မြောက်ကိုးရီးယား အမျိုးသမီး ဘောလုံးအသင်း ဖလားနဲ့အတူ အိမ်ပြန်

🟥ဆုငွေ အမေရိကန် ဒေါ်လာ ၁သန်း ထုတ်ယူခွင့်မရ

BBM - မေ ၂၅

မြောက်ကိုရီးယား အမျိုးသမီးဘောလုံးအသင်းဟာ တောင်ကိုရီးယားမှာကျင်းပတဲ့ အာရှရဲ့ ထိပ်တန်းပြိုင်ပွဲမှာ ဗိုလ်စွဲခဲ့ပြီးနောက် ပြုံးရွှင်တာမျိုးမရှိဘဲ တည်ငြိမ်အေးစက်တဲ့ ပုံစံနဲ့ တရုတ်နိုင်ငံကဆင့် ပြုံယမ်းကို မေလ ၂၄ရက်နေ့က ပြန်သွားခဲ့ကြပါတယ်။

ဒါဟာ နိုင်ငံရေးအခြေအနေတင်းမာနေတဲ့ ကိုရီးယားနှစ်နိုင်ငံရဲ့ ဆက်ဆံရေးကြားမှာ သေသေချာချာ စီစဉ်ထားတဲ့ မျက်နှာအမူအရာမျိုးဖြစ်ပုံရတယ်လို့ တောင်ကိုရီးယားဘက်က သတင်းဌာနတွေမှာ ရေးသားထားပါတယ်။

နဲဂိုယန်း (Naegohyang) အမျိုးသမီးဘောလုံးအသင်းဟာ ပြုံယမ်းကို မပြန်ခင် ဘေဂျင်းမှာ ခေတ္တရပ်နားဖို့အတွက် Air China လေယာဉ်စီးဖို့ နေ့လယ် ၁ နာရီခွဲလောက်မှာ ဆိုးလ်မြို့အနောက်ဘက်မှာရှိတဲ့ အင်ချွန်းအပြည်ပြည်ဆိုင်ရာလေဆိပ်ကို ရောက်ရှိလာခဲ့ကြပါတယ်။

အသင်းခေါင်းဆောင် နည်းပြချုပ် ရီယူအီ (Ri Yu-il) ဦးဆောင်တဲ့ မြောက်ကိုးရီးယားအမျိုးသမီးဘောလုံးအသင်းဟာ လေဆိပ်ကနေ ကောင်တာတွေဆီကို စစ်ကြောင်းတစ်ခုလို တန်းစီပြီး ရှေ့ကိုပဲ စိုက်ကြည့်ပြီး လျှောက်လှမ်းသွားခဲ့ကြပါတယ်။

မြောက်ကိုရီးယားလိုလားတဲ့ တက်ကြွလှုပ်ရှားသူတချို့က "ဂုဏ်ယူပါတယ်" လို့ အော်ဟစ်နှုတ်ဆက်ပြီး "နောက်တစ်ခါ ပြန်ဆုံကြတာပေါ့" လို့ လှမ်းပြောနေကြပေမဲ့ သူတို့ကတော့ ဘာမှမတုံ့ပြန်ဘဲ ၁၀ မိနစ်လောက်အတွင်းမှာပဲ ထွက်ခွာမယ့် ဂိတ်ပေါက်ထဲကို ဝင်ရောက်ပျောက်ကွယ်သွားခဲ့ပါတယ်။

ကစားသမား ၂၇ ဦးနဲ့ အဖွဲ့ဝင် ၁၂ ဦးပါဝင်တဲ့ ဒီမြောက်ကိုရီးယားအမျိုးသမီးအသင်းဟာ ပြီးခဲ့တဲ့တနင်္ဂနွေနေ့က တရုတ်နိုင်ငံကတစ်ဆင့် တောင်ကိုရီးယားကို ရောက်လာခဲ့တာဖြစ်ပါတယ်။

ဒါဟာမြောက်ကိုရီးယားအားကစားသမားတွေအနေနဲ့ ၈ နှစ်အတွင်း တောင်ကိုရီးယားမြေပေါ်ကို ပထမဆုံးအကြိမ် လာရောက်တာဖြစ်သလို မြောက်ကိုရီးယားအမျိုးသမီးဘောလုံးအသင်းတစ်သင်းအနေနဲ့လည်း တောင်ကိုရီးယားမြေကို ပထမဆုံးအကြိမ် ခြေချခွင့်ရခဲ့တာလည်း ဖြစ်ပါတယ်။

သူတို့ဟာ မေလ ၂၃ရက်နေ့က ဆိုးလ်မြို့တောင်ဘက် ၃၀ ကီလိုမီတာအကွာက ဆူဝမ်ကွင်းမှာ ကျင်းပခဲ့တဲ့ AFC အမျိုးသမီးချန်ပီယံလိဂ် ဗိုလ်လုပွဲမှာ တိုကျို ဗာဒီ ဘီလီဇာ (Tokyo Verdy Beleza) အသင်းကို ၁ ဂိုး - ဂိုးမရှိနဲ့ အနိုင်ယူပြီး ချန်ပီယံဖြစ်လာခဲ့တာပါ။

ဒါပေမဲ့ ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက်တွေကို ချိုးဖောက်ပြီး နျူကလီးယားနဲ့ ဒုံးကျည်အစီအစဉ်တွေ လုပ်ဆောင်နေတဲ့အတွက် နိုင်ငံတကာပိတ်ဆို့အရေးယူမှုတွေကြောင့် ချန်ပီယံဆုကြေးငွေ အမေရိကန်ဒေါ်လာ ၁ သန်းကိုတော့ မြောက်ကိုရီးယားနိုင်ငံဆီကို တိုက်ရိုက်ပေးပို့မှာမဟုတ်ပါဘူး။

ဒီဆုကြေးငွေတွေကို ကမ္ဘာ့ဘောလုံးအဖွဲ့ချုပ် (FIFA) နဲ့ အာရှဘောလုံးအဖွဲ့ချုပ် (AFC) တို့က သီးသန့်ထိန်းသိမ်းထားမှာဖြစ်ပြီး မြောက်ကိုရီးယားအသင်း နောက်နောင် နိုင်ငံတကာပြိုင်ပွဲတွေမှာ ဝင်ရောက်ယှဉ်ပြိုင်တဲ့အခါ ကုန်ကျစရိတ်တွေအတွက်ပဲ အသုံးပြုခွင့်ပေးသွားမှာ ဖြစ်ပါတယ်။

Reference - Korea Times
Photo - Korea Times
Translation - Alice
https://www.facebook.com/share/p/1EJfi6arSk/

ဖားကန့်မြို့ လုံးခင်းလမ်းမ တစ်ဝိုက်မှာ စကစနဲ့ SNA တွေက ပြည်သူတွေထံမှ တန်ဖိုးကြီးပစ္စည်းတွေကို သေနတ်ထောက်လုယူနေ

BBM-မေ၂၅
သတင်း-မင်းသော်

ကချင်ပြည်နယ်၊ ဖားကန့်မြို့၊ လုံးခင်းလမ်းမတစ်ဝိုက်မှာ စစ်ကောင်စီနဲ့ ရှမ်းနီတပ်ဖွဲ့(SNA)တို့ဟာ ဒေသခံပြည်သူတွေထံမှ တန်ဖိုးကြီးပစ္စည်းတွေကို အတင်းအဓမ္မ သေနတ်ထောက် လုယူတာတွေ ပြုလုပ်နေတယ်လို့ မြေပြင်တော်လှန်ရေးသတင်းရင်းမြစ်တွေထံမှ သိရပါတယ်။

ဖားကန့်မြို့နယ်၊ လုံးခင်းကျေးရွာနဲ့ မှော်စီစာ ကျေးရွာတွေအတွင်း တိုက်ပွဲတွေပြန်လည်ပြင်းထန်လာပြီးတဲ့နောက် စစ်ကောင်စီနဲ့ SNA တပ်ဖွဲ့ဝင်တွေဟာ ဒေသခံပြည်သူတွေရဲ့ နေအိမ်အပေါ်ထိတက်ကာ တန်ဖိုးကြီးပစ္စည်းတွေကို လုယူနေတဲ့အပြင် ဖြတ်သွားဖြတ်လာကားတွေကိုလည်း သေနတ်ပြကာရပ်တန့်စေပြီး ရွှေ၊ငွေ၊ ဖုန်းတွေက အစ လုယူနေတယ်လို့ သိရပါတယ်။

အဆိုပါလုပ်ရပ်ကို ပြီးခဲ့တဲ့ရက်တွေအတွင်းကတည်းက စစ်ကောင်စီတပ်သားတွေဟာ ကျူးလွန်နေတာဖြစ်ပြီး မေလ၂၅ ရက်(ဒီနေ့) နေ့ခင်းမှာလည်း မှော်စီစာ-လုံးခင်း အောက်လမ်းမကြီးဘေး Jade love အနီးမှာ ဖြတ်သွားဖြတ် လာကားတွေကို သေနတ်ထောက်လုယူနေတယ်လို့ လုံးခင်းစစ်မြေပြင်ရှိ KPDF တပ်ခွဲမှူးတစ်ဦးက BBM ကိုပြောပါတယ်။

"မှော်စီစာ လုံးခင်း ရပ်ရွာတွေထဲ စခတွေက ပြည်သူဆီကနေ အိမ်ပေါ်တက် ယူ။ ကားတွေတား ပါတာအကုန်ယူနေတော့တယ် ခုရက်ပိုင်း နေ့တိုင်းဖြစ်နေပြီ၊ဒီနေ့ကို မှော်စီစာ-လုံးခင်း အောက်လမ်းမကြီးဘေး Jade Love နားမှာ လမ်းပေါ်ထွက်တားပြီး သေနတ်တွေနဲ့ ထိုးချိန်ဓားပြတိုက်နေလို့ ဖြတ်သွားဖြတ်လာပြည်သူတွေ ရွှေ၊ငွေ တွေပါသွားတယ်လို့ ပြန်သိရတယ်ဗျ"

တော်လှန်ရေးအင်အားစုဘက်က စစ်ကောင်စီတပ်သားတွေ လုယက်နေတယ်ဆိုတဲ့ အဆိုပါမှော်စီစာ-လုံးခင်း အောက်လမ်းမကြီးကို သတင်းရရချင်း ဒရုန်းနဲ့တိုက်ခိုက်မှုပြုလုပ်ခဲ့ပြီးနောက် စကစ ထိခိုက်မှုအခြေအနေတွေကို စုံစမ်းနေတယ်လို့ဆိုပါတယ်။

ဒေသခံပြည်သူတွေအနေနဲ့ လုံးခင်းလမ်းမတွေကို မဖြစ်မနေဖြတ်သန်းသွားလာရမယ်ဆိုရင်တောင် ရွှေ၊ ငွေ၊ ဖုန်းကဲ့သို့တန်ဖိုးကြီးပစ္စည်းတွေကို မယူဆောင်ရန်နဲ့ သေနတ်သံမိုင်းသံနီးကပ်စွာကြားပါကလည်း လုံခြုံဲတဲ့နေရာမှာ နေထိုင်ရန် တော်
လှန်ရေးအင်အားစုတွေက သတိပေးပြောဆိုထားပါတယ်။

