لاستشهاد الامام زين العباد صلوات الله عليه
لحن عزيزة دمعتي

سنيني خلصن.. وخلصت عذابات الزمن
خواتي اتعلعلن..وابلا زلم رد الضعن
صعب ماينسن..كل ذكريات اهلي المضن
اشينسيني الجره..لوعتني بهلي كربله
اموت واذكره..منظر جثثهم بالفله
يويلي اشجم مره.. رادت ابنها تغسله
جثثهم بالفله .. لا ظل عليهم لا رده
والعمرها مدللة..صارت ذليله اويه العده
الماتو ذبح هله.. اعله الصبر شيعوّده؟
——
يويلي من يحل..ضعن الگمر بيد الغرب
والحادي مايمل..لا من شتم لا من ضرب
يعثرون الهزل..وتوگع نسانه اعله الدرب
يشلعان الگلب..جرونه من بلد لبلد
دربنه شكد صعب..والراحه ماشفناها ابد
امن السادة مو عبد..حتى يجتفوني بحبل
وگليبي ينمرد..من انشتم ما احتمل
وبحيلي ضل يهد..من ينضرب يمي الطفل
—-
اصعب واشد امر..الشام بدخلتي عدها عيد
خُزينا من النظر.. نجرينه جر مثل العبيد
يضربونه بحجر.. وادينه مجتوفه بحديد
بسبينه الكل عرف..اتلگونه بطبول ودفوف
غناهم ماوگف.. حتى اليمر يوگف يشوف
وگفنه من الصبح..بسوگ ولحد وكت المغيب
ابوكم منذبح..صاح البعيد اويه القريب
يهيجون الجرح..واعله الرمح راس الغريب

بتول الخفاجي
الاسم للمجالس الرجالية
إبراهيم مهدي الخفاجي
https://t.me/batool313BK

قصيدة استشهاد مولاي زين العابدين
لحن مايحاجيها صلوات الله عليه
——1
گضه عمري ومتكضي ذيج الايام
وبعده بجدمي اثر من حرك الخيام
لون نشدوني گلبي من شنو انضام
اصيح الشام آه الشام آ يالشام
الشام وايامه..موتنه بعذابه
——2

ذبوا نار فوگانه من السطوح
احترّگت وعيني بس لعمّتي تلوح
حجت لكن حجاية تطلع الروح
(المن هالاذية وعدنه مذبوح)
انذبحو اخواني..المن هلهلاهل
——-3
الحبل مو بس بدينه نشوفه مشدود
من رگبتي لرگبة عمتي ممدود
لا عاد الله ايام السبي السود
منها جبدي مو بس گلبي ممرود
شذكر وشنسه..جم موقف هضمني
——-4
شكد اذاني شايل راس الحسين
يهز الرمح گدام النساوين
يضحك لون يعله صوت الونين
وكلساع ويطيحه واحنه ماشين
راس ابو سكينه..يم اسكينه طايح
———5

الوج هواي من ضيم الي بيه
تلوذ بظهري صارت جم سبيه
شبعنه من خرابتهم اذيه
حد ماماتت اگبالي رقيه
بيدي دافنها..الفت گلبي رقيه

——6

ذباح الهجر والهضم ذباح
اجه موتي وعذابي بموتي ينزاح
باجر من اشوفن والدي ارتاح
راسه اعله الجسد مو فوك الرماح
ومن اشبگنه ..ماتعرض سهامه

