Хәйбулла районында юлдарҙы һәм йорт яны биләмәләрен һыу баҫҡан

Хәйбулла районы хакимиәте башлығы Рөстәм Шәрипов үҙенең телеграм-каналында ауылдарҙа урамдарҙы, ихаталарҙы һыу баҫыу осраҡтары тураһында яҙған. Ул урындағы халыҡты һыуҙы һурҙырыуҙа ярҙам итергә саҡыра.

«Бөгөн төндә яуым-төшөмдөң күп булыуы райондың ҡайһы бер ауылдарында юлдарҙы, йорт яны ихаталарын һәм подвалдарҙы һыу баҫыуға килтерҙе. Халыҡтан мөрәжәғәттәр күп, ярҙам итәбеҙ. Әлеге ваҡытта урындарҙа ташҡын эҙемтәләре бөтөрөлә. Район халҡын бөтә хәүефһеҙлек сараларын үтәргә, күмәк көс менән ҡулдан килгәнсә ташҡынға ҡаршы торорға саҡырабыҙ», — тип яҙған ул.

Радий Хәбиров Ватанды һаҡлаусыларҙы һөнәри байрамы менән ҡотланы

Бөгөн милли гвардия ғәскәрҙәре көнө. Ватанды һаҡлаусыларҙың айырым категорияһы хеҙмәткәрҙәрен һөнәри байрамы менән Башҡортостан башлығы Радий Хәбиров ҡотланы. Үҙ эшендә хәрбиҙәр һәм ведомство хеҙмәткәрҙәре көн һайын тиерлек ғүмерен ҡурҡыныс аҫтына ҡуя. Улар яуаплы бурыстарын профессиональ кимәлдә башҡара. Халҡыбыҙҙың тыныслығын һаҡлай, хәүефһеҙлеген тәьмин итә.

Радий Хәбиров социаль селтәрҙәрҙә Өфө рәссамы Александр Скорняковтың картинаһы менән бүлеште

Доға ҡыл, мин һине ҡаплармын. Башҡортостан башлығы Радий Хәбиров социаль селтәрҙәрҙә Өфө рәссамы Александр Скорняковтың картинаһы менән бүлеште. Унда алғы һыҙыҡтағы ике яугир һүрәтләнгән. Уларҙың береһе намаҙ уҡыусы мосолман. Был ваҡытта уның ғүмерен иптәше һаҡлай. Махсус хәрби операция биләмәһендә ислам һәм христиан динле Башҡортостан вәкилдәре хеҙмәт итә. Улар өсөн диндең сиктәре юҡ, һәр яугир полкташының динен хөрмәт итә. Был фекерҙе Александр Скорняков еткерә. Уның картинаһы - беҙҙең ҙур, әммә берҙәм ил яугирҙарының ысын хәрби туғанлығы тураһында, - тип яҙған Башҡортостан башлығы.

Ватанды һаҡлаусылар көнө алдынан Яңылыҡтар хеҙмәте иғлан иткән акция тамамланды

Тыл ныҡлы булғанда еңеү килә. Ватанды һаҡлаусылар көнө алдынан Яңылыҡтар хеҙмәте акция иғлан иткәйне. Бер ай дауамында республикала йәшәүселәр яугирҙарға пилотһыҙ осоу аппараты һатып алыу өсөн аҡса йыйҙы. Беҙҙең иҫәпкә барлығы 252 мең 961 һум күсте. Айырыуса Тирлән урмансылығы хеҙмәткәрҙәре ҙур әүҙемлек күрһәтте. Махсус хәрби операцияла ҡатнашыусылар теләге буйынса DJI Mavic һатып алынды.

Махсус хәрби операция биләмәһендәге яугирҙарға ирекмәндәрҙән гуманитар ярҙам

Ейәнсура районы ауылдарында йәшәүсе ирекмәндәр был изге эште күмәк көс менән башҡара. Уларҙың эшмәкәрлеге хаҡында киләһе яҙмала.

