ما يميز البرنامج عن باقي البرامج:

تنبيه: البرنامج مجاني تماماً، وعن بعد تتم الدراسة فيه عبر منصة.

1.يصلح به بداية طلب العلم الشرعي و بناء اللبنة الأولى
2.يجمع البرنامج ثلاثة مسارات مختلفة تساعد في تكوين طالب العلم
3.عدم اكتفاء البرنامج بالجانب الشرعي فقط و إنما يتعداه للجانب الفكري و حفظ القرآن
4.يضم أكبر تجمع لطلاب العلم في برنامج شرعي على المنصات الإلكترونية
5.البساطة و التدرج مع طالب العلم و الارتقاء به شيئاً فشيئاً
6.يضم قدر كبيرا من الموضوعات الثقافية و الفكرية لا يتوفر في باقي البرامج
7.التفاعل مع القضايا العامة في الأمة و أنه ليس مجرد برنامج محصور في الشاشة

#التعريف_بالبناء_المنهجي
#البناء_المنهجي_السودان

بسم الله

افتتاح التسجيل في الدفعة الخامسة من برنامج البناء المنهجي

https://forms.gle/CmB3M71H57ya61589

#استمارة_التسجيل

كتب Montasir Mosa Mosaad :

أقيف ٩٠ ثانية نتفاهم بس.

عزيزي المواطن عزيزتي المواطنة أعزائي الما مواطنين السلام عليكم ورحمة الله وبركاته.

و بعدُ إنّ العلمَ فرضٌ لزِما كلَّ امرئٍ مكلّفٍ أن يعلما:
ما أوجبَ اللهُ من الأحكامِ عليهِ في شرائع الإسلامِ

عزيزي المواطن سواء كنت طالب أو موظف شين أو سمح عامل أو دكتور أو رب منزل أو ربّة منزل أو قاعد برهان ساي،
برنامج البناء المنهجي برنامج "مجاني" عبر تطبيق تليجرام (Telegram) .
بيحتوي تلاتة أقسام، قسم اختياري لحفظ كلام بارئ الأنام و قسم شرعي فيه علوم الدّين و الآلة و الفقه و الأحكام، و قسم ثقافي للاستئناس بكتب الفِكر و السّيرِ و الأئمة الأعلام.

البرنامج عزيزي المواطن بيوفر العلوم دي بصور متنوعة و سهلة و مبسطة عبر الفيديوهات المسجلة و الكتب المقروءة المجدولة بالأيام، و بزمن يومي لا يتعدى الساعة و اختبارات دورية و ملخصات و قنوات و لقاءات تفاعلية و زيوت و موزات.

البرنامج عزيزي المواطن مدّتو أربع سنوات تراها طويلة لكنها والله ابن عوفية، فانت خش و لو بس طلعت من البرنامج دا و انت عارف إنو الدّين بيتعلموه عديل ما بيحسّوا بيهو ساي فدا إنجاز عظيم و الطشاش في بلد العِمِي شوف.
عزيزي المواطن ٤ سنوات في البلد دي إنت معديها النت جا النت قطع، أنا مثلاً دي سنتي الأخيرة في البرنامج (الدفعة الأولى) و هسي مواصل و بقى جزو من حياتي اليومية و ما ضاغط بأي شكل من الأشكال بالعكس بيساعد في تنظيم الوقت.

عزيزي المواطن إذا كنت سُنّي أو شيعي أو صوفي أو أشعري أو أو لا أدري أو دهري أو ربوبي أو مزمل فقيري فالبرنامج دا ليك،
و المفاجأة!! حتى لو كنت ملحد عزيزي المواطن، نحن دايرنك تكون ملحد فاهم الدّين الما دايرو دا، و عشان تقدر تقدم نموذج نقدي كويس للهوس الديني من الداخل و ما تجي تناقش حاجة انت جاهل بيها و تعمل لينا طمام فكري.
عزيزي المواطن برنامج البناء المنهجي ما بيبقيك شيخ أو مولانا ؛ بل بيبقيك زول عارف دينك صاح بس و عارف مصادر التلقي و طرقه.

