Йыл башынан республика юлдарында йәйәүлеләр ҡатнашлығында 160 авария теркәлгән

Бәләгә тарыусыларҙың 13-ө һәләк булған, 152-һе йәрәхәтләнгән. Белгестәр билдәләүенсә, көндәр йылыу менән балалар ҡатнашлығында авариялар тағы ла арта. Күңелһеҙ осраҡтарҙы иҫкәртеү маҡсатында республикала «Йәйәүле» акцияһы башланды.

Хәйбула районы Таштуғай ауылында йәшәүселәр 80-cе маскировка селтәрен үргән

Бөйөк Ватан һуғышында Еңеүҙең 80 йыллығы уңайынан Хәйбула районы Таштуғай ауылында йәшәүселәр 80-cе маскировка селтәрен үргән. Махсус хәрби операция биләмәһенә гуманитар ылау менән оҙатылған япмалар ҡоралды, ҡеүәтле техниканы һәм инженер ҡоролмаларҙы йәшереүҙә ҡулланыла. Әҙел ауылынла ла ирекмәнлек эше йәнләндерелгән. Яугирҙарҙың мөрәжәғәте буйынса маскировка костюмдары ла тегелә.

Башҡортостанда сираттағы экологик предприятие асылды

Благовещенда макулатура эшкәртеү буйынса «Башэковата» заводын сафҡа индереү тантанаһы Өфөлә «Экология. Технологиялар. Тормош» форум-күргәҙмәһе сиктәрендә уҙҙы. «Башэковата» ҡағыҙ ҡалдыҡтарын эшкәртеп, уны целлюлозалы йылытҡыс етештереүҙә файҙалана. Благовещенда асылған завод 13 кешене эш урыны менән тәьмин иткән, киләсәктә был күрһәткес ике тапҡырға артасаҡ.

Өфөлә Еңеүҙең 80 йыллығына бағышланған тантаналы саралар исемлеге баҫылды

Баш ҡалаһы хакимиәтенән белдереүҙәренсә, байрам программаһында республика командалары араһында лазер алышы буйынса Башҡортостан чемпионаты һәм беренселеге, фигуралы шыуыу буйынса республика беренселеге, “Яҙғы ралли” спорт туризмы фестивале, спорт аэробикаһы буйынса Федерация кубогына ҡала ярыштары, Бөтә Рәсәй волейбол турниры һәм башҡа саралар планлаштырыла. Мәҙәни афишала – патриотик концерттар, күргәҙмә- флешмобтар, спектаклдәр, конкурстар һәм ижади акциялар ҡаралған.

Өфөнөң Дим биҫтәһендәге Баланов паркын реконструкциялау киләһе йыл башлана

Башҡортостан башлығы Радий Хәбиров майҙанды төҙөкләндереү проекты менән танышып, урындағы халыҡ менән аралашты. Спорт менән шөғөлләнеү, ял өсөн ҡаралған паркта ағас ултыртыу, йүгереүселәр өсөн һуҡмаҡ, велотрасса эшләү күҙаллана. Дим биҫтәһенә эш сәфәре сиктәрендә республика етәксеһе реконструкциянан һуң асылған Башҡорт кавалерия дивизияһы исемен йөрөткән сквер менән танышты.

Өфөлә «Уңышҡа үҙ юлың» тип исемләнгән йәштәр форумы үтте

Башҡортостан юғары уҡыу йорттарының студенттар үҙидаралығы лидерҙары мәғариф программаһын үҙләштереүҙән тыш, республика башлығы Радий Хәбиров менән дә осрашып асыҡтан-асыҡ һөйләште.

Иглин районында ата-әсә ҡарауынан мәхрүм балаларға фатир асҡыстарын тапшырылды

Етемдәргә дәүләт ярҙамы. Иглин районында ата-әсә ҡарауынан мәхрүм балаларға фатир асҡыстарын тапшырылды. Торлаҡта барлыҡ уңайлыҡтар булдырылған.

Башҡортостанда махсус хәрби операция темаһын яҡтыртҡан конкурс еңеүселәре бүләкләнде

Башҡортостандың мәҙәниәт министры махсус хәрби операция темаһын ижади эштәрендә яҡтыртыусылар менән осрашты. Әңгәмәгә хәрби- патриотик тематикалы әҙәби, музыкаль әҫәрҙәр, шулай уҡ һынлы сәнғәт әҫәрҙәре менән республика конкурсында еңеүселәр саҡырылғайны. Конкурс еңеүселәрен бүләкләү тантанаһы «Арт-Ҡоролтай» бишенсе Халыҡ-ара мәҙәни форумы эше сиктәрендә быйыл март айында үтте. Һөйләшеүҙә киләсәккә илһөйәрлек рухындағы эш йүнәлештәре билдәләнде.

