ညောင်လေးပင်မြို့ရှိ စစ်ကောင်စီတပ်စခန်းတွေနဲ့ ရဲကင်းတွေကို ပစ်ခတ်တိုက်ခိုက်

BBM - ဇန်နဝါရီ ၁၂
သတင်း - Richard

ပဲခူးတိုင်း၊ ညောင်လေးပင်မြို့နယ်၊ ထိန်တပင်ကျေးရွာနဲ့ ကလိမ်ခင်ကျေးရွာရှိ စစ်ကောင်စီတပ်တွေကို ပစ်ခတ်တိုက်ခိုက်ခဲ့တယ်လို့ တောကျီးကန်းစစ်ကြောင်းက ထုတ်ပြန်ထားပါတယ်။

ဇန်နဝါရီလ ၉ ရက်၊ မနက်ပိုင်းက ညောင်လေးပင်မြို့နယ်အတွင်းရှိ ထိန်တပင်ကျေးရွာနဲ့ ကလိမ်ခင်ကျေးရွာကြားရှိ စစ်ကောင်စီစခန်း‌တွေ၊ ရထားလမ်းပေါ်ရှိ ရဲကင်းစခန်းတွေကို မြေပြင်ကရော၊ ဝေဟင်ကပါ ဒရုန်းတွေနဲ့ တိုက်ခိုက်ခဲ့တယ်လို့ ဆိုပါတယ်။

အဆိုပါတိုက်ပွဲပြီးနောက် ရန်ကုန်-မန္တလေး လမ်းဟောင်းပေါ်မှာလည်း လုံခြုံရေးဆိုင်ရာစစ်ဆေးမှုတွေကို ဆောင်ရွက်နိုင်ခဲ့တယ်လို့ ဆိုပါတယ်။

စစ်ကောင်စီဘက်က ထိခိုက်သေဆုံးမှုကို ဆက်လက်စုံစမ်းလျက်ရှိတယ်လို့ သိရပါတယ်

အဆိုပါ ပစ်ခတ်တိုက်ခိုက်မှုကို ပြည်သူ့ကာကွယ်ရေးတပ်မတော်၊ ပဲခူးတိုင်းစစ်ဌာန ဗျူဟာ (၂၆) တပ်ရင်း‌တွေဖြစ်တဲ့ တောကျီးကန်းတပ်ရင်း၊ ပဲခူးခရိုင်အမှတ် (၃) မီးနဂါး(3703)တပ်ရင်းတို့နဲ့အတူ တော်ဝင်ဒေါင်းတပ်ရင်းတို့က ပူးပေါင်းပြုလုပ်ခဲ့ကြတာဖြစ်တယ်လို့ သိရပါတယ်။

အခုစစ်ဆင်ရေးဟာ အမှတ်(၂) စစ်ဒေသ၊ ပဲခူးတိုင်းစစ်ဌာနရဲ့ စစ်တောင်းမြစ်ဝှမ်းဒေသ၊ အောင်မြင်စစ်ဆင်ရေးရဲ့ ပူးပေါင်းစစ်ဆင်ရေးတစ်ခုလည်းဖြစ်တယ်လို့ သိရပါတယ်။

Video - တောကျီးကန်းစစ်ကြောင်း
https://www.facebook.com/share/v/1GJtAvhrkj/

Chauk Revolution Army မှတပ်ရင်း ၁ ရင်း ပြည်သူ့ကာကွယ်ရေးတပ်မတော်ရဲ့ ကွပ်ကဲမှုခံယူ

BBM - ဇန်နဝါရီ ၁၂
သတင်း - ခက်ဆစ်

မကွေးတိုင်း၊ ချောက်မြို့နယ်အခြေစိုက် တော်လှန်ရေးတပ်ဖွဲ့ဖြစ်တဲ့ Chauk Revolution Army မှ တပ်ရင်း တစ်ရင်းကို ထုတ်နှုတ်ပြီး ပြည်သူ့ကာကွယ်ရေးတပ်မတော်ရဲ့ ကွပ်ကဲမှုခံယူကာ မကွေးခရိုင် အမှတ် ၃ တပ်ရင်း အဖြစ် ပြောင်းလဲဖွဲ့စည်းခဲ့တယ်လို့ အဆိုပါတပ်က ယမန်နေ့ ညပိုင်းက ထုတ်ပြန်ကြေညာပါတယ်။

ပြီးခဲ့တဲ့ ၂၀၂၅ ခုနှစ် ဒီဇင်ဘာလ ၂၉ ရက်မှာ မကွေးခရိုင် အမှတ် ၃ တပ်ရင်းအဖြစ်ပြောင်းလဲဖွဲ့စည်းခဲ့တာဖြစ်ပြီး ပြည်သူ့ကာကွယ်ရေးတပ်မတော်က ချမှတ်တဲ့ စည်းမျဉ်းစည်းကမ်းတွေ၊ စစ်သည်တော်ကျင့်ဝတ်တွေနဲ့အညီ ပေးအပ်တဲ့ တာဝန်တွေကို ကျေပွန်စွာထမ်းဆောင်သွားမယ်လို့ အသိပေးထားပါတယ်။

တပ်ရင်းကွပ်ကဲမှုအပ်နှံပွဲကိုလည်း ဇန်နဝါရီလ ၄ ရက်မှာ ကျင်းပပြုလုပ်ခဲ့တာဖြစ်ပြီး မကွေးခရိုင် စစ်ဌာန၊ မကွေးခရိုင်ပကဖ၊ ချောက်မြို့နယ် ပအဖ၊ မကွေးခရိုင် တပ်ရင်းများ၊ ကဏ္ဍအသီးသီးမှ တာဝန်ရှိသူများတက်ရောက်ခဲ့ကြတယ်လို့ သိရပါတယ်။

Chauk Revolution Army ဟာ ၂၀၂၃ ခုနှစ်အတွင်းမှာ စတင်ဖွဲ့စည်းခဲ့တာဖြစ်ပြီး လက်ရှိမှာ ချောက်မြို့နယ်အတွင်းမှာ ပြည်သူ့ကာကွယ်‌ရေးတပ်မတော်၊ မကွေးခရိုင်စစ်ဌာနနဲ့အတူ စစ်ဆင်ရေးတွေ ဖော်‌ဆောင်နေတာလည်း ဖြစ်ပါတယ်။

Photo - မကွေးခရိုင် တပ်ရင်း ၃
https://www.facebook.com/share/p/1DnnqgjPJd/

မဒေးကျွန်းမှာ စကစရဲ့ ရေလှောင်ကန်စီမံကိန်းထဲပါသွားတဲ့လယ်မြေတွေအတွက် ဒေသခံတွေ လျော်ကြေးငွေအပြည့်အဝမရသေး

BBM - ဇန်နဝါရီ ၁၂
သတင်း - နိုင်နိုင်

ရခိုင်ပြည်၊ ကျောက်ဖြူမြို့နယ်၊ မဒေးကျွန်းရှိ ကျောက်တန်းကျေးရွာမှာ တည်ဆောက်မဲ့ရေလှောင်ကန်စီမံကိန်းထဲ ပါဝင်သွားတဲ့ လယ်ယာမြေတွေအတွက် စစ်ကောင်စီတပ်က ငွေကြေးတွေလျော်ကြေးပေးနေမဲ့လည်း ဒေသခံတွေမှာ အပြည့်အဝမရရှိသေးကြဘူးလို့ မဒေးကျွန်းဒေသခံတွေဆီက သိရပါတယ်။

စစ်ကောင်စီတပ်ဟာ ရေလှောင်ကန်စီမံကိန်းထဲ ပါသွားတဲ့ လယ်ယာမြေတွေအတွက် ဒေသခံတောင်သူ (၅၅) ဦး ပိုင်ဆိုင်တဲ့ လယ်ယာမြေဧက (၁၂၅ ဒသမ ၆၀) ဧကအတွက် မြေယာ လျော်ကြေးငွေ စုစုပေါင်း ငွေကျပ် ၆,၆၆၅,၁၈၂,၃၀၅ ကို ငွေသားထုတ်ပေးတာနဲ့ ငွေစုဘဏ်စာရင်း ဖွင့်လှစ်ပေးတာတွေကို ဆောင်ရွက်ပေးခဲ့ကြတယ်လို့ ပြီးခဲ့တဲ့ ဇန်နဝါရီလ ၈ ရက်နေ့က သူတို့ရဲ့ သတင်းစာတွေမှာ ထုတ်ပြန်ထားပါတယ်။

လက်ရှိမှာတော့ စီမံကိန်းထဲပါသွားတဲ့ လယ်ယာမြေအတွက် တောင်သူလယ်သမားတွေဟာ လျော်ကြေးငွေအပြည့်အဝ မရရှိသေးဘဲ တချို့တဝက်လောက်ကိုသာ ရရှိနေတာဖြစ်ပြီး ကျန်တချို့တဝက်ကိုတော့ စစ်ကောင်စီတပ်က သိမ်းထားဆဲဖြစ်တယ်လို့ မဒေးကျွန်းဒေသခံတစ်ဦးက BBM ကို ပြောပါတယ်။

"စစ်ကောင်စီတပ်က ကျောက်တန်းကျေးရွာမှာ စီမံကိန်းထဲပါသွားတဲ့ လယ်ရှင်တွေကိုခေါ်ပြီးတော့ သိန်းတစ်ထောင် ရဖို့ရှိတဲ့ သူတွေကို သိန်းသုံးရာပေးပါတယ်၊ သိန်းငါးရာ ရဖို့ရှိတဲ့သူတွေကိုလည်း သိန်းသုံးရာပေးပါတယ်၊ ကျန်တဲ့ပိုက်ဆံတွေကိုတော့ စစ်ကောင်စီတပ်က ဘဏ်မှာထည့်ဟန်ပြထားပါတယ်" လို့ အဆိုပါ မဒေးကျွန်းဒေသခံက ဆက်ပြောပါတယ်။

ကျောက်ဖြူမြို့နယ်မှာ စစ်ကောင်စီတပ်နဲ့ အာရက္ခတပ်တော် AA တို့ တိုက်ပွဲတွေပြင်းထန်စွာ ဖြစ်ပွားနေကြတာဖြစ်ပြီး တရုတ်စီမံကိန်းတွေရှိတဲ့ မဒေးကျွန်းမှာတော့ ဒေသတည်ငြိမ်နေကြောင်း ဖော်ပြဖို့အတွက် ဟန်ပြလုပ်ဆောင်နေတာသာ ဖြစ်တယ်လို့လည်း ကျောက်ဖြူဒေသခံတစ်ဦးက ပြောပါတယ်။

"စကစကတော့ ဟန်ပြလုပ်ဆောင်နေတာပေါ့၊ သူတို့က တရုတ်ကို ကျောက်ဖြူမှာရှိတဲ့ စီမံကိန်းတွေ လှည့်ပတ်အောင်လုပ်ဆောင်နေတယ်ဆိုတာကို ပြသဖို့အတွက်ပါ၊ ရှေ့ဆက်ပြီးတော့လည်း လုပ်ဆောင်သွားမယ်ပေါ့၊ စီမံကိန်းထဲပါသွားတဲ့ လယ်ပိုင်ရှင်တွေကိုလည်း လျော်ကြေးပေးနိုင်တယ်ပေါ့၊ စကစ ကငွေကြေးတွေကိုတော့ အကုန်လုံး မထုတ်ပေးပါဘူး" လို့ အဆိုပါ ကျောက်ဖြူဒေသခံက BBM ကို ပြောပါတယ်။

လက်ရှိဆောက်လုပ်မဲ့ ရေလှောင်ကန်စီမံကိန်းနေရာကို ပြီးခဲ့တဲ့ ဇန်နဝါရီလ ၉ ရက်နေ့ကလည်း ပြည်နယ်သယံဇာတရေးရာဝန်ကြီးနဲ့ အဖွဲ့ဝင်တွေဟာ ကွင်းဆင်းပြီး သွားရောက်ကြည့်ရှုခဲ့ကြတယ်လို့လည်း သိရပါတယ်။

