ПРОЛОГ на день (04 февраля)
Па́мять преподо́бнаго отца́ на́шего Иси́дора Пилуси́йскаго

Стихи́:
Пилусио́те ра́дуйся, ра́дуйся мно́жайшее:
Ка́ла совле́кся, и ра́дость и́стинную получи́в:
Иси́дора в четве́ртый положи́ша зна́мением не́мощным.

Сей бя́ше еги́птянин ро́дом, благоро́дных и боголюбе́зных роди́телей сын, сро́дник же сый Фео́филу, и Кири́ллу, Александри́йским епи́скопом. Сей пи́сменам боже́ственыя прему́дрости, и вне́шним вельми́ извы́к: премно́гая написа́ния, и сло́ву и па́мяти досто́йная, любонауче́ным оста́ви. Оста́вль вся́кое бога́тство, и рода све́тлость, и изоби́лие жития́, дости́г го́ру Пилуси́йскую, и в мона́шеское вшед житие́. Та́мо же упражня́яся бя́ше, и к Бо́гу прити́ча, всю вселе́нную боже́ственным словесы́ свои́ми уча́ просвеща́ше. Согреша́ющих обраща́я, испра́вленыя подтвержа́я, непокаря́ющихся же сече́нием боже́ственных свои́х обличе́ний к доброде́тели подви́же. Но и царя́ ко вселе́нскому удобре́нию, воспомина́яй наказу́яше. Но оба́че и всем того́ вопроша́ющым, боже́ственных писа́ний рече́ния, прему́дренно пове́дуя. Глаго́лют же сие́, я́ко бы́ти еписто́лиям его́ до десяти́ ты́сящь. Сей у́бо про́чее добре́йше поживе́, и по Бо́зе жи́тельствовав, в глубо́це ста́рости житие́ оста́ви.

Церковнославянский текст (Источник: Пролог)
Русский текст
Чтения на 04.02
#Исидор #Пелусиот #преподобный #Пролог

ПРОЛОГ на день (05 февраля)
Па́мять святы́я му́ченицы Ага́фии

Стихи́:
Ра́дующися, темни́це мра́чней вдана́ бы́вши Ага́фия:
И све́та ненави́дящи е́же льсти́вых в лице́ зре́ти:
В пя́тый в темни́це Ага́фия у́мре виде́нием рачи́тельным.

Та бя́ше от гра́да Пано́рма, и́же в Сикили́и: ви́дом теле́сным добра́ бя́ше, и добро́тою душе́вною сия́ющи, и бога́тство мно́гое иму́щи. Во времена́ же Де́кия царя,́ Кинтиа́ну иге́мону приведена́ бы́вши: и пе́рвее у́бо предана́ бысть Афродиси́и не́которой жене́, е́же претвори́ти ю́ от Христо́вы ве́ры. Она́ же кре́пко держа́ше, и па́че жела́ше муче́ния сме́рти. Му́чена же бы́вши зело́, и сосца́ ея́ отре́заша: ю́же всехва́льный апо́стол Петр в темни́це здра́ву сотвори́. Та́же по чрепи́нах влачи́ма бысть: и огне́м попалена́, и в темни́цу вве́ржена, и та́мо Бо́гу дух предаде́. Соверша́ется же собо́р ея́ во свое́м ея́ муче́нии, су́щем в Трикогхо́не.

Церковнославянский текст (Источник: Пролог)
Русский текст
Чтения на 05.02
#Агафия #мученица #Пролог

ПРОЛОГ на день (06 февраля)
Па́мять преподо́бнаго отца́ на́шего Вуко́ла епи́скопа Сми́рнскаго

Стихи́:
Сми́рнский па́стырь Вуко́л, же́ртвенный служи́тель:
Бодр есть и по сме́рти па́стырь и храни́тель:
Луча́ со́лнечнаго све́та оста́ви Вуко́л в шесты́й.

Сей из мла́да во́зраста себе́ очи́стив, прия́телище бысть Святаго Ду́ха. Его́же обре́т иску́сна и досто́йна всехва́льный, Христу́ возлю́бленный, Иоа́нн Богосло́в, епи́скопа и пасты́ря благопотре́ба вруча́ет, Сми́рнскаго вели́каго гра́да це́ркви. И́же и от Свята́го Ду́ха просвеще́н, во мра́чней ле́сти просвети́, и креще́нием мно́ги сы́ны дне показа́, от тмы звере́й неукроти́мых тех спаса́я. Той у́бо пре́жде премене́ния жития́, блаже́ннаго Полика́рпа в том гра́де па́стыря, и учи́теля слове́сных ове́ц вручи́в. И по сих преста́вися от жития́, и в зе́млю честно́му его́ те́лу положе́ну, бы́лию израсти́ Бог сотвори́ на гро́бе его́, подаю́щу цельбы́ да́же и до днесь.

Церковнославянский текст (Источник: Пролог)
Русский текст
Чтения на 06.02
#Вукол #Смирнский #преподобный #Пролог

ПРОЛОГ на день (07 февраля)
Па́мять преподо́бнаго отца́ на́шего Парфе́ния, епи́скопа Лампсики́йскаго гра́да

Стихи́:
Оста́ви персть Парфе́ние Ламфа́ку,
Парфе́ние прия́т, получи́в до́лгий сон в седмы́й.

