Рәсәйҙә яугирҙәргә яңы ярҙам сараһы күрһәтелә

Хөкүмәт рәйесе Михаил Мишустин ҡул ҡуйған ҡарарға ярашлы, махсус хәрби операцияла ҡатнашҡан хоҡуҡ һаҡлау органдары пенсионерҙарына өҫтәмә түләү була. Яугирҙәргә оҙаҡ хеҙмәт өсөн пенсия тулыһынса тапшырылып бара. Бының өсөн бюджетта 4 миллиард һум һалынған. Быға тиклем президент Владимир Путин хоҡуҡ һаҡлау органдары хеҙмәткәрҙәренә социаль ярҙам өсөн компенсация тәғәйенләргә ҡушты.

105 йәшлек юбиляр!

Бөгөн Саҡмағош районының Киндеркүл ауылынан Бөйөк Ватан һуғышы һәм тыл ветераны Әминә Хәйбрахмановаға 105 йәш тулған.

Йөҙйәшәр инәйҙе юбилейы менән район хакимиәте башлығы Реканс Ямалеев ҡотлаған.

– Яңыраҡ ҡына бер быуатлыҡ юбилейына килгәйнем, биш йыл үтеп тә киткән. Ул беҙҙе көткән һәм ҡунаҡтар килеүенә бик шатланды. Һәр ҡайһыбыҙҙың һаулығы, тыныслыҡ һәм именлек өсөн доға ҡылды. Ошо йәшкә етеп тә зиһене асыҡ һәм хәтере яҡшы булыуы һоҡландыра, – тип яҙған социаль селтәрҙә район башлығы.

Иртәгә Владимир Путин федераль йыйылышҡа мөрәжәғәтнамә менән сығыш яһай

Был дәүләт башлығының йыллыҡ асыҡ мөрәжәғәтендә илдәге хәлгә баһа бирелә, эске һәм тышҡы сәйәсәттең, социаль-иҡтисади үҫештең һәм милли именлекте тәьмин итеүҙең төп йүнәлештәре билдәләнә. Быйылғы мөрәжәғәтнамәлә алдағы алты йылға бурыстар иғлан ителәсәк, тине Владимир Путин стратегик башланғыстар агентлығы форумының пленар ултырышында.

Өфө янында урынлашҡан районда йәшәүселәргә Өфө моторҙар эшләү берекмәһе вахталы эш тәҡдим итә

Проект «Башҡорт вахтаһы» тип атала. Республиканың Ғаилә, хеҙмәт һәм халыҡты социаль яҡлау министрлығы һәм төбәктең алдынғы сәнәғәт предприятиеһы вәкилдәре Иглин районында йәшәүселәр менән осрашты. Осрашыуҙа ҡатнашыусыларға предприятиела вахта ысулы менән эшкә урынлашыуҙың өҫтөнлөктәре хаҡында мәғлүмәт бирелде.

Радий Хәбиров ҡала һәм район хакимиәттәре башлыҡтары менән осрашты

Унда биләмәләрҙе социаль-иҡтисади үҫтереүҙең көнүҙәк мәсьәләләре һәм урындағы үҙидара органдарының бурыстары тикшерелде. Семинарҙы асып, төбәк етәксеһе муниципалитеттарға 2023 йылда республиканың тотороҡло үҫешен тәьмин иткәндәре, шулай уҡ социаль-иҡтисади программаларҙы һәм проекттарҙы үтәгәндәре өсөн рәхмәт белдерҙе.

Республика юлдарындағы видеокамералар ҡағиҙә боҙоу осраҡтарын теркәй

Республика юлдарындағы видеокамералар беркетелмәгән хәүефһеҙлек ҡайышы һәм туҡталыш линияһын үтеү кеүек ҡағиҙә боҙоу осраҡтарын теркәй. Был саралар юл-транспорт ваҡиғаларын кәметергә тейеш, тигән фекерҙә автоинспекторҙар. «Бәхет хаты» килеп төшмәһен өсөн ниндәй ҡағиҙәләрҙе иҫкә төшөрөргә кәрәк? Тулыраҡ видеояҙмала.

