တရေးနိုး ပဟေဠိ (၂၀၀၀)

IMDB - 8.4/10
Genre - Thriller, Action

သူည တစ်ရေးနိုးလာခဲ့သည်။ အိပ်ရာပေါ်က သူ့ဘေးမှာ သူ့ဇနီးရှိမနေ။ အပေါ့သွားတာ ဖြစ်ရမည်။ အင်း မဟုတ်သေးဘူး။ သူ့စိတ်ထဲမှာ သူ့ရဲ့ ဇနီး အိပ်ရာပေါ် ဘယ်တော့မှ ပြန်မလာတော့မှာကို တစ်နည်းတစ်ဖုံ သိနေသည်။ ရေချိုးခန်းထဲက ရုန်းရင်းဆန်ခတ်အသံတွေ၊ ရိုင်းစိုင်းမှုတွေ အသနားခံမှုတွေ သေချာသွားပြီ။ သူ့ဘဝထဲမှာ သူ့ဇနီးရှိမနေတော့ဘူး။ အဲဒါကလွဲပြီး ကျန်တာ သူမသိ။ မနေ့ညက သူဘာလုပ်ခဲ့လဲ၊ မနက်လင်းရင် သူဘာလုပ်ရမှာလဲ သူမသိ။ သူ့ကိုယ်ပေါ်က တက်တူး တွေ ဘယ်လိုပေါ်လာလဲ သူမသိ။ သူမှန်ရှေ့မှာ ရပ်ကြည့်လိုက်ရင်တော့ သူ့ရင်ဘတ်ပေါ်မှာ မှန်စာလိုရေးထားတဲ့ အထင်ရှားဆုံး တက်တူး ကိုတွေ့လိမ့်မယ်။

t.me/cartoonbynikko/2733

ဘဝကို ရင်ဆိုင်ခြင်း (၂၀၂၂)

IMDb - 6.8/10
Genre - Drama

အတိတ်နဲ့ လက်ရှိကြားက စည်းကို ဖြတ်ကျော်သွားခဲ့တဲ့ မိန်းကလေး အီဆွန်း။ မိခင်ရဲ့ အကြိမ်ကြိမ် နောက်အိမ်ထောင်ပြုမှုတွေကြားကနေ ခြောက်ယောက်မြောက် ဖခင်ပါ ရရှိလာခဲ့တဲ့ အီဆွန်း ကတော့ မိခင်ပျောက်ဆုံးသွားပြီးတဲ့နောက် ဘဝကြီးကို ရေစုန်မြောရင်း နေထိုင်လာခဲ့သူပါ။ သူ့မိခင်နဲ့ မတူအောင် မိခင်ကောင်း ဇနီးကောင်း တစ်ယောက်ဖြစ်ရမယ်လို့ ရည်မှန်းချက်ထားခဲ့ပြီး သူ့ရဲ့ ဘဝကြီးကို အဘက်ဘက်ကနေ ပြောင်းလဲခဲ့ပေမဲ့ သူထင်ထားသလို ဖြစ်မလာခဲ့ပါဘူး။ ဒီလိုနဲ့ တစ်ခဏတာ ပျော်ပါးတတ်တဲ့ အချစ်နဲ့ပဲ တွေ့ဆုံရဖန်များလာတဲ့ အီဆွန်း ဟာ နောက်ဆုံးမှာ သူ့ရဲ့ ဘဝကြီးကို အဆုံးသတ်လိုက်ဖို့ ဆုံးဖြတ်လိုက်ပါတော့တယ်။ ဒါပေမဲ့ ကံကြမ္မာရဲ့ အခွင့်အရေးပေးမှုကြောင့် အီဆွန်း တစ်ယောက် အတိတ်နဲ့ လက်ရှိကြားက စည်းကို ဖြတ်ကျော်ပြီး သူ့ရဲ့ ဘဝကြီးကို ပြန်လည်ကြည့်ရှုသုံးသပ်ခွင့် ရသွားခဲ့တဲ့အခါမှာတော့ ဘာတွေ ဆက်ဖြစ်လာမလဲ၊ သူဟာ တကယ်ပဲ ဘဝကြီးကို အရှုံးပေးလိုက်တော့မှာလား။ ဒါမှမဟုတ် ဘယ်လို အပြောင်းအလဲတွေများ ဆက်ဖြစ်လာဦးမလဲ ဆိုတာ အေးအေးငြိမ်ငြိမ်လေးနဲ့ စိတ်ဝင်စားဖွယ် ကြည့်ရှုရမယ့် ဇာတ်ကားတစ်ကားပါပဲ။

t.me/cartoonbynikko/2737

ဂုဏ်ပြုထိုက်သူ (၂၀၀၀)

