ဂန့်ဂေါမြို့မရဲစခန်းက ဒုရဲအုပ်တစ်ဦး ဒရုန်း ဗုံးကြဲခံရပြီး သေဆုံး

BBM - ဇန်နဝါရီ ၂၄
သတင်း - ကိုအိုက်

မကွေးတိုင်း၊ ဂန့်ဂေါမြို့ ရဲစခန်းက ဒုရဲအုပ်တစ်ဦး ဒရုန်းနဲ့ ဗုံးကြဲတိုက်ခိုက်ခံရပြီး တစ်ပတ်ကျော်ကြာမှာ သေဆုံးခဲ့တယ်လို့ ဒေသခံအမျိုးသားတစ်ဦးက BBM ကို ပြောပါတယ်။

ဂန့်ဂေါမြို့ ခလရ ၅၀ တပ်အနီး လမ်းဆုံမှာရှိတဲ့ စစ်ကောင်စီတပ်ရဲ့ဂိတ်ကို တော်လှန်ရေးပူးပေါင်းတပ်တွေက ပြီးခဲ့တဲ့ ဇန်နဝါရီလ ၁၂ ရက်နေ့က ဒရုန်းနဲ့ တိုက်ခိုက်ခဲ့ပါတယ်။

အဲဒီလို ဒရုန်းနဲ့ တိုက်ခိုက်မှုကြောင့် ဂိတ်မှာရှိတဲ့ ဒုရဲအုပ်တစ်ဦးအပါအဝင် ရဲနှစ်ဦးနဲ့ စစ်ကောင်စီတပ်သား နှစ်ဦးတို့ အပြင်းအထန် ဒဏ်ရာရရှိခဲ့တယ်လို့ သိရပါတယ်။

အပြင်းအထန်ဒဏ်ရာရတဲ့ ဒုရဲအုပ်တစ်ဦးဟာ မနေ့က ဇန်နဝါရီလ ၂၃ ရက်နေ့မှာ သေဆုံးခဲ့ပြီး သူ့ရဲ့အလောင်းကို နေ့ချင်းမြေမြှုပ်သင်္ဂြိုဟ်လိုက်တယ်လို့ သိရပါတယ်။

"ဂန့်ဂေါမြို့ မိုးကောင်းသင်္ချိုင်းမှာ စစ်သားတွေ မနေ့က အလောင်းသင်္ဂြိုဟ်တာ တွေ့တယ်၊ ကျတော်တို့ ဒီမနက်မှဘဲ ဒုရဲအုပ် သေတယ်ဆိုတဲ့ဟာ သိရတယ်၊ မနေ့က သေပြီး နေ့ချင်း သင်္ဂြိုဟ်လိုက်တဲ့ သဘောပါ၊ သတင်းတွေကို ဖုံးချင်တာလည်းဖြစ်နိုင်ပါတယ်"လို့ ဂန့်ဂေါမြို့ခံအမျိုးသားတစ်ဦးက BBM ကို ပြောပါတယ်။

ဂန့်ဂေါမြို့ ခလရ ၅၀ တပ်ရင်းအပါအဝင် စစ်ကောင်စီတပ်စွဲထားတဲ့နေရာတွေကို တော်လှန်ရေးတပ်တွေက ဒရုန်းနဲ့ ရှော့တိုက်ဒုံးတွေ ပစ်ခတ်မှုတွေ မကြာခဏ လုပ်နေတယ်လို့ သိရပါတယ်။

စစ်ကောင်စီကလည်း ဂန့်ဂေါမြို့အနီးအနား ကျေးရွာတွေကို လက်နက်ကြီးကျည် ရမ်းသမ်းပစ်ခတ်မှုတွေ လုပ်ဆောင်နေတာကြောင့် အရပ်သားထိခိုက်မှုတွေ ရှိနေပါတယ်။

ဂန့်ဂေါမြို့မှာ မနက်ဖြန် ဇန်နဝါရီ ၂၅ ရက်နေ့ စစ်ကောင်စီရဲ့ အတုယောင် ရွေးကောက်ပွဲ မဲရလဒ်ကြည့်ဖို့အတွက် မြို့တွင်း လုံခြုံရေး တင်းကျပ်ထားတယ်လို့ သိရပါတယ်။

"ဒီမနက် မြို့ထဲ စစ်သားတွေ ခြေရှုပ်နေကြတယ်၊ ခလရ ၅၀ တပ်ရင်းထဲက စစ်သားတွေ မြို့ပတ်လည်မှာ ကင်းပုန်းတွေ ချထားကြတယ်၊ မနက်ဖြန် မဲရလဒ်ကြည့်ဖို့လို့ ကြားတယ်"လို့ ဂန့်ဂေါမြို့ခံ အမျိုးသားတစ်ဦးက BBM ကို ပြောပါတယ်။

ပြီးခဲ့တဲ့ ဇန်နဝါရီလ ၁၁ ရက်နေ့က တော်လှန်ရေးတပ်ဖွဲ့တွေ တိုက်ခိုက်နေတဲ့ကြားက စစ်ကောင်စီဟာ ဂန့်ဂေါမြို့မှာ အပိုင်း (၂) ရွေးကောက်ပွဲကို ကျင်းပခဲ့တယ်လို့ သိရပါတယ်။

#bbm #bbmnews #ဂန့်ဂေါ #ရဲစခန်း #မကွေး
https://www.facebook.com/share/p/1AN296avH3/

မြင်းခြံမှာ စကစတပ်ကို MBT နဲ့ပူးပေါင်းတပ်များ တစ်ရက်တာတိုက်ခိုက်မှုအတွင်း စကစ ၂၂ ဦးသေဆုံး

🟥တော်လှန်ရေးအင်အားစုဘက်မှ ၂ ဦးကျဆုံးပြီး ၁၄ ဦးဒဏ်ရာရခဲ့

BBM - ဇန်နဝါရီ၂၄
သတင်း - မင်းသော်

မန္တလေးတိုင်း၊ မြင်းခြံမြို့နယ်အတွင်း စစ်ကောင်စီတပ်နဲ့ တော်လှန်ရေးအင်အားစုတို့ကြား တိုက်ပွဲများဖြစ်ပွားခဲ့ရာ တစ်ရက်အတွင်းမှာတင် စစ်ကောင်စီတပ်သား ၂၂ ဦးသေဆုံးပြီး ၂၀ ကျော် ထိခိုက်ဒဏ်ရာရခဲ့တယ်လို့ Myingyan Black Tiger (MBT)အဖွဲ့ရဲ့ ထုတ်ပြန်ချက်အရ သိရပါတယ်။

ပြီးခဲ့တဲ့ ဇန်နဝါရီလ ၂၀ ရက်နေ့၊ မနက် ၇ နာရီကနေ ညနေ ၆ နာရီအထိ မြင်းခြံမြို့နဲ့ နွားထိုးမြို့ကြား စကစတပ်နဲ့ MBTတပ်ဖွဲ့၊ ဗိုလ်စားပြောက်ကျားတပ်ဖွဲ့၊ Burmese Guerrilla Force(BGF) တပ်ဖွဲ့တို့ တစ်နေကုန်နီးပါး တိုက်ပွဲပြင်းထန်စွာဖြစ်ပွါးခဲ့တယ်လို့ သိရပါတယ်။

တိုက်ပွဲအတွင်း စကစ ဘက်က အထိနာတာကြောင့် ဂျက်ဖိုက်တာနဲ့ တစ်ကြိမ်၊ MI-35 နဲ့တစ်ကြိမ် လာရောက် ပစ်ကူပေးတာတွေရှိခဲ့ပေမဲ့ တိုက်ပွဲအတွင်း စကစတပ်သား ၇ ဦးသေဆုံးကာ အမြောက်အများဒဏ်ရာရရှိပြီး ခဲယမ်းအချို့နဲ့ ဆက်စပ်ပစ္စည်းတွေကို တော်လှန်ရေးအင်အားစုတွေဘက်က သိမ်းဆည်းနိုင်ခဲ့တယ်လို့ သိရပါတယ်။

ဒါ့အပြင် တရက်တည်းမှာ မနက် ၈ နာရီမှ ၉ နာရီအထိ နောက်ထပ်တနေရာဖြစ်တဲ့ မြင်းခြံမြို့အနောက်ဘက်ရှိ ပတ္တာကျေးရွာနဲ့ လေးအိမ်တန်းကျေးရွာကြား MBT တပ်၊ MGN အညာသားပြောက်ကျားတပ်နဲ့ စစ်ကောင်စီတို့ တိုက်ပွဲဖြစ်ပွားခဲ့ပြီး စကစဘက်မှ ဗိုလ်တစ်ဦးအပါအဝင် ၁၅ ဦးသေဆုံးပြီး ၂၀ ဦးကျော် ထိခိုက်ဒဏ်ရာရရှိခဲ့တယ်လို့ ဆိုပါတယ်။

တစ်ရက်အတွင်းဖြစ်ပွါးခဲ့တဲ့ အဆိုပါတိုက်ပွဲဖြစ်စဥ်(၂)ခုမှာ စကစ ဘက်က စုစုပေါင်း (၂၂)ဦးသေဆုံးပြီး (၂၀)ဦးကျော် ဒဏ်ရာရသလို MBT တပ်ဖွဲ့ဘက်မှလည်း ရဲဘော်(၂)ဦးကျဆုံးကာ (၁၄)ဦး ထိခိုက်ဒဏ်ရာရရှိခဲ့တယ်လို့ Myingyan Black Tiger (MBT) အဖွဲ့က ထုတ်ပြန်ထားပါတယ်။