Сей бя́ше в ца́рство Константи́на Вели́каго, сын Христофо́ра диа́кона, Мелитогра́дския це́ркве, кни́жен вельми́. Вся́кую оте́ческую доброде́тель прия́ти тща́шеся, и ры́бы ловя́, и прося́щым подава́я. Толи́ко же бя́ше кры́яся в нем благоче́стие и доброде́тель, я́ко и благода́ть от Бо́га прия́ти ему́, е́же бе́сы пргоня́ти, и вся́кие боле́зни исцеля́ти, и прилежа́ние ве́лие сотвори́в на уче́ние кни́жное. И поста́влен бысть пресвитер Фили́ппом епи́скопом Мелитогра́дским, и пото́м епи́скоп Лампса́ков, Ахиллием архиепи́скопом Кизи́ческим. Мно́га же чудеса́ сотвори́в: и́бо юнце́м о́ко му́жу не́которому избоде́но исцели́, и благослове́нием еди́нем трясогла́вную боле́знь от не́которыя жены́ прогна́, и пса напа́дающаго, и того́ я́ти хапа́нием хотя́ща, дунове́нием умертви́: и челове́ка колесни́цами согнете́на, и чре́ву его́ разсе́дшуся, уме́рша внеза́пу, воскреси́: и Ухе́рия не́коего, жены́ и́менем Ага́пии, отра́вную боле́знь прогна́: и пова́пующым дела́ поспеша́ти упра́ви: и и́на мно́га и пресла́вна соде́лав чудеса́, и о бу́дущих проре́к, ко Го́споду отъи́де.

Церковнославянский текст (Источник: Пролог)
Русский текст
Чтения на 07.02
#Парфений #Лампсакийский #преподобный #Пролог

ЗЛАТОУСТНИК на день (Суббота сыропустная)
Поуче́ние Иоа́нна Златоу́стаго о по́льзе душе́вней

Рече́ Госпо́дь: а́ще оставля́ете человѣ́комъ согрѣше́нія и́хъ, и ва́мъ оста́витъ Оте́цъ ва́шъ Небе́сный согрѣше́нія ва́ша; а́ще ли не оста́вите зло́ творя́щимъ согрѣше́нія и́хъ, не /л. 16 об./ оста́вятся и ва́мъ согрѣше́нія ва́ша. Си́ми бо всѣ́ми Госпо́дь Бо́гъ я́ко чадолюби́вый Оте́цъ учи́тъ на́съ, да бы́хомъ спасли́ся. И вельми́ возлюби́ на́съ, па́че не́жели ма́терь младе́нца. Помы́слимъ у́бо, бра́тіе, ко́ль мно́го согрѣша́емъ, и безъ числа́ непра́вды твори́мъ, а Онъ терпи́тъ, и милосе́рдуетъ. Аще у́бо коего́ дни́ предъ Бо́гомъ согрѣше́нія сотвори́мъ, да разумѣ́емъ у́бо долготерпѣ́ніе Бо́жіе. О, человѣ́че, а́ще реку́ ти: да́й убо́гимъ пи́щу и одѣя́ніе? И ты́ рече́ши: себѣ́ ми тре́бѣ. Аще ли реку́ ти: пости́ся и бо́дръ бу́ди? И ты́ рече́ши: не́мощно ми́ тѣ́ло. Аще ли реку́ ти: не имѣ́й гнѣ́ва, и зла́ за зло́ не воздава́й, чужи́хъ грѣхо́въ не пыта́й. И что́ проти́ву сему́ отвѣща́ти и́маши? Ни тѣ́ла бо здѣ́ утруди́ти и́маши, ни имѣ́нія дая́ти, ни пути́ до́лга ше́ствовати, ни ми́лостыни дая́ти. Но моли́ Бо́га за творя́щія зло́, да Госпо́дь Бо́гъ и твоя́ оста́витъ согрѣше́нія. Аще ли не оставля́еши злотворя́щимъ согрѣше́нія, не мо́жеши спасти́ся. Якоже бо ко́рень добродѣ́тели — любо́вь, та́ко всѣ́мъ зло́бамъ /л. 17/ ко́рень е́сть вражда́. Испе́рва бо рече́ Госпо́дь по Ада́мли согрѣше́ніи: положу́ вражду́ между́ діа́воломъ и человѣ́ки. Мно́зи бо любо́вь и́мутъ ко діа́волу и его́ во́лю творя́тъ, а со человѣ́ки вражду́ютъ. О, бра́тіе, а́ще мо́лимся Бо́гу, а зло́бы не оста́вимъ, то льсти́мся. Ка́ко мо́лимся, глаголюще: Отче на́шъ Иже еси́ на небесѣ́хъ, оста́ви на́мъ до́лги на́ша, я́коже и мы́ оставля́емъ должнико́мъ на́шимъ? О, человѣ́че, глаго́леши не оста́вя бра́тня согрѣше́нія, лже́ши Бо́гу. Са́мъ бо Госпо́дь рече́: а́ще оста́вите, и Азъ оста́влю ва́мъ. Вы́ бо са́ми человѣколю́бія мѣ́ру уставля́ете, глаго́люще: оста́ви на́мъ Го́споди, я́ко и мы́ оставля́емъ. Слы́ши проро́ка глаго́люща: а́ще беззако́нія на́зриши Го́споди, Го́споди, кто́ постои́тъ? О, человѣ́че, ви́ждь, ка́ко са́мъ ся́ связу́еши словесы́ свои́ми, не отдая́ злотворя́щимъ, са́мъ не пріи́меши отъ Бо́га грѣхо́мъ свои́мъ отда́нія, и ника́ко же мо́жеши спасти́ся? Смотри́ ты́, о человѣ́че, е́же Пе́тръ ко Іису́сови вопроша́я, глаго́лаше: коли́ко, Го́споди, оста́влю злотворя́щимъ, седми́жды ли́? Госпо́дь же рече́ къ нему́: а́ще и до седми́десять кра́тъ /л. 17 об./ седмери́цею дне́мъ согрѣши́тъ человѣ́къ, и рече́тъ ти́ — ка́юся, — прости́ его́. Вся́къ бо проща́яй проще́нъ бу́детъ, и поми́луяй поми́лованъ бу́детъ. О, вѣ́рніи, не имѣ́емъ на мно́ги дни́ зло́бы, лю́тъ бо е́сть су́дъ. Аще въ бо́рзѣ сотвори́ши проще́ніе пока́явся, вско́рѣ проще́ніе и отъ Бо́га пріи́меши, а́ще ли на до́лги дни́ гнѣ́ваешися, поги́бель е́сть души́. И а́ще кто́ и муче́ніе воспріи́метъ Го́спода ра́ди, а гнѣ́въ имы́й, непрія́тенъ е́сть Бо́гу злосе́рдія ра́ди. Аще кто́ и чудеса́ твори́тъ, а гнѣ́ва не оста́нетъ, все́ безъ успѣ́ха е́сть. Аще кто́ въ таковѣ́ злѣ́ умретъ, то го́рши жидо́въ и ерети́къ осу́дится: преслу́ша бо за́повѣдь Бо́жію. Гнѣвли́вый бо и зави́дливый го́рши ра́тника е́сть, подо́бенъ о́бразу зміи́ну, вражду́етъ бо, и не извѣству́етъ, ходя́ и воста́я и лега́я, змíинъ я́дъ въ се́рдцы свое́мъ кры́етъ, и не мо́жетъ проще́нія прія́ти, и не успѣ́етъ ника́ко же къ добродѣ́тели. Ни дѣ́вство бо, ни по́стъ, ни сле́зы, ни моли́твы, ни ми́лостыни, ни да́рове гнѣвли́ваго непрія́тны Го́сподеви. Аще, — рече́, — принесе́ши да́ръ тво́й ко олтарю́, а имѣ́еши зло́бу, ше́дъ пе́рвіе смири́ся /л. 18/ съ сопе́рникомъ свои́мъ, тогда́ прія́тенъ бу́детъ да́ръ тво́й. Бо́гу на́шему сла́ва, ны́нѣ и при́сно, и во вѣ́ки вѣко́мъ, ами́нь.

