မြင်းခြံ-တောင်သာလမ်းပေါ်မှာ စကစ ကား(၂)စီးတိုက်ခိုက်မှု အရာရှိအပါ(၁၂)ဦးသေ

BBM - မေလ ၂၆
သတင်း - ကိုဘုဏ်း

မြင်းခြံမြို့အနီး မြင်းခြံ-တောင်သာလမ်းပေါ်မှာ စစ်ကောင်စီ၊ရဲနဲ့ ပျူများစီးလာတဲ့ ကား(၂)စီးကို တော်လှန်ရေးတပ်ဖွဲ့တွေတိုက်ခိုက်ခဲ့တာကြောင့် စကစအရာရှိအပါ (၁၂)ဦးသေဆုံးခဲ့တယ်လို့ မြင်းခြံခရိုင်အမှတ် (၁)တပ်ရင်းက ထုတ်ပြန်ကြေငြာထားပါတယ်။

ပြီးခဲ့တဲ့ မေလ (၂၄)ရက်နေ့က တောင်သာ- မြင်းခြံလမ်းအားအသုံးပြု၍ စကစတပ်များ သွားလာနေကြောင်း သတင်းရတာ ကြောင့်မြင်းခြံခရိုင် အမှတ် (၁)တပ်ရင်းနှင့် မဟာမိတ်များမှ လမ်းပိုင်း စစ်ဆေးရေး ပြုလုပ်ပြီး ကင်းပုန်းစောင့်တိုက်ခိုက်ချေမှုန်ခဲ့တယ်လို့သိရပါတယ်။

တော်လှန်ရေးတပ်ဖွဲ့များက စစ်ဆေးမှု့များပြုလုပ်နေချိန် မြင်းခြံမြို့မှ ထွက်ခွာလာတဲ့ စစ်ကောင်စီ၊ပျူနဲ့ ရဲများစီးလာတဲ့ 4×4ကား (၁)စီး/ supercustomကား ၁စီးတို့ကို တိုက်ခိုက်ခဲ့တယ်လို့သိရပါတယ်။

တိုက်ခိုက်မူ့အတွင်း စစ်ကောင်စီနဲ့ လက်ပါးစေများစီးလာတဲ့ super custom ကား မှစကစအလောင်း များနဲ့ လက်နက်များ သိမ်းဆည်းရမိခဲ့ပြီး4×4ကားအားတိုက်ခိုက်ခဲ့သော်လည်း သေ ဆုံး ထိခိုက်များ၍ မြင်းခြံမြို့သို့ ပြန်လည်မောင်းနှင်းထွက်ပြေးသွားခဲ့တယ်လို့လည်း ဖော်ပြထားပါတယ်။

တော်လှန်ရေးတပ်ဖွဲ့များရဲ့တိုက်ခိုက်မူ့ကြောင့် စစ်သား၊ ရဲ ၊ပျူ (၄)လောင်းနှင့်အတူ MA1- (၁)လက်/ PA (၁) လတ် /M22 (၁)လက်/ ကာဘိုင် (၁)လတ်နှင့်အတူ ဆက်စပ်ပစ္စည်းများ သိမ်းဆည်းရမိခဲ့ပြီးစကစ အရာရှိ (၁)ဉီးအပါအဝင် (၁၂)ဉီးသေဆုံးကြောင်းလည်းသိရှိရပါတယ်။

တိုက်ခိုက်မှုပြီးချိန်မှာစကစ ဘက်မှတပ်ကူ ကား များ၊ဒရုန်းကား များရောက်ရှိလာသဖြင့် တော်လှန် ရေးရဲဘော်များမှ အထိအခိုက်မရှိ ပြန်လည်ဆုတ်ခွာခဲ့တယ်လို့လည်းဖော်ပြထားပါတယ်။

အဆိုပါတိုက်ခိုက်မူ့ကိုမြင်းခြံခရိုင်အမှ(၁)တပ်ရင်း ၊အမှတ် (၂)တပ်ရင်း၊အမှတ် (၇)တပ်ရင်း၊မြင်းခြံမြို့နယ် ပကဖ( တိုက်နယ်၂)နှင့် နွားထိုးကြီးမြို့နယ် ပကဖ တို့ ပူးပေါင်းတိုက်ခိုက်ခဲ့ပြီး မြင်းခြံခရိုင်အတွင်း ကာကွယ်ရေးအဖွဲ့ များ မှစစ်ကော်မရှင်ထံ ပူးပေါင်း သွားတဲ့ သစ္စာဖောက်များကိုလည်း ချေမှုန်းန်ိုင်ခဲ့တယ်လို့မြင်းခြံခရိုင်အမှတ် (၁)တပ်ရင်းက ထုတ်ပြန်ထားပါတယ်။

Photo-မြင်းခြံခရိုင်အမှတ် (၁)တပ်ရင်း

မင်းအောင်လှိုင်က သူအုပ်ချုပ်မည့်(၅)နှစ်တာအတွင်း ထာဝရငြိမ်းချမ်းရေးရရှိအောင် ဆောင် ရွက်မယ်လို့ဆို

🟥PDF များလက်နက်ကိုင်ခြင်းက နိုင်ငံရဲ့ပညာရေးအားနည်းချက်ကို နိုင်ငံရေးသမားတွေက အမြတ်ထုတ်ခြင်းဖြစ်ဟုလည်းပြော

BBM-မေ၂၆
သတင်း-မင်းသော်

စစ်ခေါင်းဆောင်ဟောင်း မင်းအောင်လှိုင်အနေနဲ့ သူသမ္မတလုပ် အုပ်ချုပ်မည့် (၅)နှစ်တာ ကာလအတွင်း ထာဝရငြိမ်းချမ်းရေးရရှိအောင် မျှော်မှန်းချက်ထားပြီး ဆောင်ရွက်သွားမယ်လို့ ပြောဆိုထားတယ်လို့ သိရပါတယ်။

မေလ၂၆ ရက်နေ့(ဒီနေ့) နေပြည်တော်ရှိ နိုင်ငံတော် သမ္မတရုံးတော်၊ ပြည်ထောင်စုအစိုးရအဖွဲ့အစည်းအဝေးခန်းမမှာ ပြုလုပ်တဲ့ ပြည်ထောင်စု အစိုးရအဖွဲ့အစည်းအဝေးမှာ စစ်ခေါင်းဆောင် မင်းအောင်လှိုင်က အထက်ပါအတိုင်းပြောကြားခဲ့တယ်လို့ သိရပါတယ်။

အဆိုပါအစည်းအဝေးအတွင်း မင်းအောင်လှိုင်က နိုင်ငံရဲ့ လုံခြုံရေး၊ပညာရေးအကြောင်းပြောရာမှာ ၎င်းစတင်တာဝန်ယူခဲ့တဲ့အချိန်ကစပြီး ရက်ပေါင်း၁၀၀ အတွင်း ငြိမ်းချမ်းရေးဆွေးနွေးခြင်းတွေဆောင်ရွက်ဖို့ ဖိတ်ခေါ်ပြီးလက်ရှိ EAOတွေနဲ့ အောက်ခြေမှာ ထိတွေ့ဆောင်ရွက်မှုတွေရှိနေတယ်လို့ဆိုကာ PDFများအနေနဲ့ ပြီးခဲ့တဲ့ ၂၀၂၀ ရွေးကောက်ပွဲက နိုင်ငံရေးဖြစ်စဥ်တွေကို လက်မခံဘဲ လက်နက်ကိုင်ကြခြင်းဖြစ်တယ်လို့ စွပ်စွဲပြောဆိုထားပါတယ်။

ဒီလိုဖြစ်လာရခြင်းက တိုင်းပြည်ရဲ့ပညာရေးအားနည်းချက်ကို ပြည်တွင်း၊ပြည်ပ နိုင်ငံရေးသမားတွေက ၎င်းတို့ကိုယ်ကျိုးအတွက် သွေးထိုးလှုံ့ဆော်ပြီး အသုံးချလုပ်ဆောင်ခဲ့တာကြောင့် ၎င်းအနေနဲ့ နိုင်ငံပညာရေးကို မဖြစ်မနေပြုပြင်ပြောင်းလဲဖို့ အကြိမ်များစွာ ပြောကြားခဲ့ခြင်းဖြစ်တယ်လို့လည်း ပြောပါတယ်။

ပညာရေးဖွံ့ဖြိုးတိုးတက်စေဖို့က တည်ငြိမ်အေးချမ်းဖို့လိုအပ်တာမို့ လာမဲ့(၅)နှစ်တာ ကာလအတွင်း ထာဝရငြိမ်းချမ်းရေးရဖို့ မျှော်မှန်းချက်ထားကာ ကြိုးပမ်းဆောင်ရွက်မှာဖြစ်ပြီး ၎င်းတို့က ဘယ်လောက်ပဲကြိုးစားနေပါစေ လက်နက်ကိုင်အဖွဲ့တွေက ယုံကြည်ချက်၊ခံယူချက်ရှိစွာနဲ့ တိုင်းပြည်ဖွံ့ဖြိုးတိုးတက်ရေးအတွက် ဝိုင်းဝန်းပူးပေါင်းဆောင်ရွက်ဖို့လိုတယ်လို့လည်း ပြောဆိုထားပါတယ်။

အဆိုပါအစည်းအဝေးအတွင်း နောက်ထပ်လည်း မင်းအောင်လှိုင်က နိုင်ငံတကာဆက်ဆံရေး၊ အလုပ်အကိုင်ရရှိရေး၊ ကျောင်းနေအရွယ်ကလေးငယ်တွေ ပညာသင်ကြားနိုင်ရေးနဲ့ ချင်းပြည်နယ် အတွင်းထိခိုက်တဲ့ ပြည်သူပိုင်အဆောက်အဦးတွေကို ပြန်လည်ထူထောင်ရေးသာမက အားကစားကဏ္ဍမြှင့်တင်ခြင်းတွေကိုပါ ထည့်သွင်းပြောခဲ့ပြီး တော်လှန်ရေးအင်အားစုတွေအပေါ် ပြစ်တင်ရှုတ်ချမှုတွေလည်း ပြုလုပ်သွားတယ်လို့ သိရပါတယ်။

Photo-ပုံဟောင်း

မြင်းခြံ-တောင်သာလမ်း တိုက်ခိုက်မှုမှာ စစ်တပ် ထံသွားပေါင်းတဲ့ တော်လှန်ရေးရဲဘော်ဟောင်း (၂) ဦးအပါ စကစအလောင်း (၄)လောင်းရ

