ်မှုကြောင့် အမျိုးသမီးတစ်ဦး သေဆုံး

BBM - ဖေဖော်ဝါရီ ၁၆
သတင်း - နိုင်နိုင်

တိုက်ပွဲဖြစ်ပွားနေတဲ့ ရခိုင်ပြည်၊ ကျောက်ဖြူမြို့နယ်အတွင်းရှိ စစ်ကောင်စီရေတပ်သင်္ဘောက လက်နက်ကြီးပစ်ခတ်မှုကြောင့် ဒေသခံသက်ကြီးပိုင်း အမျိုးသမီးတစ်ဦး သေဆုံးသွားတယ်လို့ ဒေသခံတွေဆီက သိရပါတယ်။

စစ်ကောင်စီတပ်ဟာ ပြီးခဲ့တဲ့ ဖေဖော်ဝါရီလ ၁၄ ရက်၊ ညနေ ၅ နာရီခွဲခန့်မှာ ကျောက်ဖြူမြို့နယ်၊ ကျောက်ကလေးကျေးရွာ အောက်ဘက်ရှိ ရေတပ်ကနေ ကျောက်ပြောက်ကျေးရွာဘက်ကို လက်နက်ကြီးကျည် အများအပြားပစ်ခတ်ခဲ့တယ်လို့ ကျောက်ဖြူဒေသခံတွေဆီက သိရပါတယ်။

အဆိုပါ လက်နက်ကြီးပစ်ခတ်တိုက်ခိုက်မှုကြောင့် သေဆုံးသွားတဲ့သူမှာ ကျောက်ဖြူမြို့နယ်၊ ကျောက်ပြောက်ကျေးရွာက ဒေါ်စောဖြူမ (၈၀) နှစ် ဖြစ်ပါတယ်။

"ကျောက်ဖြူမှာစစ်ရေးလှုပ်ရှားနေတဲ့ နေဗီတွေကတော့ လက်နက်ကြီးတွေနဲ့ အရပ်သားတွေ နေထိုင်တဲ့ကျေးရွာတွေကို လှမ်းပစ်ခတ်တာ အမြဲတမ်းရှိပါတယ်၊ အသေခံဒရုန်းတွေနဲ့ တိုက်ခိုက်တာတွေလည်း ရှိပါတယ်" လို့ ကျောက်ဖြူ စစ်ရေးသတင်းရင်းမြစ်တစ်ဦးက BBM ကို ပြောပါတယ်။

ပြီးခဲ့တဲ့ ဇန်နဝါရီလ ၁၈ ရက်နေ့ကလည်း စစ်ကောင်စီတပ်ဟာ ကျောက်ဖြူမြို့နယ်၊ ကျောက်ကလေကျေးရွာအနီးကို ဂျက်ဖိုက်တာနဲ့ လေကြောင်းကနေ ဗုံးကြဲချတိုက်ခိုက်ခဲ့တာကြောင့် စစ်ဘေးရှောင်အမျိုးသမီး ၂ ဦး ပွဲချင်းပြီး သေဆုံးခဲ့ရပါတယ်။

အလားတူ ပြီးခဲ့တဲ့ ဇန်နဝါရီလ ၃၀ ရက်နေ့မှာလည်း စစ်ကောင်စီတပ်ဟာ တိုက်ခိုက်ရေးသင်္ဘောတွေကနေ ကျောက်ဖြူမြို့နယ်၊ ဇင်ချောင်းကုန်ဘွေကျေးရွာကို လက်နက်ကြီးတွေနဲ့ ပစ်ခတ်တိုက်ခိုက်မှုကြောင့် အမျိုးသားတစ်ဦး သေဆုံးခဲ့ပါတယ်။

၂၀၂၆ ခုနှစ်အတွင်း ရခိုင်ဒေသကို စစ်ကောင်စီတပ်က လက်နက်ကြီး၊ လေကြောင်းတွေနဲ့ ပစ်ခတ်တိုက်ခိုက်မှုကြောင့် အရပ်သားပြည်သူ ၃၀ ကျော်အထိ သေဆုံးခဲ့ပြီး ၅၀ ကျော် ထိခိုက်ဒဏ်ရာရရှိခဲ့တာလည်း ဖြစ်ပါတယ်။

#bbmnews #bbm #bbmtv #kyaukphyu #reakine #aa
https://www.facebook.com/share/15ZMrYrGu6R/

ဒဏ်ရာကစားသမားတချို့ ပြန်လာဖို့ လိုအပ်နေတယ်လို့ အာတေတာ ပြောကြား

အာဆင်နယ်အသင်းနည်းပြ အာတေတာက အသင်းမှာ ဒဏ်ရာကစားသမားတချို့ ပြန်ကစားနိုင်ဖို့ လိုအပ်နေတယ်လို့ ပြောကြားခဲ့ပါတယ်။

ဒဏ်ရာအခြေအနေနဲ့ ပတ်သက်ပြီး စိုးရိမ်ပူပန်မိသလား မေးမြန်းမှုကို အာတေတာက ''ဟုတ်ပါတယ်။ ကနဦး တိုက်စစ်မှူးတွေ ဒဏ်ရာရခဲ့
တယ်။ အဲဒီနောက် နောက်ခံလူတွေအလှည့် ရောက်လာတယ်။ အခု ကွင်းလယ်လူတွေ ဒဏ်ရာရနေတယ်။ ကျွန်တော်တို့ အဲဒါကို ကိုင်တွယ်
ဖြေရှင်းရမှာပါ။ ဒါပေမဲ့ ကစားသမားတချို့ ပြန်လာဖို့ ကျွန်တော်တို့ လိုအပ်ပါတယ်။ အရေအတွက်သာမကဘဲ ပြိုင်ဘက်အသင်းတွေနဲ့
ဆက်စပ်ပြီး ကျွန်တော်တို့မှာ မတူညီတဲ့ ရွေးချယ်မှုတွေ ရှိရပါမယ်။ ဒါကြောင့် သူတို့ လျင်မြန်စွာ ပြန်လာတာဟာ ပိုကောင်းပါတယ်''လို့
အာတေတာက ပြောခဲ့ပါတယ်။

အာဆင်နယ်အသင်းဟာ FAဖလား စတုတ္ထအဆင့်မှာတော့ ဝီဂန်ကို ၄-၀ ဂိုးနဲ့ ဂိုးပြတ်နိုင်ပြီး နောက်တစ်ဆင့် တက်ရောက်နိုင်ခဲ့ပါတယ်။

ဒါပေမဲ့ နောက်ခံလူ ကာလာဖီအိုရီက သွေးပူလေ့ကျင့်ခန်းမှာ ဒဏ်ရာရခဲ့ပြီး ဘင်ဝှိုက်ကိုလည်း ဒုတိယပိုင်းမှာ ဒဏ်ရာကြောင့် လူစားလဲခဲ့
ရပါတယ်။

အသင်းခေါင်းဆောင် အိုဒီဂွယ် မကစားနိုင်သေးသလို၊ ဟာဗက်ဇ်မှာ အခုလကုန်အထိ နားရဖွယ်ရှိပြီး မယ်ရီနိုကတော့ ရာသီကုန်အထိ
အနားယူရပါလိမ့်မယ်။

အာဆင်နယ်အသင်းကတော့ ဒဏ်ရာပြဿနာတွေနဲ့ ဖြတ်သန်းနေရပေမဲ့ ဖလားလေးလုံးလမ်းကြောင်းမှာ ဆက်လက်ရှိနေဆဲပါပဲ။

Photo - Arsenal

#bbmnews #bbm #bbmtv #Arsenal #SportsNews
https://www.facebook.com/share/p/17xPDftqLG/

CHRO ရဲ့ တရားစွဲဆိုမှုကို လက်ခံခဲ့သဖြင့် တီမောသံရုံးကို စစ်ကောင်စီ မြန်မာနိုင်ငံမှ နှင်ထုတ်

BBM - ဖေဖော်ဝါရီ ၁၆
သတင်း - ခက်ဆစ်

တီမောလက်စ်တေနိုင်ငံက စစ်ကောင်စီတပ်ကျူးလွန်တဲ့ ရာဇဝတ်မှုတွေအတွက် ချင်းလူ့အခွင့်အရေးအဖွဲ့ရဲ့ တရားစွဲဆိုမှုအပေါ် လက်ခံခဲ့တာကြောင့် ရန်ကုန်မြို့ရှိ တီမောလက်စ်တဲ သံရုံးကို စစ်ကောင်စီက မြန်မာနိုင်ငံမှ ထွက်ခွာခိုင်းခဲ့ကြောင်း စစ်ကောင်စီထုတ်ပြန်ချက်အရ သိရပါတယ်။

ချင်းပြည်နယ်အတွင်း စစ်ရာဇဝတ်မှုတွေ ကျူးလွန်ခဲ့တဲ့အတွက် မင်းအောင်လှိုင်အပါအဝင် စစ်ကောင်စီတပ် ခေါင်းဆောင်တွေကို ချင်းလူ့အခွင့်အရေးအဖွဲ့ CHRO က ပြီးခဲ့တဲ့ဇန်နဝါရီလအတွင်း တီမောနိုင်ငံမှာတရားစွဲဆိုခဲ့သလို CHRO ကိုယ်စားလှယ်အဖွဲ့ကို တီမောသမ္မတက လက်ခံတွေ့ဆုံခဲ့တာ ဖြစ်ပါတယ်။

တီမောသမ္မတက စစ်ကောင်စီကို တရားစွဲဆိုတဲ့ CHRO ကိုယ်စားလှယ်အဖွဲ့ကို လက်ခံတွေ့ဆုံခဲ့တာ၊ တီမောအစိုးရက ချင်းလူ့အခွင့်အရေးအဖွဲ့ရဲ့ တရားစွဲဆိုမှုကို လက်ခံပြီး ဝါရင့်ရှေ့နေတစ်ဦး ခန့်အပ်တာဝန်‌ပေးခဲ့တာတွေဟာ အာဆီယံပဋိညာဉ်နဲ့ မူတွေကို ချိုးဖောက်တယ်လို့ စစ်ကောင်စီက စွပ်စွဲထားပါတယ်။

တီမောသမ္မတအနေနဲ့ မြန်မာပြည်တွင်းရေးကို မကြာခဏဝင်ရောက်စွက်ဖက်နေတာကြောင့်ဟုဆိုကာ စစ်ကောင်စီက ရန်ကုန်မြို့ရှိ တီမောလက်စ်တေသံရုံးယာယီတာဝန်ခံကို ဖေဖော်ဝါရီ ၁၃ ရက်မှာ ဆင့်ခေါ်ခဲ့ပြီး ဖေဖော်ဝါရီ ၂၀ ရက်မတိုင်ခင် မြန်မာနိုင်ငံမှ အပြီးအပိုင်ထွက်ခွာရန် ညွန်ကြားခဲ့တယ်လို့ စစ်ကောင်စီက ထုတ်ပြန်ထားတာပါ။

ဒါ့အပြင် တီမောလက်စ်တေ အနေနဲ့ မြန်မာနိုင်ငံအပေါ်ထားရှိတဲ့ ရပ်တည်ချက်သဘောထားတွေ ပြောင်းလဲခြင်းမရှိသေးပါက ပိုမိုပြင်းထန်တဲ့အစီအမံတွေ ထပ်မံချမှတ်ဆောင်ရွက်သွားမှာ ဖြစ်တယ်လို့လည်း စစ်ကောင်စီက ခြိမ်းခြောက်ထားပါတယ်။