ရေလှောင်ကန်စီမံကိန်းကို ကျောက်ဖြူမြို့နယ်၊ အောက်မဒေးကျွန်းရှိ ကျောက်တန်းကျေးရွာနဲ့ နှစ်ဖာလုံခန့်ကွာဝေးတဲ့ ရှောက်ပင်ချိန်တောင်နဲ့ ကျင်သန်တောင်ကြားမှာ တည်ဆောက်ဖို့အတွက် စစ်ကောင်စီတပ်က ပြီးခဲ့တဲ့ ၂ဝ၂၃ ခုနှစ်ကတည်းက စီစဉ်ဆောင်ရွက်ခဲ့တာလည်း ဖြစ်ပါတယ်။

စီမံကိန်းဧရိယာအတွင်း မဒေးကျွန်းရှိ တောင်သူ ၅၅ ဦးပိုင်ဆိုင်တဲ့ လယ်မြေ ၃၅ ဒသမ ၄၂ ဧကနဲ့ ဥယျာဉ်မြေ ၉၀ ဒသမ ၁၈ ဧက၊ စုစုပေါင်းဧရိယာ ၁၂၅ ဒသမ ၆၀ ဧက ပါဝင်သွားခဲ့တာလည်း ဖြစ်ပါတယ်။
https://www.facebook.com/share/17nD5o66V3/

မောင်တောနယ်စပ်မှာ AA နဲ့ မူဆလင်လက်နက်ကိုင်အဖွဲ့တို့ တိုက်ပွဲပြင်းထန်နေ

BBM - ဇန်နဝါရီ ၁၂
သတင်း - နိုင်နိုင်

ရခိုင်ပြည်၊ မောင်တောမြို့မြောက်ပိုင်း၊ နယ်စပ်အနီးမှာ အာရက္ခတပ်တော် AA နဲ့ ARSA ၊ ARA ၊ RIM မူဆလက်ကိုင်အဖွဲ့တို့ တိုက်ပွဲတွေ ပြင်းထန်နေကြတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဇန်နဝါရီလ ၁၀ ရက်နေ့က မောင်တောမြို့နယ်စပ် နယ်ခြားမိုင်တိုင် ၄၅ ၊ ၄၆ နဲ့ မိုင်တိုင် ၃၅၊ ၃၆ အနီးအနားဝန်းကျင်နေရာတွေမှာ AA နဲ့ မူဆလင်လက်ကိုင်အဖွဲ့တို့ တိုက်ပွဲတွေပြင်းထန်ခဲ့တာ ဖြစ်တယ်လို့ မောင်တောဒေသခံတွေဆီက သိရပါတယ်။

မူဆလင်လက်နက်ကိုင်အဖွဲ့တွေ ဖြစ်ကြတဲ့ ARSA ၊ RSO ၊ ARA ၊ RIM စတဲ့အဖွဲ့တွေဟာ တဘက်ဘင်္ဂလားဒေ့ရှ်နယ်စပ်ကနေ ရခိုင်ပြည်၊ မောင်တောမြို့နယ်စပ်ကို ခိုးဝင်မှုတွေရှိနေပြီး အာရက္ခတပ်တော် AA က နယ်မြေရှင်းလင်းရေးတွေ လုပ်ဆောင်နေတာကြောင့် ထိတွေ့မှုတွေဖြစ်ကာ တိုက်ပွဲဖြစ်ပွားတာ ဖြစ်တယ်လို့ မောင်တောဒေသခံတစ်ဦးက BBM ကို ပြောပါတယ်ဘ

"နယ်စပ်မှာ မနေ့က လက်နက်သံတွေကြားတွေ ကြားပါတယ်၊ တိုက်ပွဲတွေကတော့ ပြင်းထန်နေတဲ့ ပုံပေါ်ပါတယ်၊ AA က နယ်စပ်တွေမှာ ကင်းလှည့်တာရှိတော့ ထိတွေ့မှုတွေဖြစ်ပြီး တိုက်ပွဲကပြင်းထန်နေတာပါ၊ ဒီဘက်မှာက ARSA အန္တရာယ်က အရမ်းကိုဆိုးရွားပါတယ်၊ ဒေသခံတွေကို ဖမ်းဆီးသတ်ဖြတ်တာ၊ AA လုံခြုံရေးစခန်းတွေကိုလည်း ခြုံခိုတိုက်ခိုက်တာရှိပါတယ်"လို့ အဆိုပါ မောင်တောဒေသခံက ဆက်ပြောပါတယ်။

လက်ရှိမှာတော့ အာရက္ခတပ်တော် AA ရဲ့ တိုက်ခိုက်မှုကြောင့် မူဆလက်နက်ကိုင်အဖွဲ့တွေဟာ တစ်ဘက်ဘင်္ဂလားဒေ့ရှ်နယ်စပ်ဘက်တွေကို ထွက်ပြေးမှုတွေရှိနေကြတယ်လို့လည်း သိရပါတယ်။

မနေ့က ဇန်နဝါရီ ၁၁ ရက်နေ့၊ မနက်ပိုင်းမှာတော့ AA ရဲ့ လိုက်လံတိုက်ခိုက်မှုကြောင့် ARSA က အဖွဲ့ဝင် ၃ ဦး ၊ ARA က အဖွဲ့ဝင် ၂၉ ဦး ၊ RIM က အဖွဲ့ဝင် ၁၈ ဦး တို့ဟာ တစ်ဘက် ဘင်္ဂလားဒေရှ်နယ်စပ်ဘက်အခြမ်းကို ထွက်ပြေးလာကြတာကြောင့် ဘင်္ဂလားဒေ့ရှ် နယ်ခြားစောင့်တပ် (BGB) ကနေ ဖမ်းဆီးရမိခဲ့တယ်လို့ ဘင်္ဂလားဒေ့ရှ်အခြေစိုက် သတင်းဌာနတွေမှာ ဖော်ပြထားပါတယ်။

လက်ရှိတိုက်ပွဲတွေကြောင့် မောင်တောနယ်စပ်အနီးက ကျေးရွာတွေမှာ ဘေးလွတ်ရာနေရာတွေကို ပြောင်းရွှေ့နေထိုင်နေကြရပြီး တစ်ရွာနဲ့တစ်ရွာကို မသွားရဲကြဘူးလို့လည်း မောင်တောမြို့နယ်က အမျိုးသားတစ်ဦးက ပြောပါတယ်။

"မောင်တောနယ်စပ်အနီးက ကျေးရွာတွေဆိုရင် စစ်ရှောင်နေရတာကြာပါပြီ။ အဓိကတော့ အာဆာအန္တရာယ်ကို စိုးရိမ်လို့ရှောင်ကြတာပါ၊ ဒီမှာက တစ်ရွာနဲ့ တစ်ရွာသွားရင်လည်း အာဆာတွေဖမ်းဆီးသွားမှာကို ကြောက်ရပါတယ်၊ လူသူပြတ်လပ်တဲ့ နေရာတွေကို သိပ်မသွားနိုင်ပါဘူး " လို့ အဆိုပါ အမျိုးသားက ပြောပါတယ်။

ပြီးခဲ့တဲ့ ဒီဇင်ဘာလ ၁၃ ရက်၊ မနက် ၆ နာရီခွဲခန့်မှာလည်း မူဆလင်လက်နက်ကိုင်အဖွဲ့တွေဟာ ရခိုင် - ဘင်္ဂလားဒေ့ရှ်နယ်စပ်ရှိ လုံခြုံရေးတာဝန် ထမ်းဆောင်နေကြတဲ့ အာရက္ခတပ်တော် AA တပ်ဖွဲ့ဝင်တွေရဲ့ နယ်စပ်လုံခြုံရေးစခန်းတစ်ခုကို လက်နက်ငယ်တွေနဲ့ ပစ်ခတ်တိုက်ခိုက်ခဲ့ပြီးနောက် ဘင်္ဂလားဒေ့ရှ်နယ်စပ်ဘက်ကို ထွက်ပြေးသွားကြတယ်လို့လည်း သိရပါတယ်။
https://www.facebook.com/share/18Bxsv63fy/

ဖလမ်းမြို့နယ်ရှိ သီးဘွာလ် တိုက်နယ်ဆေးရုံ လေကြောင်းဗုံးကြဲခံရပြီးပျက်စီး

BBM - ဇန်နဝါရီ ၁၂
သတင်း - ကိုအိုက်

ချင်းပြည်နယ်မြောက်ပိုင်း၊ ဖလမ်းမြို့နယ်၊ သီးဘွာလ်ကျေးရွာရှိ တိုက်နယ်ဆေးရုံ လေကြောင်း ဗုံးကြဲတိုက်ခိုက်ခံရပြီး ပျက်စီးသွားတယ်လို့ ဒေသခံတွေက BBM ကို ပြောပါတယ်။

ဖလမ်း-ရိဒ်ခေါဒါန် လမ်းပေါ်မှာရှိတဲ့ သီးဘွာလ် တိုက်နယ်ဆေးရုံကို မနေ့က ဇန်နဝါရီလ ၁၂ ရက်၊ ည ၉ နာရီ ၃၀ မိနစ်ဝန်းကျင်မှာ စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့တာပါ။

"ညက လူတွေ အိပ်ရာဝင်ချိန် လေယာဥ်တစ်စီးလာပြီး ဆေးရုံတည့်တည့်ကို ဗုံးကြဲသွားတာပါ၊ အသံ အကျယ်ကြီးပဲ ကြားလိုက်ရတယ်၊ ဘယ်နှစ်လုံးဆိုတာ မသိရဘူး"လို့ သီးဘွာလ်ရွာသားတစ်ဦးက BBM ကိုပြောပါတယ်။

အဲဒီလေကြောင်း ဗုံးကြဲတိုက်ခိုက်မှုကြောင့် သီးဘွာလ် တိုက်နယ်ဆေးရုံအပါအဝင် ဝန်ထမ်းအိမ်ရာ ၆ လုံး မီးလောင်ပျက်စီးသွားခဲ့တယ်လို့ သိရပါတယ်။

သီးဘွာလ် တိုက်နယ်ဆေးရုံဟာ လုပ်ငန်းလည်ပတ်တာ မရှိတော့သလို လူနာတွေကလည်း မရှိတာကြောင့် အရပ်သားပြည်သူ ထိခိုက်မှုမရှိဘူးလို့ သိရပါတယ်။

"ဆေးရုံက ပျက်စီးသွားပါတယ်၊ နိုင်ငံရေး မကောင်းကတည်းက ဆေးရုံက လုပ်ငန်းလည်ပတ်မရှိတော့ ဆေးရုံမှာလည်း လူတွေမရှိတော့ဘူး၊ ဒါကြောင့် လူထိခိုက်မှု မရှိဘူး"လို့ သီးဘွာလ်ရွာသားတစ်ဦးက BBM ကို ပြောပါတယ်။

သီးဘွာလ် တိုက်နယ်ဆေးရုံ ဗုံးကြဲခံရပြီးနောက် Sim Dihai ကျေးရွာကိုလည်း စစ်ကောင်စီတပ်က တဆက်တည်း ဗုံးကြဲတိုက်ခိုက်ခဲ့တယ်လို့ သိရပါတယ်။

Sim Dihai ကျေးရွာ လေကြောင်းတိုက်ခိုက်မှု အခြေအနေကိုမူ ဆက်သွယ်ရေး ခက်ခဲမှုကြောင့် အသေးအစိတ်ကို မသိရသေးဘူးလို့ သိရပါတယ်။

ဗီဒီယို - လူမှုကွန်ရက်

#bbm #bbmnews #Falam #Chin #AirStrike #MilitaryCouncil #Myanmar
https://www.facebook.com/share/r/1CFXxxy6oU/