IMDb - 7.2/10
Genre - Action, Drama

ကားနာမည်ကို မြင်လိုက်ရုံနဲ့ ခင်ဗျားတို့ဟာ ဒီဇာတ်ကားရဲ့ အတိမ်အနက်ကို အနည်းငယ် ခန့်မှန်းမိလောက်မယ်ထင်မိပါရဲ့။ ဇာတ်ကားရဲ့ နာမည်က လေးနက်သလို ဒီကားထဲက သရုပ်ဆောင်တွေ၊ ဇာတ်လမ်းဇာတ်ကွက်တွေ စကားပြောတွေ ပေးချင်တဲ့ မက်ဆေ့ တွေဟာလည်း ခမ်းနားလှပလွန်းပါတယ်။ ဒီကားက အမေရိကန် ရေတပ်မတော်မှာ ပထမဆုံးသော လူမည်းရေငုတ်သမားဘဝကို ဖိနှိပ်တားဆီးမှုကြားက ကြိုးစားခဲ့ရတဲ့ ကားလ်ဘရက်ရှာ ရဲ့ ဘဝဖြစ်စဉ်ကို ရိုက်ပြထားတာဖြစ်ပါတယ်။ ဒီကားက ဟာသတွေ၊ CGI နည်းပညာတွေ၊ မျက်ရည်ချူကွက်တွေ၊ ရိုဆန်ဆန်အမူအရာတွေ တစ်ခုမှ မပါပါဘူး။ သို့ပေမယ့် ခင်ဗျားဟာ ဇာတ်လမ်းအမျိုးအစားရွေးချယ်ကြည့်ရှုရာမှာ ဘယ်လောက်ပဲ ဇီဇာကြောင်နေ စိတ်မရှိဘူး၊ ဒီကားက ချွင်းချက်ဖြစ်သွားလိမ့်မယ်လို့ ကျွန်တော် မဝံမရဲ အာမခံပေးလိုက်ပါ့မယ်။ ခံစားကြည့်လိုက်ပါဦး။

t.me/cartoonbynikko/2740

အဆုံးမဲ့ချစ်ခြင်း (၂၀၁၄)

IMDB - 6.2/10
Genre - Romance, Thriller

ဒီရုပ်ရှင်လေးထဲမှာတော့ အထက်ကျောင်းမှာ အလှဆုံးမိန်းကလေးတွေထဲက တစ်ယောက်ဖြစ်တဲ့ ဂျိတ်ဘတ်တာဖီးလ် ဆိုတဲ့ ကောင်မလေးတစ်ယောက် သူ့အစ်ကို ခရစ် ကိုဆုံးရှုံးပြီးနောက်ပိုင်း အနေအေးလာတဲ့အခါ ကျောင်းမှာ သူတစ်ယောက်တည်းလိုမျိုး အဖော်မရှိဖြစ်နေခဲ့ပါတယ်။ သူများတွေ ဂျိတ် ကို မေ့မေ့ပျောက်‌ပျောက် ဖြစ်နေပေမဲ့ အဲဒီထဲမှာ သူ့ကို သဘောကျပြီး စောင့်ကြည့်နေတဲ့ ဒေးဗစ် ဆိုတဲ့ အတန်း‌ဖော်ကောင်လေးကတော့ မပါခဲ့ပါဘူး။ ဒေးဗစ် ဟာ တစ်ကောင်ကြွက်၊ ဝပ်ရှော့ဖွင့်ထားတဲ့ အဖေပဲရှိတဲ့ သာမန်လက်လုပ်လက်စားမိသားစုငယ်လေးကဖြစ်ပြီး ဂျိတ် ကတော့ ပညာတတ် လူကုံထံအသိုင်းအဝိုင်းကဖြစ်ပါတယ်။ သားတစ်ယောက်လည်းဆုံးရှုံးထားရတဲ့ သူ့ရဲ့အဖေ ဟူ့ခ်ဘတ်တာဖီးလ် ဟာ အငယ်ဆုံး သမီးလေး ဂျိတ် တစ်ယောက် ဒေးဗစ် နဲ့တွေ့တဲ့အခါမှာ ဘယ်လိုမှ သဘောမတူနိုင်ဖြစ်ခဲ့ရပါဘူး။ ပညာရေးအရရော အဆင့်အတန်းအရပါ ကွာခြားလွန်းနေတဲ့ ဒေးဗစ် ကို ဂျိတ် ရဲ့အမေ အန်း နဲ့ အစ်ကို ကိ့သ် တို့က ကြည်ဖြူကြပေမဲ့ ဟူ့ခ် ကတော့ လုံးဝ လက်မခံနိုင်ခဲ့ပါဘူး။

t.me/cartoonbynikko/2742

အချစ်သည် သက်တော်ရာကျော်ရှည်ပါစေ (၂၀၂၃)