Церковнославянский текст (Источник: Златоустник)
Чтения на субботу сыропустную
#Златоуст #поучение #суббота #сырная

ЗЛАТОУСТНИК на день (Неделя сыропустная)
Поуче́ние Иоа́нна Златоу́стаго о святе́мъ посте́

Разу́мно и смы́сленно послу́шайте, бра́тіе, о святѣ́мъ се́мъ постѣ́. Проро́къ бо глаго́летъ о поще́ніи: во́ время прія́тно послу́шахъ тебе́, и въ де́нь спасе́нія помого́хъ ти́. Се́ ны́нѣ наста́ вре́мя прія́тно, се́ прибли́жися де́нь спасе́нія, святы́й се́й вели́кій по́стъ честны́й, прообразова́нный отъ Бо́га, въ о́ньже входя́ще очи́стимъ душа́ и тѣлеса́ отъ вся́каго зла́. Сíи бо дни́ очище́нія су́ть: отъ сва́ра и гнѣ́ва, лжи́ и клеветы́, за́висти и татьбы́, осужде́нія и пія́нства, блуда́ и объяде́нія. Вся́ та́, бра́тіе, зла́я сотворе́нія отве́ргше, воспріи́мемъ и́стинное покая́ніе, да прибли́жимся къ Бо́гу, ча́стыми моли́твами, слеза́ми и ми́лостынею; да омы́емъ прегрѣше́нія на́ша, не человѣ́комъ похвалу́ явля́юще поще́нія на́шего, но Бо́гу вѣ́дущему вся́. Десяти́на бо всего́ лѣ́та се́й по́стъ е́сть, да поне́ ту́ ча́сть отдади́мъ Бо́гу. Аще ли питія́ и яде́нія мно́га, и всегда́ сва́ра, и тя́жбы, и гнѣ́ва, /л. 18 об/ и всея́ про́чія зло́бы, не оста́немся, то́ ка́ко мо́жемъ отда́ніе грѣхо́мъ прія́ти? Но слы́шимъ, что́ рече́ евангели́стъ? Рече́ Госпо́дь: а́ще отпу́стите человѣ́комъ согрѣше́нія и́хъ, отпу́ститъ и ва́мъ Оте́цъ ва́шъ Небе́сный прегрѣше́нія ва́ша. Высо́ко и стра́шно сло́во: на самѣ́хъ на́съ вла́сть полага́етъ: а́ще, рече́, отпу́стите, и отпу́стится ва́мъ; и а́ще поми́луеши, поми́лованъ бу́деши; не осужда́й, не осужде́нъ бу́деши. Бо́гъ сотвори́лъ тебе́ самовла́стна, о человѣ́че, оправда́тися, или́ осуди́тися, я́коже изво́лиши. Егда́ же постите́ся, не бу́дите дря́хли, я́коже лицемѣ́ри, и не осужда́йте никого́ же: мно́зи бо я́вѣ согрѣши́ша, а о́тай вельми́ пока́яшася. И ты́ у́бо, люби́миче, постя́ся, печа́луй о себѣ́, и то́кмо свои́ грѣхи́ во умѣ́ имѣ́й. Не уныва́й, но умы́й лице́ свое́, да не яви́шися человѣ́комъ постя́ся. А егда́ ми́лостыню твори́ши, то не я́вѣ человѣ́комъ дава́й, да не погуби́ши мзды́ своея́ тщесла́віемъ. Угото́вимъ у́бо себе́, бра́тіе, на прія́тіе свята́го и честна́го поста́. Якоже бо кто́ хотя́ бра́къ че́стенъ сотвори́ти, то гото́витъ до́мъ сво́й и вся́ /л. 19/ я́же въ не́мъ че́стна твори́тъ. Та́ко и мы́ угото́вимъ себе́ на прія́тіе поста́ съ ра́достію, а не уны́ніемъ опеча́лимся, да въ ма́лое се́ вре́мя омы́вше грѣхи́, чи́сти во о́номъ вѣ́цѣ яви́мся. Аще ли кто́ отъ на́съ не предвари́тъ здѣ́ очи́ститися покая́ніемъ, и поще́ніемъ, и ми́лостынею, то изгна́нъ бу́детъ во́нъ, я́коже о́нъ и́же скве́рны ри́зы нося́й, и свя́зани ру́цѣ и но́зѣ ему́. Та́мо бо никто́ же мо́жетъ помощи́ никому́ же, но ра́вно вси́ предста́немъ Судіи́ пра́ведному: ца́ріе