__
لخادمتكم بتول الخفاجي
الاسم للمجالس الرجاليه
لخادم الحسين :-ابراهيم مهدي الخفاجي

—————

https://t.me/batool313BK

لحن قصيدة : فرقة ورد لباسم الكربلائي

صارت صدك طبت الشام ما گدرت عيوني تنام
ساهرت ليلي ليلي - ليلي ليلي
بنياتي گومن وياي — لا تشمتن الراح وجاي
شدنّه حيلي حيلي— حيلي حيلي
———-
حفظن وصيتي و ياحرم سمعنّي
للشام لو طبينه هم عيّنني
لزمن عباتي و لاتِضيعن عني
وسكتن اذا نسوانهم شتمنّي
ولو بالهلاهل شفتوا يتلگنّي
همهم تره يسمعون نوحي ووني
امشن وراي ابلا صوت
يردنّه نتمنى الموت
ايلچمونه جرحي جرحي -جرحي جرحي
رادوا يسمعون ابچاي
لاتشمتن الراح وجاي
شدنّه حيلي حيلي - حيلي حيلي
————
الجاي اصعب امن الفات بضعاف اضعاف
خلجن سوه لاوحده بيجن تنعاف
الجيش الي شايل روس لو يمجن طاف
اليوگع عليها راس ابوها لتخاف
خلها تغمض هالوجع ماينشاف
لا تبجي ماضلت للسياط اجتاف
لو يمنه هزوّا ارماح
ودم منهن اعليجن طاح
صبرن يروحي روحي -روحي روحي
روس اخوتي اعلينه فياي
لاتشمتن الراح وجاي
شدنه حيلي حيلي حيلي حيلي
———
بنياتي سمعن هالحجي الماينعاد
لو وگفّونه بسوگ والهضم ازداد
كلجن سوه صيرن بظهر السجاد
لاينظر الخدّر الرايح والراد
ولا تِطلبن لطفالي ماي ولازاد
منلشام واهله كلشي مُر ماينراد
ايذلونه ما بيهم خير
حسره يريدوها تصير
بعين الله تعبي تعبي تعبي تعبي
ماينشرب منهم ماي
لاتشمتن الراح وجاي
شدنه حيلي حيلي حيلي حيلي
———
باقيلي وگفه بنص قصر ودْوَاوين
باقيلي من الشام لوعات اسنين
باقيلي اشوف ارقية ميته اعله حسين
عينني ماباقيلي شوف بهالعين
كافي هضم هل جزه عمري الخمسين
لبنيته اجيبن حيل گولولي امنين
لو شافته وحضنت بيه
شيلنها لتضل اعليه
تلگنها ميته ميته -ميته ميته
لخاطر اعيون الوفاي
لاتشمتن الراح وجاي
شدنه حيلي حيلي -حيلي حيلي


بتول الخفاجي
الاسم للمجالس الرجاليه
لخادم الحسين :-ابراهيم مهدي الخفاجي

—————

https://t.me/batool313BK

خلْصتْ من وكت يشهور الاحزان
انكتب زينب وحيدة بلاية خوان
راحت كل اهلها و راح الحسين
ومن ايديها رايح گمر عدنان

هل خلّص عزاكم ها يخدام
من صارت رمادة ذيج الخيام
بس بعده الجرح ماطاب لليوم
لان زينب غريبه لهسه بالشام


خلصت هالخدامة وخلص عاشور
وفراگ المجالس يكسر ظهور
كون الزهره تقبل بينه خدام
ونجبر بالبجي جم ضلع مكسور

ياوحشة الماتم والمعزين
من تخلص هضيمة ايام الحسين
محرم كون مو بس شهر وايام
كوني بحزني اظل متلوع اسنين

بتول الخفاجي

علت بين الخرايب مني ونه
اريدن والدي طمنوني عنه
كالو من صحت مشتاقة احضنه
(هسه نجيبلج هالباقي منه)
لاتجيبونه..تگلهم عمتي زينب

حجة السجاد للحادي وتنخاه
لتجيبون راسه اگبالها اهنا
طفلة خلها تبجي ألحد متنساه
لون شافت ابوها تموت وياه
تتعب وتغفى..خلها من البواجي

راح وفرفحت لن شفته من راد
طشت بيديه كتله و نوحي يزداد
ردت كتلك ابويه حسين مو زاد
لن خله الطشت كدامي بس غاد
راسه كدامج..كلي حسين هذا


حرت اهواي من اتگربت ليه
اشيل الغطه عنه لو ابقيه
رفعته وشفت راسك كمت احاجيه
الكطع نحرك يكون نشلت ايديه
ياهو يتمني ..يبويه بهذا عمري

يبو طول الحلو بس راس ضليت
لچن هم انعم الله اعليك من جيت
لون ماتكدر ترد بيه للبيت
اخذني اوياك المن وحدي ضليت
غضمت عيني..اخذ روحي يروحي

بتول الخفاجي
الاسم للمجالس الرجاليه
لخادم الحسين :-ابراهيم مهدي الخفاجي

—————

https://t.me/batool313BK

لحن فرقة ورد باسم الكربلائي

تسألني كلساع اعليك..ضلت رقية اتانيك
وحسرتها بيه بيه بيه بيه
ياسكنه شو ماتحجين..يمتى يردلنه حسين
مامنه جيه جيه جيه جيه
———
جبنه الدرب تنشدني واعليك تلوع
وگبالي راسك بويه اشوفه مرفوع
تنشدني عنك وانه گلبي مشلوع
شلون اصبر وكدامي نحرك مكطعوع؟
شگلها ابونه امكطع وما مجموع؟
لوكلها مابقوله بالصدر اضلوع؟
باذن الله كلتلها يعود
واعليها گلبي ممرود
كل همها انته انته انته انته
كالتلي راح الكاه وين
يمتى يردلنه حسين
مامنه جيه جيه جيه جيه
——
مو حيل بنتك بويه مهدودة روح
وكل خوفي لو يم رمحك ارقيه تروح
ماينعرف راسك المالينه جروح
بس خوفي لو شمت عطر منه يفوح
وتسأل الشايل رمحك ويمه تنوح
ويگلها هذا بأيدي راسه المذبوح
كلساع اجرها من الايد
حدما الرمح صار ابعيد
لتشمه عطره عطره عطره عطره
وتنشدني هلعطر منين
يمته يردلنه حسين
مامنه جية جية جيه جيه
———
للشام من طبينه هالفكر احتار
شلون انه انسيها وعلينه الكل دار
يشتموك يمنه ضلوا ازغار كبار
ماردت ابجي ولاردت يمها انهار
بس موقف الخلة الگلب يلهب نار
من ضلوا يضربون راسك بحجار
حرت انه انسيها شلون
وعدانه يمنه يشتمون
لچمولي گلبي گلبي گلبي گلبي
ليش الشتم شمسوين
يمتى يردلنه حسين
مامنه جية جيه جيه جيه
——-
ادري الخرابه اشكد يبويه تأذيك
شاغت رقيه اتريد بس تلاگيك
ملوا اعدانه من كثر ما تبجيك
جابو طشت لن بحضنها مخليك
شو كطعت الانفاس من حضنت بيك
وماتت الگالتلك اموت انه اعليك
شو جنها تدري انته الجاي
كعدت امحضرتلك ماي
وبس راس اجاهه جاهه جاهه جاهه
غَمْضَت على راسه العين
يمته يردلنه حسين
مامنه جيه جيه جيه جيه