IMDb - 7.1/10
Genre - Drama, Comedy

ဒီကားကတော့ အလွယ်ပြောရရင် လူတွေရဲ့ အချစ်နဲ့ ဘဝအပေါ် အမြင်တွေကို မေးခွန်းထုတ်သွားတာပါပဲ။ ဒီလိုမျိုး ကြုံလာရရင် ဘာလုပ်မလဲ။ လက်လျှော့မလား။ ပြန်ကြိုးစားမလား ဆိုတာပေါ့။ အမှန်တရားဆိုတာ ရှုထောင့်အပေါ် မူတည်တယ်ဆိုသလိုပဲ ဘယ်လိုဆုံးဖြတ်ရင် အမှားလည်း အမှန်လည်း ပြောဖို့ ဖြစ်နိုင်ပါဘူး။ ဒီရုပ်ရှင်ထဲမှာ ပြောသွားသလိုပါပဲ။ “လူတစ်ယောက်ကို အရမ်းချစ်မိသွားရင် ကိုယ့်ကိုယ်ကိုယ် ချစ်ဖို့ မေ့သွားတတ်တယ်” တဲ့။ ဒီတော့ ကိုယ့်ကိုယ်ကိုယ် ပြန်ချစ်တာက အမှန်လား။ လူတစ်ယောက်ကိုပဲ အရမ်း ဆက်ချစ်သွားတာက အမှန်လား။ ဒီရုပ်ရှင်မှာတော့ အဓိက ဆေတီ နဲ့ မယ်တာ ဆိုတဲ့ စုံတွဲလေးက ပါဝင်ထားပါတယ်။ သူတို့ဟာ အရမ်းချစ်တဲ့ စုံတွဲပါ။ အရမ်းလည်း မုန်းတဲ့ စုံတွဲပါ။ သစ္စာမရှိတဲ့ စုံတွဲပါ၊ သစ္စာလည်း ရှိတဲ့ စုံတွဲပါ။ နားလည်မှု မရှိတဲ့စုံတွဲပါ၊ အရမ်း နားလည်ပေးတဲ့ စုံတွဲလည်း ဟုတ်ပါတယ်။ ဒီတော့ အချစ်ကို သက်တော်ရာကျော် ရှည်စေချင်တာ စုံတွဲတိုင်းပါပဲ။ လက်တွေ့မှာတော့ အချစ်ကို ဖျားနာစေတဲ့ အရာတွေ အများကြီး ရှိနေပြီတာကို ဒီရုပ်ရှင်မှာ မြင်ရပါလိမ့်မယ်။ အချစ်နေပြန်ကောင်းလား မလား။ အချစ် သေဆုံးသွားမလား ဆိုတာကိုလည်း စဉ်းစားစရာ ဖြစ်စေပါတယ်။

t.me/cartoonbynikko/2744

နောက်ဆုံးသောသူ (၂၀၂၃)

IMDb - 6.8/10
Genre - Drama, Thriller

အာတီခရောဖို့ဒ် ဆိုတာ ဒုတိယကမ္ဘာစစ်က နာမည်ကြီး နော်မန်ဒီကမ်းခြေတိုက်ပွဲမှာ ပါဝင်တိုက်ခိုက်ခဲ့တဲ့ စစ်သားတစ်ယောက်ဖြစ်ပါတယ်။ စစ်ကြီးပြီး အသက်တွေကြီးလာပြီး အသက် ၉၂ နှစ်အရွယ် လူအိုရုံမှာ နေထိုင်နေတုန်း ဇနီးဖြစ်သူ ဆုံးပါးသွားတဲ့အခါမှာ အာတီ တစ်ယောက် အတိတ်ရဲ့ ဖြစ်ရပ်ကြောင့် ဘယ်လိုဆုံးဖြတ်ချက်တွေချပြီး ဘာတွေလုပ်မှာလဲ။ ဘယ်လိုလုပ်မှာလဲ ဆိုတာ စဉ်းစားရမယ်။ အဲ့ချိန်မှာပဲ တိုက်တိုက်ဆိုင်ဆိုင် နော်မန်ဒီကမ်းခြေတိုက်ပွဲ ဒီဒေး ၇၅ နှစ်ပတ်လည်နေ့အထိမ်းအမှတ်အစီအစဉ်ကို ပြင်သစ်မှာ ကျင်းပတော့မှာဖြစ်ပါတယ်။ အိုင်ယာလန်မှာ နေထိုင်နေတဲ့ အာတီ တစ်ယောက် ကျန်းမာရေးမကောင်းတော့တဲ့ စစ်သားဟောင်းတစ်ယောက်ဟာ သူ့ဘော်ဒါတွေကို တွေ့ချင်စိတ်နဲ့ ပွဲကျင်းပရာ ပြင်သစ်နိုင်ငံထိ ခရီးနှင့်နိုင်ပါ့မလား။ ဘာအခက်အခဲတွေ ကြုံတွေ့ရမလဲ။ ဘယ်လိုကျော်ဖြတ်မှာလဲ။ အဆုံးသတ်မှာကော သူလိုချင်တာ ဖြစ်မှာလား ဆိုတာတွေကို တစ်ကားလုံး ဇာတ်ရှိန်မကျဘဲ ကြည့်ရှုခံစားရမှာ ဖြစ်ပါတယ်။ ဒုတိယကမ္ဘာစစ်ကို သမိုင်းစာအုပ်တွေထဲကလို ပုံမှန်ရှုထောင့်ကမဟုတ်ဘဲ ဘယ်လို မြင်တွေ့ရမလဲ ဆိုတာကိုလည်း စူးစမ်းတွေ့မြင်နိုင်ပါလိမ့်မယ်။

t.me/cartoonbynikko/2746

တိတ်ဆိတ်တဲ့ဘဝရဲ့ အဖော် (၂၀၀၇)

