PNO တပ်ဖွဲ့ဝင် အသက်မပြည့်သေးသူ သေဆုံးမှုအပြီး အသုဘတာဝန်ကို ရွာသားများအား ခိုင်းစေ

BBM -ဖေဖော်ဝါရီ ၁၄
သတင်း - ခွန်း

ရှမ်းပြည်နယ်တောင်ပိုင်း၊ မောက်မယ်မြို့နယ်အတွင်း ဖြစ်ပွားခဲ့တဲ့ တိုက်ပွဲမှာ PNOပြည်သူ့စစ် တပ်ဖွဲ့ဝင် တစ်ဦး သေဆုံးမှုအပြီး အသုဘပွဲအခမ်းအနားကို ရွာသားများအား တာဝန်ပေး လုပ်ဆောင်ခိုင်းစေခဲ့တယ်လို့ ရွာသားများထံမှသိရပါတယ်။

သေဆုံးသွားတဲ့ တပ်သားက ဖေဖော်ဝါရီ ၇ ရက်နေ့မှာ ဖြစ်ပွားခဲ့တဲ့ တိုက်ပွဲအတွင်း သေဆုံးခဲ့တာဖြစ်ပြီး၊ ဟိုပုံးမြို့နယ် ခိုလှိုင်ကျေးရွာနေ အသက် ၁၆ နှစ်အရွယ် ခွန်‌အောင်ပန်း (ခ) ခွန်တဗွို့ ဖြစ်တယ်လို့ ဆိုပါတယ်။

ဒေသခံတစ်ဦးက “အသုဘကိစ္စ အားလုံးကို ရွာသားတွေကိုပဲ လုပ်ခိုင်းတာပါ။ အိမ်မှာ ကျန်ခဲ့တဲ့ သူ့မိသားစုကိုလည်း သနားပါတယ်။ ရွာက တစ်အိမ်ကို ၅,၀၀၀ ကျပ်စီ ကောက်ပြီး အသုဘပွဲ လုပ်ပေးခဲ့ရပါတယ်။ အခုကာလက အလုပ်အကိုင်လည်း မရှိကြတော့ တော်တော်ခက်ခဲကြပါတယ်” လို့ ပြောပါတယ်။

ဒါ့အပြင် သေဆုံးသွားတဲ့ တပ်သားက အသက် ၁၆ နှစ်သာ ရှိသေးပေမယ့် အုပ်ချုပ်ရေးမှု ဘက်က အသက်ကို ၁၈ နှစ်လို့ လိမ်ရေးပေးဖို့ ဖိအားပေး ခိုင်းစေခဲ့တယ်လို့ ဒေသခံတွေက ပြောပါတယ်။

“တကယ်တော့ အဲဒီကလေးက အသက် ၁၆ နှစ်ပဲ ရှိသေးတာပါ။ ဒါကို အသက် ၁၈ လို့ လိမ်ရေးခိုင်းတယ်။ မရေးရင် ပြဿနာတက်မယ်ဆိုပြီး ခြိမ်းခြောက်လာတော့ ရွာသားတွေလည်း ကြောက်ပြီး လိုက်ရေးပေးခဲ့ရတယ်” လို့ အဆိုပါ ဒေသခံက ဆက်ပြောပါတယ်။

ခွန်အောင်ပန်းရဲ့ ဈာပနအခမ်းအနားကိုတော့ ဖေဖော်ဝါရီ ၉ ရက်နေ့မှာ ခိုလှိုင်ကျေးရွာမှာ ပြုလုပ်ပေးခဲ့ပြီး မီးသဂြိုလ်ခဲ့တယ်လို့ သိရပါတယ်။

ဒီဖြစ်ရပ်နဲ့ ပတ်သက်ပြီး ဒေသခံတွေက အသက်မပြည့်သေးသူတွေကို စစ်ရေးလုပ်ငန်းတွေမှာ အသုံးချနေတာ၊ သေဆုံးမှုအပြီး တာဝန်တွေကို ပြည်သူတွေထံ အတင်းအကျပ် ချထားနေတာတွေဟာ မသင့်တော်ဘူးလို့ ဒေသခံတွေက ဝေဖန်ပြောဆိုနေကြပါတယ်။

PNO ပြည်သူ့စစ်တပ်က ပအိုဝ်းဒေသရှိ လူငယ်တွေကို တပ်ထဲဝင်ဖို့ အတင်းအဓမ္မ စစ်သားစုဆောင်းနေပြီး၊ စုဆောင်းပြီးတာနဲ့ ရှေ့တန်းကို ပို့နေတယ်လို့ ဒေသခံ‌တွေက ပြောပါတယ်။

ပုံ-ပေးပို့

#bnews #bbm #bbmtv #PNO #shan
https://www.facebook.com/share/p/1C6zgAzYJS/

ရာမညမွန်တပ်တော်က အခြေခံစစ်ပညာသင်တန်းအမှတ်စဥ် (၆)သင်တန်းဆင်းပွဲပြုလုပ်

BBM - ဖေဖော်ဝါရီ ၁၄
သတင်း - ကိုဘုဏ်း

ရာမညမွန်တပ်တော်က ဦးစီးပြုလုပ်ခဲ့ တဲ့ အခြေခံစစ်ပညာသင်တန်း အမှတ်စဥ် ၆ကို လွတ်မြောက်နယ်မြေတစ်နေရာ၌ ကျင်းပြုလုပ်ခဲ့တယ်လို့ RMA ကထုတ်ပြန်ထားပါတယ်။

သင်တန်းကာလအတွင်းအခက်အခဲများကိုကျော်ဖြတ်ပြီး ထူးချွန်အောင်စွမိးဆောင်နိုင်ခဲ့ကြတဲ့အတွက် သင်တန်းသားများကို ဂုဏ်ပြုလွှာများလည်းချီးမြှင့်ပေးအပ်ခဲ့တယ်လို့သိရပါတယ်။

အဆိုပါသင်တန်းဆင်းပွဲကို မွန်ပြည်သစ်ပါတီ (စစ်အာရှင်စနစ်တိုက်ဖျက်ရေး)ရာမညမွန်တပ်တော်(NMSP(AD)/RMA)ဥက္ကဌနိုင်ဇေယျ၊ဗိုလ်ချုပ်စလွန်းထော်၊ဒုဗိုလ်မူးကြီးနိုင်မာဃ၊ဒုကျောင်းအုပ် ဗိုလ်ချမ်းထော်၊ပြည်သူ့ကာကွယ်ရေးတပ်မတော် ၊နည်းဗျူဟာ ၃၃ ဗျူဟာမူး စောဒါးကို၊မွန်ပြည်တော်လှန်ရေးတပ် (MSRF)တပ်ရင်းမူး ဗိုလ်မူးကြီးနိုင်ဒရာဂွန်တို့တက်ရောက်ခဲ့ကြပြီး RMA ဥက္ကဌ နိုင်ဇေယျ၊ဗိုလ်ချုပ်စလွန်းထော်၊ဒုဗိုလ်မူးကြီးနိုင်မာဃ၊ဒုကျောင်းအုပ် ဗိုလ်ချမ်းထော်တို့မှ အားပေးအမှာစကားများပြောကြားခဲ့တယ်လို့ ထုတ်ပြန်ကြေငြာထားပါတယ်။

Photo - RMA

#bbmnews #bbm #bbmtv #RMA #pdf
https://www.facebook.com/share/p/1BMpDhSXuD/

ယနေ့ကစားမယ့် ဆော်ဒီလိဂ်ပွဲမှာ ရော်နယ်လ်ဒို ပြန်ကစားမယ်

BBM - ဖေဖော်ဝါရီ ၁၄
သတင်း - David

Al-Nassr အသင်းခေါင်းဆောင် ခရစ္စတီယာနိုရော်နယ်လ်ဒိုဟာ ဆော်ဒီလိဂ်ပြိုင်ပွဲအပေါ် သပိတ်မှောက်ထားမှုကို ရပ်တန့်ပြီး ယနေ့ကစားမယ့်
Al-Fateh နဲ့ပွဲမှာ ပြန်ကစားဖို့ရှိနေပါတယ်။

ရော်နယ်လ်ဒို(၄၁ နှစ်)ဟာ Al-Fatehနဲ့ အဝေးကွင်းခရီးစဉ်ကို အသင်းဖော်တွေနဲ့အတူ လိုက်ပါလာတာဖြစ်တယ်။

ရော်နယ်လ်ဒိုဟာ အသင်းပိုင်ရှင်ကုမ္ပဏီ Saudi Public Investment Fund (PIF)ရဲ့ အပြောင်းအရွှေ့မူဝါဒအပေါ် မကျေနပ်လို့ ဆန္ဒပြတဲ့
အနေနဲ့ အသင်းပွဲစဉ် သုံးပွဲကို ဝင်ရောက်မကစားခဲ့ပါဘူး။

ဆော်ဒီလိဂ်မှာ Al-Hilal၊ Al-Nassr၊ Al-Ittihadနဲ့ Al-Ahli စတဲ့ ထိပ်သီးလေးသင်းကို PIF က ၇၅ ရာခိုင်နှုန်းအထိ ပိုင်ဆိုင်တာပါ။

၎င်းက ရီးရဲလ်အသင်းဖော်ဟောင်း ဘန်ဇီမာ Al-Ittihad အသင်းကနေ ချန်ပီယံပြိုင်ဘက် Al-Hilal အသင်းထံ ရောက်ရှိသွားခဲ့တဲ့အပေါ်
ဒေါသပေါက်ကွဲခဲ့ပါတယ်။

ရော်နယ်လ်ဒိုက ဆော်ဒီလိဂ်ကို ၎င်းရောက်ရှိလာတဲ့ ၂၀၂၂-၂၃ ရာသီကတည်းက Al-Hilalရဲ့ အပြောင်းအရွှေ့အသုံးစရိတ်ဟာ Al-Nassrထက်
ပေါင် သန်း ၁၈၀ လောက်ပိုများနေကြောင်း ထောက်ပြခဲ့ပါတယ်။

