Көҙгө «Йәшел Башҡортостан» акцияһында 36 мең кеше ҡатнашҡан

Барлығы етмеш меңдән ашыу ағас үҫентеһе ултырылған. Был турала Хөкүмәттең оператив кәңәшмәһендә төбәктең торлаҡ-коммуналь хужалыҡ министры Ирина Голованова хәбәр итте. Муниципалитеттарҙа яңы аллеялар барлыҡҡа килгән, шулай уҡ йәшелләндереү эштәре лә алып барылған. Ултырыш барышында Өфө һәм Нефтекамалағы уңышлы тәжрибәне башҡа район-ҡалаларға таратыу бурысы ҡуйылды.

Башҡортостан аграрийҙары ураҡты тамамланы

Ҡатмарла һауа шарттарына ҡарамаҫтан, Башҡортостан аграрийҙары ураҡты тамамланы. Барлығы 3 миллион 800 мең тонна иген һуғылған, был күрһәткес уҙған йыл менән сағышырғанда ярты миллион тоннаға күберәк. Был турала Хөкүмәттең оператив кәңәшмәһендә билдәләнде.

Башҡортостанда Һалым һалыуҙа автоматлаштырылған ябайлаштырылған система индерелеүе ихтимал

Дөйөм федераль экспериментҡа ярашлы, һалым органы һалым суммаһын үҙе иҫәпләй, йәғни отчет эше кәмей, страховка иғәнәләрен түләргә кәрәкмәйәсәк. Автоматлаштырылған системаны штатта биш кешегә тиклем хеҙмәткәре булған ойошмалар менән шәхси эшҡыуарҙар ҡуллана аласаҡ, йыллыҡ килем 60 млн һумдан артмаҫҡа тейеш.

Өфөлә моделселәр һәм коллекционерҙарҙың 2-се слеты үтте

Һирәк, күп төрлө һәм уникаль. Өфөлә моделселәр һәм коллекционерҙарҙың 2-се слеты үтте. Рәсәй төбәктәренән тиҫтәләрсә ҡатнашыусы ҡулдан эшләнгән хәрби һәм фантастик техника, меңәрләгән автомобиль моделдәрен тәҡдим итте.

Баймаҡта «Ҡурай тауыштары тынмаһын» исемле музыкаль кисә үтте

Баймаҡ район мәҙәниәт йортонда Буранбай сәсән исемендәге халыҡ ҡурайсылар ансамбленең 65 йыллығына арналған «Ҡурай тауыштары тынмаһын» исемле музыкаль кисә үтте. Юбилей сараһынан киләһе репортаж.

Өфөлә һаулыҡ мөмкинлектәре сикләнгән уҡыусылар мәҙәниәт һәм спорт өлкәһендә көстәрен һынаны

Башҡортостан коррекция учреждениелары араһында республика фестивале 19-сы тапҡыр ойошторола. Быйыл ул «Салют» республика реабилитация үҙәгендә уҙҙы. Балаларға ярҙам итеү, уларҙы үҫтереү маҡсатында ойошторолған сара 38 коррекция мәктәбенән йыйылған 190 уҡыусыны берләштерҙе.

Радий Хәбиров Мәскәүҙә Рәсәй Гвардияһы директоры Виктор Золотов менән осрашты

Фекер алышыу барышында яҡтар төбәк биләмәһендә хәүефһеҙлек тәьмин итеүҙең көнүҙәк мәсьәләләрен, Росгвардия бүлексәләренең Башҡортостан дәүләт власы органдары менән үҙ-ара килешеп эш итеүен, шулай уҡ хоҡуҡ тәртибен нығытыу буйынса сараларҙы тикшерҙе.

Оло Ирәмәл тауы янында юғалған 43 йәшлек Полина Захарова табылған

Ул иҫән. Һөйөнөслө яңылыҡ менән социаль селтәрҙәрҙә Радий Хәбиров уртаҡлашты. Силәбе өлкәһенән килгән туристың Белорет районындағы Иһәнәк тауы итәгендә булыуы асыҡлана. Иҫегеҙгә төшөрәбеҙ, Полина Захарова дүрт көн элек Оло Ирәмәлгә күтәрелгәндә юғала.

Башҡортостандың иң ҙур элеваторында 77 мең тонна уңыш һаҡлауға һалынған

Үҫтереү генә түгел, уңышты һаҡлау ҙа мөһим. Башҡортостандың иң ҙур һәм заманса элеваторы Ҡырмыҫҡалы районында урынлашҡан. Ул 122 мең тонна орлоҡто һыйҙыра ала. Әлеге ваҡытта 77 мең тонна бөртөклө, ҡуҙаҡлы һәм майлы культуралар киптерелеп, һаҡлауға һалынған. Биләмәлә төҙөлөш эше лә дауам итә. Яҡын арала орлоҡ үҙәге сафҡа инәсәк, шулай уҡ элеваторҙы тимер юлы менән тоташтырыу өсөн юл һалына.

