ဂျပန်ခေါင်းဆောင်ဟောင်း အာဘေးကို လက်လုပ်သေနတ်နဲ့ လုပ်ကြံသတ်ဖြတ်ခဲ့သူကို ထောင်ဒဏ်တစ်သက် ချမှတ်

BBM - ဇန်နဝါရီ ၂၁

ဂျပန်ဝန်ကြီးချုပ်ဟောင်း ရှင်ဇိုအာဘေးကို အိမ်လုပ်သေနတ်ဖြင့် သတ်ဖြတ်ခဲ့သူကို ထောင်ဒဏ်တစ်သက် ချမှတ်ခဲ့ကြောင်း ဒီနေ့ ဇန်နဝါရီလ ၂၁ရက်နေ့က ဂျပန်ရုပ်သံလိုင်း NHKက ဖော်ပြခဲ့ပါတယ်။

သေနတ်နဲ့ အကြမ်းဖက်မှုတွေမရှိ‌သလောက်ရှားတဲ့ ဂျပန်နိုင်ငံမှာ အခုလိုလုပ်ကြံသတ်ဖြတ်တာဟာ ဂျပန်ပြည်သူတွေကို အံ့အားသင့်‌ စေခဲ့ပြီးတော့ အဆိုပါ အမှုကို နှစ်ပေါင်းများစွာကြာ ရုံးတင်စစ်ဆေးမှုပြီးနောက် အခုလို အမိန့်ချမှတ်လိုက်တာပါ။

အဆိုပါ အမှုဟာ ဂျပန်နိုင်ငံမှာ ဩဇာကြီးမားတဲ့ ဘာသာရေးဂိုဏ်းတစ်ခုနဲ့လည်း ဆက်နွယ်နေတယ်လို့ ဆိုပါတယ်။

၂၀၂၂ ခုနှစ်တုန်းက ခေါင်းဆောင်ဟောင် အာဘေးဟာ ဂျပန်နိုင်ငံ၊ အနောက်ပိုင်းမြို့ နာရာရှိ လမ်းမတစ်ခုပေါ်မှာ ရွေးကောက်ပွဲ မိန့်ခွန်းပြောကြားနေစဉ် တက်ဆုယာ ယာမာဂါမီက နေ့ခင်းကြောင်တောင်မှာပဲ လက်လုပ် သေနတ်နဲ့ လုပ်ကြံသတ်ဖြတ်ခဲ့တာပါ။

အာဘေးက ကျန်းမာရေးအကြောင်းပြချက်တွေကြောင့် ၂၀၂၀ ခုနှစ်တုန်းကတည်းက ဝန်ကြီးချုပ်အဖြစ်မှ နုတ်ထွက်ခဲ့ပါတယ်။

ဒါပေမဲ့ သူဟာနိုင်ငံရေးမှာ တက်ကြွစွာပါဝင်နေဆဲဖြစ်ပြီး ဂျပန်ရဲ့ အရှည်ကြာဆုံး ဝန်ကြီးချုပ်အဖြစ် ကြီးမားတဲ့ ဩဇာလွှမ်းမိုးမှုကို ဆုပ်ကိုင်ထားပါတယ်။

အသက် ၄၅ နှစ်အရွယ် ယာမာဂါမီကို အခင်းဖြစ်ပွားရာနေရာမှာ ဖမ်းဆီးခဲ့ပြီး နောက်တစ်နှစ်အကြာမှာ လူသတ်မှုနဲ့ လက်နက်ကိုင်ဆောင်မှုစွဲချက်တွေနဲ့ သူ့ကို တရားစွဲဆိုခဲ့ပါတယ်။

တရားခွင်ကို မျက်မြင်တွေ့ခွင့်ရဖို့ နာရာမြို့ရှိ တရားရုံးအပြင်ဘက်မှာ ရာပေါင်းများစွာသော လူတွေ တန်းစီစောင့်ဆိုင်းခဲ့ကြပါတယ်။

အာဘေးဟာ ဝန်ကြီးချုပ်ရာထူးကို ဂျပန်နိုင်ငံရဲ့ နိုင်ငံရေးတည်ငြိမ်မှု နောက်ဆုံးကာလဖြစ်တဲ့ ၂၀၀၆ မှ ၂၀၀၇ ခုနှစ်အထိ နဲ့ ၂၀၁၂ မှ ၂၀၂၀ ခုနှစ်အထိ တာဝန်ထမ်းဆောင်ခဲ့ပါတယ်။

Reference-CNN World
Translator-Richard

#bbmnews #bbmtv #bbm #japan #NHK
https://www.facebook.com/share/p/182eX4JL6G/

လောင်းလုံးပေါက်ကွဲမှုမှာ အရပ်သား ၃ ဦးသေဆုံး၊ ၃ ဦးဒဏ်ရာရ

BBM-ဇန်နဝါရီ၂၁
သတင်း - ကိုဟန်

တနင်္သာရီတိုင်း၊ လောင်းလုံးမြို့နယ် စခန်းကြီးကျေးရွာအုပ်စုမှာ ဒရုန်းဗုံးသီးကျရောက်ပေါက်ကွဲမှုကြောင့် အရပ်သား ၃ ဦးသေဆုံးပြီး ၃ ဦးထိခိုက်ဒဏ်ရာရရှိခဲ့တယ်လို့ ဒေသခံတွေထံကနေ သိရပါတယ်။

မနေ့ ဇန်နဝါရီလ ၂၀ ရက် မွန်းလွဲ ၂ နာရီဝန်းကျင်က စခန်းကြီးကျေးရွာမှာ ဒရုန်းဗုံးသီးကျရောက်ပေါက်ကွဲခဲ့တယ်လို့ သိရပါတယ်။

“ထိသွားတာ တော်တော်များတယ်၊ အိမ်နှစ်အိမ်အနားကျကွဲတာ အဲဒီက မိသားစုဝင်တွေ ထိခိုက်သေဆုံးတာ၊ လူကြီးပိုင်းတွေ ထိကြတာများတယ်” လို့ လောင်းလုံးမြို့ပေါ်မှာ အလုပ်လုပ်နေတဲ့ စခန်းကြီးရွာခံတဦးက BBM ကို ပြောပါတယ်။

ဗုံးသီးပေါက်ကွဲမှုကြောင့် ဒေါ်မာလာ၊ ဒေါ်ချို၊ မခင်မာအေးတို့ သုံးဦးဟာ အခင်းဖြစ်ရပ်မှာပင် သေဆုံးသွားပြီး ကလေးနဲ့ အမျိုးသား၊ အမျိုးသမီးတို့ သုံးဦးက ဒဏ်ရာရရှိခဲ့တယ်လို့လည်း သူက ဆက်ပြောပါတယ်။

ထိခိုက်ဒဏ်ရာရရှိသူတွေထဲက ကလေးနဲ့ အမျိုးသမီးတို့ဟာ ဒဏ်ရာပြင်းထန်နေပြီး ဆေးကုသမှု ခံယူနေရတယ် လို့သိရသလို
ဒေသခံအချို့ ပြောဆိုချက်အရ ဒရုန်းဗုံးသီးချတိုက်ခိုက်ခံရတဲ့အချိန်ဟာ စခန်းကြီးကျေးရွာထဲမှာ ရွေးကောက်ပွဲကိစ္စနဲ့ ပတ်သက်ပြီး ဌာနဆိုင်ရာပူးပေါင်းအဖွဲ့နဲ့ စစ်ကောင်စီတပ်ဖွဲ့တွေ ရှိနေတယ်လို့ ဆိုပါတယ်။

ဒါကြောင့် ဒီတိုက်ခိုက်မှုဟာ တော်လှန်ရေးတပ်တွေ လုပ်ဆောင်ခဲ့တာ ဖြစ်နိုင်တယ်လို့ ခန့်မှန်းပြောဆိုမှုတွေ ရှိနေ ပေမဲ့ BBM အနေနဲ့ သီးခြားအတည်ပြုနိုင်ခြင်း မရှိပါဘူး။

ဒီတိုက်ခိုက်မှုကို ဘယ်အဖွဲ့က လုပ်ဆောင်ခဲ့တာကို ထုတ်ပြန်ထားခြင်း မရှိသေးသလို ဒေသတွင်း လှုပ်ရှားနေတဲ့ အဖွဲ့တွေကို ဆက်သွယ်ဖို့ ကြိုစားနေပေမဲ့ အဆက်သွယ်မရသေးပါဘူး။

“တော်လှန်ရေးအဖွဲ့က လုပ်တယ်လို့ပဲ ကြားထားတယ်၊ ဘာလို့ဆိုတော့ အဲဒီနေ့က စစ်သားတွေရော ဝန်ထမ်းတွေရော ရွာထဲရှိနေတာလို့ ပြောတယ်၊ ကျကွဲတာလဲ အဲဒီစစ်သားနဲ့သူတို့အဖွဲ့ ရှိတဲ့နေရာနဲ့ မလှမ်းမကမ်းမှာပဲတဲ့” လို့ အထက်ပါဒေသခံက ဆက်ပြောပါတယ်။

မဲစာရင်းကိစ္စဆောင်ရွက်ပြီး စခန်းကြီးကျေးရွာကနေ ပြန်ထွက်သွားတဲ့ စစ်ကောင်စီပူးပေါင်းအဖွဲ့လိုက်ပါလာတဲ့ ယာဉ်တန်းကို ထပ်မံမိုင်းဆွဲခဲ့ပေမဲ့ ထိခိုက်မှု ရှိ၊ မရှိကို မသိရသေးဘူးဟုလည်း ဆိုပါတယ်။

ရွေးကောက်ပွဲအပိုင်း(၃)မှာ ပါဝင်တဲ့ လောင်းလုံးမြို့နယ်မှာ မြို့ပေါ်ရပ်ကွက်တွေနဲ့ စခန်းကြီးကျေးရွာအုပ်စုအပါ အဝင် ကျေးရွာအုပ်စုအချို့မှာ ရွေးကောက်ပွဲကျင်းပဖို့ ရှိနေတာဖြစ်ပါတယ်။

ဒါကြောင့် စစ်ကောင်စီတပ်ဖွဲ့တွေက သူတို့ ထိန်းချုပ်ထားတဲ့ နေရာတွေကို တော်လှန်ရေးတပ်တွေက တိုက်ခိုက်မှု မရှိအောင် လုံခြုံရေးတင်းကြပ်ထားပေမဲ့လည်း လောင်းမြို့ပေါ်နေရာအပါအဝင် စစ်အခြေစိုက် တပ်ရင်းတပ်စခန်းကို တော်လှန်ရေးပူးပေါင်းတပ်တွေရဲ့ တိုက်ခိုက်တာ ခံနေရဆဲဖြစ်တယ်လို့ သိရပါတယ်။

ဓါတ်ပုံ - Social Media ၊ KNU
ပုံစာ - လက်နက်ကြီးကျရောက်ပေါက်ကွဲထားစဉ်။ (ပုံဟောင်း)