BBM-မေ၂၆
သတင်း-မင်းသော်

မြင်းခြံမြို့နယ်အတွင်းက မြင်းခြံ-တောင်သာလမ်းပိုင်း တိုက်ခိုက်မှုအတွင်း စစ်တပ်နဲ့သွား ရောက်ပူးပေါင်းတဲ့ တော်လှန်ရေးရဲဘော်ဟောင်း (၂)ဦးအပါ စကစ အလောင်း (၄)လောင်းနဲ့ လက်နက်(၄)လက် သိမ်းဆည်းနိုင်ခဲ့တယ်လို့မြင်းခြံခရိုင်တပ်ရင်း(၁) ထံမှ သိရပါတယ်။

ပြီးခဲ့တဲ့ မေလ၂၄ ရက်နေ့ကတည်းက တော်လှန် ရေးအင်အားစုတွေက မြင်းခြံ-တောင်သာလမ်းမှာ စကစ အသွားအလာရှိတာကြောင့် ရှောင်တခင်စစ်ဆေးနေစဥ်မှာ စစ်ကောင်စီကား(၂)စီးရောက်လာကာ ပစ်ခတ်မှုဖြစ်ပြီး စကစ (၁၂)ဦးထိသေဆုံးတယ်လို့ ဆိုပါတယ်။

တော်လှန်ရေးအဖွဲ့ဝင်တချို့ဟာ ရှောင်တခင်စစ်ဆေးရာနေရာမတိုင်မှီ ကြိုတင်ကင်းပုန်းဝပ်ထားကြပြီး စစ်ကောင်စီကား(၂)စီးကလည်း ရှောင်တခင်စစ်ဆေးနေတာကိုတွေ့တာကြောင့် ကင်းပုန်းဝပ်ရာနေရာတည့်တည့်မှာပဲ ကားရပ်လိုက်တာကြောင့် ကင်းပုန်းဝပ်သူတော်လှန်ရေးအင်အားစုတွေက လက်ဦးမှုယူပစ်ခတ်နိုင်ခဲ့ကာ စကစ အလောင်း(၄)လောင်း၊လက်နက် (၄)လက်နဲ့ ကား(၁)စီးကို သိမ်းဆည်းနိုင်ခဲ့တယ်လို့ သိရပါတယ်။

တော်လှန်ရေးအဖွဲ့တွေရရှိလိုက်တဲ့ စကစဘက်မှ အလောင်း(၄)လောင်းအတွင်း စစ်ကောင်စီထံ အညံ့ခံသွားရောက်ပူးပေါင်းခဲ့တဲ့ သစ္စာဖောက် တော်လှန်ရေးရဲဘော်ဟောင်း(၂)ဦးပါဝင်တယ်လို့ မြင်းခြံခရိုင် အမှတ်(၁)တပ်ရင်းမှ ကိုဝမ်းတူးက BBM ကိုပြောပါတယ်။

"ကျွန်တော်တို့က သတင်းရလို့ စစ်တာကတစ်နေရာပေါ့ ကင်းပုန်းက ကြိုပြီး ချထားပီသား၊ ကားတွေက ကင်းပုန်းရှေ့ ပထမ တစ်စီးလာရပ်တာ၊ ကင်းပုန်းအဖွဲ့ က စပြီးတိုက်လိုက်တာ ပထမ ကားသမားမှန်ပြီး ပစ်ခတ်ရှင်းလင်းတာ၊အလောင်း၄ လောင်းအလက်လေးလက်ရတယ်၊ အလောင်း(၄) လောင်းထဲ စကစ ထံ အညံ့ခံသွားတဲ့ ရဲဘော်ဟောင်းအောင်ကြီးနဲ့ ချေဆေး ဆိုတဲ့ နှစ်ကောင်လည်းပါပါတယ်"

အဆိုပါ ကားအပြင် နောက်ကပါလာတဲ့ စကစ ကားကိုလည်း တော်လှန်ရေးအဖွဲ့တွေက လိုက်လံပစ်ခတ်ခဲ့ပေမဲ့လည်း ပြန်မောင်းပြေးသွားတာကြောင့် အ လောင်း၊လက်နက်တွေထပ်မံမရရှိပေမဲ့ စုစုပေါင်း စကစ အရာရှိ(၁)ဦးအပါ (၁၂)ဦးအထိ သေဆုံးမှုများတယ်လို့လည်း ဆိုပါတယ်။

အဆိုပါတိုက်ခိုက်မှုကို မြင်းခြံခရိုင် အမှတ်(၁) တပ်ရင်း၊အမှတ်(၂)တပ်ရင်း၊ အမှတ်(၇)တပ်ရင်း၊ မြင်းခြံမြို့နယ် ပကဖ(တိုက်နယ်၂)နဲ့ နွားထိုးကြီးမြို့နယ် ပကဖ တို့က ပူးပေါင်းဆောင်ရွက်ခဲ့ခြင်းဖြစ်တယ်လို့ သိရပါတယ်။

Photo- တိုက်ပွဲအတွင်းပုံ
https://www.facebook.com/share/p/1Tw9MRwGje/

သွေးသစ္စာသီချင်းဟာ စစ်ချီတေးမဟုတ်ဘူးလို့ စစ်တပ် CDM တွေဖွင့်ဟ

BBM - မေ ၂၇
သတင်း - ဧက

လူထုလှုပ်ရှားမှုတွေတိုင်း ပြည်သူရဲ့စိတ်ဓာတ်ကိုမြှင့်တင်ဖို့ရေးစပ်ထားတဲ့ သွေးသစ္စာသီချင်းကို စစ်တပ်ကခိုးယူကာ စစ်ချီတေးဆိုပြီး တွင်တွင်ပြောနေပေမယ့် ဒီသီချင်းဟာ စစ်ချီတေးမဟုတ်ဘူးလို့ စစ်တပ် CDM အသိုင်းအဝိုင်းက ဖွင့်ဟလိုက်ပါတယ်။

စစ်တပ်ထဲမှာ နှစ်ပေါင်း ၂၀ ကျော်ကြာတာဝန်ထမ်းဆောင်ခဲ့တဲ့ CDM အရာရှိတစ်ဦးက သူစစ်သားဘဝတစ်လျှောက်လုံးသင်ခဲ့တဲ့ရတဲ့စစ်ချီတေးတွေထဲမှာ ဒီသီတင်းမပါဘူးလို့ ဆိုပါတယ်။

စစ်တပ်က သွေးသစ္စာသီချင်းသံစဉ်ရော စာသားအများစုကိုခိုးယူကာ စားသားအနည်းငယ်ပြောင်းပြီး စစ်သားသွေးနီရှေ့သို့ချီ ဆိုတဲ့ သီချင်းခေါင်းစဉ်နဲ့ စစ်ချီတေးအဖြစ် စစ်တပ်ရော၊ စစ်တပ်လော်ဘီတွေကပုံဖော်နေကြတာဖြစ်ပါတယ်။

"ကျွန်တော်အကြမ်းဖက်စစ်တပ်ထဲမှာ အနှစ် ၂၀ နေခဲ့တယ်။ ပြီးရင်လဲ စစ်သင်တန်းတွေတော်တော်များများလည်းတက်ခဲ့ရတာတွေရှိတယ်။ စစ်သင်တန်းတွေ၊ တော်လှန်ရေးနေ့လိုနေ့တွေမှာ စစ်သီချင်းတွေကမဆိုမဖြစ်ဆိုကိုဆိုရတယ်။ စစ်သီချင်းတွေအားလုံးကိုလည်း အခြေခံစစ်ပညာသင်တန်းထဲက မရရအောင် လေ့ကျင့်ပြီးတော့သင်ပေးတယ်။ ဒီသီချင်းကိုတော့ လုံးဝမဆိုခဲ့ဖူးဘူး။ ဒီသီချင်းကစစ်ချီတေးလည်းမဟုတ်ဘူး။ စစ်သည်တေးလဲမဟုတ်ဘူး"လို့ CDM အရာရှိတစ်ဦးကပြောပါတယ်။

အဲ့ဒီ သွေးသစ္စာသီချင်းဟာ ၁၉၈၉ ခုနှစ်က ကရင်အမျိုးသားအစည်းအရုံး (KNU) ထိန်းချုပ်နယ်မြေထဲမှာ တေသံရှင်ထူးအိမ်သင်က ကိုယ်တိုင်ရေးသားဖန်တီးခဲ့တာဖြစ်ပြီး ၁၉၉၂ မှာတော့ အဆိုတော်မွန်းအောင်က ဘန်ကောက်မှာအသံသွင်းကာ တော်လှန်ရေးလှုံ့ဆော်တေးအဖြစ် သီဆိုခဲ့တာဖြစ်ပါတယ်။

မြန်မာနိုင်ငံရဲ့ စစ်အာဏာရှင်စနစ်ဆန့်ကျင်ရေး လူထုလှုပ်ရှားမှုတွေတိုင်းမှာ လူထုစိတ်ဓာတ်ကိုမြှင့်တင်ဖို့ ရေးဖွဲ့ထားတဲ့ သွေးသစ္စာသီချင်းကိုသီဆိုခဲ့ကြပြီး စစ်တပ်ဝါဒဖြန့်ချီရေးဌာနက စာသားတချို့ပြောင်းလဲကာ နာမည်ပြောင်းထုတ်လွှင့်ခဲ့တဲ့အပေါ် မူရင်းအဆိုတော်မွန်းအောင်ကလည်း သူ့ရဲ့လူမှုကွန်ရက်စာမျက်နှာကတစ်ဆင့် ပြင်းပြင်းထန်ထန်ဝေဖန်ကန့်ကွက်ထားပါတယ်။

အဲ့ဒီသီချင်းကို စစ်တပ်ရဲ့ ပြည်သူ့ဆက်ဆံရေးနဲ့ စိတ်ဓာတ်စစ်ဆင်ရေးညွှန်ကြားရေးမှူးရုံးရဲ့ အစီအစဉ်နဲ့ စာသားတချို့ပြောင်းလဲပြီး စစ်သားသွေးနီရှေ့သို့ချီ ဆိုတဲ့နာမည်နဲ့ စစ်တပ်ပိုင်မြဝတီရုပ်သံလိုင်းကနေ ထုတ်လွှင့်ခဲ့တာဖြစ်ပါတယ်။

"လက်ရှိအခြေအနေမှာ စစ်ရေးအရ စစ်တပ်ဘက်က အသာစီးရလာတာတွေရှိတယ်။ အဲ့ဒီလိုရှိလာချိန် တော်လှန်ရေးဘက်ကို ရည်ရွယ်ချက်ရှိရှိဦးနှိမ်ချင်လို့ အခုလိုအချိန်ကိုက်ပြုလုပ်တာဖြစ်နိုင်တယ်"လို့ CDM ဗိုလ်ကြီးတစ်ဦးက သုံးသပ်ပါတယ်။