Video - MBT
https://www.facebook.com/share/v/1AqJPA6qaH/

မလှိုင်မြို့နယ်အတွင်း ရွေးကောက်ပွဲအတွက် ရဲအင်အား(၆၀၀)ကျော်အထိ ရောက်ရှိနေ

🟥ခရီးသည်ယာဥ်လိုင်းများအားလုံး (၂၇)ရက်နေ့အထိ ပိတ်ထားပြီး အရပ်ကားတွေကို ချောဆွဲနေ

BBM-ဇန်နဝါရီ၂၄
သတင်း-မင်းသော်

မမ္တလေးတိုင်း၊ မလှိုင်မြို့နယ်အတွင်း ရွေးကောက် ပွဲပြုလုပ်ရန်အတွက် စစ်ကောင်စီအနေနဲ့ ရဲအင်အား(၆၀၀)လောက်အထိ စေလွှတ်ထားသလို မြို့နယ်အတွင်း ခရီးသည်ယာဥ်လိုင်းတွေကို (၂၇)ရက်နေ့အထိ ပိတ်ပင်ထားတာတွေ၊ အရပ်သားကားတွေကို ပေါ်တာဆွဲတာတွေ ပြုလုပ်နေတယ်လို့ မြေပြင်သတင်းရင်းမြစ်တွေရဲ့ ပြောဆိုချက်အရ သိရပါတယ်။

ယခုလာမဲ့ ဇန်နဝါရီလ ၂၅ ရက်နေ့မှာကျင်းပမဲ့ စစ်ကောင်စီရဲ့ နောက်ဆုံးအသုတ်ရွေးကောက်ပွဲကို မလှိုင်မြို့နယ်အတွင်းမှာလည်း ကျင်းပဖို့ရှိနေတာကြောင့် ရွေးကောက်ပွဲမတိုင်မှီ ယခုကဲ့သို့ ရဲအင်အားအမြောက်အများကို ပို့ဆောင်ထားခြင်းဖြစ်တယ်လို့လည်း သိရပါတယ်။

ပြီးခဲ့တဲ့ ဇန်နဝါရီလ၁၆ရက်နေ့ကစပြီး မလှိုင်မြို့နယ်အတွင်း လုံခြုံရေးရဲများ ရောက်ရှိပြီးနောက် ဇန်နဝါရီလ ၂၃ ရက်နေ့မှာတော့ ရွေးကောက်ပွဲကျင်းပမဲ့ မြို့နယ်အတွင်းရှိကျေးရွာတွေကို အဆိုပါလုံခြုံရေးတွေနဲ့အတူ မဲရုံဝန်ထမ်းများကို စေလွှတ်ခဲ့တယ်လို့ သိရပါတယ်။

ဒီလို မြို့နယ်အတွင်းရှိကျေးရွာတွေကို သွားရာမှာ စကစ ရဲ့လုံခြုံရေးတွေအနေနဲ့ တော်လှန်ရေးအင်အားစုတွေ ဂိတ်ချခဲ့ဖူးတဲ့နေရာတွေနဲ့ ၎င်းတို့မသင်္ကာရာနေရာတွေကို သေနတ်ပစ်ဖောက်တာတွေလုပ်ဆောင်ခဲ့တယ်လို့ ဒေသခံသတင်းရင်းမြစ်တစ်ဦးက BBM ကိုပြောပါတယ်။

" မလှိုင်မြို့နယ်အတွင်း ရွေးကောက်ပွဲအတွက်
လုံခြုံရေးအင်းအား ၆၀၀ကျော်ရောက်ရှိနေပါတယ်ဗျ၊ အဲ့လုံခြုံရေးတွေနဲ့အတူ Non-CDM တွေကို ၂၃ရက်နေ့ကစပြီး ရွေးကောက်ပွဲ လုပ်မဲ့ရွာတွေကိုလွှတ်တယ်၊ အဲ့တာဝါးခွ ရွာဘက်မှာကောသေနတ်တွေပစ်ဖောက်သွားကြတယ်၊ ဘာတိုက်ပွဲမှမဖြစ်ဘဲ မိနစ်နှစ်ဆယ်လောက်ကိုပစ်တာ"

ဒါ့အပြင် မလှိုင်မြို့နယ်အတွင်းက ကားလိုင်းတွေအကုန်လုံးကိုလည်း ရွေးကောက်ပွဲကာလအတွင်း လုံခြုံးရေးအကြောင်းပြချက်ဖြင့် အားလုံးရပ်ဆိုင်းခိုင်းထားပြီး ၂၇ရက်နေ့မှ ပြန်လည် လုပ်ကိုင်ခွင့်ပြုမယ်လို့လည်း သိရပါတယ်။

ဒါတင်မက မလှိုင်မြို့နယ်အတွင်းက ရွေးကောက်ပွဲကျင်းပမဲ့ကျေးရွာတွေကို Non-CDM တွေနဲ့ စကစ တပ်သားတွေသွားလာရာမှာလည်း မြို့နယ်တွင်းက အရပ်သားကားတွေကို ချောဆွဲတာတွေပြုလုပ်နေတယ်လို့လည်း အဆိုပါဒေသခံမှဆက်ပြောပါတယ်။

"မြို့ပေါ်က ခု ကားလိုင်းတွေအကုန် ၂၇ရက်နေ့အထိ နားခိုင်းထားပါတယ်၊ ကားတွေကို ချောဆွဲတာလည်း ရက်ရက်စက်စက်ပဲ ၊ မြို့ပေါ်မှာတင် အစီး၅၀ ကျော်တယ်"

မလှိုင်မြို့နယ်ဟာ စစ်ကောင်စီတပ်တွေအမြောက်အများ အခြေပြုထားရာ မိတ္ထီလာမြို့နယ်နဲ့ကပ်ရပ်ရှိနေပေမဲ့လည်း တော်လှန်ရေးအားကောင်းရာမြို့နယ်တစ်ခုဖြစ်တယ်လို့ သိရပါတယ်။

ဒါကြောင့်မို့လည်း စစ်ကောင်စီအနေနဲ့ မလှိုင်မြို့ပေါ်နဲ့ မလှိုင်-မိတ္ထီလာကြားကိုသာ ရွေးကောက်ပွဲကျင်းပနိုင်ပြီး မြို့အနောက်ဘက်ခြမ်းနဲ့ မြောက်ဘက်ခြမ်းက ကျေးရွာတွေမှာတော့ ရွေးကောက်ပွဲ ကျင်းပနိုင်ခြင်းမရှိဘူးဟု သိရပါတယ်။

Photo-ပုံဟောင်း

မြင်းခြံမှာ မဲရုံစောင့်ပြည်သူ့စစ် ၁ဦးကို တော်လှန်ရေးတပ်ဖွဲ့တွေလက်နက်ခဲယမ်းများနှင့်အတူ ဖမ်းဆီး

BBM - ဇန်နဝါရီလ ၂၄
သတင်း -ကိုဘုဏ်း

မြင်းခြံခရိုင် ၊မြင်းခြံမြို့ပေါ်မှာမဲရုံစောင့်နေတဲ့ ပြည်သူ့စစ်တစ်ဦးကို လက်နက်ခဲယမ်းများနဲ့အတူ အရှင်ဖမ်းဆီးနိုင်ခဲ့တယ်လို့ Myingyan Twenty One Guerllia Force ကထုတ်ပြန်ကြေငြာထားပါတယ်။

မြင်းခြံမြို့ပေါ်အတွင်း မဲရုံစာင့်နေရင်းအပြင်ထွက်လာချိန်မှာ တော်လှန်ရေးတပ်ဖွဲ့တွေက ဖမ်းဆီးနိုင်ခဲ့ပြီး ၎င်းနဲ့အတူ ကာဘိုင် သေနတ် ၁လက် အပြင် ခဲယမ်းအချို့ပါသိမ်းဆည်းရမိတယ်လို့သိရပါတယ်။

အဆိုပါပြည်သူ့စစ်ကိုဖမ်းဆီးရာမှာ Myingyan Twenty One Guerrilla Force နဲ့အတူ TFM ပျောက်ကျားတပ်ဖွဲ့၊ TLK ပျောက်ကျားတပ်ဖွဲ့တို့က ပူးပေါင်းဆောင်ရွက်ခဲ့ကြောင်းထုတ်ပြန်
ကြေငြာထားပါတယ်။

Photo-Myingyan Twenty One Guerrilla Force

ကျောက်ဖြူမြို့နယ်က စစ်ဘေးရှောင်တွေရှိရာကို စကစ မှ ဒရုန်း(၂)စီးဖြင့်တိုက်ခိုက်တာကြောင့် ပြည်သူ(၂)ဦးသေဆုံး

🟥ကလေးငယ်တစ်ဦးအပါ အရပ်သား(၅)ဦးလည်း ဒဏ်ရာရ

BBM-ဇန်နဝါရီ၂၄
သတင်း-မင်းသော်

ရခိုင်ပြည်နယ်၊ ကျောက်ဖြူမြို့နယ်အတွင်းက စစ်ဘေးရှောင်တွေရှိရာကို စစ်ကောင်စီ မှ ဒရုန်း(၂)စီးဖြင့်တိုက်ခိုက်ခဲ့တာကြောင့် ပြည်သူ(၂)ဦးသေဆုံးခဲ့ရပြီး ကလေးငယ်တစ်ဦးအပါ အရပ်သား(၅)ဦးလည်း ထိခိုက်ဒဏ်ရာရခဲ့တယ်လို့ အာရက္ခတပ်တော်ရဲ့ ထုတ်ပြန်ချက်အရ သိရပါတယ်။