#bbm #bbmnews #လောင်းလုံး #Drone #UpdateNews
https://www.facebook.com/share/p/1WX6afMTj2/

မိုးကုတ်မြို့အတွင်းဝင်လာတဲ့ Non-CDM တွေကို ကြိုဆိုဖို့ စစ်တပ်က မြို့နေလူထုကို အတင်းအကြပ်ဖိအားပေး

🟥မိုးကုတ်မြို့အရှေ့ပိုင်းဘက်ကိုလည်း ကားအစီးရေ(၄၀)လောက်နဲ့ စစ်တပ်က အင်အားဖြည့်

BBM-ဇန်နဝါရီ၂၁
သတင်း-မင်းသော်

မိုးကုတ်မြို့အတွင်းကို ပြန်လည်ဝင်ရောက်လာတဲ့ Non-CDM တွေကို ကြိုဆိုဖို့အတွက် စစ်ကောင်စီအနေနဲ့ ဒေသခံပြည်သူတွေကို အတင်းအကြပ်ဖိအားပေးစေခိုင်းတာတွေ ပြုလုပ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီလ၂၀ရက်နေ့ ည၈နာရီခွဲလောက်က မန္တလေး-မိုးကုတ်လမ်းပိုင်းမှတဆင့် စစ်ကောင်စီရဲ့ စီစဥ်ပေးမှုနဲ့ Non-CDMဝန်ထမ်းတွေဟာ မိုးကုတ်မြို့တွင်းကို ယာဥ်တန်းတွေနဲ့ ဝင်ရောက်လာခဲ့တယ်လို့ သိရပါတယ်။

ဒီလို Non-CDM တွေမဝင်ရောက်လာခင်ကတည်းက မိုးကုတ်မြို့တွင်းက စစ်ကောင်စီတပ်သားတွေအနေနဲ့ ညဘက် မြို့ခံပြည်သူတွေရှိ
တဲ့ မိုးကုတ်ညစျေးတန်းအတွင်း ရောက်လာပြီး Non-CDMတွေကို မဖြစ်မနေကြိုဆိုရမယ်ဆိုပြီး ဖိအားပေးစေခိုင်းခဲ့တယ်လို့ ဒေသခံပြည်သူတစ်ဦးထံမှ သိရပါတယ်။

"မနေ့ညကညဈေးတန်းမုန့်လာဝယ်တဲ့ လူတွေမှန်သမျှဖိအားပေးပြီး ကြိုခိုင်းတယ်ဗျ၊ လူစည်တာ ညဆိုရင် အဲ့နေရာပဲရှိတော့ ရွေးလုပ်တာဗျ အဲ့နေရာကို၊ ဘယ်ပြည်သူမှ လဲ အမှန်တကယ် စိတ်မဝင်စားဘူး "

မိုးကုတ်မြို့အတွင်း အဆိုပါ Non-CDM များကိုဝင်ရောက်စေခဲ့ပေမဲ့လည်း စစ်တပ်အနေနဲ့ ၎င်းတို့အတွက် နေရာထိုင်ခင်းတွေကို အဆင်သင့်ပြင်ဆင်ထားခြင်းမရှိတာကြောင့် မိုးကုတ်မြို့အလယ်ရှိ အထက (၁) စာသင်ကျောင်းမှာသာ စုပြုံနေရာချထားပေးတယ်လို့လည်း သိရပါတယ်။

အဆိုပါ Non-CDM တွေနဲ့အတူ မန္တလေး-စဥ့်ကူးတို့ဘက်မှ စစ်ကောင်စီစစ်ကြောင်းအချို့လည်း လိုက်ပါလာတာတွေရှိပြီး ၎င်းတို့မရောက်မှီကတည်းက စစ်တပ်ဝါဒဖြန့်သူအချို့က မှတ်တမ်းတင်Video ရိုက်ရန်အတွက် ကြိုတင်ပြင်ဆင်နေတာတွေ ပြုလုပ်ခဲ့ကြောင်းလည်း သိရပါတယ်။

ဒါ့အပြင် ဒီလိုအရပ်ဘက်ဝန်ထမ်းတွေကို မြို့တွင်းခေါ်ဆောင်လာပြီးတဲ့နောက် စစ်တပ်
အနေနဲ့ မိုးကုတ်ပတ်ချာလည်ကို လုံခြုံရေးတိုးမြှင့်ရန် ယမန်နေ့ည ၉နာရီခွဲလောက်မှာတင် စစ်ကားအစီးရေ(၄၀)ကျော်ဖြင့် မိုးကုတ်မြို့အရှေ့ပိုင်းမှတဆင့်ထွက်ခွါသွားတာတွေရှိတယ်လို့လည်း အဆိုပါဒေသခံမှဆက်ပြောပါတယ်။

"မိုးကုတ်ကတပ်တစ်ချို့ ထုတ်နှုတ်နေတယ်ဗျ၊ ကားအစီး 40လောက်ရှိမယ်၊ မနေ့ညက ၉ နာရီ၄၅လောက်ကထွက်သွားတယ်၊ မိုးကုတ်
အရှေ့ပိုင်း ပန်းမထိပ်ဘက်က ထွက်သွားတာပါ၊ မြို့ပတ်ချာလည် လုံခြုံရေးပိုတင်းကြပ်ဖို့ထင်
တယ်"

ဒီလို မိုးကုတ်မြို့အတွင်း စစ်တပ်ဘက်က အရပ်သားဝန်ထမ်းကော၊ စစ်အင်အားပါ ဖြည့်တင်းတာတွေ ဆောင်ရွက်နေပေမဲ့လည်း မကြာခဏဆိုသလိုပင် ၎င်းတို့အခြေပြုထားရာ မိုးကုတ်မြို့တွင်းက စစ်စခန်းတွေကို တော်လှန်ရေးအင်အားစုတွေဘက်က ရှော့တိုက်ဒုံးတွေ၊ ဒရုန်းတွေဖြင့် ပစ်ခတ်တိုက်ခိုက်မှုတွေ ရှိနေတယ်လို့လည်း သိရပါတယ်။

Video-ဒေသခံ

မင်းဘူးမြို့နယ်အတွင်း စစ်တပ်က PDF ပုံဖမ်းကာ အနီးဝန်းကျင်မှသတင်းများလိုက်လံစုံစမ်းနေ

🟥သတင်းထူးရင်ဆက်သွယ်ရန်ဟုလည်းဆိုကာ ပြည်သူတွေထံမှ ဖုန်းနံပတ်တွေလည်းတောင်း

BBM-ဇန်နဝါရီ၂၁
သတင်း-မင်းသော်

မင်းဘူးမြို့နယ်အတွင်း မုန်ထောင်ရဲစခန်းကို တော်လှန်ရေးအင်အားစုတွေက စီးနင်းတိုက်ခိုက်ပြီးတဲ့နောက် အဆိုပါဒေသအနီးပတ်ဝန်းကျင်က တော်လှန်ရေးတပ်ဖွဲ့တွေထံ သတင်းပေးနေသူတွေကို ဖော်ထုတ်ရန်အတွက် စစ်တပ်က ၎င်းတို့ကိုယ်တိုင် PDF ပုံစံအသွင်ယူပြီး လိုက်လံစုံစမ်းနေတာတွေရှိတယ်လို့ ဒေသခံပြည်သူတွေရဲ့ပြောဆိုချက်အရသိရပါတယ်။

ပြီးခဲ့တဲ့ ဇန်နဝါရီလ၁၆ရက်နေ့က မကွေးတိုင်း၊ မင်းဘူး(စကု)မြို့နယ်အတွင်းရှိ မုန်ထောင်ရဲစခန်းကို တော်လှန်ရေးအင်အားစုတွေက ဝင်ရောက်စီးနင်းခဲ့ပြီးတဲ့နောက် ရဲစခန်းအတွင်းရှိ အဆောက်အဦးတွေကို မီးရှို့ဖျတ်ဆီးတာတွေ ပြုလုပ်ခဲ့တယ်လို့ သိရပါတယ်။

မုန်ထောင်ရဲစခန်းအတိုက်ခံရပြီးတဲ့နောက် စစ်တပ်က ၎င်းတို့ကိုယ်တိုင်ပင် PDF ကဲ့သို့ဝတ်ဆင်ကာ အနီးအနားကျေးရွာတွေမှာ သတင်းလိုက်လံစုံစမ်းတာတွေ ပြုလုပ်နေတယ်လို့ သိရပါတယ်။

ဒီလိုလိုက်လံစုံစမ်းရာမှာ စစ်ကောင်စီအင်အား (၅၀) လောက်ဟာ PDF တွေကဲ့သို့ပင် ဝတ်ဆင်ကာ အနီးအနားကျေးရွာတွေမှ ဒေသခံပြည်သူတွေကို အိမ်တိုင်းစေ့ လိုက်လံနှုတ်ဆက်တာတွေ ပြုလုပ်ခဲ့တယ်လို့လည်း သိရပါတယ်။

ဒါ့အပြင် အဆိုပါ ကျေးရွာမှပြည်သူတွေထံမှလည်း သတင်းတစ်ခုခုထူးရင် ဆက်သွယ်လို့ရနိုင်ရန် ဖုန်းနံပတ်တွေကို လိုက်လံတောင်းခံတာတွေ ပြုလုပ်ခဲ့တယ်လို့လည်း ဒေသခံပြည်သူတစ်ဦးမှ BBM ကိုပြောပါတယ်။

" ဟိုတလောက မင်းဘူး(စကု)မြို့နယ် မုန်ထောင်ရဲစခန်းကိုPDFတွေ ဝင်တိုက်သွားပြီးသွားတော့ စစ်တပ်ကရွာနီးချင်တွေထဲက သတင်းပေးတဲ့သူကိုသူတို့ကိုယ်‌တိုင်PDFအယောင်ဆောင်ပြီးစုံစမ်းနေတယ်ဗျ၊ တချို့လူတွေက အယောင်ဆောင်ဆိုတာ သိပေမဲ့ တချို့သက်ကြီးရွယ်အိုတွေကတော့မသိဘူးပေါ့ဗျာ ကျွန်တော်တို့ရွာကိုက စစ်တပ် စိုးမိုး‌နယ်မြေဗျ သူတို့အယောင်ဆောင်တေက၅၀ ဝန်းကျင်လောက်ရှိတယ်ဗျ၊ သူတို့သာPDFအစစ် တွေဆိုရင် စစ်တပ်က သူတို့စိုးမိုးနယ်မြေပဲ ‌မိနစ်မခြားရောက်ချလာမှာပါ အယောင်ဆောင်တွေကအေးဆေး တစ်အိမ်ဆင်းတစ်အိမ်တက်နဲ့ကျွန်တော်တို့ကPDFအမေ့သားတွေပါ ဘာမှကြောက်စရာမလိုပါဘူး phoneနံပါတ်ပေးလို့ရလား သတင်းထူးရင်ဆက်သွယ်လို့ရအောင်ဆိုပြီး အိမ်တိုင်းတောင်းတယ်ဗျ "