Photo-ပုံဟောင်း

စစ်တပ်ရဲ့ စီးပွါးရေးနဲ့ ဝါဒဖြန့်ချီရေးအပါ ဆက်စပ်အကောင့် ၁၀၀ ကျော်ကို Facebookမှ ဖယ်ရှား

BBM-မေ၂၅
သတင်း-မင်းသော်

မြန်မာစစ်ခေါင်းဆောင်တွေနဲ့ စစ်အုပ်စုက အွန်လိုင်းအပေါ်ဆက်ရှိရေးအတွက် ကြိုးပမ်းနေချိန်မှာပဲ စစ်တပ်ရဲ့ စီးပွါးရေး၊ ဝါဲဒဖြန့်ချီရေးအပါ ဆက်စပ်အကောင့် ၁၀၉ ခုကို Facebookမှ ဖယ်ရှားခဲ့တယ်လို့ Justice For Myanmar ရဲ့ ထုတ်ပြန်ချက်အရ သိရပါတယ်။

Justice For Myanmar ရဲ့တိုင်ကြားမှုအရ Facebookရဲ့ မိခင်ကုမ္ပဏီဖြစ်တဲ့ Meta က ၂၀၂၁ခုနှစ်က ချမှတ်ထားတဲ့ စစ်တပ်ထိန်းချုပ် မီဒီယာများနဲ့ စီးပွါးရေးအပေါ်ပိတ်ပင်တဲ့ မူဝါဒအရ Mytelနဲ့ ၎င်းအရောင်းကိုယ်စားလှယ်တွေ၊ MECtel အရောင်းကိုယ်စားလှယ်တွေ ပိုင်တဲ့ စာမျက်နှာတွေ၊ ပရိုဖိုင်အကောင့်၊ Groupများနဲ့ MRTV၊ MWDတို့ရဲ့ ဝါဒဖြန့်ချီရေးစာမျက်နှာတွေကို ဖယ်ရှားခဲ့တယ်လို့ သိရပါတယ်။

Mytelနဲ့ MECtelတို့ဟာ စစ်ရာဇဝတ်မှုကျူးလွန် ထားတဲ့ စစ်ခေါင်းဆောင်တွေ ထိန်းချုပ်မှုအောက်ရှိ မြန်မာ့စီးပွါးရေး ကော်ပိုရေးရှင်း(MEC) ရဲ့အစိတ်အပိုင်းတစ်ရပ်ဖြစ်ပြီး အဆိုပါ MEC ကိုလည်း အီးယူ၊ ယူကေ၊ အမေရိကန်၊ သြစတြေးလျနဲ့ ကနေဒါတို့ကလည်း ဒဏ်ခတ်ပိတ်ဆို့ထားတယ်လို့ ဆိုပါတယ်။

Mytelနဲ့ MECtelတို့ဟာ စစ်တပ်အတွက် အခွန်ဝင်ငွေရှာပေးနေတဲ့အပြင် ၎င်းတို့ကို ဒစ်ဂျစ်တယ်စောင့်ကြည့်ရေးထောက်လှမ်းရေးမှာလည်းသုံးတာကြောင့် စစ်တပ်ကကျူးလွန်နေတဲ့ စစ်ရာဇဝတ်မှုတွေ လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေကို အားပေးနေတယ်လို့လည်း သိရပါတယ်။

Facebookဟာ Mytelနဲ့အခြားစစ်တပ်ပိုင်စီးပွါးရေးလုပ်ငန်းအကောင့်တွေကို အကြိမ်ကြိမ်ဖယ်ရှားခဲ့ပေမဲ့ ၎င်းတို့ရဲ့ထုတ်ကုန်တွေ၊ဝန်ဆောင်မှုတွေကို ကြေငြာရောင်းချရန် နာမည်အမျိုးမျိုးပြောင်းလဲကာ ဖော်ထုတ်ခံရမှုကိုရှောင်ရှားနေပြီး စစ်တပ်ဝါဒဖြန့်ချီရေးကို အခြားလူမှုမီဒီယာတွေမှ ဖယ်ရှားထားတာကြောင့်လည်း စစ်တပ်ရဲ့ အမုန်းစကားနဲ့သတင်းမှားထုတ်လွှင့်မှုတွေကို ကန့်သတ်နိုင်ခဲ့တယ်လို့လည်း ဆိုပါတယ်။

ပြီးခဲ့တဲ့ရွေးကောက်ပွဲမတိုင်မှီ စစ်တပ်ရဲ့ MRTV ဗီဒီယိုထုတ်လွှင့်တဲ့ ပလက်ဖောင်းတွေဖြစ်တဲ့ Twitch၊Kickတို့မှဖယ်ရှားသလို MWDကိုလည်း Tiktokကဖယ်ရှားခဲ့ပေမဲ့လည်း စစ်တပ်ရဲ့အွန်
လိုင်းတည်ရှိမှုကို ပိတ်ပင်နိုင်ရန်၊ စစ်တပ်ရဲ့ စီးပွါးရေးလုပ်ငန်းများကို Alphabet၊Apple၊ Tiktokနဲ့ Telegramတို့မှ ပိတ်ပင်တားဆီးပေးရန်အတွက် တောင်းဆိုကြောင်း Justice For Myanmarက ထုတ်ပြန်ထားပါတယ်။

Photo-ပုံဟောင်း

ခက်ခဲနေချိန်မှာ တရုတ်ဆီက ဆန်အကူအညီရလို့ ကျူးဘား ကျေးဇူးတင် စကားဆို

BBM - မေ ၂၆

ကျူးဘားနိုင်ငံမှာ လူသားချင်းစာနာထောက်ထားမှုဆိုင်ရာ အကျပ်အတည်းတွေနဲ့ ဆက်တိုက် ရင်ဆိုင်နေရတဲ့အချိန်မှာပဲ တရုတ်နိုင်ငံ ဆန်တန်ချိန် စုစုပေါင်း ၆ သောင်းလောက် ပေးပို့ဖို့ရှိနေပြီး အဲဒီထဲက ပထမဆုံးအသုတ် ရောက်ရှိလာပြီဖြစ်ကြောင်း ကျူးဘားအစိုးရက ကြေညာထားပါတယ်။

ပြီးခဲ့တဲ့ မေလ ၂၅ရက်နေ့က ကျူးဘားသမ္မတ မီဂွယ် ဒီယက်ဇ်-ကာနယ်က ပထမဆုံးအသုတ်အနေနဲ့ ဆန်တန်ချိန် ၁ သောင်း ၅ ထောင် တင်ဆောင်လာတဲ့ သင်္ဘောဟာ မေလ ၂၄ရက်နေ့က ဟာဗားနား (Havana) ဆိပ်ကမ်းကို ဆိုက်ရောက်နေပြီဖြစ်‌ကြောင်း လူမှုကွန်ရက်မှာ ရေးသားခဲ့ပါတယ်။

သူက တရုတ်နိုင်ငံကို "အထူးပဲ ကျေးဇူးတင်ရှိကြောင်း" ပြောခဲ့သလို သူ့အစိုးရအပေါ် ဖိအားပေးနေတာတွေကို ကန့်ကွက်ရှုတ်ချပေးခဲ့တဲ့ ဥရောပပါလီမန် အမတ်တွေကိုလည်း ကျေးဇူးတင်စကား ဆိုခဲ့ပါတယ်။

ဒီနှစ် ဇန်နဝါရီလကစပြီး အမေရိကန် သမ္မတ ဒေါ်နယ်ထရန့်ရဲ့ ဒုတိယမြောက် သက်တမ်းအောက်မှာ ပေါ်လစီတွေ ပိုတင်းမာလာခဲ့ပြီး ကျူးဘားအပေါ် စီးပွားရေးပိတ်ဆို့မှုတွေကိုလည်း ပိုတိုးပြီး လုပ်လာခဲ့တာပါ။

ဒါနဲ့ပတ်သက်လို့ ကျူးဘားသမ္မတ ဒီယက်ဇ်-ကာနယ်က "ကျွန်တော်တို့ ပြည်သူတွေအပေါ် အုပ်စုလိုက် ဒဏ်ခတ်အရေးယူနေတာတွေကို ပြတ်ပြတ်သားသားနဲ့ ထင်ထင်ရှားရှား ကန့်ကွက်ရှုတ်ချပေးတဲ့အတွက် ပြီးတော့ အခုလို တစ်သားတည်း ရပ်တည်ကူညီပေးတဲ့အတွက် အများကြီး ကျေးဇူးတင်ပါတယ်" လို့ ရေးသားခဲ့ပြီး ကျူးဘား ကြုံတွေ့နေရတဲ့ အခြေအနေဟာ "လူမျိုးတုံး သတ်ဖြတ်မှု" နဲ့တောင် တူနေပြီလို့ နှိုင်းယှဉ်ပြောဆိုခဲ့ပါတယ်။

တစ်ဖက်မှာလည်း ထရမ့်က လက်တင်အမေရိက ဒေသတွင်းမှာ တရုတ်ရဲ့ ဩဇာလွှမ်းမိုးမှု ကြီးထွားလာနေတာကို တားဆီးဖို့ ကြိုးစားနေပေမဲ့ ကျူးဘားကတော့ အခုလို အခက်အခဲတွေကြားထဲမှာ အာရှအင်အားကြီးနိုင်ငံဖြစ်တဲ့ တရုတ်ရဲ့ အကူအညီကိုပဲ ပိုပြီး အားကိုးလာရတာ ဖြစ်ပါတယ်။

တရုတ်နိုင်ငံဟာ ကျူးဘားရဲ့ ဟောင်းနွမ်းနေတဲ့ လျှပ်စစ်ဓာတ်အားလိုင်းကို အဆင့်မြှင့်တင်ဖို့နဲ့ ရုပ်ကြွင်းလောင်စာ သုံးစွဲမှုကနေ ကူးပြောင်းနိုင်ဖို့အတွက် ဆိုလာပြားတွေကိုလည်း လှူဒါန်းပေးထားပါသေးတယ်။

နိုင်ငံတကာ စွမ်းအင်အေဂျင်စီ (IEA) ရဲ့ အဆိုအရ လက်ရှိမှာ ကျူးဘားဟာ သူတို့သုံးနေတဲ့ ရေနံလိုအပ်ချက်ရဲ့ ၆၀ ရာခိုင်နှုန်းနီးပါးကို ပြည်ပကနေ တင်သွင်းနေရတာ ဖြစ်ပါတယ်။

ဒါပေမဲ့ ဒီနှစ်ဆန်းပိုင်းကစပြီး ထရမ့်အစိုးရက ကျူးဘားဆီ ရေနံတင်ပို့မှုကို ပိတ်ဆို့ ဖြတ်တောက်လိုက်ပါတယ်။

ဒီလို လက်တွေ့ဖြစ်လာတဲ့ ရေနံပိတ်ဆို့မှုဟာ ဇန်နဝါရီလ ၃ ရက်နေ့ နောက်ပိုင်းမှာ ချက်ချင်း စတင်ခဲ့တာပါ။

အဲဒီနေ့တုန်းက အမေရိကန်ဟာ ဗင်နီဇွဲလား သမ္မတ နီကိုးလပ်စ် မာဒူရိုကို ဖမ်းဆီးထိန်းသိမ်းဖို့အတွက် စစ်ရေးအရ စစ်ဆင်ရေးတစ်ခုကို စတင်လုပ်ဆောင်ခဲ့တာ ဖြစ်ပါတယ်။