عزيزي المواطن برنامج البناء المنهجي ما عاملنو الكيزان و لا الماسونيين و لا السرورية و لا أنصار السنة و لا رواد نادي الموردة أمدرمان، و سبحان الله لحد هسي ما قالوا لينا فلان كافر أو ضال أو علمونا الشتيمة في المنابر و لا دعونا للإرهاب؛ البرنامج مجهود بداه الشيخ أحمد يوسف السيد و هو صاحب عدد من البرامج المعرفية و الفكرية و ممكن تخشوا بروفايلو تفتشوه، و العلماء البيدرسوا فيه كلهم مشهود ليهم بالخير و العلم و إن أبى المداخلة و رفسوا و بكوا.

عزيزي المواطن في الهاشتاق التحت دا حتلقى تجارب ناس زيي و زيك في البرنامج دا و النقلة المعرفية و الحياتية الحصلت ليهم بوجودهم فيه.

عزيزي المواطن هل تعلم إنو لو خشيت البرنامج و التزمت فيه فترة و استفدت منها و لأي سبب من الأسباب ما قدرت تواصل ماف زول حيشاكلك و لا حتحصل فضيحة بجلاجل!
أنا مثلاً بقرا في كلية الطب و لمن تصادف امتحانات البرنامج مع امتحاناتي بجي بشوف الملخصات بسرعة بس عشان أنجح أواصل مع الناس و ما أكسل و الحمد لله ما حصل ما نجحت في امتحان لأنو الامتحانات ذاتها ساهلة.

التسجيل فتح ولو قعدت تقول بسجل بكرة بسجل بكرة حتغني ظلموني الناس و جاروا علي.

عزيزي المواطن خلي الكسل و استثمر وقتك و جاهد نفسك، متين ح تبدا إذا كل مرة حتنتظر الوقت المناسب؟ متين حيجي الوقت المناسب؟

الرابط في التعليقات تحت و ما محتاج مجهود كبير و في صور توضيحية عن محتوى البرنامج و هذه الأشياء تجدونها في التعليقات، و أي زول عندو إضافة يضيفها في التعليقات و العندو استفسار يستفسر و الناس حترد عليه إن شاء الله.

#البناء_المنهجي_السودان
#قصتي_مع_البناء_المنهجي_السودان

القراءة المشتتة، غير المنهجية، ضعيفة النفع، كثيرة عثراتها.. والأولى بالشاب الالتحاق بالبرامج العلمية التي تسوقه إلى المطلوب وفق منهجية سليمة.. برنامج "البناء المنهجي" الذي يُشرف عليه الشيخ أحمد السيد -وفقه الله-، برنامج مبارك، وقد افتُتح التسجيل هذه الأيام.. فاستبقوا الخيرات..

د. سامي عامري

#أهمية_البناء_المنهجي
#البناء_المنهجي_السودان

كتبت سارة صلاح:

واحد قبل سنتين لقا اعلان لي منحة مجانية شاملة التكاليف كانت مدتها ٱربعة سنة، والمنحة كانت شاملة جوانب كتيرة م زي بقية المنح وفي نفس الوقت حيقدر يشتغل وينوم ويرتاح ويطلع رحلات ويتفسح،،، لٱنه المنحة بتحتاج منه ساعة واحدة بس في اليوم وباقي ال٢٣ ساعة ليه!!!

دخل لقا ناس قدمت في المنحة وقبلوها من نفس سودانا وشاف الفيدباك بتاعهم واتحمس شديد شباب في نفس البيئة الهو عاش فيها وبنفس الضغوط وقد يكون أكعب منه.. قدمه في نفس المنحة وربنا وفقهم.. قال انا الفرق بيني وبينهم شنو?!

طوااالي قدم فيها لاكن ركلس وما واصل فيها، وقبل سنة قال ياخ انا ما واصلت السنة الفاتت اسي انا مشغول ما حأقدر خليها السنة الجاية..

