Үҫмерҙәр Ағиҙелде матурлауҙа ҡатнаша

Ҡала хакимиәте башлығы Динис Ирназаров ошо турала социаль селтәрҙә яҙа. Йәштәрҙе берләштергән хеҙмәт отряды йәй аҙағына тиклем ҡаланы таҙартыу һәм йәшелләндереү эштәрен башҡара. “Был уларҙың тәүге тәжрибәһе. Беренсе тапҡыр аҡса эшләп ҡарау мөмкинлеге. Шулай уҡ ҡалалары өсөн яуаплылыҡ тойоу, уны тағы ла йәмлерәк итеү форсаты. Теләгәндәрҙе эшкә саҡырабыҙ. Ҡала хакимиәтенә мөрәжәғәт итегеҙ”, - тигән Динис Ирназаров. Быйыл Башҡортостанда 3 мең ярым студент хеҙмәт урыны менән тәьмин ителгән.

Зөһрә Гордиенко Башҡортостандың эшҡыуарлыҡ һәм туризм министры вазифаһынан бушатылды

Был турала Радий Хәбиров аҙналыҡ оператив кәңәшмәлә белдерҙе. Республика башлығы әйтеүенсә, Зөһрә Мәүлитбай ҡыҙы икенсе эшкә күсерелә. Министр вазифаһында ул бер йылдан ашыу эшләне. Эшҡыуарлыҡ һәм туризм министрлығын быға тиклем иҡтисади үҫеш һәм инвестиция сәйәсәте министры урынбаҫары булып эшләүсе Светлана Верещагина етәкләйәсәк.

Башҡортостан юл сифаты буйынса рейтингта бер баҫҡысҡа күтәрелеп 16 урынды биләне

Күрһәткестәр буйынса, республикалағы төбәк, муниципаль-ара һәм урындағы юлдарҙың 68 проценттан ашыуы нормативтарға тап килә. Рейтингтың тәүге урындарын Мәскәү, Ханты- манси автономлы округы һәм Силәбе өлкәһе бүлешкән. Был төбәктәрҙә мең квадрат километрға тура килгән ҡаты япмалы юлдар күләме Башҡортостан менән сағыштырғанда күпкә әҙерәк. Волга буйы федераль округында республика был күрһәткестәр буйынса беренсе урында.

Башҡортостан мәктәптәренә капиталь ремонт эшләнә

Республикала мәктәп һәм колледждарҙа 15 авгусҡа тиклем капиталь ремонт тамамланырға тейеш. Һүҙ “Йәштәр һәм балалар" милли проектына ярашлы төҙөкләндерелгән белем усаҡтары тураһында бара. Быйыл 35 мәктәп, 3 колледж һәм 2 балалар баҡсаһы яңыртыла. Бының өсөн 2 миллиард һумдан ашыу аҡса бүленгән.

Башҡортостанда һунарсылыҡ итеүгә квоталар билдәләнде

Ҡырағай хайуандар аулауға рөхъсәтте Башҡортостандың тәбиғәттән файҙаланыу һәм экология министрлығы бирә. Республика башлығы ҡул ҡуйған документҡа ярашлы, 1 августан алып киләһе йылдың ошо осорона тиклем республиканың һунарсылыҡ биләмәләрендә 3256 мышы, шул уҡ сама себер ҡоралайы, 77 һеләүһен, 16 болан ауларға мөмкин. Айыуҙарҙың саманан тыш артыуын иҫәпкә алып уларҙы атыуға 600 квота бирелә. Шулай уҡ 880 бурһыҡҡа һунар рөхсәте бирелә. Дөйөм тәғәйенләнештәге һунарсылыҡ биләмәләрендә ауға сығыу өсөн рөхсәт ҡағыҙҙары йәрәбә нигеҙендә таратыласаҡ.

Башҡортостанда 122 мең тонна ашлыҡҡа иҫәпләнгән заманса элеватор сафҡа индерелде

«Урожай» агрохолдингы ивестицияларына төҙөлгән проекттың хаҡы 2 миллиард ярым һум. Элеватор әленән үк уңыш ҡабул итә башлаған. Шулай ҙа ярҙамсы объекттар төҙөлөшө дауам итә. Ауыл хужалығы министры әйтеүенсә, юғары технологиялы заманса элеваторҙар аграрийҙарға һауа торошона ҡарамай ашлыҡ тупларға ярҙам итә. Сөнки бөртөклө культураларҙы яландарҙа киптереү талап ителмәй. Иң мөһиме комбайндар ғына баҫыуҙарға инә алһын.