တီမောလက်စ်တေ သမ္မတ ဟိုဆေးရာမို့စ်ဟော်တာဟာ မြန်မာ့ဒီမိုကရေစီအရေးကို ထောက်ခံအားပေးသူဖြစ်သလို NUG အစိုးရ၊ ဝန်ကြီးများနဲ့လည်း ၂၀၂၄ ခုနှစ်အတွင်းမှာ တွေ့ဆုံမှုတွေရှိခဲ့ပြီး တီမောနိုင်ငံဟာ ၂၀၂၅ ခုနှစ် အောက်တိုဘာလမှာ အာဆီယံအဖွဲ့ဝင်နိုင်ငံ ဖြစ်လာတာလည်း ဖြစ်ပါတယ်။

Photo - တီမောသမ္မတနဲ့ NUG ၊ CHRO တို့တွေ့ဆုံခဲ့စဉ်။(ပုံဟောင်း)

#bbmnews #bbm #bbmtv #timor #myanmar
https://www.facebook.com/share/p/1CLCMiSzs4/

မီဇိုရမ်ဒေသခံတစ်ဦး မြန်မာဘက်ခြမ်းမှာ သေဆုံးလျက်တွေ့ရှိပြီးနောက် နယ်စပ်ကုန်သွယ်ရေးလမ်းပိတ်ပင်မည်

BBM - ဖေဖော်ဝါရီ ၁၆
သတင်း - ကိုအိုက်

အိန္ဒိယနိုင်ငံ၊ မီဇိုရမ်ဒေသခံတစ်ဦး မြန်မာဘက်ခြမ်းမှာ သေဆုံးလျက် တွေ့ရှိပြီးနောက် အိန္ဒိယ-မြန်မာ နယ်စပ်ကုန်သွယ်ရေးလမ်း အကန့်အသတ်မရှိ ပိတ်ဆို့သွားမယ်လို့ မီဇိုရမ်လူငယ်အဖွဲ့အစည်းတွေဖြစ်တဲ့ Central Young Lai Association နဲ့ Mara Thyutlia Py တို့က မနေ့က ဖေဖော်ဝါရီ ၁၅ ရက်က ထုတ်ပြန်ထားပါတယ်။

အခုလို လမ်းပိတ်ရခြင်းမှာ လောင်တလိုင်မြို့မှ မြန်မာပြည် ဆာလာချွားရွာသို့ ကုန်စည်သွားရောက်ပို့ဆောင်တဲ့ ယာဉ်မောင်း Lalramsanga (၃၇) နှစ်အရွယ်အမျိုးသားတစ်ဦး သေဆုံးမှုနဲ့ ပတ်သက်ပြီး အမှုမှန်ပေါ်ပေါက်ခြင်း မရှိသေးတာကြောင့် ဖြစ်ပါတယ်။

မီဇိုရမ်ဒေသခံအမျိုးသား ယာဥ်မောင်းဟာ ပြီးခဲ့တဲ့ ဖေဖော်ဝါရီလ ၁၂ ရက်နေ့မှာ ပျောက်ဆုံးခဲ့ပြီး ၃ ရက်အကြာ ဖေဖော်ဝါရီ ၁၅ ရက် ညနေပိုင်းမှာ မြန်မာဘက်ခြမ်းရှိ ဆိမ်တွီးပွီးမြစ်အတွင်းမှာ ရုပ်အလောင်းကို ပြန်လည်တွေ့ရှိခဲ့တာပါ။

ဒါကြောင့် လောင်တလိုင် (Lawngtlai) နဲ့ ဆိုင်းဟား (Siaha) ခရိုင်အတွင်းမှ မြန်မာနိုင်ငံသို့ ဆက်သွယ်ထားတဲ့ ကုန်သွယ်ရေးလမ်းကြောင်းအားလုံးကို ဒီနေ့ ဖေဖော်ဝါရီလ ၁၆ ရက်၊ ညနေ ၃ နာရီမှစတင်ပြီး အကန့်သတ်မရှိ ပိတ်တော့မှာ ဖြစ်ပါတယ်။

မြန်မာနိုင်ငံသို့ ဝင်ထွက်နေတဲ့ ကုန်တင်ယာဉ်တွေနဲ့ ကုန်သွယ်မှုလုပ်ငန်းအားလုံးကို လုံးဝဖြတ်သန်းခွင့်ပြုမှာ မဟုတ်ပါဘူး။

"ပျောက်ဆုံးမှုနဲ့ သေဆုံးမှုအပေါ် ခိုင်လုံတဲ့ အဖြေတစ်ခု မရမချင်း ဒီလမ်းတွေကို ပိတ်ထားမှာဖြစ်ပြီး လိုအပ်ရင် အရေးယူဆောင်ရွက်မှုတွေကို ဒီထက်မက တိုးမြှင့်သွားမှာပါ" လို့ CYLA နဲ့ MTP တို့က ပူးတွဲသတိပေးထားပါတယ်။

မီဇိုရမ်ဘက်မှ ကုန်စည်စီးဆင်းမှု ရပ်တန့်သွားတာဟာ မြန်မာနိုင်ငံဘက်ခြမ်းရှိ ချင်းပြည်နယ်တောင်ပိုင်းနဲ့ ရခိုင်ပြည်နယ်မြောက်ပိုင်းအတွက် ကြီးမားတဲ့ စိန်ခေါ်မှုဖြစ်လာနိုင်တယ်လို့ ကုန်သည်တွေက သုံးသပ်ပြောဆိုထားပါတယ်။

အခြေခံစားသောက်ကုန်၊ လောင်စာဆီနဲ့ လူသုံးကုန်ပစ္စည်းတွေအတွက် မီဇိုရမ်ဘက်ကို အဓိကအားထားနေရတာဖြစ်တာ‌ကြောင့် ဈေးနှုန်းတွေ အဆမတန် မြင့်တက်သွားနိုင်တယ်လို့ ဆိုပါတယ်။

"စစ်ကောင်စီက ရခိုင်ပြည်နယ်ကို ကုန်စည်ပြတ်တောက်ထားပြီးနောက် ရခိုင်ပြည်နယ်ရဲ့ ကုန်စည်စီးဆင်းမှုက မီဇိုရမ်ဘက်ကိုပဲ အဓိက အားထားရတာပါ၊ အခုအဲလမ်းကို ပိတ်ဆို့သွားမယ်ဆိုရင် ရခိုင်မှာ ကုန်စည်ရှားပါးပြီး ကုန်စျေးနှုန်းတွေ မြင့်တက်သွားဖို့ပဲ ရှိတယ်"လို့ ရခိုင်ကုန်သည်တစ်ဦးက BBM ကို ပြောပါတယ်။

လမ်းပိတ်ဆို့မှု ကာလရှည်ကြာပါက နယ်စပ်ဒေသမှာ ရိက္ခာပြတ်လပ်မှုတွေ ကြုံတွေ့ရနိုင်သလို ဒေသခံ လူငယ်အဖွဲ့အစည်းတွေရဲ့ ဆောင်ရွက်ချက်ကြောင့် နယ်စပ်ဖြတ်ကျော် သွားလာရေးမှာ ပိုမိုတင်းကျပ်လာနိုင်တယ်လို့ ဆိုပါတယ်။

လက်ရှိမှာ သေဆုံးသူရဲ့ ရုပ်အလောင်းကို လူငယ်အဖွဲ့အစည်းတွေက သယ်ယူဖို့ စီစဉ်နေပြီး အမှုမှန်ပေါ်ပေါက်ရေးအတွက် နှစ်ဖက်နယ်စပ် တာဝန်ရှိသူတွေအကြား ညှိနှိုင်းမှုများ ရှိမရှိကိုမူ ဆက်လက်စောင့်ကြည့်ရဦးမှာ ဖြစ်ပါတယ်။

Photo - လူမှုကွန်ယက်

#bbmnews #bbmtv #bbm #Mizoram #chin
https://www.facebook.com/share/p/1Ar3AR2U1c/

အတက်အကျများလွန်းတဲ့ ရှမ်းပြည်တပ်မတော် - အပိုင်း (၁)
ဆောင်းပါးကဏ္ဍ

စစ်အာဏာသိမ်းမှုနောက်ဆက်တွဲအဖြစ် ပဋိပက္ခနှင့်အကျပ်အတည်းများ မြန်မာနိုင်ငံတွင်း ဆက်လက်ဖြစ်ပွားနေ သလို နိုင်ငံရေးမတည်ငြိမ်မှုနှင့် မသေချာမရေရာမှုများကလည်း နိုင်ငံတစ်ဝှမ်းလွှမ်းခြုံထားတုန်းပင်။ ပြီးခဲ့သော ၂၀၂၂ ခုနှစ် ဖေဖော်ဝါရီလပိုင်းကာလများတွင် မိုင်းကိုင် ၊ ကျောက်မဲ ၊ သီပေါ နှင့် နမ္မတူမြို့များတွင် ရှမ်းပြည်ပြန် လည်ထူထောင်ရေးကောင်စီ (RCSS / SSA) နှင့် အင်အားပေါင်းစည်းထားကြသော ရှမ်းပြည်တိုးတက်ရေးပါတီ (SSPP / SSA) နှင့် ၎င်း၏မဟာမိတ် တအာင်းအမျိုးသားလွတ်မြောက်ရေးတပ်မတော် ( TNLA) တို့ကြား ပြင်းထန် သောတိုက်ပွဲများဖြစ်ပွားခဲ့သည်။ တစ်ချိန်တည်းမှာပင် ရှမ်းပြည်နယ် အရှေ့မြောက်ပိုင်း (အထူးသဖြင့် မုန်းကိုးနှင့် ပန်ဆိုင်း)တွင် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) နှင့်စစ်ကောင်စီလက်အောက်ခံ တပ်ရင်း တပ်ဖွဲ့များကြား တိုက်ပွဲများပြင်းထန်ခဲ့သည်။ အဆိုပါဒေသတွင်းနေထိုင်ကြသောပြည်သူများကလည်း တိုက်ပွဲများအတွင်း လူသေဆုံးမှုမြင့်မားခဲ့ကြောင်း သတင်းပေးပို့ခဲ့ကြသည်။ စစ်ကောင်စီဆန့်ကျင်ရေးလှုပ်ရှားမှု များအရှိန်မြှင့်တက်နေသည့် ရှမ်း - ကယားနယ်စပ်များကလွဲပြီး ရှမ်းပြည်နယ်၏နေရာအများအပြားတွင် တိုက်ပွဲ ငယ်များ ရံဖန်ရံခါဖြစ်ပွားခဲ့ပါသည်။

RCSS လှုပ်ရှားမှု၏ မူလရင်းမြစ်

RCSS နှင့် ကျန်သောတိုင်းရင်းသားလက်နက်ကိုင်အဖွဲ့အစည်းများကြား ဖြစ်ပွားလေ့ရှိသောပဋိပက္ခများကို နား လည်ရန်အတွက် နောက်ခံနိုင်ငံရေးအခြေအနေများကိုသဘောပေါက်ထားဖို့ အရေးကြီးပါသည်။ နာမည်ဆိုးဖြင့် ကျော်ကြားခဲ့သော ဘိန်းဘုရင် ခွန်ဆာ က ၁၉၈၅ ခုနှစ်တွင်တည်ထောင်ခဲ့သည့် MTA (Mong Tai Army) ၏ ခေတ် ဟောင်းကာလများကိုတော့ ရှမ်းသမိုင်းတွင်ချန်လှပ်ထားခဲ့၍မရနိုင်ပါ။ ၁၉၈၀ ပြည့်လွန်နှစ်များနောက်ပိုင်းတွင် ထိုင်းနိုင်ငံနယ်စပ်တလျှောက်ရှိ ဟိုမိန်းနှင့် ဒွိုင်လန်းကြား အမာခံနယ်မြေများတွင်အခြေစိုက်ခဲ့သော MTA ၏ စစ် အင်အားက ၁၀၀၀၀ ကျော်အထိ တိုးမြှင့်ရောက်ရှိလာခဲ့သည်။ သို့သော်လည်း MTA တပ်မှူးများသည် ၎င်းတို့နှင့် ပုဂ္ဂိုလ်ရေးအရအဆက်အသွယ်ရှိသည့် ရှမ်းပြည်နယ်၏ဒေသများတွင်လည်း ၎င်းတို့တပ်များကို နေရာချထားနိုင်ဖို့ ကြိုးစားခဲ့ပါသည်။

