Өфөлә пляж миҙгеле асыла

Һыу инеү миҙгеле яҡынлаша. Өфөнөң граждандарҙы яҡлау идаралығы мәғлүмәттәренә ярашлы, 1 июндән күл эргәләрендәге барлыҡ пляждар ҙа асыла. Ә бына йылғаларҙа махсус йыһазландырылған 7 ял урынының бишәүһе генә халыҡты ҡабул итәсәк, шул уҡ ваҡытта һыу һаманғаса ярҙарына ҡайтмағанлыҡтан, уларҙа һыу инеү ваҡытлыса тыйыла. Нижегородкалағы «Аҡ яр» әлегә бөтөнләй асылмай, йылғаларға килгәндә, «Ҡояшлы» пляжында ғына йөҙөү рөхсәт ителгән. Әлегә сикләүҙәр булыуға ҡарамаҫтан, йылға-күл буйҙарында халыҡ күп. Ҡотҡарыусылар тәүлек әйләнәһенә дежурлыҡ итә.

Республикала барған Эшҡыуарлыҡ аҙнаһында «Дизайн форумы» үтте

Сараға төҙөлөш, күсемһеҙ милек, ремонт өлкәһендә эшләүселәр, дизайнерҙар йыйылды. Ҡатнашыусылар алдында федераль, республика белгестәре сығыш яһаны. Осрашыу барышында шәхси бренд булдырыу, тармаҡтың һуңғы яңылыҡтары, шулай уҡ дизайн объекттарын хоҡуҡи яҡлауға ҡағылышлы төп мәсьәләләр ҡаралды. Темаларҙың береһе - яһалма интеллектҡа бағышланды.

Салауат Башҡорт дәүләт драма театры 92-се ижад миҙгеленә йомғаҡ яһаны

Салауат Башҡорт дәүләт драма театры 92-се ижад миҙгеленә йомғаҡ яһаны. Ошо уңайҙан тамашасылар иғтибарына драматург Сәрүәр Суринаның «Зәйтүнә» спектакле премьераһы тәҡдим ителде. Ысын хәл-ваҡиғаларға нигеҙләнгән әҫәр Миәкә районынан Зәйтүнә Әлибаеваның батырлығы тураһында. Ул Бөйөк Ватан һуғышы йылдарында фашист илбаҫарҙары менән тиңһеҙ алышта һәләк була. Тулыраҡ киләһе яҙмала.

Өфөлә футбол һәм мини-футбол буйынса асыҡ ҡала Хәйриә турниры уҙҙы

Балалар һәм үҫмерҙәр - мәрхәмәтлек өсөн. Өфөлә футбол һәм мини-футбол буйынса асыҡ ҡала Хәйриә турниры уҙҙы. Саранан йыйылған аҡса махсус хәрби операцияла ҡатнашыусыларҙы техника менән тәьмин итеүгә йүнәлтеләсәк.

Ҡотҡарыусылар тирәк мамығы янып китеү хәүефе тураһында иҫкәртә

Ғәҙәттән тыш хәлдәр министрлығынан хәбәр итеүҙәренсә, ул сарҙаҡ, һарай, машина һәм башҡа урындарҙа йыйылып китеүе ихтимал. Мамыҡтың яныу температураһы 800 градус. Уға ут ҡапһа зыян ҙур булыуы мөмкин. Шуға үтә иғтибарлы булырға кәңәш ителә.

Салауат ҡалаһында трамвайҙа юл хаҡы билдәләнде

Тарифтар буйынса дәүләт комитетында ҡул ҡуйылған документҡа ярашлы, хәҙер "Алға", берҙәм транспорт карталары буйынса 35 һум түләргә кәрәк. Банк картаһы һәм ҡулаҡса менән билет 38 һум тора. Багаж өсөн дә шундай уҡ хаҡ ҡуйылған.

Өфөләге Ленин исемендәге паркта һирәк ағастарҙың ботаҡтары киҫелмәй

Бында манчжур сәтләүеге һәм көмөш тирәк үҫә, тип хәбәр итәләр Республика йәмәғәт платаһынан. Был паркта реконструкция башланды. Әле ағастарҙың ботаҡтары киҫелә. Парк төҙөкләндерелгәндән һуң киләһе йылда асылырға тейеш.

Джош Ливо “Алтын сәкән” исеменә лайыҡ булды

Был награда континенталь хоккей лигаһының иң мәргән уйынсыларына тапшырыла. Канада легионеры уҙған миҙгелдә “Салауат Юлаев” составында 62 уйын уҙғарған, 49 шайба индергән, 31 һөҙөмтәле пас биргән.

Өфөлә «Урал батыр» эпосы төп нөсхәһендә донъя күрҙе


1941 йылда халыҡ сәсәне Мөхәмәтша Буранғолов баҫтырған китап яңыртылып «Нур» оҫтаханаһында сығарылды. Уникаль баҫма «Китап байрамы» халыҡ-ара китап йәрминкәһендә әҙәбиәт һөйөүселәргә һәм ҡунаҡтарға тәҡдим ителә. Китап донъяһы серҙәре хаҡында нәшриәт етәксеһе Вилнур Хәсәнов менән һөйләштек.
https://vkvideo.ru/video-85076499_456257736

Башҡортостан Рәсәйҙең «Белем» йәмғиәте менән мәғрифәтселек эшмәкәрлеге өлкәһендә килешеү төҙөнө

Документ республика һәм ил халҡының интеллектуаль, мәғариф һәм мәҙәни потенциалын күтәреү маҡсатында берҙәм эштең төп йүнәлештәрен билдәләй. Башҡортостан башлығының матбуғат хеҙмәте мәғлүмәттәре буйынса, килешеүҙе тормошҡа ашырыу лекторҙар берләшмәләрен үҫтереүгә, һәләтле йәш белгестәрҙе мәғрифәтселек эшенә йәлеп итеүгә булышлыҡ итәсәк.