IMDB - 7.3/10
Genre - Comedy, Romance

ရိုင်ယန် ဂေါ့စလင်း အဓိကပါဝင်သရုပ်ဆောင်ထားပြီးအော်စကာဆန်ကာတင်တစ်ဆုလည်း စာရင်းဝင်ခဲ့တယ်။ ဘရုတ်ကန်း ဖမ်မလီ လို့ပြောရအောင် သူ့ဘဝက ဆိုးလှတယ်။ အဖေရော အမေရောဆုံးသွားတဲ့အပြင် အကိုဖြစ်သူကလည်း ငယ်ငယ်ကတည်းက အိမ်မှာ မနေခဲ့ပါ။ ကားဂိုဒေါင်ထဲ တစ်ယောက်တည်းနေပြီး တော်ရုံလူတွေနဲ့ စကားမပြောတော့ တိတ်ဆိတ်ခြင်းဟာ သူ့အတွက် အကောင်းမွန်ဆုံးအဖော် ဖြစ်ခဲ့တယ်။ ဒီချိန်မှာပဲ အိမ်ကို ပြန်ရောက်လာတဲ့ အကိုလင်မယားဟာ ညီဖြစ်သူရဲ့ အထီးကျန်ဆန်တဲ့ဘဝကိုတွေ့ပြီး အဖော်လေးရအောင် ဆိုပြီးကောင်မလေးတစ်ယောက်နဲ့ မိတ်ဆက်ပေးလိုက်တယ်။ အဲ့ဒီနောက်မှာတော့။

t.me/cartoonbynikko/2749

လူတိုင်းချစ်တဲ့ တူဒါ (၂၀၂၄)

IMDb - 6.5/10
Genre - Drama

မော်ရိုကိုမြေပြန့်ဒေသက "ရှီးခတ်" လို့ကျော်ကြားကြတဲ့ ရိုးရာတေးဆိုကြတဲ့ အဆိုတော်လူမျိုးတွေကနေဆင်းသက်လာတဲ့ တူဒါ ဆိုတဲ့အမျိုးသမီး။ အသက်မွေးကြောင်းအရ ဘားတွေမှာ တင်လှုပ်ရင်လှုပ်၊ ထိကပါးရိကပါးခံပြီး သီချင်းဆိုဖျော်ဖြေရပေမဲ့ သူ့ရဲ့အိပ်မက်က သူတို့ရိုးရာ "အိုက်တာ" သီချင်းနဲ့ကျော်ကြားတဲ့စတားတစ်ယောက်ဖြစ်လာဖို့ ။ သူ့ဘဝကို ဘားအဆိုမယ်အဖြစ်နဲ့ မပျော်ပိုက်တဲ့ မာနခဲပေါ့။ ရိုးရာတေးတွေကို နေရာမပေးကြတော့တဲ့ခေတ်မှာ အရည်အချင်းရှိပေမဲ့ အသိအမှတ်မပြုခံရတော့ သူဟာ မြို့ကြီးကိုတက်ပြီး နေရာရဖို့ ကြိုးစားပါတော့တယ်။ သူကိုယ်တိုင်စာမတတ်တော့ သူ့ရဲ့ဆွံ့အနားမကြားသားလေးကို စာတတ်အောင်သင်ရမယ်ဆိုတဲ့စိတ်နဲ့ ခေါင်းမာပြီး ရည်မှန်းချက်ကြီးတဲ့အမျိုးသမီးပေါ့။ ဒီဇာတ်ကားက သူမရဲ့ဘဝကြမ်းတမ်းပုံတွေ၊ ရုန်းကန်ရပုံတွေကို ရိုးရိုးလေးနဲ့ရိုက်ပြထားပြီး သရုပ်ဆောင်မင်းသမီးရဲ့ကာရိုက်တာကို ပုံဖော်တဲ့နေရာမှာ အမူအရာကအစ အတော်ကို သဘာဝကျကျ သရုပ်ဆောင်ထားတာကို မြင်ရမှာပါ။ ခံစားတတ်တဲ့သူတွေအတွက် ကြည့်ရတာတန်မဲ့ကားကောင်းလေးတစ်ကားပါပဲ။

t.me/dramamv/816

ဂန်းစတား (၂ဝ၁၅)