и кня́зи, бога́тіи и ни́щіи, свобо́дніи и рабо́тніи, и вся́къ по дѣ́ломъ свои́мъ пріи́метъ. Тѣ́мъ же потщи́мся, бра́тіе, сотвори́ти на́мъ повелѣ́нное Бо́гомъ. Нѣ́сть бо тя́жко гнѣ́въ попра́ти и за́висть; нѣ́сть труда́ а́лчнаго накорми́ти, на́га одѣ́яти, стра́нна прія́ти. Са́мъ бо Госпо́дь рече́: а́ще добро́ сотвори́сте еди́ному отъ ма́лыхъ си́хъ бра́тій Мои́хъ, то́ Мнѣ́ сотвори́сте. Са́мъ бо съ небесе́ на зе́млю пріи́де, и въ нищету́ облече́ся, хотя́ устра́ншіяся отъ Него́, въ пе́рвое Ца́рство ввести́, изъ него́ же есмы́ испа́ли невоздержа́ніемъ. Проти́ву болѣ́зни /л. 19 об./ исцѣле́ніе положи́ — святы́й вели́кій се́й по́стъ. Пе́рвіе пости́ся Моисе́й со́рокъ днíй, и того́ ра́ди съ Бо́гомъ бесѣ́дова лице́мъ къ Лицу́, и просвѣти́ся лице́ его́ отъ сла́вы Бо́жія, я́ко со́лнце, и невозмо́жно бѣ́ зрѣ́ти никому́ же на́нь. И па́ки пости́ся Илія́, со́рокъ днíй, и до ны́нѣ жи́въ е́сть, на колесни́цѣ о́гненнѣй взя́тъ бы́сть на не́бо. Та́ко же инíи мно́зи пости́шася, вели́кая содѣ́яша чудеса́. Послѣди́ же Са́мъ Госпо́дь Бо́гъ на́шъ пости́ся со́рокъ днíй, на́мъ по́стъ прообразу́я, побѣ́ду дая́ на враги́, си́мъ показу́я очища́ти душа́ и тѣлеса́ на́ша. Тѣ́мъ и мы́, бра́тіе, потщи́мся подо́бни бы́ти святы́мъ поще́ніемъ, и моли́твами, и чистото́ю: по́стъ бо тѣ́ло очища́етъ, а ду́шу спаса́етъ, и на не́бо возво́дитъ...

Полный церковнославянский текст (Источник: Златоустник)
Чтения на неделю сыропустную
#Златоуст #поучение #неделя #сырная

ПАРЕНЕСИС (Книга Ефрема) на день (Слово 61)
О любви́, глава́ 3

Блаже́н муж име́яй любо́вь Бо́жию, я́ко Самого́ Бо́га в себе́ но́сит: я́ко Бог Любы́ есть, и пребыв́аяй в любви́, в Бо́зе пребыва́ет.
Име́яй любо́вь Бо́жию, всегда́ с Бо́гом пребыва́ет: любы́ бо Бо́жия вон изго́нит страх.
Име́яй любо́вь Бо́жию, ни еди́ного же возненави́дит когда́, ни ма́ла ни вели́ка, ни сла́ва и несла́вна, ни ни́ща ни бога́та, но всем в попра́ние бу́дет, все терпи́т и все престраду́ет.
Име́яй любо́вь Бо́жию не возно́сится, ника́когоже не горди́тся, ни еди́ного же не оклевету́ет, но и оклевета́ющых отвраща́ется.
Име́яй любовь, не ревну́ет, ни зави́дит, ни опла́зует и не ра́дуется о согреше́нии ине́х, не потаза́ет согреши́вшаго, но и печа́лует и заступает, не пре́зрит бра́та в напа́стех, но спостраду́ет и соумира́ет.
Им́еяй любо́вь, не сумни́тся к бр́ату вни́ти, но я́ко с Бо́гом водворя́ется.
Име́яй любо́вь, стра́нна не отри́нет, но я́ко свой уд окриля́ет рука́ма.
Име́яй любо́вь, во́лю Бо́жию твори́т, и и́стинен есть учени́к Его́: Сам бо Влады́ка наш рече́: От сего́ уве́дят вси, я́ко Мои́ ученицы́ есте́, а́ще лю́бите друг дру́га.
Име́яй любо́вь в себе́, николи́же не стро́ит себе́, ни глаго́лет своего́, себе́ ничто́же нари́ча, но все ели́ко е́же и́мать – о́бще всем предлага́ет...