သွေးသစ္စာသီချင်းကို စစ်တပ်ကအရှက်သိက္ခာမဲ့စွာခိုးယူပြောင်းလဲပြီး ထုတ်လွှင့်ခဲ့တဲ့အပေါ် လူမှုကွန်ရက်စာမျက်နှာသုံးစွဲသူအများစုကလည်း ပြင်းပြင်းထန်ထန်လှောင်ပြောင်ဝေဖန်နေကြပါတယ်။

လူမှုကွန်ရက်သုံးစွဲသူအမျိုးသားတစ်ဦးက "စစ်တပ်က သွေးသစ္စာသီချင်းကိုတော့ ခိုးဆိုနေပြီ။ နောက်ဆို ရောင်နီသီချင်းလည်း ဆိုပါတော့မယ်ဗျာ"ဆိုပြီးပြောဆိုနေကြသလို နောက်တစ်ဦးကလည်း "သွေးသစ္စာခွေးဆွဲခံရ၊ ကမ္ဘာမကြေလည်းအမြန်ရှောင်"ဆိုပြီး လှောင်ပြောင်ရေးသားထားကြပါတယ်။

အဆိုတော်မွန်းအောင်ရဲ့ပြောပြချက်အရ စစ်တပ်ဟာ အဆိုတော်ထူးအိမ်သင်ရဲ့အနုပညာလက်ရာကို ခိုးယူပြီး သူတို့စိတ်ကြိုက်စာသားတွေညှပ်ထည့် အမြတ်ထုတ်နေတာဖြစ်ပြီး လွန်ခဲ့တဲ့ ၁၀ နှစ်ကလည်း ကြံ့ဖွတ်ပါတီနဲ့ စစ်တပ်က ဝါဒဖြန့်ဖို့အတွက် ဒီသီချင်းကို စာသားပြင်ကာ လုပ်ကြံဖန်တီးဖူးခဲ့သေးတယ်လို့ သိရပါတယ်။

အဲ့ဒီတုန်းကလည်း စစ်တပ်က သမိုင်းကိုလိမ်ဖို့အတွက် ဓာတ်ပြားဟောင်းအတုတစ်ခုကိုဖန်တီးပြသဖူးပေမယ့် တော်လှန်ရေးအင်အားစုတွေဘက်က ရှင်းလင်းချေပခဲ့ပြီးဖြစ်သလို အတုအယောင်ဓာတ်ပြားတွေနဲ့ ဘယ်လောက်ပဲလိမ်ညာဖို့ကြိုးစားပါစေ သမိုင်းသက်သေရှိနေသမျှတော့ အတုကအစစ်ကိုမကျော်နိုင်ဘူးလို့ အဆိုတော်မွန်းအောင်က ရေးသားထားတာဖြစ်ပါတယ်။
https://www.facebook.com/share/p/1PjjcL39wR/

တောင်ကိုရီးယားက ၂၀၃၀ခုနှစ် အလွန်မှာ ပထမဆုံး နျူကလီးယားစွမ်းအင်သုံး ရေငုပ်သင်္ဘော အသုံးပြုဖို့ ရည်မှန်းထား

BBM - မေ ၂၇

တောင်ကိုရီးယားက မြောက်ကိုရီးယားရဲ့ ရေငုပ်သင်္ဘောသုံး နျူကလီးယားနဲ့ ဒုံးကျည် ခြိမ်းခြောက်မှုတွေကို ပြန်တုံ့ပြန်ဖို့အတွက် စီမံကိန်းအသစ်တစ်ခု ရေးဆွဲနေတယ်လို့ နိုင်ငံတကာသတင်းဌာနတွေမှာ ဖော်ပြထားပါတယ်။

အဲဒီစီမံကိန်းအရ ၂၀၃၀ ပြည့်လွန်နှစ်တွေရဲ့ အလယ်ပိုင်းလောက်မှာ ပထမဆုံး နျူကလီးယားစွမ်းအင်သုံး ရေငုပ်သင်္ဘောကို လွှတ်တင်ဖို့ ကြိုးစားသွားမယ်လို့ ကာကွယ်ရေးဝန်ကြီး အန်ဂယူဘတ် (Ahn Gyu-back) က မေလ ၂၆ ရက်နေ့မှာ ပြောကြားခဲ့ပါတယ်။

တောင်ကိုရီးယားဟာ နျူကလီးယားရေငုပ်သင်္ဘော ပိုင်ဆိုင်ထားတဲ့ ထိပ်တန်းနိုင်ငံတွေထဲ ဝင်နိုင်ဖို့ ကြိုးစားနေတာ ကြာပါပြီ။

ဒီခြေလှမ်းက အာရှရဲ့ လုံခြုံရေးအခြေအနေကို ပုံစံတစ်မျိုး ပြောင်းလဲသွားစေနိုင်သလို ရေအောက် လက်နက်ပြိုင်ဆိုင်မှုကိုလည်း ပိုပြီး ပြင်းထန်လာစေနိုင်ပါတယ်။

တောင်ကိုရီးယားသမ္မတ လီဂျေမြောင် (Lee Jae Myung) ကလည်း “ခိုင်မာတဲ့ တောင်ကိုရီးယား-အမေရိကန် မဟာမိတ်အပေါ် အခြေခံပြီး တည်ဆောက်မယ့် ဒီနျူကလီးယားရေငုပ်သင်္ဘောဟာ ကိုရီးယားကျွန်းဆွယ်ရဲ့ ငြိမ်းချမ်းရေးနဲ့ လုံခြုံရေးကို ကျွန်တော်တို့ ကိုယ်တိုင် တာဝန်ယူ စောင့်ရှောက်မယ်ဆိုတဲ့ ဆန္ဒကို ပြသလိုက်တာပဲ” လို့ နိုင်ငံရဲ့ အနာဂတ် ကာကွယ်ရေးဗျူဟာကို စိစစ်တဲ့ ကော်မတီမှာ ပြောခဲ့ပါသေးတယ်။

ကာကွယ်ရေးဝန်ကြီး အန်က တောင်ကိုရီးယားရဲ့ နျူကလီးယားရေငုပ်သင်္ဘော ပိုင်ဆိုင်ခွင့် ရရှိရေး အခြေခံအစီအစဉ်ကို ချပြရာမှာ ဒီရေငုပ်သင်္ဘောဟာ ယူရေနီယံအနိမ့်စား လောင်စာကိုပဲ သုံးမှာဖြစ်ပြီး တောင်ကိုရီးယားနိုင်ငံ ပြည်တွင်းမှာပဲ ဒီဇိုင်းဆွဲ တည်ဆောက်သွားမယ်လို့ ပြောပါတယ်။

အဲဒီအပြင် ဒီစီမံကိန်းဟာ တောင်ကိုရီးယားရဲ့ နျူကလီးယားနည်းပညာ၊ သင်္ဘောကျင်းလုပ်ငန်းနဲ့ ကာကွယ်ရေးစက်မှုလုပ်ငန်းတွေကို အခြေခံပြီး အကောင်အထည်ဖော်သွားမှာ ဖြစ်သလို နျူကလီးယားလက်နက်တွေကို လုံးဝဝယ်ယူတာ ဒါမှမဟုတ် တီထွင်ထုတ်လုပ်တာမျိုး မလုပ်ဘူးဆိုတဲ့ ဆိုးလ်ရဲ့ ကတိကဝတ်ကိုလည်း ဆက်ပြီး ထိန်းသိမ်းသွားမှာပါလို့ သူက ဆိုပါတယ်။

သမ္မတ လီက အစိုးရအဖွဲ့အစည်းအဝေးမှာ ဒီစီမံကိန်းရဲ့ အရေးပါပုံကို အလေးအနက်ထား ပြောကြားခဲ့တာကြောင့် တောင်ကိုရီးယားရဲ့ နာမည်ကြီး သင်္ဘောကျင်းကုမ္ပဏီတွေဖြစ်တဲ့ Hanwha Ocean ရဲ့ ရှယ်ယာဈေးက ၁၀.၂ ရာခိုင်နှုန်း၊ HD Hyundai Heavy ရဲ့ ရှယ်ယာဈေးက ၉.၆ ရာခိုင်နှုန်းစီ အသီးသီး တက်ပြီး ဈေးပိတ်သွားခဲ့ပါတယ်။

ကာကွယ်ရေးဝန်ကြီး အန်က နျူကလီးယားလက်နက်တွေ မပြန့်ပွားစေဖို့အတွက် လိုအပ်တဲ့ ယူရေနီယံအနိမ့်စား လောင်စာကို ရယူမယ့် လုပ်ငန်းစဉ်တစ်လျှောက်လုံးမှာ တောင်ကိုရီးယားအနေနဲ့ အမေရိကန်နဲ့ အနီးကပ် ပူးပေါင်းဆောင်ရွက်သွားမှာ ဖြစ်သလို၊ နိုင်ငံတကာ အနုမြူစွမ်းအင် အေဂျင်စီ (IAEA) နဲ့လည်း အတူတူ လက်တွဲလုပ်ဆောင်သွားမယ်လို့ ဆိုပါတယ်။

ဒါ့အပြင် ဒီစီမံကိန်းအရ ပထမဆုံး ရေငုပ်သင်္ဘောကို ၂၀၃၀ ပြည့်လွန်နှစ်တွေရဲ့ အလယ်ပိုင်းလောက်မှာ စတင်လွှတ်တင်နိုင်ဖို့ ရည်မှန်းထားတယ်လို့ ကာကွယ်ရေးဝန်ကြီး အန်က ဖြည့်စွက်ပြောကြားခဲ့ပါတယ်။

အစိုးရရဲ့ ပြောကြားချက်အရ နျူကလီးယားစွမ်းအင်သုံး မောင်းနှင်စနစ်ကြောင့် ဒီရေငုပ်သင်္ဘောအသစ်တွေဟာ အခုလောလောဆယ် တောင်ကိုရီးယားမှာ ရှိနေတဲ့ ရေငုပ်သင်္ဘောတွေထက် ရေအောက်မှာ အကြာကြီး ငုပ်လျှိုးနေနိုင်မှာ ဖြစ်သလို ပိုပြီးတော့လည်း လျင်လျင်မြန်မြန် သွားလာလှုပ်ရှားနိုင်မှာ ဖြစ်ပါတယ်။

Reference - The Straits Times
Photo - The Straits Times
Translation - Richard
https://www.facebook.com/share/p/1PFkUwEvnr/