လားရှိုးမှာ စစ်ကောင်စီတပ်က တရုတ်ပစ္စည်းတွေကို ဆက်တိုက်ဖမ်းဆီးနေတာကြောင့် ဂိုထောင်တွေ၊ ဆိုင်တွေ ပိတ်ထားရ

BBM - ဇန်နဝါရီ ၁၂
သတင်း - PJ

ရှမ်းပြည်နယ်မြောက်ပိုင်း၊ လားရှိုးမြို့ မြို့တွင်းနဲ့ မြို့ပြင်ဘက်တွေမှာ ဇန်နဝါရီလ ၂ ရက်နေ့ကစ စစ်ကောင်စီက တရုတ်ဘက်ကလာတဲ့ ကုန်ပစ္စည်းတွေကို ဆက်တိုက်လိုက်လံ စစ်ဆေးဖမ်းစီးနေတယ်လို့ ဒေသခံတွေက ပြောပါတယ်။

မုန့်တွေပါမက ကုန်ပစ္စည်းထားတဲ့ နေရာတွေ၊ ဂိုဒေါင်တွေကိုပါ လိုက်စစ်နေတာကြောင့် ဂိုဒေါင်တွေ၊ ကားဂိတ်တွေ အများစု ပိတ်ထားရတယ်လို့ သိရပါတယ်။

အဆိုပါ စစ်ဆေးဖမ်းဆီးမှုတွေကြောင့် လားရှိုးမြို့ထဲမှာ တရုတ်ပစ္စည်းဆိုင်တွေ သိပ်မဖွင့်နိုင်ဘဲ နှစ်ရက်၊ သုံးရက်ဆက်တိုက် ပိတ်ထားရတဲ့အခြေအနေ ဖြစ်နေတယ်လို့ ဆိုပါတယ်။

“တရုတ်ဘက်ကလာတဲ့ မုန့်တွေ၊ ပစ္စည်းတွေ လိုက်စစ်နေတာ။ အဲဒါကြောင့် ဆိုင်တွေ၊ ဂိုဒေါင်တွေ ပိတ်ထားရတယ်ပြောတယ်” လို့ ဒေသခံအမျိုးသမီး တစ်ဦးက ပြောပါတယ်။

ဇန်နဝါရီလ ၁၁ ရက်နေ့မှာတော့ ဈေးထဲမှာ လူတောင် မရှိသလောက် ဖြစ်နေပြီး ခါတိုင်း စည်ကားနေတဲ့ ဈေးဘေးပတ်ပတ်လည်က ကားဂိတ်တွေမှာလည်း ကားတွေ မရှိဘူးလို့ သူက ပြောပါတယ်။

လားရှိုးမြို့ထဲမှာလည်း လိုက်စစ်နေတာတွေ ရှိနေပြီး အရင်တလော MNDAA ကိုးကန့်တပ်ဖွဲ့တွေ သီပေါတံတားနဲ့ မယ်ဟန်ဂိတ်ဘက်ကနေ ပြန်ဆုတ်သွားပြီးနောက် မယ်ဟန်ဘက် နေရာအနှံ့ လိုက်စစ်နေတယ်လို့ ကြားရတယ်လို့ ဆိုပါတယ်။

လက်ရှိအချိန်မှာတော့ စစ်ကောင်စီက လားရှိုးမြို့တွင်း အိမ်ထောင်စုစာရင်း၊ မှတ်ပုံတင်၊ ဧည့်စာရင်းတွေကိုပါ ရှောင်တခင် စစ်ဆေးနေပြီး ဒီရက်ပိုင်းအတွင်း ညဘက်တွေမှာ ပိုပြီး အစစ်အဆေး တင်းကြပ်လာတယ်လို့ ဒေသခံ အမျိုးသား တစ်ဦးကလည်း ပြောပါတယ်။

“လားရှိုးက အသိကုန်ဂိတ် တစ်ဂိတ်တောင် ပစ္စည်းတွေ အများကြီး အဖမ်းခံလိုက်ရလို့ ရှုံးသွားတာ။ တရုတ်ကုန်တွေ ခဏခဏ စစ်ဆေး ဖမ်းဆီးနေတော့ လားရှိုးက ဂိတ်ကို ပိတ်လိုက်ပြီး မူဆယ်မှာပဲ လာဖွင့်လိုက်တော့တာ” လို့ ကားလေးပိုင်ရှင် အမျိုးသမီး တစ်ဦးက ပြောပါတယ်။

ဒီရက်ပိုင်းအတွင်း စစ်ကောင်စီက တရုတ်ဘက်က ဝင်လာတဲ့ ကုန်ပစ္စည်းတွေကို အဖမ်းအဆီး ကြမ်းနေတာကြောင်း မူဆယ်ကနေ လားရှိုးကို ကုန်နဲ့ ဆင်းတဲ့ ကားလေးတွေတောင် မရှိသလောက် ဖြစ်နေပြီး ကား တွေအများစု ရပ်နားထားရတယ်လို့ ဆိုပါတယ်။

အလားတူ MNDAA ဂိတ်တွေ ဆုတ်ထားတဲ့နောက် ရှမ်းမြောက်နဲ့ ရှမ်းတောင် ကိုဆက်သွယ်ထားတဲ့လမ်းမ ပေါ်ရှိ နမ့်လန် နဲ့ အဲဒီနမ့်လန် အနီးနားရှိ ကွင်းလမ်းတွေထဲအထိ စစ်ကောင်စီတွေက တရားမဝင် ကုန်စည် တိုက်ဖျက်ရေး အကြောင်းပြကာ စားသောက်ကုန်ဖြစ်တဲ့ အာလူး၊ ကြက်သွန်က အစ ဖမ်းဆီးလာတာလို့ ကုန်တင်ယာဉ်မောင်းတွေက ပြောပါတယ်။

ဒါ့အပြင် ရှမ်းပြည်နယ်တောင်ပိုင်း၊ တောင်ကြီးဘက်မှာလည်း တရုတ်ကုန် ဖမ်းဆီးမှုတွေ တင်းကြပ်နေတယ်လို့ သိရပြီး ဇန်နဝါရီလ ၉ ရက်နေ့က ကား ၄ စီး ဆင်းလာတာ ၄ စီးစလုံး ဖမ်းခံရသလို ဇန်နဝါရီလ ၁၀ ရက်နေ့မှာလည်း ကား ၂ စီး ဆင်းလာတာ ၂ စီးစလုံး ထပ်မံ ဖမ်းခံရတယ်လို့ တောင်ကြီးဂိတ်မှာ အလုပ်လုပ်နေသူတွေက ပြောပါတယ်။ အဲဒီလို နေ့တိုင်း ဆက်တိုက် ဖမ်းဆီးခံနေရတာကြောင့် ဂိတ်တွေကို အကုန်လုံး ပိတ်ထားရတယ်လို့ ဆိုပါတယ်။

စစ်ကောင်စီက နယ်စပ်ကုန်စည်စီးဆင်းမှုကို တရားမဝင်ကုန်တွေ အဖြစ်သတ်မှတ်ပြီး ဖမ်းဆီးနေပေမယ့် တရုတ်နယ်စပ်ကနေ တရားမဝင်ကုန်စည် အများပြားတင်သွင်းနေသူတွေဟာ စစ်ကောင်စီ အရာရှိပိုင်းတွေ ဖြစ်တယ်လို့ ကုန်တင်ယာဉ်မောင်း တစ်ဦးက ပြောပါတယ်။ သူတို့ စီးပွားပြိုင်ဘက် အချင်းချင်း မနာလိုလို့ တိုင်းကြားတာကြောင့် ဖမ်းဆီးခံရတာတွေလည်း တွေ့ရတယ်လို့ ဆိုပါတယ်။

ဓာတ်ပုံ - CJ

#bbm #bbmnews #Lashio #Shan #UpdateNews
https://www.facebook.com/share/p/1Eofz6wUWF/

ပဲနွယ်ကုန်းအတွင်းလာတဲ့ စကစစစ်ကြောင်းကိုတိုက်ခိုက်မှု ဗိုလ်မှုးတစ်ဦးအပါ ၂၀ ဦးသေဆုံး

🟥စစ်ကောင်စီရဲ့ လက်နက်အမြောက်အများနဲ့ ခဲယမ်းဗုံးသီး ကျည်ဆံများရရှိ

BBM-ဇန်နဝါရီ၁၂
သတင်း-မင်းသော်

ပဲခူးတိုင်း၊ ပဲနွယ်ကုန်းအတွင်းလာတဲ့ စစ်ကောင်စီစစ်ကြောင်းကို တော်လှန်ရေးအင်အားစုတွေက ချေမှုန်းတိုက်ခိုက်ရာ စကစဘက်မှ ဗိုလ်မှူးတစ်ဦးအပါအဝင် (၂၀)ဦး သေဆုံးပြီး လက်နက်ခဲယမ်းနဲ့ ဆက်စပ်ပစ္စည်းများကို ရရှိခဲ့တယ်လို့ ပဲခူးတိုင်းစစ်ဌာနရဲ့ ထုတ်ပြန်ချက်အရ သိရပါတယ်။

ကျောက်တံခါးမြို့နယ်အတွင်း၊ ပဲနွယ်ကုန်းမြို့၊ ရန်ကုန်-မန္တလေး လမ်းဟောင်းအနီးရှိ ကြိမ်ခါးကုန်းကျေးရွာကို စစ်တပ်ဘက်မှ စစ်ကြောင်းထိုးလာခြင်းဖြစ်တာကြောင့် တော်လှန်ရေးအင်အားစုတွေက တိုက်ခိုက်ချေမှုန်းခဲ့တာဖြစ်ပြီး ဗိုလ်မှုးတစ်ဦးရဲ့ အလောင်းကိုရရှိသလို စကစတပ်သား(၂၀)ခန့်သေဆုံးကာ စစ်ကြောင်းပျက်ထွက်ပြေးသွားတယ်လို့ သိရပါတယ်။

ဒါ့အပြင် တိုက်ပွဲအတွင်း စစ်ကောင်စီဘက်မှအသုံးပြုတဲ့ လက်နက်ကြီး၊ သေနတ်များအပြင် ဆက်စပ်ပစ္စည်းအများအပြားကိုလည်း သိမ်းဆည်းရရှိနိုင်ခဲ့တယ်လို့ သိရပါတယ်။

အဆိုပါတိုက်ခိုက်မှုကို ပြည်သူ့ကာကွယ်ရေးတပ်မတော်၊အမှတ်(၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ(၂၅) ကွပ်ကဲမှုအောက်ရှိ အမှတ်(၃၇၀၂) တပ်ရင်း၊ အထူးကွန်မန်ဒိုတပ်ရင်း(P-29914)၊ ဗျူဟာ(၂၆) ကွပ်ကဲမှုအောက်ရှိ အမှတ်(၃၇၀၃) တပ်ရင်း(Fire Dragon)၊ တော်ဝင်ဒေါင်းတပ်ရင်း(P-29913) တို့က ပူးပေါင်းတိုက်ခိုက်ခဲ့ပြီး တော်လှန်ရေးရဲဘော် (၂)ဦး ကျဆုံးခဲ့ရကာ(၃)ဦးမှာ အနည်းငယ်ထိခိုက်ခဲ့ရတယ်လို့လည်း သိရပါတယ်။

ဒါ့အပြင် အမှတ်(၂) စစ်ဆင်ရေးနယ်မြေ၊ ပဲခူးတိုင်း စစ်ဌာနအတွင်း စစ်ရေးအခြေအနေများ ဆက်လက် ဆောင်ရွက်လျက်ရှိနေတာကြောင့် တိုက်ပွဲအနီးဝန်းကျင်ရှိ ပြည်သူများ၊ ခရီးသွားပြည်သူများ၊ လမ်းပိုင်းအသုံးပြုသွားလာနေတဲ့ ပြည်သူများအနေဖြင့် ဘေးကင်းလုံခြုံရေး သတိပြု သွားလာကြပါရန် မေတ္တာရပ်ခံကြောင်း ပဲခူးတိုင်းစစ်ဌာနက ထုတ်ပြန်ထားပါတယ်။