ရော်နယ်လ်ဒိုအနေနဲ့ ဆော်ဒီလိဂ်မှာ တစ်ပတ် ပေါင် ငါးသိန်းနီးပါး ရရှိနေပြီး Al-Nassr အသင်းနဲ့ ၂၀၂၇ ခုနှစ် နွေရာသီအထိ စာချုပ်သက်တမ်း
ရှိနေပါတယ်။

Photo - Social Media

#bbmnews #bbm #bbmtv #sportsnews #Ronaldo
https://www.facebook.com/share/p/1CWkbyxidx/

ဖားကန့်မှာ ကျည်ဆော့ရာမှ ပေါက်ကွဲမှုဖြစ်ပွားပြီး ကလေး ၁ ဦးသေဆုံးကာ ၂ ဦး ပြင်းထန်ဒဏ်ရာရ

BBM - ဖေဖော်ဝါရီ ၁၄
သတင်း - ကိုအိုက်

ကချင်ပြည်နယ်၊ ဖားကန့်မြို့နယ်၊ တောင်ပြိုကျေးရွာမှာ မပေါက်ကွဲသေးတဲ့ လက်နက်ကြီးကျည်ကို ကလေးငယ်တွေက ကောက်ယူဆော့ကစားရာမှ ပေါက်ကွဲမှုဖြစ်ပွားပြီး တစ်ဦး သေဆုံးကာ နှစ်ဦးမှာ ဒဏ်ရာပြင်းထန်စွာရရှိခဲ့တယ်လို့ ဒေသခံတွေဆီက သိရပါတယ်။

မနေ့က ဖေဖော်ဝါရီလ ၁၃ ရက်၊ မနက်ပိုင်းမှာ ဖားကန့်မြို့နယ်၊ တောင်ပြိုကျေးရွာရှိ မှော်မောင်းချောင်းဘေး အမှိုက်ပုံအနီး မပေါက်ကွဲသေးတဲ့ လက်နက်ကြီးကျည်တစ်လုံးကို အသက် ၈ နှစ်အရွယ် ကလေးငယ်တွေက တွေ့ရှိခဲ့ကြတာဖြစ်ပါတယ်။

"မှော်မောင်းချောင်းဘေး အမှိုက်ပုံအနားက မပေါက်ကွဲသေးတဲ့ ကျည်ကို ကလေးတွေက ကောက်ရပြီး ကျောက်ခဲပေါ်တင်ပြီး ထုရိုက်ဆော့ကစားရင်း ပေါက်ကွဲသွားတာပါ"လို့ ဖားကန့်ဒေသခံတစ်ဦးက BBM ကို ပြောပါတယ်။

အဲဒီပေါက်ကွဲမှုကြောင့် အသက် ၈ နှစ်အရွယ် ယောကျာ်းလေး တစ်ဦးမှာ ပွဲချင်းပြီး သေဆုံးသလို မိန်းကလေးငယ်တစ်ဦးနဲ့ ယောက်ျားလေးတစ်ဦးမှာ ပြင်းထန်ဒဏ်ရာနဲ့ မြစ်ကြီးနား ဆေးရုံကို အရေးပေါ်ပို့ဆောင်ထားတယ်လို့ သိရပါတယ်။

"ကလေးတစ်ယောက်ကတော့ ပွဲချင်းပြီး ဆုံးသွားတယ်၊ နှစ်ယောက်ကိုကတော့ ပြင်းထန်ဒဏ်ရာနဲ့ မြစ်ကြီးနား ပို့ထားရတယ်၊ တခြားတယောက်တော့ မစိုးရိမ်ရတဲ့ ဒဏ်ရာရတယ်"လို့ ဖားကန့်ဒေသခံတစ်ဦးက BBM ကို ပြောပါတယ်။

ပြီးခဲ့တဲ့ ဖေဖော်ဝါရီလ ၁၂ ရက်ကလည်း ဖားကန့်မြို့ မှော်ဝမ်းရပ်ကွက် လမ်းဘေးမှာ ထောင်ထားတဲ့ မြေမြှုပ်မိုင်း နင်းမိပြီး သင်းထောက်ဆရာတစ်ဦး ဒဏ်ရာရရှိခဲ့ပါတယ်။

လက်ရှိမှာ စစ်ရေးပဋိပက္ခများအတွင်း မပေါက်ကွဲသေးတဲ့ လက်နက်ကြီးကျည်တွေနဲ့ မြေမြှုပ်မိုင်းတွေ ပြည်သူများအတွက် ကြီးမားသောအန္တရာယ် ဖြစ်နေပြီး မိဘတွေအနေနဲ့ မိမိတို့ရဲ့ ကလေးငယ်တွေကို သံသယဖြစ်ဖွယ် လက်နက်ပစ္စည်း၊ စစ်ကျန်ခဲယမ်းတွေကို မကိုင်တွယ်၊ မဆော့ကစားကြဖို့ အထူး အသိပညာပေးကြဖို့လည်း လိုအပ်တယ်လို့ တိုက်တွန်းနှိုးဆော်ထားပါတယ်။

Photo - Social Mediahttps://www.facebook.com/share/p/171TsY5CiF/

ဖလမ်းမြို့နယ်မှာ စစ်ကောင်စီ စခန်းတစ်ခုကို သိမ်းပိုက်ရရှိပြီး စစ်သုံ့ပန်း နှစ်ဦး ဖမ်းမိ

BBM - ဖေဖော်ဝါရီ ၁၄
သတင်း - ကိုအိုက်

ချင်းပြည်နယ်၊ ဖလမ်းမြို့နယ် တိုက်ပွဲမှာ စစ်ကောင်စီတပ်ရဲ့ စခန်းကုန်းတစ်ခုကို ချင်းတော်လှန်ရေး ပူးပေါင်းတပ်တွေက သိမ်းပိုက်ရရှိပြီး စစ်သုံ့ပန်းနှစ်ဦး ဖမ်းဆီးရမိခဲ့တယ်လို့ ရှေ့တန်းစစ်ရေးသတင်းရင်းမြစ်က BBM ကို ပြောပါတယ်။

ဒီနေ့ ဖေဖော်ဝါရီ ၁၄ ရက်၊ မနက် ၁ နာရီဝန်းကျင်မှာ သိုင်းငင်းမှ ဖလမ်းမြို့ကို စစ်ကူပေးဖို့ ချီတက်လာတဲ့ စစ်ကောင်စီ စစ်ကြောင်းကို Tuphei နဲ့ Lumbang ကျေးရွာအကြားမှာ ချင်းတော်လှန်ရေးပူးပေါင်းတပ်တွေက ကြားဖြတ်တိုက်ခိုက်ခဲ့တာပါ။

"သိုင်းငင်းဘက်ကနေ ဖလမ်းမြို့ကို ထွက်လာတဲ့ စစ်ကူစစ်ကြောင်းဟာ Tuphei နဲ့ Lumhang ကြားမှာ ခြေကုတ်နေရာယူထားတဲ့ စခန်းတခုရှိတယ်၊ အဲဒီစခန်းကို မနေ့ည သန်ခေါင်ယံ အချိန်လောက်မှာ သွားတိုက်တာပါ၊ စခန်းကုန်းထိ ဝင်တိုက်နိုင်ခဲ့ပါတယ်"လို့ ရှေ့တန်းစစ်ရေးသတင်းအရစ်မြစ်က BBM ကို ပြောပါတယ်။

အဲဒီစခန်းသိမ်းတိုက်ပွဲမှာ စစ်ကောင်စီဘက်မှ အများအပြားထိခိုက်သေဆုံးခဲ့သလို စစ်သုံ့ပန်းနှစ်ဦးကို အရှင်ဖမ်းဆီးရမိပြီး သေနတ်မျိုးစုံ (၁၁) လက် သိမ်းဆည်းရမိခဲ့ပါတယ်။

ဒါ့အပြင် ဖေဖော်ဝါရီလ ၁၃ ရက်၊ ညကလည်း ဖလမ်းမြို့နယ်၊ မဏိပူရ်မြစ်ဘေးမှာ ချင်းပူးပေါင်းတပ်ဖွဲ့တွေက နယ်မြေရှင်းလင်းရေး ပြုလုပ်ခဲ့ရာ စစ်ကောင်စီဘက်မှ ဝှက်ထားခဲ့တဲ့ လက်နက်ကြီးကျည် အများအပြား တွေ့ရှိခဲ့ပါတယ်။

"ညက မဏိပူရ်မြစ်ကမ်းဘေးမှာ တပ်ဖွဲ့တွေ နယ်မြေရှင်းလင်းရေး လုပ်ငန်းတွေ ဆောင်ရွက်နေပါတယ်၊ အဲမှာ စစ်ကောင်စီတပ်ဖွဲ့ဝင်တွေ ဖွက်ထားတဲ့ လက်နက်ခဲယမ်းမျိုးစုံကို သိမ်းဆည်းရမိတာရှိတယ်"လို့ ရှေ့တန်းစစ်ရေးသတင်းအရစ်မြစ်က BBM ကို ပြောပါတယ်။

သိမ်းဆည်းရမိသော ခဲယမ်းများမှာ ၁၂၂ မမ ရှော့တိုက်ဒုံးတွေ၊ ၁၂၀ မမ၊ ၈၁ မမ၊ RPG ဗုံးသီးတွေနဲ့ ဒရုန်းဗုံးသီးတွေ ဖြစ်ပါတယ်။

လတ်တလောမှာ ဖလမ်းမြို့နယ်အတွင်း စစ်ရေးအခြေအနေ ဆက်လက်တင်းမာနေဆဲဖြစ်ပြီး စစ်ကောင်စီက ကလေးမြို့ကနေ အင်အားတွေဖြည့်တင်းနေတယ်လို့ သိရပါတယ်။