အင်အား၃၀၀ပါ စစ်ကြောင်း ညောင်ဦးမှာအတိုက်ခံရပြီး စကစ(၁၇)ဦးသေ

BBM-မေ၂၇
သတင်း-မင်းသော်

အင်အား(၃၀၀)နဲ့ စစ်ကြောင်း(၃)ကြောင်းခွဲပြီးထိုးလာတဲ့ စကစ စစ်ကြောင်းတွေ ညောင်ဦးမြို့နယ်အတွင်း အတိုက်ခံရပြီး စကစ (၁၇)ဦးသေဆုံးခဲ့တယ်လို့ ညောင်ဦးမြို့နယ် ပြည်သူ့ကာကွယ်ရေးတပ်ဖွဲ့ထံမှ သိရပါတယ်။

ပြီးခဲ့တဲ့မေလ ၂၄ရက်နေ့က ညောင်ဦးမြို့နယ်၊ ငါ့သရောက်နယ်မြေအတွင်းကို အင်အား(၃၀၀)နဲ့စစ်ကြောင်းထိုးလာပြီး ပြည်သူပိုင်ပစ္စည်းတွေကို မတရားခိုးယူပြီး ရွာလုံးကျွတ်မီးရှို့နေတဲ့ စစ်တပ်ကို မနက်၁၀နာရီခွဲအကျော်မှာ စတင်တိုက်ခိုက်ခဲ့ခြင်းဖြစ်တယ်လို့ သိရပါတယ်။

တိုက်ပွဲကြာမြင့်ချိန် ၂နာရီခန့်ကြာမြင့်ပြီး တော်လှန်ရေးတပ်ဖွဲ့တွေရဲ့ အနီးကပ်တိုက်ခိုက်မှုကြောင့် စကစ ၁၇ဦးသေဆုံးပြီး ထိခိုက်ဒဏ်ရာရသူ (၅၀)ကျော်ရှိကာ ပြန်လည်ဆုတ်ခွါသွားတယ်လို့ သိရပါတယ်။

ဒဏ်ရာရသူ စကစ တွေကို ညောင်ဦးဆေးရုံနဲ့ ကျောက်ပန်းတောင်းဆေးရုံတွေထံ ခေါ်ဆောင်သွားသလို နီးစပ်ရာရွာတွေမှာ ဆေးမှီးတိုနဲ့ကုသမှုအချို့လည်း ပြုလုပ်ခဲ့ပြီး စကစ (၄)ဦးထပ်မံသေဆုံးခဲ့တယ်လို့ ဆိုပါတယ်။

တိုက်ပွဲအတွင်း စကစ ရဲ့မီးရှို့မှုကြောင့် ညောင်ဦးမြို့နယ်၊ ကူတောကျေးရွာမှ ပြည်သူနေအိမ်၃၀၀ ခန့် မီးလောင်ပျက်စီးခဲ့ရပြီး အရေးပေါ်အကူအညီတွေလည်း လိုအပ်တာကြောင့် ပြည်တွင်းပြည်ပ အလှူရှင်တွေအနေနဲ့ ကူညီရန် ညောင်ဦးမြို့နယ် ပြည်သူ့ကာကွယ်ရေးအဖွဲ့က တောင်းဆိုထားပါတယ်။

အဆိုပါတိုက်ခိုက်မှုကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ ညောင်ဦးခရိုင် တပ်ရင်း (၁)၊ တပ်ရင်း(၅)၊ ညောင်ဦးခရိုင်အထူးတိုက်ခိုက်ရေး၊Popa Production and Guerrila Force (PPGF)၊People Democratic Army(PDA)
၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နှင့်ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ပျောက်ကျားတပ်) တို့မှ ပူးပေါင်း တိုက်ခိုက်ခဲ့တယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)ကထုတ်
ပြန်ထားပါတယ်။

Video-ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး) Part 2
https://www.facebook.com/share/v/1H4sVuLRtZ/

စင်ကာပူ နိုင်ငံခြားရေးဝန်ကြီး မြောက်ကိုရီးယားကို ရောက်ရှိ

BBM - မေ ၂၇

စင်ကာပူနိုင်ငံခြားရေးဝန်ကြီး ဗီဗီယန် ဘာလာခရစ်ရှနန်ဟာ ပြီးခဲ့တဲ့ မေလ ၂၆ရက်နေ့က ပြုံယမ်းမြို့မှာ မြောက်ကိုရီးယား နိုင်ငံခြားရေးဝန်ကြီး ချွဲဆွန်းဟီးနဲ့ တွေ့ဆုံပြီး နှစ်နိုင်ငံကြား ဆက်ဆံရေး ပိုကောင်းလာအောင် လုပ်ဖို့ ဆွေးနွေးခဲ့ကြတယ်လို့ မြောက်ကိုရီးယားအစိုးရပိုင် KCNA သတင်းဌာနက မေလ ၂၇ရက်နေ့မှာ ဖော်ပြထားပါတယ်။

ဒါ့အပြင် ဝန်ကြီးနှစ်ယောက်ဟာ ဒေသတွင်းကိစ္စတွေနဲ့ ကမ္ဘာ့ရေးရာ ကိစ္စရပ်တွေကိုလည်း အမြင်ချင်းဖလှယ် ဆွေးနွေးခဲ့ကြတယ်လို့ KCNA က ဆိုပေမဲ့ အသေးစိတ်ကိုတော့ ရှင်းရှင်းလင်းလင်း ထည့်သွင်းပြောကြားသွားတာမျိုး မရှိပါဘူး။

ဝန်ကြီး ဘာလာခရစ်ရှနန်ဟာ မြောက်ကိုရီးယားခရီးစဉ်အပြီးမှာ တောင်ကိုရီးယားနိုင်ငံဆီ ဆက်ပြီး သွားဖို့ ရှိနေပါတယ်။

စင်ကာပူ သံတမန်တစ်ယောက်အနေနဲ့ ကိုရီးယားနှစ်နိုင်ငံစလုံးဆီကို အခုလို ဆက်တိုက်သွားရောက်တာမျိုးက တော်တော့်ကို ရှားပါးတဲ့ ခရီးစဉ်တစ်ခု ဖြစ်ပါတယ်။

ပြီးခဲ့တဲ့ ၂၀၁၈ ခုနှစ်တုန်းက အမေရိကန်နဲ့ မြောက်ကိုရီးယား ခေါင်းဆောင်နှစ်ယောက်ရဲ့ ပထမဆုံးအကြိမ် သမိုင်းဝင် ထိပ်သီးအစည်းအဝေးကို စင်ကာပူက အိမ်ရှင်အဖြစ် လက်ခံကျင်းပပေးခဲ့စဉ်ကတည်းက ဝန်ကြီး ဘာလာခရစ်ရှနန်ဟာ စင်ကာပူအစိုးရအဖွဲ့ရဲ့ ဝန်ကြီးတစ်ယောက် ဖြစ်နေခဲ့တာပါ။

အဲ့ဒီ ၂၀၁၈ ဇွန်လတုန်းက အမေရိကန်သမ္မတ ဒေါ်နယ်ထရမ့်နဲ့ မြောက်ကိုရီးယားခေါင်းဆောင် ကင်ဂျုံအွန်တို့ဟာ ငြိမ်းချမ်းတဲ့ ဆက်ဆံရေးအသစ်တွေ စတင်ဖို့နဲ့ မြောက်ကိုရီးယားရဲ့ နျူကလီးယားအစီအစဉ်ကို ရပ်တန့်ဖို့ ပူးတွဲကြေညာချက်တစ်ခုကို လက်မှတ်ရေးထိုး သဘောတူခဲ့ကြပါတယ်။

အခုလည်း ထရမ့်က ကင်ဂျုံအွန်နဲ့ တွေ့ဆုံဆွေးနွေးဖို့ ထပ်ပြီး ဆန္ဒရှိနေသလို သူတို့နှစ်ယောက်ကြား ဆက်ဆံရေး ကောင်းမွန်ပါတယ်လို့ ပြောဆိုထားပေမဲ့ မြောက်ကိုရီးယားဘက်ကတော့ ဒီကမ်းလှမ်းချက်အပေါ် တိုက်ရိုက်တစ်စုံတစ်ရာ ပြန်လည်တုံ့ပြန်တာမျိုး မရှိသေးပါဘူး။

Reference - Reuters
Photo - Reuters
Translation - Richard
https://www.facebook.com/share/p/18f8RkwJwP/

မြိုင်မှာ ရွာတွေမီးလိုက်ရှို့နေတဲ့ စကစ စစ် ကြောင်း မိုင်းဆွဲမှု စကစ(၁၅)ယောက်သေနိုင်

BBM - မေလ ၂၇
သတင်း - ကိုဘုဏ်း

မြိုင်မြို့နယ်အတွင်း ကျေးရွာများကို မီးရှို့နေတဲ့ စစ်ကောင်စီစစ်ကြောင်းကို တော်လှန်ရေးတပ်ဖွဲ့တွေက မိုင်းဆွဲတိုက်ခိုက်ခဲ့ရာ စကစ (၁၅)ယောက် သေဆုံးနိုင်တယ်လို့ မြိုင်မြို့နယ် ပကဖ ကထုတ်ပြန်ကြေငြာထားပါတယ်။

ပြီးခဲ့တဲ့ မေလ၂၆ရက်နေ့က လင်းကတောစခန်းကို အခြေပြုပြီး အနီးကရွာတွေကို မီးရှို့နေတဲ့ စကစ စစ်ကြောင်းကို ဒေသတွင်းရှိ တော်လှန်ရေးအင်အားစုများ ပူးပေါင်းပြီး လိုက်လံတိုက်ခိုက် ရာ လင်းကတောကျေးရွာ အဝင်မှာမိုင်းဆွဲ
တိုက်ခိုက်ခဲ့ပြီး အနည်းဆုံး (၁၅)ယောက် သေဆုံးနိုင်ပြီး အများအပြား ဒဏ်ရာရနိုင် ကြောင်း သိရတယ်လို့ သိရပါတယ်။

တော်လှန်ရေးတပ်ဖွဲ့များရဲ့ တိုက်ခိုက်မှုကြောင့် လက်ရှိအချိန်တွင် ဒေသတွင်းနဲ့ထိစပ်မြို့နယ်များအတွင်းမှာ စစ်ရေးများ ပြင်းထန်လာနိုင်တာကြောင့် ရဲဘော်များနဲ့ပြည်သူလူထုများ အနေဖြင့် စစ်ရေးသတိဖြင့် သွားလာလှုပ်ရှားနေထိုင်ကြရန် မြိုင်မြို့နယ် ပကဖ က ထုတ်ပြန်ကြေငြာထားပါတယ်။

Video-မြိုင်မြို့နယ် ပကဖ
https://www.facebook.com/share/r/1JL4J334HC/

ရန်ကုန်မှာ ဒုစရိုက်မှုနဲ့ ခိုးဆိုးလုယက်သူ ပေါများနေတာကြောင့် ပြည်သူတွေသတိနဲ့နေထိုင်နေရ

