МХО яугире отпуск ваҡытында ғаилә ҡорған

Дүртөйлө районынан МХО яугире ҡыҫҡа ваҡытлы ялға ҡайтҡан сағында ғаилә ҡорған. Никахты теркәү тантанаһы райондың Мәҙәниәт йортонда үтте, тип яҙа муниципалитет хакимиәте башлығы Риф Йосопов социаль селтәрҙәге сәхифәһендә.

Тиҙҙән яҡташыбыҙ Тыуған илебеҙҙе һаҡлау өсөн йәнә алғы һыҙыҡҡа юллана. Йәш кәләш иренең еңеү менән иҫән-һау әйләнеп ҡайтырына ышана.

«Йәштәргә саф хистәрен һүрелтмәй, бер-береһенә терәк булып, оҙаҡ йылдар бәхетле ғүмер кисереүҙәрен теләйем. Ысын патриот, тыуған еребеҙҙе һәм илебеҙ мәнфәғәттәрен яҡлаусы яҡташыбыҙ имен-һау әйләнеп ҡайтһын», — тигән изге теләктәрен еткерҙе Риф Йосопов.

Башҡортостанда яҙғы сәсеү эштәре башланды

Башҡортостандың 22 районынан ауыл хужалығы предприятиелары һәм фермерҙар яҙғы культураларҙы сәсеүгә төшкән. Был хаҡта төбәк етәксеһе Радий Хәбиров социаль селтәрҙәрҙә яҙҙы. Быйыл яҙ иртә, әммә сәсеүҙе ғәҙәти ваҡытта тиерлек башлайбыҙ, - тип билдәләгән ул.

Республика парктары акарицид менән эшкәртелә

Талпандар әүҙемләшә. Башҡортостанда 4100 гектар самаһы майҙанда йәмәғәт биләмәһе булған парктарҙа, скверҙарҙа һәм халыҡтың башҡа ял урындарында бөжәктәргә ҡаршы биләмәләрҙе акарицид менән эшкәртелә. Миҙгел башынан алып республиканың медицина ойошмаларына талпан тешләүҙән зыян күргән 428 кеше, шул иҫәптән 162 бала мөрәжәғәт иткән. Талпандар әүҙем үрсегән осорҙа нисек һаҡланырға, төбәктә ниндәй профилактик саралар башҡарылыуы хаҡында репортаж.

Өфөнән махсус хәрби операция биләмәһенә сираттағы хәрби хеҙмәткәрҙәр төркөмө юлланды

Бөгөн Өфөнән махсус хәрби операция биләмәһенә сираттағы хәрби хеҙмәткәрҙәр төркөмө юлланды. «Башҡортостан» 31-се мотоуҡсылар полкы яугирҙары ике аҙна элек ҡайтҡан. Ял ваҡытында улар башлыса көнкүреш мәсьәләләре менән шөғөлләнгән, ғаиләһе менән бергә булған. Яу ҡырына хәрбиҙәрҙе туғандары һәм яҡындары оҙатты. Ватан һаҡсылары үҙҙәренең әйберҙәре менән бергә, хеҙмәттәштәре өсөн посылкалар ҙа алған.

«Башҡортостан» полкы артиллеристары дошман нығытмаларын ҡыйрата

Мәргән артиллерия. «Башҡортостан» 31-се мотоуҡсылар полкының Мөғин Нагаев исемендәге гаубица-артилллерия дивизионы дошман нығытмаларын ҡыйрата. Артиллеристарҙың эшен беҙҙең хәрби БЮТ хәбәрсеһе күҙәтте.

Ремонттан һуң Башҡортостан яҙыусылар союзы йорто «Китап байрамы» фестивалендә асыласаҡ

Бинала төҙөкләндереү эштәре тамамланған. Йортто асыу тантанаһы һәм башҡа һорауҙар күсмә кәңәшмә барышында һөйләшелде. Баш ҡала үҙәгендә урынлашҡан ике ҡатлы йорт Поликарпов йорто булараҡ билдәле. Мәҙәни мираҫ объекты һаналған бинала иҙән алмаштырылған, елләтеү, канализация системаһы, радиаторҙар яңыртылған. Төҙөкләндереү бинаның тышҡы яғына ла ҡағылған.

Өфөлә йәшәүсе 8 йәшлек Әмирә Сабироваға инсульт үткәргәндән һуң реабилитация үтергә кәрәк

Өфөлә йәшәүсе 8 йәшлек Әмирә Сабироваға инсульт үткәргәндән һуң реабилитация үтергә кәрәк. Инвалид баланың һул ҡулы йөрөмәй һәм сабый һөйләшкәндә лә ҡатмарлыҡтар кисерә. Баш ҡалалағы махсус үҙәктә реабилитация үтеү өсөн ғаиләгә 240 мең һум аҡса талап ителә. Был сумманы йыйыу өсөн Сабировтар битараф булмаған граждандарҙан ярҙам һорай. Тулыраҡ мәғлүмәт киләһе яҙмала.

