Башҡортостанда «Герой ҡатыны» федераль проекты буйынса фотосессиялар дауам итә

Акцияла яҡындары махсус хәрби операцияла булған гүзәл заттар, уларҙың балалары ҡатнаша. Фотостудияла эш барышын БЮТ ижади төркөмө күҙәтте.

Башҡортостанда яңы уҡыу йылынан ике яңы фән уҡытыла башлай

Дәүләт Йыйылышы – Ҡоролтайҙан хәбәр итеүҙәренсә, федераль законға үҙгәреш индерелде. Дәреслеккә “Тыуған илде яҡлау һәм хәүефһеҙлек нигеҙҙәре”, шулай уҡ “Хеҙмәт” (“Технология”) тигән фәндәр индерелә. Мәғариф өлкәһендәге үҙгәрештәргә ярашлы, уҡыусылар мәктәп мөлкәтенә һаҡсыл ҡарарға, таҙалыҡ һәм тәртип һаҡларға тейеш.

Башҡортостанға ретропоезд килә

Рәсәй ҡалаларынан"Еңеү паровозы" үтәсәк. Уға бер нисә Т-34 танкы урынлаштырылған платформа ла тағыла. Ретропоезд 27 апрелдә ҡуҙғала. Маршрутҡа 11 станция ингән, паровоз Өфөлә һәм Стәрлетамаҡта туҡтала.

Бөгөн Өфөлә Айрат Ҡобағошовты иҫкә алалар

Өфөлә танылған композитор һәм педагог Айрат Ҡобағошовҡа арналған хәтер кисәһе үтә. Унда ижадсының дуҫтары, коллегалары, уҡыусылары һәм яҡташтары ҡатнаша. “Ул әҫәрҙәре менән халыҡ һөйөүен яулаған ижадсы булды. Уҡытыусы, остаз, патриот”, - ти Көйөргәҙе район хакимиәте башлығы урынбаҫары Данил Акилов.
“Айрат Ҡобағошов ябай, эскерһеҙ булды. Ундайҙар тураһында яҡты күңелле кеше тиҙәр. Коллегалары һәм студенттары уны ихтирам итте, яратты”, - ти сәнғәт белгесе Гөлназ Галина.
Айрат Ҡобағошовҡа арналған кисә бөгөн Өфө сәнғәт училищеһында ойошторола, киске сәғәт биштә башлана.

Башҡортостан урман хужалыҡтары махсус хәрби операцияла ҡатнашыусыларға ярҙам итә

Әбйәлил һәм Балаҡатай хужалыҡтары 25 кубик метр ағас материал оҙатҡан. Таҡта оборона ҡоролмаларын төҙөүҙә ҡулланыла. Башҡортостан урмансылары быға тиклем 1 мең кубометрҙан ашыу ағас оҙатҡан. Хәрбиҙәр өсөн шулай уҡ утын әҙерләнә.

Үҙ теләге менән МХО-ға ҡушылған район хакимиәте башлығы пилотһыҙ осоу аппараттары отрядында хеҙмәт итә

Етәксе костюмын бронежилетҡа, ә йылы кабинетты окоп һәм блиндаждарға алмаштырҙы. Былтыр үҙ теләге менән махсус хәрби операцияға ҡушылған район хакимиәте башлығы пилотһыҙ осоу аппараттары отрядында хеҙмәт итә. Әле подразделение фронттың иң ҡыҙыу урындарында тора. Алғы һыҙыҡта БЮТ хәбәрселәре лә булды.

Башҡортостанда «Урындағы башланғыстарға ярҙам итеү» программаһы сиктәрендә йомғаҡлау йыйылыштары башланды

Юлдарҙы төҙөкләндереү, зыяраттарҙы кәртәләү, спорт майҙансыҡтары төҙөү, почта бүлексәләре асыу - проект йүнәлештәре күп төрлө. Конкурс сиктәрендә төбәктәрҙә мәҙәни һәм спорт саралары ойошторола. Бынан тыш, субсидияның бер өлөшө урында йәшәүселәрә көсө менән ҡапланырға тейеш.

Өфөлә балалар өсөн яңы сәнғәт мәктәбе асыла

Был турала ҡала хакимиәте башлығы Ратмир Мәүлиев хәбәр итте. Учреждение Ферин урамында урынлаша. Ике мең квадрат метр биләмәлә ремонт эшләнә, бында балалар шөғөлләнәсәк. Мәктәп 1 марттан эш башлай. Балалар өсөн музыка, театр, спорт йүнәлештәре булдырыла.

Ялан шарттарында тәүге ярҙам күрһәткәндә, нисек юғалып ҡалмаҫҡа

Башҡорт дәүләт медицина университетында студенттар өсөн оҫталыҡ дәресе ойошторолдо. Унда хәрби хирургтар буласаҡ табиптарҙы беренсе медицина ярҙамы күрһәтеү алымдары менән яҡындан таныштырҙы. Тактик медицина буйынса лекцияны Дәүләт Думаһы депутаты Бадма Башанкаев үткәрҙе. Уҡыу барышын беҙҙең ижади төркөм күҙәтте.

Драматург, тележурналист, сценарист Сәрүәр Сурина Кинйә Арыҫланов миҙалы менән бүләкләнде.

Абруйлы награда башҡорт халҡының данлыҡлы батырының тыуыуына 300 йыл тулыуға арналған сара сиктәрендә тапшырылды. Сәрүәр Рәшит ҡыҙы Кинйә Арыҫлановтың исемен мәңгеләштереү өсөн күп көсөн һалған шәхестәребеҙҙең береһе.