၁၉၈၈ ခုနှစ် မြန်မာစစ်တပ်အာဏာသိမ်းပြီးနောက်ပိုင်း မြန်မာစစ်တပ်က နိုင်ငံတော်ငြိမ်ဝပ်ပိပြားမှုတည်ဆောက် ရေးကောင်စီ (နဝတ)ဟူသောအမည်ဖြင့် အာဏာရလာခဲ့ပြီးနောက် MTA သည်လည်း ပြောင်းလဲလာခဲ့လေသည်။ နောက်ပိုင်းနှစ်များမှာတော့ နဝတ က ဗမာပြည်ကွန်မြူနစ်ပါတီ (CPB) ကနေ ခွဲထွက်လာခဲ့သည့် "ဝ"ပြည် သွေးစည်းညီညွတ်ရေးတပ်မတော် (UWSA) ၊ မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA) အပြင် အခြား သော EAOs နှင့် အပစ်အခတ်ရပ်စဲခဲ့သည်။ ဗမာပြည်ကွန်မြူနစ်ပါတီ (CPB) သည် တရုတ်နယ်စပ် တလျှောက် နယ်မြေအများအပြားကိုထိန်းချုပ်ထားခဲ့သည်။

MTA နှင့် UWSA ကြား ပြိုင်ဆိုင်မှုပြင်းထန်လာသည်နှင့်အမျှ လူသိများထင်ရှားသော ဒွိုင်လန်းတိုက်ပွဲကြီး ဖြစ်ပွားခဲ့ လေသည်။ အဆိုပါတိုက်ပွဲကြီးပေါ်ပေါက်လာရခြင်းမှာ ထိုင်းနယ်စပ်ရှိ မြန်မာစစ်တပ်၏အကူအညီဖြင့် MTA ဌာန ချုပ်ကို "ဝ"တပ်ဖွဲ့က သိမ်းပိုက်ရန်ကြိုးစားခဲ့ခြင်းကြောင့်ဖြစ်သည်။ နှစ်ဘက်စလုံးထိခိုက်ကျဆုံးမှုများခဲ့သော ယင်း တိုက်ပွဲက ပြန်လည်လွတ်မြောက်လာသူများသည် ထိုတိုက်ပွဲကို နှစ်ပေါင်းများစွာကြာသည်အထိ အိပ်မက်ဆိုး တစ်ခုအနေဖြင့် မြင်မက်နေကြဆဲဖြစ်သည်။ ထိုအချိန်ကာလများကတည်းက UWSA နှင့် MTA တို့က ရှမ်းပြည်နိုင်ငံ ရေးတွင် ဩဇာလွှမ်းမိုးချုပ်ကိုင်နိုင်ရန်အတွက် အပြင်းအထန်ပြိုင်ဆိုင်လာခဲ့ကြပါသည်။

သို့သော် MTA ၊ UWSA နှင့် မြန်မာစစ်တပ်တို့အကြားဖြစ်ပွားခဲ့သည့်တိုက်ပွဲများက ထင်ထားသလောက်တော့လည်း မရိုးရှင်းပါ။ ၎င်းတိုက်ပွဲများနောက်ကွယ်တွင် အခြားသောအကျိုးစီးပွားများပါဝင်နေပါသည်။ မူးယစ်ဆေးဝါးရောင်း ဝယ်ဖောက်ကားမှုဖြင့် နိုင်ငံတကာတွင်နာမည်ဆိုးဖြင့်ကျော်ကြားခဲ့သော "ဝေ ညီအစ်ကိုများ"ထဲကတစ်ဦးဖြစ်သူ "ဝေရှောက်ခန်း"သည်လည်း ခွန်ဆာ နှင့်အတူ အမေရိကန်၏စွဲချက်တင်ခံထားရသူဖြစ်သည်။

"ခွန်ဆာ" နှင့် "ဝေရှောက်ခန်း" တို့သည် ယခင်တုန်းက စီးပွားရေးအတူလုပ်ကိုင်ခဲ့ကြဖူးသော်လည်း "ဝေရှောက် ခန်း" က MTA ကိုရန်ငြိုးထားခဲ့ပြီး ခွန်ဆာ သည်လည်း ၎င်း၏ အကြီးမားဆုံးပြိုင်ဘက်တစ်ဦးဖြစ်လာခဲ့လေသည်။ ၁၉၈၉ ခုနှစ်တွင် UWSA ကိုဖွဲ့စည်းပြီးနောက် ဝေရှောက်ခန်း သည် တောင်ပိုင်းစစ်ဆင်ရေးများတွင် ဩဇာကြီးမား သောရာထူးရရှိခဲ့ပြီး လှုပ်ရှားမှုအသစ်များတွင်ပါဝင်လာခဲ့သည်။ ထို့ကြောင့်လည်း ဒွိုင်လန်းတိုက်ခိုက်မှုသည် အဆို ပါလှုံ့ဆော်မှုများကြောင့်ဖြစ်ပွားခဲ့ရသည်ဟု ဒေသခံပြည်သူများက ယူဆထားကြသည်။

UWSA ၏ တပ်မှူးတစ်ဦးဖြစ်ခဲ့သော "ဝေရှောက်ခန်း" သည် ခွန်ဆာ၏ အခြေစိုက်ဒေသကိုတိုက်ခိုက်ရာတွင် မြန်မာ စစ်တပ်ကိုကူညီပေးခဲ့သည်။ နောက်ဆုံးမှာတော့ ၁၉၉၆ ခုနှစ်တွင် ခွန်ဆာလည်း စစ်အစိုးရထံလက်နက်ချခဲ့သည်။ MTA ဒေသကိုလည်း "ဝေရှောက်ခန်း"ကို ထိန်းချုပ်ခွင့်ပေးခဲ့သည်။

အရေးအကြီးဆုံးက တရုတ်၏ဩဇာလွှမ်းမိုးမှုဖြစ်သည်။ UWSA တည်ထောင်ပြီးနောက်ပိုင်း "ဝ" ခေါင်းဆောင်များ သည် အိမ်နီးချင်းတရုတ်နိုင်ငံ၏အရာရှိများနှင့် နီးကပ်သောဆက်ဆံရေးရှိခဲ့ပြီး MTA ကတော့ သံသယစာရင်းထဲ ထည့်မှတ်ထားခြင်းခံခဲ့ရသည်။ MTA သည် ကူမင်တန်တရုတ်ဖြူများနှင့် အချိတ်အဆက်ရှိခဲ့သည်။ စစ်အေးကာလ တုန်းက ကူမင်တန်သည် ထိုင်းနိုင်ငံနှင့် ရှုူပ်ထွေးသောနယ်မြေပြဿနာများဖြစ်ပွားခဲ့သည်။ ၁၉၈၀ ပြည့်လွန်နှစ်များ အတွင်း ကူမင်တန်ဩဇာလွှမ်းမိုးမှုများကျဆင်းသွားသော်လည်း ဘေကျင်းရှုထောင့်ကကြည့်လျှင်မှု MTA သည် ထိုင်းနှင့်အမေရိကန်တို့၏အကျိုးစီးပွားကို ဆောင်ရွက်နေဆဲသာဖြစ်သည်။ UWSA ကလည်း တရုတ်၏ နောက် ကွယ်က တိတ်တဆိတ်ထောက်ပံ့ပေးနေမှုများအပေါ် ကြိတ်ကာသဘောကျနေခဲ့သည်သာဖြစ်၏။

ဖော်ပြပါနောက်ခံအခင်းအကျင်းများကိုဆန့်ကျင်ကာ ၁၉၉၅ ခုနှစ် ဇွန်လတွင် က အင်အား ၃၀၀၀ ခန့်ဖြင့် MTA ကခွဲထွက်ပြီး SSNA (Shan State National Army) ကိုထူထောင်ခဲ့သော်လည်း အပစ်အခတ်ရပ်စဲရန် နဝတ အစိုးရနှင့် သဘောတူညီခဲ့သည်။ အဆိုပါခွဲထွက်မှုက တမုဟုတ်ချင်းပင် MTA စစ်သားများ၏ စိတ်ဓာတ်ပိုင်းဆိုင်ရာ အပေါ် သက်ရောက်မှုရှိခဲ့ပြီး ရှမ်းနှင့်တရုတ်လူမျိုးစုများအကြား ၎င်းတို့၏ရှေ့အလားအလာနှင့် သစ္စာစောင့်သိနေရ မှုအပေါ် အကြီးအကျယ်မေးခွန်းထုတ်စရာများဖြစ်လာခဲ့သည်။

မျှမျှတတဝေဖန်ရလျှင်မူ SSNA သည် SSPP နှင့်မဟာမိတ်ဖြစ်ထားသည်။ SSPP သည် ရှမ်းပြည်အလယ်ပိုင်းနှင့် ရှမ်းပြည်မြောက်ပိုင်းနယ်မြေများကိုထိန်းချုပ်ထားသော သက်တမ်းပိုရင့်သည့် ရှမ်းတိုင်းရင်းသားလက်နက်ကိုင် အဖွဲ့တစ်ဖွဲ့လည်းဖြစ်သည်။ ကနဦးကာလများက SSA (ရှမ်းပြည်တပ်မတော်) ဟုလူသိများခဲ့သော SSPP ကို ၁၉၆၀ ပြည့်လွန်နှစ်များအအတွင်း ရှမ်းကျောင်းသားလူငယ်များက တည်ထောင်ခဲ့ကြပြီး ရှမ်းလူမျိုးရေးအတွက် အဓိက ကျသောနိုင်ငံရေးအသံအဖြစ် လျင်မြန်စွာဖြစ်တည်လာနိုင်ခဲ့သည်။ ထိုနှစ်ကာလများကိုကျော်လွန်ပြီးနောက်မှာ တော့ SSPP သည်လည်း MTA အခြေစိုက်ထားသော ရှမ်းပြည်တောင်ပိုင်းဒေသများတွင် နယ်မြေဆုံးရှုံးမှုများရှိလာ ခဲ့သလို ခွဲထွက်မှုနှင့်ဘက်ပြောင်းမှုများကိုပါ ကြုံတွေ့ခဲ့ရသည်။

ထိုအကြောင်းများကြောင့်ပင် ရှမ်းပြည်မြောက်ပိုင်းရှိ SSPP ခေါင်းဆောင်များသည် ဗမာပြည်ကွန်မြူနစ်ပါတီနှင့် စတင်နီးကပ်လာခဲ့ပြီး နောက်ပိုင်းတွင် UWSA နှင့်ပါ နီးကပ်သောဆက်ဆံရေးများရှိလာခဲ့သည်။ ၁၉၈၉ ခုနှစ်မှာ တော့ UWSA နှင့် အခြားသော ကွန်မြူနစ်ပါတီမှခွဲထွက်လာကြသည့်အုပ်စုများက နဝတ အစိုးရနှင့်အပစ်အခတ် ရပ် စဲရေးသဘောတူညီလိုက်သောအခါ SSPP လည်း ထိုလမ်းကြောင်းနောက်လိုက်ပါသွားခဲ့လေသည်။ SSPP နှင့် SSNA တို့ပူးပေါင်းပြီး "ရှမ်းပြည်ငြိမ်းချမ်းရေးကော်မတီ (SSPC) ကိုထူထောင်ခဲ့ကြပြီး ယင်းကပင် MTA စစ်သည် များ၏စိတ်ပိုင်းဆိုင်ရာအပေါ် များစွာထိခိုက်မှုရှိစေခဲ့ပါသည်။