Яугир отпускыһы ваҡытында һөйгәне менән ғаилә ҡорған

Нефтекама ҡалаһында «Бэби» позывнойлы яугир һөйгәне Анна менән ғаилә ҡорған. Башҡортостандың юстиция эштәре буйынса дәүләт комитеты рәйесе Владимир Спеле йәш парҙың туй тантанаһы тураһында яҙа.

Владимир Спеле әйтеүенсә, яңы өйләнешкәндәр никах теркәү көнөн – 22 апрелде – осраҡлы һайламаған. Тап ошо көндә 2023 йылда Олег менән Анна тәүге тапҡыр осрашҡан.

«Яҙмыш ҡушыуы буйынса, буласаҡ кейәүҙең ялы ошо датаға тура килгән. Һәм теүәл ике йылдан улар – ир менән ҡатын. Йәш парҙы туй көнө менән ҡотлайбыҙ! Ғаиләгеҙҙә мөхәббәт, татыулыҡ һәм сәскә атыу батшалыҡ итһен!» – тип яҙа дәүләт комитеты рәйесе.

Республикала умартасылыҡты үҫтереү буйынса комплекслы программа эшләй

Ул 2030 йылға тиклем иҫәпләнгән. Шулай уҡ субсидия һәм гранттар бирелә. “Тағы ла бер мөмкинлек бар. Ул бал ҡорттарын төрлө ауырыуҙарға бушлай тикшереү. Был маҡсаттан беҙ райондарға етенсе йыл рәттән Башҡорт ғилмие-етештереү ветеринарияһы лабораторияларының күсмә модулдәрен ебәрәбеҙ”, - тип яҙған республика етәксеһе Радий Хәбиров. Быйыл белгестәр Бөрйән, Күгәрсен, Әлшәй, Нуриман, Мишкә, Борай һәм салауат райондарында булды. Башҡа район умартасылары ла тикшереү өсөн материал килтергән. Лаборанттар 11 мең самаһы проба алған. “Бал ҡорттары өсөн ошондай “сәләмәтлек поездары” йөрөй. Башҡортостан илдең төп баллы төбәге статусын нығытһын өсөн барыһы ла эшләнә”, - тигән Радий Хәбиров.

Башҡортостанда умартсыларға ярҙам күрһәтеүгә айырыуса иғтибар бүленә

Бал ҡорттары өсөн генә «Сәләмәтлек поездары». Башҡортостанда умартсыларға ярҙам күрһәтеүгә айырыуса иғтибар бүленә. Татлы продукция етештереүселәр субсидия һәм гранттар ала, 2030 йылға тиклем махсус комплекслы программа ғәмәлгә ашырыла.

Бүздәк районында урманда юғалған баланы эҙләү уңышлы тамамланған

Кисә 7 йәшлек малай өләсәһе һәм олатаһы менән Бүздәктән Урҙайбаш ауылына барырға сыҡҡан булған. Әммә ниндәйҙер мәлдә ул өлкәндәр күҙенән юғала. Кискә ҡарай эҙләү отрядтары Мирондың юғалыуы тураһында хәбәр тарата. Эҙләүгә ҡотҡарыусылар, полиция, район хакимиәте вәкилдәре, кинологтар, битараф булмаған урындағы халыҡ һәм ирекмәндәр ҡушыла. Улар төнө буйына урманды һәм эргә тирәләге биләмәләрҙе иңләп сыға. Бөгөн иртәнге сәғәт 8-ҙәр тирәһендә һөйөнөслө яңылыҡ килә. Аҙашҡан малайҙы урындағы кешеләр таба. Малай төндө баҫыуҙа үткәргән.

Дүртөйлө районы аграрийҙары яҙғы баҫыу эшенә сыҡты

Быйыл төбәктә 43 мең ярым гектар майҙанда төрлө культуралар сәсеү планлаштырылған. Шул уҡ ваҡытта ужым бойҙайына ашлама индереү ҙә йылдам бара. Урындағы хужалыҡтар эшмәкәрлеге тураһында репортаж.

Тантаналы шарттарҙа мобилизацияланған яугирҙарҙы махус хәрби операция биләмәһенә оҙаттылар

Запорожье өлкәһендә хеҙмәт иткән яҡташтарыбыҙ ҡыҫҡа ваҡытлы ялға ҡайтҡан булған. Башҡортостан Хөкүмәте премьер-министры урынбаҫары Ирек Сәғитов ир-егеттәргә рәхмәт белдереп, төбәктә тыуып үҫкән меңдәрсә яҡташыбыҙҙың хәрби бурысын намыҫ менән үтәүен, Рәсәй армияһының данлы традицияларын дауам итеүен билдәләне. Тап улар батырлыҡ һәм ҡаһарманлыҡ күрһәтә, йәш быуында илһөйәрлек рухын тәрбиәләй.