Баш ҡалала ҡотҡарыусылар «Көнсығыш сығыу юлында» күнекмәләр үткәрҙе

Өфөнөң «Көнсығыш сығыу юлы»нда бөгөн юл-транспорт фажиғәһе теркәлде. Ваҡиға эҙемтәләрен бөтөрөүгә баш ҡаланың барлыҡ хеҙмәттәре лә йәлеп ителде. Ғәҙәттән тыш хәл урынынан репортаж.

Баш ҡала уҡыусылары «Учитель» ҡушаматлы яугирға гуманитар ярҙам әҙерләне

Өфө гимназияһы уҡытыусыһы ҡыҫҡа ваҡытлы ялдан һуң махсус хәрби операция биләмәһенә юлланырға әҙерләнә. «Учитель» ҡушаматлы яугирға гуманитар ярҙам әҙерләү тураһында киләһе яҙмала.

Баймаҡ участка һайлау комиссияһы ағзалары халыҡ араһында мәғлүмәт еткереү эштәре алып бара

15-17 мартта Рәсәй Президенты һайлауы үтә. Ил яҙмышын билдәләйәсәк мөһим компания алдынан Баймаҡ участка һайлау комиссияһы ағзалары халыҡ араһында мәғлүмәт еткереү һәм аңлатма биреү эштәре алып бара.

Өфө хосписы автомобилле булды

Махсус медицина машинаһын социаль учреждениеға даими бағыусылары - Башҡортостандың электр селтәрҙәре компанияһы бүләк итте. Тәү ҡарашҡа ябай Соболь, әммә ул беҙҙең өсөн ҡотҡарыусы техника, ти хоспис хеҙмәткәрҙәре.

“Салауат Юлаев” хоккейсылары Гагарин Кубогы өсөн көрәш башлай

Континенталь хоккей лигаһында плей-офф уйындары старт ала. Бөгөн Өфөлә юлаевсылар Силәбенән “Трактор” менән тәүге уйын уҙғара. “Өфө-Арена”лағы осрашыу 19 сәғәттә башлана. Серияла 4 еңеү яулаған команда плей-офтың киләһе этабында сығыш яһау хоҡуғы ала.

Республикала мәктәп уҡыусылары араһында технологик һәм тәбиғи-ғилми түңәрәктәргә ҡыҙыҡһыныу артҡан

Стәрлетамаҡ ҡалаһының 12-cе лицейында ойошторолған кванториумға ла балалар оло теләк менән йөрөй. Мәғариф майҙансығында робототехника, программалау, 3д-моделләштереү буйынса түңәрәктәр алып барыла, шулай уҡ пилотһыҙ осоусы аппараттар менән эшләргә өйрәтәләр. Юғары технологик ҡорамалдар менән йыһазландырылған лабораторияларҙы БЮТ ижади төркөмө лә ҡараны.

Өфөлә легендар мотоуҙышсы Ғабдрахман Ҡадыровҡа һәйкәл ҡуйырға тәҡдим ителде

Радий Хәбиров менән осрашыу барышында татар йәмәғәтселеге вәкилдәре ошондай башланғыс менән сығыш яһаны. Башҡортостан Башлығы уны хупланы. Ғабдрахман Ҡадыров боҙҙа мотоциклда уҙышыу буйынса 6 тапҡыр донъя чемпионы. “Минең өсөн ҡыуаныслы яңылыҡ. Ғабдрахман Ҡадыров ҡаһарманлыҡ символы иҫәпләнә һәм ул һәйкәлгә лайыҡлы кеше. Уға бағышланған монумент көйәрмәндәр өсөн ҙур бүләк булыр ине”, - ти спортсының ҡатыны, Башҡортостандың халыҡ артисы Нәзифә Ҡадырова. Өфөлә Ғабдрахман Ҡадыровҡа мемориаль таҡтаташ ҡуйылған. Баш ҡалалағы урамдарҙың береһе легендар спортсының исемен йөрөтә.