ကျောက်ဖြူမြို့နယ်၊ ဇင်ချောင်းတိုက်နယ်၊ မူရွင်းကျေးရွာရှိ စာသင်ကျောင်းမှာ လာရောက်စစ်ဘေးရှောင်နေတဲ့ ပြည်သူတွေကို ဇန်နဝါရီလ ၂၄ရက် နေ့လယ် ၁၂နာရီ၅၅မိနစ်နဲ့ ၁၂နာရီ ၅၈ မိနစ်တို့မှာ ဒရုန်း(၂)စီးနဲ့ တိုက်ခိုက်ခဲ့ခြင်းဖြစ်တယ်လို့ သိရပါတယ်။

အဆိုပါတိုက်ခိုက်မှုကြောင့် ကျောက်ဖြူမြို့နယ်၊ သိုင်းချောင်းရွာမှ ဒေါ်ဖြူနုမ (၈၁ နှစ်) နဲ့ ဦးမှဲ့ဒေါင်း (၅၆ နှစ်) တို့ သေဆုံးပြီး၊ စိုင်ခြုံဒွိန် ကျေးရွာနေ မောင်အေးမင်းခိုင် (၉ လ) ၊ ဒေါ်ခင်ဆန်းဝင်း (၃၄ နှစ်)၊ သိုင်းချောင်းကျေးရွာနေ ဒေါ်မမြရင် (၅၆ နှစ်)၊ ဇိုင်ချောင်းကျေးရွာနေ ဒေါ်ဘနုမ (၆၇ နှစ်)နဲ့ ဦးမောင်ကျော် (၆၃ နှစ်) တို့ထိခိုက်ဒဏ်ရာရခဲ့တယ်လို့ သိရပါတယ်။

ဒါတင်မက စကစဟာ ၎င်းမူရွင်းကျေးရွာအား ဇန်နဝါရီလ (၂၄) ရက်နေ့ ညနေ (၄) နာရီ (၄၀) မိနစ်ခန့်အချိန်မှာ နောက်ထပ်ဒရုန်း (၂) စီးနဲ့ ထပ်မံတိုက်ခိုက်ခဲ့တဲ့အပြင် ညနေ (၅) နာရီ (၂၀) မိနစ်ခန့်အချိန်မှာလည်း မူရွင်းရွာနဲ့ ကုန်ဘောင်ရွာတို့ကို ဂျက်ဖိုက်တာတစ်စီးနဲ့ လေကြောင်းဗုံးကြဲမှုတွေ ပြုလုပ်ခဲ့တယ်လို့သိရပါတယ်။

စစ်ကောင်စီအနေနဲ့ ဇန်နဝါရီလ (၁၈၊ ၁၉) ရက်နေ့ တွေမှာလည်း ကျောက်ဖြူမြို့နယ်၊ ကျောက်ကလေကျေးရွာအား ဂျက်ဖိုက်တာ၊ ဒရုန်းများနဲ့သာမက ပင်လယ်ပြင်၌တပ်စွဲထားသော စစ်သင်္ဘောနေဗီများပေါ်မှ လက်နက်ကြီးများဖြင့်လည်း ပစ်ခတ်တိုက်ခိုက်ခဲ့သေးပြီး ထိုတိုက်ခိုက်မှုတွေကြောင့် အပြစ်မဲ့ပြည်သူ (၂) ဦးသေဆုံးခဲ့ကာ (၂) ဦး ဒဏ်ရာရရှိခဲ့ပြီး အရပ်သားပြည်သူများရဲ့နေအိမ်အချို့ မှာလည်း မီးလောင်ပျက်စီးသွားခဲ့ရတယ်လို့ သိရပါတယ်။

ဒါ့အပြင် ဇန်နဝါရီလ (၂၂) ရက်နေ့မှာလည်းကျောက်ဖြူမြို့နယ်၊ ဇင်ချောင်း ကုန်ဘွေရွာကို ဒရုန်း (၁) စီးနဲ့ တိုက်ခိုက်ခဲ့တာကြောင့် အပြစ်မဲ့အရပ်သား ပြည်သူ (၂) ဦး ထိခိုက် ဒဏ်ရာရရှိခဲ့သေးတယ်လို့ အာရက္ခတပ်တော်မှ ထုတ်ပြန်ထားပါတယ်။

ဓာတ်ပုံ- ပုံဟောင်း
https://www.facebook.com/share/p/1Z52bJN8ex/

ရုရှားက ယူကရိန်းကို ဆက်လက်တိုက်ခိုက်မှုတွေကြောင့် ပထမဆုံး ၃ပွင့်ဆိုင် ငြိမ်းချမ်းရေးဆွေးနွေးပွဲတွေ အဆုံးသတ်

BBM -ဇန်နဝါရီ ၂၅

အမေရိကန်၊ ရုရှားနဲ့ ယူကရိန်းကြားက ပထမဆုံး ၃ ပွင့်ဆိုင်‌ ငြိမ်းချမ်းရေးဆွေးနွေးပွဲတွေဟာ ယူကရိန်းကို ရုရှားက ပြန်လည်ဗုံးကြဲတိုက်ခိုက်ပြီးနောက် အောင်မြင်တဲ့ ရလဒ်မထွက်ဘဲ အဆုံးသတ်သွားခဲ့ပါတယ်။

အဘူဒါဘီမြို့မှာ ၂ ရက်ကြာဆွေးနွေးမှု တွေအပြီး ယူကရိန်းသမ္မတ ဇယ်လင်စကီးက နောက်အပတ်အစောပိုင်းမှာ ဒုတိယအကြိမ်တွေ့ဆုံဖို့ အလားအလာရှိကြောင်းကို ထုတ်ဖော်ပြောကြားခဲ့ပါတယ်။

ဇလန်စကီးရဲ့ X မှာ ရေးသားထားတဲ့ ပို့စ်တစ်ခုအရ "အများကြီးဆွေးနွေးခဲ့ကြတယ်"လို့ ပြောကြားခဲ့ပြီး ဆွေးနွေးမှုတွေဟာ "တည်ဆောက်မှု" ဖြစ်တယ်လို့ ပြောကြားခဲ့ပါတယ်။

ဇန်နဝါရီလ ၂၄ရက် စနေနေ့အထိ ရုရှားရဲ့ တိုက်ခိုက်မှုတွေကြောင့် လူ ၁ဦးသေဆုံးပြီး ၃၅ ဦး ဒဏ်ရာရရှိပြီးနောက် အစည်းအဝေးကို အဆုံးသတ်ခဲ့တာပဲဖြစ်ပါတယ်။

ယူကရိန်းနိုင်ငံခြားရေးဝန်ကြီး အန်ဒရီ ဆီဘီဟာက ရုရှားခေါင်းဆောင် ဗလာဒီမာ ပူတင်မှ အမိန့်ပေးခဲ့တဲ့ "ရက်စက်ကြမ်းကြုတ်တဲ့ တိုက်ခိုက်မှုဟာ ကျွန်ုတော်တို့ရဲ့ ပြည်သူတွေကိုသာမက ညှိနှိုင်းရေးစားပွဲကိုပါ ထိခိုက်စေခဲ့တယ်"လို့ ပြောကြားခဲ့ပါတယ်။

အဘူဒါဘီမြို့မှာ ကျင်းပတဲ့ ဆွေးနွေးပွဲတွေဟာ ၂၀၂၂ ခုနှစ်တုန်းက ရုရှားက ယူကရိန်းကို အပြည့်အဝကျူးကျော်တိုက်ခိုက်ခဲ့ပြီး နောက်ပိုင်း ပထမဆုံး ၃ ပွင့်ဆိုင်တွေ့ဆုံမှုပဲဖြစ်ပါတယ်။

"စစ်ဘက်ရေးရာ ကိုယ်စားလှယ်တွေက နောက်ထပ်အစည်းအဝေးတစ်ခုအတွက် အလားအလာရှိတဲ့ ပြဿနာတွေကို ဖော်ထုတ်ခဲ့ကြပါတယ်။ ရှေ့ဆက်သွားဖို့ အသင့်ဖြစ်နေပြီး ယူကရိန်းကလည်း အသင့်ဖြစ်နေပါက နောက်ထပ်အစည်းအဝေးတွေကို လာမယ့် အပတ်အစောပိုင်းမှာ ကျင်းပနိုင်မှာဖြစ်တယ်"လို့ ရုရှားဘက်က ပြောကြားခဲ့ပါတယ်။

ရုရှားသတင်းဌာန RIA ကလည်း ရုရှား၊ ယူကရိန်းနဲ့ အမေရိကန်တို့အကြား ဆွေးနွေးမှုတွေ ဆက်လက်ပြုလုပ်ဖို့ ဆက်လက်တည်ရှိနေကြောင်း ဖော်ပြခဲ့ပါတယ်။

ကိယက်ဗ်မြို့တော်ဝန် Vitali Klitschko က ဒဏ်ရာရရှိသူ ၄ ဦးအနက် ၃ ဦးကို ဆေးရုံတင်ထားရတယ်လို့ Telegram မှာ ပြောကြားထားပါတယ်။

