Башҡортостанда хәрби журналистарға дәүләт ярҙамы күрһәтеләсәк

Дәүләт Йыйылышы - Ҡоролтай Башҡортостандың хәрби журналистарына дәүләт ярҙамы тураһында закон проекты өҫтөндә эшләй. Унда киң мәғлүмәт саралары хеҙмәткәрҙәренең, хәрби журналистика ветерандарының статусы, улар һәм уларҙың ғаиләләре өсөн социаль гарантиялар билдәләнер, тип күҙаллана. Парламент рәйесе Константин Толкачев һүҙҙәренсә, хеҙмәт бурыстарын үтәгәндә һәләк булған хәрби хәбәрселәргә һәм журналистарға түләүҙәр индереү планлаштырыла. Хәрби журналистика ветерандары шифахана дауалауы тәьмин ителәсәк. Ярҙам сараларының аныҡ исемлеген республика хөкүмәте билдәләргә тейеш.

Өфөлә «Башҡортостандың иң яҡшы тауары- 2025» республика конкурсы еңеүселәре тәбрикләнде

Өфөлә «Башҡортостандың иң яҡшы тауары- 2025» республика конкурсы еңеүселәре тәбрикләнде. Хөкүмәт Премьер-министры Андрей Назаров еңеүселәрҙе ҡотлап конкурс республиканың юғары стандарттар төбәге икәнлеген билдәләй, тине.

11-се класс уҡыусылары өсөн Берҙәм дәүләт имтихандары старт ала

Иртәгә 11-се класс уҡыусылары өсөн Берҙәм дәүләт имтихандары старт ала. Рус әҙәбиәте, химия һәм тарих фәндәрен һайлаусылар һынау тота. Быйылғы имтихандарҙың үҙенсәлеге һәм уға әҙерлек тураһында репортаж.

Евразия күсмә цивилизациялар музейында туристар өсөн ял урыны асыла

Радий Хәбиров был турала социаль селтәрендәге сәхифәһендә белдерҙе. “Шишмә районындағы Хөсәйенбәк кәшәнәһе һәм уға яҡын биләмә - проекттың мөһим өлөшө. Был ысын мәғәнәһендә мосолмандар, республикабыҙ халҡы һәм ҡунаҡтары өсөн изге урын. вәғәҙә иткәнсә, уны тәртипкә килтерәсәкбеҙ. Ошо биләмәне төҙөкләндереү проектын әҙерләй башлайбыҙ. Иң мөһиме-мәҙәни мираҫ объектын һаҡлап ҡалырға, хәүефһеҙлеккә бәйле эштәр башҡарырға, мавзолейҙы һәм ҡәбер таштарын емереүҙе туҡтатырға кәрәк. Аллаһы Тәғәлә ярҙамы менән, төбәктә туристар өсөн тағы ла бер йәлеп итеү нөктәһен асырбыҙ”, - тип билдәләгән Радий Хәбиров.

Өфө районының Булгаков ауылында яңы логистик парк төҙөлә

Был турала Башҡортостан хөкүмәтенең матбуғат хеҙмәте хәбәр итә. 18 миллиард һум инвестиция һалыу ҡарала. Яңы объектта А класындағы үҙенсәлекле келәттәр селтәрен булдырыу күҙаллана. Уларҙы федераль сауҙа селтәрҙәре ҡуртымға ала. Комплекстың дөйөм майҙаны 200 мең квадрат метр самаһы тәшкил итә. Проект 2034 йылға тиклем тормошҡа ашырыла һәм 2 мең яңы эш урыны булдырыла.

Башҡортостанда быйыл 190-дан ашыу рәсми пляж асыла

Ғәҙәттән тыш хәлдәр буйынса дәүләт комитеты рәйесе Кирилл Первов белдереүенсә, 63 район һәм ҡала һыу буйында ял итеү урындары булдырыла. Ҡомлоҡтар 1 июндән эшләй башлай. Бындай урындар махсус йыһазландырыла һәм ҡотҡарыусылар даими һаҡта була. Республикала йыл башынан һыуҙа 8 кеше һәләк булған. Шул иҫәптән Стәрлетамаҡтағы Ашҡаҙар йылғаһында һыу ингәндә бер бала батып үлгән.