BBM-မေ၂၈
သတင်း-မင်းသော်

ရန်ကုန်မြို့မှာ ဒုစရိုက်မှုတွေနဲ့ ခိုးဆိုလုယက်သူတွေ ပေါများလာတာကြောင့် မြို့နေပြည်သူလူထုတွေအနေနဲ့ သတိထားပြီး နေထိုင်သွားလာနေရတယ်လို့ ရန်သူနေပြည်သူလူထုထံမှ သိရပါတယ်။

အာဏာသိမ်းကာလ ၅နှစ်ကျော်လာတာနဲ့အမျှ နိုင်ငံရေးမကောင်းတာကို အကြောင်းပြပြီး ရန်ကုန်လိုမြို့ကြီးတွေမှာ ဒုစရိုက်မှုတွေပိုမိုများပြားလာနေပြီး နည်းမျိုးစုံနဲ့ လုယက်မှုတွေ ဖြစ်ပွါးနေတယ်လို့ ဒေသခံအများစုက ဆိုကြပါတယ်။

ဒီလိုဒုစရိုက်မှုတွေများပြားနေပေမဲ့လည်း ရန်
ကုန်နေ ပြည်သူအများစုအနေနဲ့က ရဲတပ်ဖွဲ့ဝင်တွေနဲ့ အုပ်ချုပ်ရေးတာဝန်ရှိသူတွေကို တိုင်တန်းတာမျိုးတွေထက် ကိုယ့်ဟာကိုယ်သာ သတိထားနေထိုင်ပြီး ပြည်သူအချင်းချင်း ကူညီဖြေရှင်းနေရတာမျိုးတွေသာ ပြုလုပ်နေရတယ်လို့ မကြာသေးခင်ကမှ လုယက်မှုကြုံတွေ့ခံစားခဲ့ရသူ အင်းစိန်နေ ပြည်သူတစ်ဦးက BBM ကိုပြောပါတယ်။

"လုယက်ခံရလို့ပဲဖြစ်ဖြစ် အနုကြမ်းစီးခံရတာမျိုးဖြစ်ဖြစ် ရဲတိုင်ရင်လည်း ရဲဖိုးက နောက်ထပ် ၄၊၅သိန်း ထပ်ကုန်ရင်ကုန်တာလေ အဲ့တော့ တကူးတကကြီးတိုင်မနေကြဘူး၊ ပြီးတော့ တိုင်
ရင်ကော သူတို့က ဘာလိုက်လုပ်ပေးမှာမို့လဲ၊ ကိုယ့်ဟာကိုယ်ပဲဖြေရှင်းလိုက်ကြတော့တယ်၊ လုခံရလို့ ပါသွားရင်လည်း ငြိမ်ခံရတာပဲပေါ့"

ဒါ့အပြင် အများသုံးဘတ်စ်ကားယာဥ်လိုင်းတွေမှာလည်း အခုနောက်ပိုင်း ဒုစရိုက်မှုတွေ၊ ခါးပိုက်နှိုက်လုယက်မှုတွေ အများအပြား ဖြစ်ပွါးနေပြီး ဒီလိုအမှုတွေကိုလည်း ပြည်သူအချင်းချင်းကသာ အများဆုံး ကူညီဆောင်ရွက်နေရတယ်လို့လည်း ဆိုကြပါတယ်။

အရင်ကတည်းက ရန်ကုန်မြို့မှာ လုယက်မှုတွေ၊ ခါးပိုက်နှိုက်မှုတွေရှိတယ်ဆိုပေမဲ့ အခုနောက်ပိုင်းမှာက ပိုမိုများပြားစွာ အုပ်စုလိုက်ဖြင့် လုယက်တာတွေ၊ ခါးပိုက်နှိုက်တာတွေ ကြုံလာရတယ်လို့ နေ့စဥ်ဘတ်စ်ကားစီးနေရတဲ့ သင်တန်းသူတစ်ဦးကလည်း ပြောပါတယ်။

"ခုနောက်ပိုင်းက ဘတ်စ်ကားပေါ်ဆိုလည်း အုပ်လိုက်ကြီးတွေ၊ ခါးပိုက်နှိုက်တွေက သိသာတယ်၊ တစ်ခါမှလည်း ခါးပိုက်နှိုက်တွေကိုရဲဖမ်းသွားတယ်ဆိုတာလည်းမကြားဖူးဘူး၊ ကိုယ့်ဟာကိုယ် ကာကွယ်နေရတယ်"

ရန်ကုန်တိုင်းအတွင်းက ခါးပိုက်နှိုက်မှုတွေနဲ့ ပတ်သတ်ပြီး စကစ လက်အောက်ခံရဲတပ်ဖွဲ့က ၅လ ကျော်အတွင်း ခါးပိုက်နှိုက်စုစုပေါင်း ၁၇၀ ကျော်ဖမ်းမိထားတယ်လို့ ဆိုထားပေမဲ့ မြေပြင်မှာတော့ နေ့စဥ် လုယက်မှုတွေ ဖြစ်ပွါးနေဆဲပဲလို့ သိရပါတယ်။

Photo-ပုံဟောင်း
https://www.facebook.com/share/p/1D42nQXtey/

ဘန်ဘောက်မှာ (၆)နှစ်အရွယ်ကလေးတွေကို ခိုင်းစားပြီးနှိပ်စက်တဲ့ မြန်မာ(၃)ယောက် အဖမ်းခံရ

BBM-မေ၂၈
သတင်း-မင်းသော်

ထိုင်းနိုင်ငံ၊ ဘန်ကောက်မြို့မှာ အသက် ၆ နှစ်
အရွယ် ကလေးတွေကို ခိုင်းစားပြီး ညှင်းပန်းနှိပ်စက်လေ့ရှိတဲ့ မြန်မာနိုင်ငံအမျိုးသမီး ၂ ဦးနဲ့အမျိုးသား ၁ ဦးတို့ အဖမ်းခံရတယ်လို့ ဘန်ကောက်ပိုစ်သတင်း အရ သိရပါတယ်။

မေလ(၂၇)ရက်(မနေ့က) ဘန်ကောက်မြို့တော် ရဲတပ်ဖွဲ့အကြီးအကဲ ရဲမှူးချုပ် စယမ် ဘွန်ဆွန် (Sayam Boonsom)ရဲ့ ညွှန်ကြားမှုနဲ့ကလေး သူငယ်နှင့် အမျိုးသမီးကာကွယ်ရေးဌာနခွဲမှ ရဲတပ်ဖွဲ့ဝင်များက ဘန်ကောက်မြို့၊ စွမ်းလွမ် (Suan Luang) ခရိုင်ရှိ နေအိမ်တစ်အိမ်မှာ ညှင်း ပန်းနှိပ်စက်ခံထားရမှုကြောင့် လက်မောင်း ရိုးကျိုးနေတဲ့ ကလေးငယ်တစ်ဦးကို ကယ်ဆယ်
နိုင်ခဲ့တယ်လို့ သိရပါတယ်။

အဆိုပါနေအိမ်အတွင်း နောက်ထပ် ကလေးငယ် ၅ ဦးကိုလည်း ရဲတပ်ဖွဲ့က ကယ်ဆယ်နိုင်ခဲ့ပြီး ပြစ်မှုကျူးလွန်သူတွေဟာ ကလေးငယ်တွေကို နေ့စဉ် နေ့ခင်း၃ နာရီကနေ နောက်နေ့မနက် ၃ နာရီအထိ မြို့တော်ရှိ စားသောက်ဆိုင်တွေ၊ ဖျော်ဖြေရေးဝန်ဆောင်မှုလုပ်ငန်းနေရာတွေမှာ ပန်းများနဲ့ မုန့်များလိုက်လံရောင်းချခိုင်းပြီး သတ်မှတ်တဲ့ရောင်းအားပမာဏ မပြည့်မီပါက ရိုက်နှက်ခြင်း၊အစာငတ်ထားခြင်းတို့ ပြုလုပ်တယ်လို့ ရဲတပ်ဖွဲ့ကဆိုပါတယ်။

အဆိုပါ ကလေးငယ်တွေဟာ မြန်မာနိုင်ငံမှတိုင်းရင်းသားလူနည်းစုအုပ်စုဝင်များဖြစ်ကြပြီး ဖမ်းဆီးထားသူတွေကို ထိရောက်စွာအရေးယူနိုင်ဖို့ ဆက်လက်စစ်မေးနေတယ်လို့ ဆိုပါတယ်။

Photo-ဘန်ကောက်ပိုစ်
https://www.facebook.com/share/p/1CycmY733u/

မြောက်ကိုရီးယား အမျိုးသမီးဘောလုံးအသင်း ခမ်းနားစွာ ကြိုဆိုခံရ

BBM-မေ၂၈

မကြာသေးခင်ကမှ ကျင်းပခဲ့တဲ့ ဒေသတွင်းဘောလုံးပြိုင်ပွဲမှာ ဗိုလ်စွဲခဲ့တဲ့ မြောက်ကိုရီးယားရဲ့ နိုင်ဂိုယန် (Naegohyang) အမျိုးသမီးဘောလုံးအသင်းဟာ ပြုံယမ်းမြို့ကို ပြန်လည်ရောက်ရှိလာချိန်မှာ သောင်းသောင်းဖြဖြ ကြိုဆိုခြင်း ခံခဲ့ရတယ်လို့ မြောက်ကိုရီးယား နိုင်ငံပိုင်မီဒီယာက မေလ ၂၇မှာ ဖော်ပြခဲ့ပါတယ်။

မေလ ၂၆ရက်နေ့က လေဆိပ်ကို အသင်းသားတွေ ဆိုက်ရောက်လာချိန်မှာ အစိုးရနဲ့ အားကစားဌာနက တာဝန်ရှိသူတွေအပြင် မိသားစုဝင်တွေကပါ လာရောက်ကြိုဆိုခဲ့ကြတာပါ။

အဲဒီနောက် သူတို့စီးလာတဲ့ ဘတ်စ်ကားဟာ ပြုံယမ်းမြို့လမ်းမတွေအတိုင်း မောင်းနှင်သွားခဲ့ပြီး လမ်းဘေးတစ်လျှောက်မှာလည်း နိုင်ငံတော်အလံတွေ ဝှေ့ယမ်းပြီး အော်ဟစ်အားပေးနေတဲ့ မြို့ခံပြည်သူတွေနဲ့ ပြည့်နှက်နေခဲ့တယ်လို့ ကိုရီးယားဗဟိုသတင်းအေဂျင်စီ (KCNA) က ဆိုပါတယ်။