မြို့တော်ရဲ့ အရေးကြီးတဲ့ အခြေခံအဆောက်အအုံတွေ ပျက်စီးသွားပြီး အဆောက်အဦး ၆၀၀၀ ဟာ အပူပေးစနစ် မရှိဘဲ ဖြစ်နေတယ်လို့ သူက ထပ်လောင်းပြောကြားခဲ့ပါတယ်။

ယူကရိန်းနိုင်ငံရဲ့ ဒေသတချို့မှာ အပူချိန်ဟာ -၁၂ ဒီဂရီစင်တီဂရိတ်လောက်အထိ ကျဆင်းသွားခဲ့ပါတယ်။

တိုက်ခိုက်မှုတွေ ဖြစ်ပွားပြီးနောက် ထုတ်ပြန်တဲ့ ကြေညာချက်မှာ ဇလန်စကီးက က "ရုရှားတွေရဲ့ အဓိကပစ်မှတ်ကဟာ စွမ်းအင်အခြေခံအဆောက်အအုံ တွေပါ" လို့ ပြောကြားခဲ့ပါတယ်။

ပြီးခဲ့တဲ့အပတ်က ရုရှားက ကိယက်ဗ်မြို့ရဲ့ လျှပ်စစ်အဆောက်အအုံတွေကို တိုက်ခိုက်ခဲ့တာကြောင့် ဇလန်းစကီး ဟာ ဆွစ်ဇာလန်နိုင်ငံ၊ ဒါးဗို့စ်မှာ ကျင်းပမယ့် ကမ္ဘာ့စီးပွားရေးဖိုရမ်ကို တက်ရောက်မယ့် ခရီးစဉ်ကို ဖျက်သိမ်းခဲ့ရပါတယ်။

Kharkiv မြို့တော်ဝန် Ihor Terekhov က စနေနေ့ မနက်အစောပိုင်းမှာ ဖြစ်ပွားခဲ့တဲ့ တိုက်ခိုက်မှုတွေအတွင်း လူ ၃၁ ဦး ဒဏ်ရာရရှိခဲ့တယ်လို့ ပြောပါတယ်။

မီးဖွားဆေးရုံနဲ့ အိုးမဲ့အိမ်မဲ့တွေအတွက် တည်းခိုခန်းတစ်ခု ပျက်စီးသွားခဲ့ပါတယ်။

ရုရှားနိုင်ငံက ယူကရိန်းနိုင်ငံရဲ့ ၂၀% ခန့်ကို သိမ်းပိုက်ထားပြီး အဲ့ဒီထဲမှာ အရှေ့ပိုင်း ဒွန်ဘတ်စ်ဒေသရဲ့ အစိတ်အပိုင်းအချို့လည်း ပါဝင်ပါတယ်။

ရုရှားက ယူကရိန်းအနေနဲ့ နယ်မြေရဲ့ ကြီးမားတဲ့ ဧရိယာတွေကို လွှဲပြောင်းပေးစေလိုပေမဲ့ ယူကရိန်းက အဆိုပါကိစ္စကို ငြင်းဆိုထားပါတယ်။

ဒါးဗို့စ်မှာ ဇလင်စကီးက “အားလုံးက နယ်မြေကိစ္စပါ။ ဒါက မဖြေရှင်းရသေးတဲ့ ပြဿနာပါ” လို့ ပြောကြားခဲ့ပါတယ်။

Reference-BBC
Translator-Richard
Photo-Reuters

#bbmnews #bbm #bbmtv #Russia #Ukarain #internationalnews
https://www.facebook.com/share/p/186Qu5ZJ5q/

နီပါဗိုင်းရပ်စ်ဟာ သေဆုံးမှုနှုန်း ၅၀%-၇၀%အထိ
မြင့်မားပြီး ကုသဆေးမရှိသေးသလို လူ-လူချင်း ကူးစက်တတ်

BBM - ဇန်နဝါရီ ၂၅

နီပါ ဗိုင်းရပ်စ်ဟာ သေဆုံးမှုနှုန်း ၅၀-၇၀% ရှိပြီး တိကျတဲ့ ကုထုံးမရှိသေးဘဲ အန္တရာယ်ရှိတဲ့ ကူးစက်ရောဂါတစ်ခုဖြစ်ပါတယ်။

အဆိုပါရောဂါဟာ တိရစ္ဆာန်တွေမှ လူသားတွေဆီကို ကူးစက်နိုင်ပြီး သစ်သီးစား လင်းနို့တွေက အဓိက သယ်ဆောင်သူတွေဖြစ်ပါတယ်။

ဒါ့အပြင် ရောဂါပိုးရှိသူတဲ့လူရဲ့ တံတွေး၊ ဆီးနဲ့ မစင်ကဲ့သို့ ခန္ဓာကိုယ်အရည်တွေနဲ့ နီးကပ်စွာထိတွေ့ရုံနဲ့ လူတစ်ဦးမှ တစ်ဦးကို ကူးစက်နိုင်ပါတယ်။

နီပါ ဗိုင်းရပ်စ်ကို ပြည်သူ့ကျန်းမာရေးဝန်ကြီးဌာနရဲ့ စည်းမျဉ်းတွေအရ အန္တရာယ်ရှိတဲ့ ကူးစက်ရောဂါတစ်ခုအဖြစ် သတ်မှတ်ထားပါတယ်။

အဆိုပါ ဗိုင်းရပ်စ်ဟာ ရောဂါပိုးကူးစက်ခံရတဲ့ တိရစ္ဆာန်တွေ အထူးသဖြင့် သစ်သီးစား လင်းနို့တွေရဲ့ ခန္ဓာကိုယ်အရည်တွေနဲ့ တိုက်ရိုက်ထိတွေတဲ့အခါ ကူးစက်တတ်ပါတယ်။

ရောဂါပိုးကူးစက်ခံရတဲ့ လင်းနို့တွေကိုက်ထားတဲ့ သစ်သီးတွေ ဒါမှမဟုတ် ညစ်ညမ်းတဲ့ အဖျော်ယမကာတွေနဲ့ အစားအစာတွေကို စားသုံးမိတဲ့အခါတွေမှာလည်း ကူးစက်နိုင်ပါတယ်။

အဆိုပါ ရောဂါဟာ တုပ်ကွေးကဲ့သို့ ရောဂါလက္ခဏာတွေမှ အသက်ရှူလမ်းကြောင်းဆိုင်ရာ ရောဂါပိုးတွေ ပြင်းထန်စွာကူးစက်ခံရတာ၊ ဦးနှောက်အမြှေးရောင်ရောဂါ ပြင်းထန်စွာဖြစ်ပွားတာမျိုးအထိ ပြင်းထန်တဲ့ ရောဂါလက္ခဏာတွေကို ဖြစ်စေနိုင်ပါတယ်။

ပြင်းထန်တဲ့ကိစ္စတွေမှာ လူနာတွေဟာ တက်တာတွေ ခံစားရပြီး ၂၄-၄၈ နာရီအတွင်း မေ့မြောသွားနိုင်ပါတယ်။

ဦးနှောက်အမြှေးရောင်ရောဂါမှ အသက်ရှင်ကျန်ရစ်သူတွေဟာ ယေဘုယျအားဖြင့် ကောင်းမွန်စွာ ပြန်လည်ကောင်းမွန်လာပေမဲ့ ၂၀% ခန့်ဟယ တက်တာ ဒါမှမဟုတ် စရိုက်ပြောင်းလဲမှုတွေလို ရေရှည်အာရုံကြောဆိုင်ရာ သက်ရောက်မှုတွေကို ခံစားရနိုင်ပါတယ်။

သေဆုံးမှုနှုန်း ၅၀ ကနေ ၇၀% ရှိတဲ့ နီပါ ဗိုင်းရပ်စ်ဟာ အိန္ဒိယနိုင်ငံမှာ ပျံ့နှံ့လျက်ရှိပါတယ်။

ကုသရဖို့ နည်းလမ်းမရှိ‌သေးပါဘူး။

တိရစ္ဆာန်တွေမှတစ်ဆင့် လူသားတွေကိုကူးစက်ပြီး အဲ့ဒီကနေတစ်ဆင့် လူတစ်ဦးမှ တစ်ဦးကို ကူးစက်နိုင်ပါတယ်။

သို့သော်လည်းပဲ နီပါ ဗိုင်းရပ်စ်ဟာ သစ်သီးလင်းနို့တွေမှ ဝက်၊ မြင်း၊ ကြောင်နဲ့ ခွေးတွေအပါအဝင် အခြားတိရစ္ဆာန်တွေကို ကူးစက်ပြီး နောက်ပိုင်းမှာ လူသားတွေဆီ ကူးစက်နိုင်ပါတယ်။

ဒါကြောင့် ဗိုင်းရပ်စ်ဟာ တစ်နေရာရာမှာ မရှိပါက လူမှလူကို ကူးစက်တာမျိုးမရှိပါဘူး။

Reference-The Nation Thailand
Translator-Richard
Photo-The Nation Thailand

#bbmnews #bbm #bbmtv #internationalnews #virus
https://www.facebook.com/share/p/1AUuHzxEGq/

မင်နီယာပိုလစ်မှာ အမေရိကန် ဖက်ဒရယ်အေးဂျင့်တွေက နောက်ထပ်လူတစ်ဦးကို ပစ်သတ်ခဲ့တယ်လို့ အုပ်ချုပ်ရေးမှူးပြောကြား