Полный церковнославянский текст (Источник: Паренесис)

ПАРЕНЕСИС (Книга Ефрема) на день (Слово 62)
О неиму́щих любви́, глава́ 3

Окая́нен же и стра́стен и́же от любве́ дале́че отстоя́й, той бо я́ко во сне мно́зе дни своя́ препровожда́ет. И кто не пла́чется челове́ка того́, от Бо́га су́щаго дале́че и све́тла лише́на, и омраче́на ходя́ща?
Глаго́лю бо вам, бра́тие, я́ко не име́яй любве́, Бо́га кроме́ таковы́й есть. Нело́жен бо есть реки́й: Я́ко ненави́дяй бра́та своего́, во тме есть и вся́кому греху пови́нен есть.
Не име́яй любве, а́бие яри́тся и ско́ро не́нависть раждиза́ется.
Не име́яй любве́, ра́дуется о непра́вде дру́га своего́, не спостра́ждет согреши́вшему, не споболи́т па́дшему, руки́ не пода́ст лежа́щему, не нака́жет соблазни́вшаго, не утверди́т коле́блемаго.
Не име́яй любве́, го́рек есть по́мыслом, друг есть диа́волу, обрета́тель есть лука́вству, творе́ц есть сва́ром, клеветни́к есть и друг клеветнико́м, собесе́дник руга́телеви, сове́тник зави́дящим и испра́витель горды́ннаго суда́ есть.
И спро́ста бы́вше, нестяжа́тель любве́, орга́н есть супроти́внаго, и прельща́ется во всех и не весть ся я́ко во тме хо́дит.

Церковнославянский текст (Источник: Паренесис)

ПАРЕНЕСИС (Книга Ефрема) на день (Слово 63)
О долготерпе́нии, глава́ 4

Блаже́н пои́стине челове́к он и́же долготерпе́ние стяжа́, я́ко такова́го святы́я кни́ги похваля́ют- я́ко долготерпели́в мужь мног в прему́дростех. И что еще́ мно́жае сего́? Долготерпели́вый у́бо никогда́ побежде́н быва́ет. Долготерпели́вый всегда́ в ра́дости и в весе́лии есть и во оглаго́лании упова́ет на Го́спода. Долготерпели́вый кроме́ греха́ есть- все бо терпи́т долготерпели́вый, на кото́ру на́гло не раждиза́ется, на досажде́ние не гото́вится- слове́с тщих удо́бь не пожене́т- оби́димь, не тчалу́ет- проти́вящимся не проти́вится, но во вся́кой ве́щи утверже́н есть- несть пови́нен в льстех, и несть удо́бен на прогне́вание- но и в ско́рбех ра́дуется, и во вся́ком де́ле бла́зе водваря́ется, о всех ключи́вшихся покаря́ется- запреща́емь, не пререку́ет- утесня́емь, не дряхлу́ет. Долготерпе́ние бо всегда́ цели́тельно есть.

Церковнославянский текст (Источник: Паренесис)

ПАРЕНЕСИС (Книга Ефрема) на день (Слово 64)
О неиму́щих долготерпе́ния, глава́ 5

Не име́яй долготерпе́ния, и терпе́ния кроме́ есть таковы́й. И́же бо несть долготерпели́в, удо́бь развраща́ется: гото́в на поощре́ние, нагл на кото́ру и раждиза́ется: досажда́емь, досажда́ет: оби́димь, проти́вится: сва́рится ни о чем же: малы ра́ди потре́бы дея́ния его́ я́ко ли́ствие ве́тром трясу́тся: во словесе́х не утверди́тся: на́гло ска́чет на сего́, на о́ного.
Не име́яй долготерпе́ния, кре́пости кроме́ есть: в моли́тве бо измени́тся, слез не стяжи́т, лука́вое собира́ет и на оклевета́наго собо́рище твори́т: оби́димь, супроти́вится: та́йны не терпи́т храни́ти, готов на открове́ние сло́ву. И что сего окая́ннее есть?