ဒါတင်မက အခြားတစ်ဖက်မှာလည်း စစ်ကောင်စီအနေနဲ့ အဆိုပါရဲစခန်းတိုက်ခိုက်ခံရပြီးတဲ့နောက် မုန်ထောင်ရွာအပါအဝင် အနီးပတ်ဝန်းကျင်က ချောင်းဖြူး၊ သီးကုန်းစတဲ့ ကျေးရွာတွေကိုလည်း စစ်ကြောင်းထိုးတာတွေ ပြုလုပ်ခဲ့သေးတယ်လို့လည်း သိရပါတယ်။

တော်လှန်ရေးတပ်ဖွဲ့တွေရဲ့ မုန်တောင်ရွာရဲစခန်းတိုက်ခိုက်မှုအတွင်း စစ်ကောင်စီဘက်မှ ထိခိုက်သေဆုံးမှုတွေရှိသလို ရဲစခန်းမှူးအပါ တာဝန်ကျရဲတချို့ကိုလည်း အရှင်ဖမ်းဆီးထိန်းသိမ်းနိုင်ခဲ့တာတွေရှိတယ်လို့လည်း မြေပြင်သတင်းရင်းမြစ်တွေအရ သိရပါတယ်။

#bbm #bbmtv #bbmnews #Minbu #UpdateNews
https://www.facebook.com/share/p/1BwB5cPkvW/

မြသိန်းတန်စေတီနဲ့ ရဲစခန်းမှာတပ်စွဲထားတဲ့ စကစအင်အား(၁၀၀)လောက်ကို တော်လှန်ရေးတပ်များတိုက်ခိုက်

BBM - ဇန်နဝါရီလ ၂၁
သတင်း - ကိုဘုဏ်း

စစ်ကိုင်းတိုင်း ၊မင်းကွန်းတိုက်နယ် မှာရှိတဲ့ မြသိန်းတန်စေတီ နဲ့ မင်းကွန်းရဲစခန်းတို့ မှာတပ်စွဲထားတဲ့ အင်အား(၁၀၀)ခန့် စကစတွေကို တော်လှန်ရေးပူးပေါင်းတပ်တွေက တိုက်ခိုက်ခဲ့ပြီး ဘန်ကာတစ်လုံးကို ပစ်ခတ်ရှင်းလင်းနိုင်ခဲ့တယ်လို့ ယူနီကွန်းပျောက်ကြားရဲ့ ထုတ်ပြန်ချက်အရ သိရပါတယ်။

ပြီးခဲ့တဲ့ ဇန်နဝါရီလ ၁၈ရက်နေ့ နေ့လယ်၂နာရီလောက်မှာ စစ်ကောင်စီနဲ့ ပြည်သူ့စစ်အင်အား ၁၀၀ခန့် တပ်စွဲထားတဲ့ အဆိုပါနေရာတွေကို တော်လှန်ရေးအင်အားစုတွေက အလစ်ဝင်ရောက်တိုက်ခိုက်ခဲ့ခြင်း ဖြစ်တယ်လို့လည်း သိရပါတယ်။

တိုက်ခိုက်မှုအတွင်း တော်လှန်ရေးပူးပေါင်းတပ်များက စစ်ကောင်စီရဲ့ ဘန်ကာ ၁ လုံးကို ပစ်ခတ်ရှင်းလင်းနိုင်ခဲ့ပေမဲ့ နယ်မြေအနေအထားအရ စခန်းသိမ်းပိုက်နိုင်ခြင်းမရှိဘဲ ရဲဘော်များအထိခိုက်နည်းစေရန် ပြန်လည်ဆုတ်ခွါခဲ့ရတယ်လို့လည်း သိရပါတယ်။

အဆိုပါတိုက်ခိုက်မူ့ကိုယူနီကွန်းပျောက်ကြားတပ်ဖွဲ့နဲ့အတူမင်းကွန်း PDF၊မင်းကွန်း ပကဖ၊ မင်းကွန်းပလဖ၊People Servent Force၊ရတနာပုံတပ်ဦး၊Nomore Dictatorship (NMD)၊GS Force၊ဥဒေါင်းမင်းတပ်ဖွဲ့၊ ဒေါင်းမာန်ပြည်သူ့ကာကွယ်ရေးတပ်ဖွဲ့၊လယ်သမားတော်လှန်ရေးတပ်ဖွဲ(FRF)၊မဟာရာရွှေဘိုသား PDFတို့မှ တိုက်ခိုက်ခဲ့ကြတယ်လို့ ယူနီကွန်းပျောက်ကြားတပ်ဖွဲ့ကထုတ်ပြန်ကြေငြာထားပါတယ်။

Video-ယူနီကွန်းပျောက်ကြား
https://www.facebook.com/share/r/1AVPbHqdfv/

YOMA GBK(PDF) မှ တပ်စုမှူးရဲဘော်ကြယ်ကြီးနဲ့ ရဲဘော်ရှိုင်းလေးတို့ရဲ့ စျာပနကိုကျင်းပပြုလုပ်

BBM-ဇန်နဝါရီ၂၁
သတင်း-မင်းသော်

သာယာဝတီခရိုင် တပ်ရင်း(၁) ၊ တပ်ခွဲ(၁)မှ တပ်စုမှူး ရဲဘော်ကြယ်ကြီးနဲ့ ရဲဘော်ရှိုင်းလေးတို့ရဲ့ စျာပနကို တော်လှန်ရေးလွတ်မြောက်နေရာတစ်ခုမှာ ကျင်းပပြုလုပ်ခဲ့တယ်လို့ အဆိုပါတပ်ရင်းရဲ့ထုတ်ပြန်ချက်အရ သိရပါတယ်။

ပြီးခဲ့တဲ့ ၂၀၂၅ခုနှစ် ဒီဇင်ဘာလ ၂၄ ရက်နေ့က တပ်စုမှူး ရဲဘော်ကြယ်ကြီးနဲ့ ရဲဘော်ရှိုင်းလေးတို့ဟာ တပ်ရင်းတာဝန်ထမ်းဆောင်ရင်း မြင့်မြတ်စွာကျဆုံးခဲ့ရတယ်လို့ သိရပါတယ်။

ပေးအပ်တဲ့ တာဝန်တွေကိုကျေပြွန်စွာထမ်းဆောင်ရင်း ကျဆုံးသွားရတဲ့ အဆိုပါရဲဘော်(၂)ယောက်အတွက် တပ်ရင်းအနေဖြင့် အကြီးအကျယ် ဝမ်းနည်းကြေကွဲရတယ်လို့လည်း ဆိုပါတယ်။

ဒါ့အပြင် မြင့်မြတ်စွာကျဆုံးသွားတဲ့ ရဲဘော်တွေကို အစဥ်အောက်မေ့သတိရလျက် တော်လှန်ရေးအောင်မြင်တဲ့အထိ တပ်ဖွဲ့အနေဖြင့် အာဏာရှင်ကို ဆက်လက်တိုက်ပွဲဝင်သွားမယ်လို့ ကတိသစ္စာပြုကြောင်းလည်း သာယာဝတီခရိုင်တပ်ရင်း(၁)၊တပ်ခွဲ(၁)မှ ထုတ်ပြန်ကြေငြာထားပါတယ်။

Video-သာယာဝတီခရိုင် တပ်ရင်း(၁)၊ တပ်ခွဲ(၁)
https://www.facebook.com/share/v/17xMYcLrki/

ကမ္ဘောဒီးယား ကျားဖြန့်၀င်းတွေမှ လိမ်လည်သူထောင်နဲ့ချီ ထွက်ပြေးခဲ့တယ်လို့ အရာရှိတွေ ပြောကြား

BBM - ဇန်နဝါရီ ၂၂

ကမ္ဘောဒီးယားမှာ ဒေါ်လာဘီလီယံပေါင်းများစွာတန်ဖိုးရှိတဲ့ ကျားဖြန့် လုပ်ငန်းတွေကို နှိမ်နင်းဖို့ နိုင်ငံတကာဖိအားတွေ တိုးပွားလာပြီးနောက် မကြာသေးမီရက်တွေအတွင်း ကမ္ဘောဒီးယားတစ်ဝှမ်းရှိ ကျားဖြန့်၀င်းတွေမှ ထွက်ပြေးလာတဲ့ လူလိမ်ပ ထောင်ပေါင်းများစွာရှိတယ်လို့ အရာရှိတွေက ဆိုပါတယ်။

ဖနွမ်းပင်ရှိ အင်ဒိုနီးရှားသံရုံးက ကျားဖြန့်စင်တာတွေက ထွက်ပြေးလာတဲ့ နိုင်ငံသား ၁၄၄၀ ဆီမှ အစီရင်ခံစာတွေကို လက်ခံရရှိခဲ့ပြီး တရုတ်သံရုံးအပြင်ဘက်မှာလည်း တရုတ်နိုင်ငံသားများစွာ တန်းစီစောင့်ဆိုင်းနေသည်ကို တွေ့ရှိခဲ့ရတယ်လို့ ဆိုပါတယ်။

ထုတ်ပြန်ချက်အရ ထွက်ပြေးသူအရေအတွက် တိတိကျကျမသိရသေးပေမဲ့ Amnesty International ကတော့ ထောင်နဲ့ချီပြီး ရှိနိုင်တယ်လို့ ခန့်မှန်းထားပါတယ်။

အဆိုကိစ္စရပ်မှာ ရဲတွေဘယ်လို ပါဝင်နေလဲဆိုတာ ဆုံးဖြတ်ဖို့ ခက်ခဲတယ်လို့ Amnesty ရဲ့ ဒေသဆိုင်ရာ သုတေသန ဒါရိုက်တာ Montse Ferrer က ပြောကြားခဲ့ပြီး ဗီဒီယိုတချို့မှာ ရဲတွေကို မြင်နိုင်ပေမယ့် တခြားဗီဒီယိုတွေမှာတော့ မမြင်ရဘူးလို့ ထပ်လောင်းပြောကြားခဲ့ပါတယ်။

ထွက်ပြေးလာတဲ့ လိမ်လည်သူတွေကို ပံ့ပိုးမှုမရှိတာနဲ့ပတ်သက်ပြီး စိုးရိမ်မှုတွေရှိတယ်လို့ Ferrer က ထပ်လောင်းပြောကြားခဲ့ပါတယ်။

တချို့ဆိုရင် “အကူအညီရှာဖို့ လျှောက်သွားနေကြတာကို တွေ့ရပါတယ်။ ပြီးတော့ တချို့လူတွေက ဘေးကင်းတဲ့အိမ်တွေကို ရောက်နေပြီဆိုတာလည်း ကျွန်မတို့ သိပါတယ်” လို့ သူမက ပြောပါတယ်။