BBM - ဇန်နဝါရီ ၂၅

အမေရိကန်နိုင်ငံ၊ မင်နီဆိုယာပိုလစ်မှာ လူဝင်မှုကြီးကြပ်ရေး နှိမ်နင်းမှုတွေ ပြုလုပ်နေစဉ်အတွင်း ဖက်ဒရယ်အေးဂျင့်တွေက နောက်ထပ်လူတစ်ဦးကို ပစ်ခတ်ခဲ့ကြောင်း မင်နီဆိုတာပြည်နယ် အုပ်ချုပ်ရေးမှူး တင်ဝေါ့ဇ်က ပြောကြားခဲ့ပါတယ်။

အမေရိကန်လူဝင်မှုကြီးကြပ်ရေးဆိုင်ရာ ရဲတပ်ဖွဲ့နဲ့ အခြားဖက်ဒရယ်အေးဂျင့်တွေက မင်နီဆိုတာပြည်နယ်ကို ရက်သတ္တပတ်များစွာကြာ စစ်ဆေးမှုတွေလုပ်ဆောင်စဉ် ဖြစ်ပွားခဲ့တဲ့ “ထိတ်လန့်ဖွယ်ပစ်ခတ်မှု” ဖြစ်ပွားခဲ့ပါတယ်။

အဆိုပါကိစ္စကို အိမ်ဖြူတော်နဲ့ စကားပြောဆိုခဲ့ကြောင်း ဇန်နဝါရီလ ၂၄ရက် စနေနေ့မှာ ဝေါ့ဇ်က ပြောကြားခဲ့ပါတယ်။

“မင်နီဆိုတာမှာ ကြုံခဲ့ရတယ်။ ဒါက စက်ဆုပ်ရွံရှာဖွယ်ကောင်းတယ်။ သမ္မတက ဒီစစ်ဆင်ရေးကို အဆုံးသတ်ရမယ်။ အကြမ်းဖက်တဲ့ ရဲအရာရှိထောင်ပေါင်းများစွာကို မင်နီဆိုတာကနေ ဆုတ်ခွာခိုင်းရမယ်။ အခုချင်ချင်းပဲ” လို့ ဝေါ့ဇ် က လူမှုမီဒီယာမှာ ရေးသားခဲ့ပါတယ်။

စနေနေ့က ပစ်ခတ်မှုရဲ့ တိကျတဲ့အခြေအနေတွေအပြင် ပစ်ခတ်ခံရသူရဲ့ အထောက်အထားနဲ့ အခြေအနေကို ချက်ချင်း ရှင်းရှင်းလင်းလင်း မသိရသေးပါဘူး။

လူမှုမီဒီယာမှာ ပျံ့နှံ့နေတဲ့ ဗီဒီယိုမှတ်တမ်းတွေအရ အမေရိကန် ဥပဒေစိုးမိုးရေးအရာရှိအဖွဲ့တစ်ဖွဲ့ဟာ သေနတ်သံတွေ မကြားခင် လူတစ်ယောက်ကို မြေပြင်ပေါ် လဲကျအောင် နှောင့်ယှက်နေတာကို တွေ့ရပါတယ်။

ဒီပစ်ခတ်မှုဟာ လူဝင်မှုကြီးကြပ်ရေးနဲ့ အကောက်ခွန်ဌာန (ICE) ရဲ့ အရာရှိတစ်ဦးက ဒီလအစောပိုင်းက မင်နီယာပိုလစ်မြို့က Renee Nicole Good ဆိုတဲ့ အမျိုးသမီးတစ်ဦးကို သူမရဲ့ကားထဲမှာ ပစ်ခတ်သတ်ဖြတ်ပြီး ရက်သတ္တပတ်အနည်းငယ်အကြာမှာ ဖြစ်ပွားခဲ့တာပါ။

အမေရိကန်သမ္မတ ဒေါ်နယ်ထရမ့် နဲ့ သူ့ရဲ့အစိုးရအဖွဲ့ရဲ့ အကြီးတန်းအဖွဲ့ဝင်တွေဟာ နိုင်ငံရဲ့သမိုင်းမှာ အကြီးမားဆုံး နှင်ထုတ်မှုစစ်ဆင်ရေးကို ဆောင်ရွက်ဖို့ ICE နဲ့ တခြားဖက်ဒရယ်အရာရှိတွေကို မင်နီယာပိုလစ်မြို့ကို စေလွှတ်ဖို့ အကြောင်းပြချက်ပေးခဲ့ကြပါတယ်။

ဒါပေမယ့် ဒေသခံတွေနဲ့ ရွေးကောက်ခံအရာရှိတွေက ထရမ့်အစိုးရရဲ့ လူဝင်မှုကြီးကြပ်ရေးဆန့်ကျင်ရေးမူဝါဒတွေအတွက် ရှုတ်ချခဲ့ပြီး သူတို့ရဲ့လမ်းတွေပေါ်မှာ လက်နက်ကိုင်ရဲအရာရှိတွေ ရှိနေတာက လူတွေကို ပိုလုံခြုံစေမှာ မဟုတ်ဘူးလို့ ပြောကြားခဲ့ပါတယ်။

မင်နီဆိုတာပြည်နယ်ကိုယ်စားပြု ဒီမိုကရက်တစ်အမေရိကန်အထက်လွှတ်တော်အမတ် အေမီ ကလိုဘူချာက စနေနေ့က ပစ်ခတ်မှုနဲ့ ပတ်သက်ပြီး အချက်အလက်တွေ ပိုမိုရရှိဖို့ လုပ်ဆောင်နေကြောင်း ပြောကြားခဲ့ပါတယ်။

“ ထရမ့်အစိုးရနဲ့ ကွန်ဂရက်လွှတ်တော်ရှိ ရီပတ်ဘလီကန်အမတ်‌ေတွအ‌ေနနဲ့- ICE ကို ကျွန်မတို့ပြည်နယ်မှ အခုပင် ထွက်ခွာသွားစေပါ” လို့ သူမက X မှာ ရေးသားခဲ့ပါတယ်။

မင်နီယာပိုလစ်မြို့ကလည်း ဖြစ်ပျက်ခဲ့တဲ့ အရာတွေနဲ့ ပတ်သက်ပြီး အသေးစိတ်အချက်အလက်တွေကို စုဆောင်းဖို့ လုပ်ဆောင်နေစဉ် ဒေသခံတွေကို “စိတ်အေးအေးထားဖို့နဲ့ အခင်းဖြစ်ပွားရာနေရာကနေ ရှောင်ရှားဖို့” တိုက်တွန်းခဲ့ပါတယ်။

Reference-Al Jazeera
Translator-Richard
Photo-Al Jazeera

#bbmnews #bbm #bbmtv #USA #propaganda #InternationalNews
https://www.facebook.com/share/p/18AjvoUdCV/

ရန်ကုန်မှာ ရွေးကောက်ပွဲဆန့်ကျင်ကန့်ကွက်ကြောင်း Bluetooth Speaker ဖွင့်ပြီး ဆန္ဒထုတ်ဖော်

BBM - ဇန်နဝါရီ ၂၅
သတင်း - ခက်ဆစ်

ရန်ကုန်မြို့ရှိ လူစည်းကားရာ နေရာမှာ စစ်ကောင်စီရဲ့ အတုအယောင်ရွေးကောက်ပွဲကို ဆန့်ကျင်ကန့်ကွက်ကြောင်း Bluetooth Speaker ဖွင့်ပြီး လူထုအသံ အစစ်အမှန်ကို ထုတ်ဖော်တဲ့ လှုပ်ရှားမှု ပြုလုပ်ခဲ့တယ်လို့ စမ်းချောင်းပင်မသပိတ်စစ်ကြောင်း ယမန်နေ့ ညပိုင်းမှာ ထုတ်ပြန်ထားပါတယ်။

အတုအယောင် ရွေးကောက်ပွဲကို လူထုက လုံးဝဆန့်ကျင်ကန့်ကွက်ကြောင်း၊ လက်မခံကြောင်းကို ဆိတ်သုဉ်းနေတဲ့ လူထုအသံနဲ့ လူထုဆန္ဒ အစစ်အမှန်ကို ရန်ကုန်မြို့ပြ လူစည်ကားတဲ့နေရာမှာ Bluetooth Box ဖွင့်ပြီး စမ်းချောင်းပင်မသပိတ်စစ်ကြောင်းနဲ့ ရန်ကုန်ပြည်သူလူထုက အတုအယောင်ရွေးကောက်ပွဲ ဆန့်ကျင်ရေး People’s Voices Action လူထုလှုပ်ရှားမှုနဲ့ ဆန္ဒဖော်ထုတ်ခဲ့ကြတယ်လို့ ဆိုပါတယ်။

ရွေးကောက်ပွဲကို လူထုက လုံးဝမယုံကြည်၊ လက်မခံသော်လည်း ပြည်တွင်းမှာ စစ်တပ်က ပြည်သူတွေကို ခြိမ်းခြောက်တာ၊ ဖမ်းစီးတာနဲ့ စစ်ကြောရေးသို့ပို့ဆောင်ပြီး သတ်ဖြတ်တာ စတဲ့ လူ့အခွင့်အရေးချိုးဖောက်မှုတွေနဲ့ စစ်ရာဇဝတ်မှုတွေကို ပြောင်ပြောင်တင်းတင်းချိုးဖောက်ပြီး ပြည်သူတွေကို ဖိနှိပ်လျက်ရှိတာကြောင့် လူထုရဲ့ ဆန္ဒအမှန်နဲ့ လူထုအသံတို့ဟာ ဆိတ်သုဉ်းနေတယ်လို့ အသိပေးထားပါတယ်။