بتول الخفاجي
الاسم للمجالس الرجالية
ابراهيم مهدي الخفاجي..

https://t.me/batool313BK

لحن اني وياك واحد باسم الكربلائي

رقية تريد ابوها..ويم راسه خذوها
صارت من الايتام
…
بخرابه تلوب .. بهمس متعوب
اريدن والدي ياعمة بس وينه
بگلب ملجوم .. تدور تحوم
تنشد زينب وتسألها لسكينه
شوكت يرجع..البعد يفجع
يدري بهلوضع لو مادره بينه
يالتنشدين ..اذا تنامين
باجر تكعدين انت وتشوفينه
تكول بكسر خاطر..اشوكت يخلص الباجر
گوه تقنع تنام.. صارت من الايتام
___
تفز تصيح..تگوم تطيح
تجيها زينب وتحضنها متلهفة
شنو بحلمج..انه يمج
لا تكدر تهيد ولا ترد تغفه
يعمة تگول.. بفكر مذهول
اجاني الوالد وحط جفي بجفة
تره بملگاه .. حجيت وياه
وگام بأيده يمسح دمعي وينشفه
عمة بحلمي جاني ..ونومني بمكاني
هاجت كل الالام ..صارت من الايتام
…..
رقية تنوح .. بگلب مجروح
اريد حسين هسه والدمع ينصب
بحقد جابوه .. الطشت خلوه
تكلهم مااريد اكل ولا اشرب
التريديه .. وبچيتي اعليه
ارفعي الغطه جبنالج تره المطلب
وتشوف العين .. راس حسين
طبرة براسه تنظر والخد امتَّرب
تگلة رد عليه ..يبويه انه رقية
ليش الحلم مادام..صارت من الايتام
————-
تمدلة جفوف.. تريدة يشوف
يبويه شلون محترگة انه بيدية
تسولفلة ..على الهزلة
طحت منها صحت بويه الحك اعليه
انه بممشاي..انضربت هواي
تگله شسوت سياط الشمر بيه
البعد يجرح ….بهضم تشرح
رقية إسمي ويسموني مسبية
تحضنه وتبجي سكته..لنها الطفلة ميته
وحيدة بغربة الشام ..صارت من الايتام

لخادمتكم:بتول الخفاجي
الاسم للمجالس الرجالية
ابراهيم مهدي الخفاجي
https://t.me/batool313BK

شور دفنة السيدة رقية

يالمارضيتوا ماي تنطوها
رقيه هل ماتت دغسلوها

ماتقبل امغسلة تگرّب ليها
من الضرب كل اثر باقي اعليها
ظنوا مريضه اتوسل باهل الشام
والله احلفلكم كل مرض مابيها

يهل لشام..رحموها طفله احنه لترحمونه
يهل الشام..احنه نغسلها انتو بس خلونه
يهل الشام..گلنالهم علاقل ماي انطونه

ويلي ويلي ..ويلي على بنيتك
ويلي ويلي .. ويلي على بنيتك


افتر احير وشايلتها بأيدي
مارحموا الطفلة ابد يعضيدي

گاع الله متروسه يخويه ابمايه
بالشام كمنه نشتريه اشرايه
ردت انه اغسلها وحقك يحسين
ولا اسمع اعله ابنيتك اي احجايه


حسره يصير..بلشام ذله كلشي خويه واكشر
حسره يصير.. والماي لهل البيت مايتدبر
حسرة يصير..شلناها نفتر بيها خويه بهلحر

ويلي ويلي ..ويلي على بنيتك
ويلي ويلي .. ويلي على بنيتك
——
اتدبرنه وتغسّلت بنتك نعمة
عاد الگبر شيدبره يابو اليمه؟