IMDB - 6.6/10
Genre - Crime, Thriller

ဂန်းစတား ဇာတ်ရုပ်ကို ပိုင်ပိုင်နိုင်နိုင် သရုပ်ဆောင်နိုင်သူ မင်းသားတွေကို ပြပါဆိုရင် တွမ်ဟာဒီ ကိုလည်း ချန်ထားခဲ့လို့ မရဘူးရယ်။ ဒီဇာတ်ကားမှာတော့ ၅၀ ပြည့်နှစ်၊ ၆၀ ပြည့်နှစ်တွေမှာ လန်ဒန်မြို့ရဲ့ နာမည်ဆိုးနဲ့ ကျော်ကြားခဲ့တဲ့ ဂန်းစတား တွေဖြစ်တဲ့ ခရေး အမြွှာညီနောင်ရဲ့ နေရာကနေ နှစ်ကိုယ်ခွဲ သရုပ်ဆောင်ထားတာဖြစ်ပါတယ်။ ရော်နယ် ခရေး နဲ့ ရတ်ဂျီနယ် ခရေး ဆိုတဲ့ အမြွှာညီအစ်ကိုနှစ်ယောက်အကြား ရွန် လို့ခေါ်တဲ့ ရော်နယ် ကတော့ စိတ်ကစဉ့်ကလျားရောဂါကို ခံစားနေရသူပေါ့။ ဒီတော့ သွေးဆာတတ်တယ်၊ အကြမ်းဖက်တတ်တယ်၊ ထင်တိုင်းကြဲတတ်တယ်။ ရတ်ဂျီ ကတော့ ပိုက်ဆံကြိုက်တယ်၊ ကလပ်ပိုင်ရှင်၊ ကာစီနိုပိုင်ရှင်ဖြစ်တဲ့အတွက် အဲ့ဂုဏ်ပုဒ်နဲ့ ထိုက်တန်တဲ့ လေးစားမှုကို ရချင်ပါတယ်တဲ့။ အကျဉ်းချုပ်လိုက်ရင်တော့ နှစ်ယောက်လုံးက ဂန်းစတားတွေပါ။ ဒီရုပ်ရှင်ကို ရတ်ဂျီ ရဲ့ ချစ်ရသူ၊ သူ့ထက် ၁၀ နှစ်ငယ်တဲ့ ဖရန်စစ်ရှေယာ က ဇာတ်ကြောင်းကို ပြောပြနေဟန် ရိုက်ကူးထားတယ်။ “ကျွန်မရဲ့ ခန့်ညားလှတဲ့ ရတ်ဂျီ/ ကျွန်မရဲ့ ရတ်ဂျီ/ ကျွန်မရဲ့ခင်ပွန်း” ဒီလိုလေးတွေ သုံးနှုန်းပြီးတော့ ခရေး ညီနောင် နာမည်ကျော်ကြားလာပုံကစလို့ သူတို့ရဲ့ အဆုံးသတ်အထိ ဇာတ်ကြောင်းကို ပြောပြသွားတယ်။

t.me/cartoonbynikko/612

မျှော်လင့်ခြင်းလေး (၂၀၁၂)

IMDb - 6.6/10
Genre - Sci-fi, Drama

စိတ်ကူးယဉ်စရာကောင်းလှတဲ့ နာဂါရှီမာစီရင်စုရှိ ရွာငယ်လေးတစ်ခုမှာ အိုနိုတို့ ဇနီးမောင်နှံ နဲ့ သားဖြစ်သူ ယိုအိချီနဲ့ သူ့ဇနီး အီဇူမီတို့ဟာ လယ်ယာနဲ့ နွားမွေးမြူရေး လုပ်ကိုင်ရင်း အေးချမ်းစွာ နေထိုင်ခဲ့ကြပါတယ်။ တစ်နေ့ ဂျပန်နိုင်ငံမှာ ငလျင်လှုပ်ခတ်ပြီး ကမ်းရိုးတန်းဒေသတွေမှာလည်း ဆူနာမီဒဏ်ကို ခံစားလိုက်ကြရပါတယ်။ ငလျင်ကြောင့် နာဂါရှီမာက နျူကလီးယား ဓာတ်အားပေးစက်ရုံ ပေါက်ကွဲသွားခဲ့ပါတယ်။ စက်ရုံရဲ့ အချင်းဝက် ၂၀ ကီလိုမီတာကို လုံခြုံရေးနယ်မြေ သတ်မှတ်ပြီး စည်းတားကာ အဲဒီနယ်နိမိတ်အတွင်း နေထိုင်သူများကို အတင်းပြောင်းရွှေ့ခိုင်းခဲ့ပါတယ်။ လယ်သမားကြီး အိုနိုတို့အိမ်ဟာ စည်းအပြင်မှာ ရောက်ရှိနေတာကြောင့် မပြောင်းရွှေ့ဘဲ ဆက်လက်နေထိုင်ဖို့ ဆုံးဖြတ်ခဲ့ပါတယ်။ ဒါပေမဲ့ အိုနိုဟာ သားဖြစ်သူနှင့် ချွေးမကိုတော့ တခြားကို ပြောင်းဖို့ ဖိအားပေးခဲ့ပါတယ်။ အာဏာပိုင်များ၏ ညွှန်ကြားချက်များကို လျစ်လျူရှုကာ သူတို့အိမ်ကို ခိုင်မာစွာ ဆုပ်ကိုင်ထားကြတဲ့ အိုနိုတို့ ဇနီးမောင်နှံ သူတို့ဆန္ဒအတိုင်း အိမ်မှာပဲ ဆက်ပြီးနေခွင့်ရကြပါ့မလား။ ဆူနာမီနဲ့ နျူကလီးယားစက်ရုံပေါက်ကွဲမှုကြောင့် တခြားကို ပြောင်းနေကြတဲ့ သားနဲ့ ချွေးမ၊ ရွာသူရွာသားတွေရော ဇာတိမြေကို ပြန်လည်ခြေချခွင့်ရကြပါ့မလားဆိုတာ။