Церковнославянский текст (Источник: Паренесис)

ПАРЕНЕСИС (Книга Ефрема) на день (Слово 66)
О терпе́нии, глава́ 6

Блаже́н есть бра́тие таковы́й и́же терпе́ние стяжа́, я́ко терпе́ние упова́ние и́мать, упова́ние же не постыди́тся: блаже́н у́бо пои́стине и треблаже́н име́яй терпе́ние.
«Претерпе́вый бо до конца́, той спасе́тся». И что сея́ за́поведи добре́е [есть]? Христо́с бо есть Госпо́дь терпя́щим.
Терпе́ние же до коли́ка су́дится:
Бра́тие, а́ще у́бо све́сте, подо́бно бы и нам о сем обрести́ сло́во, на утвержде́ние вам. Не бо есть еди́но терпе́ние, но вся́кой де́тели иско́мо есть.
Терпе́ние бо стяжа́вый вся́кой де́тели каса́ется. Ра́дует бо ся в ско́рбех, и в беда́х благоиску́сен. В напа́стех весели́тся, на послуша́ние гото́в. В долготерпе́нии красе́н, в любви́ испо́лнен. В досажде́нии благодари́т и в кото́рах смиря́ется. В безмо́лвии му́жествен, и в пе́нии безле́ностив. В посте́х гото́в и в моли́твах терпели́в. В де́лех непоро́чен, и во отве́тех скор. В житии́ приле́жен, в слу́жбах ве́сел. В хожде́нии красе́н, и во о́бщей бра́тии благ. В сове́тех сла́док, в бде́ниих тих и тщали́в. На стра́нныя приле́жен, и немощны́м разуми́тель. На целова́ние пе́рвый притека́тель, и в поразуме́нии трезви́тель, и на вся́ку вещь востани́в.
Терпе́ние бо стяжа́вый, стяжа́л есть упова́ние, и вся́ким де́лом благи́м укра́шен есть таковы́й.
Те́мже со благи́м терпе́нием возопие́т сицевы́й ко Христу́, глаго́ля: «Терпя́ потерпе́х Го́спода, и внят ми».

Церковнославянский текст (Источник: Паренесис)

ПАРЕНЕСИС (Книга Ефрема) на день (Слово 66)
О неиму́щих терпе́ния, глава́ 7

Окая́н же и стра́стен, не стяжа́вый терпе́ния. Сицевы́м бо е́же го́ре, претя́т боже́ственыя кни́ги: «Го́ре бо рече́ погуби́вшим терпе́ние».
Не име́яй бо терпе́ния, трясе́тся я́ко ли́ствие ве́тром. Сицевы́й досажде́ния не терпи́т, в ско́рбех пренемога́ет. Таковы́й бо во вся́ком де́ле непотре́б(ен) есть. Сицевы́й в кото́рах пови́нен есть, в покоре́нии ропотли́в, в послуша́нии лени́в, в моли́твах уны́л, в бде́нии разсла́блен, в посте́ дряхл, на воздержа́ние не приле́жен, во отве́тех неради́в, в де́лех злоде́латель, в лука́вствии непобеди́мь, в начина́ниих си́лен, в сва́рех му́жествен, и в безмо́лвии не́мощен. Сицевы́й благоиску́сным проти́вится, и преди́ спе́ющим зави́дит.
Не име́яй терпе́ния, мно́гими тщета́ми состои́тся, и де́тели сицевы́й не мо́жет име́ти и косну́тися.
Терпе́ния бо ра́ди тече́м на предлежа́щий нам по́двиг. Рече́ блаже́ный апо́стол: «Не име́яй терпе́ния, упова́ния таковы́й чуждь есть».
Те́мже молю́ вы, ели́ко по моему́ нетерпели́ви нарече́теся, стяжи́те терпе́ние, да спасе́теся.

Церковнославянский текст (Источник: Паренесис)

СИНАКСАРЬ на день (Суббота первой седмицы поста)

Стихи́:
Пи́щею ко́лив пита́ет Ти́рон град:
Пи́щу оскверне́ную учини́в непотре́бну.

В сий день в субботу первую постов, еже коливами преславное чудо святаго и славнаго великомученика Феодора Тирона празднуем, еже име начало быти сице:

Иулиану преступнику, по Константии Великаго Константина сыне скиптры царствия удержавшу, и от Христа во идолослужение преложшуся, гонение на христианы воздвизается превелие, яве же вкупе и не явленне. Отрекл убо злочестивый, еже мучити сурове, вкупе же и объявленно безчеловечне, тако искушати христианы: стыдяся же и обзирая, да не прилагаются множайшии, сокровенне некако осквернити сия льстивый и скверный умысли: отонудуже и соблюд, якоже наш язык Христов, первую святых постов седмицу наипаче очищается, и внимает Богу: епарха града призвав, повеле продаемыя обычне снеди от среды отнести, другия же снеди предложити торжищу, сиречь хлебы и пития, от жертв его кровьми сия прежде смесивша, и в смешении осквернивша: яко да убо от поста сия купующии паче в чистоте осквернилися быша. Абие убо епарх на дело веде повеленое, и предлагает яже от жертв и кровей оскверненная брашна и пития во всем торжищи...