السنة الجاية طلعت هي هي آخر سنة يدوهو المنحة دي وتاني م حتتوفر ليه فرصة مجانية بنفس المواصفات قد بقروشه م تتوفر ليه💔

اتشوقتو تعرفو المنحة دي شنو عشان تقدمو فيها?!🔥

اتشوقتو تعرفو التجارب السودانية في المنحة دي?;

المنحة هي البناء المنهجي🤍✨
برنامج متكاملة مدته ٱربع سنين مقسم لمراحل داخلية كاملة متكاملة للبناء الفكري والسلوكي🤍

نحن كلنا نفس الزول دا اتخيلو حسرته اذا فوت الفرصة دي السنة دي برضو??
انتو عارفين هو الحمسه يخش شنو?!
داس هاشتاق:

#قصتي_مع_البناء_المنهجي_السودان
#البناء_المنهجي_السودان

عن استمارة التعاون بين طلاب البناء المنهجي السودانيين

اغتنموا الفرصة للتسجيل، ولا تحرموا انفسكم من الخير العظيم، فـ[قد] تكون الدفعة الأخيرة من البرنامج.

رابط التسجيل

#البناء_المنهجي_السودان

كتبت رزان محمد قبل سنة:

السلام عليكم
انا رزان محمد طالبة في البناء المنهجي الدفعه الثالثة و حبيت أكتب عن تجربتي المتواضعة جداً

صراحه بدايتي مع البناء المنهجي كانت من الدفعه الثانية تقريباً كانت فتره كورونا او قفلة جامعة (ما بتذكر) و كنت سجلت و دخلت طوالي بكل الحماس بس للأسف انا من نوع الناس البحبو النتائج السريعة ومن دخلت لقيت الموضوع بسيط و بمشي خطوة خطوة و مفروض انتظر 4 سنوات قلت يا زوله اطلعي بتتعلمي وتفتشي براك (ودي طبعاً كانت أكبر كذبه😂😂) وما أكذب كان واجهتني مشكله انو اللغه العربيه كانت حبتين ثقيلة علي فااا كسرت حنك ولمن جا التسجيل للدفعه الثالثة لقاني زي ما انا بل أسوأ 😂😂

2022 كنت في مرحلة فقدان بوصلة كدا إحساس أنا منو و هدفي شنو وانا عاوزه اطلع من الدنيا دي بشنو وليه انا ما مبسوطه وراضيه عن نفسي كدا وهل أنا حكون رزان الممتازه في الجانب المهني / النقابي وبس ولا في حاجة تانية والمهم الهناي ضرب في البتاع وجاطت الدنيا فااا قررت أبدا والتزم مع الدفعه الجديدة
📌خدو المعلومة دي مني (انا اتعلمتها بي صعوبة طبعاً) انو انت لو عاوزه تبحر في ديننا دا كويس انت محتاج:
١. محتاج منهجيه تناسب مستواك
٢. مدرسين أكفاء
٣. عزيمة وحبة ترتيب زمن
رقم ٣ دي هينه وبتجي براها
١ و ٢ ديل البوفرهم ليك برنامج البناء المنهجي بطريقه سهله و منظمة ومرتبه و متسلسلة
📌 وخدو دي برضو: أنت بي تنطيطك من كتاب لي كتاب و من فيديو لي فيديو انت مجرد إنسان مثقف في المجال المعين (زي مثلاً زول يقرأ ليهو كم كتاب كدا في القانون وكم فيديوهات فااا هل الزول دا بنعتبره فاهم المحاماة كويس؟ لا طبعاً)
📌صراحة من إيجابيات الإنترنت انو وفر لينا اي حاجة بس عيبه انو انت ما ح تعرف مع الكم الهائل من الكتب والفيديوهات والدورات دي تبدأ من وين

المهم بدينا بدايه كويسه بي دفتري و قلمي و ملخصاتي
📍في البناء المنهجي بتبدأ بالمرحلة التمهيدية بتتعرف فيها علي التزكية و مواضيع تانيه زي العلم بين المنهجية والفوضوية و حأرفق تحت صورة
📍المرحلة الأولى الجزء الأول منهت بركز على أساسيات العلوم زي اللغة العربية، علوم القرآن والتفسير، علوم الحديث، علم العقيدة، دراسة السيرة
بتتعلم تعريفات العلوم دي بالتفصيل و مصطلحات كتيره مهمه فيها، كيف نشأت و تاريخها وأهم كتبها و أهم حاجة منهجية تعلمها
(اديكم مثال في فترة بدايتي لحفظ القرآن الكريم قلت مالو احنا نتعلم تفسير بالمره ونحفظ و هووبا قمت جبت كتاب تفسير الطبري وقلت بسم الله نبدأ وغلبني طبعاً و بعداك ضحكت على نفسي بعد البناء المنهجي وراني انو تفسير الطبري هو طبعاً كتاب للتخصصية والاتقان وما حق زول مبتدئ)
📍بتمشي بعدها المرحلة الثانية وتقرأ فيها كتب جميلة زي الدليل إلى القرآن، مسلكيات، جمالية الدين و أجمل ما في المرحلة دي سلسلة سوية المؤمن (ممكن تفتشوها في يوتيوب)
📍حالياً احنا في المرحلتين الثالثة والرابعة