စစ်အုပ်စုဟာ လူထုကို အကျပ်ကိုင်ခြိမ်းခြောက်တာအပြင် ကြိုတင်မဲတွေနဲ့ မဲလိမ်မဲခိုးတာ၊ စစ်တပ်လက်ပါးစေ ရွေးကောက်ပွဲကော်မရှင်အနေနဲ့လည်း အကျင့်ပျက်ခြစားမှု၊ တရားမဝင် နည်းလမ်းမျိုးစုံနဲ့ အတုအယောင်ရွေးကောက်ပွဲ ပြုလုပ်ပြီး အာဏာထပ်မံသိမ်းယူဖို့ ကြိုးပမ်းနေခြင်းဖြစ်တယ်လို့ စမ်းချောင်းပင်မသပိတ်စစ်ကြောင်းက အသိပေးထုတ်ပြန်ထားပါတယ်။

Video - စမ်းချောင်းပင်မသပိတ်စစ်ကြောင်း

#bbmnews #bbm #bbmtv #election #sanchaung
https://www.facebook.com/share/v/16tTYcv5Ra/

မွန်တောင်ပိုင်းမှာ စစ်ကောင်စီစစ်ကြောင်းထိုးနေသဖြင့် ဒေသခံတွေ ဥယျာဉ်ခြံသွားလာဖို့ အခက်ကြုံနေ

BBM - ဇန်နဝါရီ ၂၅
သတင်း - မင်းဟန်

မွန်ပြည်နယ်တောင်ပိုင်းမှာ စစ်ကောင်စီတပ်က အင်အားအများအပြားနဲ့ စစ်ကြောင်းထိုးနေတာကြောင့် ဒေသခံတွေ ဥယျာဉ်ခြံသွားလာဖို့ ခက်ခဲနေတဲ့အပြင် ဖမ်းဆီးခံရသူတွေလည်း ရှိနေတယ်လို့ ရော်ဘာခြံပိုင်ရှင်တွေနဲ့ ခြံလုပ်သားတွေက ပြောပါတယ်။

အခုနှစ်အစပိုင်းမှာ ရွေးကောက်ပွဲအကြောင်းပြပြီး အင်အားထောင်ချီ အသုံးပြုထားတဲ့ စစ်ကောင်စီတပ်ဟာ မော်လမြိုင်-ရေး အမှတ်(၈)ပြည်ထောင်စုလမ်းပိုင်းအပါအဝင် သံဖြူဇရပ်၊ ရေး၊ မုဒုံ၊ ကျိုက်မရောမြို့နယ်အတွင်း ကျေးရွာတွေဘက်ကို စစ်ကြောင်းထိုးနေတာပါ။

စစ်ကြောင်းထိုးလာတဲ့ စစ်ကောင်စီတပ်ဟာ ဒေသခံတွေအပါအဝင် ဥယျာဉ်ခြံလုပ်ငန်းမှာ အလုပ်လုပ်နေသူတွေကိုပါ မကျန် ဖမ်းဆီးနေတဲ့အတွက် ဥယျာဉ်ခြံလုပ်ငန်းခွင်သွားလာဖို့ အခက်ကြုံနေရတယ်လို့ သံဖြူဇရပ်မြို့နယ်မှ ရော်ဘာခြံပိုင်ရှင်တဦးက BBM ကို ပြောပါတယ်။

“ရွာတွေ ရှိတဲ့ဘက်ကို ဝင်လာတယ်၊ ပြီးတော့ ခြံထဲမှာ ကင်းပုန်းချလိုက်တော့ ဒီအလုပ်သမားတွေ ဘယ်လိုမှ ခြံထဲမသွားရဲတော့ဘူး၊ ဒီအချိန်က ရာဘာဆို ခြစ်နေရတဲ့ကာလ၊ အများကြီးပါပဲ၊ ဒုက္ခတွေ ရောက်ကြတာပေါ့” လို့ ပြောပါတယ်။

ယခုကာလဟာ ရော်ဘာအစေးခြစ်တဲ့ရာသီဖြစ်နေပေမဲ့ အခုလို စစ်တပ်စစ်ကြောင်းထိုးပြီး ခြံထဲ တပ်စွဲနေတဲ့ အတွက် လုပ်ငန်းအတွက် သက်ရောက်မှု ကြီးမားတယ်လို့ သူက ဆက်ပြောပါတယ်။

တဖက်မှာလည်း စစ်ကောင်စီတပ်ဖွဲ့တွေဟာ စစ်ကြောင်းထိုးရာ လမ်းတလျှောက်မှာ တွေ့ရှိသူမှန်သမျှကို ဖမ်းဆီးမှုများ ပြုလုပ်နေသလို အချို့ဆို စစ်ကြောင်းနဲ့အတူ ပေါ်တာဆွဲခံရတာ ရှိနေတယ်လို့ ဆိုပါတယ်။

“ဒီရေးနယ်တခွင်ဆို သူတို့(စစ်တပ်)ဝင်ပြီဆို ခြံထဲရော၊ ရွာကလူတွေရော ရှောင်ပြေးပြီး ဘယ်မှ မသွားရဲ မလာရဲ ဖြစ်ကုန်တယ်၊ သူတို့က ဖမ်းပြီး ပြန်မလွတ်ဘူး၊ ငွေတောင်းမယ်၊ မရရင် ပေါ်တာဆွဲသွားမယ်၊ ဒီတလောတောင် ရေးမှာ ဖမ်းခံရတာ ရှိတယ်” လို့ ရေးမြို့နယ် မော့ကနင်ကျေးရွာအနီးတဝိုက်မှာ ရော်ဘာအစေးခြစ်ခဲ့ဖူးသူတဦးက ပြောပါတယ်။

အဲဒီဖမ်းဆီးခံရတဲ့သူတွေထဲက လူငယ်ဖြစ်ပါက စစ်မှုထမ်းသင်တန်းပို့ဆောင်လိုက်တာမျိုး ရှိသလို အချို့ဆို ငွေကျပ်သိန်း ၂၀ ကနေ ၅၀ အထိ ပြန်ရွေးခိုင်းတာမျိုးလည်း ရှိတယ်လို့ သူက ဆက်ပြောပါတယ်။

ဇန်နဝါရီလ တတိယအပတ်ထဲမှာပင် ရေးမြို့နယ်မှာ ဖမ်းဆီးခံရတဲ့သူ ၁၀ ဦးထက်မနည်း ရှိခဲ့ပြီး အများစုကို ပြန်လွတ်ပေးခြင်းမရှိသေးသလို မိသားစုနဲ့လည်း အဆက်အသွယ်မရသေးဘူးလို့ BBM က စုံစမ်းသိရှိရပါတယ်။

လက်ရှိ အစေးခြစ်လက်စ ရော်ဘာခြံအများအပြား ရပ်ထားရသလို အချို့ဆို အလုပ်သမားခေါ်ယူလို့ မရတဲ့ ပြဿနာနဲ့ ကြုံတွေ့နေရတယ်လို့ ရော်ဘာခြံပိုင်ရှင်အချို့က ပြောပါတယ်။

“အခုက တချို့ခြံတွေ အရွက်ကျတော့ နားထားတာ ရှိတာပေါ့၊ ဒါပေမဲ့ ဒီတခါ ပြန်စရင် အလုပ်သမား မရှိနေဘူး၊ ခေါ်မရတာလေ၊ အကုန်ပြန်ကုန်ပြီး တချို့ဆိုလေ၊ မနေရဲတာ၊ ဒီရေးမြောက်ပိုင်းကားလမ်းမနားဆို တိုက်ပွဲ ခဏခဏ ဖြစ်နေတော့ တခါတလေ လက်နက်ကြီးက ခြံထဲကို ကျတာ အလုပ်သမားတွေ ထိတာပေါ့၊ အမျိုးမျိုးပါပဲ၊ ကျွန်တော်တို့လည်း အလုပ်သမားမရှိတော့ အလုပ်ပြန်စလို့ မရဘူး” လို့ ရေးမြို့နယ်မှ ရော်ဘာခြံပိုင်ရှင်တဦးက ပြောပါတယ်။

မွန်ပြည်နယ်မှာ ရော်ဘာလုပ်ငန်းအပါအဝင် ဥယျာဉ်ခြံလုပ်ငန်းအတွက် ပဲခူး၊ စစ်ကိုင်း၊ မကွေး အစရှိတဲ့ အလယ်ပိုင်းနဲ့ အထက်ပိုင်းဒေသမှ အလုပ်သမားအများစုက မိသားစုအလိုက် လာရောက်လုပ်ကိုင်နေကြတာ ဖြစ်ပါတယ်။

ဓါတ်ပုံ - Social Media
ပုံစာ - မွန်ပြည်နယ်အတွင်းရှိ ရော်ဘာအစေးခြစ်လုပ်ငန်းခွင် (ပုံဟောင်း)
https://www.facebook.com/share/p/1HX7brM5ef/

စစ်ကောင်စီရဲ့ မိုင်းတွေကို AA ရှင်းနေသော်လည်း ဒေသခံပြည်သူများ ထိခိုက်မှုများရှိနေသေး