Полный церковнославянский текст (Источник: Постная Триодь)
Русский текст
Чтения на день (суббота 1-й седмицы поста)
#Федор #Тирон #Постная #Триодь #синаксарь

ЗЛАТОУСТНИК на день (В неделю первую Поста)
Въ недѣ́лю пе́рвую поста́, поуче́ніе свята́го Іоа́нна Златоу́стаго о по́льзѣ душе́внѣй

Отъ са́мыхъ веще́й ви́дѣсте, возлю́бленніи, по́стную добро́ту и ю́же отъ нея́ по́льзу. Иже бо кто́ искуси́лся е́сть пе́рвую сію́ недѣ́лю свята́го великаго поста́, то́й больма́ разумѣ́етъ свое́ къ Бо́гу приближе́ніе, и на про́чія недѣ́ли бо́дрѣе бу́детъ. Аще ли кто́ сію́ недѣ́лю въ лѣ́ности пребы́сть, то́й не вѣ́сть, ка́я отъ поста́ по́льза е́сть: сла́ждьши бо ме́да, и семида́льнаго бра́шна е́сть. О се́мъ Дави́дъ проро́къ рече́: вкуси́те и ви́дите, я́ко бла́гъ Госпо́дь. И са́ми бо вѣ́сте по́стную добро́ту, я́ко ни сва́ра, ни доса́ды нѣ́сть: не я́коже въ пія́нствѣ, но вся́кое здѣ́ молча́ніе и тишина́, зло́му обы́чаю посто́мъ преста́вшу. Тѣ́мъ молю́ вы́, вѣ́рніи, не отложи́мъ нача́тка по́стнаго: се́ бо пе́рвая недѣ́ля поста́ премину́ла е́сть, да на про́чія недѣ́ли бодрѣ́йши бу́демъ, я́коже досто́итъ преспѣва́ти на благо́е, я́коже апо́столъ Па́велъ рече́: за́дняя забыва́юще, на пре́дняя простира́йтеся. Послу́шайте, вѣ́рніи, съ любо́вію: се́дмь недѣ́ль е́сть свята́го и вели́каго поста́, отъ ни́хъ же всѣ́хъ честнѣ́е седма́я недѣ́ля, я́же Вели́кая имену́ется. Не часы́ бо мно́гими инѣ́хъ бо́льши, но зане́же въ не́й бы́ша вели́кія та́йны Госпо́днихъ Страсте́й. Та́ко и сія́ предъиду́щая недѣ́ля бо́льши пе́рвыя е́сть. Якоже ца́рь бо́лѣе кня́зя е́сть, а кня́зь бо́лѣе е́сть боля́рина; а боля́ринъ бо́лѣе воево́ды; а воево́да бо́лѣе со́тника; а со́тникъ деся́тника. Се́ же разу́мно да вѣ́сте, а́ще кто́ о каковѣ́ дѣ́лѣ ити́ хо́щетъ къ ца́рю, пе́рвіе ми́лъ ся дѣ́етъ ме́ньшимъ, да́же и до вельмо́жъ, кто́ бы о не́мъ возвѣсти́лъ царю́. Аще ли же зло́ сотвори́лъ е́сть вельми́, то́ бо́лѣе пече́тся, ка́ко бы оправда́тися. Но и мы́, бра́тіе, не то́кмо яви́тися хо́щемъ Небе́сному Царю́, но и въ сердца́ на́ша прія́ти Та́инъ Причаще́ніе, сія́ бо недѣ́ли на очище́ніе грѣхо́мъ на́шимъ даны́ су́ть, а́ще я́ до́брѣ соверши́мъ. Хощу́ у́бо ва́мъ при́тчу повѣ́дати. Бѣ́ въ нѣ́коей странѣ́ ца́рь вельми́ бла́гъ, вся́ бо я́ко своя́ дѣ́ти любля́ше, и о всѣ́хъ ра́вно печа́ловашеся, не то́кмо о тѣлесѣ́хъ, но и о душа́хъ и́хъ, и не бѣ́ никто́ же убо́гъ въ странѣ́ то́й. Бѣ́ бо земля́ та́ испо́лнена вся́каго оби́лія, я́коже проро́къ Дави́дъ глаго́лаше: отъ плода́ пшени́цы, вина́ и еле́я умно́жишася. И царе́ви тому́ бя́ше все́ раче́ніе, е́же бы подава́ти бѣ́днымъ и неиму́щимъ. И за́повѣдь положи́, да бога́тіи подаю́тъ ни́щимъ. Та́ко бо и апо́столъ въ Дѣя́ніихъ рече́: бѣ́ мно́жество люде́й я́ко еди́на душа́, раздава́юще, кто́ чего́ хотя́ше, или́ тре́боваше. Такова́ бѣ́ та́ страна́, и тако́въ бѣ́ то́й ца́рь. Имѣ́яше же благíй то́й ца́рь у себе́ се́дмь дще́рей вельми́ красны́, и заповѣ́да всѣ́мъ лю́демъ, да прише́дше почтя́тъ его́, и дще́ри его́. И посади́ и́хъ по еди́ной: ме́ньшую пода́лѣе, а бо́льшую бли́зъ себе́ посади́. Нѣ́ціи же всѣ́хъ ра́вно почти́ша, и угоди́ша царе́ви...

Полный церковнославянский текст (Источник: Златоустник)
Чтения на день (Неделя 1-я поста)
#польза #душа #Златоуст #поучение

ПАРЕНЕСИС (Книга Ефрема) на день (Слово 67)
О безгневии и еже не имети гнева, глава 9