Photo-ပဲခူးတိုင်း စစ်ဌာန
https://www.facebook.com/share/p/1H5CxsGhjj/

မွန်မှာ ရွေးကောက်ပွဲလုပ်တဲ့မြို့နယ်က နေရာ ၅ ခုကိုဝင်တိုက်လို့ အရာရှိတဦးအပါ ၆ ဦးသေဆုံး

BBM - ဇန်နဝါရီ ၁၂
သတင်း - ကိုဟန်

မွန်ပြည်နယ် ရေးမြို့နယ်နဲ့ မုဒုံမြို့နယ်က ရွေးကောက်ပွဲကျင်းပတဲ့နေရာအပါအဝင် နေရာ ၅ ခုကို ဝင်ရောက်တိုက်ခိုက်ခဲ့ပြီး စစ်တပ်ဘက်က အရာရှိတဦးအပါအဝင် ၆ ဦးထက်မနည်းသေဆုံးခဲ့တယ်လို့ ရာမညမွန်တပ်တော် RMA ထံမှ သိရပါတယ်။

ရွေးကောက်ပွဲ အပိုင်း(၂)ကျင်းပရာ ဇန်နဝါရီလ ၁၁ ရက်မှာ RMA တပ်ဖွဲ့အနေနဲ့ ရေးမြို့နယ် အစင်ကျေးရွာထိပ်မှာ တပ်စွဲထားတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ခဲ့သလို ရေးမြို့ပေါ်မှာရှိတဲ့ စစ်ဆင်ရေးကွပ်ကဲမှုဌာနချုပ်(စကခ-၁၉)ကို ၁၀၇ မမ ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့တယ်လို့လည်း သိရပါတယ်။

အစင်ကျေးရွာထိပ် တိုက်ပွဲအတွင်း စစ်တပ်ဘက်က ၃ ဦးသေဆုံးပြီး (၁)ဦးဒဏ်ရာရှိခဲ့တာကို အတည်ပြုနိုင်ပေမဲ့ စကခ-၁၉ ပစ်ခတ်မှုရဲ့ ထိခိုက်မှုကို စုံစမ်းနေဆဲဖြစ်တယ်လို့ မွန်ပြည်သစ်ပါတီစစ်အာဏာရှင်တိုက်ဖျက်ရေး/ရာမညမွန်တပ်တော် NMSP-AD/RMA ပြောရေးဆိုခွင့်ရှိသူ နိုင်ကောင်းစကားက BBM ကို ပြောပါတယ်။

ဒါ့အပြင် အဆိုပါနေ့မှာပဲ မုဒုံမြို့နယ် ကမာဝက်မြို့ အခြေစိုက် ခမရ(၂၀၉)တပ်ရင်းကို ဒရုန်းနဲ့ ဗုံးသီးချတိုက်ခိုက်ခဲ့ပြီး အဲဒီတိုက်ခိုက်မှုအတွင်း တပ်အရာရှိတဦးသေဆုံးကြောင်း တပ်တွင်းဖရဲသီးတွေက သတင်းပေးပို့ခဲ့တယ်လို့ သူကဆက်ပြောပါတယ်။

“ရွေးကောက်ပွဲကို လက်မခံကြောင်း တိုက်ပွဲနဲ့ ပြသကြောင်းဖြစ်ပါတယ်၊ ရေးမှာဆို ဝင်တိုက်တော့ စစ်တပ်ဘက်က ကျဆုံးမှုကို မျက်မြင်ကိုယ်တွေ့ မြင်ခဲ့ရတာပါ” လို့ပြောပါတယ်။

အလားတူပဲ ဇန်နဝါရီလ ၁၀ ရက်မှာလည်း မုဒုံမြို့နယ်၊ ကမာဝက်မြို့ မဲရုံတွေကို လိုက်စစ်နေတဲ့ စစ်ကောင်စီအဖွဲ့ကိုလည်း ဒရုန်းနဲ့ ဗုံးသီးချတိုက်ခိုက်ခဲ့ပြီး အဲဒီမှာ ၃ ဦးဒဏ်ရာရရှိခဲ့တယ်လို့လည်း သိရပါတယ်။

စစ်တပ်ထောက်ခံသူတွေကတော့ ကမာဝက်မြို့ ဒရုန်းဗုံးကြဲခံရတဲ့ဖြစ်စဉ်အတွင်း အသက် ၈၀ ကျော်အရွယ် အမျိုးသမီးတဦးသေဆုံးခဲ့တယ်လို့ ဝါဒဖြန့်ထားပေမဲ့ အရပ်သားပစ်မှတ်တွေ ရှိတဲ့နေရာကို တိုက်ခိုက်ခဲ့တာ မဟုတ်ဘူးလို့ NMSP-AD/RMA ပြောခွင့်ရသူက တုံ့ပြန်ပါတယ်။

“တော်လှန်ရေးအဖွဲ့တွေက လုပ်တော့ လုပ်နေကြတယ်၊ ရွေးကောက်ပွဲနေ့မှာလေ၊ ထိရောက်မှု ကြီးကြီးမားမား မရှိတာကို တွေ့ရတယ်၊ အေးဆေးပဲ ပြီးသွားတာပေါ့နော်၊ ဒီအပေါ်မှာလည်း ပြစ်တင်နေလို့မရဘူး၊ လူအင်အား လက်နက်အင်အား ဘယ်လောက်အသုံးပြုပြီး မြို့ကို ကပ်လို့မရအောင် လုပ်ထားတဲ့အခြေအနေမှာ အခုလို လုပ်နိုင်တာပဲ မဆိုးလှဘူးပေါ့နော်” လို့ မွန်နိုင်ငံရေးသမားတဦးက သူ့အမြင်ကို ပြောပါတယ်။

အဆိုပါတိုက်ပွဲတွေမှာ တော်လှန်ရေးတပ်ဘက်က အထိအခိုက်မရှိခဲ့ပေမဲ့ စစ်တပ်ဘက်က ကျေးရွာတွေဘက်ကို လက်နက်ကြီးပြန်လည်ပစ်ခတ်တာတွေ ရှိခဲ့တဲ့အတွက် အရပ်သားထိခိုက်မှု ရှိ၊ မရှိကို မေးမြန်းနေဆဲ ဖြစ်ပါတယ်။

တော်လှန်ရေးအင်အားစုတွေ ကန့်ကွက်နေတဲ့ ရွေးကောက်ပွဲအပိုင်း(၂)ကို မွန်ပြည်နယ်အတွင်းက ရေး၊ ဘီးလင်း၊ ပေါင်၊ မုဒုံ၊ သံဖြူဇရပ်မြို့နယ်တွေမှာ ပြုလုပ်ခဲ့ပြီး အများစုက မွန်ညီညွတ်ရေးပါတီ MUP က အနိုင်ရရှိထားတယ်လို့ သိရပါတယ်။

ဓါတ်ပုံ/ဗီဒီယို - NMSP-AD/RMA
https://www.facebook.com/share/p/1AsMdkpBPy/

တအာင်းနယ်မြေတွေကို နိုင်ငံရေး၊ လူမှုရေးဆွေးနွေးချက်အရ ရရှိတာမဟုတ်ဘဲ တိုက်ပွဲမှ ရရှိခြင်းဟု TNLA ပြော

BBM-ဇန်နဝါရီ၁၂
သတင်း-မင်းသော်

တအာင်းအုပ်ချုပ်ရေးနယ်မြေတွေကို ရရှိလာဖို့အတွက် နိုင်ငံရေး၊ လူမှုရေး ဆောင်ရွက်ချက်တွေနဲ့ ဆွေးနွေးအဖြေရှာခဲ့ပြီး ရရှိခဲ့တာမဟုတ်ဘဲ တိုက်ပွဲတွေမှတဆင့် စစ်ရေးအရ တိုက်ယူပြီးရရှိခဲ့တယ်လို့ PSLF/TNLA တပ်ဖွဲ့ရဲ့ ပြောဆိုချက်အရ သိရပါတယ်။

ဇန်နဝါရီလ ၁၂ ရက်နေ့မှာ ကျရောက်တဲ့ ၆၃ နှစ်မြောက် တအာင်းအမျိုးသားတော်လှန်နေ့ အတွက် PSLF/TNLA ရဲ့ ဥက္ကဌ ဗိုလ်ချုပ်ကြီး တာအိုက်ဘုန်းက ပြောကြားတဲ့ ဂုဏ်ပြုမိန့်ခွန်းအတွင်း အထက်ပါအတိုင်း ဆိုထားပါတယ်။

တအာင်းတိုင်းရင်းသား အရာရှိ၊ အရာခံ၊ ရဲဘော်များရဲ့ အသက်သွေးချွေး၊ ကိုယ်ခန္ဓာစွန့်လွှတ် အနစ်နာခံခဲ့တဲ့ သမိုင်းဝင်တိုက်ပွဲတွေကတဆင့် တအာင်းအုပ်ချုပ်ရေးနယ်မြေတွေကို တိုက်ယူခဲ့ရခြင်းဖြစ်တာမို့ ဂုဏ်ဒြပ်မြင့်မားပြီး ဒီတန်ဖိုးကို အရာရှိ အရာခံ၊ ရဲဘော်၊ ရဲမေတွေက မှတ်သားထားဖို့လိုတယ်လို့ ဗိုလ်ချုပ်ကြီး တာအိုက်ဘုန်းက ဆိုပါတယ်။

"အခုလို အုပ်ချုပ်ရေးနယ်မြေရရှိလာဖို့က နိုင်ငံရေး၊ လူမှူရေး ဆောင်ရွက်ချက်တွေနဲ့ ဆွေးနွေးအဖြေရှာပြီး ရရှိခဲ့ကြတာမဟုတ်ဘဲ၊ တအာင်းတိုင်းရင်းသား အရာရှိအရာခံများ၊ ရဲဘော်များရဲ့ အသက်၊ သွေး၊ ချွေး၊ ကိုယ်ခန္ဓာစွန့်လွှတ်အနစ်နာခံ သမိုင်းတွင်ပြောင်မြောက်တဲ့ တိုက်ပွဲတွေကနေတဆင့် စစ်ရေးအရ တိုက်ယူခဲ့ရတာဖြစ်တယ်" လို့ ဆိုပါတယ်။

ဒါတင်မက စစ်ဆင်ရေးကာလတွေအတွင်း ပြည်သူတွေအနေနဲ့ အသက်အိုးအိမ်စည်းစိမ်တွေ ဆုံးရှုံးနစ်နာခဲ့ရတာတောင် စိတ်ရှည်သည်းခံပြီး PSLF/TNLA ပေါ် စိတ်ရောကိုယ်ပါ ပံ့ပိုးကူညီခဲ့ကြတာကိုလည်း အထူးလေးစားတန်ဖိုးထားဂုဏ်ယူတယ်လို့လည်း ဆိုပါတယ်။

ပြီးခဲ့တဲ့ ကာလတွေအတွင်း ပြည်သူတွေကော၊ ရဲဘော်တွေပါ ကိုယ်ရောစိတ်ပါ ခက်ခဲကြမ်းတမ်းတဲ့ ကာလကိုရင်ဆိုင်ဖြတ်သန်းခဲ့ရတာမို့ အခုလိုတိုက်ပွဲတွေရပ်နားချိန်မှာ ပြည်သူနဲ့ရဲဘော်တို့ ချစ်ချစ်ခင်ခင်ပူးပေါင်းပြီး ဒေသတည်ငြိမ်အေးချမ်းရေးအတွက် ဆောင်ရွက်သွားရမဲ့အပြင် ပျက်ဆီးသွားတဲ့ အိုးအိမ်၊ ဘုန်းကြီးကျောင်း၊ စာသင်ကျောင်း၊ အများပြည်သူ အဆောက်အအုံ၊ ဆေးရုံနဲ့ လမ်းတံတားတွေကို တတ်နိုင်သမျှပြုပြင်သွားမယ်လို့လည်း ဆိုပါတယ်။