Өфөлә быйыл 8 дауаханала ремонт үткәреү күҙаллана

Баш ҡалала медицина учреждениаларын тәртипкә килтереү өсөн 400 млн һум аҡса бүленгән. Был турала Башҡортостан башлығы Радий Хәбиров аҙналыҡ оператив кәңәшмәлә хәбәр итте. Көн тәртибендә ураҡ кампанияһы барышы һорауҙары ҡаралды. Республика аграрийҙары ужым бойҙайы уңышын йыйып алып борсаҡ һәм арпа урып-йыйырға әҙерләнә.

Благовещен ҡалаһында яңы физкультура-һауыҡтырыу комплексы файҙаланыуға тапшырылды

Бөгөн Благовещен ҡалаһында бассейн менән йыһазландырылған яңы физкультура-һауыҡтырыу комплексы файҙаланыуға тапшырылды. Спорт объекты «Башнефть» компанияһының финанс ярҙамында Башҡортостан менән «Роснефть» араһындағы хеҙмәттәшлек сиктәрендә төҙөлгән. Коплексты асыу тантанаһы республика башлығы ҡатнашлығында үтте. Радий Хәбиров шулай уҡ төбәктең иҡтисади үҫеш мөмкинлектәре менән дә яҡындан танышты.

Башҡортостанда хәрби хеҙмәткә контракт төҙөүселәрҙе ҡабул итеү дауам итә

Өфөлә «Защитник» үҙәгенә республика район-ҡалаларынан ғына түгел, Рәсәйҙең башҡа төбәктәренән дә килеүселәр өсөн бөтә шарттар булдырылған. Үҙәктә банк хеҙмәткәрҙәре финанстар буйынса аңлатыу эштәре алып бара, табиптар тикшереүҙәр үткәрә, ә инструкторҙар хәрби әҙерлек буйынса эш алып бара. Бер көн эсендә тулыһынса хәрби хеҙмәткә һайлау тәртибен үтергә була.

Республика мәғәриф учреждениеларының яңы уҡыу йылына әҙерлеге тикшерелә

Мәктәп һәм балалар баҡсаларында ремонт эштәре башҡарыла, кабинеттар тәртипкә килтерелә,йыһаздар, ҡормалардар,уҡыу әсбаптары яңыртыла. Хәүефһеҙлек ҡағиҙәләре үтәлеше тикшерелә. Өфө районы белем биреү усаҡтарының яңы уҡыу йылына әҙерлек кимәлен беҙҙең ижади төркөм дә өйрәнде.

Стәрлетамаҡта тәүлек дауамында еңел атлетика эстафетаһы ойошторолдо

Спорт сараһы «Экологик именлек» милли проектының «Таҙа һауа»федераль проекты сиктәрендә ҡаланың һаулыҡ паркында уҙғарылды. Йүгерәктәр ярышында профессиональ спортсылар ҙа, һәүәҫкәрҙәр ҙә ҡатнашты.Хатта сабыйҙар ҙа ата-әсәләренә ҡеүәт биреп, дәртләндереп торҙо. Спортсылар дистанцияларҙы үтеүҙән тыш, махсус «йәшел ғәҙәттәр зкотрекерында» балдар йыйып, экологик яуаплы булған йәмғиәт формалаштырыуға үҙ өлөшөн индерҙе

Республикала тағы ике ауылға зәңгәр яғыулыҡ үткән


Белорет районы Туҡан һәм Егәҙе ауылдарында ҡасаба-ара газ үткәргес һәм селтәрҙәр һуҙылған. Хәҙер 800-ҙән ашыу ғаилә экологик яҡтан таҙа яғыулыҡ менән ҡуллана ала.

AY YOLA төркөмө “Интервидение”ла сығыш яһай

Музыканттар халыҡ-ара конкурс илселәре итеп һайланды. Танылған йырсылар Дима Билан һәм Клава Кока улар менән бергә ошо миссияны үтәүҙә ҡатнаша. “Беҙҙең маҡсат – музыка аша дәүер һәм мәҙәниәттәрҙе тоташтырыу. Йыр конкурсы тап ошоноң өсөн булдырылған да инде. Беҙҙең һәр йырыбыҙ “Урал батыр” эпосын тергеҙә. “Интервидение” илселәре булыу хеҙмәттәшлек кенә түгел, йәндәрҙең туғанлығы һәм яҡынлығы”, - тип белдергән социаль селтәрҙә “Әй йола” музыканттары. Халыҡ-ара бәйге 20 сентябрҙә Мәскәүҙә үтә. Унда 20 дәүләт вәкиле ҡатнашырға теләк белдергән. Конкурста Рәсәй исеменән популяр йырсы Шаман сығыш яһай.

