Башҡортостанда балалар һәм үҫмерҙәр спортын үҫтереү буйынса программа әҙерләнгән

Ул ауылдарҙа спорт инфраструктураһын яҡшыртыуға, ауыл йәштәрен спортҡа йәлеп итеүгә йүнәлтелә. Проектты ғәмәлгә ашырыу өсөн өс йылда 840 миллион һум тотонола. - Халыҡ өсөн спорт менән шөғөлләнеү мөмкинлеген булдырыу - өҫтөнлөклө бурыс, тип белдерҙе Вице-премьер-спорт министры Руслан Хәбибов.

Башҡортостан яугирҙары сираттағы хәрби бурысын үтәргә китте

Ике аҙналыҡ ялдан һуң Башҡоротостандан мобилизацияланыусы ир-егеттәр төркөмө махсус хәрби операция биләмәһенә юлланды. Яугирҙарҙы тантаналы оҙатыу «Өфө-арена» боҙ һарайы алдындағы майҙанда уҙҙы.

Башҡортостандан Донбассҡа 150-се юбилей ылауы оҙатылды

Яугирҙар өсөн адреслы ярҙам Республика Башлығы ҡушыуы буйынса тупланған. Гуманитар конвойҙы йыйыуҙа Башҡортостан Башлығы хакимиәте, дәүләт органдары, муниципаль берәмектәр хакимиәттәре, йәмәғәт ойошмалары һәм ирекмәндәр ярҙам күрһәткән. Махсус хәрби операция башланғандан алып республиканан алғы һыҙыҡҡа 17 мең тоннанан ашыу гуманитар ярҙам ебәрелгән.

Бөрө районында Ағиҙел йылғаһына ҡыҙыл китапҡа ингән 21 мең уҡбалыҡ ебәрелде

Улар Башҡортостанға Мәскәү өлкәһенән Рәсәй балыҡсылығының Волга-Кама территориаль идаралығы хеҙмәткәрҙәре күҙәтеүе аҫтында килтерелгән. Уҡбалыҡтар бикре тоҡомло ыуылдыҡтарҙы үрсетеү менән шөғөлләнгән махсус предприятиела үрсетелгән. Тәбиғи шарттарҙа уларға йәшәүе ауыр, шуға күрә яһалма шарттарҙа үрсетелеп, артабан йылғаға сығарыу - һирәк һәм ҡиммәтле балыҡтарҙы тергеҙеүҙең һөҙөмтәле ысулы һанала.

«Саптар» хореография студияһына – 10 йыл

«Торатау» Конгресс-холында Радик Бакиров етәкселегендә «Саптар» өлгөлө хореография студияһының - 10 йыллығы уңайынан юбилей концерты уҙҙы.
Бынан тиҫтә йыл элек ҙур сәхнәгә аяҡ баҫҡан коллективтың йөрәге Баймаҡ ҡалаһында. Саптар»ҙар баш ҡалала үҙҙҙәренең сағыу, халыҡсанлыҡ рухы менән һуғарылған номерҙары менән сығыш яһаны. Хореография өлкәһендә көслө һәм үҫешкән мәктәптә балалар бәләкәйҙән илһөйәрлек рухында тәрбиәләнә.

Башҡорт әҙәбиәтенә ижадсылар әҙерләүсе түңәрәк үҙенең 90 йыллығын билдәләй

«Шоңҡар» ижади берләшмәһе шағир, яҙыусы, журналист һәм ғалимдар әҙерләүсе мәккә. Мостай Кәрим, Сәғит Агиш, Һәҙиә Дәүләтшина, Рауил Бикбаев, Гөлназ Ҡотоева, Гөлфиә Янбаева кеүек билдәле әҙиптәр тап ошо ижади коллективта ҡанат нығытҡан. Ул бөгөн дә яңы исемдәр асыуын дауам итә. «Шоңҡарҙар» билдәләүенсә, 90 йыллыҡ юбилей ябай дата ғына түгел, ә ижад, илһам талантлы шағир-яҙыусыларҙың быуындар күсәгилешлеген бәйләгән тотош дәүер.

Өфөлә 10 июнгә тиклем Совет майҙанына яҡын урамдар ябыла

30 майҙан бында "Китап Байрам" халыҡ-ара йәрминкәһе уҙғарыла. 5 июндән 8 июнгә тиклем Бөтә Рәсәй уйынсыҡтар фестивале була. Ошо сараларға бәйле майҙанға яҡын урындарҙа машиналар йөрөшө сикләнә.