မြောက်ကိုရီးယား အာဏာရအလုပ်သမားပါတီရဲ့ တရားဝင်သတင်းစာဖြစ်တဲ့ 'ရိုဒေါင်ဆင်မွန်' (Rodong Sinmun) မှာလည်း ပန်းစည်းတွေ ကိုင်ဆောင်ပြီး ပြုံးရွှင်နေတဲ့ ကစားသမားပြန်လည်ရောက်ရှိလာပုံကို ဓာတ်ပုံနှင့်တကွ ဖော်ပြခဲ့ပါတယ်။

မြောက်ကိုရီးယား အစိုးရပိုင်မီဒီယာတွေက သူတို့အသင်း အာရှဘောလုံးအဖွဲ့ချုပ် (AFC) အမျိုးသမီး ချန်ပီယံလိဂ်ပြိုင်ပွဲမှာ အနိုင်ရခဲ့တာကို အမွမ်းတင် ချီးကျူးခဲ့ကြပေမဲ့ ပြိုင်ပွဲကျင်းပခဲ့တဲ့နေရာကိုတော့ လုံးဝထည့်သွင်းပြောကြားခြင်း မရှိခဲ့ပါဘူး။ အမှန်တော့ ဒီပြိုင်ပွဲရဲ့ ဆီမီးဖိုင်နယ်နဲ့ ဖိုင်နယ်ပွဲစဉ်တွေကို ပြီးခဲ့တဲ့အပတ်က တောင်ကိုရီးယားနိုင်ငံ ဆိုးလ်မြို့ရဲ့တောင်ဘက် ၃၀ ကီလိုမီတာအကွာမှာရှိတဲ့ ဆူဝမ် (Suwon) မြို့မှာ ကျင်းပခဲ့တာ ဖြစ်ပါတယ်။

လက်ရှိမှာ တောင်-မြောက်ကိုရီးယား နှစ်နိုင်ငံကြား ဆက်ဆံရေး တင်းမာနေတာကြောင့် ကစားသမားတွေဟာ မေလ-၂၄ရက်က တောင်ကိုရီးယားကနေတစ်ဆင့် တရုတ်နိုင်ငံကို ထွက်ခွာခဲ့ပြီးမှ ပြုံယမ်းကို ပြန်လာခဲ့ကြတာပါ။ တောင်ကိုရီးယားမှာ ရှိနေစဉ်အတွင်းမှာတော့ ကစားသမားတွေဟာ ကြိုတင်ဇာတ်တိုက်ထားတဲ့အတိုင်း ခံစားချက်မရှိတဲ့ မျက်နှာပေးနဲ့ ဂရုတစိုက်နဲ့ထိန်းထိန်းသိမ်းသိမ်း နေထိုင်ခဲ့ကြတာကို တွေ့ရပါတယ်။

ဒါ့အပြင် မြောက်ကိုရီးယားအသင်းဟာ ဒီလအစောပိုင်းက ကျင်းပခဲ့တဲ့ AFC U-17 အမျိုးသမီးအာရှဖလားပြိုင်ပွဲမှာလည်း ဗိုလ်စွဲခဲ့ပြီး ၅ ကြိမ်မြောက် ချန်ပီယံဆုကို စံချိန်တင် သိမ်းပိုက်နိုင်ခဲ့ပါသေးတယ်။ ဒါဟာ တခြားဘယ်နိုင်ငံထက်မဆို ဆုဖလားအများဆုံး ရရှိထားတဲ့ စံချိန်လည်း ဖြစ်ပါတယ်။

News-The Korean Times
Photos-The Korean Times
Translation -Alice
https://www.facebook.com/share/p/18wT9zAmGx/

ဒရုန်းနဲ့ကျည်ကာတွေအပါ ထောက်ပံ့ပစ္စည်းတွေကို Dawna Column တပ်ဖွဲ့ရရှိ

BBM - မေလ ၂၈
သတင်း - ကိုဘုဏ်း

Victory Spear ဒေါနအင်အား Campaign မှတဆင့် ဒရုန်းနဲ့ကျည်ကာတွေအပါ ထောက်ပံ့ပစ္စည်းများ ကို တပ်ဖွဲ့ ဝင်များကိုပေးအပ်ခဲ့တယ်လို့ ဒေါနတပ်ရင်း P -9902 က ထုတ်ပြန်ကြေငြာထားပါတယ်။

Campaign မှာပြည်သူများရဲ့ ပါဝင်ကူညီမှု၊ ယုံကြည်အားပေးမှုများကြောင့် P - 9902 တပ်ရင်းထံ ကျည်ကာပြား (31)ခု၊ ကျည်ကာဦးထုတ် (37) လုံး၊ကျည်ကာ Vest (25) ခု ၊Drone (1) စီး၊ဆက်သွယ်ရေးစက်တိုင် (16)ချောင်းနှင့် အပိုပစ္စည်းများအောင်မြင်စွာ ရောက်ရှိလာခဲ့ပြီး ယခုအခါ ရဲဘော်များထံ တပ်ဆင်ပေးအပ်နေပြီ ဖြစ်တယ်လို့သိရပါတယ်။

Campaign တွင် ပါဝင်ကူညီပေးကြသော အလှူရှင်ပြည်သူများ၊ စီစဉ်ဆောင်ရွက်ပေးသူများနှင့် အားပေးဝန်းရံပေးနေသူများအားလုံးကို အထူးကျေးဇူးတင်ရှိကြောင်းကိုလည်းဖော်ပြထားပါတယ်။

ပြည်သူများ၏ ထောက်ပံ့မှုတိုင်းသည်ရှေ့တန်းတွင် တိုက်ပွဲဝင်နေသော ရဲဘော်များအတွက်အသက်ကယ်ဒိုင်းတစ်ချပ်၊ အားအင်တစ်ခု ဖြစ်တယ်လို့ အဆိုပါ ဒေါနတပ်ရင်း P - 9902 တပ်ရင်းက ထုတ်ပြန်ကြေငြာထားပါတယ်။

Photo-Dawna Column
https://www.facebook.com/share/p/1C3MUV5hzE/

စစ်ကောင်စီတပ်သား (၁)ဦးကို လက်နက်ခဲယမ်းများနဲ့ အတူ ငါ့သရောက်မြို့မှာ အရှင်ဖမ်းမိ

BBM - မေလ ၂၈
သတင်း -ကိုဘုဏ်း

မန္တလေးတိုင်းဒေသကြီး၊ ညောင်ဦးမြို့နယ်၊ ငါ့သရောက်မြို့မှာ စစ်ကောင်စီတပ်သား(၁)ဦးကို လက်နက်ခဲယမ်းများနဲ့ အတူအရှင်ဖမ်းမိခဲ့တယ်လို့Earthquake People’s Defence Force က မေလ (၂၈) ရက်နေ့(ဒီနေ့) မှာထုတ်ပြန်ထားပါတယ်။

ပြီခဲ့တဲ့မေလ (၂၆) ရက်နေ့က စစ်ကောင်စီတပ်သား မျိုးထက်ဇော်ကို MA (1) သေနတ် (၁)လတ်၊ ကျည် (၁၀၀)၊ ကျည်အိမ် (၄)ခု၊ (၆၀) မမ (၁)ခုတို့နဲ့ အတူ ဖမ်းဆီးရရှိခဲ့တယ်လို့သိရပါတယ်။

အဆိုပါ ဖမ်းဆီးမှုကို Earthquake People's Defense Force၊ ပခုက္ကူခရိုင်တပ်ရင်း (၈)၊ ပခုက္ကူခရိုင် Localတပ်ရင်း(PDLB)၊ 21Bagan-People Defense Force ၊ Bagan Garuda Force ၊ ဒေါင်းရင်သွေးပျောက်ကျားတပ်ဖွဲ့-DYTနဲ့ Badassess Burma Force တို့မှပူးပေါင်းလုပ်ဆောင်ခဲ့ခြင်းဖြစ်တယ်လို့ Earthquake People's Defense Forceမှ ထုတ်ပြန်ထားပါတယ်။

Photo- Earthquake People's Defense Force
https://www.facebook.com/share/p/1NDkYrLnsg/

မြောက်ကိုရီးယား အနေနဲ့ တံခါးဖွင့်သင့်ပြီဖြစ်ကြောင်း စင်ကာပူ အကြံပြု

BBM - မေ ၂၉

စင်ကာပူ နိုင်ငံခြားရေးဝန်ကြီး ဗီဗီယန် ဘာလာခရစ်ရှနန် (Vivian Balakrishnan) က မြောက်ကိုရီးယားအနေနဲ့ ဒေသတွင်းနိုင်ငံတွေနဲ့ အပြုသဘောဆောင်တဲ့ ဆက်ဆံရေးမျိုး ရှိစေချင်တယ်လို့ ပြောကြားခဲ့ပါတယ်။

ဒါ့အပြင် စကားပြောလို့ရမယ့် လမ်းကြောင်းတွေကိုလည်း ဆက်ဖွင့်ထားစေချင်တယ်လို့ တိုက်တွန်းလိုက်ပါတယ်။

အာဆီယံဒေသတွင်းဖိုရမ် (ARF) ကို တက်ရောက်ဖို့ကိုလည်း ဆက်လက် တိုက်တွန်းခဲ့ပါတယ်။

အခုလို ကမ္ဘာကြီးမှာ အခြေအနေတွေ မရေမရာ ဖြစ်နေတဲ့အချိန်မှာ ဒီလို အဆက်အသွယ်ရှိနေဖို့က အရေးကြီးတယ်လို့ သူက အလေးအနက် ပြောသွားခဲ့ပါတယ်။

ဒေါက်တာ ဘာလာခရစ်ရှနန်ဟာ မြောက်ကိုရီးယား နိုင်ငံခြားရေးဝန်ကြီး မစ္စ ချွဲဆွန်းဟီး (Choe Son Hui) ရဲ့ ဖိတ်ကြားချက်အရ မေလ ၂၆ ရက်နဲ့ ၂၇ ရက်တွေမှာ မြောက်ကိုရီးယားကို ရောက်နေခဲ့တာပါ။

ဒါက တရုတ်နဲ့ တောင်ကိုရီးယားနိုင်ငံတွေပါဝင်တဲ့ သူ့ရဲ့ အရှေ့မြောက်အာရှ ခရီးစဉ်ရဲ့ တစ်စိတ်တစ်ပိုင်းလည်း ဖြစ်ပါတယ်။

မေလ ၂၇ ရက်နေ့မှာ ဒေါက်တာ ဘာလာခရစ်ရှနန်က ဒေသတွင်း လုံခြုံရေးနဲ့ နိုင်ငံတကာ ဖြစ်ပျက်ပြောင်းလဲမှုတွေအပေါ် အမြင်ချင်း ပွင့်ပွင့်လင်းလင်း နှီးနှောဖလှယ်ခွင့်ရခဲ့တယ်လို့ သူ့ရဲ့ Facebook စာမျက်နှာမှာ ရေးသားခဲ့ပါတယ်။