အဘက်ဘက်၌ ဖိအားများတိုးလာမှုများကြောင့် လက်နက်နှင့်ငြိမ်းချမ်းရေးလဲလှယ်ရန် ၁၉၉၆ ခုနှစ် ဇန်နဝါရီ ၇ ရက်တွင် ခွန်ဆာနှင့် MTA ခေါင်းဆောင်များက မြန်မာစစ်အစိုးရထံ လက်နက်ချခဲ့လေတော့သည်။ အဆိုပါသဘော တူညီချက်အရ MTA တပ်ဖွဲ့ဝင်ပေါင်း ၁၀၀၀၀ ကျော် လက်နက်ချခဲ့ရသည်ဟုသိရသည်။ သို့သော်လည်း ကြိုတင် ပြင်ဆင်ခြင်း သို့မဟုတ် ကြိုတင်စီစဥ်ခြင်းမျိုးမရှိဘဲ ထိုကဲ့သို့ ရုတ်တရက်အရှုံးပေးလက်မြှောက်လိုက်ခြင်းက ရှမ်း ပြည်နယ်၏ အခြားသောနယ်မြေများတွင်ရှိနေကြသည့် MTA တပ်ဖွဲ့ဝင်များကို ကသောင်းကနင်းဖြစ်စေခဲ့ပါသည်။

မြောက်မြားလှစွာသော MTA တပ်မှူးများသည် နဝတ အစိုးရ၏ ပြည်သူ့စစ်များအဖြစ်ပြောင်းလဲခံလိုက်ရပြီး မြန်မာ စစ်တပ်လက်အောက်ရှိနယ်မြေများတွင် စီးပွားရေးလုပ်ငန်းများ လုပ်ပိုင်ခွင့်များရရှိလာခဲ့ကြသလို တချို့ကတော့ ယနေ့အထိ လည်ပတ်နေဆဲဖြစ်သည်။ သို့သော် MTA စစ်သည်များနှင့် ၎င်းတို့၏မိသားစုဝင်အများစုမှာတော့ မည်သူက ထောက်ပံ့ပေးမည်မသိရသော မသေချာမရေရာသည့်အခြေအနေများဆီသို့ တွန်းပို့ခြင်းခံခဲ့ကြရသည်။

ဤနေရာတွင်သတိပြုစရာတစ်ချက်က MTA တပ်ဖွဲ့ဝင်များအားလုံး ခွန်ဆာ၏ဆုံးဖြတ်ချက်ကို သဘောတူလက်ခံခဲ့ ခြင်းမရှိကြပါ ဆိုသည်ကိုပင်။ ခွန်ဆာ၏အဆိုပါလုပ်ရပ်အပေါ်တုံ့ပြန်သည့်အနေဖြင့် ယွက်ဆစ်ခေါင်းဆောင်သော ရှမ်းအမျိုးသားရေးဝါဒီ လူငယ်အရာရှိအုပ်စုများက ရှမ်းပြည်ပြန်လည်ထူထောင်ရေးကောင်စီ (RCSS)ကို ဖွဲ့စည်းလိုက်ကြပါတော့သည်။

အပိုင်း (၂)ကို ဆက်လက်ဖော်ပြပေးသွားပါမည်။

ဘုန်းမောင်
Ref: TNI, Wiki
https://www.facebook.com/share/p/1AQm3HfiEs/

မရမ်းကုန်းမြို့မှာ နေအိမ်နဲ့ ဆိုင်ခန်း မီးလောင်မှုဖြစ်ပွားပြီး သက်ကြီးပိုင်း အမျိုးသမီး နှစ်ဦး သေဆုံး

BBM - ဖေဖော်ဝါရီ ၁၆
သတင်း - ကိုအိုက်

ရန်ကုန်တိုင်း၊ မရမ်းကုန်းမြို့ရှိ နေအိမ်နဲ့ ဆိုင်ခန်းတွဲဖွင့်ထားတဲ့ အဆောက်အအုံတစ်ခုမှာ မီးလောင်ကျွမ်းမှုဖြစ်ပွားခဲ့ပြီး နေအိမ်အတွင်း ပိတ်မိနေတဲ့ သက်ကြီးပိုင်း ညီအစ်မနှစ်ဦး သေဆုံးသွားခဲ့တယ်လို့ မြို့ခံတွေက BBM ကို ပြောပါတယ်။

မရမ်းကုန်းမြို့၊ အမှတ် (၂) ရပ်ကွက်၊ အောက်ဗဟိုလမ်းရှိ အဆိုပါ နေအိမ်နဲ့ ဆိုင်ခန်းတွဲဖွင့်ထားတဲ့ နေရာမှာ မနေ့က ဖေဖော်ဝါရီလ ၁၅ ရက်၊ မနက် ၃ နာရီခွဲခန့်က မီးစတင်လောင်ကျွမ်းခဲ့တာဖြစ်ပြီး မီးလောင်မှုအတွင်း ညီအစ်မနှစ်ဦးမှာ အပြင်သို့ ထွက်မရဘဲ ပိတ်မိပြီး သေဆုံးခဲ့ရတာ ဖြစ်တယ်လို့ သိရပါတယ်။

အဆိုပါ မီးလောင်တဲ့ နေအိမ်မှာ နယ်မြေအတွင်း ဖြစ်ပွားလေ့ရှိတဲ့ ခိုးဆိုးလုယက်မှုနဲ့ ဖောက်ထွင်းမှု အန္တရာယ်တွေကို စိုးရိမ်တာကြောင့် နေအိမ်နဲ့ ဆိုင်ခန်းတံခါးတွေကို သော့အထပ်ထပ် ခတ်ထားလေ့ရှိတယ်လို့ သိရပါတယ်။

"ဘယ်ကစလောင်တဲ့ မီးဆိုတာ မသိရသေးဘူး၊ အိမ်ထဲမှာရှိတဲ့ ညီအစ်မနှစ်ယောက်က မီးလောင်တဲ့အချိန် အရေးပေါ်တံခါး ဖွင့်မရဘဲ အိမ်နောက်ဘက်မှာ ရုပ်အလောင်းကို တွေ့ရတယ်၊ ဒီဘက်ရပ်ကွက်မှာ ခိုးဆိုးလုယက်၊ ဖောက်ထွင်းမှုရှိတော့ တံခါးကို အထပ်ထပ် ခတ်ထားတယ်လို့ ကြားတယ်" လို့ မြို့ခံတစ်ဦးက BBM ကို ပြောပါတယ်။

မရမ်းကုန်းမြို့နယ် မီးသတ်ဌာန၊ လှိုင်မြို့နယ် မီးသတ်ဌာန၊ ရွှေရောင်သမိုင်း လူမှုကယ်ဆယ်ရေးအသင်းတို့ ပူးပေါင်း၍ မီးငြှိမ်းသတ်ခဲ့ကြတယ်လို့ သိရပါတယ်။

ကယ်ဆယ်ရေးအဖွဲ့တွေ ရောက်ရှိလာချိန်မှာလည်း လုံခြုံရေးအတွက် ခတ်ထားတဲ့ သော့အထပ်ထပ်ကို ခက်ခက်ခဲခဲ ဖွင့်ထုတ်ခဲ့ရတယ်လို့ သိရပါတယ်။

ဓာတ်ပုံ - လူမှုကွန်ရက်

#bbmnews #bbm #bbmtv #Mayangone #Yangon
https://www.facebook.com/share/p/1Adxkt7baK/

တိုင်းရင်းသားခေါင်းဆောင်တွေက NUG နဲ့အတူ ညီညွတ်မှုပြသဖို့ လိုအပ်နေသေးဟု KNDF ဥက္ကဌ ပြောကြား

BBM - ဖေဖော်ဝါရီ ၁၆
သတင်း - ခက်ဆစ်

တိုင်းရင်းသားတော်လှန်ရေး ခေါင်းဆောင်တွေက အမျိုးသားညီညွတ်ရေးအစိုးရ NUG နဲ့အတူ ညီညွတ်မှုကို ပြသဖို့ လိုအပ်နေသေးကြောင်း ကရင်နီအမျိုးသားများကာကွယ်ရေးတပ် KNDF ဥက္ကဌ ခွန်ဘီထူးက ပြောကြားလိုက်ပါတယ်။

ကရင်နီပြည်နယ်အတွင်းရှိ စစ်ရေးလိုအပ်ချက်တွေကို ဖြည့်တင်းဖို့ ပြုလုပ်ခဲ့တဲ့ ရတနာအားမာန် Lucky Draw မဲဖွင့်ပွဲနဲ့ ကမ်ပိန်းပိတ်ပွဲ အခမ်းအနားကို မနေ့က ဖေဖော်ဝါရီလ ၁၅ ရက်မှာ ပြုလုပ်ခဲ့ပြီး အဆိုပါအခမ်းအနားမှာ KNDF ဥက္ကဌ ခွန်ဘီထူးက အခုလိုပြောကြားခဲ့တာ ဖြစ်ပါတယ်။

ကရင်နီအမျိုးသားများကာကွယ်ရေးတပ် KNDF ဥက္ကဌ ခွန်ဘီထူးက တော်လှန်ရေးရဲ့ လက်ရှိအခြေအနေတွေ၊ စစ်ရေးအခြေအနေတွေ၊ နိုင်ငံရေးအခြေအနေတွေကို အဆိုပါအခမ်းအနားမှာ ပြောကြားခဲ့ပါတယ်။

တော်လှန်ရေးဟာ အခက်အခဲတွေကြားမှာ ဆက်ပြီး ရှင်သန်နေဆဲဖြစ်သလို နည်းပေါင်းစုံနဲ့ ဆက်ပြီး ပွင့်လန်းနေဆဲဖြစ်ပြီး ခက်ခဲတဲ့အရာတွေထဲမှာ ဆက်ပြီးတော့ ကျော်လွှားရမယ့်အရာတွေရှိကြောင်း ဆိုပါတယ်။

"နံပါတ်တစ် အရေးကြီးတဲ့ အခက်အခဲ ကျော်လွှားရမဲ့ အရာတစ်ခုကတော့ ဒီနေ့ဒီချိန်မှာ ညီညွတ်မှုက အင်မတန်အရေးကြီးတယ်ပေါ့်နော်၊ ဒီညီညွတ်မှုက ကျွန်တော် ပထမဆုံးပြောလိုတဲ့ ညီညွတ်မှုက ခေါင်းဆောင်ပိုင်းမှာ ညီညွတ်မှုကို ကျွန်တော်တို့ ပြသဖို့ အင်မတန်လိုအပ်တယ်၊ ကျွန်တော်တို့ရဲ့ လက်ရှိခေါင်းဆောင်တွေကြားမှာပေါ့နော်၊ တော်လှန်ရေးကို စစ်ကောင်စီကို အားလုံး တော်လှန်နေကြတယ်၊ မြောက်ပိုင်းအဖွဲ့တွေပဲဖြစ်ဖြစ်၊ AA ပဲဖြစ်ဖြစ် စစ်ကောင်စီကို တော်လှန်နေကြတယ်၊ ဒါပေမဲ့ ကျွန်တော်တို့ရဲ့ ညီညွတ်မှုကို ပြသတဲ့ နေရာမှာ လိုအပ်ချက်တွေ ရှိနေသေးတယ်၊ NUG ကိုကပေါ့နော် တော်လှန်ပြည်သူတွေ ဦးဆောင်နေတဲ့ အစိုးရတစ်ရပ်အနေနဲ့ ရှိပေမယ့်ပေါ့နော်၊ NUG နဲ့အတူတူ ကျွန်တော်တို့ရဲ့ ညီညွတ်မှုကို ပြသဖို့ ကျွန်တော်တို့ လိုအပ်နေသေးတဲ့ အခြေအနေမျိုးဖြစ်တယ်ပေါ့နော်" လို့ KNDF ဥက္ကဌ ခွန်ဘီထူးက ပြောကြားခဲ့တာပါ။