كالولي بره شامنه اتدفنيها
وعزوا خرابه من نخيت اعليها
گِلي الخرابة شتسوه خويه بهلكاع؟
بشلعان گلبي رضوا ندفن بيها


قصرت حيل..كون بقصر مو بالخرابة ادفنها
قصرت حيل..ياكون ميته اهنا واضلن يمها
قصرت حيل..تاليها يمهم وانه واروحن عنها؟
ويلي ويلي ويلي على بنيتك
ويلي ويلي ويلي على بنيتك
——-
هاي الامانه وهلله هلله بيها
يمكم رقية لحد يأذيها

ماعدها احد زوروها يهل الرحمة
وخلو المشاعل لا تظل بالظلمة
رشوا گبرها بماي ويعين الله
الميت بهلغربه يكبر همه


يهل الرحم..ماعدها اهل وحدها لتخلوها
يهل الرحم..بالغربه بت احسين لتأذوها
يهل الرحم..بداعة رسول الله اعتنو وزوروها

ويلي ويلي ويلي على بنيتك
ويلي ويلي ويلي على بنيتك

بتول الخفاجي
الاسم للمجالس الرجالية:
ابراهيم مهدي الخفاجي

https://t.me/batool313BK

ياويلي على المسموم ..الليلة موعد مصابه
——
(مقطع ورباط)
ظل ينازع بهل روح فت جبد الحسن
سَمّة
انحل گلب الحسين اعليه ظل يعاين بهمه
سمع صوت العقيلة وكال ياخويه الطشت ضمه
تنظر للچبد وتطيح لوشافت نزف دمه
لتشوفه اخيتنه ..ضم عنها الطشت
………
(مقطع رباط)
متلوع تصدلة ام عون واعليه الگلب ملچوم
صاحت ياخلگ احاه ابن امي وكع مسموم
من حر سمَّه صار يلوب ساعة يغمة ساعة ايكوم
زينب بلطشت تلكاه لجم قطعة الجبد مثلوم
من عمت عيني ..شفت جبدة المكطع
——
(مقطع ورباط)
يتلوى الحسن ياحيف يفتح ايده ويسدها
يحضن بيه اخيه احسين زينب تلطم بخدها
ياويلي العليه تحوم ياحيل اليضل عدها
غمض عينه ركضت ليه حسين بحسره بعدّها
واحسين ظل ينعة..من وسد اخيها

—

المكسر ضلوعي ..فراكك يالحسن
خويه اودعنك .. صعب شكد عليه


لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

لحن مايحاجيها


انه الوالده المسموم ابنها
انه الينسمع هليوم ونها
واكابل بالعزه الفگدت ولدها
تشاركني وتواسيني بحزنها
فاگده وليدي..اليوم الزهره صاحت

شفته وليدي حيله اليوم مهدوم
ومن حر سمه يتكلب المسموم
مهضوم الحسين اليوم مهضوم
اخيه امدد ومايكدر ايكوم
كسرة اخوانه..بوليدي جبيره


ابني بحضن اخيه احسين ممدود
واخته تخمش وتلطم علخدود
ياحيل اليضل بوليدي موجود
شاغت روحه ابني وجبده ممرود
بالطشت جبده.. متكطع يويلي



گطع انفاسه لنه وغمض العين
وبجه مثل اليتيم ابفگده الحسين
عِلّه ابيت الحسن هليوم الونين
وزينب حايره تنطي الوجه وين
يم ابو فاضل..ركضت تبجي زينب


شكد بنعشه گلبي اعليه ينضام
لوليداتي شلعان الگلب دام
من كثر النبل الحسين هل گام
من جثمان اخيه يطلع اسهام
يطلع اسهامه..بيده من الجنازه

لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

يفت بروحي هالحال ..يتلوى الحسن ضال
هد حيل الحسين وهاد حيلي
ويلي اعله جبير الساده ويلي
——-
كايم وطايح..حيله هل رايح.. يتلوه شفته
كتله عافيتي.. كلها الك فدوه..يحبيّب اخته

بعد مابيه كل صبري انكضه و راح
شفته ايلوج لا هوّد ولا ارتاح
من حر سمّه گام وعلارض طاح
بجيت وشفته هوه اعليه هم ناح

يزينب صاح بونين..ماريدج تشوفين
ليل بلا صبح جن باقي ليلي
ويلي اعله جبير الساده ويلي
——
يمه يالزهره..منظر اخواني..شبعني اذيه
المجتبى ايعالج ..وينحب احسيني ..وشابگ اخيه

واحد فرفح من النوح مهضوم
الثاني امدد ومايكدر ايكوم
يلوج بحضن اخيه صفه المسموم
وحيلي آنه اويه حيل احسين مهدوم