Быйыл Башҡортостанда яңы ҡотҡарыусылар отряды ойошторола

Нөгөш һыуһаҡлағысында 20-нән ашыу хеҙмәткәр эшләй. Әле команда туплана, тип хәбәр итәләр Ғәҙәттән тыш хәлдәр буйынса дәүләт комитетынан. Һыуһаҡлағыста туристар күпләп ял итә, башҡа төбәктәрҙән дә килеүселәр байтаҡ. Был урында хәүефһеҙлекте тәьмин итеү маҡсаты ҡуйылған.

«Айыҡ ауыл» конкурсы еңеүселәренә 48 миллион һум

Быйыл Радий Хәбировтың ҡушыуы буйынса республика конкурсының приз фонды арттырылған. Был турала бөгөн Башҡортостан башлығы рәйеслегендә уҙған оператив кәңәшмәлә белдерелде. Министрлыҡ, ведомстволар етәкселәре ҡатнашлығында үткән кәңәшмәлә шулай уҡ Сәнәғәт фондының эш һөҙөмтәләре, туризм үҫеше, «Управдом» форумын ойоштороу талаптары тураһында һүҙ барҙы.

Радий Хәбиров «Башҡортостан» полкының 9 яугирына Шайморатов миҙалы тапшырҙы

Яҡташтарыбыҙ махсус хәрби операцияла бер йылға яҡын, егеттәр әле ҡыҫҡа ваҡытлы ялға ҡайтҡан. Ошо көндәрҙә улар яңынан алғы һыҙыҡҡа юллана. Яугирҙар араһында төрлө быуын вәкилдәре, төрлө һөнәр эйәләре бар.

Өфөлә күп яуған ҡар арҡаһында юл буйҙарын көрт баҫты

Өфө юлдары - ҡар аҫтында. Күп яуған ҡар арҡаһында ихаталарҙы, юл буйҙарын көрт баҫты. Баш ҡала халҡы юлдарҙың тейешенсә таҙартылмауына дәғүә белдерҙе. Өфөлә иретеү станцияһына тәүлегенә 21 мең кубометр ҡар сығарылыуға ҡарамаҫтан, һауа шарттары үҙенекен итә, синоптиктар тағы ла ҡар вәғәҙәләй.

Баш ҡаланың Глумилин биҫтәһендә 1225 урынлыҡ мәктәп төҙөлә

Объект Өфөнөң 450 йыллығы уңайынан һалынған мәғариф комплекстарының береһе булып тора. Тағы ла яңы мәктәптәр Дим районында һәм Затонда барлыҡҡа киләсәк.

Балтас районынан Хәбиповтар ата-әсә наҙынан мәхрүм ҡалған 9 баланы тәрбиәләй

Балтас районынан Хәбиповтар үҙҙәренең өс балаһынан башҡа, төрлө сәбәптәр арҡаһында ата-әсә наҙынан мәхрүм ҡалған 9 баланы бәхетле иткән. Бөгөн уларҙың икәүһе студент, ҡалғаны мәктәп йәшендәгеләр. Миһырбанлы ғаилә тураһында ентекләберәк киләһе яҙмала.

Гармун ҡайһы клубҡа эләгер?

БСТ телеканалы Башҡортостандың иң яҡшы ауыл мәҙәниәт йортон билдәләй! Конкурстың республика этабы 15 февралгә 22:00 сәғәткә тиклем дауам итәсәк.

Районығыҙҙың клубына тауыш биреү өсөн үрҙә беркетелгән хәбәргә баҫығыҙ һәм исемлектән районығыҙҙың/ауылығыҙҙың мәҙәниәт йортон һайлағыҙ.

ИҪКӘРМӘ: Бер кеше бер тапҡыр ғына тауыш бирергә мөмкин. Махсус бот телеграмм-каналға өҫтәлгән һәр кешегә хәбәр ебәрә һәм тауыш биреүселәр һанын теркәп бара. Каналдан сыҡҡандарҙың тауыштары иҫәпләнмәйәсәк.
https://t.me/+M7ILuY35mcViMjUy

Башҡортостанда ишле ғаиләләрҙе социаль яҡлау арта

Дәүләт Йыйылышы-Ҡоролтай тейешле закон проектын әҙерләй. Республика Парламенты рәйесе Константин Толкачев һүҙҙәренсә, ҡануниәттә ҡаралған социаль ярҙам саралары күп балалы ғаиләләге өлкән балаға 18 йәш тулғансы, әгәр ул көндөҙгө бүлектә уҡый икән, 23 йәшкә тиклем күрһәтелә. Закон Рәсәй Президентының “Күп балалы ғаиләләргә социаль ярҙам саралары тураһында” Указына ярашлы әҙерләнә.

Ауылға эшкә ҡайтҡан йәш белгестәргә 750 мең һум түләнә

Ауыл хужалығы министрлығы дәүләт ярҙамы алыу өсөн документтар ҡабул итә. Конкурста агросәнәғәт ойошмаларында эшләгән йәш белгестәр ҡатнаша ала. Ғаризалар 14 февралгә тиклем ҡабул ителә.

🥲20 йәшлек ҡыҙ аварияла һәләк булған

Әбйәлил районында полицейскийҙар үлемесле юл-транспорт ваҡиғаһының сәбәптәрен асыҡлай. Авария иртәнге сәғәт туғыҙ тирәһендә Озерный - Күсем руднигы автомобиль юлының 24-се саҡрымында теркәлгән.

Daewoo Nexia водителе, 2004 йылғы ҡыҙ, идара итеү һәләтен юғалтып, ҡаршы һыҙатҡа сыҡҡан һәм Renault Duster менән бәрелешкән. Nexia водителе ашығыс медицина ярҙамы бригадаһы килеп еткәнсе йән биргән. Renault водителе дауаханаға оҙатылған.