Башҡортостанда «Оҙайлы һәм әүҙем тормош» милли проекты сиктәрендә бер юлы 6 поликлиника төҙөлә

Был хаҡта социаль селтәрҙәрҙә Республика башлығы Радий Хәбиров хәбәр итте. Медицина учреждениелары Благовещен, Яңауыл, Учалы, Әбйәлил, Асҡын һәм Баҡалы райондарында сафҡа индерелә, объекттарҙың дүртәүһе балалар поликлиникаһы. Бер үк ваҡытта Өфө поликлиникалары яңыртыла, төҙөкләндереү тулыһынса республика бюджеты иҫәбенә алып барыла. Һуңғы йылдарҙа беренсел звеноның ландшафтын тулыһынса үҙгәртеү, ошо маҡсатҡа федераль финанстарҙы йәлеп итеү мөмкинлеге булды. Халыҡтың һаулығын һаҡлау, ғүмер оҙонлоғон арттырыу өҫтөнлөклө йүнәлеш булып ҡала, тип билдәләне Радий Хәбиров.

Башҡортостанда йәшәгән 472 мең ғаиләнең һәр һигеҙенсеһе күп балалы

Ишле ғаиләләр буйынса республика Волга буйы федераль округында алдынғы, Рәсәйҙә етенсе урынды биләй. Был турала бөгөн Башҡортостан Хөкүмәте кәңәшмәһендә Премьер-министр Андрей Назаров белдерҙе. Кәңәшмәлә шулай уҡ төбәктә сауҙа һәм хеҙмәттәр күрһәтеү сифатын үҫтереү, Халыҡ-ара «Китап» байрамына әҙерлек тураһында ла һүҙ барҙы.

Шишмә районы десантсылары махсус хәрби операцияға ярҙам итә

Әлеге ваҡытта урындағы Һауа-десант ғәскәрҙәре һәм спецназ ветерандары союзы алғы һыҙыҡтағыларға ике машина - Нива менән Уаз әҙерләй. Техниканы ремонтлағандан һуң, ул республиканан оҙатыласаҡ гуманитар ылау составында ил һағында торған яҡташтарыбыҙға еткереләсәк.

Өфөлә «Хәтер нотаһы» исеме аҫтында музыкаль кисә үтте

Хәйриә сараһы бөгөн илдә билдәләнгән Эшҡыуарлыҡ көнөнә бәйле ойошторолдо. Сираттағы осрашыу Бөйөк Еңеүҙең 80 йыллығына, Ватанды һаҡлаусылар, махсус хәрби операция ҡатнашыусылары һәм уларҙың ғаиләләренә ярҙам йылына ла арналды. Яугирҙар кисәгә махсус саҡырылғайны. Улар араһында эшҡыуарлыҡ эшен алып барғандар ҙа байтаҡ.

Сибайҙа медицина хеҙмәткәрҙәре араһында һөнәри ярыш үтте

Шәфҡәт туташтары эштә лә, ярышта ла һынатмай. Баймаҡ районының Граф күле буйында профсоюз ойошмаһы хәрәкәте Сибай округының медицина хеҙмәткәрҙәре араһында «Беҙҙең дәүер геройҙары» исемле ярыш ойошторҙо. Һөнәр оҫталары хаҡында киләһе яҙмала.

Өфөлә самокат ҡулланыу ҡағиҙәләрен боҙоусыларҙың аккаунттары ябыла

Миҙгел асылған ваҡыттан алып Өфөлә электр самокаттарын ҡуртымға биреүсе ике сервис ойошмаһы 12 меңләп ҡулланыусының аккаунтын япҡан. Уларҙың 70 проценты парковка урындарын дөрөҫ файҙаланмауға бәйле. Шулай уҡ ҡағиҙә боҙоуҙарға бер самокатта ике, хатта өсәр кешегә тиклем йөрөүҙәр ҙә инә. Ошоно күҙ уңында тотоп ҡала урамдарында ғына түгел, мәғариф учреждениеларында ла юл хәрәкәте хәүефһеҙлеге дәүләт автоинспекцияһы хеҙмәткәрҙәре ҡатнашлығында иҫкәртеү саралары үтә.