Хәйбулла районынан махсус хәрби операция биләмәһенә сираттағы гуманитар ылау ебәрелде

Махсус операцияла ҡатнашҡан яугирҙарға ярҙам итеү теләге ирекмәндәрҙе һәм төбәктең ярҙамсыл кешеләрен берләштерҙе. Ауыл биләмәләре башлыҡтары, мәктәптәр тарафынан һалдаттарға ярҙам итеү ойошҡанлыҡ менән үтәлә.Был юлы гуманитар ярҙамға аҙыҡ-түлек һәм көндәлек кәрәкле тауарҙар, маскировка селтәрҙәре, окоп шәмдәре, төҙөлөш материалдары, электр ҡорамалдары һәм йылы кейем-һалым тупланған.

Владимир Путин: "Бөтә ил алғы һыҙыҡтағылар менән"

“Алғы һыҙыҡта булған яугирҙәр белә, улар менән бөтә ил”. Рәсәй Президенты Владимир Путин Федераль йыйылышҡа мөрәжәғәтендә шулай тип белдерҙе. “Беҙ иң ҡатмарлы мәсьәләләрҙе лә хәл итә, иң ауыр һынауҙарҙы ла үтә алабыҙ. Беҙ быны иҫбат иттек. Халыҡ-ара терроризмға ҡаршы тора алдыҡ. Илдең берҙәмлген һаҡлап ҡалыуға өлгәштек”, - тине Рәсәй етәксеһе. “Беҙҙең ил суверенитетын һәм именлеген яҡлай. Махсус хәрби операцияны халыҡтың күп өлөшө хупланы”, - тине Владимир Путин.
“Мөрәжәғәтнамә тәү сиратта киләсәккә ҡараш. Унда пландар ғына түгел, стратегик бурыстар, илдең ышаныслы үҫеше өсөн мөһим булған мәсьәләләр күтәрелә”, - тине Владимир Путин. Федераль йыйылышҡа мөрәжәғәт сараһында Федерация Советы ағзалары, Дәүләт Думаһы депутаттары, етәкселәр, табиптар, уҡытыусылар, артистар, эшҡыуарҙар һәм дин әһелдәре ҡатнаша.

Владимир Путин: "Берҙәмлек - бөйөк һәм еңелмәҫ көс"

“Колониялар тоторға, бөтә донъяла милли низағтар булдырырға күнеккән Көнбайыш Рәсәйҙең үҫешен тотҡарларға ғына тырышмай. Уларға беҙҙең ил урынына юҡҡа сыға барған, уларға бәйле булған киңлек кәрәк”. Ил Президенты Владимир Путин Федераль Йыйылышҡа мөрәжәғәтендә шулай тип белдерҙе.
“Быуаттар дауамында нығынған берҙәмлегебеҙ – бөйөк һәм еңелмәҫ көс. Беҙҙең һалдаттар һәм офицерҙар, төрлө милләт һәм дин кешеләре быны эше менән иҫбат итте. Улар иңгә-иң ҡуйып Тыуған илебеҙ өсөн алыша. Беҙ азатлығыбыҙҙы, тыныс һәм лайыҡлы тормошта йәшәү хоҡуғын барыбыҙ ҙа бергә яҡлайбыҙ. Быуандар бәйләнешен һәм традицияларыбыҙҙы һаҡлайбыҙ һәм балаларыбыҙға тапшырасаҡбыҙ”, - тине ил етәксеһе. “Бөгөн суверенитетты нығытыу бөтә йүнәлештәр буйынса алып барыла. Фронтта яугирҙәребеҙ сыҙамлыҡ һәм ҡыйыулыҡ күрһәтә”, тип белдерҙе Владимир Путин.

«Айыҡ ауыл» республика конкурсында Кушнаренко районы данын Иҫке Ғүмәр ауылы яҡлаясаҡ

«Айыҡ ауыл» конкурсы сиктәрендә Иҫке Ғүмәрҙәр ауыл көнөн билдәләне. Был хаҡта тулыраҡ киләһе яҙмала.