t.me/gwmmupl/4340

သင်းခွေချပ်လေး ကူလု ၏ ခရီးစဉ် (၂၀၂၅)

IMDB - 7.5/10
Genre - Documentary

ဒိုင်နိုဆောခေတ်ကတည်းက တည်ရှိခဲ့တဲ့ ရှားပါးသင်းခွေချပ်တွေမှာ သူတို့ရဲ့ကြေးခွံနဲ့ အသားက ဆေးဖက်ဝင်တာကြောင့် တရားမဝင်ရောင်းဝယ်မှုတွေမြင့်မားလာခဲ့ပြီး လက်ရှိမှာ မျိုးတုန်းတော့မယ့် ရှားပါးမျိုးစိတ်တွေဖြစ်နေပါတယ်။ ဇာတ်လမ်းလေးကတော့ တရားမဝင်ရောင်းဝယ်တဲ့ သူတွေလက်ထဲမှာရှိနေတဲ့ သင်းခွေချပ်ပေါက်လေးကို တောရိုင်းတိရစ္ဆာန်ကာကွယ်ရေးအဖွဲ့က ကယ်တင်ခဲ့ပြီး တောရိုင်းထဲပြန်မလွှတ်ခင် စေတနာ့ဝန်ထမ်းလေး ဂဲရက်က သင်ခွေချပ်လေးကို ကျန်းမာသန်စွမ်းလာအောင် ဖခင်သကဲ့သို့ ကိုယ်နဲ့မကွာစောင့်ရှောက်ပေးခဲ့ပုံကို စိတ်ဝင်စားဖွယ် ရိုက်ပြထားတာပဲဖြစ်ပါတယ်။ တိရစ္ဆာန်လေးတွေမှာလည်း လူလိုပဲ ထိတ်လန့်လွန်ပြီး ထရာမာရသွားတဲ့ အခိုက်အတန့်လေးတွေ ရှိတတ်တာကြောင့် မှောင်ခိုသမားတွေလက်ထဲမှာ ထရာမာရသွားတဲ့ သင်းခွေချပ်လေးကို စိတ်ပိုင်းဆိုင်ရာပြန်လည်ကျန်းမာအောင် လုပ်ပေးခဲ့ပုံကလည်း ပညာယူစရာကောင်းလှပါတယ်။ တောင်အာဖရိကမှာ ရိုက်ကူးထားတာကြောင့် ရှုခင်းတွေလှပတာကိုလည်း ဝေဖန်ရေးသမားတွေက ချီးကျူးထားကြပါသေးတယ်။ ဇာတ်ကားက မှတ်တမ်းရုပ်ရှင်ဖြစ်တာကြောင့် ဒါတွေအားလုံးကတော့ ဖြစ်ရပ်မှန်တွေပဲဖြစ်ပါတယ်။ တောရိုင်းတိရစ္ဆာန်တွေရဲ့ စိတ်ဝင်စားဖို့ကောင်းတဲ့ အချက်တွေ၊ လူတွေကြောင့် တိရစ္ဆာန်လေးတွေ ကြုံတွေ့နေရတဲ့ ဒုက္ခတွေ၊ ဂဲရက်လို နှလုံးသားလှတဲ့စေတနာ့ဝန်ထမ်းလေးတွေကြောင့် ကိုယ်၊ စိတ်ဒဏ်ရာရနေတဲ့ တိရစ္ဆာန်လေးတွေ ပြန်လည်ကောင်းမွန်လာခဲ့ပုံနှင့် သဘာဝပတ်ဝန်းကျင်နှင့် တောရိုင်းတိရစ္ဆာန်တွေကို ကာကွယ်ပေးဖို့ ဘာကြောင့်လိုအပ်နေလဲဆိုတာတွေကို ကျကျနနဖန်တီးရိုက်ကူးထားတဲ့ မှတ်တမ်းရုပ်ရှင်လေးကြည့်ရင်း လေ့လာလိုက်ကြရအောင်။

t.me/gwmmupl/4334

ဂျာမဏီနိုင်ငံရဲ့ ဒုတိယကမ္ဘာစစ် စစ်ပြီးခေတ် အခြေအနေ (၂၀၀၆)