#bbmnews #bbm #bbmtv #phalam #chin
https://www.facebook.com/share/p/17ziuqAcXE/

ကမ္မမြို့မှာ စစ်ကောင်စီစစ်ကြောင်းကို တိုက်ခိုက်ခဲ့ရာ စစ်သားနဲ့ ပျူ ၃ ဦးသေဆုံး

BBM - ဖေဖော်ဝါရီ ၁၄
သတင်း - ခက်ဆစ်

မကွေးတိုင်း၊ ပခုက္ကူခရိုင်၊ ကမ္မမြို့နယ်အတွင်း စစ်ကြောင်းထိုးနေတဲ့ စစ်ကောင်စီစစ်သားနဲ့ ပျူ အင်အား ၂၅၀ ခန့်ကို တော်လှန်ရေးအင်အားစုတွေက တိုက်ခိုက်ခဲ့ရာ စစ်ကောင်စီတပ်သားနဲ့ ပျူ ၃ ဦးသေဆုံးခဲ့တယ်လို့ ဧရာဒေါင်းပြည်သူ့ကာကွယ်ရေးအဖွဲ့ ထံမှ သိရပါတယ်။

ဖေဖော်ဝါရီလ ၁၁ ရက်၊ မနက် ၆ နာရီခန့်မှာ ကမ္မရဲစခန်းမှ ထွက်လာတဲ့ စစ်ကောင်စီစစ်ကြောင်းကို ကမ္မစျေးထဲမှာ ပြည်သူပိုင်ပစ္စည်းတွေ ခိုးယူနေစဉ်မှာ တော်လှန်ရေးအင်အားစုတွေက တိုက်ခိုက်ခဲ့ကြတာ ဖြစ်ပါတယ်။

"မြိုင်တို့ ကမ္မတို့ ပတ်ချာလည် စစ်ကြောင်းပတ်ထိုးနေတဲ့ အင်အား ၂၅၀ ဝန်းကျင်စစ်ကြောင်းကို ကျနော်တို့ ကမ္မရဲစခန်းရဲ့မှ အရှေ့ဘက်နား စျေးနားမှာ တိုက်ပွဲစဖြစ်ခဲ့တာဗျ၊ သူတို့က စျေးကနေ အရှေ့ဘက်ကို ထွက်အလာမှာ ကျနော်တို့က အသင့်စောင့်ပြီး တိုက်ပွဲဖြစ်တာဗျ" လို့ ဧရာဒေါင်းတပ်ဖွဲ့မှ သတင်းနဲ့ ပြန်ကြားရေးတာဝန်ခံ ကိုရှိန်းက BBM ကိုပြောပါတယ်။

တိုက်ပွဲကြာချိန်ဟာ ၄၅ မိနစ်ခန့်ကြာမြင့်ခဲ့ပြီး တိုက်ခိုက်မှုအတွင်း စစ်ကောင်စီဘက်မှ စစ်သားနဲ့ ပျူ ၃ ဦး နေရာမှာတင် ပွဲချင်းပြီးသေဆုံးပြီး အများအပြားထိခိုက်ဒဏ်ရာရခဲ့တယ်လို့ ဆိုပါတယ်။

"ကျနော်တို့ တပ်တွင်းသတင်းတွေအရတော့ စစ်ခွေးဘက်က ၃ ယောက်နေရာတင်ပွဲချင်းပြီးသေတယ်တဲ့ဗျ၊ ထိခိုက်ဒဏ်ရာရအများအပြားနဲ့ ညောင်ဂျစ်ပင်ပျူစခန်းကို ပြန်လည်ခေါ်ဆောင်သွားတယ်လို့ သိရတယ်ဗျ၊ ကျနော်တို့ တော်လှန်ရေးတပ်ဖွဲ့တွေဘက်က ထိခိုက်ဒဏ်ရာရ မရှိဘူးဗျ" လို့ သူက ဆက်ပြောပါတယ်။

ဧရာဒေါင်းပြည်သူ့ကာကွယ်ရေးတပ်ဖွဲ့အနေနဲ့ မိတ်ဖက်အဖွဲ့အစည်းများစွာနဲ့ ဘုံရန်သူကို အတူတကွ ရဲဘော်ရဲဘက်စိတ်နဲ့ တိုက်ခိုက်သွားမှာ ဖြစ်ကြောင်းအသိပေးထားပါတယ်။

အဆိုပါတိုက်ခိုက်မှုကို ဧရာဒေါင်း‌ပြည်သူ့ကာကွယ်ရေးတပ်ဖွဲ့၊ ABSDF အမှတ်(၃)စစ်ကြောင်း၊ ကံမ္မတပ်ပေါင်းစု၊ PC စစ်ကြောင်း၊ မကွေး PDF ၊ မြို့နယ်ပြည်သူ့လုံခြုံရေးအင်အားစုနဲ့ SAF တို့က ပူးပေါင်းတိုက်ခိုက်ခဲ့ပြီး တော်လှန်ရေးအင်အားစုတွေဘက်မှာ အထိအခိုက်မရှိခဲ့ဘူးလို့ သိရပါတယ်။

လက်ရှိမှာ စစ်ကောင်စီစစ်ကြောင်းက ‌ညောင်ဂျစ်ပင်ပျူစခန်းမှာ အင်အား ထပ်မံဖြည့်တင်းနေပြီး နောက်တကြိမ် စစ်ကြောင်းထိုးဖို့ ရှိနေတဲ့အတွက် ဒေသခံပြည်သူတွေအနေနဲ့ စစ်ကြောင်းနဲ့ဝေးရာမှာ နေထိုင်ကြဖို့ တိုက်တွန်းထားပါတယ်။

Video - Ayar Daung

#bbmnews #bbm #bbmtv #AyarDaung #drone
https://www.facebook.com/share/v/17VZggVFq9/

ပွန်ချောင်းအနီး တိုက်ပွဲဖြစ်ပွားတဲ့ နှစ်ရက်အတွင်း PNO ဖက်က စစ်သား ၁၀၀ ကျော် သေဆုံး

BBM - ဖေဖော်ဝါရီ ၁၄
သတင်း - ခွန်း

ရှမ်းပြည်နယ်တောင်ပိုင်း၊ ဆီဆိုင်မြို့နယ်၊ နောင်ထောဝ်အရှေ့ဘက် ပွန်ချောင်းအနီးမှာ ဖြစ်ပွားခဲ့တဲ့ တိုက်ပွဲတွေကြောင့် PNO ပြည်သူ့စစ်ဖက်က စစ်သား ၁၀၀ ကျော် သေဆုံးခဲ့တယ်လို့ စစ်ရေးသတင်းရင်းမြစ်တွေက ပြောပါတယ်။

ဒီတိုက်ပွဲတွေဟာ ဖေဖော်ဝါရီ ၁၂ ရက်နဲ့ ၁၃ ရက် နှစ်ရက်အတွင်း ဖြစ်ပွားခဲ့တာဖြစ်ပြီး၊ သေဆုံးသူတွေ များလွန်းတဲ့အတွက် PNO ပြည်သူ့စစ်က အလောင်းတွေကို မှန်လုံကားကြီး နှစ်စီးနဲ့ သယ်ပြန်သွားခဲ့တယ်လို့ သိရပါတယ်။

“မှန်လုံကား နှစ်စီးလုံး အလောင်းတွေနဲ့ ပြည့်နေတယ်။ အပွင့်ကားနဲ့ သယ်ရင် ပြည်သူတွေ မြင်မှာ စိုးလို့ အခုလို မှန်လုံကား အသုံးပြုခဲ့တာပါ။ " လို့ ဒေသခံသတင်းရင်းမြစ်တစ်ဦးက BBM ကိုပြောပါတယ်။

ဒါ့အပြင် ဒဏ်ရာရ စစ်သားတွေကိုတော့ PNO ဘက်က ရွာသားတွေကို မရပ်မနား ထမ်းခိုင်းခဲ့ရပြီး စစ်မြေပြင်ကို ကျော်လွန်မှ ကားနဲ့တင်ပြီး အောင်ပန်းမြို့ စစ်ဆေးရုံကို ပို့ခဲ့တယ်လို့လည်း အဆိုပါသတင်းရင်းမြစ်က ဆက်ပြောပါတယ်။

လက်ရှိအချိန်မှာတော့ PNO ပြည်သူ့စစ်က ပွန်ချောင်းတစ်လျှောက် စစ်ကြောင်း ဆက်ထိုးနေဆဲဖြစ်ပြီး နေ့စဉ်လိုလို တိုက်ပွဲတွေ ဖြစ်နေတယ်လို့ပအိုဝ်းအမျိုးသားလွှတ်မြောက်ရေးတပ်မတော် PNLA ပြောရေးဆိုခွင့်ရှိသူ ခွန်ရိန်းယံက ပြောပါတယ်။

“အခုတစ်လော နေ့တိုင်းလိုလို တိုက်ပွဲဖြစ်နေတယ်။ PNO ဖက်က စစ်ကြောင်းတွေက တိုးလိုက် ဆုတ်လိုက် လုပ်နေတာ။ ဒါ့အပြင် လူနေကျေးရွာတွေကိုပါ ဒရုန်းနဲ့ ဗုံးကြဲနေတယ်” လို့ ဆိုပါတယ်။

ဒါ့အပြင် PNO ပြည်သူ့စစ်က တိုက်ပွဲမဖြစ်တဲ့ လူနေကျေးရွာတွေကိုပါ လက်နက်ကြီးနဲ့ ဒရုန်းတွေ အသုံးပြုပြီး တိုက်ခိုက်နေတဲ့အတွက် ကျေးရွာ ၈ ရွာက ဒေသခံတွေဟာ လက်ရှိမှာ ဘေးကင်းရာကို စစ်ဘေးတိမ်းရှောင်နေရတယ်လို့လည်း သိရပါတယ်။

