إيه الصوت ده!!!
ده جاي من شقة سيف، يا جمال
_اقعدي مكانك... رايحة فين؟
_يوه، هطلع أشوف في إيه
جمال بضيق:
_اقعدي يا وليّة مكانك، واحد ومراته في بيتهم، إحنا مالنا؟
الباب خبط
_دة شكله سيف، هفتح.
_عمو جمال موجود؟
_جوه... ادخلي يا بنتي، في إيه؟
_ ابنك ضربني يا عمو علشان عارف إني ما ليش أهل هنا...
" دخل سيف وهو متعصب"
_نازلة تشتكيني لأبويا؟
تعالي هنا
جمال بصوت عالي:
_ما تعلّيش صوتك سامع
سيف، إنت فعلاً مدّيت إيدك على مراتك؟
فتحية:
_ دي عين ودخلت البيت...
جمال:
_إيدك اتمدّت عليها؟
ردّ عليا
سيف بتردد:
_آه، علشان...
" مكملش الكلمه لاقيته ضربه قلمين علي وشة وهو واقف ثابت منطقتش بكلمة "
جمال بغضب:
_الراجل اللي ياخد قوامته علي الست الي معاة بالضرب والصوت العالي ميبقاش راجل .
البِنت دي سابت أهلها وناسها وبلدها علشانك...
أقل واجب عليك تبقى أهلها وناسها ، مش تهينها وتمد ايدك عليها.
"بص لي وقال:"
_حقك عليا يا بنتي،
وما تقوليش تاني إنك ما لكيش أهل...
أنا هنا أبوكي، وأجيبلك حقك من أي حد، حتى لو كان ابني...
بس بلاش عياط بقى.
مسحت دموعي بطرف الاسدال وقولت:
_شكراً... بس أنا عايزة أرجع لأهلي.
فتحية:
_يا خبر! إيه اللي حصل لكل ده بس ؟
"عيطي زاد "
_مفيش... سيف عايز يتجوز عليا.
جمال بهدوء:
اية دة بجد مبروك يا سيف... مبروك يحبيبي بس يا تري هتتجوز فين؟
_في شقتي.
قرب منه خطوة وقال:
_تقصد شقتي أنا، اللي ادهالك علشان تتجوز بنت الناس دي
عايز تتجوز؟
براحتك وحقك يا بني محدش يقدر يعرضك ...
بس تشوفلك شقة جديدة بعيد عن هنا.
سكتت ثواني وقال:
_اسمعي يا أروى، الشقة اللي فوق دي بيتك إنتي وبنتك، ما تسيبيهاش .
سيف بص له بضيق وقال:
_ بتقويها عليا يا حج
جمال بجمود:
_فتحية، خدي مرات ابنك وادخلي جوه.
فتحية بطاعه:
_حاضر... يلا يا بنتي.
---
(في أوضة تانية، قعدوا سوا)
فتحية:
_استهدي بالله يا بنتي البيوت ياما بيحصل فيها ...
دة إنتوا كنتوا زي السمن على العسل، إيه اللي صابكم بس ؟
بطلي عياط بقى...
أروى وهي بتعيط:
_صعبان عليا نفسي... ليه يعمل فيا كده؟ سيف وجعني أوي...
إزاي عايز يتجوز عليا!
طب أنا قصّرت معاه في إيه؟
هو حبها إمتى؟
مش كان بيحبني أنا ؟
---
_مش دي البنت اللي جيتلي وإنت في تالتة كلية وقلتلي عايز تخطبها علشان بتحبها؟
فاكر أنا قولتلك إيه ساعتها؟
_ متسرعش و فكر بعقلك... دخول بيت الناس مش بساهل و الجواز مش لعبة .
_وساعتها رديت عليا و قلتلي: قلبي وعقلي عايزين أروى، تعالي معايا نروح نطلبها من أهلها فاسرع وقت... اصل متقدملها عريس واهلها مرحبين وانا مش عايزها تروح مني..
لما لاقيتك متمسك بيها وعينك فضحاك قولت ماله اكسر بخاطرة ليه؟
وروّحنا نطلبها من أهلها، اقول كمان افكرك
سيف بضيق:
_فاكر...
جمال:
_طالما فاكر... بتعمل كده فيها ليه؟
سيف:
_زهقت...
زهقت مش دي الحياة الي كانت في دماغي وقرفت من زنانها، مبقتش زي زمان.
_الدنيا مش وردي زي احلامك الدنيا شد وجذب وظروف بس مهما كان ايدك متمدتش عليها ولا علي ست انا ربيتك علي كدا
وممدّتش إيدي غير لما طلبت الطلاق.
جمال باستغراب:
_ أما أمرك عجيب يعني زهقت وعايز تتجوز، ومش عايز تطلقها كمان.
الي بيعوز ياخد كل حاجة وبيخسر كل حاجة يا سيف.