ဒါ့အပြင် နိုင်ငံရေးဆွေးနွေးမှုတွေကို အဖွဲ့အစည်းပေါင်းစုံ တက်ကြ၊ ဆွေးနွေးကြရာမှာ ပြည်သူတွေကို ရှင်းလင်းတဲ့ ဦးဆောင်မှုကို ပြရမယ့် ညီညွတ်မှုမျိုး၊ တော်လှန်ရေးက တစ်စိတ်တစ်ဝမ်းထဲ ရှိနေတယ်ဆိုတာ ပြသရမယ့် အချိန်မျိုး၊ နိုင်ငံတကာကို မြင့်ချင်နေတဲ့ ညီညွတ်မှုမျိုးကို ပြသရမယ်အချိန်မျိုးမှာ ပျက်ကွက်နေသလို ဖြစ်ပြီး ခက်ခဲမှုတခုဖြစ်ကြောင်း KNDF ဥက္ကဌ ခွန်ဘီထူး ပြောကြားခဲ့ပါတယ်။

ခေါင်းဆောင်တွေအားလုံးက တော်လှန်ရေးအခြေအနေတစ်ခုကို ဦးဆောင်နေရသလို တော်လှန်ရေးကြားမှာ အဆက်မပြတ်ကြိုးစားနေကြတဲ့အပြင် ညီညွတ်မှုကို တည်ဆောက်နေကြတာဟာ မဖြစ်မနေလိုအပ်တဲ့အရာ ဖြစ်ကြောင်းကိုလည်း အသိပေးထားပါတယ်။

ဒါကြောင့် တော်လှန်ရေးကို ဆက်ပြီးဦးဆောင်နိုင်ဖို့အတွက် အခက်အခဲတွေကို ကျော်လွှားနိုင်ဖို့အတွက် ညီညွတ်မှုတွေကို အတူ ဆက်ပြီးပြကြရအောင် လို့ KNDF ဥက္ကဌ ခွန်ဘီထူး ပြောကြားခဲ့တာ ဖြစ်ပါတယ်။

Photo - KNU

#bbmnews #bbm #bbmtv #KNU #NUG
https://www.facebook.com/share/p/17Nygec5Wm/

ဖားဆောင်းမြို့နေရာအချို့ကို ပြန်သိမ်းနိုင်ပြီးနောက် ပိတ်မိနေတဲ့ ခလရ၁၃၅မှ စကစ တွေစစ်သီချင်းများဖွင့်ကာအောင်ပွဲခံ

🟥ဖားဆောင်းသာမက ကရင်နီပြည်နယ်အခြားဒေသများမှာလည်း မြေပြင်တိုက်ပွဲများပြင်းထန်

BBM-ဖေဖော်ဝါရီ၁၆
သတင်း-မင်းသော်

ကရင်နီပြည်နယ် ဖားဆောင်းမြို့တွင်းက နေရာအချို့ကို ပြန်သိမ်းပိုက်နိုင်ပြီးတဲ့နောက် မြို့တွင်းရှိ ခလရ ၁၃၅ တပ်ရင်းအတွင်း (၈)လကျော်
ပိတ်မိနေခဲ့တဲ့ စစ်ကောင်စီတပ်သားတွေဟာ စစ်သီချင်းများဖွင့်ပြီး အောင်ပွဲခံနေတာတွေ ပြုလုပ်နေတယ်လို့ ဒေသခံ စစ်ရေးသတင်းရင်းမြစ်တွေထံမှသိရပါတယ်။

တော်လှန်ရေးအင်အားစုတွေအဓိက စိုးမိုးထားပြီး စကစ ရဲ့ ခလရ၁၃၅ တပ်တစ်ခုတည်းသာကျန်တော့တဲ့ ဖားဆောင်းမြို့ကို စစ်ကောင်စီဘက်က ပြန်လည်ရရှိပြီဆိုပြီး ဖေဖော်ဝါရီလ ၁၅ ရက်နေ့ ညပိုင်းမှာ ၎င်းဝါဒဖြန့်ချန်နယ်တွေမှာ ဓာတ်ပုံတွေနဲ့တကွ တင်ထားပါတယ်။

ဖားဆောင်းမြို့ကိုရရှိဖို့အတွက် ပြီးခဲ့တဲ့နှစ် စက်တင်ဘာလကတည်းက စစ်ကောင်စီအနေနဲ့ လေကြောင်းတိုက်ခိုက်မှုတွေသာမက ဘော်လခဲဘက်တွေမှ စစ်ကူစစ်ကြောင်းတွေဖြင့်ထိုးဖောက်ဝင်ရောက်လာတာဖြစ်ပြီး အခုအခါမှာတော့ မြို့နေရာအတော်များများကို စစ်တပ်ဘက်က ပြန်လည်ရရှိသွားပြီဟုလည်း သိရပါတယ်။

အဆိုပါစစ်ကူလာတဲ့စစ်ကြောင်းနဲ့ ဖားဆောင်မြို့အတွင်းပိတ်မိနေတဲ့ ခလရ၁၃၅ မှ စစ်ကောင်စီတပ်သားတို့ ပူးပေါင်းမိသွားပြီဖြစ်သလို ခလရ၁၃၅ အတွင်းမှလည်း စစ်သီချင်းများဖွင့်ကာ အကြီးအကျယ်အောင်ပွဲခံနေတာတွေ ပြုလုပ်နေတယ်လို့ ဒေသခံစစ်ရေးသတင်းရင်းမြစ်တစ်ဦးက BBM ကိုပြောပါတယ်။

"ဖားဆောင်းပြန်ပါသွားပြီဆိုတာက အကုန်တော့မဟုတ်သေးပါဘူး၊ ခုက ကာတော့ကာနေတုန်းပါပဲ၊ ဘော်လခဲဘက်ကလာတဲ့ စစ်ကူတွေနဲ့ ၁၃၅ ထဲကကောင်တွေတော့ ပေါင်းမိပြီ၊ ပြီးတော့ ၁၃၅ ထဲ စစ်သီချင်းတွေ အကျယ်ကြီးဖွင့်ပြီးအောင်ပွဲခံနေတယ်"

စစ်ကောင်စီဘက်က ခလရ ၁၃၅ တပ်တွင်းမှ အသေခံဒရုန်းတွေ၊ လက်နက်ကြီးတွေနဲ့လည်း တော်လှန်ရေးအင်အားစုတွေရှိရာနေရာတွေကိုသာမက ဖားဆောင်းတံတားဘက်တွေကိုပါ တိုက်ခိုက်နေတယ်လို့လည်း သိရပါတယ်။

တော်လှန်ရေးအင်အားစုတွေဘက်ကတော့ ဖားဆောင်းတံတားကို ဆက်လက်ထိန်းချုပ်ထားပြီး စစ်ရေးအခြေအနေအရ သွားလာခွင့်ကိုလည်း ကန့်သတ်ထားတယ်လို့ သိရပါတယ်။

ဒါ့အပြင် ကရင်နီပြည်နယ်အတွင်း ဖားဆောင်းမြို့တစ်ခုတည်းသာမက ဒီးမော့ဆိုးနဲ့အခြားတော်လှန်ရေးအင်အားစုတွေထိန်းချုပ်ရာနေရာတွေကို စစ်ကြောင်းထိုးတာတွေရှိနေပြီး မြေပြင်တိုက်ပွဲတွေပြင်းထန်လျက်ရှိတယ်လို့လည်း နောက်ထပ်မြေပြင်တော်လှန်ရေး ရဲဘော်တစ်ဦးက BBM ကိုအတည်ပြုပြောဆိုပါတယ်။

"ဒီးမော့ဆိုအနောက်ဘက်အခြမ်းမှာလည်း တိုက်ပွဲတွေဆက်တိုက်ရှိတယ်ဗျ၊ ခွေးတွေက ဒရုန်းအရမ်းသုံးတယ်၊ ရဲဘော်တွေထိတာတွေလည်းရှိပါတယ်"

စစ်ကောင်စီအနေနဲ့ အခုနောက်ပိုင်း ကရင်နီပြည်နယ်တစ်ခုတည်းသာမက ကရင်ပြည်နယ်၊ မိုးကုတ်နဲ့ တကောင်းဒေသဘက်တွေမှာပါ ဒရုန်းနည်းပညာ၊ လူအင်အားအမြောက်အများဖြင့် ဖြည့်တင်းနေတာတွေရှိပြီး ၎င်းတို့လက်လွှတ်ထားရတဲ့နယ်မြေတွေကို ပြန်လည်ရရှိအောင် ဆောင်ရွက်နေတာတွေရှိတယ်လို့ သိရပါတယ်။

Photo-စကစ ချန်နယ်တွေတင်ထားတဲ့ ဖားဆောင်းတိုက်ပွဲမှ စကစများ

#bbmnews #bbm #bbmtv #Karenni #Hpasawng
https://www.facebook.com/share/p/1CxY4yxvU4/

ခမရ (၅၉၁) တပ်ရင်းက ထွက်ပြေးလာတဲ့ စကစတစ်ဦးကို ရေးဘီလူးဖမ်းမိ

BBM-ဖေဖော်ဝါရီ၁၆
သတင်း-မင်းသော်

မွန်ပြည်နယ်၊ ရေးမြို့နယ်အတွင်းရှိ ခမရ (၅၉၁) တပ်ရင်းကနေ ထွက်ပြေးလာတဲ့ စစ်ကောင်စီတပ်သားတစ်ဦးကို ဖမ်းဆီးရမိခဲ့တယ်လို့ ရေးဘီလူးအဖွဲ့မှ ထုတ်ပြန်ချက်အရ သိပါတယ်။

ဖေဖော်ဝါရီ ၁၆ ရက်(ဒီနေ့)မှာ အဆိုပါတပ်သားကို ဖမ်းဆီးမိခဲ့တာဖြစ်ပြီး အဆိုပါတပ်သားအနေနဲ့ မြိတ်မြို့နယ်မှာ ကားဝပ်ရှော့အလုပ်လုပ်ကိုင်နေစဥ် စစ်ကောင်စီရဲ့ ပေါ်တာဆွဲဖမ်းဆီးမှုကို ခံခဲ့ရသူဖြစ်တယ်လို့လည်း သိရပါတယ်။

ဒါ့အပြင် ရေးဘီလူးအဖွဲ့ရဲ့ စစ်မေးချက်အရ အဆိုပါတပ်သားအနေနဲ့ ကြိုတင်ချိတ်ဆက်ထားမှုမရှိဘဲ ရေးဘီလူးတပ်ရင်းနယ်မြေအတွင်းထွက်ပြေးလာခြင်းဖြစ်ပြီး လုံခြုံရေးအရ ဆက်လက်စောင့်ကြည့်သွားဖို့ရှိတယ်လို့လည်း သိရပါတယ်။