အဲဒီစစ်ဆင်ရေးပြီးတာနဲ့ ထရန့်က ဗင်နီဇွဲလားကနေ ကျူးဘားဆီ ရေနံတွေ၊ ငွေကြေးတွေ နောက်ထပ် မလွှဲပြောင်းပေးဖို့ ပိတ်ပင်တဲ့အကြောင်း ကြေညာခဲ့ပါတယ်။

ဇန်နဝါရီလကုန်ပိုင်းမှာတော့ သူက သမ္မတအမိန့်တစ်ရပ် ထပ်ထုတ်ပြန်ခဲ့ပြီး ကျူးဘားဟာ အမေရိကန်အတွက် ပုံမှန်မဟုတ်တဲ့ ခြိမ်းခြောက်မှုဖြစ်တယ်လို့ သတ်မှတ်လိုက်သလို ကျူးဘားဆီ ရေနံပံ့ပိုးပေးမယ့် ဘယ်နိုင်ငံကိုမဆို စီးပွားရေးအရ အရေးယူဒဏ်ခတ်မယ်လို့ ခြိမ်းခြောက်ခဲ့ပါတယ်။

အဲဒီအချိန်ကစပြီး ရုရှားရေနံတင်သင်္ဘော တစ်စီးတည်းပဲ ကျူးဘားကျွန်းဆီ ရောက်လာခွင့်ရခဲ့တာပါ။

ဒီလအစောပိုင်းမှာတော့ ကျူးဘား စွမ်းအင်ဝန်ကြီး ဗီဆင်းတေး ဒီလာအို လီဗီက နိုင်ငံထဲမှာ ရေနံလက်ကျန် လုံးဝပြတ်တောက်သွားပြီဖြစ်ကြောင်း ကြေညာခဲ့ပါတယ်။

ကျူးဘားမှာ လျှပ်စစ်မီးခဏခဏပျက်တာက ဆန်းတဲ့ကိစ္စမဟုတ်ပေမဲ့ အခုနောက်ဆုံးကြုံရတဲ့ အကျပ်အတည်းကတော့ တစ်နိုင်ငံလုံးအတိုင်းအတာနဲ့ မီးလိုင်းတွေအကုန် ပြတ်တောက်သွားစေခဲ့ပါတယ်။

ဒါ့အပြင် ဒေသအတော်များများမှာ သယ်ယူပို့ဆောင်ရေးနဲ့ ဆေးဝါးကုသမှုအပါအဝင် အများပြည်သူဆိုင်ရာ ဝန်ဆောင်မှုလုပ်ငန်းတွေပါ အကုန်လုံး ရပ်တန့်ကုန်တဲ့အထိ ဖြစ်သွားခဲ့ရတာပါ။

ဒါပေမဲ့လည်း ထရမ့်ကတော့ ကျူးဘားရဲ့ ကွန်မြူနစ်အစိုးရကို ဖြုတ်ချပြီး အစိုးရအပြောင်းအလဲဖြစ်အောင် တွန်းအားပေးတဲ့အနေနဲ့ စီးပွားရေးပိတ်ဆို့မှုတွေကို ဆက်တိုက် ဖိအားပေးလုပ်ဆောင်နေပါတယ်။

မီဒီယာတွေရဲ့ ဖော်ပြချက်အရ ထရမ့်ဟာ သမ္မတ ဒီယက်ဇ်-ကာနယ်ကို ရာထူးကနေ နှုတ်ထွက်စေချင်နေတာပါ။

သူက ဗင်နီဇွဲလားမှာလိုမျိုး အခြေအနေမျိုးဖြစ်လာရင် လက်ခံမယ့်သဘောရှိပြီး အဲဒါကတော့ ဗင်နီဇွဲလားသမ္မတ မာဒူရိုကိုပဲ ဖယ်ရှားပြီး ကျန်တဲ့သူ့အစိုးရအဖွဲ့ကိုတော့ ဒီအတိုင်း ဆက်ထားလိုက်တဲ့ ပုံစံမျိုး ဖြစ်ပါတယ်။

ထရမ့်က ကျူးဘားဘက်ကသာ သူ့တောင်းဆိုချက်တွေကို မလိုက်လျောရင် စစ်ရေးအရ အရေးယူဖို့အထိ စဉ်းစားနိုင်တယ်လို့ ခဏခဏ ပြောဆိုနေပေမဲ့ သူ့အစိုးရအဖွဲ့ဘက်ကတော့ ကျူးဘားကို စစ်ရေးအရ ဝင်ရောက်စွက်ဖက်မယ့်ကိစ္စနဲ့ ပတ်သက်ပြီး တစ်ယောက်တစ်မျိုးနဲ့ ဝေဝေဝါးဝါး သတင်းစကားတွေပဲ ပါးနေပါတယ်။

"တခြားသမ္မတတွေကတော့ ဒီကိစ္စကို နှစ်ပေါင်း ၅၀၊ ၆၀ လောက်ပဲ စောင့်ကြည့်ပြီး တစ်ခုခုလုပ်ဖို့ ကြိုးစားခဲ့ကြတာ။ ဒါပေမဲ့ ကျွန်တော်ကပဲ ဒါကို တကယ်အကောင်အထည်ဖော်မယ့်သူ ဖြစ်လာလိမ့်မယ် ထင်တယ်" လို့ ထရန့်က ပြီးခဲ့တဲ့အပတ်က သမ္မတရုံးခန်း (Oval Office) ကနေ ပြောကြားခဲ့ပါတယ်။

ဒါပေမဲ့လည်း နှစ်နိုင်ငံကြား ဆွေးနွေးညှိနှိုင်းမှုတွေကတော့ ပိုပြီး တင်းမာသွားဖို့ပဲ ရှိပါတယ်။

ဒါဟာ ၁၉၉၆ တုန်းက ကျူးဘားကနေ ထွက်ပြေးတိမ်းရှောင်သွားသူတွေ မောင်းနှင်တဲ့ လေယာဉ်နှစ်စီးကို ပစ်ချခဲ့မှုနဲ့ပတ်သက်ပြီး ကျူးဘားသမ္မတဟောင်း ရာအူးလ် ကက်စထရို (Raul Castro) ကို လူသတ်မှုနဲ့ တရားစွဲဆိုထားတယ်လို့ ထရမ့်အစိုးရက ထုတ်ဖော်ကြေညာခဲ့တာကြောင့်ပါ။

တကယ်တော့ ကျူးဘားဟာ ၁၉၆၀ ပြည့်လွန်နှစ်တွေကတည်းက အမေရိကန်ရဲ့ ဘက်စုံစီးပွားရေးပိတ်ဆို့မှုကို ခံထားရတာဖြစ်ပြီး အဲဒီဒဏ်ကြောင့်ပဲ စီးပွားရေးက တော်တော်လေး ကျဆင်းခဲ့တာပဲ ဖြစ်ပါတယ်။

ဒါပေမဲ့ အမေရိကန်အရာရှိတွေဘက်ကတော့ ကျူးဘားအစိုးရရဲ့ စီးပွားရေးစီမံခန့်ခွဲမှု လွဲမှားတာတွေနဲ့ နိုင်ငံရေးအတိုက်အခံတွေအပါအဝင် ပြည်သူတွေအပေါ် ဖိနှိပ်ချုပ်ချယ်မှုတွေကြောင့်သာ အခုလိုဖြစ်ရတာလို့ အပြစ်တင်ထားပါတယ်။

ဒီလအစောပိုင်းတုန်းကလည်း အမေရိကန် နိုင်ငံခြားရေးဝန်ကြီး မာကို ရူဘီယိုက ထရန့်အစိုးရအနေနဲ့ ကျူးဘားကို လူသားချင်းစာနာမှုဆိုင်ရာ အကူအညီ ဒေါ်လာ သန်း ၁၀၀ ပေးဖို့ ကမ်းလှမ်းထားတယ်လို့ ပြောပါတယ်။

ဒါပေမဲ့ အဲဒီလိုကူညီဖို့အတွက် ကျူးဘားဘက်က "ထိရောက်တဲ့ ပြုပြင်ပြောင်းလဲမှုတွေ" လုပ်ရမယ်ဆိုတဲ့ ကန့်သတ်ချက်တော့ ပါပါတယ်။

ဒါပေမဲ့ ပြီးခဲ့တဲ့ တနင်္ဂနွေနေ့က တင်ခဲ့တဲ့စာတွေထဲမှာတော့ သမ္မတ ဒီယက်ဇ်-ကာနယ်က ထရန့်ရဲ့ "အပြင်းထန်ဆုံး ဖိအားပေးမှု" ကမ်ပိန်းကို အရှုံးမပေးဘဲ တုံ့ပြန်ဖို့ ကြိုးစားခဲ့ပါတယ်။

သူက "အမေရိကန်က လူအချို့ သွေးရူးသွေးတန်း လျှောက်အော်နေကြတဲ့ 'အပြင်းထန်ဆုံး ဖိအားပေးမှု' ဆိုတဲ့ ဗျူဟာဟာ ကျူးဘားအစိုးရ ပြိုလဲတော့မယ်ဆိုတဲ့ သတင်းအမှားတွေကို ဖန်တီးဖို့နဲ့၊ အဲဒီကတစ်ဆင့် စစ်ရေးအရ ဝင်ရောက်စွက်ဖက်ဖို့ လမ်းခင်းပေးဖို့အတွက်ပဲ ဖြစ်တယ်" လို့ ရေးသားခဲ့ပါတယ်။

ဒါ့အပြင် ကျူးဘားအနေနဲ့ အမေရိကန်ရဲ့ စီးပွားရေးနဲ့ နိုင်ငံရေးပြိုင်ဘက်ဖြစ်တဲ့ တရုတ်နိုင်ငံနဲ့ ဆက်ဆံရေးကို ပိုပြီးတော့တောင် ခိုင်မာအောင် ဆက်လုပ်သွားမယ်လို့ ဒီယက်ဇ်-ကာနယ်က ထည့်သွင်းပြောကြားခဲ့ပါတယ်။

သူက "အခုလို အကျပ်အတည်းဖြစ်နေတဲ့ အချိန်မျိုးမှာ ကျွန်တော်တို့နှစ်နိုင်ငံကြားက တန်ဖိုးထားရတဲ့ ချစ်ကြည်ရေးနဲ့ ပူးပေါင်းဆောင်ရွက်မှု သံယောဇဉ်တွေဟာ ပိုပြီးတော့တောင် ခိုင်မြဲလာပါတယ်" လို့လည်း ပြောခဲ့ပါသေးတယ်။

Reference - Al Jazeera
Photo - Al Jazeera
Translation - Richard
https://www.facebook.com/share/p/1HabKQt1uM/

ရခိုင်ကမ်းရိုးတန်းမှာ ဇွန်လဆန်းအတွင်း မုန်တိုင်းဖြစ်လာနိုင်တယ်လို့ မိုးလေဝသခန့်မှန်းသူတွေ ခန့်မှန်းနေ

BBM - မေ ၂၆
သတင်း - ဧက

ဧရာဝတိတိုင်းကိုဖြတ်ကျော်လာမယ့် လေဖိအားနည်းဆဲလ်တွေဟာ ဇွန်လပထမပတ်အတွင်း ရခိုင်ကမ်းရိုးတန်းတစ်လျှောက် ဆိုင်ကလုန်းမုန်တိုင်းအဖြစ်ကိုရောက်ရှိလာနိုင်တယ်လို့ မိုးလေဝသခန့်မှန်းသူတွေက ခန့်မှန်းနေကြပါတယ်။