#bbm #bbmnews #ဆီဆိုင် #PNO #UpdateNews
https://www.facebook.com/share/p/1NLH4JR3X1/

တောင်သာမြို့နယ်၊ ပဲခင်းကျော်ရွာကို စကစ စစ်ကြောင်း မီးဝင်ရှို့တဲ့အပြင် စစ်ရှောင်သွားတဲ့ ရွာသားတွေကိုလည်း မိုက်နဲ့အော်ခေါ်ကာ ခြိမ်းခြောက်

🟥အဆိုပါစစ်ကြောင်း ပြန်ထွက်သွားစဥ်မှာလည်း ရွာခံတွေရဲ့ တန်ဖိုးကြီးပစ္စည်းတွေကို (၁၂)ဘီးကားနဲ့ သယ်ဆောင်သွား

BBM-ဖေဖော်ဝါရီ၁၄
သတင်း-မင်းသော်

မန္တလေးတိုင်း၊ တောင်သာမြို့နယ်အတွင်းရှိ ပဲခင်းကျော်ရွာကို စစ်ကောင်စီစစ်ကြောင်းက မီးရှို့ဖျတ်ဆီးတာတွေ လုပ်တဲ့အပြင် စစ်ရှောင်နေတဲ့ ရွာခံတွေကိုလည်း မိုက်နဲ့အော်ခေါခြိမ်းခြောက် တာတွေ ပြုလုပ်ခဲ့တယ်လို့ ဒေသခံပြည်သူတွေရဲ့ ပြောဆိုချက်အရ သိရပါတယ်။

ပြီးခဲ့တဲ့ ဖေဖော်ဝါရီလ ၁၂ ရက်နေ့ မနက်၁၁နာရီခွဲလောက်က ပျုစောထီးတွေပါတဲ့ စစ်ကောင်စီစစ်ကြောင်းဟာ ပဲခင်းကျော်ကျေးရွာကို ဝင်ရောက်စီးနင်းတဲ့အပြင် အဆိုပါကျေးရွာအတွင်းရှိ ဘုန်းကြီးကျောင်းမှာ ပုန်းခိုနေတဲ့ ပြည်သူ(၂၀)ကျော်ကိုလည်း ဓားစာခံအဖြစ် ဖမ်းဆီးတာတွေ ပြုလုပ်ခဲ့တယ်လို့ သိရပါတယ်။

အဲ့ဒီနောက် ဖေဖော်ဝါရီလ ၁၂ ရက်နေ့နဲ့ ၁၃ ရက်နေ့ (၂)ရက်ဆက်တိုက် ကျေးရွာအတွင်း လှည့်လည်ကာ ပြည်သူပိုင်နေအိမ်တွေကို မီးရှို့ဖျတ်ဆီးတာတွေ ပြုလုပ်ခဲ့တဲ့အပြင် ၎င်းတို့စစ်ကြောင်းကြောင့် ထွက်ပြေးတိမ်းရှောင်သွားကြတဲ့ ရွာခံတွေကိုလည်း ဘုန်းကြီးကျောင်းမှ အသံချဲ့စက်ဖြင့် အော်ခေါ်ခြိမ်းခြောက်တာတွေ၊ ကြိမ်းမောင်းတာတွေကို ပြုလုပ်ခဲ့တယ်လို့ ဒေသခံတစ်ဦးက BBM ကိုပြောပါတယ်။

"ပဲခင်းကျော်ရွာကို စစ်တပ်က ၁၂ ရက်နေ့ကတည်းက ဝင်စီးပြီးမီးရှို့ခဲ့တာပါ၊ ပဲခင်းကျော် မြောက်ကျောင်း(ဘုန်းကြီးကျောင်း)ထဲဝင်ပုန်းနေတဲ့ ပြည်သူတွေကိုလည်း ဖမ်းတယ်ဗျ၊ အဲ့တာ(၂)ရက်လောက် မီးရှို့ပြီးတော့ ၁၃ ရက်နေ့ညက ဘုန်းကြီးကျောင်းက မိုက်နဲ့ပဲ အော်ပြီးစိန်ခေါ်နေတာ မျိုးစုံပဲဗျာ၊ မိုက်တဲ့ကောင်ထွက်ခဲ့ကော၊ တောနင်းပြီးရှာမယ်၊ တွေ့တာနဲ့သတ်မယ်ကော၊ အတော်မိုက်ရိုင်းတယ်"

ကျေးရွာအတွင်း အဆိုပါစစ်ကြောင်းဝင်ရောက်မီးရှို့နေစဥ် နောက်ထပ်လည်း စစ်ကောင်စီဘက်က အင်အားဖြည့်တင်းတာတွေ ပြုလုပ်ပြီး ရွာနီးစပ်ကို လုံခြုံရေးတင်းကြပ်ခဲ့တယ်လို့လည်း သိရပါတယ်။

ဒါ့အပြင် ကျေးရွာအတွင်းမီးရှို့ဖျတ်ဆီးစဥ် ပြည်သူပိုင်တန်ဖိုးကြီးပစ္စည်းများနဲ့ ရွာခံတွေစုဆောင်းထားတဲ့ အခြေခံစားသောက်ကုန် ဆန်၊ ဆီ၊ မြေပဲ တွေကို ၎င်းတို့စိတ်ကြိုက်ယူဆောင်သွားတာတွေရှိတယ်လို့လည်း အဆိုပါဒေသခံက ဆက်ပြောပါတယ်။

"ရွာမှာက ဆန်၊ဆီ၊ မြေပဲတွေအကုန်လုံးကို ဘုန်းကြီးကျောင်းမှာစုထားတာ၊ အဲ့တာတွေအကုန်လုံးလည်း ၁၂ ဘီးကားနဲ့တင်သွားတယ်၊ ရွာထဲက တန်ဖိုးကြီးပစ္စည်းတွေလည်း စိတ်ကြိုက်ယူသွားတယ်"

အဆိုပါစစ်ကြောင်းအနေနဲ့ ပဲခင်းကျော်ကျေးရွာအတွင်းမှ ဖေဖော်ဝါရီလ ၁၃ ရက် ညပိုင်းမှာ ပြန်လည်ထွက်ခွါသွားခဲ့တယ်လို့ သိရပြီး ထွက်ခွါမသွားမှီ ၎င်းတို့တပ်စွဲခဲ့တဲ့ ပဲခင်းကျော်ဘုန်းကြီးကျောင်းကိုပါ မီးတင်ရှို့ခဲ့သေးတယ်လို့လည်း ဆိုပါတယ်။

မြင်းခြံ၊နွားထိုးကြီးနဲ့ တောင်သာဘက်တစ်ကြော စကစ စစ်ကြောင်းတွေအနေနဲ့ အခုရက်ပိုင်းအတွင်း အင်အားအလွန်အကျွံဖြင့် စစ်ကြောင်းထိုးတာတွေ၊ ကျေးရွာတွေကို မီးရှို့တာတွေနဲ့ပတ်သတ်ပြီး မြေပြင်တော်လှန်ရေးအင်အားစုတွေကလည်း BBM ကိုအတည်ပြုပေးပြီး တိုက်ပွဲတွေ ပြင်းထန်နေတယ်လို့လည်း သိရပါတယ်။

Video-စကစ တပ်စွဲပြီး မီးရှို့ခဲ့တဲ့ ပဲခင်းကျော်မြောက်ကျောင်း(ဘုန်းကြီးကျောင်း)
https://www.facebook.com/share/v/1K4SF9CdVW/

ထရမ့်က အီရန်ကိုတိုက်ခိုက်ဖို့ စစ်ဆင်ရေး ပြင်ဆင်နေကြောင်း အမေရိကန်အရာရှိနှစ်ဦးပြောကြား

BBM - ဖေဖော်ဝါရီ ၁၄
သတင်း - Richard

အမေရိကန် သမ္မတဒေါ်နယ်ထရမ့်က အီရန်ကိုတိုက်ခိုက်ဖို့ စစ်ဆင်ရေး ပြင်ဆင်နေကြောင်း အမေရိကန်အရာရှိနှစ်ဦးက ရိုက်တာသတင်းဌာနကို ပြောကြားခဲ့ပါတယ်။

ဒါဟာ နှစ်နိုင်ငံအကြား အရင်ကထက် ပိုမိုပြင်းထန်နဲ့ ပဋိပက္ခတစ်ခု ဖြစ်လာနိုင်ပါတယ်။

အမည်မဖော်လိုတဲ့ အရာရှိတွေရဲ့ ထုတ်ဖော်ပြောဆိုမှုဟာ ထိလွယ်ရှလွယ် အနေအထားကြောင့် အမေရိကန်နဲ့ အီရန်အကြား လုပ်ဆောင်နေတဲ့ သံတမန်ရေးဆိုင်ရာ ဆက်ဆံရေးကို ‌အနှောင့်အယှက်ဖြစ်စေခဲ့ပါတယ်။

ပြီးခဲ့တဲ့အပတ်က အိုမန်မှာ အမေရိကန်နဲ့ အီရန်သံတမန်တွေက ဆွေးနွေးမှုတွေ ပြုလုပ်ခဲ့ကြပါတယ်။

ဖေဖော်ဝါရီလ ၁၃ရက်နေ့က အမေရိကန်အရာရှိတွေဟာ ပင်တဂွန်က အရှေ့အလယ်ပိုင်းကို လေယာဉ်တင်သင်္ဘောတစ်စင်း ထပ်မံစေလွှတ်ခဲ့တဲ့အပြင် တိုက်ခိုက်မှုတွေ ပြုလုပ်နိုင်ဖို့အတွက် တပ်ဖွဲ့ဝင်ထောင်ပေါင်းများစွာကိုလည်း ထပ်မံစေလွှတ်ခဲ့ကြောင်း ပြောကြားခဲ့ပါတယ်။

