Өфөлә ҡотҡарыусыларға арналған мурал барлыҡҡа килде

22 янғын һүндереү-ҡотҡарыу отряды хеҙмәткәре Альберт Юлдашев Өфөләге янғын һүндереү часы стенаһында ҡотҡарыусыларға арналған мурал төшөргән.
Янғын һүндереүселәрҙең хеҙмәтенә хөрмәт йөҙөнән ул быға тиклем дә мурал эшләгән. 8-се янғын һүндереү бүлеге стенаһын уның ижад емеше биҙәй.

Өфөлә альпака паркы асылды

Яңы паркта шулай уҡ лама һәм ланаларҙы, башҡа хайуандарҙы күрергә мөмкин.

Өфөлә «Күренекле шәхестәрҙең имиджы» курстары башлана

«Имидж» төшөнсәһе нисек формалаша? Имидж уңышҡа өлгәшеүгә нисек ярҙам итә ала? Был һорауға яуапты телерадиосәнғәт мәктәп -студияһы ойошторған «Күренекле шәхестәрҙең имиджы» курстарында табырға мөмкин. Яуапты һеҙгә танылған имиджмейкерҙар, бизнес-тренер, карьера үҫтереү буйынса эксперт, имидж-консультант, ораторлаҡ оҫталары, стилист, визажист, этикет белгестәре бирәсәк.

Ниязбай Сәлимовтың «Бәхетстан» тип исемләнгән китабының исем туйы үтте

Зәйнәб Биишева исемендәге «Китап» нәшриәтендә Ниязбай Сәлимовтың «Бәхетстан» тип исемләнгән китабының исем туйы үтте. Билдәле журналист, яҙыусының яңы китабын Башҡортостанға арналған энциклопедик баҫмаға тиңләргә була. Унда Башҡортостан тарихы, шәхестәре, хозур тәбиғәте сағылыш тапҡан.

Өфөлә Фәйзи Ғәскәров исемендәге Халыҡ-ара конкурс еңеүселәре билдәләнде

Мәҙәни сара күренекле балетмейстр нигеҙ һалған традицияларҙы һаҡлауға һәм популярлаштырыуға йүнәлтелгән. Республика район-ҡалалары, Рәсәй төбәктәренән 35 хореография коллективы ҡатнашлығында үткән конкурста 800-ҙән ашыу бейеүсе сығыш яһаған. Улар өс тур һынау аша үткән. Баһалама ағзалары ҡатнашысыларға оҫталыҡ дәрестәре лә ойошторҙо.

Өфөлә республика көнөнә арналған ҙур ат спорты байрамы үтте

Таһир Күсимов исемендәге «Аҡбуҙат» ипподромында республика көнөнә арналған ҙур ат спорты байрамы үтте. Ярыштарҙа 120 жокей һәм һыбайлы ҡатнашты. Тоҡомло аттарҙа һыбайлылар Башҡортостан Башлығы Призы өсөн көрәште. Бынан тыш башҡорт тоҡомло аттарҙа сабыштар уҙғарылды. Йәш спортсылар пониҙа сығыш яһаны. Ярыштарҙың дөйөм приз фонды яҡынса 5 миллион һум тәшкил итте.

Шәкәр сөгөлдөрөнән мул уңыш алына

Бөгөнгә баҫыуҙарҙың 73 процентында эш теүәлләнгән. 1 миллион ярым тонна уңыш йыйылған. Һәр гектарҙан 482 центнер алына. "Уңышты ваҡытында йыйып аласаҡбыҙ. Ике шәкәр заводына тулы ҡеүәткә эшләргә тура килә. Бөгөнгә 377 мең тонна эшкәртелгән. Киләһе йылдың февраленә сөгөлдөрҙө эшкәртеп бөтөргә тейештәр", - тип яҙа социаль селтәрҙә премьер-министр Андрей Назаров.

Рәсәйҙә минималь хеҙмәт хаҡы артасаҡ

1 ғинуарҙан айлыҡ минималь эш хаҡы 20,7 процентҡа индексациялана. Дәүләт Думаһы ошо көндәрҙә бюджет һәм һалым комитеты индергән төҙәтмәләрҙе ҡарарға йыйына. Урал коэффициентын иҫәпкә алғанда Башҡортостанда был сумма 31 мең 156 һум була. Әле минималь хеҙмәт хаҡы 22 мең 440 һум кимәлендә билдәләнгән.

Бүздәк районы үҙәгендә яңы парк асылды

Йәмәғәт биләмәһендә асфальт түшәлгән, йәйәүлеләр зонаһы, баскетбол, волейбол һәм футбол майҙансыҡтары йыһазландырылған, яҡтыртҡыстар, эскәмйәләр һәм урналар ҡуйылған. Балалар өсөн шыумалы тау һәм бәүелсәктәр менән уйын зонаһы бар. “Йәшел Башҡортостан” экологик акцияһы барышында ҡарағай һәм миләш үҫентеләре ултыртылған. Эштәр “Тормош өсөн инфраструктура” милли проекты буйынса башҡарылған.

Башҡортостанда йәйәүлеләр ҡатнашлығында авариялар артҡан

Башҡортостандың баш дәүләт автоинспекторы Владимир Севастьянов көҙгө юлда айырыуса һаҡ булырға саҡырҙы. Сөнки ямғыр яуған ҡараңғы ваҡытта күреү мөмкинлеге кәмей. Был үҙ сиратында йыш ҡына йәйәүлеләр ҡатнашлығында үлемесле юл-транспорт ваҡиғалары артыуына килтерә.