PSLF/TNLA အနေနဲ့ ၁၀၂၇ စစ်ဆင်ရေးအတွင်း မြို့နယ်ပေါင်း ၁၂ မြို့နယ်ကို ထိန်းချုပ်နိုင်ခဲ့ပေမဲ့ အခုနောက်ဆုံး (၅) မြို့နယ်ကို စစ်ကောင်စီထံပြန်လည်လက်လွှတ်ခဲ့ရပြီး စစ်တပ်နဲ့အပစ်အခတ်ရပ်ဆဲခဲ့တာလည်း ဖြစ်ပါတယ်။

#bbm #bbmtv #bbmnews #TNLA #UpdateNews
https://www.facebook.com/share/p/1Ac8DEuhKu/

ကျောင်းသားလက်ရုံးတပ်တော်ထံ၂လအတွင်း အလင်းဝင်ခိုလှုံသူ (၁၃)ဦး ရဲဘော်အဖြစ် တာဝန်ထမ်းဆောင်

🟥 စစ်သုံ့ပန်း(၁၆)ဦးကိုလည်း အမ်း-ပဒါန်းလမ်းပိုင်း၊ ပုသိမ်-မုံရွာလမ်းမတို့မှ(၂)လအတွင်း ဖမ်းဆီးရမိ

BBM-ဇန်နဝါရီ ၁၂
သတင်း-မင်းသော်

ကျောင်းသားလက်ရုံးတပ်တော်မှ ၂လအတွင်း စစ်သုံ့ပန်း(၁၆)ဦးကို အရှင်ဖမ်းမိသလို အလင်းဝင်ရောက်ခိုလှုံလာသူ စကစ (၁၃)ဦးရှိပြီး အဆိုပါအလင်းဝင်ရောက်လာသူများက
တပ်ရင်းမှာ ရဲဘော်များအဖြစ် ပြန်လည်တာဝန်
ထမ်းဆောင်နေတယ်လို့ ကျောင်းသားတပ်ဦး/ကျောင်းသားလက်ရုံးတပ်တော်မှ ဇန်နဝါရီလ ၁၂ရက်နေ့မှာထုတ်ပြန်ထားပါတယ်။

ကျောင်းသားလက်ရုံးတပ်တော်ရဲ့ စစ်ဆင်ရေးနယ်မြေတစ်ခုဖြစ်တဲ့ အမ်း-ပဒါန်းလမ်းပိုင်း၊ ပုသိမ်-မုံရွာလမ်းမကြီးတစ်ဝိုက်က စကစ စစ်ကြောင်းများထံမှ (၂)လအတွင်း စစ်သုံ့ပန်းများရရှိခဲ့ပြီး ၎င်းတို့ကို နိုင်ငံတကာစစ်ဥပဒေများနဲ့အညီ ထိန်းသိမ်းထားရှိတယ်လို့ သိရပါတယ်။

ဒါ့အပြင် အဆိုပါစစ်ကြောင်းများမှပဲ ဒုတပ်ကြပ် (၁)ဦး၊ တပ်ကြပ်(၁)ဦးတို့အပါ စုစုပေါင်း စကစ (၁၃)ဦးတို့ အလင်းဝင်ရောက်လာပြီး ၎င်းတို့က ရဲဘော်များအဖြစ်ကျောင်းသားလက်ရုံးတပ်တော်ထံ ပြန်လည်ထမ်းဆောင်နေတယ်လို့လည်း သိရပါတယ်။

ဒါတင်မက တပ်ဦး/တပ်တော်အနေနဲ့ အဖိနှိပ်ခံလူထုကို မျက်နှာမှုပြီး တော်လှန်ရေးတာဝန်ထမ်းဆောင်လိုတဲ့ ဘယ်သူ့ကိုမဆို အတူတိုက်ပွဲဝင်ရန် လက်ကမ်းကြိုဆိုလျက်ရှိတယ်လို့လည်း ကျောင်းသားတပ်ဦး/ကျောင်းသား လက်ရုံးတပ်တော်မှ ထုတ်ပြန်ကြေငြာထားပါတယ်။

Photo-ကျောင်းသားတပ်ဦး/ကျောင်းသားတပ်တော်

#bbmnews #bbm #bbmtv #PDF #updatenews
https://www.facebook.com/share/p/19zoTrWuWW/

ကုလသမဂ္ဂရဲ့ အမြင့်ဆုံးတရားရုံးက စစ်ကောင်စီတပ်ရဲ့ ရိုဟင်ဂျာလူမျိုးတုံးသတ်ဖြတ်တဲ့အမှုကို စတင်စစ်ဆေး

BBM - ဇန်နဝါရီ ၁၃

ကုလသမဂ္ဂရဲ့ အမြင့်ဆုံးတရားရုံးက စစ်‌ကောင်စီတပ်က မြန်မာနိုင်ငံရဲ့ ရိုဟင်ဂျာမူစလင်လူမျိုးတွေအပေါ် လူမျိုးတုံးသတ်ဖြတ်မှုကျူးလွန်တဲ့မှုကို စတင်စစ်ဆေးလျက်ရှိပါတယ်။

စစ်ကောင်စီတပ်ဟာ ရိုဟင်ဂျာလူနည်းစုကို ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ကြောင်း ဂမ်ဘီယာတရားရေးဝန်ကြီး ဒေါ်ဒါဂျယ်လိုက ဇန်နဝါရီလ ၁၂ရက် တနင်္လာနေ့က ဟိဂ်မြို့ရှိ အပြည်ပြည်ဆိုင်ရာတရားရုံး (ICJ)မှာ ပြောကြားခဲ့ပါတယ်။

“ဒါဟာ နိုင်ငံတကာဥပဒေရဲ့ လျှို့ဝှက်ဆန်းကြယ်တဲ့ ကိစ္စတွေအကြောင်း မဟုတ်ပါဘူး။ တကယ့်လူတွေ၊ တကယ့်ဇာတ်လမ်းတွေနဲ့ တကယ့်လူသားအုပ်စုတစ်စုအကြောင်းပါ။ မြန်မာနိုင်ငံက ရိုဟင်ဂျာတွေပါ။ မြန်မာစစ်တပ်က သူတို့ကို ဖျက်ဆီးဖို့ ပစ်မှတ်ထားခဲ့ပါတယ်” လို့ ဂျယ်လို (Jallow) က ပြောကြားခဲ့ပါတယ်။

၂၀၁၉ ခုနှစ်တုန်းက ဂမ်ဘီယာနိုင်ငံဟာ ကမ္ဘာ့တရားရုံး (ICJ) လို့ လူသိများတဲ့တရားရုံးမှာ စစ်ကောင်စီတပ်ဟာ ရိုဟင်ဂျာ ၇၅၀,၀၀၀ ခန့်ကို နေအိမ်တွေကနေ စွန့်ခွာစေခဲ့ပြီး အများစုမှာ အိမ်နီးချင်း ဘင်္ဂလားဒေ့ရှ်နိုင်ငံ အတင်းအကြပ် တွန်းပို့ခဲ့တဲ့ ထိုးစစ်ဆင်မှုတစ်ခု စတင်ခဲ့ပြီး ၂ နှစ်အကြာမှာ တရားစွဲဆိုခဲ့တာပဲဖြစ်ပါတယ်။

ရိုဟင်ဂျာ ဒုက္ခသည်တွေဟာ အစုလိုက်အပြုံလိုက်သတ်ဖြတ်မှုတွေ၊ မုဒိမ်းမှုနဲ့ မီးရှို့တိုက်ခိုက်မှုတွေကို ပြန်ပြောင်းပြောပြခဲ့ကြပါတယ်။

အဆိုပါ ရုံးတင်စစ်ဆေးမှုဟာ ပြီးခဲ့တဲ့ ဆယ်စုနှစ်တစ်ခုကျော်အတွင်း ICJ မှ အပြည့်အဝကိုင်တွယ်ခဲ့တဲ့ ပထမဆုံးလူမျိုးတုံးသတ်ဖြတ်တဲ့အမှုဖြစ်ပြီး အဆိုပါ ရလဒ်ဟာ မြန်မာနိုင်ငံပြင်ပမှာပါ အကျိုးဆက်တွေ ရှိလာမှာဖြစ်ပြီးတော့ ဂါဇာမှာ လူမျိုးတုံးသတ်ဖြတ်မှုစစ်ပွဲနဲ့ ပတ်သက်ပြီး အစ္စရေးကို ဆန့်ကျင်တဲ့ တောင်အာဖရိကရဲ့ တောင်းဆိုတဲ့အမှုလိုပဲ သက်ရောက်မှုရှိမှာပါ။

ကြားနာမှုတွေဟာ ၃ ပတ်ခန့် ကြာမှာပဲဖြစ်ပါတယ်။
ကုလသမဂ္ဂအချက်အလက်ရှာဖွေရေးမစ်ရှင်တစ်ခုက ၂၀၁၇ ခုနှစ် ထိုးစစ်ဆင်မှုအတွင်း စစ်ကောင်စီတပ်ဟာ“လူမျိုးတုံးသတ်ဖြတ်မှုလုပ်ရပ်‌တွေ” လုပ်ဆောင်ခဲ့ကြောင်း ကောက်ချက်ချခဲ့ပါတယ်။

ဒါပေမဲ့ စစ်ကောင်စီတပ်င အဆိုပါ
ထိုးစစ်ဆင်မှုတွေဟာ
ရိုဟင်ဂျာလက်နက်ကိုင်အဖွဲ့တွေရဲ့ တိုက်ခိုက်မှုတွေကို တုံ့ပြန်တဲ့အနေနဲ့ တရားဝင်အကြမ်းဖက်မှုတန်ပြန်လှုပ်ရှားမှုတစ်ခုဖြစ်တယ်လို့ ချေပကာ အစီရင်ခံစာကို ပယ်ချခဲ့ပါတယ်။

“လူမျိုးတုံးသတ်ဖြတ်မှုကို ဘယ်လိုအဓိပ္ပာယ်ဖွင့်ဆိုမလဲ၊ ဘယ်လိုသက်သေပြနိုင်မလဲ၊ ချိုးဖောက်မှုတွေကို ဘယ်လိုပြုပြင်နိုင်မလဲဆိုတဲ့ အရေးကြီးတဲ့ သာဓကတွေကို ဒီအမှုက ချမှတ်နိုင်ဖွယ်ရှိပါတယ်” ဟု မြန်မာနိုင်ငံဆိုင်ရာ ကုလသမဂ္ဂ လွတ်လပ်တဲ့ စုံစမ်းစစ်ဆေးရေးယန္တရားရဲ့ အကြီးအကဲ နီကိုလတ်စ် ကွန်ဂျီယန်က ရိုက်တာသတင်းဌာနကို ပြောကြားခဲ့ပါတယ်။

Reference-Al Jazeera
Translator-Richard
Photo-Reuters

#bbmnews #bbm #bbmtv #icc #icj
https://www.facebook.com/share/p/17T5UNgop6/

အမေရိကန်က ဂရင်းလန်းကို တစ်နည်းနည်းနဲ့ သိမ်းယူမယ်လို့ ထရမ့်ပြော

BBM - ဇန်နဝါရီ ၁၃

အာတိတ်ဒေသမှာ ရုရှားနဲ့ တရုတ်တို့ရဲ့ စစ်ရေးလှုပ်ရှားမှုတွေ တိုးလာနေတာကြောင့် သတ္တုကြွယ်ဝတဲ့ ဒိန်းမတ်နယ်မြေကို ထိန်းချုပ်တာဟာ အမေရိကန်အမျိုးသားလုံခြုံရေးအတွက် အရေးကြီးကြောင်း ထရမ့်က ပြောကြားခဲ့ပါတယ်။