သောကြာနေ့က မြောက်ကယ်ရိုလိုင်းနားရှိ အခြေစိုက်စခန်းတစ်ခုမှာ ထရမ့်က အမေရိကန်တပ်တွေနဲ့ စကားပြောဆိုရာမှာ အီရန်နဲ့ "သဘောတူညီချက်တစ်ခု ပြုလုပ်ဖို့ ခက်ခဲခဲ့တယ်"လို့ ပြောကြားခဲ့ပါတယ်။

Reference-Reuters
https://www.facebook.com/share/p/1DVWoUuXf8/

ခမရ (၄၁၆)မှ စစ်ကောင်စီတပ်ဖွဲဝင် နှစ်ဦး မန္တလေးအထူးလူပ်ရှားတပ်မထံလက်နက်နဲ့အလင်းဝင်

BBM. - ဖေဖော်ဝါရီ ၁၄
သတင်း - ကိုဘုဏ်း

စစ်ကောင်စီ ရဲ့ ခမရ (၄၁၆)မှ စစ်သား နှစ်ဦးဟာ လက်နက်တွေနဲ့အတူ အန္တလေးအထူးလူပ်ရှားတပ်မထံ ဖေဖော်ဝါရီလ ၉ ရက်နေ့က အလင်း ဝင်လာခဲ့တယ်လို့ သိရပါတယ်။

အလင်းဝင်ရောက်လာတဲ့ စစ်ကောင်စီတပ်ဖွဲ့ဝင် နှစ်ဦးမှာ ပြည်သူ့စစ်မှု့ထမ်း အမှတ်စဥ် ၁၇မှ ဖြစ်ပြီး ၎င်းတို့နဲ့အတူ လက်နက်များလည်းပါခဲ့တယ်လို့သိရပါတယ်။

ယခုအချိန်မှာ အဆိုပါအလင်းဝင် စစ်ကောင်စီရဲ့ ပြည်သူ့စစ် နှစ်ဦးကို နွေးထွေးစွာကြိုဆိုထားပြီး ဂုဏ်ပြုချီးမြှင့်ငွေများပေးကာ ဘေးကင်းလုံခြုံရာနေရာမှာ ပိုဆောင်ထားကြောင်း မန္တလေး အထူးလူပ်ရှားတပ်မက သတင်းထုတ်ပြန်ထားပါတယ်။
https://www.facebook.com/share/p/1FRmkAfhtP/

ရုရှားက အတိုက်အခံခေါင်းဆောင် Alexei Navalny ကို ဖားအဆိပ်နဲ့ သတ်ဖြတ်ခဲ့ကြောင်း ဗြိတိန်ပြောကြား

BBM - ဖေဖော်ဝါရီ ၁၅
သတင်း - Richard

ရုရှားအတိုက်အခံခေါင်းဆောင် Alexei Naval you ဟာ ဖားတစ်ကောင်မှ ထုတ်လုပ်ထားတဲ့ အဆိပ်နဲ့ သေဆုံးခဲ့ကြောင်း UK နဲ့ ဥရောပမဟာမိတ်တွေက ပြောကြားခဲ့ပါတယ်။

ဆိုက်ဘေးရီးယား အကျဉ်းထောင်အတွင်း Navalny သေဆုံးပြီး နှစ်နှစ်အကြာမှာ ဗြိတိန်နဲ့ မဟာမိတ်နိုင်ငံတွေက Navalnyရဲ့ ခန္ဓာကိုယ်မှာ ခွဲခြမ်းစိတ်ဖြာပြီးနောက် ရုရှား ကို အပြစ်တင်ခဲ့ကြပါတယ်။

Navalny ရဲ့ ခန္ဓာကိုယ်မှ ရယူထားတဲ့ နမူနာတွေထဲမှာ epibatidine လို့ခေါ်တဲ့ အဆိပ်တွေ့ရှိမှုကြောင့် ဒါဟာ ရုရှားလက်ချက်ဖြစ်တယ်ဆိုတာ UK နိုင်ငံခြားရေးရုံးက ပြောကြားခဲ့ပါတယ်။

နိုင်ငံခြားရေးဝန်ကြီး Yvette Cooper က Munich လုံခြုံရေးညီလာခံမှာ “Alexei Navalny ရုရှားမှာ အကျဉ်းကျခံနေရစဉ်အတွင်း ကို ဒီသေစေနိုင်တဲ့ အဆိပ်ကို အသုံးပြုဖို့ ရုရှားအစိုးရမှာသာ အခွင့်အရေးရှိတယ်” လို့ ပြောကြားခဲ့ပါတယ်။

Cooperက တွေ့ရှိချက်တွေကို ကြေညာစဉ်အတွင်း ယူကေ၊ ဆွီဒင်၊ ပြင်သစ်၊ ဂျာမနီနဲ့ နယ်သာလန်နိုင်ငံတို့ကလည်း ပူးတွဲကြေညာချက်တစ်စောင် ထုတ်ပြန်ခဲ့ပါတယ်။

အခုသီတင်းပတ်ကုန်မှာ Cooperဟာ ညီလာခံမှာ Navalnyရဲ့ ဇနီး Yulia Navalnaya(ယူလီယာ နာဗယ်နာယာ)နဲ့ တွေ့ဆုံခဲ့ပါတယ်။

"ရုရှားနာဗယ်နီကိုNavalnyကို ခြိမ်းခြောက်မှုတစ်ခုအဖြစ် မြင်ခဲ့တယ်"လို့ Cooperက အခမ်းအနားမှာ ပြောကြားခဲ့ပါတယ်။

"ဒီအဆိပ်အမျိုးအစားကို အသုံးပြုခြင်းအားဖြင့် ရုရှားဟာ နိုင်ငံရေးအတိုက်အခံတွေအပေါ် အလွန်အမင်းကြောက်ရွံ့မှုကို ပြသခဲ့တယ်" လို့ Navalnyရဲ့ ဇနီး Yuliaက ထပ်လောင်းပြောကြားခဲ့ပါတယ်။

မဟာမိတ်‌တွေရဲ့ ကြေညာချက်အတွင်းမှာလည်း
Navalnyရဲ့သေဆုံးမှုဟာ ရုရှားကြောင့်ဖြစ်တယ်လို့ ဆိုထားကြပါတယ်။

"Epibatidine ကို တောင်အမေရိကရှိ သဘာဝအတိုင်း ပေါက်ဖွားလာတဲ့ ဖားတွေမှာသာ သဘာဝအတိုင်း တွေ့ရှိနိုင်ပါတယ်၊ စနစ်တကျ မွေးမြူပြီး ပေါက်ဖွားလာတဲ့ ဖားတွေကတော့ အဆိုပါအဆိပ်ကို မထုတ်လုပ်နိုင်ပါဘူး၊ ဒါ့အပြင် ရုရှားမှာလည်း သဘာဝအတိုင်း မတွေ့ရှိရပါ။"ဘူးလို့ ဆိုထားကြပါတယ်။

ယူကေနိုင်ငံခြားရေးရုံးက ရုရှားကို ဓာတုလက်နက်များ တားမြစ်ရေးဆိုင်ရာ သဘောတူညီချက်ကို ချိုးဖောက်မှု စွပ်စွဲချက်နဲ့ပတ်သက်ပြီး ဓာတုလက်နက်များ တားမြစ်ရေးဆိုင်ရာ အဖွဲ့အစည်းကို အကြောင်းကြားထားပြီးဖြစ်ကြောင်း ပြောကြားခဲ့ပါတယ်။

အဂတိလိုက်စားမှု တိုက်ဖျက်ရေး လှုပ်ရှားသူနဲ့ ရုရှားရဲ့ အပြင်းထန်ဆုံး အတိုက်အခံခေါင်းဆောင် နာဗယ်နီဟာ ၂၀၂၄ ခုနှစ် ဖေဖော်ဝါရီလ ၁၆ ရက်နေ့ အသက် ၄၇ နှစ်အရွယ်မှာ ရုတ်တရက် အကျဉ်းထောင်မှာ ကွယ်လွန်ခဲ့တာပဲဖြစ်ပါတယ်။

Reference-BBC
https://www.facebook.com/share/p/14UgdPb8Kdb/

NCGUB ဝန်ကြီးချုပ်ဟောင်း ဒေါက်တာစိန်ဝင်းနဲ့ KNU အထွေထွေအတွင်းရေးမှူးဟောင်း ဗဒိုမန်းရှာလာဖန်းတို့ရဲ့ အောက်မေ့သတိရပွဲကျင်းပ

BBM - ဖေဖော်ဝါရီ ၁၅
သတင်း - မင်းသော်၊ ကိုထွန်း

ဒေါ်အောင်ဆန်းစုကြည်ရဲ့အစ်ကို NCGUB ဝန်ကြီးချုပ်ဟောင်း ဒေါက်တာစိန်ဝင်းရဲ့နာရေးနဲ့ (၁၈)နှစ်မြောက် ကျဆုံးသွားတဲ့ KNU အထွေထွေ အတွင်းရေးမှူး ဗဒိုမန်းရှာလာဖန်းတို့အတွက် အောက်မေ့သတိရဖွယ် အထိမ်းအမှတ်ကို ထိုင်း-မြန်မာ နယ်စပ် မဲဆောက်မြို့မှာ ကျင်းပခဲ့တယ်လို့ သိရပါတယ်။