ဒီကနေ့ မေလ ၂၅ ရက်တိုင်းထွာချက်အရ ပစိဖိတ်သမုဒ္ဒရာအတွင်း ဖြစ်ပေါ်လာမယ့် အလွန်အားကောင်းတဲ့ စူပါတိုင်ဖွန်းမုန်တိုင်းရဲ့ ဆွဲအားကြောင့် ဟိုင်းကြီးကလမ်းလွန်နဲ့ ဘင်္ဂလားပင်လယ်မှာ လေဖိအားနည်းဆဲလ်တွေအစပျိုးလာမှာဖြစ်တယ်လို့ ဆိုကြပါတယ်။

အဲ့ဒီဆဲလ်တွေဟာ မေလ ၃၁ ရက်မှာ မုတ္တမကွေ့တစ်ဝိုက်မှာအစပျိုးပြီးနောက်ရက်မှာတော့ မြစ်ဝကျွန်းပေါ်ကိုဖြတ်ကာ ရခိုင်ကမ်းရိုးတန်းတစ်လျှောက် မြောက်ဘက်ကိုရွေ့လျားသွားမှာဖြစ်တယ်ဆိုပြီး ခန့်မှန်းထားကြတာပါ။

မြောက်ဘက်ကိုရွေးလျားရာတစ်လျှောက် ဇွန်လ ၄ ရက်မှာ ဆိုင်ကလုန်းမုန်တိုင်းအဆင့်ကိုရောက်ရှိလာနိုင်ပြီး ဇွန်လ ၅ ရက် မာန်အောင်၊ ကျောက်ဖြူကမ်းလွန်အရောက်မှာတော့ ပိုမိုအားကောင်းလာပြီး ဇွန်လ ၆ ရက်မှာ စစ်တွေကမ်းခြေနားကနေ ဖြတ်ကျော်သွားမှာဖြစ်တယ်ဆိုပြီး ခန့်မှန်းထားကြတာဖြစ်ပါတယ်။

ရခိုင်ကမ်းရိုးတန်းတောင်ပိုင်း၊ ဧရာဝတီတိုင်း၊ ရန်ကုန်တိုင်း၊ ပဲခူးတိုင်းနဲ့ တနင်္သာရီတိုင်းတို့ဟာ ဒီမုန်တိုင်းအစိုဓာတ်နဲ့ လေပြင်းပင့်တင်ရာလမ်းကြောင်းထဲကို တိုက်ရိုက်ကျရောက်နေတယ်လို့ မိုးလေဝသခန့်မှန်းသူ ဦးဝင်းနိုင်ကအသိပေးထားပါတယ်။

ဒီမုန်တိုင်းရဲ့သက်ရောက်မှုကြောင့် ရခိုင်ကမ်းရိုးတန်းနဲ့ ချင်းပြည်နယ်တို့မှာ မိုးအလွန်များတာ၊ လေပြင်းတိုက်ခတ်တာနဲ့ တောင်ကျချောင်းရေလျံတာ၊ ရုတ်တရက်ရေကြီးတာတွေဖြစ်နိုင်တယ်လို့သိရပါတယ်။

ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်နဲ့ တနင်္ဿာရီတိုင်းတို့မှာတော့ မုတ်သုံလေစီးကြောင်းကို မုန်တိုင်းဆွဲအားက ထပ်ဆင့်ပင့်တင်ပေးသလိုဖြစ်တာကြောင့် နေ့စဉ်ရက်ဆက်မိုးသည်းထန်စွာရွာသွန်းမယ့်အပြင် ကမ်းရိုးတန်းတစ်လျှောက်နဲ့ ပင်လယ်ပြင်တွေမှာ မိုးသက်လေပြင်းကျရောက်မှုဖြစ်ပွားနိုင်တယ်လို့ ခန့်မှန်းထားကြပါတယ်။
https://www.facebook.com/share/p/1FSkq6mETd/

ကွန်ဂိုမှာ အလောင်းလာလုတဲ့ လူငယ်တွေကြောင့် အီဗိုလာဆေးရုံမှာ ရုန်းရင်းဆန်ခတ်ဖြစ်ပွား

BBM - မေ ၂၆

ကွန်ဂိုနိုင်ငံအရှေ့ပိုင်းက အီဗို
လာဗိုင်းရပ်စ် အဆိုးဆုံးဖြစ်နေတဲ့ ဒေသတစ်ခုမှာ မေလ ၂၅ရက်နေ့ ညနေပိုင်းက စိတ်ဆိုးဒေါသထွက်နေတဲ့ လူငယ်တစ်စု ဆေးရုံထဲကို အတင်းဝင်စီးခဲ့ကြတယ်လို့ နိုင်ငံတကာသတင်းဌာနတွေမှာ ဖော်ပြထားပါတယ်။

အဆိုဖြစ်စဥ်မှာ သေနတ်သံတွေပါ ထွက်ပေါ်လာတာကြောင့် ဆေးရုံဝန်ထမ်းတွေဟာ လူနာတွေကို ခက်ခက်ခဲခဲရွှေ့ပြောင်းပေးခဲ့ရတယ်လို့ သိရပါတယ်။

ဒီတိုက်ခိုက်မှုကြောင့် ဘယ်သူဘယ်ဝါ ထိခိုက်ဒဏ်ရာရသွားတယ်ဆိုတာကိုတော့ ချက်ချင်းမသိရသေးပါဘူး။

ဒါပေမဲ့ Mongbwalu အထွေထွေရောဂါကုဆေးရုံရဲ့ ဒါရိုက်တာဖြစ်သူ ဒေါက်တာ ရစ်ချက်လိုကူဒူက အဲ့ဒီလူငယ်တွေဟာ ဆေးရုံမှာသေဆုံးသွားတဲ့ သူတို့ဆွေမျိုးနှစ်ယောက်ရဲ့ ရုပ်အလောင်းကို လာတောင်းတာလို့ AP သတင်းဌာနကို ပြောပြခဲ့ပါတယ်။

ဒေါက်တာ လိုကူဒူက ဖုန်းနဲ့ဖြေကြားရာမှာ "သေနတ်သံတွေ ကြားနေရတယ်၊ ဆရာတို့လည်း လူနာတွေနဲ့ ဝန်ထမ်းတွေကို ဘေးလွတ်ရာ ရွှေ့ဖို့ ကြိုးစားနေရတယ်" လို့ ပြောပြီး၊ ဆေးရုံတစ်ခုလုံး အရေးပေါ်အခြေအနေ ကြေညာထားရပေမဲ့ အခြေအနေတွေက အရမ်းရှုပ်ထွေးနေတုန်းပဲလို့ ဆိုပါတယ်။

ဒီတိုက်ခိုက်မှုဟာ ဆေးရုံဝန်ထမ်းတွေ ဆေးဝါးပစ္စည်းမလုံလောက်မှုကြားက အီဗိုလာလူနာတွေကို အသည်းအသန် ကုသပေးနေရတဲ့ ဆေးရုံတွေပေါ် တစ်ပတ်အတွင်း တတိယအကြိမ်မြောက် အကြမ်းဖက်ခံရတာလည်း ဖြစ်ပါတယ်။

လက်ရှိ အီဗိုလာကူးစက်မှုကို ကမ္ဘာ့ကျန်းမာရေးအဖွဲ့ (WHO) က နိုင်ငံတကာက စိုးရိမ်ရတဲ့ ပြည်သူ့ကျန်းမာရေး အရေးပေါ်အခြေအနေအဖြစ် ကြေညာထားရတာပါ။

အီဗိုလာရောဂါနဲ့ သေဆုံးသွားတဲ့သူတွေရဲ့ ရုပ်အလောင်းဟာ ကူးစက်နိုင်ခြေ အရမ်းမြင့်မားပါတယ်။ အသုဘပြင်ဆင်တာ ဒါမှမဟုတ် ဈာပနမှာ လူစုလူဝေးလုပ်တာတွေကနေ ရောဂါပိုပြန့်ပွားစေနိုင်ပါတယ်။

ဒီပြဿနာကို ထိန်းချုပ်ဖို့ ကွန်ဂိုအာဏာပိုင်တွေက သေဆုံးသူတွေရဲ့ အလောင်းကို အစိုးရအဖွဲ့အစည်းတွေကပဲ စနစ်တကျ သင်္ဂြိုဟ်ပေးဖို့ သတ်မှတ်ထားပါတယ်။

ဒါပေမဲ့ ဒါကို သေဆုံးသူတွေရဲ့ မိသားစုနဲ့ သူငယ်ချင်းတွေက လက်မခံဘဲ ဆန္ဒပြကန့်ကွက်နေကြတာပါ။

ပြီးခဲ့တဲ့ မေလ ၂၃ရက်နေ့က ဗိုင်းရပ်စ် ကူးစက်မှုကို တားဆီးဖို့အတွက် ကွန်ဂိုအရှေ့မြောက်ပိုင်းမှာ လူ ၅၀ ထက်ပိုတဲ့ ဈာပနအခမ်းအနားတွေနဲ့ လူစုလူဝေးတွေကို ပိတ်ပင်တားမြစ်ထားတယ်လို့ အစိုးရက ထုတ်ပြန်ထားပါတယ်။

Reference - Ap News
Photo - Ap News
Translation - Alice
https://www.facebook.com/share/p/1Ga3XJfg43/

စစ်တွေမြို့မှာ ညအပြင်ထွက်ရင် ပစ်မိန့်ထုတ်ပြန်ထားတာကြောင့် မြိုခံတွေ စိုးရိမ်မှုမြင့်တက်

BBM - မေ ၂၆
သတင်း - နိုင်နိုင်

စစ်ကောင်စီတပ်က ထိန်းချုပ်ထားတဲ့ ရခိုင်ပြည်နယ်ရဲ့ မြို့တော် စစ်တွေမြို့မှာ ညမထွက်ရအမိန်နဲ့အတူ ပစ်မိန့်ကိုပါ တစ်ပါတည်းထုတ်ပြန်ထားတာကြောင့် မြို့ခံတွေမှာ စိုးရိမ်မှုမြင့်တက်နေတယ်လို့ စစ်တွေဒေသခံတွေဆီက သိရပါတယ်။

အာရက္ခတပ်တော် AA ဟာ စစ်တွေမြို့ကို ထိုးစစ်အရှိန်မြင့် တိုက်ခိုက်လာနေတာကြောင့် စစ်ကောင်စီတပ်ဟာ ပြီးခဲ့တဲ့ မေလတတိယ အပတ်ကတည်းကနေ ညမထွက်ရအမိန့်ကို ထပ်မံထုတ်ပြန်လိုက်ပြီး ညအပြင်ထွက်ရင် ပစ်မိန့်ကိုပါ ပူးတွဲထုတ်ပြန်လိုက်တာလည်း ဖြစ်ပါတယ်။

အဆိုပါ စစ်ကောင်စီတပ်ရဲ့ ထုတ်ပြန်ချက်ကြောင့် မြို့ပေါ်မှာ ပိတ်မိနေကြတဲ့ စစ်တွေဒေသခံတွေမှာ စိုးရိမ်ထိတ်လန့်ကာ နေထိုင်နေကြရတယ်လို့ စစ်တွေဒေသခံအမျိုးသားတစ်ဦးက BBM ကို ပြောပါတယ်။