احضرينه يزهره.. الهوه مابي يجره
الحسن يم الحسن لوع دليلي
ويلي اعله جبير السادة ويلي
——
من عمت عيني ..ايلوب من سمّه..وزيدلي تعبي
بالطشت شفته..مكطعة احشاءة ..ولوعلي گلبي

شاغت روحه ابنج يمه نظريه
والله لا جبد لا حيل ضل بيه
جبت يمه عباتج كلت اغطيه
بلكي الله وتردله العافيّة ليه

يتگلب وجع صار..باخينه صرنه نحتار
بمصاب الحسن ردتج تجيلي
ويلي اعله جبير السادة ويلي

———
ودع اخوانه..مدد ايدينه..وعينه عليه
فرفحت يمه..تنسلب روحه..الفارك اخيه

سد عينه وكطع كدامي الانفاس
انفجع گلبي وركضت انه اعله عباس
حضنته وكمت الطم بيدي علراس
اخيي الحسن راح شلون ياناس


شفته غمض العين..ومات بحضن الحسين
على ابن امي فلا يبرد غليلي
ويلي اعله جبير الساده ويلي
——
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

لحن بالعافية للحاج باسم الكربلائي


يالغالي
جنك نويت اتروح عم اعيالي؟
يالغالي
وتعوفه گلبي وبيتي بعدك خالي
يالغالي
—
عينك افتحها وعليّه خويه حِن
حيلي مو مهدود حيلي منطحِن
آنه اخوك الرابي خويه بهلحضن
انته ابويه وانته اخويه والابن

بهالحالة اشوفنك صعب
يمك كسير او منغلُّب
دمعي اعله وجهك ضل يصب
رايدلي لوداعك گلب

ياروحي
ياكل عزيز اعليه يادلّالي
ياروحي
جنك نويت اتروح عم اعيالي؟
يالغالي

——-
والله صعبة شوفّتّك من تنوجع
اتعالج ابروحك او گلبك منشلع
اعليك يغشى وانه انظر وانفجع
او مِن تِفز تلگاني سابح بالدمع

لتغّمض اعيونك بعد
خويه وعلي گلبي انمرد
يااهلي انته يالسند
بعدك اضل ابلا احد

كل خوفي
اتغمض يخويه وماتفز للتالي
كل خوفي
وتعوفه بيتي وگلبي بعدك خالي
يالغالي
——
خويه شصبر وآنه بعيوني شفت
جبدك امكطع وذر نص الطشت
وتكلي ضمه حسين لتشوفه الاخت
الله راحمني بوكتها وما متت

هاي اقسى من كل المضن
بيدي اضم جبد الحسن
من گتلي خويه ينگضن
لاتبجي اخياتك اجن

رديتلك
زينب تشوفه حزني من اخيالي
رديتلك
جنك نويت تروح عم اعيالي؟
يالغالي
———
دِخلّت الحره اوگمت ليكم اصد
ابجفها مي مقري عليه اشجم ورِد
كالتلك اشرب بلكي عافيتك ترد
وبالطشت شافته ممرود الجبد

طاح الروي من الايد
تلطم وحسرتها تزيد
اتموت وتخليني اتريد؟
احضنها لكن متهيد

من ترحل
شيصفه الها ياخويه وأنه شيصفالي
من ترحل
وتعوفه بيتي وكلبي بعدك خالي

——————
اگبالي من مددت كل حيلي طاح
موتك احسه بنحر اخيّك ذباح
من غَمضِت عينك عِلّه ابيتي اصياح
كلتلها اخونه الحسن يازينب راح

شبيدي عليها بهلقهر
كسرة گلب مو بس ظهر
من تالي لوعني الدهر
وگبرك بهاي ايدي انحفر

يچبيرنه
بموتك يخويه هل چفيت ادلالي
يجبيرنه
جنك نويت تروح عم اعيالي


لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

اربعينية الامام الحسين. ع

—-
انه الوالده والهضم ماهدني
ضعن ابني اجه وجوه التراب ابني
شفت زينب بحالة تهد بواجي الحيل
صحت كوم انهض اتلگاها واسندني

حسين يمه

انه الوالده اليم گبره محنيه
انه البتها رجعت ليها مسبيه
تگرّب لينه وانه احتار بيها ام عون
كل خطوة اكولن هيه مو هيه؟

حسين يمه

اجه يوم اربعينه وگلبي مل صبره
من عاشر مصابه لهسه منتظره
اريد احضن اخيته ونبجي حيل اعليه
واگابلها بنواعي اليوم يم گبره

حسين يمه

صحت گوم ابني ناري اعليك ماتطفه
كلها بجفه واختك زينب بجفه
اجت ومغطيه راسك بالعبا يحسين
ياام راس ابنها تشوفه متعرفه!!