IMDb - 8.7/10
Genre - Thriller, War

ဒုတိယကမ္ဘာစစ်ပြီးတဲ့အခါ ဂျာမဏီနိုင်ငံကို မဟာမိတ်နိုင်ငံတွေဖြစ်တဲ့ ပြင်သစ်၊ ဗြိတိန်၊ အမေရိကန်နဲ့ ရုရှားတို့က အသီးသီး ပိုင်းယူခဲ့ကြပြီး နောက်ပိုင်းမှာ အနောက်ဘက် မဟာမိတ်အုပ်စုနဲ့ ရုရှားအစိုးရတို့ကြား နိုင်ငံရေးအယူအဆကွာခြားမှုကြောင့် ဂျာမဏီနိုင်ငံကို အရှေ့ဂျာမဏီနဲ့ အနောက်ဂျာမဏီအဖြစ် နှစ်ပိုင်း ခွဲခြားခဲ့ရပါတယ်။ ဒါ့အပြင် ရုရှားအစိုးရလက်ထဲကျရောက်နေတဲ့ ဘာလင်မြို့ကိုပါ အရှေ့ဘာလင်နဲ့ အနောက်ဘာလင်အဖြစ် ခွဲခြားခဲ့ပြီး လူမျိုးတစ်မျိုးတည်းဖြစ်ပေမဲ့ နိုင်ငံရေးစနစ် မတူညီတဲ့ နှစ်နိုင်ငံ ဖြစ်လာခဲ့ပါတယ်။ အရှေ့ဂျာမဏီဟာ ဆိုရှယ်လစ်စနစ်ကို ကျင့်သုံးခဲ့ပြီး အနောက်ဂျာမဏီကတော့ ဒီမိုကရေစီစနစ်နဲ့ သွားလာခဲ့ကာ ၁၉၆၁ ခုနှစ်မှာတော့ ဘာလင်တံတိုင်းကို တည်ဆောက်ပြီး လုံးဝ ခွဲခြားလိုက်ပါတယ်။ အနောက်ဂျာမဏီက လူတွေဟာ အရှေ့ဂျာမဏီကို သွားလာနိုင်ပေမဲ့ အရှေ့ဂျာမဏီကနေ အနောက်ဂျာမဏီကို ကူးသန်းခွင့်ရဖို့ကတော့ ထိုခေတ်အခါမှာ ရွှေထက်ရှားခဲ့ပါတယ်။ အဲဒီကာလမှာ အနုပညာရှင်တွေကိုပါ အစိုးရက စောင့်ကြည့်ထိန်းချုပ်ခဲ့ပြီး အနုပညာလုပ်ခွင့်တွေ ပိတ်ပင်ခဲ့တာတွေ ရှိခဲ့ပါတယ်။ ဒီဇာတ်ကားထဲမှာတော့ ပြဇာတ်စာရေးဆရာ ဂရော့ ဒရိုင်းမန်း ကို ဗိုလ်မှူးကြီး ဗီးစ်လာ က အနီးကပ် စောင့်ကြည့်ရတဲ့ အကြောင်းကို အခြေခံရိုက်ကူးထားပြီး သူ့ရဲ့ တိုက်ခန်းတစ်ခုလုံးကို အသံဖမ်းစက်တွေ တပ်ဆင်ကာ နားထောင်စောင့်ကြည့်သွားတဲ့ ပုံစံနဲ့ ဇာတ်လမ်းကို တည်ဆောက်ထားပါတယ်။ ဇာတ်ကားအစပိုင်းမှာ အနည်းငယ် အေးသလို ခံစားရပေမဲ့ သည်းခံကြည့်သွားရင် တဖြည်းဖြည်းနဲ့ ဇာတ်ကားရဲ့ အဓိပ္ပာယ်ကို ပြောက်မြောက်စွာ ပုံဖော်လာပြီး ကြည့်ရှုသူကို အဆုံးထိ ဆွဲခေါ်သွားနိုင်မှာဖြစ်ကာ ကြည့်ပြီးတိုင်း ရင်ထဲမှာ နင့်နေအောင် ခံစားရမယ့် ရသတစ်မျိုးကို ပေးစွမ်းနိုင်တဲ့ ဇာတ်ကားတစ်ကားဖြစ်ပါတယ်။ နောက်ဆုံးအနေနဲ့ အသေးစိတ်လေးတွေကို သတိထားကြည့်ပြီး ညွှန်းထားသလို ဟုတ်မဟုတ်ကို ကိုယ်တိုင် ကြည့်ရှုပြီး ဆုံးဖြတ်ကြည့်ကြပါစို့လားဗျာ။

t.me/cartoonbynikko/2755

အမှတ်တမဲ့မှ အမှတ်တရများသို့ (၂၀၀၉)