ကူညီပံ့ပိုးမှုမရှိရင် အလုပ်သမားတွေဟာ ကျားဖြန့်၀င်း အသစ်တစ်ခုကို ပြောင်းရွှေ့ခံရနိုင်ခြေရှိပါတယ်။

အရင်ထုတ်ပြန်မှုတွေမှာ “တခြားဝင်းတွေကို ပြောင်းရွှေ့ဖို့ အတင်းအကျပ်ခိုင်းစေခံရတဲ့သူတွေကို ကျွန်မတို့ တွေ့ခဲ့ရပါတယ်၊ လူတွေ ထွက်ပြေးလွတ်မြောက်သွားပေမယ့် ဘယ်ကိုသွားရမှန်းမသိဘူး၊ နောက်ဘာလုပ်ရမှန်းမသိရင် တခြားဝင်းတစ်ခုမှာ အဆုံးသတ်သွားနိုင်ပါတယ်။”

မကြာသေးမီနှစ်တွေအတွင်းအွန်လိုင်းလိမ်လည်မှုလုပ်ငန်းဟာ အရှေ့တောင်အာရှရဲ့ အစိတ်အပိုင်းတွေမှာ ထွန်းကားလာခဲ့ပြီး ကုလသမဂ္ဂက ဝင်းတွေထဲမှာ အလုပ်လုပ်သူ ၁သိန်းခန့် အလုပ်လုပ်နေတယ်လို့ ခန့်မှန်းထားတဲ့ နိုင်ငံတွေထဲမှာ ကမ္ဘောဒီးယားနိုင်ငံ အပါအဝင်ပါ။

အလုပ်သမားအများအပြားဟာ ဝင်းတွေမှာ အလုပ်လက်ခံဖို့ လှည့်စားခံခဲ့ရပြီး သူတို့ရဲ့ဆန္ဒမပါဘဲ ဖမ်းဆီးခံရကာ အချစ်ဇာတ်လမ်း၊ ရင်းနှီးမြှုပ်နှံမှုလိမ်လည်မှုတွေနဲ့ crypto လိမ်လည်မှုအပါအဝင် အွန်လိုင်းလိမ်လည်မှုတွေကို လုပ်ဆောင်ဖို့ အတင်းအကျပ်ခိုင်းစေခံခဲ့ရပါတယ်။

ဟားဗတ်တက္ကသိုလ်ရဲ့ အာရှစင်တာမှာ ဧည့်ပညာရှင် Jacob Sims က မကြာသေးခင်က ထုတ်ပြန်ခဲ့တဲ့ ထုတ်ပြန်ချက်တွေဟာ ကမ္ဘောဒီးယားမှာ မကြုံစဖူးဖြစ်ရပ်တစ်ခုလို့ ဖော်ပြခဲ့ပါတယ်။

"ဒီကစ္စရပ် တွေဟာ နှစ်ပေါင်းများစွာကတည်းက မြင့်တက်လာနေပေမဲ့ အောက်တိုဘာ ၁၄ ရက်နေ့တွင် ချန်ဇီအပေါ် ယူကေနဲ့ အမေရိကန်တို့ရဲ့ သမိုင်းဝင်အရေးယူမှုနဲ့အတူ အဆမတန် မြင့်တက်လာတဲ့ နိုင်ငံတကာဖိအားတွေကြောင့် ဒီအရာအားလုံး အရှိန်အဟုန်မြင့်တက်လာခြင်းဖြစ်တယ်ဆိုတာ အလွန်ရှင်းလင်းပါတယ်”လို့ ပြောကြားခဲ့ပါတယ်။

Reference - The Guardian
Translator-Richard

#bmnews #bbm #bbmtv #cambodia #onlinescam
https://www.facebook.com/share/p/17sMGosKFU/

စစ်ကောင်စီရဲ့ ခလရ -၃၅ မှ အဓမ္မ စစ်မှုထမ်းခိုင်းစေခြင်းခံရတဲ့ တပ်သား (၇)ဦး KNDO တပ်ရင်း (၃)ထံလက်နက်ချအလင်းဝင်

BBM - ဇန်နဝါရီလ ၂၂
သတင်း - ကိုဘုဏ်း

ကရင်အမျိုးသား အစည်းအရုံး၊ကော်သူးလေ ထိန်းချူပ်နယ်မြေ၊ခလယ်လွီထူခရိုင်၊လယ်ဒိုမြို့မှာ စစ်ကောင်စီတပ်သား ၇ ဦးအလင်းဝင်လာတယ်လို့ ဇန်နဝါရီလ ၁၈ရက်နေ့က KNUက ထုတ်ပြန်ထားပါတယ်။

အလင်းဝင်လာတဲ့ စစ်ကောင်စီတပ်ဖွဲ့ဝင်တွေဟာ ခလရ -တပ်ရင်းမှ တုံးတံတားမှာ တာဝန်ကျနေတဲ့ မောင်သီဟဝင်း(၂၉)နှစ်၊မောင်ဆက်နိုင် (၂၈)နှစ်၊မောင်မြင့်တင် (၂၈)နှစ်၊မောင် အောင်ကို(၃၅)နှစ်၊မောင်တင်အောင်မိုး(၃၀)၊မောင်သိန်းဇော်ဝင်း(၂၆)နှစ်၊မောင်နေမျိူးဦး(၂၉)နှစ်တို့ဖြစ်ကြပါတယ်။

အဆိုပါ စစ်ကောင်စီတပ်သားတွေဟာ အဓမ္မ စစ်မှုထမ်းခိုင်းစေခြင်းခံရတာဖြစ်ပြီး မိမိ သဘော ဆန္ဒနဲ့KNDO တပ်ရင်း (၃)ထံ လက်နက်ချအလင်းဝင်ခဲ့ခြင်းဖြစ်တယ်လို့သိရပါတယ်။

လက်ရှိမှာ ကေအဲန်ယူ ကရင်အမျိူးသားအစည်းအရုံးက ကောင်းမွန်စွာစောင့်ရှောက်ထားတယ်လို့လည်းသိရပါတယ်။

စစ်ကောင်စီတပ်အတွင်းမှာရှိတဲ့ တပ်သားတွေအနေနဲ့ အလင်းဝင်ရောက်လိုပါက နီးစပ်ရာတော်လှန်ရေးတပ်ဖွဲ့တွေဆီ ဆက်သွယ်ပြီးအလင်းဝင်ကြဖို့ကိုလည်း ကေအဲန်ယူ ၊ကရင်အမျိူးသားအစည်းအရုံးက တိုက်တွန်းထားပါတယ်။

ပုံ-KNU

#bbm #bbmtv #bbmnews #KNU #KNDO #karen
https://www.facebook.com/share/p/16fCy74VBq/

တောင်ငူရှိ ထန်းတပင်မြို့ရှိ ကျေးရွာကို စစ်ကောင်စီ ဗုံးကြဲ

🟥ပြည်သူ ၂ဦးသေပြီး၂ ဦးဒဏ်ရာရ နေအိမ် ၆လုံးပျက်စီးခဲ့

BBM - ဇန်နဝါရီလ၂၂
သတင်း - ကိုဘုဏ်း

ပဲခူးတိုင်း၊ တောင်ငူခရိုင် ၊ထန်းတပင်မြို့(ထောတထူ)အတွင်းမှာရှိတဲ့ ဇီဒေါခိုကျေးရွာကို စစ်ကောင်စီ က ဗုံးကြဲခဲ့ပါတယ်လို့ ကရင်အမျိုးသားအစည်းအရုံးက ထုတ်ပြန်ထားပါတယ်။

ဇန်နဝါရီလ ၁၉ရက်နေ့ နေ့လယ် ၁၂နာရီ၃၅မိနစ်နဲ့ ၁နာရီ ၁၅ မိနစ်တို့မှာ စစ်ကောင်စီဟာဂျက်ဖိုက်တာနဲ့လေကြောင်းတိုက်ခိုက်မီု (၂)ကြိမ်ပြုလုပ်ခဲ့ပြီးပေါင် ၅၀၀ ဗုံး (၃)လုံးနဲ့ကြဲချတိုက်ခိုက်ခဲ့တာပါ။

အဆိုပါလေကြောင်းတိုက်ခိုက်မှုကြောင့် ဇီဒေါခိုကျေးရွာမှာရှိတဲ့ နော်ဖော်ဆဲ (၈၅)နှစ်နဲ့ နော်မူသဲ(၅၅)နှစ်တို့ဟာထိခိုက်ဒဏ်ရာရပြီးသေဆုံးခဲ့သလို
နော်ဝါး(၅၂)နှစ်နဲ့ နော်ချာခူး(၆၄)နှစ်တို့ဟာ ဒဏ်ရာရခဲ့တယ်လို့သိရပါတယ်။

ဒါ့အပြင် ပြည်သူ့နေအိမ် ၆လုံးလည်း ဗုံးဒဏ်ကြောင့် ထိခိုက်ပျက်စီးခဲ့တယ်လို့လည်းသိရပါတယ်။

ကျေးရွာနေပြည်သူတွေဟာ အဆိုပါ လေကြောင်းတိုက်မှုကြောင့် ထိတ်လန့်ကြောက်ရွံ့ပြီး ရွာလုံးကျွတ်ထွက်ပြေးတိမ်းရှောင်နေရတဲ့အတွက် အကူအညီတွေ လိုအပ်နေတယ်လို့ ကေအဲန်ယူ ကရင်အမျိူးသားအစည်းအရုံးက ထုတ်ပြန်ကြေငြာထားပါတယ်။

ပုံ-ကေအဲန်ယူ ကရင်အမျိူးသားအစည်းအရုံး

#bbmnews #bbmtv #bbm #KNU #KNDO #karen
https://www.facebook.com/share/p/1ACyG5D7tG/

ရေးမြို့နယ်မှာ ခမရ ၅၈၈ မှ စကစတပ်သား ၃ ဦး ခဲယမ်းအချို့ ယူဆောင်အလင်းဝင်

BBM - ဇန်နဝါရီ ၂၂
သတင်း - ခက်ဆစ်

မွန်ပြည်နယ်၊ ရေးမြို့နယ်မှာ စစ်ကောင်စီရဲ့ စကခ ၁၉ လက်အောက်ခံ ခမရ ၅၈၈ မှ တပ်သား ၃ ဦးက ခဲယမ်းအချို့ယူဆောင်လာပြီး ပြည်သူ့ကာကွယ်ရေးတပ်မတော်၊ အထူးတိုင်းစစ်ဌာန၊ နည်းဗျူဟာ(၃၃)၊ ရေးပြောက်ကျားတပ်(YGF) အမှတ်(၈၀၀၁)တပ်ရင်းထံသို့ အလင်းဝင်ရောက်ခဲ့တယ်လို့ အဆိုပါတပ်က ယမန်နေ့ ညပိုင်းမှာ ထုတ်ပြန်ခဲ့ပါတယ်။