"ညမထွက်ရအမိန့် ပုဒ်မ ၁၄၄ ကိုတော့ အရင်ကတည်းက ထုတ်ပြန်ထားတာရှိပါတယ်။ ဒီလမှာပဲ ထပ်မံသက်တမ်းတိုးလိုက်တာပါ။ အဲဒီအထဲမှာ ညအပြင်ထွက်တဲ့အခါ တွေ့လို့ရှိရင် ပစ်မိန့်ကိုပါ တစ်ပါတည်း ထုတ်ပြန်လိုက်ပါတယ်။ ဒီလိုထုတ်ပြန်လိုက်တော့ မြို့ပေါ်ကလူတွေဟာ စိုးရိမ်ထိတ်လန့်မှုတွေ ရှိနေကြပါတယ်" လို့ အဆိုပါ အမျိုးသားက ပြောပါတယ်။

စစ်ကောင်စီတပ်က ထုတ်ပြန်ထားတဲ့ ညမထွက်ရအမိန့်ဟာ ညနေ ၉ နာရီကနေ အာရုဏ်တက်ချိန် နံနက် ၄ အထိဖြစ်ပြီး ပစ်မိန့်ကိုတော့ ရပ်ကွက်အတွင်းရှိ အုပ်ချုပ်ရေးအဖွဲ့ဝင်တွေတဆင့် ရပ်ကွက်သူ၊ ရပ်ကွက်သားတွေကို အကြောင်းကြားလာတာ ဖြစ်တယ်လို့လည်း သိရပါတယ်။

စစ်ကောင်စီတပ်ရဲ့ ထုတ်ပြန်ချက်ကြောင့် မြို့ပေါ်မှာရှိကြတဲ့ ပြည်သူတွေဟာ ညနေအချိန် အရေးပေါ်ကျန်းမာရေးကိစ္စတွေ ပေါ်ပေါက်လာပါက အခက်အခဲတွေ ဖြစ်ပေါ်လာနိုင်ပြီး ရပ်ကွက်အုပ်ချုပ်ရေးမှူးနဲ့ တာဝန်ရှိတဲ့သူတွေဆီက တစ်ဆင့်သွားသင့်တယ်လို့ စစ်တွေဒေသခံ လူငယ်တစ်ဦးက BBM ကို ပြောပါတယ်။

"စစ်တွေမှာ ကျန်ခဲ့တဲ့သူတွေက သက်ကြီးရွယ်အိုတွေ ကျန်ခဲ့တာများပါတယ်။ ညအချိန်ကျန်းမာရေးကိစ္စတစ်ခုခုဖြစ်ရင် ဒုက္ခရောက်ပါပြီ။ အခုက ပစ်မိန့်လည်းပါတာဆိုတော့ ဘယ်သူမှ ထွက်ရဲ့မှာမဟုတ်ဘူး။ အရေးပေါ်ဖြစ်ပြီးဆိုရင်တော့ ရပ်ကွက်အုပ်ချုပ်ရေးမှူးရဲ့ ထောက်ခံချက်ယူပြီးမှ သွားရမယ်။ အဲလိုမှအဆင်ပြေပါမယ် " လို့ အဆိုပါ လူငယ်က ဆက်ပြောပါတယ်။

အလားတူ စစ်တွေမြို့ထဲမှာ မရှိဆင်းရဲသားတွေလည်း ကျန်ရစ်နေခဲ့တာဖြစ်ပြီး သူတို့တွေမှာ စားဝတ်နေရေးဖြေရှင်းဖို့အတွက် ညနေ ငါးရှာ၊ ဖားရှာထွက်ကြရသလို လက်ရှိမှာ စစ်ကောင်စီတပ်ရဲ့ ထုတ်ပြန်ချက်ကြောင့် မထွက်ဝံ့ကြဘူး ဖြစ်နေကြ တယ်လို့လည်း သိရပါတယ်။

စစ်တွေမြို့ပေါ်ကို အာရက္ခတပ်တော် AA က ဝိုင်းရံပိတ်ဆို့ထားတဲ့ အခြေအနေမှာ ရှိနေတာကြောင့် စစ်ကောင်စီတပ်ဟာ မြို့ပေါ်ကို လေကြောင်း၊ ရေကြောင်းကနေပါ စစ်အင်အားတွေ အဆက်မပြတ် တိုးချဲ့နေရာချထားတာလည်း ဖြစ်ပါတယ်။

ဒါ့အပြင် စစ်တွေမြို့ ပတ်ပတ်လည်ကိုလည်း စစ်ကောင်စီတပ်က ခြံစည်းရိုးခတ်ကာ ဒေသခံတွေကို ပိတ်လှောင်ထားတာဖြစ်ပြီး စစ်တွေဟိုတယ်မှ ကမ်းနားတစ်လျှောက် စာတိုက်အနီးအနားထိကို ဘန်ကာတွေအများအပြား တိုးချဲ့ချထားတယ်လို့လည်း သိရပါတယ်။

Photos - Social Media
https://www.facebook.com/share/p/14cyLUaRByW/

မြင်းခြံ-တောင်သာလမ်းပေါ်မှာ စကစ ကား(၂)စီးတိုက်ခိုက်မှု အရာရှိအပါ(၁၂)ဦးသေ

BBM - မေလ ၂၆
သတင်း - ကိုဘုဏ်း

မြင်းခြံမြို့အနီး မြင်းခြံ-တောင်သာလမ်းပေါ်မှာ စစ်ကောင်စီ၊ရဲနဲ့ ပျူများစီးလာတဲ့ ကား(၂)စီးကို တော်လှန်ရေးတပ်ဖွဲ့တွေတိုက်ခိုက်ခဲ့တာကြောင့် စကစအရာရှိအပါ (၁၂)ဦးသေဆုံးခဲ့တယ်လို့ မြင်းခြံခရိုင်အမှတ် (၁)တပ်ရင်းက ထုတ်ပြန်ကြေငြာထားပါတယ်။

ပြီးခဲ့တဲ့ မေလ (၂၄)ရက်နေ့က တောင်သာ- မြင်းခြံလမ်းအားအသုံးပြု၍ စကစတပ်များ သွားလာနေကြောင်း သတင်းရတာ ကြောင့်မြင်းခြံခရိုင် အမှတ် (၁)တပ်ရင်းနှင့် မဟာမိတ်များမှ လမ်းပိုင်း စစ်ဆေးရေး ပြုလုပ်ပြီး ကင်းပုန်းစောင့်တိုက်ခိုက်ချေမှုန်ခဲ့တယ်လို့သိရပါတယ်။

တော်လှန်ရေးတပ်ဖွဲ့များက စစ်ဆေးမှု့များပြုလုပ်နေချိန် မြင်းခြံမြို့မှ ထွက်ခွာလာတဲ့ စစ်ကောင်စီ၊ပျူနဲ့ ရဲများစီးလာတဲ့ 4×4ကား (၁)စီး/ supercustomကား ၁စီးတို့ကို တိုက်ခိုက်ခဲ့တယ်လို့သိရပါတယ်။

တိုက်ခိုက်မူ့အတွင်း စစ်ကောင်စီနဲ့ လက်ပါးစေများစီးလာတဲ့ super custom ကား မှစကစအလောင်း များနဲ့ လက်နက်များ သိမ်းဆည်းရမိခဲ့ပြီး4×4ကားအားတိုက်ခိုက်ခဲ့သော်လည်း သေ ဆုံး ထိခိုက်များ၍ မြင်းခြံမြို့သို့ ပြန်လည်မောင်းနှင်းထွက်ပြေးသွားခဲ့တယ်လို့လည်း ဖော်ပြထားပါတယ်။

တော်လှန်ရေးတပ်ဖွဲ့များရဲ့တိုက်ခိုက်မူ့ကြောင့် စစ်သား၊ ရဲ ၊ပျူ (၄)လောင်းနှင့်အတူ MA1- (၁)လက်/ PA (၁) လတ် /M22 (၁)လက်/ ကာဘိုင် (၁)လတ်နှင့်အတူ ဆက်စပ်ပစ္စည်းများ သိမ်းဆည်းရမိခဲ့ပြီးစကစ အရာရှိ (၁)ဉီးအပါအဝင် (၁၂)ဉီးသေဆုံးကြောင်းလည်းသိရှိရပါတယ်။

တိုက်ခိုက်မှုပြီးချိန်မှာစကစ ဘက်မှတပ်ကူ ကား များ၊ဒရုန်းကား များရောက်ရှိလာသဖြင့် တော်လှန် ရေးရဲဘော်များမှ အထိအခိုက်မရှိ ပြန်လည်ဆုတ်ခွာခဲ့တယ်လို့လည်းဖော်ပြထားပါတယ်။

အဆိုပါတိုက်ခိုက်မူ့ကိုမြင်းခြံခရိုင်အမှ(၁)တပ်ရင်း ၊အမှတ် (၂)တပ်ရင်း၊အမှတ် (၇)တပ်ရင်း၊မြင်းခြံမြို့နယ် ပကဖ( တိုက်နယ်၂)နှင့် နွားထိုးကြီးမြို့နယ် ပကဖ တို့ ပူးပေါင်းတိုက်ခိုက်ခဲ့ပြီး မြင်းခြံခရိုင်အတွင်း ကာကွယ်ရေးအဖွဲ့ များ မှစစ်ကော်မရှင်ထံ ပူးပေါင်း သွားတဲ့ သစ္စာဖောက်များကိုလည်း ချေမှုန်းန်ိုင်ခဲ့တယ်လို့မြင်းခြံခရိုင်အမှတ် (၁)တပ်ရင်းက ထုတ်ပြန်ထားပါတယ်။

Photo-မြင်းခြံခရိုင်အမှတ် (၁)တပ်ရင်း

မင်းအောင်လှိုင်က သူအုပ်ချုပ်မည့်(၅)နှစ်တာအတွင်း ထာဝရငြိမ်းချမ်းရေးရရှိအောင် ဆောင် ရွက်မယ်လို့ဆို

🟥PDF များလက်နက်ကိုင်ခြင်းက နိုင်ငံရဲ့ပညာရေးအားနည်းချက်ကို နိုင်ငံရေးသမားတွေက အမြတ်ထုတ်ခြင်းဖြစ်ဟုလည်းပြော

BBM-မေ၂၆
သတင်း-မင်းသော်

စစ်ခေါင်းဆောင်ဟောင်း မင်းအောင်လှိုင်အနေနဲ့ သူသမ္မတလုပ် အုပ်ချုပ်မည့် (၅)နှစ်တာ ကာလအတွင်း ထာဝရငြိမ်းချမ်းရေးရရှိအောင် မျှော်မှန်းချက်ထားပြီး ဆောင်ရွက်သွားမယ်လို့ ပြောဆိုထားတယ်လို့ သိရပါတယ်။

မေလ၂၆ ရက်နေ့(ဒီနေ့) နေပြည်တော်ရှိ နိုင်ငံတော် သမ္မတရုံးတော်၊ ပြည်ထောင်စုအစိုးရအဖွဲ့အစည်းအဝေးခန်းမမှာ ပြုလုပ်တဲ့ ပြည်ထောင်စု အစိုးရအဖွဲ့အစည်းအဝေးမှာ စစ်ခေါင်းဆောင် မင်းအောင်လှိုင်က အထက်ပါအတိုင်းပြောကြားခဲ့တယ်လို့ သိရပါတယ်။