اتنهد وقال:
بص يا بني... موال اصل اتغيرت عن أول الجواز دة عادي وبيحصل .
إخزي الشيطان يا سيف وارجع لعقلك لو تعرف واحدة كده ولا كده علي مراتك سيبك من السكه دي علشان التانيه دي فاضيلك وحلوة علشان تجيب رجلك لو اتجوزتها هتبقي زيها زي ايه ست متجوزه
ارضي بعيشتك واتغافل عن مراتك شوية، متركزش في كل تصرفاتها الست كل ساعة بحال، راعي إنها لسه اول مره تبقي ام ومحتسة ولا جنبها ام ولا اخت تساعدها ولا تاخد بحسها حتي.
لو هي بعدت... إنت قرّب.
لو عملت حاجه ضايقتك، الفت نظرها براحه وبود، منها لنفسها هتلاقيها بتعمل كل حاجة علشان تراضيك.
انتم في الاول ولسه ياما هتشوفوا
---
فتحية بحنان:
_ هو انتم لسه شوفتوا حاجه، اومال لما يبقي معاكم كام عيل هتعملوا اية؟
اسمعي الكلمتين دول من امك
بلاش تقفي بند بند قدام جوزك يا بنتي... قولي حاضر، الكلمة بتريح .
ولما يروق، اتكلمي معاه بالراحة هيسمعك ويعملك الي عايزها.
جمال:
_ يا غشيم افهم الست تحب الحنية... خليك حنين معاها، تديك عنيها.
سيف يبتسم:
_مدرسة يا حج، ونتعلم منك.
جمال:
_٢٧ سنة جواز مش قليل بردوا
قوم طيب خاطر مراتك، واطلعوا شقتكم واتصفوا متنيمهاش ليلة واحدة دمعتها علي خدها .
واقسم بالله ولو مدّيت إيدك عليها تاني، لأقطّعها.
_هو انت أبوها ولا أبويا؟
جمال:
_أبوك... وتستاهل بدل القلمين عشرة ينزلوا علي سيدغك علشان تفكر مليون مرة قبل ما تمد ايدك عليها
قوم يلا
---
_ لا اخص عليكي، متقوليش كدة، سيف بيحبك، هي بس ساعه شيطان وهتروح لحالها وهتلاقية جاي يطيب بخاطرك
وزي ما قولتك بقي تعملي وادعيلي
_ مش عايزة اشوفه ولا اسمع حسه مش طاياة.
سيف باسف: حقك عليا
اديته ضهري وقلت:

_ هو انت دوستلي علي صبعي يا سيف من غير ما تقصد، انت جيت تقولي بكل برود ايه رأيك اجلبك ضرة ولما قولتك حقك تجوز تاني وتالت ورابع كمان بس أنا مش هقبل بالوضع دة طلقني، ضربتني.
_هنتكلم بيتنا ... بس اطلعي معايا، وهنحلها سوا.
أروى بضيق:
_ لا هفضل هنا للصبح... وهارجع لأهلي.
جمال يتدخل:
وأنا هنا أهلك، ولا مش عاجبك اللي عملته برة؟
_شكراً يا بابا... ربنا ما يحرمني منك، بس .
جمال:
لو شايفاني فعلا في مقام أبوكي، اطلعي مع جوزك، واقفلوا بابكم. لو زعلك تاني، تعاليلي بس ... وأنا هملصلك ودانه.
" روحت حضنته وهمست"
_شكراً علي انك معتربني بنتك .
جمال:
_ متشكرنيش علي حاجة واجب تعمل، ربنا يعلم انك في معزة ولاء بنتي من ساعة ما دخلتي البيت دة
سيف قرب شدني من إيدي وقال: "معلش يا حج... اصل أنا بغير، وماما بتغير عليك وكلنا دمنا حامي مولع نار اكتر من باسم سمرة فاسلم حل نطلع تصبحوا علي خير .
ضحكنا كلنا علي تصرفاته وسمعت كلام حمايا وحماتي وطلعت معاه من غير ولا كلمه... دخلت اطمنت علي ليلة لاقتها لسه نايمة غيوبية طلعها لابوها بوست خدها براحه وطلعت لاقيته قاعد في الصاله علي كنبة وبيشاورلي اجي جنبة واقفت كام دقيقه اشارو عقلي اروح ولا لا، بعدين قعدت جنبة من غير ولا كلمه
_ ايه الي حصل خلاك تفكر في واحدة غيري؟ ايه الي وصل حياتنا لكده يا سيف.