📌التدرج في البناء المنهجي بكون في العلوم الذكرتها فوق كالآتي:
التأصيل.
البناء.
التمكين.
التخصص.
بجانب حفظ كتاب الله

📌طبعاً يخوانا الحياة ما وردية و مرات الزول بنشغل مع الطب وقرايته والحياه بس في ملخصات و معينات كتيره بتفيدك انك تنجح في الاختبارات و بعد تفضي ممكن ترجع للفاتك

📍صراحه انا استفدت استفادة عظيمة جداً من حيث ترتيب المعلومات و خلق مجتمعات جميلة خالص و بدورها المجتمعات دي دلتني على برامج تانية اكتر
لغتي العربية اتحسنت كتير وبقت لي جميلة وخفيفة جداً
أثر كبير جداً على شخصيتي على المستوى الشخصي (ح أحتفظ بيها لي روحي حالياً😂)
الحمد لله بركة وترتيب في الزمن وترتيب لحياتي كاملة
لقيت بعض الاجوبة لي أسئلتي الفوق
كونت أهداف جديدة ليها علاقة بالجانب الديني ما كانت قبل كدا

البرنامج جميل جداً جداً وسهل عاوز صبر والناس ما تستعجل و تحاول ترتب زمنها فااا ال consistency مهمة يخوانا

ح أختم بي مقولة الإمام الشافعي رحمه الله : كلما أدّبني الدهر أراني نقص عقلي و كلما ازددت علماً زادني علماً بجهلي

________


#البناء_المنهجي_السودان
#قصتي_مع_البناء_المنهجي_السودان

كتبت ملاذ علي:

البناء المنهجي ..

الناس البيزهجوا من البرامج الجادة والكانوا عايشين سبهللا _ حرفياً _ وشايفين موضوع طلب العلم والعلوم الشرعية دي قصة كبيرة وما تبعي وووو
تعالوا جنب أختكم 😁

أختكم من الدفعة الثالثة
وبعد المقدمة الفوق دي أحب أقول بكل صدق إنو البناء المنهجي من محطات التغيير في حياتي..

دخلت وسجلت دخول زول مُستكشف مقدم رِجل ومؤخر أخرى
وإحساس بيتاوق ولو القصة ما نفعت معاي طوالي بتخارج

في المرحلة التمهيدية البداية كانت بتخلي الزول يتهجم
" التزكية للمُصلحين "
إحساس يا أخوانا أنا يادوب جيتكم وبقول يا هادي
مصلحين ديل منو استهدوا بالله ! 😁

فإذا بها كانت نِعم البداية ♥️
ومع كل محاضرة الواحد بيحس بلطف ربنا بيه وإنو بيلقى إجابات لتساؤلات كتيرة في حياته
حلول مشاكل خفية في روحه
كانت مرحلة معالجة بيُسر ولطف
فأسميتها بيني وبين نفسي " وليتلطف "💓

البناء المنهجي بيأثر على كل جوانب حياتك
بيخليك تحس إنو في حاجات مهمة لازم تنتبه ليها
لازم ترتب جوانب حياتك كلها
لازم تركِز في الدنيا دي وتقعد في الأرض وتبطل الفارغات وتعرف إنو عندك دور في الدنيا دي ..