"ကျွန်တော်တို့ ဂရင်းလန်းကို မသိမ်းယူဘူးဆိုရင် ရုရှား ဒါမှမဟုတ် တရုတ်က ယူမယ်၊၊ ကျွန်တော်လည်း အဲဒီလိုဖြစ်ခွင့်မပေးဘူး" လို့ ထရမ့်က Air Force One လေယာဉ်ပေါ်မှာ သတင်းထောက်တွေကို ပြောကြားခဲ့ပါတယ်။

အဆိုပါ ကျွန်းကြီးကို ပိုင်ဆိုင်ဖို့ ဘယ်သူကမှ မတောင်းဆိုပေမဲ့ ထရမ့်က ဒိန်းမတ်နဲ့ သဘောတူညီချက်တစ်ခု ပြုလုပ်ဖို့ ပြောကြားခဲ့ပြီး "ဒါပေမယ့် တစ်နည်းနည်းနဲ့တော့ ကျွန်တော်တို့အနေနဲ့ ဂရင်းလန်းကို ရအောင်လုပ်မယ်" လို့ပြောကြားခဲ့ပါတယ်။

ဒိန်းမတ်နဲ့ အခြားဥရောပမဟာမိတ်တွေက
ဒုတိယကမ္ဘာစစ်နောက်ပိုင်း အမေရိကန်ပြည်ထောင်စုဟာ စစ်စခန်းတစ်ခု ထားရှိခဲ့တဲ့ ဂရင်းလန်းကျွန်းကို ထရမ့်ရဲ့ ခြိမ်းခြောက်မှုတွေနဲ့ပက်သက်ပြီး အံ့အားသင့်မိကြောင်း ထုတ်ဖော်ပြောကြားခဲ့ပါတယ်။

၁၉၅၃ ခုနှစ်အထိ ဒိန်းမတ်ကိုလိုနီတစ်ခုဖြစ်ခဲ့တဲ့ ဂရင်းလန်းဟာ ၂၆ နှစ်အကြာမှာ ကိုယ်ပိုင်အုပ်ချုပ်ခွင့်ရခဲ့ပြီး နောက်ဆုံးမှာ ဒိန်းမတ်နဲ့ ဆက်ဆံရေးကို လျှော့ချဖို့ စဉ်းစားနေပါတယ်။

ဂရင်းလန်းပြည်သူတွေနဲ့ နိုင်ငံရေးပါတီအများစုဟာ အမေရိကန်ထိန်းချုပ်မှုအောက်မှာ ‌မနေလိုကြောင်း ပြောကြားခဲ့ပြီး သူတို့ရဲ့အနာဂတ်ကို ကိုယ်တိုင်ပဲဆုံးဖြတ်ရမယ်လို့ အခိုင်အမာပြောဆိုခဲ့ကြပါတယ်

အဆိုပါအမြင်ကို ထရမ့်က အဆက်မပြတ်စိန်ခေါ်ခဲ့ပါတယ်။

"ဂရင်းလန်းဟာ ရုရှား သို့မဟုတ် တရုတ်က သိမ်းပိုက်တာကို မြင်တွေ့လိုခြင်းမရှိတာကြောင့် ဂရင်းလန်းအနေနဲ့ သဘောတူညီချက်ကို ပြုလုပ်ဖို့ လိုအပ်ပါတယ်" လို့ ထရမ့်က သူ့ရဲ့ကာကွယ်ရေးတပ်ဖွဲ့တွေကို လှောင်ပြောင်ရင်း သတိပေးခဲ့ပါတယ်။

"ခင်ဗျားသိလား" သူတို့ရဲ့ ကာကွယ်ရေးက ဘာလဲ၊ ခွေးလှည်းနှစ်စီးပေါ့” လို့ ထရမ့် ပြောကြားခဲ့ပြီး ရုရှားနဲ့ တရုတ်တို့ရဲ့ “ဖျက်သင်္ဘောတွေနဲ့ ရေငုပ်သင်္ဘောတွေဟာ နေရာအနှံ့မှာ”ရှိနေတယ်လို့ ဆိုပါတယ်။

ပြီးခဲ့တဲ့အပတ်က ဒိန်းမတ်ဝန်ကြီးချုပ်က အမေရိကန်ရဲ့ဂရင်းလန်းကို အင်အားသုံးသိမ်းပိုက်ဖို့ ဘယ်လုပ်ဆောင်ချက်မဆို ဒါဟာ နှစ်ပေါင်း ၈၀ ကြာ အတ္တလန္တိတ်ဖြတ်ကျော် လုံခြုံရေးဆက်ဆံရေးကို ဖျက်ဆီးပစ်မယ်လို့ သတိပေးခဲ့ပါတယ်။

ထရမ့်က “ ဂရင်းလန်းကို ကျွန်တော်တို့လိုအပ်တာထက် ဂရင်းလန်းက ကျံန်တော်တို့ကို ပိုအပ်ပါတယ်”လို့ ပြောကြားခဲ့ပါတယ်။

Reference - France 24
Translator-Richard
https://www.facebook.com/share/p/1D3sZ8fANy/

ဘားအံမြို့နယ်က BGF ဂိတ်နှစ်ခုကို စစ်ကောင်စီဗုံးကြဲ၊ နှစ်ဦးဒဏ်ရာရပြီး အရပ်သားတစ်ဦးသေဆုံး

BBM - ဇန်နဝါရီ ၁၃
သတင်း - ကိုအိုက်

ကရင်ပြည်နယ်၊ ဘားအံမြို့နယ်မြောက်ဘက် သိုက်တောရွာနဲ့ ဥဒေါင်းရွာရှိ ကရင်နယ်ခြားစောင့်တပ် (BGF) ဂိတ်နှစ်ကို စစ်ကောင်စီတပ်က ဗုံးကြဲတိုက်ခိုက်ခဲ့တယ်လို့ ကရင်စစ်ရေးသတင်းရင်းမြစ်တွေဆီက သိရပါတယ်။

အဲဒီ ဗုံးကြဲတိုက်ခိုက်မှုကြောင့် သိုက်တောရွာ ဂိတ်က BGF ရဲဘော်နှစ်ဦးဟာ ဒဏ်ရာရပြီး အရပ်သားတစ်ဦး ပွဲချင်းပြီး သေဆုံးသွားတယ်လို့ သိရပါတယ်။

မနေ့ ဇန်နဝါရီလ ၁၂ ရက်နေ့၊ ညနေ ၄ နာရီဝန်းကျင်မှာ သိုက်တောကျေးရွာ BGF စက်လှေဂိတ်ကို စစ်ကောင်စီတပ်က လေယာဥ်နဲ့ ဗုံးသီး ၃ လုံးထက်မနည်း တိုက်ခိုက်ခဲ့တာဖြစ်ပါတယ်။

"BGF ပိုင် စက်လှေဂိတ်ကို ဗုံးကြဲသွားတာပါ၊ ဂိတ်မှာ ဗုံးသီးသုံး လုံးကျတယ်၊ စက်လှေသမားက သေဆုံးသွားတယ်၊ BGF ရဲဘော်နှစ်ယောက်လည်း ဒဏ်ရာရကြတယ်"လို့ ကရင်စစ်ရေးသတင်းရင်းမြစ်က BBM ကို ပြောပါတယ်။

ဒါ့အပြင် ဗုံးကြဲခံရပြီးနောက် နာရီပိုင်းကြာမှာ စစ်ကောင်စီက ပေါ့ထော်ရွာကနေ အင်အားအလုံးရင်းနဲ့ စစ်ကောင်စီရဲ့ ကားလေးစီး တက်သွားတယ်လို့လည်း သိရပါတယ်။

ဗုံးကြဲခံရတဲ့ သိုက်တောရွာနဲ့ အနီးအနားကျေးရွာမှာ တိုက်ပွဲဖြစ်ပွားခဲ့တာမရှိဘဲ စစ်ကောင်စီတပ်က လေကြောင်းကနေ ဗုံးကြဲ တိုက်ခိုက်ခဲ့တာ ဖြစ်ပါတယ်။

"ရွာမှာက ဘာတိုက်ပွဲမရှိဘူး၊ ဗုံးကြဲခံရတော့ ရွာသားတွေက တိုက်ပွဲဖြစ်မှာ စိုးရိမ်ကြတယ်၊ စစ်ကားတွေ၊ စစ်သားတွေကလည်း တက်လာတော့ ခြေရှုပ်နေကြတယ် "လို့ ကရင်စစ်ရေးသတင်းရင်းမြစ်က BBM ကို ပြောပါတယ်။

ဥဒေါင်းရွာရှိ BGF ဂိတ်ကိုလည်း စစ်ကောင်စီက အသေခံဒရုန်းနဲ့ ဗုံးကြဲတိုက်ခဲ့ပြီး ထိခိုက်မှုရှိနိုင်ပေမဲ့ အသေးအစိတ်ကို မသိရသေးကြောင်း ကရင်စစ်ရေးသတင်းရင်းမြစ်ဆီက သိရပါတယ်။

#bbm #bbmnews #GBF #Kayin #HpaAn #Myanmar
https://www.facebook.com/share/p/17JLuvomDe/

ရိုဟင်ဂျာလူမျိုးတုန်းသတ်ဖြတ်မှုအတွင်း သီတဂူ၊ ဝီရသူနဲ့ အစွန်းရောက် မဘသ ဘုန်းကြီးတွေကိုပါတရားစွဲဖို့ ဂမ်ဘီယာရှေ့နေတင်ပြ

BBM - ဇန်နဝါရီ ၁၃
သတင်း - Richard

၂၀၁၇ ခုနှစ်က မြန်မာစစ်တပ်ရဲ့ ရိုဟင်ဂျာ လူနည်းစုအပေါ် လူမျိုးတုံးသတ်ဖြတ်မှုရဲ့ နောက်ကွယ်မှာ စစ်တပ်အမာခံဘုန်းကြီးတွေဖြစ်တဲ့ သီတဂူ၊ ဝီရသူနဲ့ အစွန်းရောက် မဘသ ဘုန်းကြီးတွေကိုပါ တရားစွဲဆိုဖို့တင်သွင်းခဲ့တယ်လို့ ဂမ်ဘီယာနိုင်ငံ ရှေ့နေ အာဆလန် ဆူလီမန်(Arsalan Suleman)ရဲ့ တရားရုံးတွင်းတင်ပြတဲ့ အစီရင်ခံစာအရ သိရပါတယ်။

အဆိုပါ လူမျိုးတုံးသတ်ဖြတ်မှု ကျူးလွန်ပြီး ၂ နှစ်အကြာ ၂၀၁၉ ခုနှစ်မှာ ဂမ်ဘီယာနိုင်ငံက မြန်မာစစ်တပ်ကို တရားစွဲဆိုခဲ့တာပါ။

မြန်မာစစ်တပ်ဟာ ရိုဟင်ဂျာ ၇ သိန်းခွဲခန့်ကို နေအိမ်တွေကနေ စွန့်ခွာစေခဲ့ပြီး အများစုမှာ အိမ်နီးချင်း ဘင်္ဂလားဒေ့ရှ်နိုင်ငံသို့ အတင်းအကြပ်တွန်းပို့ခဲ့တဲ့အပြင် အစုလိုက်အပြုံလိုက်သတ်ဖြတ်မှုတွေ၊ အုပ်စုလိုက် မုဒိမ်းပြုကျင့်မှုတွေနဲ့ ရွာလုံးကျွတ် မီးရှို့တာ‌တွေ ပါ၀င်တယ်လို့ သိရပါတယ်။