IMDb - 6.9/10
Genre - Romance , Drama

ရက်စွဲတွေနဲ့ အမှတ်တရဇာတ်လမ်းတွေဟာ ပုံမှန်အားဖြင့် ဇာတ်သိမ်းမလှတဲ့အမျိုးများ ဖြစ်ကြပြီး၊ "အမှတ်တမဲ့မှ အမှတ်တရများသို့" ဆိုတဲ့ စကားအတိုင်း အမှတ်တမဲ့ဖြစ်ရပ်သေးသေးလေးက စတင်ခဲ့တဲ့ ဆဲန်ကျန် ဆိုတဲ့ စာမဖတ်တတ်တဲ့ ကောင်မလေးတစ်ယောက်နဲ့ နိုင်ငံခြားမာစတာတန်း ပညာတော်သင်ကျောင်းသား ရာဝီ တို့ရဲ့ အချစ်ရေးကို ရိုက်ကူးထားတဲ့ ဇာတ်လမ်းလေး ဖြစ်ပါတယ်။ ဆဲန်ကျန် ဟာ မထင်မှတ်ထားတဲ့ နှစ်တစ်နှစ်ရဲ့ အောက်တိုဘာလမှာ ရာဝီ ဆိုတဲ့ ကောင်လေးနဲ့ တွေ့ခဲ့ပြီး တစ်ညတာအတွင်း ရင်းနှီးခဲ့ကြပေမယ့် သူတို့နှစ်ယောက်ကြား ဆက်ဆံရေးက မျက်စိတစ်မှိတ်အတွင်းပဲ ကုန်ဆုံးသွားခဲ့ပါတယ်။ အကြောင်းကတော့ ရာဝီ ဟာ နိုင်ငံခြား ပညာတော်သင်သွားဖို့ဖြစ်လာခဲ့တာပါ။ ဒါပေမယ့် သူတို့နှစ်ယောက်ရဲ့ ဆက်ဆံရေးက အဆုံးသတ်သွားမနေပါဘူး။ နှစ်တိုင်း အောက်တိုဘာလ ၈ ရက်နေ့မှာ နှစ်ယောက်သားရဲ့ အမှတ်တရနေရာလေးဆီ ပြန်လာဖို့ ကတိပေးထားပါတယ်။ ဒီလိုနဲ့ ဆဲန်ကျန် ဟာ အောက်တိုဘာလ ၈ ရက်နေ့ရောက်တိုင်း အမှတ်တရတွေရှိခဲ့တဲ့ နေရာလေးမှာ အမြဲတမ်း စောင့်မျှော်နေခဲ့ပြီး ရာဝီ က ကတိအတိုင်း ပြန်လာပါ့မလား။ သူတိုနှစ်ယောက်ရဲ့ အချစ်ရေးက ဖြောင့်ဖြူးနိုင်ပါ့မလား။ ဆဲန်ကျန် က ရာဝီ တစ်ယောက်ကိုပဲ စောင့်စားသွားမလား။ အချစ်နဲ့ ဘဝရွေးချယ်ဖို့ဖြစ်လာတဲ့အခါ လူတွေ ဘယ်အရာကို ဦးစားပေးသွားကြမလဲ ဆိုတာကို ကြည့်ရှုရမယ့် ဇာတ်လမ်းတစ်ပုဒ် ဖြစ်ပါတယ်။

t.me/cartoonbynikko/2757

အထီးကျန်ဘဝ (၂၀၂၃)

IMDb - 7.4/10
Genre - Romance, Thriller

ဘဝမှာ အထီးကျန်တယ်ဆိုတဲ့ စကားလုံးကို အပြည့်အဝ ခံစားနေရတဲ့ ခိန်ကျိ ဆိုတဲ့ ဂျပန်လူမျိုး ကောင်လေးတစ်ယောက်ဟာ သီးသန့်နေတတ်သူဖြစ်ပြီးကိုယ်တိုင်ကိုယ်ကျ လက်လျှော့ချင်တဲ့ အတွေးတွေကြောင့် ခက်ခဲတဲ့ ဘဝကို ဖြတ်သန်းနေရသူပါ။ တစ်နေ့မှာတော့ ခိန်ကျိ က နွိင်း ဆိုတဲ့ မိန်းမလှလေးနဲ့ သိကျွမ်းလာခဲ့ပြီး ဘဝက တဖြည်းဖြည်း ပန်းရောင်သမ်းလာတဲ့ အချိန်ရောက်လာပါတယ်။ အထီးကျန်မှုကြောင့် ဘဝကို လက်လျှော့ဖို့ မကြာခဏ စိတ်ပင်ပန်းနေတဲ့ လူတစ်ယောက်အတွက် မျှော်လင့်ချက်ကို ပြန်လည်ပေါက်ဖွားစေနိုင်တဲ့ အချစ်တစ်ခု ဖြစ်လာနိုင်မလားဆိုတာကို ဒီဇာတ်လမ်းထဲမှာ ဆက်လက်ခံစားကြည့်ရှုနိုင်ပါတယ်။

t.me/cartoonbynikko/2760