Саҡмағош районында йылына 480 тонна ҡош ите етештереү планлаштырыла

Бындай күләмдәге хәләл продукцияны баҙарға «Сәрмәсән» ҡошсолоҡ фабрикаһы сығарырға әҙер. Был аҙнала предприятиеның яңы корпусы сафҡа индерелде. Республика өсөн өҫтөнлөклө тип танылған инвестиция проекты тураһында репортаж.

«Башҡорт йыры - 2024» телевизон бәйгеһе старт алды

Ҡаршы алығыҙ, «Башҡорт йыры-2024». Башҡортостан телерадиокомпанияһында ижади проекттың 14-се миҙгеле старт алды. Быйыл телевизион бәйгегә 100-ҙән ашыу ғариза килгән, һайлап алыу турынан һуң конкурсҡа 30-ға яҡын ҡатнашыусы үткән. Ойоштороусылар әйтеүенсә, ижади ярыш сәмле һәм ҡатмарлы барасаҡ, сөнки көслө, үҙенсәлекле тауыштар күп.

Ейәнсура районының Күгәрсен ауылында өйҙәрҙе һыу баҫҡан

Яҙғы ташҡын төшөрөлгән видеояҙмалар интернетҡа таралған. Видео авторы һөйләүенсә, ҡар һыуы тауҙан кинәт килеп төшкән. Һөҙөмтәлә ауылдағы бер нисә йортто һыу баҫҡан.

Башҡортостанда ташҡынды күҙәтеү буйынса автоматлаштырылған система булдырылған. Уның ярҙамында һәр кем ғәмәлдәге һыу торошо, гидропостарҙағы хәл менән таныша ала.

Башҡортостан ҡыҙы Азалия Әминева — Нефть илдәре кубогы чемпионы

Кисә ярымфиналда Азалия Әминева Ҡаҙағстан спортсыһы Милана Сафронованы еңде. Ә бөгөн финалда яҡташыбыҙ Белоруссиянан Дарья Лецко менән алышта алдынғылыҡты бирмәне.

Хәтерегеҙгә төшөрәбеҙ, Нижневартовскиҙа Социалистик Хеҙмәт Геройы Фарман Сәлмәнов иҫтәлегенә бокс буйынса Нефть илдәре кубогы үтте. Турнирҙа 16 яҡын һәм алыҫ сит илдән 165 спортсы ҡатнашты.

1 апрелдән социаль пенсия 7,5 процентҡа күтәрелә

Хөкүмәт ҡарарына ярашлы, хаҡлы ялдағыларға йәшәү минимумы артыуына ҡарап йыл һайын индексация үткәрелә. Социаль пенсия хеҙмәт стажы тулмағандарға, шулай уҡ инвалидтар һәм ғаиләне ҡараған кешеһен юғалтҡандарға тәғәйенләнә. Бынан тыш, киләһе айҙан ветерандар һәм яраланған хәрбиҙәргә түләү 7,5 процентҡа арта. Бының өсөн бюджетта 37,5 миллиард һум һалынған.

Ялдан һуң Башҡортостан хәрбиҙәренең сираттағы төркөмө махсус хәрби операция биләмәһенә юлланды

Ял итеп, көс туплағандан һуң йәнә хәрби бурысты үтәргә. Ҡыҫҡа ваҡытлы ялдан һуң Башҡортостан хәрбиҙәренең сираттағы төркөмө махсус хәрби операция биләмәһенә юлланды. Яугирҙарҙы «Өфө-Арена» майҙанынан тантаналы шарттарҙа яҡындары, туғандары һәм дуҫтары оҙатты. Ҡайһы бер хәрби хеҙмәткәрҙәр өсөн был отпуск беренсе түгел. Ғаиләнән айырылыу еңел булмаһа ла, кәйефтәр хәрбиҙәрсә, ти ватан һаҡсылары.

Баймаҡ районы халҡынан махсус хәрби операция биләмәһенә 23-сө сираттағы гуманитар ылау оҙатылды

Яугирҙарға күсереп йөрөтмәле мунса. Баймаҡ районы халҡынан махсус хәрби операция барған зонаға 23-сө сираттағы гуманитар ылау оҙатылды. Был хаҡта тулыраҡ киләһе яҙмала.