حسين يمه

حضنت راسه اخته وضلت تبوسه
تعب من الرمح والشام وشموسه
هينه تكلي لوبس ينرفع برماح
يمه الخيل كلما يوكع اتدوسه

حسين يمه

حفروا گبره ياروحي گلت هيدي
آخر مره انظر بيها لوليدي
يبعد امك كلتله شلون بيه احسين
اريد آنه أنزِّل راسك بأيدي

حسين يمه

اندفن وام عون خلت علگبر رايه
ابثَواب الكافل توزعلهم بمايه
ماخلت اخيها باربعينه اوحيد
اجت ويه الضعن حد گبره مشايه

حسين يمه

——-
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

لحن:فرقة ورد باسم الكربلائي

ما خله گلبي محروم..نظرة رزقني المعصوم
ماعندي غيره غيره غيره غيره
سجلني ويه الماشين..خلاني بعيونه احسين
غرگني خيره خيره خيره خيره
———
احسانه عادة وخيره ما شح بيوم
ماخله كلبي امن الزيارة محروم
امأمن اكصده ونظرته اعليه تحوم
وزينب مشتله بگلب خايف ملجوم
امدللني واخته جتله توگع وتگوم
ينطيني حيل وحيلها اعليه مهدوم
وبدربي اتخيل كون
وامشي وافكر بم عون
بيا حاله ضعنه ضعنه ضعنه ضعنه
رايد عليها اعمي العين.. خلاني بعيونه حسين
غرگني خيره خيره خيره

——-
جيته بترف امشيله وبراحة بال
ماجيته وبهاي ايدي مضبوبه احبال
ولاظهري حدب من سبي الخدر ومال
ولاعفت اخوتي امذبحة فوك ارمال
ولا منجبر امشي انه ويه الچتال
بحالي استحي و زينب مشتله بلا حال
زينب اجت للمذبوح
مفجوعة والحس مبحوح
واللوعة بيها بيها بيها بيها
وين انه يم زينب وين…خلاني بعيونه حسين
غرگني خيره خيره خيره خيره
——
لملم شتاتي واخته لمت الايتام
مامحترگ بيتي مثل حرگ اخيام
ولاطلّعت من صدر خوّاني اسهام
بستره انام وبالخرابه اخته تنام
اهلي بوطن بي هو بس اهله بشام
ايضمني بحنانه عادته وبكل عام
لو ما زرت مره بعام..يكتبي ويه الخدام
دللني گلبه گلبه گلبه گلبه
حجاية بخت صحت ودْيِن..خلاني بعيونه حسين
غرگني خيره خيره خيره خيره
——
لاعندي اخوه انذبحوا وعيني تشوف
ولا عندي اخو گطعوله كدامي اجفوف
اهلي بنعيمة وضعنه بالسوگ يطوف
امأمن حياتي وسكنه تارسها الخوف
عفت ايده ظل لازمني گلبه الميعوف
كون انه اموت اعليه موتت ملهوف
احسانه مامثله احسان..يرويني ماي العطشان
مولاي احبه احبه احبه احبه
تارسلي فضله الجفين ..خلاني بعيونه احسين
غرگني خيره خيره خيره خيره

—
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

لحن :بالعافية باسم الكربلائي

مشتاگه
يابعد اخيتك يالكسرني فراگه
مشتاگة
اتلگاني واكف مو گبر نتلاگه
مشتاگه
———
يابعد روح اختك انته والنظر
فرگتك كسرة عمر مو بس ظهر
جيت بتراب العباية من السفر
گلبي من ضيم السبي شابع قهر

بحضنك ردت هسه استقر
مو مالت الگاك بگبر
تعبانه اخيتك يالذخر
فك ايدك وخل انجبر

ضل بيه
حسره اعله حضنك من خذتني الناگة
ضل بيه
يابعد اخيتك يالكسرني فراگه

مشتاگة
——
ترابك المن عطره ريتي تميزه
باربعينك كلت لو سبيي انجزه
من اجي لكبرك نذرت انصب عزه
ماردت منك ثواب ولا جزه

امجازاتي لو ما صح حضن
تنطيني حيل اعله الحزن
والطم على اعيوني واون
گلبي اعله ملگاكم يحن


مفجوعة
وتچويني نار افراگك الحرَّاگه
مفجوعة
اتلگاني واكف مو گبر نتلاگه

——
ادري تسمعني اذا نوحي عله
للمدينه ماارد امعلعله
شعندي بيها واهلي كلها بكربلا
والضعن لا انته بي لا كافله

انشاف من دونك صعب
لازم ارد ابلا گلب
يسألوني عنكم من اطب
وانه بطرگ دمعي اليصب

عفتوني
گلبي يلوج اعليكم بأشواگه
عفتوني
يابعد اخيتك يالكسرني افراگه
مشتاگة

———
ادري هاهيه وبعد مترد الي
جبت راسك كلت ودموعي تهلي
ابريلي ذمتي يابعد ناسي وهلي
ماجبتها ابنيّتك يابو علي