مع التقدم في البرنامج
كانت بيزيد جواي شعور الفخر والعِزّة بالإنتماء للدين ده ..
كواحدة كنت لمن أقرأ حديث بتخطى كل "حدثنا حدثنا حدثنا " وبدخل في الحديث مباشرة
وبعد مدخل علوم الحديث
وكيف الصحابة تعبوا وبذلوا الجهود عشان الأحاديث دي تتحفظ وتصلنا
الواحد بقى يحس بالخجل من نفسه
ويحس بعظمة السُنة
وعظمة الدين ده
وكمان بعد المعلومات دي بقى لمن يشوف أي زول بيطعن في السنة أو الأحاديث
بيجيو إحساس : " أمشي ألعب بعيد يا بابا الكلام ده أكبر منك "
وبيعلم إنو أي طاعن إنما هو جاهل أو مُكابر أعاذنا الله ..

المميز فيه التنوع
ما بين لغة عربية ، علم الحديث ، علم السنة ، علوم القرآن ، جانب تحفيظ القرآن ،
الكتب المُختارة بعناية
المحاضرين المميزين المتمكنين

برنامج يجمع بين الفائدة والمتعة
وفي كل خطوة تجد التزكية حاضرة كأعظم غاية
( قَدْ أَفْلَحَ مَنْ زَكَّاهَا ۝ وَقَدْ خَابَ مَنْ دَسَّاهَا )

البناء المنهجي وسيلة تغيير حقيقية في حياة أي زول يشترك فيه
وأي زول يشترك فيه حيشوف أثره في جميع جوانب حياته بإذن الله ..

"هاكَ البشاراتِ فسُقْ
للحائرينَ على الطُّرُق
نجمُ الهُدى زَانَ الأُفُق
نِـعـمَ الـبنـاءُ المنهجِيّ!" ♥️

جزى الله شيخ أحمد السيد خير الجزاء وتقبل منه ونفعنا ..

اللهم آتِ نفوسنا تقواها وزكها أنت خير من زكاها أنت وليها ومولاها ..

#قصتي_مع_البناء_المنهجي_السودان
#البناء_المنهجي_السودان

كلمة انقلوها لكل الشباب الراغب في تثقيف وتطوير نفسه..

هذه البرامج : البناء المنهجي، والفكري وأشباههما من البرامج.. نعمةٌ لا تقدر بثمن. لم تكن متوفرة في وقت أوائل الشباب وتوافر الهمة عندنا.. وقد سلكنا وقتها طرقا متعددة، طويلة ومتعبة. وغير مرتبة، وحصلنا ما يسره لنا ربنا..

أما أنتم فقد قربت لكم العلوم، وقدمت في أحسن ثوب وأجمل طبق. فانهلوا منها ما استطعتم .
ووالله وإن كنتُ أستاذا جامعيا وأدرس طلابي علوم العقيدة والمذاهب.. ولولا أن وقتي لا يسمح لي بالانتظام لكنتُ أولّ المسجلين وأكثر الفرحين بهذه البرامج..

والله على ما أقول شهيد.

- الشيخ الدكتور عبدالله الشهري.

#أهمية_البناء_المنهجي
#البناء_المنهجي_السودان

كتب الحارث عبدالله:

الحمد لله وبعد

السودان بيمرّ بي حرب منذ حوالي تسعة شهور، خلال الفترة دي غالبا معظم الناس فقدت حاجات كتيرة، وقدرة الزول أنه يضبط حياته أو يجعل لي نفسه خطة أو مسار اضمحلّت، ومعظم الناس قاعدة منتظرة أنه ربنا يفرجها علينا ويصلح الأحوال بس.

وسط التنشنة أعتقد من المفهوم أنه لمن زول يلقى إعلان لي برنامج زي البناء المنهجي مدته أربع سنوات يحسّ أنه ده ما وقته، وأنه الدنيا حرب والواحد مع كل الجوطة دي ما ناقص كمان التزام هو ما حيقدر عليو غالبا، مع التشتت الذهني والاضطراب الداخلي والخارجي وحالة الخوف والترقب الحاصلة دي، مفهوم أنه زول يحس أنه ما وقته.

لكن الحقيقة بخلاف كده، عشان الدنيا حرب فده وقته بالزبط كمان!