ဇန်နဝါရီလ ၂၀ ရက်မှာ မော့ကနင်ကျေးရွာအနီးရှိ စစ်ကောင်စီရဲ့ ခမရ ၅၈၈ တပ်ရင်းမှ တပ်သား ကျော်ဝင်းထွဋ်၊ တပ်သား ရဲကိုလတ်နဲ့ တပ်သား မင်းအာကာတို့ဟာ ကျည်ဘောက် ၂ ခု၊ ကျည် ၁၀၀ တောင့်တို့ကို ယူ‌ဆောင်လာပြီး ပြည်သူ့ရင်ခွင်ခိုလှုံ အလင်းဝင်ခဲ့တယ်လို့ ဆိုပါတယ်။

အလင်းဝင်လာသူတွေဟာ စစ်ကောင်စီရဲ့ အတင်းအဓမ္မတပ်သားစုဆောင်းခြင်းကိုခံခဲ့ရပြီး သံဖြူဇရပ်မြို့နယ်၊ ဝဲကလိသင်တန်းကျောင်း စစ်မှုထမ်းသင်တန်းအပတ်စဥ်(၁၆)မှ သင်တန်းဆင်းတွေ ဖြစ်ကြတယ်လို့ သိရပါတယ်။

အဆိုပါ အလင်းဝင်ရောက်လာသူတွေကို နွေးထွေးစွာ ကြိုဆိုခဲ့ပြီး အတင်းအဓမ္မတပ်သားစုဆောင်းခံထားရတဲ့ ပြည်သူ့စစ်(ပစ)တပ်သားတွေအနေနဲ့ ပြည်သူတွေနဲ့အတူ အမြန်ဆုံးပူးပေါင်းပေးကြဖို့ တိုက်တွန်းလိုကြောင်း အဆိုပါတပ်က အသိပေးထားပါတယ်။

တော်လှန်ရေးအမြန်ဆုံးပြီးဆုံးရေးအတွက် ကျရာနေရာကနေ ဝိုင်းဝန်းတွန်းလှန်ကြဖို့၊ ပြည်သူရင်ခွင်သို့နီးစပ်ရာတော်လှန်ရေးအဖွဲ့တွေ ချိတ်ဆက်ပြီး အမြန်ဆုံးခိုလှုံအလင်းဝင်ကြဖို့ ရေးပြောက်ကျားတပ် YGF က တိုက်တွန်းအသိပေးထားပါတယ်။

Photo - YGF

#bbmnews #bbm #bbmtv #ye #mon #PDF
https://www.facebook.com/share/p/1AnfRzWRFV/

သားစဥ်မြေးဆက် စစ်ကျွန်ဘဝမရောက်စေဖို့ အချင်းချင်းထိန်းကြောင်းပေးမှရတော့မယ့် တော်လှန်ရေး
(ဆောင်းပါးရုပ်သံ)
ရေးသားသူ - မင်းသော်

ဒီနောက်ပိုင်း ကျွန်တော်တို့ဟာ တော်လှန်ရေးတပ်ဖွဲ့အချင်းချင်းဆိုသူတွေရဲ့ တစ်ဖွဲ့နဲ့တစ်ဖွဲ့ ပွတ်တိုက်မှုတွေ၊ မကျေလည်မှုတွေ၊ လက်နက်နဲ့ဖြေရှင်းနေတာမဟုတ်တောင် အပေါ်ယံအသေးအဖွဲဖြေရှင်းနည်းနဲ့မဟုတ်တဲ့ ဖြေရှင်းမှုတွေကို ခပ်စိပ်စိပ်မြင်တွေ့နေရတာတွေရှိနေပါတယ်။ ဒါတွေကို မြင်သာအောင်ပြောရမယ်ဆိုရင် ပြီးခဲ့တဲ့ ဒီဇင်ဘာလအတွင်း တောင်ပိုင်းတိုင်းထဲကNUGလက်အောက်ခံ စစ်ဒေသမှူးနဲ့အဖွဲ့ကို KNLAတပ်ဖွဲ့က ခေတ္တထိန်းသိမ်းတာတွေ၊ အညာဘက်က NUG လက်အောက်ခံတပ်တွေနဲ့ တချို့သော Local တပ်ဖွဲ့တွေကြား ဂိတ်ကိစ္စ၊ အခွန်ကိစ္စနဲ့ပတ်သတ်ပြီး မကြာခဏအငြင်းပွါးနေကြတာတွေအပြင် မြေပြင်တော်လှန်ရေးတပ်ဖွဲ့အချို့နဲ့ ပြည်ပထောက်ပို့အချို့ ပဋိပက္ခဖြစ်နေပြီး သူ့အဖွဲ့၊ ကိုယ့်အဖွဲ့ သဘောထားကွဲနေကြတာတွေကို ကြည့်ပြီး သိနိုင်ပါတယ်။

ရွှေတွင်းနဲ့ စီးပွါးရေးလုပ်ကွက်တွေ ပေါတဲ့မန္တလေး-မတ္တရာ-ဖော့တော-မိုးကုတ်လမ်းပိုင်းတွေကို ခုဆို စစ်တပ်က ပြန်ထိန်းချုပ်သွားပြီ၊ ပြီးတော့ မန္တလေး-သပိတ်ကျင်း-တကောင်း-ကြာညှပ် လမ်းပိုင်းတွေကနေတဆင့် ကသာ၊ ဗန်းမောက်နဲ့ ကချင်ပြည်နယ်အတွင်းထိ လမ်းကြောင်းပွင့်အောင်လည်း စစ်တပ်ရဲ့ထိုးစစ်တွေဟာ အခု သပိတ်ကျင်းကိုပင် ကျော်လာနေပြီ၊ ဒါ့အပြင် ကရင်ပြည်မှာဆိုရင်လည်း စီးပွါးရေးအရ အရေးပါတဲ့ မြဝတီ အာရှလမ်းမကြီးကို တော်လှန်ရေးအင်အားစုတွေက ပြန်ပြီလက်လွှတ်ထားရရုံတင်သာမက မြဝတီမြို့ရဲ့တောင်ဘက်ခြမ်းဘက်ဖြစ်တဲ့ မင်းလက်ပံ၊ ဖလူးလေးဒေသကိုပါ ထိုးစစ်ဆင်ခံနေရတဲ့အနေအထားမျိုးနဲ့ရင်ဆိုင် နေရပါတယ်။မြဝတီမြို့ရဲ့တောင်ဘက်ခြမ်းဘက်ဖြစ်တဲ့ မင်းလက်ပံ၊ ဖလူးလေးဒေသကိုပါ ထိုးစစ်ဆင်ခံနေရတဲ့ အနေအထားမျိုးနဲ့ရင်ဆိုင် နေရပါတယ်။

ဆောင်းပါးရုပ်သံအပြည့်အစုံကို ကြည့်လိုက်ရအောင်။

#bbmtv #ArticleVideo #Revolution #Myanmar #MilitaryCouncil #PDF


https://www.facebook.com/share/p/1Dbg1AHGuq/

မုံရွာမှာ နာမည်ဆိုးနဲ့ကျော်ကြားတဲ့ မုံရွေးတန်ပိုဂိတ်မှထွက်လာတဲ့ စစ်အုပ်စုကို မိုင်းဆွဲတိုက်ခိုက်

BBM - ဇန်နဝါရီ ၂၂
သတင်း - ခက်ဆစ်

စစ်ကိုင်းတိုင်း၊ မုံရွာမြို့နယ်အတွင်း နာမည်ဆိုးနဲ့ ကျော်ကြားတဲ့ မုံရွေးတန်ပိုဂိတ်မှ ဆက်ကြေးကောက်၊ မိုင်းရှာထွက်လာတဲ့ စစ်ကောင်စီတပ်ဖွဲ့ဝင်တွေကို ပဒေသမိုင်းနဲ့ မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၄ ဦးဒဏ်ရာရပြီး တစ်ဦးမှာသေဆုံးနိုင်တယ်လို့ MONYWA DYNAMITE.STF အဖွဲ့က ဒီနေ့ ထုတ်ပြန်ပါတယ်။

ဇန်နဝါရီလ ၂၁ ရက်၊ နေ့လယ် ၁၂ နာရီ ၄၅ မိနစ်မှာ မုံရွေးတန်ပိုဂိတ်မှ မုံရွာ-ချောင်းဦးလမ်းမပေါ်သို့ ဆက်ကြေးကောက်၊ မိုင်းရှာဖို့ထွက်လာတဲ့ စစ်ကောင်စီတပ်သား၊ ရဲ၊ ပျူစောထီး အင်အား ၂၀ ခန့်ကို ပဒေသာမိုင်း ၂ လုံးနဲ့ ဖောက်ခွဲတိုက်ခိုက်ခဲ့တယ်လို့ ဆိုပါတယ်။

တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၄ ဦးထိခိုက်ဒဏ်ရာရပြီး ၁ ဦးမှာ သေဆုံးနိုင်ကြောင်း မျက်မြင်တွေ့ရှိတဲ့ ပြည်သူတွေထံမှတဆင့် သိရတယ်လို့ ထုတ်ပြန်ချက်မှာ ဖော်ပြထားပါတယ်။

အဆိုပါ ထိခိုက်ဒဏ်ရာရတဲ့ သူတွေကို မုံရွာမြို့ထဲမှထွက်လာတဲ့ သံပြားကာကား တစ်စီးနဲ့ လာရောက်တင်ဆောင်ခဲ့ပြီး မုံရွာ နမခ သို့ ခေါ်ဆောင်သွားတယ်လို့ သိရပါတယ်။

အဲဒီမိုင်းဆွဲတိုက်ခိုက်မှုကို BRAVE HEART AYMY-BHA ၊ MONYWA DYNAMITE - STF နဲ့ CHINDWIN FIGHTER GROUP - CFG တို့က လုပ်‌ဆောင်ခဲ့တာဖြစ်ပြီး လိုအပ်တဲ့ လက်နက်ခဲယမ်းအတွက်လည်း ပြည်သူတွေအနေနဲ့ ပါဝင်အားဖြည့်ပေးကြဖို့ကိုလည်း အဆိုပါအဖွဲ့တွေက မေတ္တာရပ်ခံထားပါတယ်။

Video - MONYWA DYNAMITE - STF
https://www.facebook.com/share/v/1Fycz4xb9N/

မင်းဘူးနယ်အတွင်း စစ်တပ်က PDF ပုံဖမ်းကာ သတင်းများလိုက်လံစုံစမ်းနေတယ်ဆိုတာ သတင်းမှားသာဖြစ်