အဆိုပါအစည်းအဝေးအတွင်း မင်းအောင်လှိုင်က နိုင်ငံရဲ့ လုံခြုံရေး၊ပညာရေးအကြောင်းပြောရာမှာ ၎င်းစတင်တာဝန်ယူခဲ့တဲ့အချိန်ကစပြီး ရက်ပေါင်း၁၀၀ အတွင်း ငြိမ်းချမ်းရေးဆွေးနွေးခြင်းတွေဆောင်ရွက်ဖို့ ဖိတ်ခေါ်ပြီးလက်ရှိ EAOတွေနဲ့ အောက်ခြေမှာ ထိတွေ့ဆောင်ရွက်မှုတွေရှိနေတယ်လို့ဆိုကာ PDFများအနေနဲ့ ပြီးခဲ့တဲ့ ၂၀၂၀ ရွေးကောက်ပွဲက နိုင်ငံရေးဖြစ်စဥ်တွေကို လက်မခံဘဲ လက်နက်ကိုင်ကြခြင်းဖြစ်တယ်လို့ စွပ်စွဲပြောဆိုထားပါတယ်။

ဒီလိုဖြစ်လာရခြင်းက တိုင်းပြည်ရဲ့ပညာရေးအားနည်းချက်ကို ပြည်တွင်း၊ပြည်ပ နိုင်ငံရေးသမားတွေက ၎င်းတို့ကိုယ်ကျိုးအတွက် သွေးထိုးလှုံ့ဆော်ပြီး အသုံးချလုပ်ဆောင်ခဲ့တာကြောင့် ၎င်းအနေနဲ့ နိုင်ငံပညာရေးကို မဖြစ်မနေပြုပြင်ပြောင်းလဲဖို့ အကြိမ်များစွာ ပြောကြားခဲ့ခြင်းဖြစ်တယ်လို့လည်း ပြောပါတယ်။

ပညာရေးဖွံ့ဖြိုးတိုးတက်စေဖို့က တည်ငြိမ်အေးချမ်းဖို့လိုအပ်တာမို့ လာမဲ့(၅)နှစ်တာ ကာလအတွင်း ထာဝရငြိမ်းချမ်းရေးရဖို့ မျှော်မှန်းချက်ထားကာ ကြိုးပမ်းဆောင်ရွက်မှာဖြစ်ပြီး ၎င်းတို့က ဘယ်လောက်ပဲကြိုးစားနေပါစေ လက်နက်ကိုင်အဖွဲ့တွေက ယုံကြည်ချက်၊ခံယူချက်ရှိစွာနဲ့ တိုင်းပြည်ဖွံ့ဖြိုးတိုးတက်ရေးအတွက် ဝိုင်းဝန်းပူးပေါင်းဆောင်ရွက်ဖို့လိုတယ်လို့လည်း ပြောဆိုထားပါတယ်။

အဆိုပါအစည်းအဝေးအတွင်း နောက်ထပ်လည်း မင်းအောင်လှိုင်က နိုင်ငံတကာဆက်ဆံရေး၊ အလုပ်အကိုင်ရရှိရေး၊ ကျောင်းနေအရွယ်ကလေးငယ်တွေ ပညာသင်ကြားနိုင်ရေးနဲ့ ချင်းပြည်နယ် အတွင်းထိခိုက်တဲ့ ပြည်သူပိုင်အဆောက်အဦးတွေကို ပြန်လည်ထူထောင်ရေးသာမက အားကစားကဏ္ဍမြှင့်တင်ခြင်းတွေကိုပါ ထည့်သွင်းပြောခဲ့ပြီး တော်လှန်ရေးအင်အားစုတွေအပေါ် ပြစ်တင်ရှုတ်ချမှုတွေလည်း ပြုလုပ်သွားတယ်လို့ သိရပါတယ်။

Photo-ပုံဟောင်း

မြင်းခြံ-တောင်သာလမ်း တိုက်ခိုက်မှုမှာ စစ်တပ် ထံသွားပေါင်းတဲ့ တော်လှန်ရေးရဲဘော်ဟောင်း (၂) ဦးအပါ စကစအလောင်း (၄)လောင်းရ

BBM-မေ၂၆
သတင်း-မင်းသော်

မြင်းခြံမြို့နယ်အတွင်းက မြင်းခြံ-တောင်သာလမ်းပိုင်း တိုက်ခိုက်မှုအတွင်း စစ်တပ်နဲ့သွား ရောက်ပူးပေါင်းတဲ့ တော်လှန်ရေးရဲဘော်ဟောင်း (၂)ဦးအပါ စကစ အလောင်း (၄)လောင်းနဲ့ လက်နက်(၄)လက် သိမ်းဆည်းနိုင်ခဲ့တယ်လို့မြင်းခြံခရိုင်တပ်ရင်း(၁) ထံမှ သိရပါတယ်။

ပြီးခဲ့တဲ့ မေလ၂၄ ရက်နေ့ကတည်းက တော်လှန် ရေးအင်အားစုတွေက မြင်းခြံ-တောင်သာလမ်းမှာ စကစ အသွားအလာရှိတာကြောင့် ရှောင်တခင်စစ်ဆေးနေစဥ်မှာ စစ်ကောင်စီကား(၂)စီးရောက်လာကာ ပစ်ခတ်မှုဖြစ်ပြီး စကစ (၁၂)ဦးထိသေဆုံးတယ်လို့ ဆိုပါတယ်။

တော်လှန်ရေးအဖွဲ့ဝင်တချို့ဟာ ရှောင်တခင်စစ်ဆေးရာနေရာမတိုင်မှီ ကြိုတင်ကင်းပုန်းဝပ်ထားကြပြီး စစ်ကောင်စီကား(၂)စီးကလည်း ရှောင်တခင်စစ်ဆေးနေတာကိုတွေ့တာကြောင့် ကင်းပုန်းဝပ်ရာနေရာတည့်တည့်မှာပဲ ကားရပ်လိုက်တာကြောင့် ကင်းပုန်းဝပ်သူတော်လှန်ရေးအင်အားစုတွေက လက်ဦးမှုယူပစ်ခတ်နိုင်ခဲ့ကာ စကစ အလောင်း(၄)လောင်း၊လက်နက် (၄)လက်နဲ့ ကား(၁)စီးကို သိမ်းဆည်းနိုင်ခဲ့တယ်လို့ သိရပါတယ်။

တော်လှန်ရေးအဖွဲ့တွေရရှိလိုက်တဲ့ စကစဘက်မှ အလောင်း(၄)လောင်းအတွင်း စစ်ကောင်စီထံ အညံ့ခံသွားရောက်ပူးပေါင်းခဲ့တဲ့ သစ္စာဖောက် တော်လှန်ရေးရဲဘော်ဟောင်း(၂)ဦးပါဝင်တယ်လို့ မြင်းခြံခရိုင် အမှတ်(၁)တပ်ရင်းမှ ကိုဝမ်းတူးက BBM ကိုပြောပါတယ်။

"ကျွန်တော်တို့က သတင်းရလို့ စစ်တာကတစ်နေရာပေါ့ ကင်းပုန်းက ကြိုပြီး ချထားပီသား၊ ကားတွေက ကင်းပုန်းရှေ့ ပထမ တစ်စီးလာရပ်တာ၊ ကင်းပုန်းအဖွဲ့ က စပြီးတိုက်လိုက်တာ ပထမ ကားသမားမှန်ပြီး ပစ်ခတ်ရှင်းလင်းတာ၊အလောင်း၄ လောင်းအလက်လေးလက်ရတယ်၊ အလောင်း(၄) လောင်းထဲ စကစ ထံ အညံ့ခံသွားတဲ့ ရဲဘော်ဟောင်းအောင်ကြီးနဲ့ ချေဆေး ဆိုတဲ့ နှစ်ကောင်လည်းပါပါတယ်"

အဆိုပါ ကားအပြင် နောက်ကပါလာတဲ့ စကစ ကားကိုလည်း တော်လှန်ရေးအဖွဲ့တွေက လိုက်လံပစ်ခတ်ခဲ့ပေမဲ့လည်း ပြန်မောင်းပြေးသွားတာကြောင့် အ လောင်း၊လက်နက်တွေထပ်မံမရရှိပေမဲ့ စုစုပေါင်း စကစ အရာရှိ(၁)ဦးအပါ (၁၂)ဦးအထိ သေဆုံးမှုများတယ်လို့လည်း ဆိုပါတယ်။

အဆိုပါတိုက်ခိုက်မှုကို မြင်းခြံခရိုင် အမှတ်(၁) တပ်ရင်း၊အမှတ်(၂)တပ်ရင်း၊ အမှတ်(၇)တပ်ရင်း၊ မြင်းခြံမြို့နယ် ပကဖ(တိုက်နယ်၂)နဲ့ နွားထိုးကြီးမြို့နယ် ပကဖ တို့က ပူးပေါင်းဆောင်ရွက်ခဲ့ခြင်းဖြစ်တယ်လို့ သိရပါတယ်။

Photo- တိုက်ပွဲအတွင်းပုံ
https://www.facebook.com/share/p/1Tw9MRwGje/

သွေးသစ္စာသီချင်းဟာ စစ်ချီတေးမဟုတ်ဘူးလို့ စစ်တပ် CDM တွေဖွင့်ဟ

BBM - မေ ၂၇
သတင်း - ဧက

လူထုလှုပ်ရှားမှုတွေတိုင်း ပြည်သူရဲ့စိတ်ဓာတ်ကိုမြှင့်တင်ဖို့ရေးစပ်ထားတဲ့ သွေးသစ္စာသီချင်းကို စစ်တပ်ကခိုးယူကာ စစ်ချီတေးဆိုပြီး တွင်တွင်ပြောနေပေမယ့် ဒီသီချင်းဟာ စစ်ချီတေးမဟုတ်ဘူးလို့ စစ်တပ် CDM အသိုင်းအဝိုင်းက ဖွင့်ဟလိုက်ပါတယ်။

စစ်တပ်ထဲမှာ နှစ်ပေါင်း ၂၀ ကျော်ကြာတာဝန်ထမ်းဆောင်ခဲ့တဲ့ CDM အရာရှိတစ်ဦးက သူစစ်သားဘဝတစ်လျှောက်လုံးသင်ခဲ့တဲ့ရတဲ့စစ်ချီတေးတွေထဲမှာ ဒီသီတင်းမပါဘူးလို့ ဆိုပါတယ်။

စစ်တပ်က သွေးသစ္စာသီချင်းသံစဉ်ရော စာသားအများစုကိုခိုးယူကာ စားသားအနည်းငယ်ပြောင်းပြီး စစ်သားသွေးနီရှေ့သို့ချီ ဆိုတဲ့ သီချင်းခေါင်းစဉ်နဲ့ စစ်ချီတေးအဖြစ် စစ်တပ်ရော၊ စစ်တပ်လော်ဘီတွေကပုံဖော်နေကြတာဖြစ်ပါတယ်။