ဖေဖော်ဝါရီလ ၁၄ ရက်နေ့မှာ New Myanmar Foundation က ဒေါက်တာစန်းအောင်ဦးစီးပြီး
ပြည်ထောင်စု မြန်မာနိုင်ငံ အမျိုးသားညွှန့်ပေါင်းအစိုးရ (NCGUB) ဝန်ကြီးချုပ်ဟောင်း ဒေါက်တာစိန်ဝင်းနဲ့ K.N.U အထွေထွေ အတွင်းရေးမှူးဟောင်း ဗဒိုမန်းရှာလားဖန်း တို့အတွက် သံဃာတော်များအား နေ့ဆွမ်းဆပ်ကပ်လှူဒါန်းခြင်း ၊ ဧည့်သည်များမှ တရားနာယူခြင်း အခမ်းအနားကိုကျင်းပပြုလုပ်ခဲ့တယ်လို့သိရပါတယ်။

အခမ်းအနားတွင် ဒီမိုကရေစီအရေး၊ တိုင်းရင်းသားများ၏ တန်းတူရေး နှင့် ကိုယ်ပိုင်ပြဌာန်းခွင့်အရေး အဆက်ဆက်မှာ အသက်ပေးလှူသွားတဲ့ ရဟန်းရှင်လူ ၊ ခေါင်းဆောင်များ၊ ကျောင်းသားပြည်သူများအတွက် ဝမ်းနည်းခြင်း အထိမ်းအမှတ် အဖြစ် “ ၈ “စက္ကန့်ငြိမ်သက်ပြီး ဝန်ကြီးချုပ်ဟောင်း ဒေါက်တာစိန်ဝင်းအတွက်

နယူးမြန်မာဖောင်ဒေးရှင်း၏ Executive Director Dr. Sann Aung၊ အမျိုးသားဒီမိုကရေစီအဖွဲ့ချုပ် NLD မှ ဗဟိုအလုပ်အမှုဆောင်ကော်မတီအဖွဲ့ဝင် (CEC) ဆရာ ဟံသာမြင့်၊ ABSDF ဥက္ကဌ ရဲဘော်သံခဲ၊ မယ်တော်ဆေးခန်း ကလေးအထူးကု ဆရာဒေါက်တာသိန်းဝင်း၊ Children’s Development Centre (CDC) ကျောင်းအုပ်ကြီး ဆရာမန်းရွှေနှင်း၊ Burma Medical Association မှ ဒေါက်တာ မြင့်ချို၊ မယ်တော်ဆေးခန်း Founder Dr. စင်သီယာမောင်၊ ပအိုဝ်း အမျိုးသား ဖက်ဒရယ်ကောင်စီ ဥက္ကဌ ခွန်မြင့်ထွန်း တို့အသီးသီး မှ ဒေါက်တာစိန်ဝင်း နှင့် ဗဒိုမန်းရှာလားဖန်း တို့(၂)ဦး အတွက် အောက်မေ့သတိရ အမှတ်တရ ဂုဏ်ပြုအမှာစကားများ ပြောကြားခဲ့တယ်လို့ သိရပါတယ်။

အဲ့ဒီနောက် တက်ရောက်လာတဲ့ ဧည့်သည်တွေကပြည်ထောင်စု မြန်မာနိုင်ငံ အမျိုးသားညွန့်ပေါင်း အစိုးရ (NUGUB) ဝန်ကြီးချုပ်ဟောင်း ဆရာဒေါက်တာစိန်ဝင်း နှင့် K.N.U အထွေထွေ အတွင်းရေးမှူးဟောင်း ဗဒိုမန်းရှာလားဖန်း တို့ရဲ့တိုင်းပြည်အပေါ် ထားရှိခဲ့တဲ့ စိတ်စေတနာ၊ အနစ်နာခံ လုပ်ဆောင်ခဲ့မှုတွေကို လေးစားဂုဏ်ပြုသောအားဖြင့် လွမ်းသူ့ပန်းပေးအပ်ခဲ့တယ်လို့ သိရပါတယ်။
https://www.facebook.com/share/1HTM9ugrLx/

ရုရှားတပ်ဖွဲ့တွေက အတုအယောင် Starlink ဝန်ဆောင်မှုအတွက် ငွေပေးချေခဲ့ကြောင်း ယူကရိန်းတပ်ဖွဲ့ ပြောကြား

BBM - ဖေဖော်ဝါရီ ၁၅
သတင်း - Richard

ရုရှားတပ်ဖွဲ့တွေက ယူကရိန်း စစ်ဆိုက်ဘာဌာနဆီက Starlink ၀န်ဆောင်မှုအတုတစ်ခု ၀ယ်ယူခဲ့တယ်လို့ ယူကရိန်းက ဖေဖော်ဝါရီလ ၁၃ရက် ကြာသပတေးနေ့က ပြောကြားခဲ့ပါတယ်။

၂၅၆ ကြိမ်မြောက် ဆိုက်ဘာတိုက်ခိုက်ရေးတပ်မဟာက open-source ထောက်လှမ်းရေးအဖွဲ့တွေနဲ့ ပူးပေါင်းပြီး ရှရှားတပ်ဖွဲ့တွေကို ယူကရိန်း whitelist မှာ Starlink terminal တွေကို မှတ်ပုံတင်ဖို့ ကူညီပေးမယ့် Telegram channel တွေနဲ့ bot တွေကို မြှင့်တင်ဖို့ ပြောကြားခဲ့ပါတယ်။

အဆိုပါ channel တွေဟာ လှည့်စားမှုတစ်ခုသာဖြစ်ပြီး ယူကရိန်းတပ်ဖွဲ့တွေရဲ့ တည်နေရာနဲ့ terminal data အဟောင်းတွေကို ပေးပို့ခဲ့ကြောင်း ၂၅၆ ကြိမ်မြောက် တပ်မဟာက ပြောကြားခဲ့ပါတယ်။

ဒါဟာ ရုရှားတပ်ဖွဲ့တွေက ယူကရိန်းအရပ်သားတွေကို Starlink မှတ်ပုံတင်ဖို့အတွက် ငွေပေးပြီး ဒေသတစ်ဝှမ်းရှိ Starlink ပိတ်ဆို့တာကို ရှောင်ကွင်းဖို့ ကြိုးစားနေကြောင်း ထပ်ခါတလဲလဲ သတင်းတွေ ထွက်ပေါ်ပြီးနောက် အခုလိုဖြစ်စဉ်ဖြစ်ပွားလာတာပဲဖြစ်ပါတယ်။

အခုလအစောပိုင်းမှာ SpaceX က ယူကရိန်းနိုင်ငံရှိ Starlinkတွေကို ဖြတ်တောက်ခဲ့ပြီး ယူကရိန်းအစိုးရနဲ့ မှတ်ပုံတင်ထားတဲ့ နေရာတွေကိုသာ ဝန်ဆောင်မှုဆက်လက်ရရှိနိုင်စေခဲ့ပါတယ်။

ရုရှားတပ်ဖွဲ့တွေက တိုက်ခိုက်ရေးဒရုန်းတွေကို အသုံးပြုဖို့နဲ့ စစ်မြေပြင် ဆက်သွယ်ရေးပိုင်းအတွက် မှောင်ခိုဈေးကွက်ရှိ Starlink တွေကို ဝယ်ယူနေကြောင်း ထပ်ခါတလဲလဲ သတင်းတွေ ထွက်ပေါ်ပြီးနောက် အခုလို တိုက်ခိုက်ခံခဲ့ရတာပဲဖြစ်ပါတယ်။

"ဒီပုံစံက Elon Musk ရဲ့ ကွန်ရက်ကို ပြန်လည်ထူထောင်ဖို့နဲ့ ဒီကနေ ဖြစ်ပေါ်လာတဲ့ ခြိမ်းခြောက်မှုတွေကို ဘယ်လိုနည်းအောင် ရှာဖွေနေမလဲဆိုတာကို နားလည်တဲ့အတွက် InformNapalm နဲ့ MILITANT တို့နဲ့အတူ သူတို့ကို ကူညီသ ဖို့ ဆုံးဖြတ်ခဲ့ပါတယ်" လို့ တပ်မဟာက ၎င်းနဲ့ အလုပ်လုပ်ခဲ့တဲ့ အဖွဲ့နှစ်ဖွဲ့ကို ကိုးကားပြီး ရေးသားခဲ့ပါတယ်။

ရုရှားတပ်သားတွေနဲ့ အပြန်အလှန်ဆက်ဆံမှုတွေကို ပြသထားတဲ့ တပ်မဟာက တင်ထားတဲ့ ဖန်သားပြင်ဓာတ်ပုံတွေအရ Telegram bot တွေဟာ စစ်သားတွေကို သူတို့ရဲ့ Starlink terminal တွေအကြောင်း အချက်အလက်တွေ မေးမြန်းထားပါတယ်။

Reference-Business Insider

#bbmnews #bbm #bbmtv #russia #starlink #internationalnews
https://www.facebook.com/share/p/1DpZkfXAGR/

မြန်မာနိုင်ငံကို အိန္ဒိယသမုဒ္ဒရာထွက်ပေါက်အဖြစ် တရုတ်အတွက် ဖန်တီးဖို့ မင်းအောင်လှိုင် ဖိတ်‌ခေါ်ထား

BBM - ဖေ‌ဖော်ဝါရီ ၁၅
သတင်း - ခက်ဆစ်

မြန်မာနိုင်ငံဟာ တရုတ်နိုင်ငံအတွက် အိန္ဒိယသမုဒ္ဒရာထွက်ပေါက်ကို ဖန်တီးပေးနိုင်မဲ့ နိုင်ငံဖြစ်တဲ့အတွက် လာရောက်ရင်းနှီးမြှုပ်နှံဖို့ စစ်ခေါင်းဆောင်‌ မင်း‌အောင်လှိုင်က ဖိတ်ခေါ်ထားတယ်လို့ စစ်ကောင်စီ ထုတ်ပြန်ချက်အရ သိရပါတယ်။