အခုလို ဒေသတွင်းမှာ စိန်ခေါ်မှုတွေ များနေတဲ့အချိန် ငြိမ်းချမ်းရေးနဲ့ တည်ငြိမ်ရေးကို ထိန်းသိမ်းဖို့အတွက် ကျွန်တော်တို့ နိုင်ငံတွေဘက်က တတ်နိုင်တဲ့ဘက်ကနေ ဆက်ပြီး ဝိုင်းဝန်းလုပ်ဆောင်သွားကြဖို့ မျှော်လင့်တယ် လို့ မစ္စ ချွဲဆွန်းဟီးနဲ့ ဆွေးနွေးခဲ့တာတွေကို ရေးသား ဖော်ပြထားပါတယ်။

စင်ကာပူ နိုင်ငံခြားရေးဝန်ကြီးဌာန (MFA) ရဲ့ ထုတ်ပြန်ချက်အရ ဒေါက်တာ ဘာလာခရစ်ရှနန်က မစ္စ ချွဲဆွန်းဟီးကို နိုင်ငံရေးနဲ့ လုံခြုံရေးဆိုင်ရာ ဆွေးနွေးပွဲဖြစ်တဲ့ အာဆီယံဒေသတွင်းဖိုရမ် (ARF) ကို တက်ရောက်ဖို့ ဖိတ်ကြားခဲ့တယ်လို့ သိရပါတယ်။

ဒါနဲ့ပတ်သက်လို့ ပြောရရင် မြောက်ကိုရီးယားဟာ ၂၀၀၀ ပြည့်နှစ်ကတည်းက အဆိုပါ ဖိုရမ်ရဲ့ အဖွဲ့ဝင် ဖြစ်ခဲ့တာပါ။

ဒေါက်တာ ဘာလာခရစ်ရှနန်က “ကျွန်တော်တို့ နှစ်နိုင်ငံကြား ဆက်ဆံရေးက ချစ်ကြည်ရင်းနှီးမှု ရှိပါတယ်၊ ဆယ်စုနှစ်တွေနဲ့ချီပြီး အပြန်အလှန် လေးစားမှု၊ အစဉ်တစိုက် ထိတွေ့ဆက်ဆံမှုတွေအပေါ်မှာ တည်ဆောက်ထားတာ ဖြစ်ပါတယ်” လို့လည်း ဆက်ပြီး ရေးသားထားပါသေးတယ်။

စင်ကာပူ နိုင်ငံခြားရေးဝန်ကြီးဌာန (MFA) ရဲ့ ပြောပြချက်အရ ဝန်ကြီးနှစ်ယောက်စလုံးက စင်ကာပူနဲ့ မြောက်ကိုရီးယားကြားမှာ ရှိနေတဲ့ “ရေရှည်တည်တံ့ခိုင်မြဲပြီး ရင်းနှီးချစ်ကြည်တဲ့ ဆက်ဆံရေး”ကို ထပ်လောင်း အတည်ပြုခဲ့ကြတယ်လို့ သိရပါတယ်။

ဒါ့အပြင် ဒေါက်တာ ဘာလာခရစ်ရှနန်ကို မစ္စ ချွဲဆွန်းဟီးက ဂုဏ်ပြုညစာစားပွဲနဲ့လည်း တည်ခင်းဧည့်ခံခဲ့ပါသေးတယ်။

ဒီခရီးစဉ်က စင်ကာပူနဲ့ မြောက်ကိုရီးယားတို့ရဲ့ နှစ်နိုင်ငံ သံတမန်ဆက်ဆံရေး ၅၀ ပြည့်မြောက်ခဲ့တဲ့ ပြီးခဲ့တဲ့ ၂၀၂၅ ခုနှစ်အလွန် ကိုရီးယားကျွန်းဆွယ်အခြေအနေတွေ ပိုပြီး တင်းမာလှုပ်ခတ်နေတဲ့ အချိန်မျိုးမှာ ပေါ်ပေါက်လာတာပါ။

မေလ ၂၇ ရက်နေ့တုန်းကတင် ပြံုယမ်း (မြောက်ကိုရီးယား) ဘက်က ဒုံးကျည်လက်နက်စနစ်အသစ်တွေကို စမ်းသပ်ပစ်ခတ်ခဲ့တယ်လို့ ထုတ်ပြောခဲ့တာကြောင့် ဒေသတွင်း လုံခြုံရေးနဲ့ တည်ငြိမ်ရေးအတွက် စိုးရိမ်စရာတွေ ထပ်ပြီး ဖြစ်လာခဲ့ရပါတယ်။

ဒါက ၂၀၁၈ ခုနှစ်နောက်ပိုင်း ဒေါက်တာ ဘာလာခရစ်ရှနန်အတွက်တော့ လူသူမနီးတဲ့ ဒီနိုင်ငံကို ဒုတိယအကြိမ်မြောက် သွားရောက်တဲ့ ခရီးစဉ်ဖြစ်ပါတယ်။

အဲ့ဒီ ၂၀၁၈ တုန်းကတော့ ဇွန်လထဲမှာ စင်ကာပူက အိမ်ရှင်အဖြစ် လက်ခံကျင်းပခဲ့တဲ့ အမေရိကန်သမ္မတ ဒေါ်နယ်ထရမ့်နဲ့ မြောက်ကိုရီးယားခေါင်းဆောင် ကင်ဂျုံအန်းတို့ရဲ့ ထိပ်သီးအစည်းအဝေးကြီး မတိုင်ခင် ပျုံယမ်းကို သူ သွားရောက်ခဲ့တာပါ။

ဒေါက်တာ ဘာလာခရစ်ရှနန်က နောက်ဆုံးအကြိမ် လာခဲ့ပြီးတဲ့နောက်ပိုင်း ‘ပြုံယမ်းကို တစ်ခေါက် ပြန်ရောက်ရတာ ဝမ်းသာပါတယ်’ လို့ ရေးသားထားပြီး မြောက်ကိုရီးယား နိုင်ငံခြားရေးဝန်ကြီးကိုလည်း အာဆီယံဒေသတွင်းဖိုရမ် (ARF) ကို တက်ရောက်ဖို့ ထပ်ပြီး တိုက်တွန်းခဲ့တယ်လို့ ဖော်ပြထားပါတယ်။

သူက ဆက်ပြီးတော့ “အခုလို စကားပြောဆို ဆွေးနွေးမှုတွေ၊ သံတမန်ရေးရာ နည်းလမ်းတွေက ဘယ်တုန်းကထက်မဆို ပိုပြီး လိုအပ်နေတဲ့ အချိန်မျိုးမှာ မြောက်ကိုရီးယား (DPRK) ဟာ အာဆီယံဒေသတွင်းဖိုရမ် (ARF) ရဲ့ အရေးကြီးတဲ့ အဖွဲ့ဝင်တစ်ဦးအဖြစ် ဆက်ရှိနေပါတယ်” လို့လည်း ရေးသားထားပါသေးတယ်။

ဒါက သူက မြောက်ကိုရီးယားကို သူ့ရဲ့ တရားဝင်နိုင်ငံအမည်ဖြစ်တဲ့ ‘ကိုရီးယားဒီမိုကရက်တစ် ပြည်သူ့သမ္မတနိုင်ငံ’ ဆိုတဲ့ အသုံးအနှုန်းနဲ့ ရည်ညွှန်းပြီး ရေးခဲ့တာပါ။

တကယ်တော့ မြောက်ကိုရီးယားဟာ ၂၀၀၀ ပြည့်နှစ်မှာ ဖိုရမ်ကို စတင်ဝင်ရောက်ခဲ့ပြီးတဲ့နောက်ပိုင်း ပြီးခဲ့တဲ့ ၂၀၂၅ ခုနှစ် ဇူလိုင်လ ကွာလာလမ်ပူမှာ လုပ်ခဲ့တဲ့ ဖိုရမ်ကို ပထမဆုံးအကြိမ်အဖြစ် ပျက်ကွက်ခဲ့ဖူးပါတယ်။

အဲ့ဒီအချိန်တုန်းက အာဆီယံအလှည့်ကျဥက္ကဋ္ဌဖြစ်တဲ့ မလေးရှားနိုင်ငံက သူတို့ကို ဖိတ်ကြားတာမျိုး မရှိခဲ့ပါဘူး။

ဒါနဲ့ပတ်သက်ပြီး တောင်ကိုရီးယားနိုင်ငံဆိုင်ရာ မလေးရှားသံအမတ်ကြီးက Korea Joong Ang Daily သတင်းစာကို နောက်ပိုင်းမှာ ရှင်းပြခဲ့တာကတော့ ၂၀၂၁ ခုနှစ်မှာ ပျုံယမ်းဘက်က သံတမန်ဆက်သွယ်ရေး ဖြတ်တောက်ခဲ့ပြီးတဲ့နောက်ပိုင်း နှစ်နိုင်ငံကြား ဆက်ဆံရေးကို ပြန်မတည်ဆောက်ရသေးတာကြောင့်လို့ ဆိုပါတယ်။

ဒီနှစ် ဇူလိုင်လ ၂၃ ရက်နေ့ မနီလာမြို့မှာ ကျင်းပမယ့် (၃၃) ကြိမ်မြောက် အာဆီယံဒေသတွင်းဖိုရမ် (ARF) ကိုတော့ ဖိလစ်ပိုင်နိုင်ငံက အိမ်ရှင်အဖြစ် လက်ခံကျင်းပဖို့ ရှိနေပါတယ်။

ဒါ့အပြင် ဒေါက်တာ ဘာလာခရစ်ရှနန်ဟာ ပျုံယမ်းမြို့မှာရှိစဉ်အတွင်း မြောက်ကိုရီးယားရဲ့ ဥပဒေပြုလွှတ်တော်ဖြစ်တဲ့ ပြည်သူ့လွှတ်တော် (Supreme People's Assembly) အမြဲတမ်းကော်မတီ ဥက္ကဋ္ဌ ဂျိုယောင်ဝမ် (Jo Yong Won) နဲ့လည်း တွေ့ဆုံခဲ့ပါသေးတယ်။

မစ္စတာ ဂျိုက ဒေါက်တာ ဘာလာခရစ်ရှနန်ကို သူတို့နိုင်ငံရဲ့ လတ်တလော နိုင်ငံရေးဖြစ်ပေါ်တိုးတက်မှုတွေကို ရှင်းပြခဲ့သလို၊ နှစ်ဦးစလုံးကလည်း အမေရိကန်-မြောက်ကိုရီးယား ပထမဆုံးအကြိမ် ထိပ်သီးအစည်းအဝေးအတွက် ခေါင်းဆောင် ကင်ဂျုံအန်းရဲ့ သမိုင်းဝင် စင်ကာပူခရီးစဉ်အကြောင်းကို ပြန်ပြောင်းပြောဆိုခဲ့ကြပါတယ်။