BBM - ဇန်နဝါရီ ၂၅
သတင်း - သော်

ရခိုင်ပြည်နယ်အတွင်း မြို့သိမ်းတိုက်ပွဲတွေအပြီး အာရက္ခတပ်တော်က နယ်မြေရှင်းလင်းရေးနဲ့ မိုင်းရှင်းလင်းရေးတွေကို ဆက်တိုက်ဆိုသလို အရှိန်အဟုန်မြှင့် ဆောင်ရွက်နေပေမယ့်လည်း စစ်ကောင်စီနဲ့ တခြားလက်နက်ကိုင်အဖွဲ့တွေ ထောင်ထားခဲ့တဲ့ မိုင်းတွေကြောင့် ဒေသခံပြည်သူတွေဟာ ထိခိုက်မှုတွေ ရှိနေသေးတယ်လို့ သိရပါတယ်။

စစ်ကောင်စီတပ်ဖွဲ့ဝင်တွေဟာ သူတို့ အခြေစိုက်ခဲ့တဲ့ စခန်းတွေမှာသာမက အရပ်သားအလုပ်လုပ်ကိုင်ရာ လယ်ယာခင်းတွေ၊ တောင်ယာတွေနဲ့ လမ်းဘေးဝဲယာတွေမှာပါ မိုင်းတွေကို ထောင်ထားခဲ့တာပါ။

ပြီးခဲ့တဲ့ ဇန်နဝါရီလ ၂၁ ရက်နေ့က မောင်တောမြို့နယ် အမှတ် ၇၆၆ တပ်ရင်းအနီးနဲ့ မြကံသာဆည်ပတ်ဝန်းကျင်တို့မှာ AA က မိုင်းရှင်းလင်းရေးတွေ ပြုလုပ်ရာ M-14 နင်းမိုင်း ၇၈ လုံးထိ ရှာဖွေနိုင်ခဲ့ပါတယ်။

ဒီမိုင်းတွေဟာ စစ်ကောင်စီတပ်တွေသာမက ဘူးသီးတောင်-မောင်တောနယ်စပ်မှာ လှုပ်ရှားနေတဲ့ ARSA ၊ RSO နဲ့ ARA အဖွဲ့တွေကလည်း ထောင်ထားခဲ့တာဖြစ်တယ်လို့ သိရပါတယ်။

“အဓိကက ပြည်သူတွေအတွက် မိုင်းအန္တရာယ် အသိပညာပေးမှုတွေ လိုအပ်နေတယ်၊ ဘယ်လိုပစ္စည်းက မိုင်းလဲ၊ မိုင်းရှိနိုင်တာက ဘယ်နေရာတွေလဲ၊ ဘယ်လို ခွဲခြားမလဲဆိုတာမျိုးပေါ့၊ ဒါတွေကို သိထားမှ အသက်အန္တရာယ်ကနေရော ကိုယ်လက်အင်္ဂါဆုံးရှုံးတာရောကပါ ကာကွယ်နိုင်မှာ”လို့ ရခိုင်ဒေသခံတစ်ဦးက ပြောပါတယ်။

၂၀၂၅ ခုနှစ်အတွင်းကလည်း ရခိုင်ပြည်နယ်ဟာ မြေမြှုပ်မိုင်းနဲ့ စစ်ကျန်လက်နက်တွေကြောင့် သေဆုံးသူ ၂၁ ဦးနဲ့ ဒဏ်ရာရရသူ ၈၁ ဦးအထိ ရှိခဲ့တယ်လို့ သိရပါတယ်။

အခုနှစ် နှစ်စမှာတင် မောင်တောမြို့နယ်က ဒေသခံအမျိုးသားတစ်ဦးဟာ သစ်ခုတ်သွားစဉ် နင်းမိုင်းကို နင်းမိတာကြောင့် အပြင်းအထန်ဒဏ်ရာရခဲ့သလို အမ်းမြို့နယ်မှာလည်း ၈ နှစ်အရွယ်ကလေးငယ်တစ်ဦး မိုင်းကြောင့်ပဲ သေဆုံးခဲ့ရပါတယ်။

“မြို့တွေကို AA က သိမ်းပြီးတော့ ကိုယ့်အိမ်ကိုယ် ပြန်ကြတယ်၊ စားဝတ်နေရေးအတွက်လည်း တောတောင်ထဲ ပြန်ဝင်ကြရတာပေါ့၊ မိုင်းတွေက ရှိနေသေးတော့ သတိထားသွားရတယ်”လို့ မောင်တောမြို့နယ် ဒေသခံတစ်ဦးက ပြောပါတယ်။

အာရက္ခတပ်တော်အနေနဲ့ နယ်မြေရှင်းလင်းတာ၊ ပြန်လည်ထူထောင်တာနဲ့ စစ်ကျန်လက်နက်တွေကို ရှင်းလင်းနေပေမယ့်လည်း အလုံးစုံရှင်းနိုင်ဖို့အတွက် နိုင်ငံတကာ အကူအညီတွေလည်း လိုအပ်တယ်လို့ အာရက္ခတပ်တော်နဲ့ နီးစပ်သူတွေက ပြောပါတယ်။

ပြည်သူတွေအနေနဲ့ တိုက်ပွဲဖြစ်ခဲ့တဲ့ နေရာတွေကို မသွားဖို့ စစ်စခန်းဟောင်းတွေနဲ့ စွန့်ပစ်ထားတဲ့ ကတုတ်ကျင်းတွေနားကို မသွားဖို့ မိုင်းအန္တရာယ်ရှိကြောင်းပြထားတဲ့ အမှတ်အသားတွေကိုလည်း ကြည့်ဖို့ အာရက္ခတပ်တော်က သတိပေးထုတ်ပြန်ထားပါတယ်။

Photo-AA Info Desk
https://www.facebook.com/share/p/1Mo9WTHRj8/

မြိုင်မြို့နယ်အတွင်း ရိက္ခာရှာနေတဲ့ စကစ တွေကို သွားတိုက်ရာမှာ စကစ ကင်းပုန်းနဲ့တွေ့ပြီး တိုက်ပွဲဖြစ်ပွါး

🟥စကစ ဘက်မှ (၂)ဦးသေဆုံးပေမဲ့ တော်လှန်ရေးရဲဘော်(၃)ဦးသေကာ (၁)ဦးအရှင်ဖမ်းခံရ

BBM-ဇန်နဝါရီ၂၅
သတင်း-ကိုဘုဏ်း

မကွေးတိုင်းမြိုင်မြို့နယ်အတွင်း ရိက္ခာရှာနေတဲ့ စစ်ကောင်စီတပ်သားတွေကို သွားတိုက်ခိုက်ရာမှာ စကစ ကင်းပုန်းနဲ့တွေ့ပြီး တိုက်ပွဲဖြစ်ပွါးကာ စကစ ဘက်မှ (၂)ဦးသေဆုံးပေမဲ့ တော်လှန်ရေးရဲဘော်(၃)ဦးသေကာ (၁)ဦးအရှင်ဖမ်းခံခဲ့ရတယ်လို့ မြိုင် ပကဖ ရဲ့ထုတ်ပြန်ချက်အရ သိရပါတယ်။

ပြီးခဲ့တဲ့ ဇန်နဝါရီလ ၁၅ရက်နေ့က ကင်းထောက်ဒရုန်းများနဲ့ကြည့်ရှုချက်အရ စစ်ကောင်စီတပ်များနဲ့ မြိုင်မြို့နယ် ကန်နီပျူစောထီးရွာက ပျူများကထန်းအူများပေါက်ကာ ရိက္ခာရှာနေတာကို တွေရှိခဲ့တယ်လို့သိရပါတယ်။

ထိုသို့ပြုလုပ်နေတဲ့နေရာကို ဇန်နဝါရီလ ၂၂ရက်နေ့မှာ မြိုင်ပကဖမှ ရဲဘော်များက စတင် ချည်းကပ်ရာ စစ်ကောင်စီရဲ့ ကင်းပုန်းများနဲ့ ထိတွေတိုက်ပွဲ တစ်နာရီခန့်ဖြစ်ပွားခဲ့ပါတယ်။

တိုက်ပွဲအတွင်း စစ်ကောင်စီနဲ့ပျူစောထီးများဘက်က ပစ်အားသာလွန်းတာကြောင့် တော်လှန်ရေးတပ်ဖွဲ့များမှ နောက်ဆုတ်ပေးခဲ့ရပြီး စကစ ဘက်မှ ပျူစောထီး ၂ဦးသေခဲ့ပေမဲ့တော်လှန်ရေးရဲဘော် ၃ဦးကျဆုံးကာ ၁ ဦးအရှင်အဖမ်းခံရတယ်လို့ သိရပါတယ်။

ယခုလက်တလောအချိန်တွင် မြိုင်မြို့နယ်အတွင်းစစ်ကောင်စီ စခန်းများ ပိုမို လူပ်ရှားလာပြီး မြေပြင်ခေါင်းဆောင်များအနေနဲ့ ရန်သူ့သတင်းကို စနစ်တကျ ထောက်လှမ်းပြီးမှ သွားကြရန်နဲ့ စစ်ရေးဖော်ဆောင်ကြရန် မြိုင်မြို့နယ် ပကဖ ထုတ်ပြန်ကြေငြာထားပါတယ်။