Өфөлә яңы проект эшләй башланы

Баш ҡала хакимиәтенән белдереүҙәренсә, программаға ярашлы мәктәп һәм балалар баҡсаһына илтән тротуарҙар төҙөкләндерелә. Дөйөм оҙонлоғо 7 километрҙан ашыу булған 67 участкала бордюрҙар алмаштырыла һәм яңы асфальт һалына. Шулай уҡ уҡыу йорттарына инеү урындары, ундағы майҙансыҡтар тәртипкә килтереү ҡарала, юл билдәләре, светофорҙар ҡуйыла. Эштәрҙе яңы уҡыу йылына тамамлау планлаштырыла.

11-се класс уҡыусылары өсөн Берҙәм дәүләт имтиханы башланды

Егет ҡыҙҙар тарих, әҙәбиәт һәм химиянан һынау тота. 9-сы класс уҡыусылары тәүге имтиханды бер аҙ алдараҡ - 21 майҙа тапшырҙы. Быйыл республикала берҙәм дәүләт имтиханын - 16 мең 844, ә төп дәүләт имтиханын - 51 мең 812 уҡыусы тапшыра. Бөтә балаларға ла уңыштар теләйем! Ата-әсәләргә сабырлыҡ. Ә уҡытыусыларға уларҙың изге хеҙмәте өсөн рәхмәт, тип яҙған Башҡортостан башлығы социаль селтәрҙәрҙә.

Башҡортостан уҡыусыларының 50 проценттан ашыуы профилле математиканы һайлаған

Башҡортостанда сығарылыш уҡыусыларының яртыһынан күбеһе профилле математиканы һайлаған, йәмғиәтте өйрәнеү предметына 34, информатикаға 27 процент өҫтөнлөк биргән. Өфөнөң 45-се мәктәбендә берҙәм дәүләт имтиханы барышынан репортаж.

Өфө-Шафран маршруты буйынса тимер юлында экологик рейд үтте

Өфө-Шафран маршруты буйынса тимер юлында экологик рейд үтте. Куйбышев тимер юлдарының Башҡортостан бүлегендә рейдтар ай һайын ойошторола. Уның төп маҡсаты - рөхсәт ителмәгән сүплектәрҙе асыҡлау. Сираттағы тикшереүҙе БЮТ ижади төркөмө күҙәтте.

Өфөлә башҡорт телендә китаптар уҡыу марафоны еңеүселәре тәбрикләнде

Башҡорт телен һаҡлау һәм үҫтереү һәм «Мираҫ» йәштәр башланғыстарын күтәреү фондтары тарафынан ойошторолған конкурста 15 еңеүсе билдәләнде. Марафон шарттары буйынса ҡатнашыусылар сентябрҙән мартҡа тиклем тәҡдим ителгән китаптарҙы уҡып сығып, был турала социаль селтәрҙәрҙә яҙырға тейеш ине. Китаптарҙың исемлеге республика милли китапханаһы төҙөгән «Башҡорт мотлаҡ уҡырға тейеш йөҙ китап» проекты нигеҙендә төҙөлгән, унда заман әҙиптәренең әҫәрҙәре лә индерелгән.

Өфөнөң «Мирас» йыр һәм бейеү ансамбле ижад миҙгелен сағыу концерт менән тамамланы

Ҡала мәҙәниәт һарайындағы сара аншлаг менән үтте. Быйыл коллектив Еңеүҙең 80 йыллығына һәм Рәсәй мәҙәниәттәренең берҙәмлегенә арналған махсус программа тәҡдим итте. «Офицерҙар» хор йырының премьераһын тамашасылар баҫып тыңланы. Миҙгелдең тағы бер премьераһы - ҡалмыҡ бейеүе. Был миҙгелдә коллектив «Беҙ - Рәсәй» федераль проекты буйынса, Татарстанда һәм Төмән өлкәһендә гастролдәрҙә уңышлы сығыш яһай.

Башҡортостанда авария хәүефе ҙур булған юл участкаларына иғтибар арта

Дәүләт автоинспекцияһы "Ҡаршы һыҙат" тигән операция башланы. Ул 28 майға тиклем дауам итә. Баш автоинспектор Владимир Севастьянов белдереүенсә, республика юлдарында һәләк булыу осраҡтарының 25 проценты машинаның ҡаршы һыҙатҡа сығып аварияға тарыуы менән бәйле. - Юл билдәләренә иғтибар итергә, хәүефһеҙлек талаптарын үтәргә кәрәк, - тине ул.