رد عليا، متسكتش
_ مش عارف بس فجاءة حياتنا بقيت روتينه وامبارح زي بكرة، مبقناش نقعد نتكلم مع بعض زي زمان
اتنهدت بتعب:
_ يمكن أنا مقصرة معاك شوية اخر فتره بس والله غصب عني لسه بتعلم ازاي اتعامل مع ليلة صح، وبيت وعمايل الاكل وغسيل حاجات كتيرة عليا
مش عارفه لسه اظبط الدنيا، بس بحاول
_ كنتي اتكلمي معايا يا أروي، ونشوف حل سوا انما انتي كنتي بتبعدي عني وفجاءة اتحولتي من أروي حبيتي وصحبتي لماما أروي
اتنهد وكمل كلامه:
_ مش بلوم عليكي ولا بشيلك الذنب الي حصل لان أنا كمان غلطان اني مخدتش بالي إنك مضغوطة.
قرب مني وحاوطني بدراعه وقال:
_ ابويا خدلك حقك مني تلت ومتلت، وأنا اسف ساعة شيطان وراحت ل
عيطت تاني وقلت:
سيف انت في واحدة في حياتك غيري؟
أصل موبايلك وسايبهولي عادي ...
عرفتها إمتى؟
إزاي ما حسيتش بس ؟
مسك ايدي وباسهابحب كعادته :
_بلاش عياط ...
وأقسم لك،إن مفيش واحدة تانية...
كنت بفكر بس وخلاص.
_ بجد؟
_ ايوة
سيف إنت مش من حقك تفكر في دة سامع، مينفعش وتفكر في فاي حاجه تقاسمني فيك
قلبي زعلان منك أوي، يا سيف...
مسحلي دموعه بايدة وقال:
_دواها عندي... وهداويه، ومش هزعّله تاني أبداً.
دخلت في حضنه اكتر وقلت:
_مش عايزة أفتكر اليوم ده تاني.
_اتكلم معايا، قولي اللي مضايقك... وأنا كمان هقولك.
الحل إننا نتكلم، مش نسكت وننفجر مرة واحدة كده.
_ معاكي حق...
لو كنا قعدنا واتكلمنا، ما كانش ده حصل.
_ وأوعى تقول اتجوز تاني، لأني هموتك يا سيف بجد أنا مجنونة واعملها
ضحك وقال:
_إنتِ ست العاقلين...
خلاص، نقفل السيرة دي.
أروى:
_ نقفلها ومن النهاردة، لو حد فينا بعد...
_التاني يقرب.
ولو حد سكت...
_ التاني يفتح معاه الكلام.
_ صافي يا لبن؟؟
_ حليب يقشطة بس هطلع عينك حبتين علشان اسامحك
_ خلي قلبك ابيض يا أروتي.
_ لا، لازم يطلع عينك وتحمد ربنا إنها مش روحك
_ طب ويهون عليكي سيف حبيبك
متبصليش كدة
_ اة تهون.... لا متهونش عليا بس بردوا الي حصل مش هين بالنسبالي يا سيف.
_ اوعدك متكررش ابدا، واعملي ما بدالك بس وانتي في حضني متبعديش عني.
بعدك عني غربتي وأنا محبش اتغرب.
تمّت.
_ آلاء الواقع.

رواية اوقعتني في عشقها كاملة (جميع فصول الرواية) بقلم فاتن جمال
فصول جديدة
https://camo3blog.com/%d8%b1%d9%88%d8%a7%d9%8a%d8%a9-%d8%a7%d9%88%d9%82%d8%b9%d8%aa%d9%86%d9%8a-%d9%81%d9%8a-%d8%b9%d8%b4%d9%82%d9%87%d8%a7-%d9%83%d8%a7%d9%85%d9%84%d8%a9-%d8%ac%d9%85%d9%8a%d8%b9-%d9%81%d8%b5%d9%88%d9%84/

رواية شهادة قيد كاملة (جميع فصول الرواية) بقلم دودو محمد
فصول جديدة
https://camo3blog.com/%d8%b1%d9%88%d8%a7%d9%8a%d8%a9-%d8%b4%d9%87%d8%a7%d8%af%d8%a9-%d9%82%d9%8a%d8%af-%d9%83%d8%a7%d9%85%d9%84%d8%a9-%d8%ac%d9%85%d9%8a%d8%b9-%d9%81%d8%b5%d9%88%d9%84-%d8%a7%d9%84%d8%b1%d9%88%d8%a7%d9%8a/

رواية حور الفارس كاملة (جميع فصول الرواية) بقلم زهرة الحياة
فصول جديدة
#مكتملة
https://camo3blog.com/%d8%b1%d9%88%d8%a7%d9%8a%d8%a9-%d8%ad%d9%88%d8%b1-%d8%a7%d9%84%d9%81%d8%a7%d8%b1%d8%b3-%d9%83%d8%a7%d9%85%d9%84%d8%a9-%d8%ac%d9%85%d9%8a%d8%b9-%d9%81%d8%b5%d9%88%d9%84-%d8%a7%d9%84%d8%b1%d9%88%d8%a7-2/