Өфөнөң Совет майҙанында «Китап-байрам» Халыҡ-ара китап йәрминкәһе асылды

Өфөнөң Совет майҙанында «Китап-байрам» Халыҡ-ара китап йәрминкәһе асылды, ул өс көн дауам итә. Быйыл унда Рәсәй төбәктәренән йөҙҙән ашыу нәшриәт ҡатнаша, Белоруссия һәм Ҡырғыҙстан республикаларынан, шулай уҡ тәүге тапҡыр Ирандан да яңы баҫмалар тәҡдим ителә.

Өфөлә бер төркөм әҙиптәр юғары дәүләт наградалары менән бүләкләнде

Башҡортостандың халыҡ яҙыусылары сафы тағы бер әҙипкә артты. «Китап-байрам» Халыҡ-ара китап йәрминкәһе уңайынан бөгөн асылған «Өфө йүкәләре» скверында бер төркөм әҙиптәр юғары дәүләт наградалары менән бүләкләнде. Улар араһында Гөлнур Яҡупова ла бар, Ҡатындар трилогияһы авторы хәҙер халыҡ яҙыусыһы.

Асҡарҙа Салауат баҡыр ятҡылығы буйынса тәүге күҙәтеү советы ултырышы үтте

Әбйәлил районы үҙәге Асҡарҙа Башҡортостандың Тәбиғәттән файҙаланыу һәм экология министрлығы ҡарамағындағы күҙәтеү советының беренсе ултырышы үтте. Ул Федераль лицензия талаптарына ярашлы Салауат баҡыр ятҡылығы биләмәһендә планлаштырған геологоразведка эштәрен контролгә алды. «Салауат» яуаплылығы сикләнгән йәмғиәтенең инвестиция проектын тормошҡа ашырыу буйынса күҙәтеү советы ҡараған ошо һәм башҡа көнүҙәк мәсьәләләр хаҡында репортаж.

Башҡортостан танкистары дошман терәк пунктына һөжүм яһаны

«Башҡортостан» мотоуҡсылар полкының Сергей Зорин исемендәге танк батальоны Украина хәрби көстәренең терәк нығытмаһына ҡыйратҡыс һөжүм яһаны. Атака ваҡытында дүрт тиҫтәгә яҡын неонацист тар-мар ителде. Ҡурҡыу белмәҫ башҡорт танкистары тураһында репортаж.

Өфөлә «Рулгә ултырма, малай!» социаль кампанияһына старт бирелде

Өфөлә «Рулгә ултырма, малай!» социаль кампанияһына старт бирелде. Проект водитель-балалар ҡатнашлығындағы юл-транспорт ваҡиғаларын иҫкәртеүгә йүнәлтелгән. Бәлиғ булмағандарҙың рулгә ултырыу осраҡтары артыуы күҙәтелә. Йыл башынан ғына уларҙың ғәйебе буйынса ете юл-транспорт ваҡиғаһы теркәлгән. Әммә үҫмерҙәр мототранспорт һәм автомобиль менән идара итеүен дауам итә.

Өфөлә төбәк телестудиялары кәңәшмәһе үтте

Унда Башҡортостан Башлығы грантына тормошҡа ашырылған «Дуҫ йәшәйек» проектына йомғаҡ яһалды. Проект сиктәрендә «Сәләм» телеканалы һәм райондарҙа эшләүсе телестудиялар ауыл ерендә йәшәүсе күп балалы ғаиләләр тураһында тапшырыуҙар циклын әҙерләгән.

Башҡортостанда "Урал батыр" эпосы көнө булдырылды

Ул йыл һайын 8 июндә билдәләнә. Радий Хәбировтың ошо турала Указы бар. Республика Хөкүмәтенә саралар планын әҙерләргә, финанслау сығанаҡтарын билдәләргә ҡушылған. Район һәм ҡалаларҙа башҡорт эпосын танытыуға йүнәлтелгән саралар уҙғарыла.

«Китап байрамы»нда Ҡәҙим Аралбайҙың яңы китабы күрһәтелде

III «Китап байрамы» халыҡ-ара китап йәрминкәһендә Башҡортостандың халыҡ шағиры Ҡәҙим Аралбайҙың «Седые ковыли» китабының исем туйы уҙҙы. Яңы китап һәм тәржемә үҙенсәлектәре хаҡында автор менән БСТ каналының күсмә студияһында һөйләштек.
https://vkvideo.ru/video-85076499_456257747

Радий Хәбиров Стәрлетамаҡ районында Золотоношка ауылында хәтер мемориалын асыу тантанаһында ҡатнашты

Башҡортостан башлығы Радий Хәбиров Стәрлетамаҡ районында Золотоношка ауылында хәтер мемориалын асыу тантанаһында ҡатнашты. Бөйөк Ватан һуғышында һәм локаль хәрби хәрәкәттәрҙә һәләк булған яугирҙарға бағышланған мемориаль комплекс «Атайсал « проекты сиктәрендә сафҡа индерелде. Меценат Юрий Кийко тырышлығы менән Золотоношка ауылында иҫке сиркәү төҙөкләндерелгән, урамдар тәртипкә килтерелгән.

Өфөлә «Китап-байрам» Халыҡ-ара китап йәрминкәһенең икенсе көнө тамамланды

Өфөлә «Китап-байрам» Халыҡ-ара китап йәрминкәһенең икенсе көнө тамамланды. Бөгөн дә форум фәһемле һәм иҫтәлекле осрашыуҙарға, эшлекле сараларға бай булды. Совет майҙанында ҡоролған сатырҙарҙа әҙәби уҡыуҙар үтте.