Быйыл дауаханаларҙа модернизация үткәреү өсөн 400 млн һум аҡса бүленгән

Был суммаға Өфөлә 8 -се дауахана филиалын, ашығыс ярҙам дауаханаһы корпусын, наркология диспансеры станционарын һәм республика клиник инфекция сирҙәре дауаханаһын тәртипкә килтереү күҙаллана. 2029 йылға тиклем иҫәпләнгән төбәк программаһы буйынса Өфөлә тиҫтәләгән дауахана-поликлиниканы тәртипкә килтереү ҡаралған.

Дүшәмбегә республика аграрийҙары 550 мең бойҙай һуғып йыйған

Ауыл хужалығы эшсәндәре уңыш ҡеүәте менән ҡәнәғәт, улар гектарынан 40 центнерға тирәһе бойҙай алған. Аграрийҙар уңышты теүәлләп, киләһе йылға ҡалдырыласаҡ ужым бойҙайын сәсеүгә әҙерләнә. Ошо көндәрҙә баҫыу эшсәндәре арпа һәм борсаҡ, аҙаҡ ярауай культураларҙы йыйырға төшәсәк. Барлығы төбәк аграрийҙары алдында 2 млн 600 гектар майҙанда уңыш йыйыу маҡсаты тора.

Бәләбәй--Николаевка-Туймазы юл участкаһы ремонты август аҙағында тамамлансаҡ

Әле төҙөкләндереү эштәре Кәлшәле ауылы эргәһенда бара. «Йәшәү инфраструктураһы» милли проекты сиктәрендә 4 ярым километр юл тәртипкә килтерелә. Төҙөкләндерелгән юл участкаһы Бәләбәй, Туймазы, Шаран райондары өсөн мөһим транспорт объекты. Бында тәүлегенә 3 мең самаһы машина үтә. Ошо уҡ программа буйынса уҙған йылда Бәләбәй һәм Туймазы райондарында 16 километр юл участкаһы ремонтланды.

Башҡортостанда мутлашыуҙа ғәйепләнеүсе ҡатын ҡулға алынды

Асыҡланыуынса, Өфөлә йәшәүсе 27 йәшлек ҡыҙ мутлашыусылар ҡушыуы буйынса финанс ойошмаларҙа һәм кибеттәрҙә аҡса таларға маташҡан. Ғәйепләнеүсе гранатаға оҡшаған әйбер менән Менделеев һәм Цюрупа урамдарында енәйәт ҡылған. Тикшереү барышында хоҡуҡ боҙоусы ҡатын мутлашыусылар ҡушыуы буйынса эшләгәне асыҡланған.

«Сәләмәтлек поезы» Саҡмағош районында туҡталған

Табиптар унда июль аҙағынан алып 8 авгусҡа тиклем халыҡты ҡабул итә. Баш ҡала белгестәрен тәүҙә Йомаш ауылы ҡаршыланы.
Саҡмағоштарҙың милли кейемдәрҙә, һый-хөрмәт күрһәтеп ҡаршы алыуҙарынан табиптар баҙап та ҡалды. Табиптар бындай иғтибарҙы көтмәгән дә. Ә бына урындағы халыҡ баш ҡала табиптарының килеүен күптәнән көткән.

Йәйге сәләмәтлекте яҡшыртыу кампанияһы 500 меңдән ашыу баланы йәлеп итәсәк

Был иһә республика балаларының 96 проценты. Башҡортостанда лагерҙар селтәре ярайһы уҡ киңәйҙе. Әгәр дүрт йыл элек улар һаны мең ярымға аҙ ғына етмәһә, бөгөн иһә 1899 лагер эшләй. Йыл әйләнеһенә эшләүсе ял итеү учреждениелары һаны ла артҡан.

Өфөлә йөҙ шаҡмаҡлы шашка уйыны буйынса Рәсәй чемпионаты уҙа

Римма Баталова исемендәге спорт әҙерлеге үҙәгендә үткән сараға илдең иң көслө спортсылары йыйылған. Улар араһында 9 донъя чемпионы ла бар. Йәмғеһе Рәсәйҙең 14 төбәгенән 80 шашкасы килгән. Ярыштарҙа классик, тиҙ һәм үтә тиҙ программалы буйынса миҙалдар уйнатыла. Уның һөҙөмтәләре буйынса Төркиәлә үтәсәк донъя чемпионатында ил данын яҡлаясаҡ йыйылма команда туплана.