Video-ရေး ဘီလူး
https://www.facebook.com/share/v/1B3q2ZURXG/

အတိုက်အခံခေါင်းဆောင် နာဗယ်နီကို ဖားအဆိပ်နဲ့ သတ်ခဲ့တယ်ဆိုတဲ့ စွပ်စွဲချက်တွေကို ရုရှားငြင်းဆို

BBM - ဖေဖော်ဝါရီ ၁၇
သတင်း - Richard

ရုရှားနိုင်ငံမှာ ထောင်ချခံထားရတဲ့ အတိုက်အခံခေါင်းဆောင် အက်လက်ဇီ နာဗယ်နီ(Alexey Navalny) ကို အဆိပ်ခတ်သတ်ခဲ့တယ်ဆိုတဲ့ ဥရောပနိုင်ငံ ၅ နိုင်ငံရဲ့ အကဲဖြတ်ချက်ကို ရုရှားဘက်မှ "ပြင်းပြင်းထန်ထန်" ပယ်ချခဲ့ကြောင်း အယ်လ်ဂျားဇီးယား သတင်းဌာနမှာ ဖော်ပြထားပါတယ်။

လွန်ခဲ့တဲ့ နှစ်ပေါင်းများစွာကတည်းက သမ္မတ ဗလာဒီမာ ပူတင်(Vladimir Putin)ရဲ့ အပြင်းထန်ဆုံး ပြည်တွင်းပြိုင်ဘက်ဖြစ်တဲ့ နာဗယ်နီဟာ "အစွန်းရောက်ဝါဒ" နဲ့ ထောင်ဒဏ် ၁၉ နှစ်ကျခံနေစဉ် ၂၀၂၄ ခုနှစ် ဖေဖော်ဝါရီလ ၁၆ ရက်နေ့မှာ အာတိတ်အကျဉ်းထောင်မှာ သေဆုံးသွားခဲ့ပါတယ်။

ဖေဖော်ဝါရီလ ၁၄ရက် စနေနေ့မှာ ယူနိုက်တက်ကင်းဒမ်း၊ ပြင်သစ်၊ ဂျာမနီ၊ နယ်သာလန်နဲ့ ဆွီဒင်နိုင်ငံတို့က ပူးတွဲကြေညာချက်တစ်စောင် ထုတ်ပြန်ခဲ့ပြီး အဆိပ်သင့်ဖားတွေမှာ တွေ့ရှိရတဲ့ အဆိပ်တစ်မျိုးဖြစ်တဲ့ epibatidine နဲ့ အဆိပ်ခတ်ခံခဲ့ရတယ်လို့ ယုံကြည်ကြောင်းဆိုကြပါတယ်။

ရုရှားနိုင်ငံကသာ အဆိုပါ အဆိပ်ကို အသုံးပြုဖို့ “နည်းလမ်း၊ ရည်ရွယ်ချက်နဲ့ အခွင့်အလမ်း” ရှိကြောင်း ပြောကြားခဲ့ပါတယ်။

“ကျွန်တော်တို့အနေနဲ့ အဲ့ဒီလို စွပ်စွဲချက်တွေကို လက်မခံပါဘူး၊ သဘောမတူပါဘူး၊ ဒါတွေဟာ ဘက်လိုက်ပြီး အခြေအမြစ်မရှိဘူးလို့ ယူဆပါတယ်” လို့ ရုရှား ပြောရေးဆိုခွင့်ရှိသူ ဒီမစ်ထရီ ပက်စ‌ကော့ဗ်(Dmitry Peskov)က ဖေဖော်ဝါရီလ ၁၆ရက် တနင်္လာနေ့မှာ နေ့စဉ်သတင်းစာရှင်းလင်းပွဲတစ်ခုအတွင်း သတင်းထောက်တွေကို ပြောကြားခဲ့ပါတယ်။

“ကျွန်တော််တို့ သူတို့ရဲ့ ပြင်းပြင်းထန်ထန် စွပ်စွဲချက်တွေကို ငြင်းပယ်ပါတယ်” လို့ သူက ထပ်လောင်းပြောကြားခဲ့ပါတယ်။

ပက်စကော့ဗ်ရဲ့ မှတ်ချက်တွေဟာ နာဗယ်နီရဲ့ ကွယ်လွန်ခြင်း နှစ်ပတ်လည်နေ့ အထိမ်းအမှတ်ဖြစ်တဲ့ ဖေဖော်ဝါရီလ ၁၆ရက် တနင်္လာနေ့မှာ မော်စကိုရှိ သူရဲ့အုတ်ဂူကို လာရောက်လည်ပတ်စဉ် ထွက်ပေါ်လာခဲ့တာပဲဖြစ်ပါတယ်။

တက်ရောက်လာသူအချို့က မျက်နှာဖုံးတွေနဲ့
ပုဝါတွေ ဝတ်ဆင်ထားခဲ့ကြပါတယ်။

ရုရှားအာဏာပိုင်တွေက နာဗယ်နီ နဲ့ သူ့အဖွဲ့အစည်းကို နာဗယ်နီ မကွယ်လွန်ခြင်းမှီ "အစွန်းရောက်သမား"တွေ အဖြစ် သတ်မှတ်ခဲ့ပါတယ်။

Epibatidine အဆိပ်ကို တောင်အမေရိကရှိ မိုးသစ်တောတွေထဲမှာ နေထိုင်လေ့ရှိတဲ့ သေးငယ်ပြီး အရောင်ရှိတဲ့ ဖား(Dart Frog)တွေထဲမှာ သဘာဝအတိုင်းတွေ့ရှိရပါတယ်။

အဆိုပါ အဆိပ်ဟာ အသက်ရှူမဝခြင်း၊ တက်ခြင်းနဲ့ နှလုံးခုန်နှုန်းနှေးကွေးခြင်းတို့ဖြစ်ပြီး နောက်ဆုံးမှာ သေဆုံးခြင်းတို့ကို ဖြစ်စေပါတယ်။

#bbmnews #bbm #bbmtv #dartfrog #russia

Reference - Al Jazeera
Photo - Al Jazeera
https://www.facebook.com/share/p/1AasSChk5u/

စစ်ကောင်စီက တီမောလက်စတေးသံတမန်ကို နှင်ထုတ်တဲ့အ‌ပေါ် NUG ရှုတ်ချ

BBM - ဖေဖော်ဝါရီ ၁၇
သတင်း - Richard

စစ်ကောင်စီက တီမောလက်စတေးသံတမန်ကို နှင်ထုတ်တဲ့အ‌ပေါ် NUG ရှုတ်ချကြောင်း အမျိူသားညီညွတ်ရေး အစိုးရ ( NUG)က ဖော်ပြထားပါတယ်။

ဖေဖော်ဝါရီလ ၁၆ရက်နေ့က စစ်ကောင်စီတပ်ဟာ တီမောလက်စတဲနိုင်ငံခြားရေးရုံးနဲ့ သံတမန်ကို နှင်ထုတ်တဲ့အပေါ် အမျိုးသားညီညွတ်ရေးအစိုးရ(NUG)က ရှုတ်ချကြောင်းဖော်ပြထားတာ ပဲဖြစ်ပါတယ်။

အမျိုးသားညီညွတ်ရေးအစိုးရအနေနဲ့ စစ်ကောင်စီတပ်က တီမောလက်စတေးသံတမန်ကို မြန်မာနိုင်ငံမှ (၇) ရက်အတွင်း ထွက်ခွာဖို့ ခြိမ်းခြောက်ဖိအားပေးမှုကို ပြင်းထန်စွာ ရှုတ်ချတယ်လို့ ဆိုပါတယ်။

အခုလို ခြိမ်းခြောက်ဖိအားပေးမှုတွေဟာ သံတမန်ဆက်ဆံရေးနဲ့ စပ်လျဉ်းတဲ့ ဗီယင်နာ ကွန်ဗင်းရှင်းအောက်ရှိ သံတမန်ဆက်ဆံရေးဆိုင်ရာ သတ်မှတ်မူဘောင်တွေကို ပျက်စီးစေခဲ့ပြီး အပိုဒ် (၉) အရ လက်ခံနိုင်ငံဟာ သံတမန်တစ်ဦးကို persona non grata အဖြစ် ကြေညာနိုင်ပေမဲ့ သတ်မှတ်ထားရှိတဲ့ သံတမန်ရေးရာ လုပ်ထုံးလုပ်နည်းတွေ၊ နိုင်ငံတကာဥပဒေတွေနဲ့အညီ လိုက်နာ ကျင့်သုံးဆောင်ရွက်ရမှာ ဖြစ်တယ်လို့ ဆိုပါတယ်။

စစ်ကောင်စီရဲ့ ဖိအားပေးအကျပ်ကိုင်မှု၊ ခြိမ်းခြောက်မှုဆွေဟာ ဗီယင်နာ ကွန်ဗင်းရှင်းရဲ့ အနှစ်သာရ၊ ငြိမ်းချမ်းတဲ့ သံတမန်ဆက်ဆံမှု အခြေခံသဘောတရားတွေနဲ့ ဆန့်ကျင်လျက်ရှိတယ်လို့ ဆိုပါတယ်။

အမျိုးသားညီညွတ်ရေးအစိုးရ(NUG)အနေနဲ့ တီမောလက်စတေးနိုင်ငံအပါအဝင် အာဆီယံအဖွဲ့ဝင် နိုင်ငံတွေနဲ့ ပုံမှန်ဆက်သွယ်ဆောင်ရွက်လျက်ရှိ‌ကြောင်းကိုလည်း ဖော်ပြထားပါတယ်။

စစ်ကောင်စီတပ်ဟာ တီမောလက်စတေးနိုင်ငံကို ရွေးချယ်ပြီး အရေးယူဆောင်ရွက်တဲ့ ဆုံးဖြတ်ချက်ဟာ နိုင်ငံတကာ သံတမန်စံနှုန်းတွေနဲ့ လုပ်ထုံးလုပ်နည်းတွေအပေါ် လေးစားလိုက်နာမှု ရှိ-မရှိနဲ့ စပ်လျဉ်းပြီး အလွန် စိုးရိမ်ဖွယ်ရာရှိကြောင်းကိုလည်း ဆိုပါတယ်။

အမျိုးသားညီညွတ်ရေးအစိုးရဟာ မြန်မာနိုင်ငံအတွင်းရှိ တာဝန်ခံမှု ရှိစေရေး၊ ထိခိုက်ခံစားခဲ့ရသူတွေအတွက် တရားမျှတမှုရရှိစေရေးနဲ့ ပြစ်ဒဏ်ကင်းလွတ်ခွင့်ရရှိနေတဲ့ အလေ့အထတွေကို အဆုံးသတ်ရေးတို့အတွက် အမြဲမပြတ်ကူညီပံ့ပိုးပေးနေတဲ့ တီမောလက်စတေးအပါအဝင် အခြားနိုင်ငံအားလုံးကို အထူးကျေးဇူးတင်ရှိကြောင်းလည်း ဆိုထားပါတယ်။

အခုလို အရေးကြီးကာလအတွင်း မြန်မာပြည်သူတွေအတွက် အကူအညီတွေ ဆက်လက်ပြီး တိုးမြှင့်ပံ့ပိုးပေးဖို့အတွက်လည်း နိုင်ငံတကာအသိုင်းအဝိုင်းကို လေးစားစွာနဲ့ အမျိုးသားညီညွတ်‌ရေးအစိုးရ (NUG)က တိုက်တွန်းထားပါတယ်။
https://www.facebook.com/share/p/17wbP3MMhg/