အဆိုပါ တရားစွဲဆိုထားတဲ့အမှုကို ၂၀၂၆ ခုနှစ် ဇန်နဝါရီလ ၁၂ ရက်နေ့မှာ ICJ တရားရုံးမှာ အမှုကို ပြန်လည်စတင်ကြားနားခဲ့ပြီး မြန်မာစစ်တပ်ရဲ့ ရိုဟင်ဂျာ လူမျိုးတုန်းသတ်ဖြတ်မှုမှာ သီတဂူ၊ ဝီရသူ အပါအဝင် အစွန်းရောက် မဘသ ဘုန်းကြီးတွေက လှုံ့ဆော်ခဲ့မှုတွေကို သက်သေတွေနဲ့တကွ ဂမ်ဘီယာနိုင်ငံဘက်က တင်ပြခဲ့တာပဲ ဖြစ်ပါတယ်။

“၂၀၁၆ ခုနှစ် ရိုဟင်ဂျာ‌တွေကို စတင်သတ်ဖြတ်တဲ့ ပထမပိုင်းမှာ ဝီရသူဟာ ဗိုလ်ချုပ် မင်းအောင်လှိုင်ရဲ့ အကူအညီနဲ့ ရခိုင်ပြည်နယ် မြောက်ပိုင်းက စစ်တပ်အရာရှိတွေနဲ့‌ တွေ့ဆုံပြီး ရသေ့တောင်ရှိ ကျပ်ပြင်နဲ့ စေတီပြင်ကို နယ်မြေရှင်းလင်းရေးခေါင်းစဉ်တပ်ပြီး လူမျိုးတုန်းသတ်ဖြတ်မှုတွေ လုပ်ဆောင်ဖို့ တိုက်တွန်းခဲ့ပါတယ်၊ ဒါ့အပြင် ရိုဟင်ဂျာတွေကို မြက်ပင်ပေါင်းပင်တွေလို ခိုင်းနှိုင်းခဲ့ပြီး အပြတ်ရှင်းမှရမယ်၊ မဟုတ်ရင် ထိန်းမနိုင်သိမ်းမရ ပေါက်ဖွားလာလိမ့်မယ်ဟု ဝီရသူက ပြောဆိုခဲ့တယ်” လို့ ရှေ့နေအာဆလန်က တင်ပြခဲ့ပါတယ်။

ဒါ့ကြောင့် ၂၀၂၃ ခုနှစ် ဇန်နဝါရီလ ၄ ရက်နေ့က စစ်ခေါင်းဆောင် မင်းအောင်လှိုင်က နိုင်ငံတော်အတွက် အကျိုးပြုလုပ်ငန်းတွေ လုပ်ဆောင်တယ်လို့ဆိုကာ ဝီရသူကို သီရိပျံချီ ဘွဲ့ အပ်နှင်းခဲ့ကြောင်းကိုလည်း အာဆလန်က တင်ပြခဲ့ပါသေးတယ်။

“ဒီ ၂၀၁၇ ခုနှစ် ဩဂုတ်လ ၁၈ ရက်နေ့က တပ်မတော်က ဝီရသူရဲ့စကားကို Facebookမှာ တင်ခဲ့ပါသေးတယ်၊ အဲ့စကားကတော့ 'မြန်မာအမျိုးသမီးတွေအနေနဲ့ ခွေးနဲ့ ကုလား ဘယ်ဟာကိုရွေးမလဲဆိုရင် ကုလားကိုမရွေးနဲ့၊ ခွေးထက်ပိုအမျိုးယုတ်တယ်၊ ခွေးသာယူကြ'ဆိုတဲ့ စကားပါ၊ ဒါဟာ လူ့အခွင့်အရေးချိုးဖောက်တဲ့ စကားတွေပါ၊ ဒါ့အပြင် ဝီရသူက ရိုဟင်ဂျာတွေကို ခွေးရူး၊ မြွေ၊ အမျိုးယုတ်၊ ဝံပုလွေ စတဲ့ ရိုင်းစိုင်းတဲ့အသုံးအနှုန်းတွေနဲ့ ပြောဆိုခဲ့ပါသေးတယ်”လို့ အာဆလန်က တင်ပြခဲ့ပါတယ်။

ဒါ့အပြင် မြန်မာနိုင်ငံရဲ့ ထိပ်တန်းဘုန်းကြီးတပါးဖြစ်တဲ့ သီတဂူကလည်း ဗုဒ္ဓဘာသာမဟုတ်သူတွေကို သတ်ဖြတ်ရင် ပြစ်မှုကျူးလွန်တာမဟုတ်ဘဲ၊ ဗုဒ္ဓဘာသာမဟုတ်သူတွေကို သတ်ဖြတ်တာဟာ အကုသိုလ်မမြောက်ကြောင်း ဟောပြောချက်ကိုလည်း အာဆလန်က တင်ပြခဲ့ပါတယ်။

"ဗုဒ္ဓဘာသာ မဟုတ်တဲ့ မကောင်းဆိုးဝါး စစ်သည် ငါးသိန်းဟာ စစ်ပွဲမှာ သေဆုံးခဲ့ပါတယ်၊ ဒါကြောင့် ဘုရင်ကြီးဟာ ညဘက်တွေမှာ အိပ်မပျော်ပါဘူး၊ ဘာကြောင့်လဲဆိုတော့ ဗုဒ္ဓဘာသာအရ လူတွေကိုသတ်တာဟာ အပြစ်တော်တော်ကြီးတာကြောင့်ပါ၊ ဒါကိုရဟန်း ၈ ပါးက ဘုရင်ကြီးကို အရှင်မင်းကြီး စိတ်မပူနဲ့၊ ဘုရင်ကြီးသတ်တဲ့အထဲမှာ ဗုဒ္ဓဘာသာဝင် တစ်ယောက်မှ မပါပါဘူး၊ သူတို့က ဗုဒ္ဓရဲ့အဆုံးအမတွေကို မလိုက်နာကြလို့ ဘာကောင်းလဲ၊ ဘာဆိုးလဲမသိကြပါဘူး၊ ဒါကြောင့် တိရိစ္ဆာန်သာသာပဲ ဖြစ်ပါတယ်၊ ဘုရင်ကြီးသတ်ခဲ့တဲ့ လူ ၅ သိန်းကျော်ထဲမှာ ၁ ယောက်ခွဲလောက်ပဲ လူသားဖြစ်ဖို့ ထိုက်တန်တယ်၊ ဒါကြောင့် ဒါဟာ သေးငယ်တဲ့အပြစ်ဖြစ်ပြီး ဘုရင်ကြီး စိုးရိမ်စရာမလိုပါဘူး" ဆိုတဲ့ သီတဂူဘုန်းကြီးရဲ့ ဟောပြောချက်ကို တင်ပြခဲ့ပါသေးတယ်။

မြန်မာစစ်တပ်ဟာ ရိုဟင်ဂျာလူနည်းစုကို ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ကြောင်း ဂမ်ဘီယာတရားရေးဝန်ကြီး ဒေါ်ဒါဂျယ်လိုက ဇန်နဝါရီလ ၁၂ ရက်၊ တနင်္လာနေ့က ဟိဂ်မြို့ရှိ အပြည်ပြည်ဆိုင်ရာတရားရုံး (ICJ)မှာ ပြောကြားခဲ့ပါသေးတယ်။

"ဒါဟာ အပြည်ပြည်ဆိုင်ရာဥပဒေရဲ့ နက်နဲခက်ခဲတဲ့ အကြောင်းအရာတွေအပေါ် ငြင်းခုံနေတာ မဟုတ်ပါဘူး၊ ဒါဟာ တကယ့်လူသားတွေ၊ တကယ့်ဖြစ်ရပ်တွေနဲ့ တကယ့်လူသားအုပ်စုတစ်စုအကြောင်း ဖြစ်ပါတယ်၊ သူတို့ဟာ မြန်မာနိုင်ငံက ရိုဟင်ဂျာတွေပါ၊ သူတို့ဟာ ဖျက်ဆီးပစ်ဖို့အတွက် ပစ်မှတ်ထားခံခဲ့ရတာပါ" လို့ ဂမ်ဘီယာ တရားရေးဝန်ကြီး Dawda Jallow က ICJ တရားကို တင်ပြခဲ့ပါသေးတယ်။

ပြီးခဲ့တဲ့ ၂၀၁၇ ခုနှစ် ရိုဟင်ဂျာတွေကို သတ်ဖြတ်မှုအတွင်း မြန်မာနိုင်ငံဟာ ၁၉၄၈ ခုနှစ် မျိုးတုံးသတ်ဖြတ်မှုဆိုင်ရာ သဘောတူညီချက်ကို ဖောက်ဖျက်ခဲ့ကြောင်း ICJ တရားရုံးမှာ မြန်မာနိုင်ငံကို ဂမ်ဘီယာနိုင်ငံက တရားစွဲဆိုခဲ့တာပဲ ဖြစ်ပါတယ်။

အဆိုပါ ရုံးတင်စစ်ဆေးမှုဟာ ပြီးခဲ့တဲ့ ဆယ်စုနှစ်တစ်ခုကျော်အတွင်း ICJ မှ အပြည့်အဝကိုင်တွယ်ခဲ့တဲ့ ပထမဆုံးလူမျိုးတုံးသတ်ဖြတ်တဲ့အမှုဖြစ်သလို ရလဒ်ဟာ မြန်မာနိုင်ငံပြင်ပမှာပါ အကျိုးဆက်တွေ ရှိလာမှာဖြစ်ပြီး ဂါဇာမှာ လူမျိုးတုံးသတ်ဖြတ်မှုစစ်ပွဲနဲ့ ပတ်သက်ပြီး အစ္စရေးကို ဆန့်ကျင်တဲ့ တောင်အာဖရိကရဲ့ တောင်းဆိုတဲ့အမှုလိုပဲ သက်ရောက်မှုရှိမှာပါ။ ကြားနာမှုတွေဟာလည်း ၃ ပတ်ခန့် ကြာမြင့်မှာပဲ ဖြစ်ပါတယ်။

ကုလသမဂ္ဂအချက်အလက်ရှာဖွေရေးမစ်ရှင်တစ်ခုကလည်း ၂၀၁၇ ခုနှစ်အတွင်း မြန်မာစစ်တပ်ဟာ “လူမျိုးတုံးသတ်ဖြတ်မှုလုပ်ရပ်‌တွေ” လုပ်ဆောင်ခဲ့ကြောင်း ကောက်ချက်ချခဲ့ပါတယ်။

ဒါပေမဲ့ မြန်မာစစ်တပ်က အဆိုပါလူမျိုးတုံးသတ်ဖြတ်မှုတွေဟာ ရိုဟင်ဂျာလက်နက်ကိုင်အဖွဲ့တွေရဲ့ တိုက်ခိုက်မှုတွေကို တုံ့ပြန်တဲ့အနေနဲ့ တရားဝင်အကြမ်းဖက်မှုတန်ပြန်လှုပ်ရှားမှုတစ်ခုဖြစ်တယ်လို့ ချေပပြီး အစီရင်ခံစာကို ပယ်ချခဲ့ကြပါတယ်။

“လူမျိုးတုံးသတ်ဖြတ်မှုကို ဘယ်လိုအဓိပ္ပာယ်ဖွင့်ဆိုမလဲ၊ ဘယ်လိုသက်သေပြနိုင်မလဲ၊ ချိုးဖောက်မှုတွေကို ဘယ်လိုပြုပြင်နိုင်မလဲဆိုတဲ့ အရေးကြီးတဲ့ သာဓကတွေကို ဒီအမှုက ချမှတ်နိုင်ဖွယ်ရှိပါတယ်” လို့ မြန်မာနိုင်ငံဆိုင်ရာ ကုလသမဂ္ဂ လွတ်လပ်တဲ့ စုံစမ်းစစ်ဆေးရေးယန္တရားရဲ့ အကြီးအကဲ နီကိုလတ်စ် ကွန်ဂျီယန်က ရိုက်တာသတင်းဌာနကို ပြောကြားခဲ့ပါတယ်။