🟥ဗမာပြည်ကာကွယ်ရေးတပ်-USBAမှ တပ်ဖွဲ့ဝင်များဖြစ်ကြောင်း အဆိုပါတပ်ဖွဲ့မှအတည်ပြု

BBM-ဇန်နဝါရီ၂၂
သတင်း-မင်းသော်

မင်းဘူးမြို့နယ်အတွင်း မုန်ထောင်ရဲစခန်းကို တော်လှန်ရေးအင်အားစုတွေက စီးနင်းတိုက်ခိုက်ပြီးတဲ့နောက် စစ်တပ်က PDF ပုံဖမ်းကာ သတင်းများ လိုက်လံစုံစမ်းနေတယ်ဆိုတာဟာ သတင်းမှားသာ ဖြစ်တယ်လို့ ဗမာပြည်ကာကွယ်ရေးတပ်-USBA ထံမှ သိရပါတယ်။

ပြီးခဲ့တဲ့ ဇန်နဝါရီလ ၁၆ရက်နေ့က မကွေးတိုင်း၊ မင်းဘူး(စကု)မြို့နယ်အတွင်းက မုန်ထောင်ရဲစခန်းကို တော်လှန်ရေးအင်အားစုတွေက ဝင်ရောက်တိုက်ခိုက်ခဲ့ပြီးတဲ့နောက် စစ်တပ်အနေနဲ့ အဆိုပါဒေသပတ်ဝန်းကျင်အနီးတစ်ဝိုက်ကို PDFအယောင်ဆောင်ကာ ဝင်ရောက်သတင်းယူမှုတွေရှိနေတယ်ဆိုပြီး ဒေသခံတွေထံမှ BBM အနေနဲ့ စုံစမ်းသိရှိခဲ့ရပြီး သတင်းထုတ်ဝေမှုတွေရှိခဲ့ပါတယ်။

ဒါပေမဲ့ စစ်တပ်စိုးမိုးထားတဲ့ အဆိုပါနယ်မြေတွေအတွင်းထဲထိဝင်ပြီး သတင်းရယူတာတွေ ဖုန်းနံပတ်တောင်းယူတာတွေဟာ အမှန်တကယ်ပင် တော်လှန်ရေးရဲဘော်တွေဖြစ်ကြောင်းကို ဗမာပြည်ကာကွယ်ရေးတပ်-USBAမှ ကိုဗဟိန်းက BBM ကိုအတည်ပြုပြောဆိုပါတယ်။

"မင်းဘူးမြို့နယ်က ရွာတွေကို လျှပ်တပြတ်ဝင်ပြီး သတင်းယူတာတွေ၊ ပြည်သူနဲ့ဆက်
သွယ်တာတွေလုပ်ခဲ့တာက ကျွန်တော်တို့တပ်ဖွဲ့ပါ၊ အဲ့ဘက်နယ်တွေက စစ်တပ်စိုးမိုးတဲ့နယ်ဆိုတာလည်းဟုတ်ပါတယ်၊ ကျွန်တော်တို့ဝင်တဲ့အချိန်မှာတောင် စစ်တပ်ခန့် အုပ်ချုပ်ရေးမှူးတွေရှိနေတုန်းပဲ၊ လျှပ်တပြတ် ဝင်ရောက်ပြီး ပြည်သူနဲ့ထိတွေ့ခဲ့တာပါ"

ဒါ့အပြင် အဆိုပါဒေသတွေဟာ စစ်တပ်အစဥ်
အဆက် စိုးမိုးထားရာနေရာတွေဖြစ်ပြီး တော်လှန်ရေးတပ်ဖွဲ့တွေ ဝင်ရောက်လာစဥ်မှာပင် PDF ဆိုတာကိုမသိသူတွေနဲ့ စစ်တပ်က PDF အယောင်ဆောင်ပြီး ဝင်ရောက်လာတယ်လို့ ထင်တဲ့သူတွေလည်း အမှန်တကယ်ရှိကြောင်းလည်း ကိုဗဟိန်းမှ ဆက်ပြောပါတယ်။

"စစ်တပ်စိုးမိုးတဲ့နယ်တွေဆိုတော့ PDF ဆိုတာ ဘာမှန်းတောင်မသိတဲ့ သူတွေလည်းရှိတယ်အဲ့ဘက်နယ်တွေမှာ၊ စစ်တပ်က PDF အယောင် ဆောင်ပြီး သတင်းလာမေးတယ်လို့ ထင်တဲ့သူတွေလည်း ရှိကြပါတယ်"

ဗမာပြည်ကာကွယ်ရေး တပ်ဖွဲ့အနေနဲ့ စစ်တပ်နဲ့အနီးဆုံးထိဆင်းပြီး ပြည်သူလူထုနဲ့တွေ့ဆုံခဲ့ချိန် စစ်ကောင်စီထုတ်ကုန်တွေဖြစ်တဲ့ အရက်၊ ဘီယာနဲ့ဆေးလိပ်အများစု၊ ဘိလပ်မြေများကို ရောင်းဝယ်သုံးစွဲနေတာတွေတွေ့ရှိခဲ့ရပြီး လူထုမနစ်နာစေရန်အတွက် ပညာပေးကာလ(၁)နှစ် သတ်မှတ်ခဲ့ပြီး (၁)လအတွင်းရောင်းချပြီးတာနဲ့ စကစ ထုတ်ကုန်များကို ထပ်မံရောင်းဝယ်ဖောက်ကာတာတွေသုံးစွဲတာတွေ မပြုလုပ်ဖို့အတွက်စနစ်တကျ ရှင်းပြဆွေးနွေးခဲ့တယ်လို့လည်း သိရပါတယ်။

Photo-ဗမာပြည်ကာကွယ်ရေးတပ်
ပုံစာ-ဗမာပြည်ကာကွယ်ရေးတပ်ဖွဲ့များနဲ့ မင်းဘူးဒေသမှ ပြည်သူတွေထံတွေ့ရှိရတဲ့ ပစ္စည်းများ

#bbmnews #bbm #bbmtv #minbu #PDF
https://www.facebook.com/share/p/17yYKWwgKn/

မဲဆောက်မှာ ထိုင်းရဲကိုပစ်ခတ်ခဲ့တဲ့ သေနတ်သမားကို ကော်ဘရာစစ်ကြောင်းမှူး ဗိုလ်ဒါဘော ကိုယ်တိုင်အပ်နှံ

BBM - ဇန်နဝါရီ ၂၂
သတင်း - Richard

ထိုင်းနိုင်ငံ၊ မဲဆောက်မြို့၊ မယ်ကုဘက်ခြမ်းမှာ လက်နက်အရောင်းအ၀ယ်လုပ်စဉ် ပစ်ခတ်ထွက်ပြေးခဲ့တဲ့ သေနတ်သမားကို ကော်ဘရာစစ်ကြောင်းမှူး ဗိုလ်ဒါဘောက ဇန်နဝါရီလ ၂၂ ရက်နေ့မှာ ထိုင်းအာဏာပိုင်တွေထံသို့ ကိုယ်တိုင်လာရောက်အပ်နှံခဲ့တယ်လို့ သတင်းရင်းမြစ်တွေအရ သိရပါတယ်။

ဇန်နဝါရီလ ၂၀ ရက်နေ့ ည ၈ နာရီခွဲခန့်မှာ တာ့ခ်ခရိုင်၊ မဲကု၊ ဖလမ်းရွာရှိ မဲဆောက်-အုံဖန် အဝေးပြေးလမ်းမကြီးပေါ်က Seven Eleven စတိုးဆိုင်နားမှာ မဲဆောက်ရဲတပ်ဖွဲ့က ကြိုတင်စီစဉ်ထားတဲ့ ဖမ်းဆီးမှုတစ်ခုအတွင်း အခုလိုပစ်ခတ်မှုဖြစ်ပွားခဲ့တာပါ။

ထိုင်းရဲအရာရှိတွေက နယ်စပ်ဖြတ်ကျော်လက်နက်ရောင်းဝယ်ရေးကွန်ရက်မှ သံသယရှိသူ ၂ ဦးဆီက သေနတ်တစ်လက်ဝယ်ယူဖို့ စီစဉ်ခဲ့ကြတယ်လို့လည်း သိရပါတယ်။

အဆိုပါ ဖြစ်စဉ်အတွင်း ဆိုင်ကယ်မောင်းနှင်သူ တရားခံတစ်ဦးကို ဖမ်းဆီးရရှိခဲ့ပေမဲ့ ထိုင်းရဲကို ပစ်ခတ်ခဲ့သူ နဂါးကြီး(ခ) နိုင်လင်းအောင်(၂၀ နှစ်)မှာ ၂ရက်ကြာ လွတ်မြောက်နေခဲ့ပါတယ်။

ထိုင်းရဲတပ်ဖွဲ့ဝင်ကို ပစ်ခတ်ခဲ့သူ နိုင်လင်းအောင်ဟာ မြန်မာဘက်ခြမ်း ကရင်ပြည်နယ်ဘက်ကို ထွက်ပြေးသွားတယ်လို့ ထိုင်းသတင်းဌာနတွေမှာ ဖော်ပြခဲ့ပါတယ်။

အခုလို လွတ်မြောက်ပြီး ၂ ရက်အကြာ ဇန်နဝါရီလ ၂၂ ရက်၊ မနက်ပိုင်းမှာ ကော်ဘရာစစ်ကြောင်းမှူး ဗိုလ်ဒါဘော ကိုယ်တိုင်က ထိုင်းအာဏာနိုင်ပိုင်တွေထံကို ကိုယ်တိုင်သွားရောက်အပ်နှံခဲ့တာပါ။

လက်ရှိမှာ အပစ်ခတ်ခံခဲ့ရတဲ့ မဲဆောက်ရဲတပ်ဖွဲ့မှ အသက် ၅၁ နှစ်အရွယ် ရဲတပ်ကြပ်ကြီး ဆက်ဆန်ကန်ကာဟာ ကျန်းမာရေးအခြေအနေကောင်းမွန်လာတယ်လို့လည်း သိရပါတယ်။

အဆိုပါ ပစ်ခတ်ခံခဲ့ရတဲ့နေ့မှာပဲ ထိုင်းရဲတပ်ဖွဲ့ဝင် ဆက်ဆန်ကန်ကာအတွက် ထိုင်းရောက် မြန်မာနိုင်ငံသားတွေက မဲဆောက်ဆေးရုံကြီးကို သွားရောက်ပြီး သွေးလှူဒါန်းခဲ့ကြပါသေးတယ်။

လက်ရှိ ထိုင်းနိုင်ငံမှာ အခြေအနေတွေ ဆက်တိုက်ရှုပ်ထွေးလာနေတာကြောင့် ထိုင်းနိုင်ငံရောက် မြန်မာနိုင်ငံသားတွေအနေနဲ့လည်း အထူးသတိထားဆင်ခြင်နေထိုင်ကြဖို့ NUG အပါအဝင် တော်လှန်ရေး အဖွဲ့အစည်းတွေက တိုက်တွန်းထားကြပါတယ်။

