برای سر فرازی های تاریخ ایلم:
💐💐💐بیرانوند💐💐💐


شوئه تارش زُوارونِ سحر بی
بَلی بی داغ صد زخم تَوَر بی

هنی هم شیر بیشه روزگاره
تَنیا ایلی که چو پُشتِ کَوَر بی

#حجت_زرینجو_بیرانوند

:
پا وه پا تو نو بهار افتا وه ره
قافله خنه وه بار افتا وه ره
میرتی سی تو ولاتی زن وه بار
پشت پات ایلی سوار افتا وه ره
جمسی کوه جمس و پشت سرت
برد برد و دار دار افتا وه ره
زرده خنه کردی افتو سر کشی
توک توکآو برفا نسار افتا وه ره
پچ پچت پیچس ده گوش تاف آو
سیمره ری وه بنار افتا وه ره
سر پتی کردی پریشونی جمس
ناله  باد بیقرار افتا وه ره
تو رتی مه منم و سیک ای مزار
ری جنازه ام مور و مار افتا وه ره
ده مزاری که وه دسیا خوم کنم
صد مه خاک اوار سینه ام بی منم
اشکسم ده زور پنجه ات مل قعی
سی مه پرسی سی همه بیت بعی
ده بهارت چن پلی بهرم نعی
ده همه باغت تلی بهرم نعی
غیض توزت سی مه واباقی وه ناز
سوزلونت بی وه جا  بوری وراز
بلگ ریزون خزونت سی منه
پا قدم شر یخ بنونت سی منه
زندگی  مه ذره ذره مردنه
زندگی شَر چینَه خی خوت هَردنَه
جو بَنیمو  دی غریوی بیترَه
دَس اَجل دی سی نصیوی بیتَره
سَر جنازه ام موئَه آری نی درَک
دَنگ هلاتَه دَس براری نی درَک
خوم حکیم زخمیا کاری خومم
گیر ناچار گرفتاری خومم
میا رویی رو پشت پشت ماه صفر
شرته کم کو به بمونم وا چمر
تو خویی دختر خدایی مه گنم
ده ولم کو  به فقیریمن بنم
دس پتینم وا خدا داریا بمو
هه رفیق گرگ و کفتاریا بمو
مه الوئم عمریه دالی نکرد
مه پلنگم بو وه مردالی نکرد
لیوه حالم پر سرم دنگ رم رمه
خوت وه او ره نزه که دونی چمه

#حجت_زرینجو_بیرانوند

@boosondobeyti