ဒီနေ့အချိန်အထိ ရိုဟင်ဂျာ ၁.၁၇ သန်းမှာ ဘင်္ဂလားဒေ့ရှ်နိုင်ငံ၊ ကော့စ်ဘဇားရှိ ဒုက္ခသည်စခန်းတွေမှာ နေထိုင်နေကြရဆဲလည်း ဖြစ်ပါတယ်။

Reference-Al Jazeera/ Arsalan Suleman

#bbm #bbmnews #သီတဂူ #ဝီရသူ #မဘသ #ရိုဟင်ဂျာ #ဂမ်ဘီယာ
https://www.facebook.com/share/p/1BpwGyiYXy/

စစ်တွေနဲ့ ကျောက်ဖြူမြို့နယ်က စစ်ကောင်စီတပ်မိသားစုဝင်တွေ စတင်ထွက်ပြေးတိမ်းရှောင်

BBM - ဇန်နဝါရီ ၁၃
သတင်း - နိုင်နိုင်

ရခိုင်မှာ တိုက်ပွဲတွေပြင်းထန်နေကြတဲ့ စစ်တွေနဲ့ ကျောက်ဖြူမြို့နယ်အတွင်းက စစ်ကောင်စီတပ်မိသားဝင်စုတွေဟာ ရန်ကုန်နဲ့ တခြားနေရာတွေကို ထွက်ပြေးတိမ်းရှောင်မှုတွေ ရှိနေကြတယ်လို့ ဒေသခံတွေဆီက သိရပါတယ်။

အခုနှစ် ၂၀၂၆ ခုနှစ်၊ နှစ်ဆန်းပိုင်းလောက်က စတင်ကာ အာရက္ခတပ်တော် AA ဟာ စစ်တွေနဲ့ ကျောက်ဖြူမြို့နယ်ကို ထိုးစစ်အရှိန်မြှင့်တင်ပြီး တိုက်ခိုက်လာနေတာကြောင့် မြို့ပေါ်နဲ့ နယ်တပ်ရင်းတွေမှာ နေထိုင်ကြတဲ့ စစ်တပ်မိသားစုဝင်တွေဟာ ရန်ကုန်နဲ့ တခြားနေရာတွေကို ရေကြောင်း၊ လေကြောင်းတွေကနေ ထွက်ပြေးတိမ်းရှောင်မှုတွေ ရှိနေတယ်လို့ စစ်တွေဒေသခံတွေဆီက သိရပါတယ်။

"စစ်တွေမှာ ကာကင်းစခန်း ၂ ခုကို AA က သိမ်းလိုက်ပြီလို့ ကြားပြီးနောက် စစ်တွေမြို့ပေါ်က တပ်ရင်းတွေနဲ့ ကျားမသောက်ကျေးရွာရှိ တပ်ရင်းက တပ်မိသားစုဝင်တွေဟာ ထွက်ပြေးနေကြတယ်လို့ ကြားပါတယ်၊ မိသားစုဝင်တွေရှိနေရင် စစ်မတိုက်ချင်ပဲ ဖြစ်နေမှာကြောက်တဲ့အတွက် အရာရှိပိုင်းတွေကနေ ပို့ပေးနေတာဖြစ်ပါတယ်" လို့ စစ်တွေစစ်ရေးအခြေအနေကို သိရှိတဲ့ ဒေသခံတစ်ဦးက BBM ကို ပြောပါတယ်။

ပြီးခဲ့တဲ့ ဇန်နဝါရီလ ၉ ရက်နေ့က အာရက္ခတပ်တော် AA ဟာ သက္ကယ်ပြင်ကျေးရွာရှိ ဒကစ ဌာနချုပ်အနီးက ကာကင်းစခန်း ၂ ခုကို သိမ်းပိုက်ထိန်းချုပ်နိုင်ခဲ့ပြီး စစ်သုံ့ပန်း အယောက် ၃၀ ကျော်ကိုလည်း ဖမ်းဆီးရမိခဲ့တာရှိတယ်လို့ AA နဲ့ နီးစပ်တဲ့ စစ်ရေးသတင်းရင်းမြစ်တွေဆီက သိရပါတယ်။

စစ်တွေမြို့နယ်မှာ ဒေသကွပ်ကဲမှုစစ်ဌာနချုပ် (ဒကစ) စစ်တွေနဲ့ ကွပ်ကဲမှုအောက်က ခြေလျင်၊ ခြေမြန်တိုက်ခိုက်ရေးတပ်တွေ ဖြစ်ကြတဲ့ ခလရ (၂၀)၊ ခလရ (၂၃၂)၊ ခလရ (၂၇၀)၊ ခမရ (၃၄၄)၊ ခမရ (၃၅၄)နဲ့ အမှတ် (၁၂) ရဲတပ်ရင်း၊ အမှတ် (၃၆) ရဲတပ်ရင်းတွေအပါအဝင် ကျားမသောက်ကျေးရွာအနီးရှိ အမှတ် (၉၀၈) စစ်မြေပြင်အင်ဂျင်နီယာတပ်ရင်းတို့ ရှိနေတာလည်း ဖြစ်ပါတယ်။

အလားတူ အာရက္ခတပ်တော် AA ဟာ ကျောက်ဖြူမြို့နယ်အတွင်းက သစ်ပုတ်တောင်လမ်းပိုင်းရှိ ဓညဝတီရေတပ်ဌာနချုပ်နဲ့ ဒိုးတန်းတောင်ပေါ်ရှိ အမှတ် ၃၂ ရဲတပ်ရင်းတွေကို လက်နက်ကြီးတွေနဲ့ ပစ်ခတ်တိုက်ခိုက်မှုတွေရှိလာနေတာကြောင့် ကျောက်ဖြူမြို့နယ်အတွင်းက တပ်မိသားစုဝင်တွေမှာလည်း ဘေးလွတ်ရာနေရာတွေကို ထွက်ပြေးတိမ်းရှောင်မှုတွေ ရှိနေကြတယ်လို့လည်း သိရပါတယ်။

"တပ်မိသားစုတစ်ချို့တော့ ရေကြောင်း၊ လေကြောင်းကနေ တိမ်းရှောင်နေကြတာရှိပါတယ်၊ စစ်တပ်က သူတို့ရဲ့မိသားစုဝင်တွေကိုပဲ အဓိကထားပြီး ပို့ဆောင်ပေးနေတာပါ၊ မြို့ပေါ်ကဒေသခံတွေလိုက်ရင် စစ်ဆေးတာတွေလုပ်တယ်၊ သုံးလေးရက်စောင့်ရတာတွေလည်း ရှိပါတယ်" လို့ ကျောက်ဖြူဒေသခံတစ်ဦးက BBM ကို ပြောပါတယ်။

ကျောက်ဖြူမြို့နယ်မှာ သစ်ပုတ်တောင်လမ်းပိုင်းရှိ ဓညဝတီရေတပ်ဌာနချုပ်၊ မြို့ပေါ် ခရီးသည်လေယာဥ်ကွင်းအနီးရှိ ခလရ ၃၄ တပ်ရင်း၊ ဂုံးချွိန်ကျေးရွာအနီးရှိ ခမရ ၅၄၂ တပ်ရင်းနဲ့ ခမရ ၅၄၃ တပ်ရင်း၊ ပြိုင်းစေ့ကေကျေးရွာအနီးက ဒိုးတန်းတောင်ပေါ်ရှိ အမှတ် ၃၂ ရဲတပ်ရင်း၊ တောင်မော်ကြီး ရေတပ်စခန်းနဲ့ အုံးကျွိန်ရေတပ်ဌာနခွဲတို့ ရှိနေတာလည်း ဖြစ်ပါတယ်။

ကျောက်ဖြူမြို့နယ်ကို အာရက္ခတပ်တော် AA က ထိုးစစ်အရှိန်မြှင့် တိုက်ခိုက်လာနေတာကြောင့် စစ်ကောင်စီတပ်ဟာ တရုတ်စီမံကိန်းတွေ များစွာရှိတဲ့ မဒေးကျွန်းရှိ အနောက်ဘက်ခြမ်း ရေနက်ဆိပ်ကမ်းစီမံကိန်းကို သွယ်တန်းထားတဲ့ ဓာတ်အားပိုက်လိုင်း လမ်းကြောင်းတွေမှာ တပ်စခန်းတွေ တိုးချဲ့ချထားတယ်လို့လည်း သိရပါတယ်။

#bbm #bbmnews #စစ်ကောင်စီ #တပ်မိသားစု #တိမ်းရှောင်
https://www.facebook.com/share/p/1C1v5z2g1M/

ရေဦးမြို့ရှိ စစ်ကောင်စီအထိုင်ဂိတ်ကို ပြည်သူ့ကာကွယ်ရေးတပ်များ ဝင်ရောက်တိုက်ခိုက်

■ဂိတ်တာဝန်ခံ ဗိုလ် ၁ ဦးအပါ စစ်ကောင်စီတပ်သား ၁၃ ဦးသေဆုံး

BBM - ဇန်နဝါရီ ၁၃
သတင်း - ကိုဘုဏ်း

စစ်ကိုင်းတိုင်း၊ ရေဦးမြို့နယ် အနောက်ဘက် စစ်ကောင်စီတပ်တွေ အထိုင်ချထားတဲ့ ရွှေကျီးမင်းဂိတ်ကို ပြည်သူ့ကာကွယ်ရေးတပ်တွေက ဇန်နဝါရီလ ၈ ရက်၊ မနက် ၅ နာရီခန့်မှာ ဝင်ရောက်တိုက်ခိုက်ခဲ့တယ်လို့ ရွှေဘိုခရိုင် တပ်ရင်း ၂၄ က ထုတ်ပြန်ထားပါတယ်။

တော်လှန်ရေးတပ်ဖွဲ့တွေရဲ့ ဝင်ရောက်တိုက်ခိုက်မှုကြောင့် အဆိုပါဂိတ်စခန်းမှ တာဝန်ခံ စစ်ဗိုလ်အပါအဝင် စစ်ကောင်စီတပ်သား ၉ ဦးသေခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် ပွိုင့် ၅ စက်သေနတ် တင်ထားသော ကားကိုလည်းတိုက်ခိုက်ရာ အဆိုပါကားတိမ်းမှောက်ပြီး ကားပေါ်ပါတဲ့ စစ်ကောင်စီတပ်သား ၄ ဦး လည်း သေဆုံးခဲ့တယ်လို့ ဆိုပါတယ်။

ကျန်စစ်ကောင်စီအင်အားတွေလည်း ရေဦးမြို့ထဲကို ဆိုင်ကယ်တွေနဲ့ ကစဥ့်ကလျား ထွက်ပြေးသွားကြတယ်လို့လည်း သိရပါတယ်။

အဆိုပါတိုက်ခိုက်မှုကို ရွေဘိုခရိုင် တပ်ရင်း ၁၁၊ တပ်ရင်း ၁၄၊ တပ်ရင်း ၂၄ တို့နဲ့အတူ ဒေသတွင်း တော်လှန်ရေးအင်အားစုတွေ ပူးပေါင်းဖွဲ့စည်းထားတဲ့ ရေဦးစစ်ကြောင်းက ဖော်ဆောင်ခဲ့တာဖြစ်တယ်လို့ ရွှေဘိုခရိုင် တပ်ရင်း ၂၄ က အသိပေးထားပါတယ်။

Photo - ရွှေဘိုခရိုင် တပ်ရင်း ၂၄
https://www.facebook.com/share/p/18GRAZvAxi/