လယ်ဒိုမြို့မှာ စစ်မှုထမ်းတပ်သား ၉ ဦး KNDO ထံ လက်နက်ချအလင်းဝင်

BBM - ဖေဖော်ဝါရီ ၁၇
သတင်း -ကိုဘုဏ်း

ကော်သူးလေ ထိန်းချုပ်နယ်မြေအတွင်းရှိ ၊ လယ်ဒိုမြို့မှာ စစ်ကောင်စီရဲ့စစ်မှုထမ်းတပ်သား ၉ဦးဟာ KNDO တပ်ရင်း ၃ထံလက်နက်ချ အလင်းဝင်ခဲ့တယ်လို့ ကေအဲန်ယူက ထုတ်ပြန်ထားပါတယ်။

ဖေဖော်ဝါရီ ၁၂ရက်နေ့မှာ အဆိုပါ အလင်းဝင်လာတဲ့ တပ်သား ၉ဦး ဖြစ်ကြတဲ့ ကျော်ဇေယျ၊သက်ပိုင်စိုးစောကာဘီ၊မင်းထက်၊အောင်စိုးဝင်း၊ ခလရ - ၅၉၈ တပ်ရင်းမှ တပ်သား ကိုမျိုး၊ခလရ - ၆၀ တပ်ရင်းမှ ဝင်းမြထူး၊ခလရ - ၃၅၁ မှ အာကာကျော် ဝင်း၊ခမရ - ၅၃ မှ အောင်မင်းစိုး တို့ဖြစ်ကြပါတယ်။

အဆိုပါစစ်ကောင်စီ စစ်မှုထမ်းတပ်သားတွေဟာ KNU တပ်မဟာ ၃ လက်အောက်ခံ KNDO တပ်ရင်း ၃ ထံမှာ လက်နက်ချ အလင်းဝင်ခဲ့ကြခြင်းဖြစ်တယ်လို့ သိရပါတယ်။

အလင်းဝင်လာတဲ့ စစ်မှုထမ်းတပ်သားတွေဟာ သူတို့ရဲ့ ဆန္ဒမပါပဲ အတင်းအဓမ္မ စစ်မှုထမ်းခိုင်းခြင်းဖြစ်တယ်လို့လည်းသိရပြီး ကေအဲန်ယူမှ ထိန်းသိမ်းစောင့်ရှောက်ပေးထားကြောင်းလည်းသိရပါတယ်။

စစ်ကောင်စီတပ်အတွင်းမှာရှိတဲ့ အဓမ္မ စစ်မှုထမ်းစေခိုင်းခြင်းခံရတဲ့ တပ်သားတွေအနေနဲ့ အလင်းဝင်လိုပါက နီးစပ်ရာတော်လှန်ရေးတပ်ဖွဲ့များထံ ဆက်သွယ်အလင်းဝင်ရောက်ကြရန် ကေအဲန်ယူ ၊ကရင်အမျိူးသားအစည်းအရုံးက ထုတ်ပြန်ကြေငြာထားပါတယ်။

ပုံ - KNU

#bbmnews #bbm #bbmtv #KNU #karen
https://www.facebook.com/share/p/1AhdzneHhX/

AA ဖမ်းဆီးထိန်းသိမ်းထားတဲ့ ဘင်္ဂလားဒေ့ရှ်ရေလုပ်သား ၇၃ ဦးကို ဘင်္ဂလားဒေ့ရှ်နယ်ခြားစောင့်တပ်ထံပြန်လည်လွှဲအပ်

BBM - ဖေဖော်ဝါရီ ၁၇
သတင်း - နိုင်နိုင်

အာရက္ခတပ်တော် AA က ဖမ်းဆီးထိန်းသိမ်းထားတဲ့ ဘင်္ဂလားဒေ့ရှ်ရေလုပ်သား (၇၃) ဦးကို ဘင်္ဂလားဒေ့ရှ် နယ်ခြားစောင့်တပ်ထံ AA ကနေ ပြန်လည်လွှဲအပ်ပေးခဲ့တယ်လို့ သိရပါတယ်။

အာရက္ခတပ်တော် AA ဟာ ရခိုင်ရေပိုင်နက်အတွင်းကို တရားမဝင်ကျူးကျော်ဝင်ရောက် ငါးခိုးဖမ်းတဲ့သူတွေကို ဖမ်းဆီးတာ ဥပဒေနဲ့အညီ အရေးယူပြစ်ဒဏ်ချမှတ်တာတွေ လုပ်ဆောင်နေတာဖြစ်ပြီး အဲဒီထဲကနေ ဘင်္ဂလားဒေ့ရှ်ရေလုပ်သား (၇၃) ဦးကို မနေ့က ဖေဖော်ဝါရီ ၁၆ ရက်နေ့မှာ ပြန်လည်လွှဲပြောင်းပေးခဲ့တာလည်း ဖြစ်ပါတယ်။

အာရက္ခတပ်တော် AA ဟာ အဆိုပါ ရေလုပ်သား (၇၃) ဦးကို ဘင်္ဂလားဒေ့ရှ်နယ်ခြားစောင့်တပ်နဲ့ အဆက်အသွယ်ပြုလုပ်ကာ အထောက်အထားအချက်အလက်တွေကို စစ်ဆေးမှုတွေပြုလုပ်ခဲ့ပြီးနောက် မနေ့က ဖေဖော်ဝါရီလ ၁၆ ရက်၊ ညနေပိုင်းမှာ လွှဲပြောင်းပေးခဲ့တာဖြစ်တယ်လို့လည်း သိရပါတယ်။

လက်ရှိ AA ကနေ ဘင်္ဂလားဒေ့ရှ်နယ်ခြားစောင့်တပ်ဆီ လွှဲပြောင်းပေးအပ်ခဲ့တဲ့ အဆိုပါရေလုပ်သား (၇၃) ဦးကို ရခိုင်ရေပိုင်နက်အတွင်း ကျူးကျော်ဝင်ရောက်ကာ ငါးခိုးမဖမ်းတော့ကြောင်း ခံဝန်ကတိလက်မှတ် ရေးထိုးပြီးမှလွှတ်ပေးခဲ့တာဖြစ်တယ်လို့လည်း သိရပါတယ်။

AA ထိန်းချုပ်ထားတဲ့ မောင်တောမြို့နယ်နဲ့ ရသေ့တောင်မြို့နယ် ရေပိုင်နက်အတွင်းကို ပြီးခဲ့တဲ့ အောက်တိုဘာလ ၂၇ ရက်နေ့ကနေ ဒီဇင်ဘာလ ၂၃ ရက်နေ့အထိ တစ်ဖက်ဘင်္ဂလားဒေ့ရှ်နိုင်ငံမှ တရားမဝင်ကျူးကျော် ဝင်ရောက်ငါးခိုးဖမ်းတဲ့ ငါးဖမ်းသမား ၇၉ ဦးကို အာရက္ခတပ်တော် AA က ဖမ်းဆီးထိန်းသိမ်းခဲ့တာလည်း ဖြစ်ပါတယ်။

ရခိုင်ရေပိုင်နက်အတွင်းကို တရားမဝင်ကျူးကျော်ဝင်ရောက် ငါးခိုးဖမ်းတဲ့သူတွေကို အာရက္ခတပ်တော် AA ကမ်းခြေစောင့်တပ်ဖွဲ့က အချိန်နဲ့တပြေးညီစောင့်ကြည့် ဖမ်းဆီးဆောင်ရွက်မှုတွေ ရှိနေတာလည်း ဖြစ်ပါတယ်။

#bbmnews #bbm #bbmtv #AA #rakhine
https://www.facebook.com/share/p/16SAes8bsM/

အနိုင်ဂိုးပေးခဲ့ရမှုအပေါ် ဆင်ခြေပေးမှာမဟုတ်ကြောင်း ဘာစီလိုနာနည်းပြ ပြောကြား

BBM - ဖေ‌ဖော်ဝါရီ ၁၇
သတင်း - David

ဘာစီလိုနာအသင်းနည်းပြ ဟန်ဆီဖလစ်ခ်က ဂျီရိုနာကို ၁-၂ ဂိုးနဲ့ အရေးနိမ့်ခဲ့တဲ့ပွဲမှာ အနိုင်ဂိုးပေးခဲ့ရမှုအပေါ် ဆင်ခြေပေးမှာမဟုတ်ကြောင်း
ပြောကြားခဲ့ပါတယ်။

၈၆ မိနစ်မှာ ဘာထရန် အနိုင်ဂိုးမသွင်းခင် build up မှာ အယ်ချယ်ဗယ်ရီက ဘာစီလိုနာနောက်ခံလူ ခွန်ဒဲကို သိသိသာသာ ပြစ်ဒဏ်ကျူးလွန်
ခဲ့တာဖြစ်တယ်။

ဘာစီလိုနာအသင်းက ကူဘာဆီ ဦးဆောင်ဂိုးသွင်းခဲ့ပေမဲ့ ဂျီရိုနာဘက်က လူမာ ပြန်လည်ချေပခဲ့ပြီးနောက် ဒီအငြင်းပွားဖွယ် အနိုင်ဂိုး
ပေးခဲ့ရတာပါ။

ဒီရလဒ်ကြောင့် ဘာစီလိုနာအသင်းဟာ ဇယားထိပ်ဆုံးနေရာကို ရီးယဲလ်အသင်းထံ လွှဲပြောင်းပေးခဲ့ရပြီး နှစ်မှတ်ကွာသွားခဲ့ရပါတယ်။

''ဒါနဲ့ပတ်သက်ပြီး ကျွန်တော် မပြောချင်ပါဘူး။ ဒုတိယဂိုးမတိုင်ခင် လူတိုင်း ဒီအခြေအနေကို မြင်တွေ့ခဲ့ရတယ်။ ဒါပေမဲ့ ဂျီရိုနာက အနိုင်ရလဒ်နဲ့
ထိုက်တန်ပါတယ်။ ကျွန်တော်တို့ ကာကွယ်မှုက အလွန်ဆိုးရွားခဲ့တယ်။ အထူးသဖြင့် အကူးအပြောင်းတွေမှာပေါ့။ ကျွန်တော်တို့ ဖွင့်ကစား
လွန်းခဲ့တယ်။ ကွင်းလယ်ကလည်း ပုံမှန်အနေအထား မရှိခဲ့ပါဘူး။ တကယ်တော့ ပြစ်ဒဏ်ဘောက သိသာထင်ရှားပါတယ်။ ဒါက ဒီလိုပါပဲ။
ကျွန်တော့်အဖို့တော့ အသင်းကောင်းကောင်းကစားနိုင်ရင်တော့ ဒီထက်ပိုပြောနိုင်မှာပါ။ ဒါပေမဲ့ ကျွန်တော်တို့ ကောင်းကောင်း မကစားနိုင်
ခဲ့ပါဘူး။ ဒါက ဆင်ခြေပေးသလိုပါပဲ။ ကျွန်တော် ဒါမျိုး မလုပ်ချင်ပါဘူး။ ကျွန်တော်တို့ ပိုကောင်းအောင်ကစားရမယ်။ ဒီအဆင့်ကို ပြန်လာ
နိုင်ရမယ်''လို့ ဟန်ဆီဖလစ်ခ်က ပြောခဲ့ပါတယ်။

ဘာစီလိုနာအသင်းဟာ ပထမပိုင်းနာကျင်အချိန်ပိုမှာ ယမားလ် ပယ်နယ်တီကန်ခွင့်ရပေမဲ့ ဂိုးမဝင်ခဲ့ပါဘူး။