ပုံ-လူမှုမီဒီယာ

#bbmnews #bbm #bbmtv #maesot #ဗိုလ်ဒါဘော
https://www.facebook.com/share/p/1BqD9gWYgr/

ဂရင်းလန်းအဖွဲ့တစ်ဖွဲ့က ပရဟိတအတွက် 'Make America Go Away' ဦးထုပ်တွေကို ရောင်းချနေ၊ အမေရိကန်တွေ အများဆုံးဝယ်ယူနေကြ

BBM - ဇန်နဝါရီ ၂၂

ဂရင်းလန်း ပရဟိတအဖွဲ့တစ်ခုက "Make America Go Away"(အမေရိကန်တွေထွက်သွား) ဆိုတဲ့ အဖြူရောင်စာလုံးတွေနဲ့ ရိုက်နှိပ်ထားသော အနီရောင်ဦးထုပ်တွေကို ရောင်းချလျက်ရှိပြီး ၀ယ်သူအများစုကလည်း အမေရိကန်နိုင်ငံသား‌ ဖြစ်တယ်လို့ ဆိုပါတယ်။

Make America Great Again(အမေရိကန် အားပြန်ကောင်းအောင်လုပ်မယ်) နိုင်ငံရေးလှုပ်ရှားမှုရဲ့ ကုန်အမှတ်တံဆိပ်ဦးထုပ်ကို လှောင်ပြောင်ဖို့ ဒီဇိုင်းထုတ်ထားတာပဲဖြစ်ပါတယ်။

ဒါဟာ သမ္မတဒေါ်နယ်ထရမ့်က ဂရင်းလန်းကို သိမ်းပိုက်ဖို့ ခြိမ်းခြောက်မှုတွေ တိုးမြှင့်လာချိန််မှာ အခုလို လှုပ်ရှားမှု ပေါ်ပေါက်လာတာပဲဖြစ်ပါတယ်။

ဦးထုပ်တွေ ရောင်းချတဲ့ အဖွဲ့တစ်ခုရဲ့တည်ထောင်သူ Greenland Support မှ Victor Schøtt က အဆိုပါ ဒီဇိုင်းဟာ ထရမ့် ရဲ့ နိုင်ငံခြားဆက်ဆံရေးပုံစံကိုငြင်းပယ်တာနဲ့ ပိုမိုသက်ဆိုင်ပြီးအမေရိကကိုယ်တိုင်ကိုမနှစ်သက်တာမဟုတ်ဘူးလို့ Business Insider ကိုပြောကြားခဲ့ပါတယ်။

"ဒေါ်နယ်ထရမ့်အနေနဲ့ ဂရင်းလန်း ကိုသိမ်းပိုက်ဖို့ ကိစ္စနဲ့ ခပ်ဝေးဝေးမှာ နေသင့်တယ်" လို့ Schøtt ကပြောကြားခဲ့ပါတယ်။

ထရမ့်က နော်ဒစ်နဲ့ အာတိတ်ဒေသရဲ့ အဓိက မဟာမိတ်ဖြစ်တဲ့ နော်ဝေဝန်ကြီးချုပ်ဆီကို "ငြိမ်းချမ်းရေးကိုသာ စဉ်းစားဖို့ တာဝန်မရှိတော့ကြောင်း” သတိပေးတဲ့ သတင်းစကားပေးပို့ခဲ့ပါတယ်။

Schøtt က လွန်ခဲ့တဲ့ တစ်လခန့်က အဆိုပါ ဦးထုပ်ကမ်ပိန်းကို စတင်ခဲ့ပြီး ရောင်းအားဟာ တစ်ပတ်ကို ရာဂဏန်းအထိ တိုးလာခဲ့ပြီး အမေရိကန်တွေက အများဆုံး၀ယ်ယူတာဖြစ်ကြောင်း ပြောကြားထားပါတယ်။

Reference - Business Insider
Translator-Richard

#bbm #bbmnews #Trump #greenland #UpdateNews
https://www.facebook.com/share/p/1DSByQ3Tyd/

ကိုယ့်လူကိုပြန်သတ်ပြီး လူမဆန်တဲ့လုပ်ရပ် စစ်ကောင်စီလုပ်နေဟု စစ်သုံ့ပန်းများပြော

BBM - ဇန်နဝါရီ ၂၂
သတင်း - သော်

ရခိုင်ပြည်နယ်အတွင်း စစ်ရေးနိမ့်နေတဲ့ စစ်ကောင်စီဟာ သူတို့အတွက် တာဝန်ထမ်းဆောင်ခဲ့တဲ့ စစ်သားဟောင်းတွေနဲ့ မိသားစုဝင်တွေကို ငဲ့ညှာခြင်းမရှိဘဲ လေကြောင်းကနေ ဗုံးကြဲတိုက်ခိုက်တဲ့အပေါ် "စစ်ကောင်စီရဲ့ လုပ်ရပ်ဟာ လူမဆန်တဲ့ လုပ်ရပ်ဖြစ်တယ်" လို့ အသက်ဘေးကနေ လွတ်မြောက်လာသူတွေက ပြောပါတယ်။

ဇန်နဝါရီလ ၂၀ ရက်နေ့က ကျောက်တော်နဲ့ ပုဏ္ဏားကျွန်းမြို့နယ်အစပ်မှာရှိတဲ့ ချောင်းတူကျေးရွာနားမှာရှိတဲ့ စစ်သုံ့ပန်းစခန်းတစ်ခုကို စစ်ကောင်စီက ပေါင် ၃၀၀ ဗုံးသီး ၄ လုံးနဲ့ တိုက်ခိုက်ခဲ့တာကြောင့် စစ်သုံ့ပန်း အယောက် ၂၀ ကျော် သေဆုံးပြီး ၃၀ ထက်မနည်း အပြင်းအထန် ဒဏ်ရာရခဲ့တယ်လို့ သိရပါတယ်။

“ကျွန်မတို့ တပ်မတော်အတွက် ပေးဆပ်ခဲ့ဖူးပါတယ်၊ အခုလို ဗုံးကြဲတာက လူမဆန်တဲ့ လုပ်ရပ်ပါ၊ ကိုယ့်လူကို ပြန်သတ်နေတာ၊ ကျွန်မတို့ရဲ့ သစ္စာစောင့်သိမှုတွေဟာ အခုတော့ အသတ်ခံရဖို့ ဖြစ်နေတယ်”လို့ စစ်သုံ့ပန်းမိသားစုဝင် အမျိုးသမီးတစ်ဦးက ပြောပါတယ်။

အာရက္ခတပ်တော်ဘက်က စစ်သုံ့ပန်းတွေကို ပြန်လွှတ်ပေးဖို့ စီစဉ်နေချိန်မှာ ဖြစ်ပွားခဲ့တဲ့ စစ်ကောင်စီတပ်ရဲ့ လေကြောင်းတိုက်ခိုက်မှုဟာ လက်အောက်ခံ တပ်သားတွေရဲ့ အသက်ကို တန်ဖိုးမထားတာဖြစ်တယ်လို့လည်း ဆိုပါတယ်။

စစ်ကောင်စီက ဗုံးကြဲတိုက်ခိုက်ခဲ့တဲ့ စစ်သုံ့ပန်းစခန်းမှာ အာရက္ခတပ်တော်ဆီ လက်နက်ချခဲ့တဲ့ ခမရ ၃၇၇ နဲ့ ၅၃၉ တပ်ရင်းတို့မှ စစ်သားတွေနဲ့ သူတို့ရဲ့ ဇနီးနဲ့ သားသမီးတွေ ရှိနေတာကို သိလျက်နဲ့ တိုက်ခိုက်ခဲ့တာပါ။

“ကျွန်တော်တို့ ဒီမှာ ရှိတာကို သိပါတယ်၊ တမင် ကိုယ့်လူကိုယ် ပြန်သတ်တာပါ၊ ပါးစပ်ကတော့ ငြိမ်းချမ်းရေး ပြောပေမဲ့ တကယ့်လက်တွေ့ကျ ကိုယ့်လူပါ ကိုယ်ပြန်သတ်နေတယ်”လို့ စစ်သုံ့ပန်းတစ်ဦးက ပြောပါတယ်။

အာရက္ခတပ်တော်အနေနဲ့ စစ်သုံ့ပန်းတွေကို ကာကွယ်ရမယ်ဆိုတဲ့ Geneva Conventions ကို လိုက်နာပြီး စစ်သုံ့ပန်းတွေကို လူသားဆန်စွာ ထိန်းသိမ်းထားကာ ပြန်လွှတ်ပေးဖို့ စီစဉ်နေချိန် စစ်ကောင်စီကတော့ ကိုယ့်တပ်သားကို ကိုယ်တိုင်ပြန်လည်သတ်ဖြတ်နေတာလည်း ဖြစ်ပါတယ်။

စစ်ကောင်စီဘက်က စစ်သုံ့ပန်းတွေနဲ့ မိသားစုဝင်တွေကို ထားတဲ့နေရာတွေကို ရည်ရွယ်ချက်ရှိရှိနဲ့ တိုက်ခိုက်တယ်ဆိုတာက Geneva Conventions ကို ပြောင်ပြောင်တင်းတင်း ချိုးဖောက်တာဖြစ်တယ်လို့ ရခိုင့်စစ်ရေး လေ့လာသူတွေက ပြောပါတယ်။

Photo – ONN
ပုံစာ - စစ်ကောင်စီ ဗုံးကြဲတိုက်ခိုက်မှုကြောင့် သေဆုံးသွားသော စစ်သုံ့ပန်းတစ်ဦး။

#bbm #bbmnews #စစ်သုံ့ပန်း #စစ်ကောင်စီ #Kyauktaw
https://www.facebook.com/share/p/1FmtbucB2t/

တိုက်ပွဲဖြစ်ပွားနေတဲ့ ဖလမ်းမြို့နယ်ကို စစ်ကောင်စီတပ်က ကလေးမြို့မှ ထပ်မံအင်အားဖြည့်တင်းနေ

BBM - ဇန်နဝါရီ ၂၂
သတင်း - ကိုအိုက်

ချင်းပြည်နယ်မြောက်ပိုင်း၊ ဖလမ်းမြို့နယ်ကို စစ်ကောင်စီက တပ်အင်အားတွေ ထပ်မံ ဖြည့်တင်းနေတာကြောင့် တိုက်ပွဲတွေ ပိုမိုပြင်းထန်လာနိုင်တယ်လို့ ချင်းပြည်အစိုးရ (CC) စစ်ရေးသတင်းအရင်းမြစ်က BBM ကို ပြောပါတယ်။

တိုက်ပွဲဖြစ်နေတဲ့ ဖလမ်းမြို့နယ်ကို စစ်ကောင်စီက ဇန်နဝါရီ ၂၀ ရက်နေ့က စစ်ကိုင်းတိုင်း၊ ကလေးမြို့နယ်ကနေ ကလေး-သိုင်းငင်း ကားလမ်းအတိုင်း စစ်ကားတွေနဲ့ အင်အား ၂၀၀ ကျော်ဝန်းကျင်နဲ့ စစ်အင်အား ဖြည့်တင်းနေတာပါ။