"ကျွန်တော်အကြမ်းဖက်စစ်တပ်ထဲမှာ အနှစ် ၂၀ နေခဲ့တယ်။ ပြီးရင်လဲ စစ်သင်တန်းတွေတော်တော်များများလည်းတက်ခဲ့ရတာတွေရှိတယ်။ စစ်သင်တန်းတွေ၊ တော်လှန်ရေးနေ့လိုနေ့တွေမှာ စစ်သီချင်းတွေကမဆိုမဖြစ်ဆိုကိုဆိုရတယ်။ စစ်သီချင်းတွေအားလုံးကိုလည်း အခြေခံစစ်ပညာသင်တန်းထဲက မရရအောင် လေ့ကျင့်ပြီးတော့သင်ပေးတယ်။ ဒီသီချင်းကိုတော့ လုံးဝမဆိုခဲ့ဖူးဘူး။ ဒီသီချင်းကစစ်ချီတေးလည်းမဟုတ်ဘူး။ စစ်သည်တေးလဲမဟုတ်ဘူး"လို့ CDM အရာရှိတစ်ဦးကပြောပါတယ်။

အဲ့ဒီ သွေးသစ္စာသီချင်းဟာ ၁၉၈၉ ခုနှစ်က ကရင်အမျိုးသားအစည်းအရုံး (KNU) ထိန်းချုပ်နယ်မြေထဲမှာ တေသံရှင်ထူးအိမ်သင်က ကိုယ်တိုင်ရေးသားဖန်တီးခဲ့တာဖြစ်ပြီး ၁၉၉၂ မှာတော့ အဆိုတော်မွန်းအောင်က ဘန်ကောက်မှာအသံသွင်းကာ တော်လှန်ရေးလှုံ့ဆော်တေးအဖြစ် သီဆိုခဲ့တာဖြစ်ပါတယ်။

မြန်မာနိုင်ငံရဲ့ စစ်အာဏာရှင်စနစ်ဆန့်ကျင်ရေး လူထုလှုပ်ရှားမှုတွေတိုင်းမှာ လူထုစိတ်ဓာတ်ကိုမြှင့်တင်ဖို့ ရေးဖွဲ့ထားတဲ့ သွေးသစ္စာသီချင်းကိုသီဆိုခဲ့ကြပြီး စစ်တပ်ဝါဒဖြန့်ချီရေးဌာနက စာသားတချို့ပြောင်းလဲကာ နာမည်ပြောင်းထုတ်လွှင့်ခဲ့တဲ့အပေါ် မူရင်းအဆိုတော်မွန်းအောင်ကလည်း သူ့ရဲ့လူမှုကွန်ရက်စာမျက်နှာကတစ်ဆင့် ပြင်းပြင်းထန်ထန်ဝေဖန်ကန့်ကွက်ထားပါတယ်။

အဲ့ဒီသီချင်းကို စစ်တပ်ရဲ့ ပြည်သူ့ဆက်ဆံရေးနဲ့ စိတ်ဓာတ်စစ်ဆင်ရေးညွှန်ကြားရေးမှူးရုံးရဲ့ အစီအစဉ်နဲ့ စာသားတချို့ပြောင်းလဲပြီး စစ်သားသွေးနီရှေ့သို့ချီ ဆိုတဲ့နာမည်နဲ့ စစ်တပ်ပိုင်မြဝတီရုပ်သံလိုင်းကနေ ထုတ်လွှင့်ခဲ့တာဖြစ်ပါတယ်။

"လက်ရှိအခြေအနေမှာ စစ်ရေးအရ စစ်တပ်ဘက်က အသာစီးရလာတာတွေရှိတယ်။ အဲ့ဒီလိုရှိလာချိန် တော်လှန်ရေးဘက်ကို ရည်ရွယ်ချက်ရှိရှိဦးနှိမ်ချင်လို့ အခုလိုအချိန်ကိုက်ပြုလုပ်တာဖြစ်နိုင်တယ်"လို့ CDM ဗိုလ်ကြီးတစ်ဦးက သုံးသပ်ပါတယ်။

သွေးသစ္စာသီချင်းကို စစ်တပ်ကအရှက်သိက္ခာမဲ့စွာခိုးယူပြောင်းလဲပြီး ထုတ်လွှင့်ခဲ့တဲ့အပေါ် လူမှုကွန်ရက်စာမျက်နှာသုံးစွဲသူအများစုကလည်း ပြင်းပြင်းထန်ထန်လှောင်ပြောင်ဝေဖန်နေကြပါတယ်။

လူမှုကွန်ရက်သုံးစွဲသူအမျိုးသားတစ်ဦးက "စစ်တပ်က သွေးသစ္စာသီချင်းကိုတော့ ခိုးဆိုနေပြီ။ နောက်ဆို ရောင်နီသီချင်းလည်း ဆိုပါတော့မယ်ဗျာ"ဆိုပြီးပြောဆိုနေကြသလို နောက်တစ်ဦးကလည်း "သွေးသစ္စာခွေးဆွဲခံရ၊ ကမ္ဘာမကြေလည်းအမြန်ရှောင်"ဆိုပြီး လှောင်ပြောင်ရေးသားထားကြပါတယ်။

အဆိုတော်မွန်းအောင်ရဲ့ပြောပြချက်အရ စစ်တပ်ဟာ အဆိုတော်ထူးအိမ်သင်ရဲ့အနုပညာလက်ရာကို ခိုးယူပြီး သူတို့စိတ်ကြိုက်စာသားတွေညှပ်ထည့် အမြတ်ထုတ်နေတာဖြစ်ပြီး လွန်ခဲ့တဲ့ ၁၀ နှစ်ကလည်း ကြံ့ဖွတ်ပါတီနဲ့ စစ်တပ်က ဝါဒဖြန့်ဖို့အတွက် ဒီသီချင်းကို စာသားပြင်ကာ လုပ်ကြံဖန်တီးဖူးခဲ့သေးတယ်လို့ သိရပါတယ်။

အဲ့ဒီတုန်းကလည်း စစ်တပ်က သမိုင်းကိုလိမ်ဖို့အတွက် ဓာတ်ပြားဟောင်းအတုတစ်ခုကိုဖန်တီးပြသဖူးပေမယ့် တော်လှန်ရေးအင်အားစုတွေဘက်က ရှင်းလင်းချေပခဲ့ပြီးဖြစ်သလို အတုအယောင်ဓာတ်ပြားတွေနဲ့ ဘယ်လောက်ပဲလိမ်ညာဖို့ကြိုးစားပါစေ သမိုင်းသက်သေရှိနေသမျှတော့ အတုကအစစ်ကိုမကျော်နိုင်ဘူးလို့ အဆိုတော်မွန်းအောင်က ရေးသားထားတာဖြစ်ပါတယ်။
https://www.facebook.com/share/p/1PjjcL39wR/

တောင်ကိုရီးယားက ၂၀၃၀ခုနှစ် အလွန်မှာ ပထမဆုံး နျူကလီးယားစွမ်းအင်သုံး ရေငုပ်သင်္ဘော အသုံးပြုဖို့ ရည်မှန်းထား

BBM - မေ ၂၇

တောင်ကိုရီးယားက မြောက်ကိုရီးယားရဲ့ ရေငုပ်သင်္ဘောသုံး နျူကလီးယားနဲ့ ဒုံးကျည် ခြိမ်းခြောက်မှုတွေကို ပြန်တုံ့ပြန်ဖို့အတွက် စီမံကိန်းအသစ်တစ်ခု ရေးဆွဲနေတယ်လို့ နိုင်ငံတကာသတင်းဌာနတွေမှာ ဖော်ပြထားပါတယ်။

အဲဒီစီမံကိန်းအရ ၂၀၃၀ ပြည့်လွန်နှစ်တွေရဲ့ အလယ်ပိုင်းလောက်မှာ ပထမဆုံး နျူကလီးယားစွမ်းအင်သုံး ရေငုပ်သင်္ဘောကို လွှတ်တင်ဖို့ ကြိုးစားသွားမယ်လို့ ကာကွယ်ရေးဝန်ကြီး အန်ဂယူဘတ် (Ahn Gyu-back) က မေလ ၂၆ ရက်နေ့မှာ ပြောကြားခဲ့ပါတယ်။

တောင်ကိုရီးယားဟာ နျူကလီးယားရေငုပ်သင်္ဘော ပိုင်ဆိုင်ထားတဲ့ ထိပ်တန်းနိုင်ငံတွေထဲ ဝင်နိုင်ဖို့ ကြိုးစားနေတာ ကြာပါပြီ။

ဒီခြေလှမ်းက အာရှရဲ့ လုံခြုံရေးအခြေအနေကို ပုံစံတစ်မျိုး ပြောင်းလဲသွားစေနိုင်သလို ရေအောက် လက်နက်ပြိုင်ဆိုင်မှုကိုလည်း ပိုပြီး ပြင်းထန်လာစေနိုင်ပါတယ်။

တောင်ကိုရီးယားသမ္မတ လီဂျေမြောင် (Lee Jae Myung) ကလည်း “ခိုင်မာတဲ့ တောင်ကိုရီးယား-အမေရိကန် မဟာမိတ်အပေါ် အခြေခံပြီး တည်ဆောက်မယ့် ဒီနျူကလီးယားရေငုပ်သင်္ဘောဟာ ကိုရီးယားကျွန်းဆွယ်ရဲ့ ငြိမ်းချမ်းရေးနဲ့ လုံခြုံရေးကို ကျွန်တော်တို့ ကိုယ်တိုင် တာဝန်ယူ စောင့်ရှောက်မယ်ဆိုတဲ့ ဆန္ဒကို ပြသလိုက်တာပဲ” လို့ နိုင်ငံရဲ့ အနာဂတ် ကာကွယ်ရေးဗျူဟာကို စိစစ်တဲ့ ကော်မတီမှာ ပြောခဲ့ပါသေးတယ်။

ကာကွယ်ရေးဝန်ကြီး အန်က တောင်ကိုရီးယားရဲ့ နျူကလီးယားရေငုပ်သင်္ဘော ပိုင်ဆိုင်ခွင့် ရရှိရေး အခြေခံအစီအစဉ်ကို ချပြရာမှာ ဒီရေငုပ်သင်္ဘောဟာ ယူရေနီယံအနိမ့်စား လောင်စာကိုပဲ သုံးမှာဖြစ်ပြီး တောင်ကိုရီးယားနိုင်ငံ ပြည်တွင်းမှာပဲ ဒီဇိုင်းဆွဲ တည်ဆောက်သွားမယ်လို့ ပြောပါတယ်။

အဲဒီအပြင် ဒီစီမံကိန်းဟာ တောင်ကိုရီးယားရဲ့ နျူကလီးယားနည်းပညာ၊ သင်္ဘောကျင်းလုပ်ငန်းနဲ့ ကာကွယ်ရေးစက်မှုလုပ်ငန်းတွေကို အခြေခံပြီး အကောင်အထည်ဖော်သွားမှာ ဖြစ်သလို နျူကလီးယားလက်နက်တွေကို လုံးဝဝယ်ယူတာ ဒါမှမဟုတ် တီထွင်ထုတ်လုပ်တာမျိုး မလုပ်ဘူးဆိုတဲ့ ဆိုးလ်ရဲ့ ကတိကဝတ်ကိုလည်း ဆက်ပြီး ထိန်းသိမ်းသွားမှာပါလို့ သူက ဆိုပါတယ်။

