နယ်စပ်ငြိမ်းချမ်းရေးဆွေးနွေးပွဲတွေပြုလုပ်နေစဉ် ထိုင်းနိုင်ငံက တိုက်ခိုက်မှုတွေပြုလုပ်ခဲ့တယ်လို့ ကမ္ဘောဒီးယားစွပ်စွဲ

BBM-ဒီဇင်ဘာ ၂၇

ထိုင်း-ကမ္ဘောဒီးယားနှစ်နိုင်ငံဟာ နယ်စပ်ပဋိပက္ခတွေ အဆုံးသတ်ဖို့ အစည်းအဝေးတွေ ကျင်းပနေပေမဲ့ အငြင်းပွားနေတဲ့ နယ်စပ်ဒေသမှာ ဗုံးကြဲတိုက်ခိုက်မှုတွေ ပိုမိုပြင်းထန်လာတယ်လို့ ကမ္ဘောဒီးယားက ထိုင်းကို စွပ်စွဲခဲ့ပါတယ်။

တရားဝင်စာရင်းတွေအရ အိမ်နီးချင်းနှစ်နိုင်ငံရဲ့ ရှည်လျားတဲ့ နယ်စပ်ပဋိပက္ခတွေဟာ အခုလထဲမှာ ပြန်လည်စတင်ခဲ့ပြီး အစောပိုင်းက သဘောတူညီထားတဲ့ အပစ်အခတ်ရပ်စဲရေးကို ပျက်ပြားစေပြီး လူ ၄၀ ကျော် သေဆုံးခဲ့ရကာ လူတစ်သန်းခန့်လည်း အိုးမဲ့အိမ်မဲ့ဖြစ်ခဲ့ရတယ်လို့ ဆိုပါတယ်။

ဒီဇင်ဘာလ ၂၆ရက် သောကြာနေ့က ကမ္ဘောဒီးယားနဲ့ ထိုင်းအရာရှိတွေက နယ်စပ်စစ်ဆေးရေးဂိတ်တစ်ခုမှာ တတိယမြောက်နေ့ ဆွေးနွေးမှုတွေ ပြုလုပ်ခဲ့ပါတယ်။

လာမယ့် ဒီဇင်ဘာလ ၂၇ရက်နေ့မှာတော့ နှစ်နိုင်ငံမှ ကာကွယ်ရေးဝန်ကြီးတွေက တွေ့ဆုံဖို့ စီစဉ်ထားကြပါတယ်။

ဒါပေမဲ့လည်း ကမ္ဘောဒီးယားကာကွယ်ရေးဝန်ကြီးဌာနက သောကြာနေ့မနက်က ထိုင်းစစ်တပ်က အငြင်းပွားနေတဲ့ နယ်နိမိတ်ဒေသတွေကို ပြင်းထန်စွာ ဗုံးကြဲတိုက်ခိုက်ခဲ့ကြောင်း ပြောကြားခဲ့ပါတယ်။

“မနက် ၆ နာရီမှ ၇ နာရီ ၁၅ မိနစ်အထိ ထိုင်းစစ်တပ်က ချော့ချေရွာကို ဗုံး အလုံး ၄၀ အထိ ကြဲချဖို့ F-16 တိုက်လေယာဉ်တွေ စေလွှတ်ခဲ့တယ်”လို့ ကြေညာချက်တစ်စောင်မှာ ဖော်ပြထားပါတယ်။

Reference-The Guardian
Translator-Richard
Photo-The Guardian/the nation Thailand

#bbmnews #bbm #bbmtv #thailand #cambodia

ရွှေဘိုမြို့နယ်မှာ ရွေးကောက်ပွဲဆန့်ကျင်ကြောင်း လက်ဗွေနှိပ်ပြီး ဆန္ဒထုတ်ဖော်

BBM-ဒီဇင်ဘာ၂၇
သတင်း-ခက်ဆစ်

စစ်ကိုင်းတိုင်း၊ ရွှေဘိုမြို့နယ်မှာ စစ်ကောင်စီရဲ့ အတုအယောင်ရွေးကောက်ပွဲကို လက်မခံ၊ ဆန့်ကျင်ကြောင်း လက်ဗွေနှိပ် ဆန္ဒဖော်ထုတ်ခဲ့ကြတယ်လို့ ရွှေဘိုမြို့နယ် သပိတ်အင်အားစုက ယမန်နေ့ ညပိုင်းမှာ ထုတ်ပြန်ခဲ့ပါတယ်။

ရွှေဘိုမြို့နယ်အတွင်းရှိ ပြည်သူလူထု အသွားအလာများတဲ့ လမ်းမတွေပေါ်မှာ စစ်ကောင်စီရဲ့ အတုအယောင်ရွေးကောက်ပွဲကို ဆန့်ကျင်ကြောင်း လက်ဗွေနှိပ်ဆန္ဒဖော်ထုတ်ခဲ့ကြတယ်လို့ ဆိုပါတယ်။

"အတုအယောင်ရွေးကောက်ပွဲသည် ပြည်သူလက်မခံနိုင်သော စစ်ကော်မရှင်၏ အနိုင်ကျင့်မှု ထွက်ပေါက်ရှာဖွေမှု တရားဝင်ဖြစ်ဖို့အတွက် တရားမဝင်ကြံစည်မှုသာဖြစ်သည်၊ ဤလုပ်ရပ်ကို ပြည်သူက လက်မခံ ဆန့်ကျင်ကြောင်း ပြည့်သူ့လက်ဗွေများဖြင့် ဆန္ဒထုတ်ဖော်ကြခြင်းဖြစ်ပါသည်" လို့ ရွှေဘိုမြို့နယ် သပိတ်အင်အားစုက အသိပေးထားပါတယ်။