Photo-မြိုင်ပကဖ
https://www.facebook.com/share/p/1G7tc5TUTq/

ရွေးကောက်ပွဲအပိုင်း(၃) ပြုလုပ်နေတဲ့ တနင်္သာရီတိုင်းမှာ ပေါက်ကွဲမှုတွေ ဖြစ်ပေါ်

BBM - ဇန်နဝါရီ ၂၅
သတင်း - ကိုဟန်

ရွေးကောက်ပွဲ အပိုင်း ၃ ပြုလုပ်နေတဲ့ တနင်္သာရီတိုင်းရှိ မြို့နယ်တခုက မဲရုံအနီးမှာ ဒီကနေ့ မနက်ပိုင်းက ပေါက်ကွဲမှုတွေ ဖြစ်ပေါ်ခဲ့တယ်လို့ ဒေသခံတွေက ပြောပါတယ်။

ဒီကနေ့ ဇန်နဝါရီလ ၂၅ ရက်မှာ စစ်အုပ်စုပြုလုပ်တဲ့ ရွေးကောက်ပွဲအပိုင်း(၃)အတွင်း တနင်္သာရီတိုင်းမှာ သရက်ချောင်း၊ လောင်းလုံးနဲ့ ပုလောမြို့နယ်တို့ ပါဝင်ပါတယ်။

စစ်ကောင်စီတပ်ဟာ လုံခြုံရေးအများအပြားအသုံးပြုထားတဲ့ ရွေးကောက်ပွဲနေ့ မနက် ၁၀ နာရီခန့်က သရက်ချောင်းမြို့နယ် ပိန်းတောရွာရှိ မဲရုံအနီးပတ်ဝန်းကျင်မှာ ပေါက်ကွဲမှုတွေ ရှိခဲ့တာလို့ ဒေသခံတဦးက BBM ကို ပြောပါတယ်။

“ပေါက်ကွဲအသံတော့ ကြားလိုက်တယ်၊ တခါတည်းမဟုတ်ဘူး၊ နှစ်ခါ၊ သုံးခါလောက်ရှိတယ်၊ ဒီ ပိန်းတောမှာ မဲရုံ ရှိတယ်လေ အဲဒီအနားတဝိုက်မှာ တလုံးကြားရတယ်” လို့ ပြောပါတယ်။

ပေါက်ကွဲမှုကြောင့် ထိခိုက်မှု ရှိ၊ မရှိကို မသိရသေးသလို ဘယ်အဖွဲ့က လုပ်ဆောင်ခဲ့တာကို ထုတ်ပြန်ထားခြင်း မရှိသေးပါဘူး။

ရပ်ကွက်ကျေးရွာ ၁၀၀ ဝန်းကျင်ရှိတဲ့ သရက်ချောင်းမြို့နယ်မှာ မြို့ပေါ်ရပ်ကွက်နဲ့ ကျေးရွာအချို့မှာသာ ရွေးကောက်ပွဲပြုလုပ်နေတာ ဖြစ်ပါတယ်။

သရက်‌ချောင်းမြို့နယ်အပါအဝင် လောင်းလုံးနဲ့ ပုလောမြို့နယ်တို့ဟာ တော်လှန်ရေးအားကောင်းတဲ့ မြို့နယ်တွေ ဖြစ်ကြပြီး စစ်တပ်က သူတို့တပ်အထိုင်ချထားတဲ့ တပ်ရင်းတပ်စခန်းရှိတဲ့ ကျေးရွာတွေနဲ့ မြို့ပေါ်နေရာအချို့မှာ ရွေးကောက်ပွဲ ပြုလုပ်နေတာဖြစ်ပါတယ်။

“ဒီလောင်းလုံးမြို့ပေါ်မှာဆို မဲရုံဖွင့်ဖို့ သူတို့စီစဉ်ထားတယ်၊ ဒီနေ့တော့ ဟိုဘက်ထားဝယ်တက္ကသိုလ်မှာ မဲရုံလုပ်လိုက်တယ်၊ ဒီလောင်းလုံးမြို့ပေါ်မှာက နေ့တိုင်းလိုလိုပဲ ဒီတလော တိုက်ခိုက်ခံနေရတာ၊ ဒရုန်းရောပဲ ချနေတော့လေ၊ အဲဒါကြောင့်ဖြစ်မယ်၊ တချို့စီစဉ်ထားတဲ့နေရာကနေ ရုတ်တရက်ကြီး နေရာပြောင်းလိုက်တာ ရှိသေးတယ်”လို့ လွတ်မြောက်နယ်မြေကို ရောက်ရှိနေတဲ့ လောင်းလုံးမြို့ခံတဦးက ပြောပါတယ်။

လုံခြုံရေးတင်းကြပ်ထားတဲ့ လောင်းလုံးမြို့ပေါ်မှာတော့ ဒီကနေ့ မနက်ပိုင်းအထိ ပစ်ခတ်ပေါက်ကွဲသံတွေ မကြားရသလို ပုလောမြို့နယ်မှာလည်း တိုက်ပွဲဖြစ်ပွားတာမျိုး မကြားရသေးဘူးလို့ သူက ဆက်ပြောပါတယ်။

ပြီးခဲ့တဲ့ ဒီဇင်ဘာလ ၂၈ ရက်နေ့မှာ ရွေးကောက်ပွဲအပိုင်း(၁)ကို မြိတ်၊ ထားဝယ်၊ ဘုတ်ပြင်း၊ ကော့သောင်း မြို့နယ်တို့မှာ ပြုလုပ်ခဲ့ပြီး ဇန်နဝါရီလ ၁၁ ရက်နေ့မှာ အပိုင်း(၂)ကို ကျွန်းစု၊ တနင်္သာရီနဲ့ ရေဖြူမြို့နယ်တို့မှာ ပြလုပ်ခဲ့ပြီးစီးခဲ့သလို လွှတ်တော်နေရာအများစုကို ကြံ့ခိုင်ရေးပါတီက အနိုင်ရရှိထားတယ်လို့ ထုတ်ပြန်ထားပါတယ်။

ဓါတ်ပုံ - Social Media
ပုံစာ - ရွေးကောက်ပွဲနေ့က ဘုတ်ပြင်းမြို့နယ်မှာ ပြည်သူတွေ မဲထည့်စဉ်။(ပုံဟောင်း)

#bbmnews #bbm #bbmtv #Tanintharyi #election2026

မြင်းခြံမြို့နယ် အနောက်ဘက်မှာ စစ်ကြောင်းထိုးလာတဲ့ စကစတပ်ကို ပစ်ခတ်တိုက်ခိုက်

🟥 ဗိုလ် ၁ ဦးနဲ့ တပ်ကြပ် ၁ ဦးသေဆုံးပြီး ထိခိုက်ဒဏ်ရာရရှိသူများပြား

BBM - ဇန်နဝါရီ ၂၅
သတင်း - Richard

မန္တလေးတိုင်း၊ မြင်းခြံမြို့နယ်အနောက်ဘက်မှာ စစ်ကြောင်းထိုးလာတဲ့ စစ်‌ကောင်စီစစ်ကြောင်းကို တိုက်ခိုက်ရာ ဗိုလ် ၁ ဦးနဲ့ တပ်ကြပ် ၁ ဦးသေဆုံးပြီး အများအပြားထိခိုက်ဒဏ်ရာရရှိခဲ့တယ်လို့ One More စစ်ကြောင်းရဲ့ တာ၀န်ရှိသူက BBM ကိုပြောပါတယ်။

ဇန်နဝါရီလ ၂၀ ရက်‌နေ့ မနက် ၈ နာရီ ၀န်းကျင်ခန့်ကစပြီး မြင်းခြံမြို့နယ်အနောက်ဘက် ရွှေကျွန်းသာရွာရှိ ပြည်သူပိုင်နေအိမ်တွေကို မီးရှို့ဖျက်ဆီးပြီး ပြည်သူတွေကိုပါ ဖမ်းဆီးနှိပ်စက်သတ်ဖြတ်နေတဲ့ စစ်ကောင်စီ စစ်ကြောင်းကို ပစ်ခတ်တိုက်ခိုက်ခဲ့တာပါ။

အဆိုပါ တိုက်ခိုက်မှုကြောင့် ဗိုလ် ၁ ဦးနဲ့ တပ်ကြပ် ၁ ဦးသေဆုံးပြီး အများအပြားထိခိုက်ဒဏ်ရာရရှိခဲ့တယ်လို့ သိရပါတယ်။

“ခွေးတွေက စစ်ကြောင်းထိုး မီးရှို့သတ်ဖြတ်တာတွေလုပ်နေတာပါ၊ အဲ့ဒီစစ်ကြောင်းကို တိုက်ခိုက်နိုင်ခဲ့တယ်ဗျ၊ ဒါပေမဲ့ စိတ်မကောင်းစရာက မဟာမိတ်တွေဘက်က ၁ ယောက်ကျတယ်ဗျာ” လို့ ဆိုပါတယ်။

အဆိုပါ ပစ်ခတ်တိုက်ခိုက်မှုကို One More စစ်ကြောင်းနဲ့ မဟာမိတ်တပ်ဖွဲ့တွေက ပူးပေါင်းဖော်ဆောင်ခဲ့တာပဲ ဖြစ်ပါတယ်။

ပုံ-One More စစ်ကြောင်း
(ပုံဟောင်း)

#bbm #bbmnews #OneMore #Myingyan #UpdateNews #Myanmar
https://www.facebook.com/share/p/1PkfJvKmGo/