သမ္မတ လီက အစိုးရအဖွဲ့အစည်းအဝေးမှာ ဒီစီမံကိန်းရဲ့ အရေးပါပုံကို အလေးအနက်ထား ပြောကြားခဲ့တာကြောင့် တောင်ကိုရီးယားရဲ့ နာမည်ကြီး သင်္ဘောကျင်းကုမ္ပဏီတွေဖြစ်တဲ့ Hanwha Ocean ရဲ့ ရှယ်ယာဈေးက ၁၀.၂ ရာခိုင်နှုန်း၊ HD Hyundai Heavy ရဲ့ ရှယ်ယာဈေးက ၉.၆ ရာခိုင်နှုန်းစီ အသီးသီး တက်ပြီး ဈေးပိတ်သွားခဲ့ပါတယ်။

ကာကွယ်ရေးဝန်ကြီး အန်က နျူကလီးယားလက်နက်တွေ မပြန့်ပွားစေဖို့အတွက် လိုအပ်တဲ့ ယူရေနီယံအနိမ့်စား လောင်စာကို ရယူမယ့် လုပ်ငန်းစဉ်တစ်လျှောက်လုံးမှာ တောင်ကိုရီးယားအနေနဲ့ အမေရိကန်နဲ့ အနီးကပ် ပူးပေါင်းဆောင်ရွက်သွားမှာ ဖြစ်သလို၊ နိုင်ငံတကာ အနုမြူစွမ်းအင် အေဂျင်စီ (IAEA) နဲ့လည်း အတူတူ လက်တွဲလုပ်ဆောင်သွားမယ်လို့ ဆိုပါတယ်။

ဒါ့အပြင် ဒီစီမံကိန်းအရ ပထမဆုံး ရေငုပ်သင်္ဘောကို ၂၀၃၀ ပြည့်လွန်နှစ်တွေရဲ့ အလယ်ပိုင်းလောက်မှာ စတင်လွှတ်တင်နိုင်ဖို့ ရည်မှန်းထားတယ်လို့ ကာကွယ်ရေးဝန်ကြီး အန်က ဖြည့်စွက်ပြောကြားခဲ့ပါတယ်။

အစိုးရရဲ့ ပြောကြားချက်အရ နျူကလီးယားစွမ်းအင်သုံး မောင်းနှင်စနစ်ကြောင့် ဒီရေငုပ်သင်္ဘောအသစ်တွေဟာ အခုလောလောဆယ် တောင်ကိုရီးယားမှာ ရှိနေတဲ့ ရေငုပ်သင်္ဘောတွေထက် ရေအောက်မှာ အကြာကြီး ငုပ်လျှိုးနေနိုင်မှာ ဖြစ်သလို ပိုပြီးတော့လည်း လျင်လျင်မြန်မြန် သွားလာလှုပ်ရှားနိုင်မှာ ဖြစ်ပါတယ်။

Reference - The Straits Times
Photo - The Straits Times
Translation - Richard
https://www.facebook.com/share/p/1PFkUwEvnr/

အင်အား၃၀၀ပါ စစ်ကြောင်း ညောင်ဦးမှာအတိုက်ခံရပြီး စကစ(၁၇)ဦးသေ

BBM-မေ၂၇
သတင်း-မင်းသော်

အင်အား(၃၀၀)နဲ့ စစ်ကြောင်း(၃)ကြောင်းခွဲပြီးထိုးလာတဲ့ စကစ စစ်ကြောင်းတွေ ညောင်ဦးမြို့နယ်အတွင်း အတိုက်ခံရပြီး စကစ (၁၇)ဦးသေဆုံးခဲ့တယ်လို့ ညောင်ဦးမြို့နယ် ပြည်သူ့ကာကွယ်ရေးတပ်ဖွဲ့ထံမှ သိရပါတယ်။

ပြီးခဲ့တဲ့မေလ ၂၄ရက်နေ့က ညောင်ဦးမြို့နယ်၊ ငါ့သရောက်နယ်မြေအတွင်းကို အင်အား(၃၀၀)နဲ့စစ်ကြောင်းထိုးလာပြီး ပြည်သူပိုင်ပစ္စည်းတွေကို မတရားခိုးယူပြီး ရွာလုံးကျွတ်မီးရှို့နေတဲ့ စစ်တပ်ကို မနက်၁၀နာရီခွဲအကျော်မှာ စတင်တိုက်ခိုက်ခဲ့ခြင်းဖြစ်တယ်လို့ သိရပါတယ်။

တိုက်ပွဲကြာမြင့်ချိန် ၂နာရီခန့်ကြာမြင့်ပြီး တော်လှန်ရေးတပ်ဖွဲ့တွေရဲ့ အနီးကပ်တိုက်ခိုက်မှုကြောင့် စကစ ၁၇ဦးသေဆုံးပြီး ထိခိုက်ဒဏ်ရာရသူ (၅၀)ကျော်ရှိကာ ပြန်လည်ဆုတ်ခွါသွားတယ်လို့ သိရပါတယ်။

ဒဏ်ရာရသူ စကစ တွေကို ညောင်ဦးဆေးရုံနဲ့ ကျောက်ပန်းတောင်းဆေးရုံတွေထံ ခေါ်ဆောင်သွားသလို နီးစပ်ရာရွာတွေမှာ ဆေးမှီးတိုနဲ့ကုသမှုအချို့လည်း ပြုလုပ်ခဲ့ပြီး စကစ (၄)ဦးထပ်မံသေဆုံးခဲ့တယ်လို့ ဆိုပါတယ်။

တိုက်ပွဲအတွင်း စကစ ရဲ့မီးရှို့မှုကြောင့် ညောင်ဦးမြို့နယ်၊ ကူတောကျေးရွာမှ ပြည်သူနေအိမ်၃၀၀ ခန့် မီးလောင်ပျက်စီးခဲ့ရပြီး အရေးပေါ်အကူအညီတွေလည်း လိုအပ်တာကြောင့် ပြည်တွင်းပြည်ပ အလှူရှင်တွေအနေနဲ့ ကူညီရန် ညောင်ဦးမြို့နယ် ပြည်သူ့ကာကွယ်ရေးအဖွဲ့က တောင်းဆိုထားပါတယ်။

အဆိုပါတိုက်ခိုက်မှုကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ ညောင်ဦးခရိုင် တပ်ရင်း (၁)၊ တပ်ရင်း(၅)၊ ညောင်ဦးခရိုင်အထူးတိုက်ခိုက်ရေး၊Popa Production and Guerrila Force (PPGF)၊People Democratic Army(PDA)
၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နှင့်ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ပျောက်ကျားတပ်) တို့မှ ပူးပေါင်း တိုက်ခိုက်ခဲ့တယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)ကထုတ်
ပြန်ထားပါတယ်။

Video-ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး) Part 2
https://www.facebook.com/share/v/1H4sVuLRtZ/

စင်ကာပူ နိုင်ငံခြားရေးဝန်ကြီး မြောက်ကိုရီးယားကို ရောက်ရှိ

BBM - မေ ၂၇

စင်ကာပူနိုင်ငံခြားရေးဝန်ကြီး ဗီဗီယန် ဘာလာခရစ်ရှနန်ဟာ ပြီးခဲ့တဲ့ မေလ ၂၆ရက်နေ့က ပြုံယမ်းမြို့မှာ မြောက်ကိုရီးယား နိုင်ငံခြားရေးဝန်ကြီး ချွဲဆွန်းဟီးနဲ့ တွေ့ဆုံပြီး နှစ်နိုင်ငံကြား ဆက်ဆံရေး ပိုကောင်းလာအောင် လုပ်ဖို့ ဆွေးနွေးခဲ့ကြတယ်လို့ မြောက်ကိုရီးယားအစိုးရပိုင် KCNA သတင်းဌာနက မေလ ၂၇ရက်နေ့မှာ ဖော်ပြထားပါတယ်။

ဒါ့အပြင် ဝန်ကြီးနှစ်ယောက်ဟာ ဒေသတွင်းကိစ္စတွေနဲ့ ကမ္ဘာ့ရေးရာ ကိစ္စရပ်တွေကိုလည်း အမြင်ချင်းဖလှယ် ဆွေးနွေးခဲ့ကြတယ်လို့ KCNA က ဆိုပေမဲ့ အသေးစိတ်ကိုတော့ ရှင်းရှင်းလင်းလင်း ထည့်သွင်းပြောကြားသွားတာမျိုး မရှိပါဘူး။

ဝန်ကြီး ဘာလာခရစ်ရှနန်ဟာ မြောက်ကိုရီးယားခရီးစဉ်အပြီးမှာ တောင်ကိုရီးယားနိုင်ငံဆီ ဆက်ပြီး သွားဖို့ ရှိနေပါတယ်။

စင်ကာပူ သံတမန်တစ်ယောက်အနေနဲ့ ကိုရီးယားနှစ်နိုင်ငံစလုံးဆီကို အခုလို ဆက်တိုက်သွားရောက်တာမျိုးက တော်တော့်ကို ရှားပါးတဲ့ ခရီးစဉ်တစ်ခု ဖြစ်ပါတယ်။

ပြီးခဲ့တဲ့ ၂၀၁၈ ခုနှစ်တုန်းက အမေရိကန်နဲ့ မြောက်ကိုရီးယား ခေါင်းဆောင်နှစ်ယောက်ရဲ့ ပထမဆုံးအကြိမ် သမိုင်းဝင် ထိပ်သီးအစည်းအဝေးကို စင်ကာပူက အိမ်ရှင်အဖြစ် လက်ခံကျင်းပပေးခဲ့စဉ်ကတည်းက ဝန်ကြီး ဘာလာခရစ်ရှနန်ဟာ စင်ကာပူအစိုးရအဖွဲ့ရဲ့ ဝန်ကြီးတစ်ယောက် ဖြစ်နေခဲ့တာပါ။

အဲ့ဒီ ၂၀၁၈ ဇွန်လတုန်းက အမေရိကန်သမ္မတ ဒေါ်နယ်ထရမ့်နဲ့ မြောက်ကိုရီးယားခေါင်းဆောင် ကင်ဂျုံအွန်တို့ဟာ ငြိမ်းချမ်းတဲ့ ဆက်ဆံရေးအသစ်တွေ စတင်ဖို့နဲ့ မြောက်ကိုရီးယားရဲ့ နျူကလီးယားအစီအစဉ်ကို ရပ်တန့်ဖို့ ပူးတွဲကြေညာချက်တစ်ခုကို လက်မှတ်ရေးထိုး သဘောတူခဲ့ကြပါတယ်။

အခုလည်း ထရမ့်က ကင်ဂျုံအွန်နဲ့ တွေ့ဆုံဆွေးနွေးဖို့ ထပ်ပြီး ဆန္ဒရှိနေသလို သူတို့နှစ်ယောက်ကြား ဆက်ဆံရေး ကောင်းမွန်ပါတယ်လို့ ပြောဆိုထားပေမဲ့ မြောက်ကိုရီးယားဘက်ကတော့ ဒီကမ်းလှမ်းချက်အပေါ် တိုက်ရိုက်တစ်စုံတစ်ရာ ပြန်လည်တုံ့ပြန်တာမျိုး မရှိသေးပါဘူး။

Reference - Reuters
Photo - Reuters
Translation - Richard
https://www.facebook.com/share/p/18f8RkwJwP/