Photo - ရွှေဘိုမြို့နယ် သပိတ်အင်အားစု

#bbmnews #bbm #bbmtv #election #shwebo

မိုးကုတ်မြို့မှာ စစ်ကောင်စီ၀င်လာပြီးနောက် စစ်ရှောင်တွေရဲ့အိမ်တွေ ဖောက်ထွင်းခံနေရ

BBM-ဒီဇင်ဘာ ၂၇
သတင်း-Richard

စစ်ကောင်စီပြန်လည်၀င်ရောက်ထားတဲ့ မိုးကုတ်မြို့မှာ စစ်ရှောင်ပြည်သူတွေရဲ့ နေအိမ်‌တွေ ဖောက်ထွင်းခံနေရတယ်လို့ ဒေသခံသတင်းရင်းမြစ်က BBM ကိုပြောပါတယ်။

ဒီဇင်ဘာလ ၂၅ ရက်၊ ညပိုင်းမှာ မိုးကုတ်မြို့ အနောက်ခြမ်းရှိ သော်တာ၀င်းဆီဆိုင် အရှေ့ဘက်လမ်းက စစ်ရှောင်ပြည်သူတွေရဲ့ အိမ်တွေတော်တော်များများအဖောက်ခံခဲ့ရတာပါ။

“ဖောက်ခံရတဲ့အိမ်တိုင်း အကုန်လုံးကို အမွှေခံရတာ”လို့ အဆိုပါ သတင်းရင်းမြစ်က ဆိုပါတယ်။

ဒီဇင်ဘာလ ၁၃ ရက်မှစပြီး မိုးကုတ်မြို့အနောက်ခြမ်းမှာ‌ရှိတဲ့ စစ်ရှောင်ပြည်သူတွေရဲ့ အိမ်တော်တော်များများအဖောက်ခံရပြီး အရှေ့ပိုင်းမှာတော့ အိမ်စောင့်တွေရှိတာကြောင့် ဖောက်ထွင်းခံရတဲ့ ကိစ္စနည်းတယ်လို့ သိရပါတယ်။

ဒါဟာ မိုးကုတ်မြို့ကို စစ်ကောင်စီတပ် ပြန်လည်၀င်ရောက်လာပြီးနောက် ပြည်သူတွေရဲ့စား၀တ်နေရေးကအစ လုံခြုံရေးကိုပါ ထိခိုက်လာတာဖြစ်တယ်လို့ ဆိုပါတယ်။

“မနေ့က မိုးကုတ်အနောက်ပိုင်းက ကသဲကုန်စိမ်းဈေးမှာဆိုရင် စစ်သားမိန်းမတွေက ၁၀၀၀ ပေးမှ ဈေးတံတားဖွင့်ပေးမယ်ဆိုပြီး ဆက်ကြေးကောက်သလိုကောက်နေတာဗျ၊ ဈေးက အရင်လို လူသိပ်မစည်တော့ဘူးလေ၊ ၅၀၀ ဆိုရင်တောင် အနိုင်နိုင်ပေးရမှာ”လို့ မိုးကုတ်မြို့ခံ ပြည်သူတစ်ဦးက ပြောပါတယ်။

ဒါ့အပြင် မိုးကုတ်မြို့ထဲရှိ ချောင်းတွေ၊ မြောင်းတွေမှာ တစ်နိုင်တစ်ပိုင် ကျောက်ရှာတဲ့ ပြည်သူတွေကိုလည်း စစ်ကောင်စီတပ်က လိုက်လံဖမ်းဆီးတာတွေ ရှိနေတယ်လို့ သိရပါတယ်။

“အိမ်နားကချောင်းမှာလဲ ခနဲဆေးနေကြတာ၊ လာဖမ်းတာပြေးကြရတာဗျ၊ အဲ့နားမှာလုပ်နေကြတာတစ်ပိုင်တစ်နိုင်လေးပါ”လို့ အဆိုပါ သတင်းရင်းမြစ်က ဆက်ပြောပါတယ်။

ပြီးခဲ့တဲ့ လကုန်ပိုင်းလောက် TNLA က မိုးကုတ်မြို့ကို စစ်ကောင်စီတပ်ထံ ပြန်လည်ပေးအပ်ခဲ့တာဖြစ်ပြီး လက်ရှိမှာ တော်လှန်ရေးပူးပေါင်းမဟာမိတ်တပ်တွေက မိုးကုတ်မြို့မကျရေးအတွက် တိုက်ပွဲ၀င်နေကြတာဖြစ်ပါတယ်။

မိုးကုတ်မြို့ကို ၂၀၂၄ ခုနှစ်၊ ဇူလိုင်လမှာ တော်လှန်ရေးပူးပေါင်းမဟာမိတ်တပ်တွေနဲ့ TNLA တို့က သိမ်းပိုက်ခဲ့တာဖြစ်ပြီး တစ်နှစ်ကျော်အကြာမှာ စစ်ကောင်စီထံ TNLA က ပြန်လည်ပေးအပ်လိုက်တာပဲ ဖြစ်ပါတယ်။

#bbmnews #bbm #bbmtv #Mogok #militarycouncil