Парад маршында беренсе урын яулаған Өфө кадет корпусы кадеттары бүләкләнде

Былтыр Һамар ҡалаһында Бөйөк Еңеү парадында беренсе урын яулаған уҡыусыларҙы Дәүләт Йыйылышы - Ҡоролтай рәйесе Константин Толкачев һәм махсус хәрби операцияла ҡатнашыусы ветеран яугирҙар тәбрикләне. Тантаналы маршта Рәсәйҙең төрлө төбәктәренән 125 взвод ҡатнаштҡан. Дисциплина, берҙәмлек, патриотик рух һәм башҡа йүәнлештәрҙә Өфө кадеттары юғары оҫталыҡ күрһәтә.

«Байыҡ. Балалар» республика телевизон конкурсының һайлап алыу туры старт ала!

Ярыш ике йәш категорияһы буйынса үткәрелә:
I категория — 16-35 йәш: соло, дуэт, трио, ансамблидәр;

II категория — 36 йәштән өлкәндәр: соло, дуэт, трио, ансамблдәр.

2025 йылдың 15 майына тиклем хореографик композицияның видеояҙмаһын конкурстың baik-bk@mail.ru электрон почтаһына ебәрергә кәрәк.
https://vk.com/video-85076499_456257047

Өфөлә «Атайҙар һәм уландар» тип исемләнгән республика патриотик йыр конкурсы үтә

Йәш быуында Ватансылыҡ тойғоларын тәрбиәләү ғаиләнән башлана. Ошо маҡсатта иртәгә Өфөнөң «Атайсал» мәҙәниәт үҙәгендә «Атайҙар һәм уландар» тип исемләнгән республика патриотик йыр конкурсы үтә.

Өфөлә Павел Крашенинниковтың китабының исем туйы үтте

Өфөлә Дәүләт думаһының дәүләт төҙөлөшө һәм ҡануниәт буйынса комитеты рәйесе, Рәсәй яҙыусылар союзы ағзаһы Павел Крашенинниковтың китабының исем туйы үтте. «Бөйөк державаға юлда» тип исемләнгән китапта ил тарихындағы һынылышлы һәм ҡатмарлы осор тураһында һүҙ бара.

Быйыл Башҡортостанда 21 меңдән ашыу юл билдәһе ҡуйыла

Хәүефһеҙлек тәьмин итеү өсөн төрлө саралар ҡаралған. Транспорт һәм юл хужалығы министрлығынан хәбәр итеүҙәренсә, уҙған йылда 3 меңгә яҡын авария булған. Уларҙа 397 кешенең ғүмере өҙөлгән. Был 2023 йылдағынан аҙыраҡ. Республикала транспорт саралары һаны арта бара. Әле 2 миллион 82 меңдән ашыу техника теркәлгән. Был да юлдарҙа хәүефһеҙлеккә йоғонто яһай.

Шәмбе Башҡортостанда башҡорт теленән Халыҡ-ара диктант уҙа

Мәғрифәтселек сараһы иртәнге сәғәт 11-ҙә БСТ телеканалында тура эфирҙа күрһәтелә. Дикторҙар тексты өс кимәлдә уҡый.Тәүгеһе яңы башлап өйрәнеүселәр , икенсеһе башҡорт телен иркен белгәндәр, өсөнсөһө төньяҡ-көнбайыш диалектында һөйләшеүселәр өсөн. Темалары Ватанды һаҡлаусыларға һәм Бөйөк Ватан һуғышында еңеүҙең 80 йыллығына, тыныслыҡҡа һәм берҙәмлеккә арналған. Башҡорт теленән яҙма эште оффлайн һәм онлайн форматта яҙырға мөмкин. Мәғрифәтселек сараһы 28 апрелгә тиклем дауам итә.

Башҡортостан халҡының 62 проценты физкультура һәм спорт менән даими шөғөлләнә

Был турала вице-премьер-Спорт министры Руслан Хәбибов белдерҙе. Уның әйтеүенсә, өлкән йәштәге 270 мең кеше системалы рәүештә күнекмәләр уҙғара. Уларҙың 6 меңе ГТО нормаларын үтәгән һәм 10 мең һумлыҡ сертифкаттар алған. Халыҡ өсөн спортты үҫтереү - өҫтөнлөклө йүнәлештәрҙең береһе - тине Руслан Хәбибов.