Блаже́н челове́к он, и́же не удо́бь разгне́ваемь быва́ет, ниже́ я́рости прие́мляй.
Сицевы́й в ми́ре есть всегда́, и я́ростный и гне́вный дух от себе́ прогоня́, брани и смущения кроме́ есть, и всегда́ тих нарече́тся, и лице́м ра́дуется, не на́гло гне́ваяйся, от сло́ва тща не подви́гнется.
Сицевы́й пра́вде и и́стине де́латель есть.
Сицевы́й удо́бь язы́к не разсе́ет и языкоболез́неники удо́бь терпи́т.
Таковы́й бо кото́рам не ра́дуется, ко всем любо́вь показу́ет. И без гне́ва сый, сва́рех не причаща́ется, непра́вды не де́лает.
Сицева́го боле́зни не сря́щут: здрав бо есть весь.
Таковы́й бо о ми́ре ра́дуется, и долготерпе́ние вселя́ется вонь. Ду́ха на́гла не имы́й, Ду́ха Свята́го не прогне́вает.
Сицевы́й мо́жет и кро́ток бы́ти, и любо́вь име́ти, и терпе́нием и смире́нием, и вся́ким де́лом благи́м укра́шен, и негневли́в есть. Таковы́й от всех сла́вимь есть, и а́нгелы похваля́емь, и Христо́м люби́мь есть.
Треблаже́н у́бо есть по и́стине, и́же [не]ду́г гне́вный и я́ростный отгна́ от себе́ всегда́, я́ко сего́ те́ло и душа́ всегда́ здра́ва есть при́сно.

Церковнославянский текст (Источник: Паренесис)

ПАРЕНЕСИС на день (Слово 69)
О кротости, глава 11

Блаже́н есть и треблаже́н вои́стину име́яй кро́тость. Се бо и святы́й наш Спас воспева́ет глаго́ля: Блаже́ни кро́тцыи, я́ко ти́и насле́дят зе́млю. И что блаже́нства сего́ блаже́ннее есть и сея́ ра́дости светле́е? И что сея́ за́поведи вы́ше есть, е́же насле́дствовати зе́млю ра́йскую?
Те́мже слы́шавше бра́тие, вышеме́рную за́поведь, бога́тство добро́ принесе́те, и ско́ро обу́йтеся во светле́йшая де́тели, и слы́шавше пока́йтеся, и ели́ку же си́лу и́мате потщи́теся, еда́ кто вас не насле́дник бу́дет Ца́рствию и пла́катися и́мать неуте́шно. Слы́шавше же кро́тость блаже́нства, потщи́теся к ней. Послу́шайте, что глаго́лет о ней нело́жный Иса́ия Ду́хом Святы́м: На ком почи́ю, глаго́лет Госпо́дь? Но на кро́тких и безмо́лвных и трепе́щущих Мои́х слове́с. Несть ли у́бо чу́до и от за́поведи, что бо сея́ чтисла́внее?

Блюде́теся у́бо бра́тия моя́, еда́ кто отпаде́т сего́ блаже́нства и безчи́сленыя ра́дости и весе́лия. Потщи́теся, молю́ вы, стяжа́ти кро́тость. Кро́ткий бо вся́ким де́лом благи́м укра́шен есть, и ко вся́кому делу гото́в есть. Во всех благи́х благоиску́сен, и от всех похва́лен есть. Лука́вства кроме́ есть, и лицеме́рия дале́че нари́чется. Сицевы́й нрав, злу не порабоща́ется, и за́висти не покаря́ется. Клеве́ту отвраща́ет, и оглаго́лания не прие́млет. Клеветнико́в ненавид́ит, и оглаго́лавающая отрева́ет. О́ блаже́ное бога́тство кро́тости, я́ко все́ми сла́вима есть!

Церковнославянский текст (Источник: Паренесис)

ПАРЕНЕСИС на день (Слово 70)
О лукавстве, глава 12

Рыда́ти у́бо подоба́ет и пла́катися о не иму́щим кро́тости, но лука́встве причета́ну, я́ко отве́ту лука́ву подлежи́т. Лука́вии бо рече́ поги́бнут. Святы́й же Спас наш сицевы́м досажда́ет глаго́ля: Лука́вый челове́к от лука́ваго сокро́вища се́рдца своего́ изно́сит лука́вая. И па́ки проро́ком прети́т глаго́ля: Лука́вых не послу́шает у́хо Мое́. Лю́то бо есть бесо́вское лука́вство, бра́тие.

Те́мже внемли́те, еда́ кто вас себе́ погуби́в, сам ся возненави́дит. Лука́вый бо николи́же смиря́ется, но всегда́ смуте́ет, всегда́ я́рости и гне́ва и льсти испо́лнь есть, всегда́ подблюда́ет су́щаго близ его́, всегда́ ро́пщет и всегда́ зави́дит, всегда́ ревну́ет и всегда́ про́сту ши́ю имать, сказу́ет и пререку́ет, и развраща́ет, и повелева́ет неполе́зная. Таковы́й бо кро́ткия отрева́ет, долготерпели́вым смее́тся, стра́нныя осужда́ет, и еди́наго со еди́нем сважда́ет, и ко еди́ному ко́ждо их проти́вится, и к кото́рам скор сва́дник, на поощре́ние воставляет, на возда́ние проти́вится, на клевету́ гото́в и на оглаго́лание скор, на многоре́чие му́жествен, на досажде́ние удо́бен, на соплете́ния пре́дний, на молву́ пе́рвый притека́тель, на пе́ние не́мощен, на пост разсла́блен, на вся́ко де́ло бла́го не́мощен и неразу́мичен, на словеса́ духо́вная неглаго́лив: вся́ко беззако́ние затче́ уста́ ему́, мно́гу у́бо рыда́нию и пла́чу досто́ин есть таковы́й. Те́мже молю́ вы бра́тие, е́же храни́тися от многослове́сия.

Церковнославянский текст (Источник: Паренесис)