"စကစတွေက ကလေးမြို့ ကနေ ၁၂ ဘီး ကား ၅ စီး၊ သံပြားကာကား ၃ စီး နဲ့ အင်အား ၂၀၀ ကျော်လောက် သိုင်းငင်းရွာကို ဇန်နဝါရီ ၂၀ ရက်က ရောက်တယ်၊ အဲသိုင်းငင်းရွာကနေတဆင့် ဖလမ်းမြို့ဘက်ကို စစ်ကူပို့တာဖြစ်ပါတယ် "လို့ ချင်းပြည်အစိုးရ (CC) စစ်ရေးသတင်းအရင်းမြစ်က BBM ကို ပြောပါတယ်။

သိုင်းငင်းရွာကို ရောက်ရှိနေတဲ့ စစ်ကောင်စီတပ်တွေဟာ သိုင်းငင်း-ဖလမ်း ကားလမ်းအတိုင်း ဖလမ်းမြို့နယ်ဘက်သို့ စတင်စစ်ကြောင်းထိုးနေပြီဖြစ်တယ်လို့ သိရပါတယ်။

"ဖလမ်းဘက်ကို ကားတွေနဲ့ စစ်ကြောင်းတွေ ထိုးနေပါပြီ၊ ခြေလျင်နဲ့ လာတာလည်းရှိတယ်၊ လောလောဆယ် အဲစစ်ကြောင်းနဲ့ ထိတွေ့မှုဖြစ်တာက မရှိသေးဘူး၊ ဖလမ်းဘက်က စစ်ကြောင်းဆီလည်း မရောက်သေးဘဲ လမ်းမှာပဲ ရှိသေးပါတယ်"လို့ ချင်းပြည်အစိုးရ (CC) စစ်ရေးသတင်းအရင်းမြစ်က BBM ကို ပြောပါတယ်။

ဖလမ်းမြို့နယ်မှာ စစ်ကောင်စီတပ်နဲ့ ချင်းတော်လှန်ရေး တပ်ဖွဲ့တို့ နေ့စဥ်ထိတွေ့ တိုက်ပွဲပြင်းထန်နေပြီး လက်ရှိမှာ စစ်ကောင်စီက တပ်အင်အား ထပ်မံဖြည့်တင်းနေတာကြောင့် တိုက်ပွဲတွေ ပိုမိုပြင်းထန်လာနိုင်တဲ့ အခြေအနေရှိတယ်လို့ ဆိုပါတယ်။

"အခုအင်အားက ၂၀၀ ကျော် ဝန်းကျင်လောက်ဆိုတော့ ကားတွေလည်း ရောက်လာတော့ ဘယ်လိုပဲဖြစ်ဖြစ် သူတို့ဆီမှာ လက်နက်တွေ၊ ခဲယမ်းတွေလည်း ပါလာနိုင်သလို ရိက္ခာတွေလည်း ပါလာနိုင်တာကြောင့် တိုက်ပွဲက ပိုပြင်းထန်မယ်လို့ ထင်ပါတယ်" လို့ ချင်းပြည်အစိုးရ (CC) စစ်ရေးသတင်းအရင်းမြစ်က BBM ကို ပြောပါတယ်။

ဖလမ်းမြို့ကို ပြန်ရရေးအတွက် စစ်ကောင်စီတပ်က ပြီးခဲ့တဲ့ ၂၀၂၅ ခုနှစ်၊ အောက်တိုဘာလမှစပြီး ကလေးမြို့နယ်ကနေ ကလေး - ဝေဘူလ - ဖလမ်း ကားလမ်းနဲ့ ကလေး-သိုင်းငင်း-ဖလမ်း ကားလမ်းအတိုင်း စစ်ကြောင်းနှစ်ကြောင်းနဲ့ ထိုးစစ်ဆင်နေတာပါ။

အဲဒီစစ်ကြောင်းဟာ ၃ လကျော်ကြာထိ ဖလမ်းမြို့ကို မရောက်နိုင်သေးပေမဲ့လည်း ဖလမ်းမြို့အနီး ခွန်လီ၊ ဆုမ်းရန်း စတဲ့ကျေးရွာမှာရောက်ရှိနေပြီး ချင်းတော်လှန်ရေးပူးပေါင်းတပ်ဖွဲ့တွေနဲ့ နေ့စဥ်ထိတွေ့ တိုက်ပွဲပြင်းထန်နေတာ ဖြစ်ပါတယ်။

Photo - ပုံဟောင်း
https://www.facebook.com/share/p/176jopvTPL/

AA ရဲ့ ထိုးစစ်ဆင်မှု ကျောက်ဖြူမြို့နဲ့ ရေတပ်ဌာနချုပ်အနီးသို့ ရောက်ရှိလာ

BBM - ဇန်နဝါရီ ၂၂
သတင်း - ကိုအိုက်

ရခိုင်ပြည်နယ်၊ ကျောက်ဖြူမြို့နယ်မှာ အာရက္ခတပ်တော်(AA) ရဲ့ ထိုးစစ်ဆင်မှု အမှတ် (၃၂) ရဲတပ်ရင်းနဲ့ ဓညဝတီရေတပ်ဌာနချုပ် အနီးသို့ ရောက်ရှိနေပြီလို့ ရခိုင်စစ်ရေးသတင်းအရင်းမြစ်နဲ့ ဒေသခံတွေက BBM ကို ပြောပါတယ်။

အခုလ ဇန်နဝါရီ ပထမအပတ်မှစပြီး ကျောက်ဖြူတိုက်ပွဲမှာ စစ်ကောင်စီတပ်ဘက်က လေကြောင်းနဲ့ လက်နက်ကြီးကျည် ပစ်ခတ်မှု အလွန်အကျွံ အသုံးပြုလာပေမဲ့ AA ရဲ့ ထိုးစစ်ဟာ မြို့နဲ့ ရေတပ်ဌာနချုပ်အနီး ရောက်ရှိလာပြီ ဖြစ်ပါတယ်။

စစ်ကောင်စီတပ်ရဲ့ ကျောက်ဖြူအခြေစိုက် ဓညဝတီရေတပ်ဌာနချုပ်နဲ့ နှစ်မိုင်၊ သုံးမိုင်ခန့် ဝေးတဲ့ သုံးနေရာလောက်မှာ AA နဲ့ စစ်ကောင်စီတို့ တိုက်ပွဲဖြစ်တာ တစ်လနီးပါးရှိပြီဖြစ်သလို တိုက်ပွဲအရှိန်လည်းမြင့်လာတယ်လို့ သိရပါတယ်။

"တိုက်ပွဲက တဖြည်းဖြည်းနဲ့ အရှိန်မြင့်လာသလို ရေတပ်ဌာနချုပ်က ဒရုန်းနဲ့ ပစ်ကူပေးတာ၊ လက်နက်ကြီးကျည် ပစ်ကူပေးတာ လုပ်ပါတယ်၊ တိုက်ပွဲဖြစ်တဲ့နေရာတွေနဲ့ အနီးအနားကျေးရွာတွေကို လေကြောင်း တိုက်ခိုက်တာတွေလည်း ရှိတယ်"လို့ ရခိုင်စစ်ရေးသတင်းအရင်းမြစ်က BBM ကို ပြောပါတယ်။

ရေတပ်ဌာနချုပ်အနီး ဦးဂင်း၊ စေမော်၊ ဇိုင်ချောင်း၊ သိုင်းချောင်း စတဲ့ ကျေးရွာအနီးအနားမှာ စစ်ကောင်စီနဲ့ အာရက္ခတပ်တော်(AA) တို့ တိုက်ပွဲဖြစ်ပွားနေတာပါ။

ဒါ့အပြင် ကျောက်ဖြူမြို့ ခမရ (၅၄၂) တပ်ရင်းအနီးမှာရှိတဲ့ အမှတ် (၃၂) ရဲတပ်ရင်းနဲ့ ၅ မိုင်လောက်ဝေးတဲ့ ပြိုင်စေ့ကေရွာမှာလည်း အခုလကစပြီး စစ်ကောင်စီတပ်နဲ့ အာရက္ခတပ်တော်(AA) တို့ တိုက်ပွဲပြင်းထန်နေတယ်လို့ သိရပါတယ်။

"ပြိုင်စေ့ကေမှာလည်း တိုက်ပွဲဖြစ်တာ အတော်ကြာပြီ တခါတလေ တိုက်ပွဲ က ရဲတပ်ရင်းအနားဖြစ်သလို ကြားရတယ်၊ လိပ်ခမော် ဘက်မှာလည်း တိုက်ပွဲရှိတယ်၊ နေရာတိုင်းမှာ တိုက်ပွဲတွေရှိတယ်၊ တိုက်ပွဲကြားမှာ ညှပ်နေတယ်၊ ကျောက်ဖြူလည်းသွားမရ၊ တခြားတိုက်ပွဲနဲ့ လွတ်ကင်းမယ့်နေရာဘက်လည်း သွားမရဘူး"လို့ ဂုန်းချွန်ရွာသားတစ်ဦးက BBM ကို ပြောပါတယ်။

မြို့အနီးအနားမှာ ဖြစ်ပွားတဲ့ တိုက်ပွဲတွင်း အရပ်သားပြည်သူတွေ ထိခိုက်သေဆုံးမှု မရှိပေမဲ့ ရေတပ်ဌာနချုပ်အနီးဖြစ်ပွားတဲ့ တိုက်ပွဲမှာ စစ်ကောင်စီရဲ့ လေကြောင်း ပစ်ခတ်မှုနဲ့ လက်နက်ကြီးကျည် ပစ်ခတ်မှုတို့ကြောင့် အရပ်သား ထိခိုက်မှုသေဆုံးမှုတွေလည်းရှိတယ်လို့ သိရပါတယ်။

အဲဒီကျောက်ဖြူမြို့နယ်တိုက်ပွဲအတွင်းမှာ သောင်းနဲ့ချီ စစ်ဘေးရှောင်တွေဟာ စားနပ်ရိက္ခာတွေအပြင် ဆေးဝါး၊ သောက်ရေ စတာတွေ အကူအညီလိုအပ်နေတယ်လို့ သိရပါတယ်။

ကျောက်ဖြူမြို့နယ်မှာ စစ်ကောင်စီတပ်ရဲ့ ခလရ ၃၄၊ ခမရ ၅၄၂၊ ခမရ ၅၄၃၊ အမှတ် (၃၂) ရဲတပ်ရင်း နဲ့ ဓညဝတီရေတပ်ဌာနချုပ်တို့ တည်ရှိနေတာလည်း ဖြစ်ပါတယ်။

#bbm #bbmtv #bbmnews #AA #Rakhine
https://www.facebook.com/share/p/1De3yBgxiD/