တရုတ်နိုင်ငံအတွက် အိန္ဒိယသမုဒ္ဒရာထွက်ပေါက်ကို ဖန်တီးနိုင်တဲ့နိုင်ငံဖြစ်တဲ့အတွက် တရုတ်က လာရောက်ရင်းနှီးမြှပ်နှံဖို့ကို မင်းအောင်လှိုင်က ဖိတ်ခေါ်ခဲ့ကြောင်း မနေ့က ရန်ကုန်မှာ ပြုလုပ်တဲ့ ၂၀၂၆ ခုနစ် မြင်းနှစ် တရုတ်နှစ်သစ်ကူးပွဲတော်အခမ်းအနားမှာ ဒုစစ်ခေါင်းဆောင် စိုးဝင်းက ထည့်သွင်းပြောဆိုခဲ့တာပါ။

နှစ်နိုင်ငံကြား ကျောက်ဖြူရေနက်ဆိပ်ကမ်းစီမံကိန်း၊ မြစ်ဆုံရေအားလျှပ်စစ်စီမံကိန်း၊ ရေနံနဲ့ သဘာဝဓာတ်ငွေ့ပိုက်လိုင်းစီမံကိန်းတို့ကို ပူးပေါင်းဆောင်ရွက်လျက်ရှိသလို မူဆယ်-မန္တလေး မီးရထားလမ်းသစ်ဖောက်လုပ်ရေးစီမံကိန်းနဲ့ မန္တလေး-ကျောက်ဖြူ မီးရထားလမ်း စီမံကိန်းတို့ကိုလည်း အကောင်အထည်ဖေါ်ဆောင်ရွက်လျက်ရှိတယ်လို့ ဆိုပါတယ်။

မူဆယ်-မန္တလေး မီးရထားလမ်းဟာ ကျောက်ဖြူ-ကူမင်းမီးရထားလမ်းစီမံကိန်းကို အကောင်အထည်ဖော်ခြင်းရဲ့ ပထမခြေလှမ်းဖြစ်ပြီး ‌ကျောက်ဖြူ-ကူမင်းမီးရထားလမ်းစီမံကိန်းရဲ့ အဓိကကျတဲ့ အစိတ်အပိုင်း တရပ်လည်း ဖြစ်ကြောင်း၊ မန္တလေး-‌ကျောက်ဖြူမီးရထားလမ်းစီမံကိန်းဟာ တရုတ်နိုင်ငံအတွက် အိန္ဒိယသမုဒ္ဒရာထွက်ပေါက်အဖြစ် ပုံပေါ်လာနိုင်မည့် အလားအလာရှိတဲ့ အခွင့်အလမ်းကောင်းများဖြစ်ကြောင်း ဒုစစ်ခေါင်းဆောင် စိုးဝင်းက ပြောခဲ့ပါတယ်။

"မြန်မာနိုင်ငံဟာ လမ်းပန်းဆက်သွယ်မှုအနေနဲ့ လမ်းဆုံနေရာမှာ တည်ရှိနေပြီး တရုတ်နိုင်ငံအတွက် အိန္ဒိယသမုဒ္ဒရာထွက်ပေါက်ကို ဖန်တီးပေးနိုင်မည့် နိုင်ငံဖြစ်သည့်အတွက် လမ်းပန်းဆက်သွယ်ရေးကဏ္ဍနဲ့ အခြေခံအဆောက်အဦကဏ္ဍများတွင် တရုတ်နိုင်ငံက လာရောက်ရင်းနှီးမြှုပ်နှံနိုင်ရန်အတွက် နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေး‌‌ကော်မရှင် ဥက္ကဌ၏ ၂၀၂၅ ခုနှစ် ဩဂုတ်လအတွင်းက တရုတ်နိုင်ငံခရီးစဉ်တွင် ဖိတ်‌ခေါ်ခဲ့ပြီး ဖြစ်ကြောင်း" စိုးဝင်းက တရုတ်နှစ်သစ်ကူးပွဲတော်မှာ ‌ပြောခဲ့တာပါ။

မြန်မာနိုင်ငံအနေနဲ့ တရုတ်တစ်နိုင်ငံတည်း မူဝါဒကို ဒီနေ့ထိ လက်ခံကျင့်သုံးနေသကဲ့သို့ စစ်မှန်တဲ့ မိတ်ဘက်ဆက်ဆံရေး အပြန်အလှန်ယုံကြည်မှုနဲ့ ရှိရင်းစွဲ ဆွေးမျိုးပေါက်ဖော် ချစ်ကြည်ရင်းနှီးမှုကို အခြေခံပြီး နှစ်နိုင်ငံဆက်ဆံမှု တိုးမြှင့်ဆောင်ရွက်ရေး၊ ကဏ္ဍစုံ ပူးပေါင်း‌ဆောင်ရွက်မှု ပိုမိုတိုးမြှင့်ရေး၊ အေးအတူပူအမျှအသိုက်အဝန်းတည်ဆောက်မှု အရှိန်အဟုန်မြှင့်တင်ရေးနဲ့ ‌ဒေသတွင်းတည်ငြိမ်ရေးဆိုင်ရာ ကိစ္စရပ်များတွင် ပူးပေါင်းဆောင်ရွက်ရေးတို့နဲ့ ပတ်သက်ပြီး ဆွေးနွေးနိုင်ခဲ့တယ်လို စိုးဝင်းက ဆိုပါတယ်။

တရုတ်နိုင်ငံအတွက် မြန်မာနိုင်ငံကို အိန္ဒိယသမုဒ္ဒရာ ထွက်ပေါက်အဖြစ် ဖန်တီးလိုက်ပါက မြန်မာနိုင်ငံကို တရုတ်ရဲ့ မဟာဗျူဟာကွင်းထဲ ဝင်သွားပြီလို့ နိုင်ငံတကာကမြင်နိုင်သလို အရေးကြီးမူဝါဒတွေမှာ တရုတ်အကျိုးစီးပွားကို စဉ်းစားရတဲ့ အခြေအနေဖြစ်လာနိုင်ပြီး တရုတ်ကို အလုံးစုံအားကိုးနေရတဲ့ တရုတ်လက်အောက်ခံ နိုင်ငံအဖြစ် ရောက်ရှိသွားနိုင်တဲ့အတွက် နိုင်ငံရေးပုံရိပ်ထိခိုက်နိုင်ကြောင်း ပထဝီနိုင်ငံ‌ရေးအရ လေ့လာသုံးသပ်မှုတွေ ရှိနေတာလည်း ဖြစ်ပါတယ်။

Photo - မင်းအောင်လှိုင်နဲ့ တရုတ်သမ္မတ ၂၀၂၅ မေလက ရုရှားမှာတွေ့ဆုံခဲ့စဉ်(ပုံဟောင်း)။

#bbmnews #bbm #bbmtv #MinAungHlaing #Myanmar
https://www.facebook.com/share/p/1JwQHeYmyH/

ဘိုင်ယန်တိုက်စစ်မှူး ဟာရီကိန်း ကစားသမားဘ၀ ဂိုး ၅၀၀၊ ပယ်နယ်တီဂိုး ၁၀၀ ပြည့်မြောက်

ဘိုင်ယန်မြူးနစ်တိုက်စစ်မှူး ဟာရီကိန်းဟာ ဝါဒါဘရီမင်နဲ့ပွဲမှာ နှစ်ဂိုးသွင်းပြီးနောက် ကစားသမားဘ၀ ဂိုး ၅၀၀နဲ့ ပယ်နယ်တီ ဂိုး ၁၀၀
ပြည့်မြောက်ခဲ့ပါတယ်။

ဟာရီကိန်းအနေနဲ့ ပွဲချိန် ၂၂ မိနစ်မှာ ပယ်နယ်တီနဲ့ ၂၅ မိနစ်မှာ ဂိုးတွေ သွင်းယူခဲ့တာပါ။

၎င်းဟာ ကလပ်နဲ့ နိုင်ငံလက်ရွေးစင်ပွဲ ၇၄၃ ပွဲမှာ အခုမှတ်တမ်းကို ပိုင်ဆိုင်ခဲ့တာဖြစ်တယ်။

အခုရာသီမှာ လိဂ်ဂိုး ၂၆ ဂိုးအပါအဝင် ပြိုင်ပွဲစုံသွင်းဂိုးလည်း ၄၁ ဂိုးအထိ ရှိလာခဲ့ပါတယ်။

ဒါ့အပြင် ဂိုး ၅၀၀ ပြည့်မှတ်တမ်းကို ပိုင်ဆိုင်ခွင့်ရတဲ့ ပထမဆုံး အင်္ဂလိပ်ကစားသမား ဖြစ်လာခဲ့ပြီး ပြီးခဲ့တဲ့ ဒီဇင်ဘာလကတည်းက ဂျင်မီဂရေ့ဗ်စ်ရဲ့
၄၇၄ ဂိုးကို ကျော်ဖြတ်ခဲ့တာပါ။

ဟာရီကိန်းဟာ စပါးအတွက် ၂၈၀ ဂိုး၊ ဘိုင်ယန်မြူးနစ်အတွက် ၁၂၆ ဂိုး၊ အင်္ဂလန်အတွက် ၇၈ ဂိုး၊ မီဝေါလ်အတွက် ၉ ဂိုး၊ လေတန်အတွက်
၅ ဂိုး၊ လက်စတာအတွက် ၂ ဂိုး သွင်းယူပေးခဲ့ပါတယ်။

၎င်းအနေနဲ့ ကစားတဲ့ပြိုင်ပွဲတိုင်းမှာ ဂိုးသွင်းနိုင်သူအဖြစ်လည်း မှတ်တမ်းဝင်ထားပါတယ်။

Photo - Bayern & Bundesliga

#bbmnews #bbm #bbmtv #sportsnews #Bayern #Bundesliga
https://www.facebook.com/share/p/1WrmThJ8Q6/