Башҡортостан сәнәғәт күрһәткестәре буйынса Рәсәйҙең алдынғы төбәктәре иҫәбендә

Башҡортостан Мәскәү, Санкт-Петербург һәм Татарстан менән бер рәттән сәнәғәт производствоһының тотороҡло күрһәткестәренә өлгәште. Төбәк сәйәсәтен үҫтереү үҙәге әҙерләгән доклад йомғаҡтары буйынса ошондай һығымта яһалды. Эш 2025 йылдың яҙында Рәсәй субъекттарында сәнәғәт производствоһы торошон анализлауға арналған.

Башҡортостанда юлдар яңырыуы туристик ағымға этәргес бирә

Республика юл инфраструктураһының яңырыуы төбәк туризмы үҫешен дә яйға һала. Өфө - Инйәр - Белорет автомобиль юлында алып барылған төҙөлөш эштәре урындағы тәбиғәт һәйкәлдәренә юл аса. Архангел районының Абҙан шарлауығы ял көндәрендә генә туғыҙ меңләп кешене ҡабул итә.

Йәмәғәт контроле көсәйә: Әбйәлилдәге комбинат төҙөлөшө халыҡ күҙәтеүендә

Әбйәлил районында тау-байыҡтырыу комбинаты төҙөлөшө ихтималлығына бәйле хәл йәмәғәт күҙәтеүенә алынасаҡ, айырым совет булдырыла. Был турала бөгөн Бөтә донъя башҡорттары Ҡоролтайы башҡарма комитеты ағзалары «Салауат» яуаплылығы сикләнгән йәмғиәт директоры Таһир Бәхтигәрәев менән осрашыуында билдәләне.

«Ватанды һаҡлаусылар» фондының Башҡортостан филиалы ойошторолоуға ике йыл

Ойошманың эш йүнәлештәре күп яҡлы: махсус хәрби операцияла ҡатнашыусыларға һәм һәләк булғандарҙың ғаилә ағзаларына ярҙам күрһәтеү, медик-психологик реабилитация, реабилитацияның техник саралары менән тәьмин итеү, юридик мәсьәләләр, торлаҡ биналарҙы яраҡлаштырыу һәм башҡалар. 2023 йылда хәрби хеҙмәткәрҙәрҙең проблемалары менән 40 социаль координатор шөғөлләнһә, бөгөн улар 107. Төбәк филиалының функциялары ла киңәйә. Хеҙмәткәрҙәр махсу схәрби операцияла хәбәрһеҙ юғалған яугирҙарҙы эҙләү менән әүҙем шөғөлләнә башлай.

Башҡортостанда студент отрядтарының өсөнсө хеҙмәт семестры асылды

Өфөнөң Аксаков паркында үткән байрамда һәр отрядҡа хеҙмәт урындарына юллама тапшырылды. Йәштәр байрамында республиканың бөтә студент отрядтары ҡатнашты. Быйыл республиканың студент отрядтары хәрәкәте ун йыллығын билдәләне. Ошо ваҡыт эсендә унда ҡатнашыусылар һаны алты меңгә тиклем артҡан. Йыл аҙағына күрһәткесте 9 меңгә еткереү бурысы ҡуйылған.

Ғилемгә тәүге аҙым: балалар күренекле башҡорт ғалимдары менән таныша

Үҫмерҙәр өсөн өр-яңы проект! «Тамыр»телеканалының мөһим йүнәлеше - үҫеп килеүсе быуынды патриотик яҡтан тәрбиәләү. Шуға ла»Бишек» коммерция булмаған ойошмаһы менән берлектә йәш тикшеренеүселәр өсөн билдәле башҡорт мәғдәнсеһе Исмәғил Тасимов исемендәге «Асыш» медиапроекты ойошторолдо. «Родина» кинотеатрында Баш ҡала мәктәптәре уҡыусылары өсөн күренекле ғалимдар тураһында документаль фильмдарҙың исем туйы үтте

Яңауыл районында Энергетик ауылына илткән юлда асфальт һалына

3 километр тәртипкә килтерелә. Эштәр "Тормош өсөн инфраструктура" милли проектына ярашлы алып барыла. Ремонтты быйыл тамамлау көтөлә, тип хәбәр итәләр Республика хөкүмәтенән. Быйыл милли проект буйынса 680 километр юлды төҙөкләндереү маҡсаты ҡуйыла.