ماتت رقيه اعله الطشت
ابنتيك تردلك حاولت
يابعد اخيتك قصرت
مو هيه كون انه المتت

خجلانه
كون انه اموت اعليك من نتلاگه
خجلانه
يابعد اخيتك يالكسرني فراگة
مشتاگة

——-

لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

رجوع السيدة زينب عليها السلام الى المدينة
——

رجعت وانه ارددها جملة وتخنگ بريتي
(المن ردتي بلياك والمن رجعتي لبيتي)
كل اهل المدينه اعليك تنشد بيه تاليتي
وينه ضعنج ايصيحون غريبه بلا اهل جيتي
رحتي وكافل يماشيج اشو من دونه رديتي

يزينب وينه كفالج
رحتي وكلها تبرالج
كلها جتني وتناشد
وين اهلج يعلوية

———
يم جدي انوح اعليك واصيح احاه يم گبره
يجدي منذبح عطشان ظل بحسره الگطره
سحگت فوكه عشر اخيول ضلع مابقت بصدره
ظل يرافس برجليه من گطعوا يجد نحره

يصيح وينخه بالعدوان
وحق جدي أنا عطشان
حجيت الي جره بحالك
وماكتله آنه مسبيه

———
اجتني ام ابو فاضل ويلي شلون لاگتني
وجهي امكشر ومحني من ضيم السبي متني
ماعرفتني امي شلون شافتني وتعدتني
تنشد بالنسه عني هيج الشام غيرتني

صحت زينب انه يمه
غيرني السبي وهضمه
لنها بلهفه شبگتني
وتبجي صارت اعليه
———
جابت ريحة الكافل الفضل بيديها لازمته
حضنته وانه مفجوعة واترس ريتي من شمته
يبو فاضل اصيح بصوت يفزز كل جرح عشته
من كد ما نحت صاحوا اخذوا الفضل من عمته

لاتبعدوا صحت ياناس
خلولي ابن عباس
اريد بحضنته ارتاح
واشبع منه حنيه
———
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

قصيدة استشهاد رسول الله (صل الله عليه واله)
فكرة القصيدة : بعد عودة السيدة زينب (عليها السلام) من الأربعين صادفت ذكرى استشهاد جدها رسول الله (صلى الله عليه وآله وسلم)

لحن القصيدة : راح الابو للرادود محمد الجنامي
———
دارت سنة..توني رجعت من السبي وطف كربله
دارت سنة..لمصابك ونوحي على فگدك عِله
توني رجعت من السبي..وبعده التراب اعله العبي
انصب عزه جدي النبي ..دارت سنه
——
توني رديت..منلضيم للبيت
والك باذن الله نويت انصب عزيه
نوحي مسموع..گلبي مفجوع
وبعده كل تعب اليسر واضح عليه

اعلگلك سواد وظهري محني
وبعده من الضرب يوجعني متني
يجد زينب تره زينب غريبة
عمتني كربله والشام فتني

انصب عزه..ومااكدر الطم ايدي ماكلها الحبل
انصب عزه..هم انعم الله ابيتي مو فوك الهزل
ابيتي العزه مو بالدرب..ولابالخرايب ينصب
ظليت مكسورة گلب..دارت سنه
——
ابريلي ذمه..البيت ظلمة
يجد سامحني ماكو اخوان عندي
باقي الاحفاد..زين العباد
عمت عيني فلا خلاني وحدي

هاي السنه ماكو اوياي عباس
ظل وحده علي يستقبل الناس
راحوا اهلي وانه بحسرة ظليت
وگلبي اليوم بضعاف الفگد حاس

شگده الوجع..كل عام يتحزم الك وين الشهم
شكده الوجع..هلسنه بيتي بس نسه ومابي زلم

بيتي صبح وحشة وخِلي .. ماباقي منهم بس علي
مشتاگة روحي لكل هلي ..دارت سنة
———
اعليك چنه..نبجي كلنه
بمجلسك نلتم يجدي ونگعد انّوح
مجلسك جان .. ملاگة الاخوان
ننعه مفجوعين كلنه وحسنه مبحوح

جنه اعليك نبجي بعالي الونين
وتموتنه النواعي بصوت الحسين
هسه بوحدي انعه ومختفي الصوت
وتگابلني بمصابي ام البنين


يمي الحسين..جان يحضني اذا بيك انفجع
يمي الحسين..يلزم ايدي لو لطمت اعله الضلع

هسه انه وحدي بهل الحزن..الطم على عيوني واون
الهم والك گلبي يحن..دارت سنه
…
بهذا هضمي..رايده امي
انه لوعوني مثل ما لوِّعوها
نفس المصاب..فگد الاحباب
انه ابجي لخوتي وهي لابوها

كون ياجد اجتمع وي امي مره
بفرفحة روحي انادي اه يزهره
محمد راح يمه وراح الحسين
وتجرّعت انه كسره فوك كسره

محتاجة الك..ياحنين شيسوه بعدك هالعمر
محتاجة الك..بيه حسره وماخذك مني الگبر

تقبل عزاء ام الخدر ..لو قصرت انه اعتذر
ماظلّي حيل ولا صبر ..دارت سنة
——
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

قصيدة استشهاد الامام الرضا عليه السلام
….