أول شي: ما في شي بيخفف اضطراب الواحد في أوقات الأزمات زي أنه يكون عنده شغل ذو جدوى يشتغل بيو، والتزام معقول بيقدر يضبط نفسه بيو، خاصة أنه الواحد فينا بيلاحظ كيف أنه الانغماس الشديد في أخبار الحرب -بدون ما يكون عنده شي يعملها حيالها- ما قاعد يكون عنده فايدة عليو، إضافة لي أنه معظمه بيكون تكرار واجترار لي نفس العرفه الواحد في أول نص ساعة، وده كله بس بيزيد قلقه بدون جدوى. الخروج من ده كله إلى حرمِ الله سبحانه وتعالى، سواء بي محاضرة في واحدة من العلوم الشرعية، أو جلسة تزكية، أو غيرا من المواد النافعة؛ ده كله بيخرج الزول من استهلاك نفسه في أخبار الحرب، وبتساعده يتّزن داخليًّا، وده بيؤهله يكون أكثر عقلانية في اتخاذ القرارات فترة الحرب.

ثاني شي: فمع اللايقينية الحاصلة دي، وتفكير الواحد أنه ممكن يحصل ليو أي شي في الفترة دي، بيكون كويس أنه الزول يسارع لي ربنا ويكون عنده وِرد من الصلة بيه. في الحديث بتاع الرجل القتـ.ـل مئة نفس، قام قرر يتوب ويمشي لي أرض خير ومات في الطريق، فربنا يسّر أنه يكون أقرب لي أرض الخير عشان تاخده ملائكة الرحمة، فربنا داير منك النيّة والتوكّل، ولعلّ الحاجة دي تكون سبب في أنه ربنا يختم ليو بالخير والحسنى.

ثالث شي: أنه الواحد يحتسب التسجيل في البرنامج ونيته تعلم الدين كعبادة ربنا يرفع بيها الحاصل في البلد، ربنا سبحانه وتعالى قال: { وَلَقَدۡ أَرۡسَلۡنَاۤ إِلَىٰۤ أُمَمࣲ مِّن قَبۡلِكَ فَأَخَذۡنَـٰهُم بِٱلۡبَأۡسَاۤءِ وَٱلضَّرَّاۤءِ لَعَلَّهُمۡ یَتَضَرَّعُونَ (42) فَلَوۡلَاۤ إِذۡ جَاۤءَهُم بَأۡسُنَا تَضَرَّعُوا۟ وَلَـٰكِن قَسَتۡ قُلُوبُهُمۡ وَزَیَّنَ لَهُمُ ٱلشَّیۡطَـٰنُ مَا كَانُوا۟ یَعۡمَلُونَ (43) }، فالأعمال في أوقات الحروب من روافع العذاب، ودي نية عظيمة ومن صميم واجب الوقت على المسلم.

رابع شي: أنه أجر العبادة في أوقات زي دي مضاعف جدا، ومنه قوله صلى الله عليه وسلم: "العبادةُ في الهَرْج كهجرة إليّ".

ده كله غير أجر تعلم الدين ونية رفع الجهل عن الزول وأجر الإقبال على الله عز وجل، وخيرات كتيرة بتجتمع في البرنامج ده.

عشان كده مع الحرب دي الواحد مفروض يخش، عشان يحصل الفوائد دي. ما تشيل همّ النت وتذبذبه والحاجات دي، ولا عدم الالتزام، اتوكل على ربنا وخش، لو استعنت بي ربنا ودعيته يوفقك بإذن الله حتقدر، إضافة لي أنه غالبا يكون في مراعاة لي أحوال السودانيين (في قناة التليجرام الحأختها تحت، غير فورم التسجيل حق البناء المنهجي، في فورم لي مجتمع سودانيي البناء المنهجي في آخره في قروب، جوة فيو طلاب من الدفع الأولى عنده تواصل ومشرفين مع إدارة البرنامج حيجتهدوا يعملوا تسهيلات مع الظروف).

وصلِّ اللهم وسلم على نبينا محمد وعلى آله وصحبه أجمعين!

#البناء_المنهجي_السودان
#قصتي_مع_البناء_المنهجي_السودان

#التعريف_بالبناء_المنهجي
#أهمية_البناء_المنهجي
#البناء_المنهجي_السودان