Башҡортостанда сәнәғәт производствоһы индексы артҡан

Һүҙ 2024 йылдың ике айындағы күрһәткестәр хаҡында бара. Республика буйынса сәнәғәт производствоһы индексы 109,1 процент тәшкил иткән. Рәсәй буйынса өс процентҡа тиерлек кәмерәк - 106,6 процент. Ыңғай динамика ике секторҙа билдәләнә: эшкәртеү һәм энергетика секторында.

Киләһе өс йылда Башҡортостандың 74 мәктәбендә капиталь ремонт көтөлә

Мәғариф өлкәһендә күләмле яңырыу. Киләһе өс йылда Башҡортостандың 74 мәктәбендә капиталь ремонт көтөлә. Ошо маҡсатта федераль программа буйынса биш миллиард һумдан ашыу дәүләт ярҙамы алынасаҡ. Ил президенты ҡушыуы тормошҡа ашырылған проектта Өфө ҡалаһы тәүге тапҡыр ҡатнаша, төҙөкләндереү эштәре старт алған белем усағында БЮТ ижади төркөмө лә булды.

Дәүләт Йыйылышы-Ҡоролтайҙың бөгөнгө ултырышында республиканың бюджетын үҫтереү ҡаралды

Балаһын ташлап киткән әсәйҙәрҙән алимент түләтеү, махсус хәрби операциялағы дин әһелдәрен ирекмәндәргә тиңләү, етемдәргә интернаттан һуң социаль ярҙам саралары. Дәүләт Йыйылышы -Ҡоролтайҙың бөгөнгө ултырышында 40-тан ашыу мәсьәлә ҡаралды, уларҙың төп өлөшө закон проекттарын тикшереү менән бәйле. Иң төп ҡануни документ Башҡортостандың киләһе йылдарға бюджеты тураһында.

Ағиҙел йылғаһы аша һалынған тарихи күпер төҙөлөшө бөгөн 47 процентҡа тиклем теүәлләнгән

Өфө ҡалаһы хакимиәте эштең планға ярашлы алып барылыуын билдәләй. Әлеге ваҡытта 3800 тонналыҡ металл ҡоролмаларҙың 1800 тоннаһы урынлаштырылған. Республика башлығы Радий Хәбиров социаль селтәрҙә белдереүенсә, объектты йыл аҙағына тиклем асыу ҡарала.

Ғәҙәттән тыш хәлдәр министрлығының төбәк буйынса баш идаралығы көстәре юғары әҙерлек режимында эшләй

28 март иртәһенә Башҡортостан буйынса баш идаралыҡ тарафынан һыу баҫыуға бәйле 3 осраҡ контролгә алынған.Республика район-ҡалаларында яҙғы ташҡын эҙемтәләрен бөтөрөү хаҡында киләһе яҙмала.

Өфөлә «Башҡортостандың йыл уҡытыусыһы» конкурсына йомғаҡ яһалды

Абсолют еңеүсе тип Өфөләге Николай Кузнецов исемендәге 105-cе гимназияның тарих һәм йәмғиәтте өйрәнеү уҡытыусыһы Сергей Александрович Наумов билдәләнде. Тәжрибәле педагог төбәктең мәғариф һәм фән министры Илдар Мәүлитбирҙин ҡулынан диплом һәм иҫтәлекле бүләктәр алды.

Өфөлә «Ландшафт дизайны» компетенцияһы буйынса ярышы уҙҙы

Өфө лимонарийында «Һөнәрмәндәр-2024» чемпионатының «Ландшафт дизайны» компетенцияһы буйынса ярышы уҙҙы. Конкурстың төбәк этабында республика колледждары студенттары ҡатнашты.

Башҡортостанда балалар киберспорт менән бушлай шөғөлләнә ала

Евразия фәнни-мәғариф үҙәгендә шундай мөмкинлек булдырылды. Программа буйынса лекциялар һәм практик дәрестәр ҡаралған. Балалар киберспорт нигеҙҙәрен өйрәнә, төрлө ярыштарҙа ҡатнаша. Дәрестәр аҙнаһына өс тапҡыр уҙғарыла, 14-17 йәшлектәр араһынан уҡыусылар конкурс нигеҙендә һайлап алына.