حسين آنه يوليدي ومرسالي وصل
زواري تعنولك وحدك ماتضل
عينك اعله الدرب..ماتضل بالغرب
——
يلمسموم يبني ويكل روحي
بهذا اليوم مسموع الك نوحي
جروحك حيل تشبها لجروحي
مامذبوح بس انت مذبوحي
ماخليك وحدك يبو محمد
من كربلا زوراي حد مشهد
بغربه شلون تضل وحدك امدد
احبابي اليوم ترسولك المرقد

ماجيتك تعذرني وليدي يالرضا
بس تدري بضلوعي كلها امرضرضه
دمعي لجلك يصب.. ما تضل بالغرب
——
يبني اليوم تحضرلك الزهره
ام حسين كلتلها بالحسره
انعي هواي و ابجيله يم گبره
(غالي الرضا حيل اعله ابو العتره)
مصابك ضال جمره حزن بيه
واتمنيت يمك تصح جيه
والطم حيل اعيوني بيديه
يالگضيت عمرك بجي اعليه

وبعيني الي زارك ودموعه جرن
ولو نصبولك مأتم تحضر ام الحسن
الزهره من تطب ..ما تضل بالغرب
———
دمعك جان يوميه الي هامل
لو ونيت ياروحي تستاهل
ودام اليوم مرسالي الك واصل
ايسلم اعليك عمك ابو فاضل
والزوار خل بالك اعليهم
ردتك كون بعينك تخليهم
تعنوا ليك عافو اهاليهم
عطشانين من عطفك اسگيهم

ماتتوصه اعليهم تلگاهم هلا
مشهد يابو محمد صارت كربله
طيبولك گلب ..ماتضل بالغرب
—
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

قصيدة لمولاي الرضا عليه السلام
…..

انه ممنون
يالرضا سهلتلي الزياره
آنه ممنون
هذا گلبي جبرت انكساره
آنه ممنون
والغريب انته اهله ودياره
آنه ممنون
—-
يبن الحسين
من الحسين ودياره اجيتك
يبن الحسين
يالرضا تأذن ادخلّه بيتك؟
يبن الحسين
تقبل اعله المقصر يريتك
يبن الحسين
—-
ضامن الروح
علگلب مد يمولايَ چفك
ضامن الروح
بالجواد آنه جيتك احلفك
ضامن الروح
سيدي ريته يشملني عطفك
ضامن الروح
—-
كلشي ماريد
غير نظرة الي من رحمتك
كلشي ماريد
بس رضاك ورضا معصومة اختك
كلشي ماريد
منلعمر سيدي بس انت ردتك
كلشي ماريد
—-
انت سلطان
يالرؤوف شكثر عالي مجدك
انت سلطان
وافتخر لو صرت آنه عبدك
انت سلطان
خلي گلبي اسير يكون عندك
انت سلطان
—
خيرك هواي
بنعمتك مكتفي وزايد عليه
خيرك هواي
وتارس الدنيا مو بس اديه
خيرك هواي
مو عجيبة اعله ابن الزجية
خيرك هواي
——

لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK

قصيدة استشهاد الامام الحسن العسكري عليه السلام
…..
مولاتي الزهراء عليها السلام مخاطبة الامام المنتظر عجل الله فرجه

انه الوالده يوليدي يالمهدي
يا اغله الولد جا غيرك شعندي
حده بيك الدمع من عمت عيني اعليك
ونينك عالابو هالليلة فت جبدي

اعينك على امصابك واسجب العبره
الطم للحسن وضلوعي متكسره
ماخليك وحدك يبني يالموعود
يبن الزهره اجتك امك الزهره

اكعد يمك ونوح الگلب عالي
اقرالك نواعي وانت تقرالي
كسر فگد الابو يوليدي عشته وياك
شحالك عليتم يايمه وشحالي

اشوفك تنفجع واصرخ على هونك
وجفك الزمه من تلطم عيونك
يبن الحسن انه ام الحسن ونخاك
كافي من البجي يمه نخطف لونك

دكوم اوياي لتخلي الجرح يكبر
اوديك لعلي لو يم ابو الاكبر
ادري هواي ترتاح انته يم احسين
لتخليني يمه بوضعك اتحير

يبن العسكري ضيم الكلب شايل
دمع عيني اعله حالك يمه ضل هامل
ادري شكد عزيز انت بگلب عباس
يعينك على امصابك كون ابو فاضل
___
لخادمتكم بتول الخفاجي
الاسم للمجالس الرجالية
ابراهيم مهدي الخفاجي

https://t.me/batool313BK