ထရမ့်နဲ့ ကင်တို့ဟာ ထရမ့်ရဲ့ အမေရိကန်သမ္မတ ပထမသက်တမ်းတုန်းက သုံးကြိမ်တိုင်တိုင် တွေ့ဆုံခဲ့ကြဖူးပါတယ်။

အဲ့ဒီတုန်းက ရီပတ်ဘလီကန်ခေါင်းဆောင် ထရမ့်က မြောက်ကိုရီးယားခေါင်းဆောင်ကို သူတို့ရဲ့ နျူကလီးယားအစီအစဉ်တွေ လျှော့ချလာအောင် စည်းရုံးဖို့ ကြိုးစားခဲ့တာပါ။

ဒါပေမဲ့ နောက်ဆုံးမှာတော့ ဒီကြိုးပမ်းမှုတွေက မအောင်မြင်ခဲ့ပါဘူး။

ဒါနဲ့ပတ်သက်ပြီး ပြီးခဲ့တဲ့ ဖေဖော်ဝါရီ ၂၆ ရက်နေ့တုန်းကလည်း အမေရိကန် ဝါရှင်တန်ဘက်ကသာ ပြံုယမ်းရဲ့ နျူကလီးယားပိုင်ဆိုင်မှု အဆင့်အတန်းကို အသိအမှတ်ပြု လက်ခံမယ်ဆိုရင် မြောက်ကိုရီးယားအနေနဲ့ အမေရိကန်နဲ့ “အဆင်ပြေပြေ ဆက်ဆံသွားလို့ရပါတယ်” ဆိုပြီး ကင်က ပြောခဲ့ကြောင်း မြောက်ကိုရီးယား နိုင်ငံပိုင်မီဒီယာတွေမှာ ဖော်ပြခဲ့ဖူးပါတယ်။

ဒေါက်တာ ဘာလာခရစ်ရှနန်ရဲ့ ဒီမြောက်ကိုရီးယားခရီးစဉ်ဟာ ဒီသီတင်းပတ်အစောပိုင်း ဘေဂျင်းမြို့မှာ တရုတ်နိုင်ငံခြားရေးဝန်ကြီး ဝမ်ယိ (Wang Yi) နဲ့ မေလ ၂၅ ရက်နေ့က တွေ့ဆုံခဲ့ပြီးတဲ့နောက် ထွက်ပေါ်လာတာပါ။

အဲ့ဒီတုန်းက ဆွေးနွေးပွဲအပြီးမှာ သူတို့နှစ်ယောက်စလုံးက အရှေ့အလယ်ပိုင်းဒေသမှာ အပစ်အခတ်ချက်ချင်းရပ်စဲဖို့နဲ့ ဟော်မုဇ်ရေလက်ကြား (Strait of Hormuz) ပိတ်ဆို့ထားမှုကို အဆုံးသတ်ဖို့ ပူးတွဲတောင်းဆိုခဲ့ကြပါသေးတယ်။

အခုတော့ ဒေါက်တာ ဘာလာခရစ်ရှနန်ဟာ သူ့ရဲ့ အလုပ်သဘောခရီးစဉ် နောက်ဆုံးအဆင့်အနေနဲ့ တောင်ကိုရီးယားနိုင်ငံကို သွားရောက်ဖို့ မေလ ၂၇ ရက်နေ့ကတင် မြောက်ကိုရီးယားကနေ ထွက်ခွာသွားပြီ ဖြစ်ပါတယ်။

ဒီခရီးစဉ်မှာ စင်ကာပူနိုင်ငံခြားရေးဝန်ကြီးဌာန (MFA) က အရာရှိတွေလည်း အတူလိုက်ပါသွားကြတယ်လို့ သိရပါတယ်။

Reference - The Strait Times
Photo - The Strait Times
Translation - Richard
https://www.facebook.com/share/p/1JYKXx8vMN/

အမေရိကန်၊ မက္ကဆီကိုနဲ့ ကနေဒါတို့ အီဘိုလာကြောင့် ကမ္ဘာ့ဖလားအတွက် ခရီးသွားလာခွင့်တွေ ကန့်သတ်

BBM - မေ ၂၉

ကမ္ဘာ့ကျန်းမာရေး အဖွဲ့အစည်း(WHO)က အီဘိုလာရောဂါကို အရေးပေါ်အခြေအနေအဖြစ် ကြေညာပြီးနောက် ကမ္ဘာ့ဖလားအိမ်ရှင်နိုင်ငံတွေက အီဘိုလာခြိမ်းခြောက်မှုကို ကာကွယ်ဖို့ ပူးပေါင်းလုပ်ဆောင်လာ ကြပါတယ်။

အမေရိကန်၊ မက္ကဆီကိုနဲ့ ကနေဒါနိုင်ငံတို့ဟာ လာမယ့်လမှာ စတင်မယ့် ကမ္ဘာ့ဖလားပြိုင်ပွဲအတွင်း သူတို့ရဲ့နိုင်ငံသားတွေနဲ့ ကမ္ဘာလှည့်ခရီးသွားတွေကို အကာအကွယ်ပေးဖို့ လုပ်ဆောင်နေပါတယ်။

အီဘိုလာကူးစက်နိုင်ခြေ အမြင့်ဆုံးဖြစ်တဲ့ အာဖရိကဒေသတွေကနေ လာမယ့်သူတွေကိုကျန်းမာရေးနဲ့ ခရီးသွားလာမှုဆိုင်ရာ တားမြစ်ချက်တွေကို ချမှတ်လိုက်ကြောင်း ပူးတွဲကြေညာခဲ့ပါတယ်။

ပြီးခဲ့တဲ့လက ထုတ်ပြန်တဲ့ ပူးတွဲကြေညာချက်မှာ ဘယ်လိုအရေးယူဆောင်ရွက်မှုမျိုးတွေ လုပ်မလဲဆိုတာ အသေးစိတ် မပြောထားပေမဲ့ "မြောက်အမေရိကဒေသက လာရောက်ကြမယ့် ကမ္ဘာ့ပြည်သူတွေကို ကြိုဆိုရင်း ဒေသတွင်းက လူတိုင်းရဲ့ ကျန်းမာရေးနဲ့ ဘေးကင်းလုံခြုံရေးကို အမြင့်ဆုံး ဦးစားပေး ဆောင်ရွက်သွားမှာပါ" လို့ ဖော်ပြထားပါတယ်။

ကွန်ဂိုဒီမိုကရက်တစ်သမ္မတနိုင်ငံ (DRC) မှာ ဖြစ်ပွားနေတဲ့ အီဘိုလာကူးစက်ရောဂါဟာ အိမ်နီးနားချင်းနိုင်ငံတွေကို ကူးစက်ပြန့်ပွားဖို့ အန္တရာယ်အလွန်များနေတာကြောင့် ကမ္ဘာ့ကျန်းမာရေးအဖွဲ့ (WHO) က မေလ ၁၇ ရက်နေ့မှာ နိုင်ငံတကာပြည်သူ့ကျန်းမာရေး အရေးပေါ်အခြေအနေအဖြစ် ကြေညာခဲ့ပါတယ်။

ဒါကြောင့် အစိုးရအသီးသီးက ခရီးသွားလာမှု ထိန်းချုပ်ရေးလုပ်ငန်းတွေကို အရှိန်မြှင့် ဆောင်ရွက်လာကြတာပါ။

ပြီးခဲ့တဲ့အပတ်တွေအတွင်း ကွန်ဂို၊ ယူဂန်ဒါနဲ့ တောင်ဆူဒန်နိုင်ငံတွေကို သွားရောက်ခဲ့ဖူးတဲ့ နိုင်ငံခြားသားတွေကို အမေရိကန်နိုင်ငံထဲကို ပေးမဝင်ဘဲ ပိတ်ပင်ခဲ့ပါတယ်။

ပြီးခဲ့တဲ့ မေလ ၂၂ရက်နေ့မှာတော့ အမေရိကန် ကူးစက်ရောဂါထိန်းချုပ်ရေးစင်တာတွေက အဆိုပါနိုင်ငံတွေကနေ ၂၁ ရက်အတွင်း ရောက်ရှိခဲ့ဖူးတဲ့ Green Card (အမြဲတမ်းနေထိုင်ခွင့်) ရထားသူတွေကိုပါ ခရီးသွားလာခွင့် ထပ်မံပိတ်ပင်လိုက်ပါတယ်။

ကနေဒါနိုင်ငံက ပြီးခဲ့တဲ့ မေ ၂၇ရက်က စပြီး ကွန်ဂို၊ ယူဂန်းဒါနဲ့ တောင်ဆူဒန်နိုင်ငံသားတွေကို ကနေဒါနိုင်ငံထဲ ဝင်ရောက်ခွင့် ရက်ပေါင်း ၉၀ ပိတ်ပင်ထားပါတယ်။

ဒါ့အပြင် အဆိုပါဒေသတွေကနေ ပြန်လာတဲ့ ကနေဒါနိုင်ငံသားတွေ၊ အမြဲတမ်းနေထိုင်ခွင့်ရသူတွေနဲ့ အခြားနိုင်ငံခြားသားတွေအနေနဲ့ ရောဂါလက္ခဏာမပြရင်တောင် လာမယ့်စနေနေ့ကစပြီး ၂၁ ရက်ကြာ ကွာရန်တင်း (Quarantine) ဝင်ရမှာ ဖြစ်ပါတယ်။

မက္ကဆီကို ကျန်းမာရေးဝန်ကြီး ဒေးဗစ်ကာရှန်နိုဗစ်ခ်ျ (David Kershenovich)က လေဆိပ်တွေမှာ အီဘိုလာ စစ်ဆေးမှုတွေကို ပိုမိုတင်းကျပ်ထားကြောင်း မေလ၂၅ရက်နေ့က ပြောကြားခဲ့ပါတယ်။

ပြည်သူတွေအနေနဲ့ Democratic Republic of the Congo (DRC)ကို ခရီးမသွားကြဖို့ တိုက်တွန်းထားပြီး DRC ကနေ ရောက်ရှိလာသူတွေကိုလည်း ၂၁ ရက်ကြာ ကွာရန်တင်း ဝင်ရောက်စောင့်ကြည့်ဖို့ တောင်းဆိုထားပါတယ်။

Reference - Al Jazeera
Photo - Al Jazeera
Translation - Alice
https://www.facebook.com/share/p/1BmztG5ZF4/