Һуңғы ҡыңғырау көнөндә алкоголь һатыу тыйылыуға ҡарамаҫтан, закон боҙоусы кибеттәр асыҡланды

Һуңғы ҡыңғырау көнөндә алкоголь һатыу тыйылыуға ҡарамаҫтан, закон боҙоусы кибеттәр асыҡланды. Өфөнөң Дим районындағы магазиндарҙың береһендә хеҙмәткәр һис бер тартыныуһыҙ алкоголле эсемлектәр һата. Рейд ойоштороусылар полиция саҡырта һәм ҡағиҙә боҙоу тураһында протокол төҙөлә. Тикшереү барышында Сауҙа һәм хеҙмәттәр министрлығының спиртлы эсемлектәр һатыуға биргән рөхсәт ҡағыҙының мөҙҙәте үтеүе лә асыҡланған. Баш ҡала үҙәгендә дөйөм туҡланыу учреждениеһы статусы булған кибеттең дә тейешле шарттары булмауы асыҡланған.

Өфөлә йәшәүсе Даниэль Мансуров ике килограммға яҡын йыйылған тәңкәне һәйкәл төҙөү өсөн тапшырған

Быйыл көҙ Мәскәүҙә Бөйөк Еңеүҙең 80 йыллығына бағышлап «Рәхмәтле быуындың тере хәтере» һәйкәле асыласаҡ. Өс мөйөшлө һалдат хаты һәм ағас формаһындағы мемориал тотош илдән йыйылған тимер аҡсаларҙы иретеп ҡойоласаҡ. Башҡорт иҡтисад-юридик колледжы студенты Даниэль Мансуров акцияға ҡушылып, 200-гә яҡын совет аҡсаһын тапшырған.

Башҡортостанда турист һалымынан алынған килем 20 миллион һумдан ашҡан

Йылдың тәүге кварталында 117 һалым түләүсе декларация тапшырған. Килемдең күпселек өлөшө Әбйәлил, Белорет, Салауат райондарына тура килә. Турист һалымын йәшәтеү урыны булған ойошма һәм шәхси эшҡыуарҙар түләй. Быйыл ул күрһәтелгән хеҙмәттәр күләменең 1 процентын тәшкил итә, ләкин йөҙ һумдан да кәмерәк булырға тейеш түгел. Декларация квартал һайын урындағы һалым оргадарына тапшырыла.

Өфөнөң Дим биҫтәһендә «Һөт кухняһы»ның яңы таратыу пункты асылды

Ул «Көньяҡ» сауҙа комплексында урынлашҡан, халыҡ уңайлығы өсөн эш ваҡыты ла оҙонайтылған. Һөт ризыҡтарын таратыу буйынса айырым көндәр билдәләнгән. Ярҙам алыусылар исемлегендә йөклө ҡатындар, бала имеҙеүсе әсәләр, аҙ тәьмин ителгән ғаиләләрҙән өс йәшкә тиклемге балалар, етем балалар һәм опекала булғандар ҙа бар.

Әбйәлил районында махсус хәрби операцияла ҡатнашыусыларҙың ғаиләләре өсөн берҙәм ҡабул итеү көнө үтте

Асҡар, Ташбулат һәм Буранғол ауылдарында 120-нән ашыу мөрәжәғәт ҡабул ителгән. Улар, башлыса, социаль ярҙам сараларына, төҙөлөш өсөн ер участкаһы биреү, льготалы ипотека һәм төбәк түләүҙәре алыу, торлаҡты ремонтлау һәм башҡа һорауҙарға ҡағылды. Ошо уҡ майҙансыҡтарҙа һәләк булған яугирҙарҙың яҡындары өсөн өҫтәл артында ултырып һөйләшеү ойошторолдо.

Өфөләге Арт-квадрат үҙенең 8 йыллығын байрам итте

Арт-квадрат асылыуға 8 йыл. Өфө үҙәгендәге ижади киңлек үҙенең тыуған көнөн бик сағыу билдәләне. Байрам саралары ике көн дауам итте. Баш ҡала халҡы һәм ҡунаҡтары өсөн Арт-квадраттың тыуған көнө карнавал-шоу, спектаклдәр һәм мюзиклдар, утлы шоу һәм аниме-фестиваль менән иҫтә ҡалды.

Өфөлә ҡатын-ҡыҙҙар өсөн ял итеүҙең яңы форматы тәҡдим ителде

Милли биҙәкле фитнес-ретрит. Өфөлә ҡатын-ҡыҙҙар өсөн ял итеүҙең яңы форматы тәҡдим ителде. Фитнес-ретритта ҡатнашыусылар спорт менән шөғөлләнә, дөрөҫ туҡланыу серҙәрен өйрәнә һәм «Аҡбуҙат»ипподромында өйрәтелгән аттар янында фотоға төшөп зауыҡлы итеп ваҡыт үткәрә ала.