Баш ҡалала Рәсәйҙең сит ил студенттары ассоциацияһының ун өсөнсө съезы үтте

Евразия ғилми-мәғариф үҙәгенең Вуз-ара студенттар кампусында ойошторолған форумда донъяның 50-нән ашыу иленән 250 сит ил студенты ҡатнашты. Ике көн дауамында барған сарала улар илдең башҡарма власть органдары вәкилдәре менән асыҡ диалог форматында лекциялар тыңланы.

Өфөлә «Йөрәк ҡаны менән» тип аталған халыҡ-ара әҙәбиәт күргәҙмәһе асылды

Унда Бөйөк Ватан һуғышы йылдарында һәләк булған белорус шағирҙарының ижад емештәре урын алған. Рәсәйҙең 18 төбәген үҙ эсенә алған экспозицияла Беларусь әҙәбиәте тарихы дәүләт музейы вәкилдәре ҡатнашты.

Өфөлә тыл ветераны Мәрзүнә Сөнәғәтуллина 95 йәшлек юбилейын билдәләне

Өфөлә йәшәүсе тыл һәм хеҙмәт ветераны Мәрзүнә Сөнәғәтуллина 6 октябрҙә 95 йыллыҡ ғүмер байрамын ҡаршыланы. Бөйөк Ватан һуғышы йылдарында тылдағы фиҙаҡәр хеҙмәте менән Еңеүҙе яҡынайтҡан ветеран Рәсәй Президенты Владимир Путиндан, Башҡортостан Башлығы Радий Хәбировтан ҡотлауҙар һәм иҫтәлекле бүләктәр ҡабул итте.

Өфөлә Светлана Хәмиҙуллина иҫтәлегенә беренсе Халыҡ-ара пианистар конкурсы асылды

Федор Шаляпин исемендәге концерт залында алты көн дауамында барасаҡ мәҙәни сарала республика район-ҡалаларынан тыш, илдең төрлө төбәктәренән килгән пианистар ҡатнаша. Ошонда уҡ баһалама ағзалары оҫталыҡ дәрестәре лә бирәсәк. Унда алдынғы музыканттарҙың башҡарыу алымын, тәжрибәһен өйрәнергә мөмкин.

Шаран районында тынғы белмәҫ шағирә Зинфира Зәйҙуллинаның яңы китабы донъя күрҙе

Матурлыҡҡа ынтылам. Шаран районында йәшәп ижад иткән шағирә Зинфира Зәйҙуллинаның яңы китабы шулай тип атала. Баҫманың исем туйы шағирә йәшәгән Күгәрсенбүләк ауылында үтте. Кисәлә шағирә һүҙҙәренә йырҙар яңғыраны, нәфис һүҙ оҫталары уның шиғырҙарын уҡып ишеттерҙе, өлкән йәштә лә арымай-талмай ижад иткән авторға ауылдаштары рәхмәт һүҙҙәрен еткерҙе.

Ағиҙелдә һыу аҫты һунарсылары йәйге миҙгелде япты

Ағиҙел ҡалаһында Башҡортостандың һыу аҫты спорты федерацияһы йәйге миҙгелде япты. Тантанала республиканан һәм күрше төбәктәрҙән һыу аҫты һунарсылары ҡатнашты. Иң тәжрибәле балыҡсы Наил Аҡһаҡал ауырлығы 7 килограмға еткән һыла тотоуға иреште.

Башҡортостанда ФСИН етәксеһе итеп Сергей Кудрявцев тәғәйенләнде

Федераль яза башҡарыу хеҙмәтенең Башҡортостан буйынса идаралығы етәксеһе вазифаһы Сергей Кудрявцевҡа йөкмәтелде. Был туралағы указға Рәсәй президенты Владимир Путин ҡул ҡуйған. Бөгөн төбәк башлығы Радий Хәбировты ведомствоның яңы етәксеһе менән таныштырҙылар.

Башҡортостанда йыл башынан миллион ярым турист ял иткән

Йыл башынан Башҡортостанда миллион ярым кеше ял иткән. Туристар ағымы буйынса республика Волга буйы федераль округында өсөнсө, ә Рәсәй кимәлендә-17 урында. Шифаханалағы ялға ихтыяж буйынса ла ул ил кимәлендә алдынғы биш төбәк исемлегендә. Был турала төбәк башлығы Радий Хәбиров ҡатнашлығында үткән оператив кәңәшмәлә билдәләнде. Көн тәртибенә шулай уҡ йәмәғәт биләмәләрен, юлдарҙы төҙөкләндереү мәсьәләләре лә сығарылды.

Радий Хәбиров «Транспорт сәғәте»ндә юлдарҙы яңыртыу мәсьәләһен тикшерҙе

Башҡортостан башлығы Радий Хәбиров сираттағы «Транспорт сәғәте»н үткәрҙе. Унда төбәктең юл селтәрен яңыртыу мәсьәләләре тикшерелде. Быйыл төбәктә дөйөм оҙонлоғо 150 километр тәшкил иткән 56 төбәк һәм муниципаль-ара трасса участкаһы ремонтланған. Юл-ремонт миҙгеле аҙағына тиклем «Тормош өсөн инфраструктура» милли проекты буйынса тағы ла 350 километр юлды тәртипкә килтереү күҙаллана.

Әбйәлил районы үҙәгендә Рәсәй Геройы Тамерлан Илһамовҡа бюст асылды

Һәйкәл булып ҡалҡты тыуған ерендә. Әбйәлил районы үҙәгендә Рәсәй Геройы Тамерлан Илһамовҡа бюст асылды. Уны скульпторҙар Хәлит Ғәлиуллин һәм Рафаэль Зиннуров эшләгән. Тантанала район етәкселеге, яугирҙың яҡындары һәм яҡташтары ҡатнашты.