Credit - Bleacher Report Football and La Liga

#bbmnews #bbm #bbmtv #sportsnews #Bleacher #LaLiga
https://www.facebook.com/share/p/1DeqJUKazJ/

ဗန်းမက်ရွာကို မီးရှို့ရာမှာ ဦးဆောင်သူ PNO ဗိုလ်ကြီး တိုက်ပွဲတွင်း စနိုက်ပါထိမှန်သေဆုံး

BBM - ဖေဖော်ဝါရီ ၁၇
သတင်း - ခွန်း

ရှမ်းပြည်နယ်တောင်ပိုင်း၊ မောက်မယ်မြို့နယ် ကဒူးကြီးဒေသ၊ ဗန်းမက်‌ဒေသမှာ ဖြစ်ပွားခဲ့တဲ့ တိုက်ပွဲအတွင်း PNO ပြည်သူ့စစ် ဗိုလ်ကြီး တစ်ဦး စနိုက်ပါနဲ့ ပစ်ခတ်ခံရပြီး သေဆုံးသွားတယ်လို့ ဒေသခံသတင်းရင်းမြစ်တွေက ပြောပါတယ်။

ပြီးခဲ့တဲ့ ဖေဖော်ဝါရီလ ၁၄ ရက်နေ့မှာ ထိမှန်သေဆုံးခဲ့တာဖြစ်ပြီး သေဆုံးသွားသူကတော့ စစ်ကောင်စီလက်အောက်ခံ PNO ပြည်သူ့စစ်မှ ဗိုလ်ကြီး ခွန်မောင်ကွိ (ခ) လရောင် ဖြစ်ပါတယ်။

“အဲဒီဗိုလ်ကြီးက စစ်ဘေးရှောင်တွေ နေထိုင်နေတဲ့ ဗန်းမက်ရွာသစ်ကို မီးရှို့ရာမှာ ကိုယ်တိုင်ဦးဆောင်ခဲ့သူပါ၊ ဖေဖော်ဝါရီ ၁၃ ရက်နေ့မှာ ရွာကို မီးရှို့ပြီး နောက်တစ်နေ့ ၁၄ ရက်နေ့မှာတော့ စနိုက်ပါထိမှန်ပြီး သေဆုံးသွားတာပါ” လို့ သတင်းရင်းမြစ်က ပြောပါတယ်။

သေဆုံးသွားတဲ့ ဗိုလ်ကြီး ခွန်မောင်ကွိဟာ တောင်ကြီးမြို့နယ် မူးယားကျေးရွာအုပ်စု၊ ကန်လောင်းကျေးရွာမှာ နေထိုင်သူဖြစ်ပြီး သေဆုံးချိန်မှာ ဇနီးနှင့် သားတစ်ဦး ကျန်ရစ်ခဲ့တယ်လို့ လည်းသိရပါတယ်။

သေဆုံးချိန်မှာ အသက် ၂၉ နှစ်သာရှိသေးပြီး ဖေဖော်ဝါရီလ ၁၆ ရက်၊ ညနေပိုင်းမှာ မီးသင်္ဂြိုဟ်ခဲ့တယ်လို့ ပြောပါတယ်။

ဒေသခံရွာသားများအဆိုအရ ဗိုလ်ကြီး ခွန်မောင်ကွိဟာ ပအိုဝ်းဒေသအတွင်း လူငယ်တွေကို စစ်ကောင်စီနဲ့ PNO အတွက် အတင်းအဓမ္မ စစ်သားစုဆောင်းပေးတာ၊ ကျေးရွာတွေမှာ ငွေကြေးကောက်ခံမှုတွေ လုပ်ဆောင်တာ စစ်ကောင်စီအလိုကျ လုပ်ရပ်တွေကို ဦးဆောင်လုပ်ကိုင်နေသူ ဖြစ်တယ်လို့ သိရပါတယ်။

အခု ဖေဖော်ဝါရီလအတွင်း ဗန်းမက်ဒေသမှာ ဖြစ်ပွားခဲ့တဲ့ တိုက်ပွဲတွေကြောင့် PNO ပြည်သူ့စစ်ဘက်က စစ်သား ၂၀၀ နီးပါး သေဆုံးခဲ့ပြီး အလောင်းတွေကို မှန်လုံကားတွေနဲ့ သယ်ဆောင်ခဲ့ရတယ်လို့ ဒေသခံသတင်းရင်းမြစ်များထံမှ သိရပါတယ်။

Photo - Social Media

#bbmnews #bbm #bbmtv #PNO #စနိုက်ပါ
https://www.facebook.com/share/p/17WJbvSAaL/

ကျောက်ဖြူမှာ လေကြောင်းတိုက်ခိုက်ခံရပြီး ထိခိုက်ဒဏ်ရာရသူများ ဆေးကုသဖို့ အခက်အခဲရှိနေ

BBM - ဖေဖော်ဝါရီ ၁၇
သတင်း - နိုင်နိုင်

ရခိုင်ပြည်၊ ကျောက်ဖြူမြို့နယ်မှာ စစ်ကောင်စီတပ်က လေကြောင်းတိုက်ခိုက်မှုကြောင့် ထိခိုက်ဒဏ်ရာရရှိတဲ့သူတွေမှာ ဆေးကုသမှုခံယူဖို့အတွက် ငွေကြေးအခက်အခဲတွေ ရှိနေကြတယ်လို့ ကျောက်ဖြူမြို့နယ်ရှိ လူမှုကူညီရေးဆောင်ရွက်နေသူတွေဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၅ ရက်၊ ညနေပိုင်းမှာ စစ်ကောင်စီတပ်က ကျောက်ဖြူမြို့နယ်၊ ဝမျှောင်ကျေးရွာနဲ့ ငအုပ်ကျေးရွာကို ဒရုန်းနဲ့ဗုံးကြဲချတိုက်ခိုက်ခဲ့တာကြောင့် ကလေးငယ် ၁ ဦးနဲ့ အမျိုးသမီး ၁ ဦးတို့ သေဆုံးခဲ့ရတာလည်း ဖြစ်ပါတယ်။

သေဆုံးသွားတဲ့သူတွေမှာ ကျောက်ဖြူမြို့နယ်၊ ဝမျှောင်ကျေးရွာမှ မခင်ထက်ထက်စိုး (၇ နှစ်)နဲ့ ဒေါ်ခင်ဆန်းဝေ (၄၃ နှစ်) တို့ဖြစ်ပြီး ထိခိုက်ဒဏ်ရာရရှိတဲ့သူတွေမှာ ဝမျှောင်ကျေးရွာနဲ့ ငအုပ်ကျေးရွာမှ ၁၀ ဦး ရှိတယ်လို့ ကျောက်ဖြူမြို့နယ်မှ လူမှုကူညီကယ်ဆယ်ရေးလုပ်နေသူတစ်ဦးက BBM ကို ပြောပါတယ်။

"လက်ရှိအခြေအနေက ဒဏ်ရာပြင်းထန်တဲ့ လူနာ ၃ ဦး ရှိပါတယ်၊ သူတို့ကိုတော့ ဆေးကုသမှု အဆင်အပြေဆုံးနေရာကို လွှဲပြောင်းပေးထားရပါတယ်၊ လက်ရှိ ဆေးကုသနေတာဆိုရင် ၁၀ ယောက်ပါ၊ ဆုံးသွားတာကကျရင် ၂ ယောက်ပါ၊ ဆေးဝါးကုသဖို့အတွက်တော့ ငွေးကြေး အခက်အခဲတွေဖြစ်နေကြပါတယ်" လို့ သူကဆက်ပြောပါတယ်။

အလားတူ စစ်ကောင်စီတပ်ဟာ ပြီးခဲ့တဲ့ ဖေဖော်ဝါရီလ ၁၅ ရက်နေ့အတွင်းမှာပဲ ကျောက်ဖြူမြို့နယ်၊ မင်းပြင်းကျေးရွာကိုလည်း လေကြောင်းကနေ ဂျက်ဖိုက်တာနဲ့ ဗုံးကြဲချတိုက်ခိုက်ခဲ့တာကြောင့် နေအိမ်တစ်ချို့ပျက်စီးမှုတွေရှိခဲ့တယ်လို့ ကျောက်ဖြူဒေသခံတွေဆီက သိရပါတယ်။

ကျောက်ဖြူမြို့နယ်မှာ စစ်ကောင်စီတပ်နဲ့ အာရက္ခတပ်တော် AA တို့ဟာ ဓညဝတီရေတပ်ဌာနချုပ်ရှိတဲ့ သစ်ပုတ်တောင်လမ်းတစ်လျှောက်မှာ တိုက်ပွဲတွေဖြစ်ပွားနေကြတာဖြစ်ပြီး အနီးအနားရှိကျေးရွာတွေက ဒေသခံထောင်ချီမှာ ဘေးလွတ်ရာနေရာတွေကို စစ်ဘေးတိမ်းရှောင်နေကြရတာလည်း ဖြစ်ပါတယ်။

စစ်ကောင်စီတပ်ဟာ ကျောက်ဖြူတိုက်ပွဲအတွင်းမှာ လေကြောင်း၊ ရေကြောင်းနဲ့ လက်နက်ကြီးပစ်ကူတွေ အဆက်မပြတ်အသုံးပြုနေတာကြောင့် ဒေသခံတွေဟာ လက်နက်ကြီးအန္တရာယ်တွေကို နေစဥ်နဲ့အမျှ ရင်ဆိုင်နေကြရပါတယ်။

"ကျောက်ဖြူမြို့နယ်ရှိ ကျေးရွာတွေက ဒေသခံတွေမှာ လက်နက်ကြီးအန္တရာယ်တွေ နိစ္စဓူဝ ကြုံနေရပါတယ်၊ အခုနောက်ပိုင်း စစ်ကောင်စီတပ်က အရပ်သားတွေကိုပဲ ပစ်မှတ်ထားတိုက်ခိုက်လာနေပါတယ်" လို့ ကျောက်ဖြူဒေသခံတစ်ဦးက BBM ကို ပြောပါတယ်။

ပြီးခဲ့တဲ့ ဖေဖော်ဝါရီလ ၁၄ ရက်ကလည်း ကျောက်ဖြူမြို့နယ်၊ ကျောက်ကလေးကျေးရွာ အောက်ဘက်ရှိ စစ်ကောင်စီရေတပ်သင်္ဘောကနေ ကျောက်ပြောက်ကျေးရွာဘက်ကို လက်နက်ကြီး ပစ်ခတ်တိုက်ခိုက်ခဲ့တာကြောင့် ကျေးရွာနေ ဒေါ်စောဖြူမ (၈၀) နှစ်ဟာ ကျည်ထိမှန်သေဆုံးခဲ့ပါတယ်။

၂၀၂၆ ခုနှစ်အတွင်းမှာ ရခိုင်ဒေသကို စစ်ကောင်စီ လက်နက်ကြီး၊ လေကြောင်းတွေနဲ့ ပစ်ခတ်တိုက်ခိုက်မှုကြောင့် အရပ်သားပြည်သူတွေနဲ့ စစ်သုံ့ပန်း သေဆုံးသူဦးရေ ၃၀ ကျော်အထိရှိလာတဲ့အပြင် ထိခိုက်ဒဏ်ရာရရှိသူ ၅၀ ကျော် ရှိလာပြီ ဖြစ်ပါတယ်။

ပုံစာ - ဇင်ချောင်းလူငယ်ပရဟိတအသင်း

#bbmnews #bbm #bbmtv #kyaukphyu #airstrike
https://www.facebook.com/share/p/1B4GbDQEcY/