ဖားကန့်တိုက်ပွဲအတွင်း လက်နက်ကြီးကျည်ကျရောက်မှုကြောင့် ကလေး ၄ ဦးအပါ မိသားစု ၆ ဦး ဒဏ်ရာရ

BBM - ဖေဖော်ဝါရီ ၁၄
သတင်း - ကိုအိုက်

ကချင်ပြည်နယ်၊ ဖားကန့်မြို့နယ်၊ လုံးခင်းရွာမှာ တိုက်ပွဲတွင်း ပစ်ခတ်လိုက်တဲ့ လက်နက်ကြီးကျည် ကျပေါက်ကွဲမှုကြောင့် ကလေးငယ် ၄ ဦးအပါအဝင် အရပ်သား ၆ ဦး ဒဏ်ရာရရှိခဲ့တယ်လို့ ဒေသခံတွေဆီက BBM ကို ပြောပါတယ်။

မနေ့က ဖေဖော်ဝါရီလ ၁၄ ရက်နေ့၊ ညနေ ၄ နာရီခွဲခန့်မှာ စစ်ကောင်စီတပ်နဲ့ KIA ပူးပေါင်းတပ်တို့ တိုက်ပွဲအတွင်း ပစ်ခတ်လိုက်တဲ့ လက်နက်ကြီးကျည်ဟာ လုံးခင်းရွာ တရုတ်စာသင်ကျောင်းအနီး မိသားစုထမင်းစားနေကြတဲ့ နေအိမ်ပေါ်သို့ ကျပေါက်ကွဲတာပါ။

"တိုက်ပွဲတွင်း ပစ်ခတ်တာဆိုတော့ ဘယ်အဖွဲ့အစည်းက ပစ်တယ်ဆိုတာ မသိရဘူး၊ ဒဏ်ရာရတဲ့သူတွေက မိသားစုတစ်စုလို့ ကြားတယ်၊ ကလေး ၄ ယောက်၊ လူကြီး ၂ ယောက်ပါ"လို့ ဖားကန့်ဒေသခံတစ်ဦးက BBM ကို ပြောပါတယ်။

ဖားကန့်မြို့၊ ဗျူဟာကုန်းနဲ့ လုံးခင်းနယ်မြေရဲစခန်းအပါအဝင် အနီးအနားရှိ စစ်ကောင်စီ တပ်စခန်းတွေကို KIA နဲ့ KPDF ပူးပေါင်းတပ်တွေက မနေ့က ဖေဖော်ဝါရီလ ၁၄ ရက်နေ့၊ နံနက်ပိုင်းမှစပြီး ထိုးစစ်ဆင် တိုက်ခိုက်နေတာ ဖြစ်ပါတယ်။

အဆိုပါ တိုက်ပွဲတွေဟာ ပိုမိုပြင်းထန်လာသဖြင့် ဒေသခံပြည်သူတွေဟာ တိုက်ပွဲတွင်း ပိတ်မိနေမှာကို စိုးရိမ်တာကြောင့် ဘေးလွတ်ရာကို ထွက်ပြေးတိမ်းရှောင်နေကြပါတယ်။

"နံနက်ပိုင်းမှာ တိုက်ပွဲ စတင် ဖြစ်ကြတယ်၊ မနက်ပိုင်း ၈ နာရီလောက်မှာ တိုက်ပွဲတွေ ခဏငြိမ်သွားပြီး ညနေ ၄ နာရီလောက်မှာ တိုက်ပွဲတွေ ပြန်ဖြစ်ကြတယ်၊ အခုဒေသခံ ပြည်သူတွေက ကြားညှပ်မှာ စိုးရိမ်နေလို့ ထွက်ပြေးတိမ်းရှောင်ကြရတယ်" လို့ လုံးခင်းကျေးရွာဒေသခံတစ်ဦးက BBM ကို ပြောပါတယ်။

လက်ရှိမှာ KIA ပူးပေါင်းတပ်တွေက ဖားကန့်မြို့နယ်၊ လုံးခင်းနယ်မြေရဲစခန်းကို ဝိုင်းရံပိတ်ဆို့ထားပြီး အသာစီးရနေတယ်လို့ ဒေသခံတွေဆီက သိရပါတယ်။

ဇန်နဝါရီလဆန်းကတည်းက KIA ပူးပေါင်းတပ်နဲ့ စစ်ကောင်စီတို့ ဖြစ်ပွားတဲ့ ဖားကန့်တိုက်ပွဲမှာ လက်နက်ကြီးကျည်၊ လေကြောင်း တိုက်ခိုက်မှု၊ မိုင်းစတာတွေကြောင့် အရပ်သားပြည်သူ ထိခိုက်သေဆုံးမှု မြင့်တက်နေတယ်လို့ သိရပါတယ်။

#bbmnews #bbm #bbmtv #Hpakant #kachin #KIA
https://www.facebook.com/share/p/1C4DvfySe1/

ဗန်းမက်ဒေသရှိ စစ်ဘေးရှောင်များ တည်ထားတဲ့ ကျေးရွာသစ်ကို PNO မီးရှို့ဖျက်ဆီး

BBM -ဖေဖော်ဝါရီ ၁၅
သတင်း- ခွန်း

ရှမ်းပြည်နယ်တောင်ပိုင်း၊ မောက်မယ်မြို့နယ်၊ ဗန်းမက်ဒေသမှာ စစ်ဘေးရှောင်တွေ တည်ထောင်ထားတဲ့ ကျေးရွာသစ်ကို PNO ပြည်သူ့စစ်က မီးရှို့ဖျက်ဆီးသွားတယ်လို့ ဒေသခံတွေက ပြောပါတယ်။

ဖေဖော်ဝါရီလ ၁၃ ရက်နေ့မှာ မီးရှို့ဖျက်ဆီးခဲ့တာဖြစ်ပြီး အဆိုပါ ကျေးရွာဟာ ၂၀၂၃ ခုနှစ်မှာ နိုင်ငံတကာအလှူရှင်တွေနဲ့ ပြည်တွင်းအလှူရှင်တွေ စုပေါင်းလှူဒါန်းပြီး ဆောက်လုပ်ပေးထားတဲ့ စစ်ဘေးရှောင်ကျေးရွာလည်း ဖြစ်တယ်လို့ သိရပါတယ်။

“စစ်ကောင်စီလက်အောက်ခံ PNO ပြည်သူ့စစ်တွေက ပွန်ချောင်းကို ကျော်လာပြီး အဲဒီရွာကို ရောက်လာတာပါ။ သူတို့က ကိုယ်ကျိုးစီးပွားအတွက် ရွာတစ်ရွာလုံးကို မီးရှို့ဖျက်ဆီးသွားပါတယ်”လို့ ဒေသခံတစ်ဦးက BBMကို ပြောပါတယ်။

အဆိုပါ ကျေးရွာမှာ နေထိုင်သူတွေဟာ လွိုင်ကော်မြို့နယ် ပဒါညေးကျေးရွာက စစ်ဘေးရှောင်တွေဖြစ်ပြီး၊ လက်ရှိမှာ စစ်ကောင်စီလက်အောက်ခံ PNO ပြည်သူ့စစ်ရဲ့ မီးရှို့ဖျက်ဆီးမှုကြောင့် သက်တမ်း ၃ နှစ်ကျော်သာရှိသေးတဲ့ ကျေးရွာသစ်တစ်ရွာလုံး မီးလောင်ပျက်စီးသွားခဲ့ရတာ ဖြစ်ပါတယ်။

“PNO စစ်ကြောင်း စဝင်လာကတည်းက ရွာသားအားလုံး စစ်ရှောင်လိုက်ရပါတယ်။ တောတောင်ထဲကိုပဲ ထွက်ပြေးရှောင်နေရပါတယ်။ လူနေတဲ့ ကျေးရွာကို မီးရှို့ဖျက်ဆီးတာကတော့ တော်တော်ကို ရက်စက်လွန်းပါတယ်”လို့ အဆိုပါဒေသခံက ဆက်ပြောပါတယ်။

ယင်းကျေးရွာမှာ အိမ်ခြေ ၁၆အိမ်ရှိပြီး လှုဦးရေအားဖြင့် ၁၃၀ကျော် နေထိုင်ကာ ပအိုဝ်တိုင်းရင်းသား အများစု နေထိုင်ကြတယ်လို့လည်း သိရပါတယ်။

အခုလက်ရှိမှာတော့ ကျေးရွာခံများမှာ ဘေးကင်းရာထင်တဲ့ တောတောင်တွေမှာ စစ်ဘေးတိမ်းရှောင်နေရပြီး စားနပ်ရိက္ခာ၊ ဆေးဝါးများ၊ မိုးကာများ အရေးပေါ်လိုအပ်လျက်ရှိတယ်လို့ပြောပါတယ်။

ယင်းဒေသမှာ PNO ပြည်သူ့စစ်နဲ့ ပအိုဝ်းအမျိုးသားလွှတ်မြှောက်ရေးတပ်မတော် PNLAတို့အကြား တိုက်ပွဲ ပြင်းထန်နေဆဲဖြစ်ပြီး နှစ်ဖက်စလုံးလည်း အထိအခိုက် သေဆုံးမှု များပြားလျက်ရှိတယ်လို့ပြောပါတယ်။

ဖေဖော်ဝါရီ ၁၂ ရက်နဲ့ ၁၃ ရက် နှစ်ရက်အတွင်း ဖြစ်ပွားခဲ့တဲ့တိုက်ပွဲမှာတော့ PNOပြည်သူ့စစ်ဖက် စစ်သား ၁၀၀ကျော်သေဆုံးခဲ့ပြီး မှန်လုံကားနဲ့ အလောင်းသယ်ခဲ့ရတယ်လို့ ဒေသခံများထံမှ သိရပါတယ်။

ပုံ - ရွာစတင်တည်ထောင်တုန်းကပုံ
https://www.facebook.com/share/p/1G9Q9DkC6y/