Өфөнөң Октябрь районы хакимиәте хеҙмәткәре үҙ ирке менән махсус хәрби операция биләмәһенә юлланды

Хакимиәт хеҙмәткәре Оборона министрлығы менән контракт төҙөгән. Яугирҙарға ул район хакимиәтенән гуманитар ярҙам, квадрокоптер алып бара.

Өфөлә йөҙгә яҡын егет Рәсәй Ҡораллы көстәренә оҙатылды

Был көҙгө саҡырылыштың тәүге төркөмө. Егеттәр ҡоро ер ғәскәрҙәре һәм һауа-йыһан көстәре частарында хеҙмәт итәсәк. Хәрби хәрәкәттәр ветерандары, дини конфессия вәкилдәре һәм ҡунаҡтар буласаҡ һалдаттарға уңышлы хеҙмәт, «йәш яугир» курсын үҙләштереп, яңы дуҫтар табырға тигән теләктәрен еткерҙе.

Миәкә районында Сталинград алышы геройы Зәйтүнә Әлбаеваның исеме мәңгеләштерелде

Ҡаһарман яҡташыбыҙ 1942 йылдың авгусында Ҡалмыҡ АССР-да батырҙарса һәләк булған. Хәтер сараһында Ҡалмыҡ Республикаһы делегацияһы ла ҡатнашты. Тулыраҡ киләһе яҙмала.

Башҡортостанда тәүге тапҡыр милли бейеү көнө билдәләнде

Байрам Радий Хәбиров тәҡдиме менән ойошторолдо. Социаль селтәрҙәге сәхифәһендә ул Башҡортостанда төрлө милләт вәкилдәре татыу һәм дуҫ йәшәүен, бейеү традицияларын һаҡлауын билдәләне. Милли бейеү көнөндә республиканың төп сәхнәһендә ижади коллективтар сығыш яһаны.

Һуңғы алты йылда Башҡортостанда йөҙҙән ашыу яңы мәктәп һәм балалар баҡсаһы төҙөлгән

Был хаҡта Радий Хәбиров Мәскәүҙә Рәсәйҙең мәғариф министры менән осрашыуҙа һөйләне. Ул Сергей Кравцовҡа төбәктең мәғариф өлкәһенә булышлыҡ иткәне өсөн рәхмәт белдерҙе. Йөҙләгән мәктәп яңыртылған, капиталь ремонт үткәрелгән. Белем усаҡтары һанлы мөхит индереү өсөн ҡорамалдар менән йыһазландырылған, ауыл ерендә заманса спорт залдары барлыҡҡа килгән.

Урал Килсенбаев Мәскәүҙә #өйҙә форумы сиктәрендә Башҡортостан студенттары менән осрашты

Илдең баш ҡалаһында-башҡортса мөхит! Башҡортостан хөкүмәте премьер- министрының беренсе урынбаҫары Урал Килсенбаев Мәскәүҙә #өйҙә форумы сиктәрендә Башҡортостан студенттары менән осрашты. Йылы осрашыуҙа йәштәр төрлө өлкәләрҙә эшләп йөрөүсе яҡташтарына һорауҙар бирҙе, үҙҙәрен борсоған мәсьәләләр буйынса фекер алышты.

Өфөлә алтынсы тапҡыр ойошторолған «Атай ҡаһарманлығы» республика конкурсы еңеүселәре бүләкләнде

Быйыл йәмәғәт наградаһына 34 кеше лайыҡ булды. Улар араһында махсус хәрби операцияла ҡатнашыусылар, ирекмәндәр, спортсылар, мәҙәниәт эшмәкәрҙәре, күп балалы атайҙар һәм хеҙмәт династиялары вәкилдәре бар.

Баймаҡ районы Ниғәмәт ауылы мәҙәниәт йортонда «Өс ул үҫтергән әсә» исемле кисә үтте

Уның төп ҡунағы-ике улы махсус хәрби операцияла ҡатнашҡан әсә-Дилә Мырҙағәлина булды.
Батыр улдар үҫтергән әсәгә бағышланған кисә Ватан һаҡсылары һәм махсус хәрби операцияла ҡатнашыусылар һәм уларҙың ғаилә ағзалары тураһында хәстәрлек йылына арналды.

Ишембай районы Маҡар ауылы мәҙәниәт йортонда күләмле төҙөкләндереү эштәренән һуң тәүге концерт ҡуйылды

«Берҙәм Рәсәй» партияһының «Кесе Ватан мәҙәниәте» проекты сиктәрендә клубҡа яңы мебель, йыһаздар, музыка ҡорамалдары һатып алынған, урындағы үҙешмәкәр коллективтар костюмдар менән тәьмин ителгән.

Өфөлә мәктәп уҡыусыларына Мостай Кәрим исемендәге фонд грантары тапшырылды

Бөйөк әҙиптең тыуыуына 106 йыл тулыуға арналған әҙәби-музыкаль кисәлә аҡсалата премияға Башҡортостандың халыҡ шағиры исемен йөрөткән 158-се башҡорт гимназияның 10 өлкән класс уҡыусыһы лайыҡ булды.