112-се Башҡорт кавалерия дивизияһының Ҡыҙыл байрағы реставрациянан һуң Өфөгә ҡайтты

Башҡорт атлыларының был иң беренсе байрағы, уны Башҡорт АССР-ы Юғары советы Президиумы тапшырған. Ҡыҙыл әләмде 1942 йылда Миңлеғәле Шайморатов фронтҡа юлланыр алдынан үҙ ҡулдары менән байраҡ төркөмөнә биргән. 1945 йылдан 1963 йылға тиклем әләм Мәскәүҙә, Ҡораллы көстәрҙең Үҙәк музейында, Өфөгә ҡайтарылғас, Милли музейҙа һаҡланған. Бөйөк Ватан һуғышында Еңеүҙең 80 йыллығы алдынан Мәскәүҙә билдәле реставратор Наталья Синицына етәкселегендә тергеҙелгән. Байраҡ ебәк репстан эшләнгән,башҡорт һәм рус телдәрендә яҙыуҙары бар. Реставрация эше декабрҙә башланып апрелгә тиклем дауам иткән.

«Еңеү ирекмәндәре» 9 майға әҙерләнә

Хәрәкәт ағзалары республика ҡалаларында үтәсәк тантаналарҙы көйләү буйынса махсус уҡыуҙар үтә, байрам уңайынан ойоштороласаҡ акцияларҙа ҡатнашыу шарттарын өйрәнә. Йолаға әүерелгән «Георгий таҫмаһы» акцияһы өсөн таҫмалар әҙерләй.

Өфөлә Милли кейем көнө алдынан Башҡорт сигеү йорто асылды

Ул билдәле рәссам-модельер, Башҡортостандың аҡаҙанған туҡыу һәм еңел сәнәғәт хеҙмәткәре Роза Юлдашбаева етәкселегендә эшләйәсәк. «Ағиҙел» башҡорт художество кәсептәре предприятиеһындағы цехты файҙаланыуға тапшырыуҙа БЮТ ижади төркөмө лә булды.

Башҡортостан 4 төбәк менән килешеү төҙөнө

Республика Сәнәғәт, энергетика һәм инновациялар министрлығы Мәскәү, Киров, Түбәнге Новгород һәм Омск өлкәләре менән балалар тауарҙарын етештереү өлкәһендә хеҙмәттәшлек итергә килеште. Документҡа Мәскәүҙә уҙған балалар тауарҙары индустрияһы когресында ҡул ҡуйылды. Балалар тауарҙары индустрияһы берләшмәһе етәксеһе Антонина Цицулина белдереүенсә, лидер булған төбәктәр менән хеҙмәттәшлек эште киңәйтеү һәм кооперация бәйләнештәрен нығытыу мөмкинлеген бирә. “Беҙ һөҙөмтәләрҙе яҡшыртыу, илдә сығарылған тауарҙарҙы арттырыуу, яңы продукция етештереү маҡсатын ҡуябыҙ”, - тине Антонина Цицулина.

Хужалыҡтар сәсеү алдынан минераль ашлама туплай

Әле план 63 проценҡа үтәлгән. Стәрлетамаҡ, Саҡмағош, Благовар, Ауырғазы, Бүздәк, Дәүләкән, Шишмә һәм Ҡырмыҫҡалы райондары айырыуса әүҙем. Быйыл 236 мең тонна ашлама һатып алыу ҡарала. Яҙғы кампанияла 2 миллион 150 мең гектарҙан ашыу ер сәселә.

Өфөлә Дәүләт Думаһы депутаты яңы закондар тураһында һөйләне

Кибермутлашыусыларға ҡаршы көрәш, шәхси мәғлүмәттәрҙе һаҡлау, социаль түләүҙәр күләмен индексациялау һәм башҡалар. Илдә бер нисә яңы закон проекты ҡабул ителде. Улар Өфөлә Дәүләт думаһы депутаты Ирина Панькинаның республика журналистары менән осрашыуында тикшерелде.

Өс ай эсендә Башҡортостанда йәшәүселәр мутлашыусылар иҫәбенә 750 миллион һумға яҡын аҡса күсергән

Сумма былтырғы менән сағыштырғанда, 80 миллионға күберәк. Башҡортостан йәмәғәт палатаһы үҙ майҙанында мутлашыусыларҙан һаҡланыу буйынса лекциялар үткәрә башланы. Дәрестәр үҫмерҙәргә һәм оло йәштәге граждандарға тәғейенләнгән. Бөгөн 5 меңдән ашыу кеше ошо йүнәлештә уҡыу үткән.

Башҡортостанда етештерелгән продукция «Окей» гипермаркетында һатыла башлаясаҡ

Өфөлә федераль сауҙа селтәре вәкилдәре һәм республика етештереүселәре ҡатнашлығында сауҙа-һатып алыу конференцияһы уҙҙы. Унда аҙыҡ-түлектән алып йорт кәрәк-яраҡтарына тиклем етештереүсе 50-нән ашыу ойошма коммерция тәҡдимдәре һәм продукция өлгөләре менән таныштырҙы.

Еңеүҙең 80 йыллығы айҡанлы хөрмәт: фронтовиктар һәм тыл эшсәндәренә миҙалдар

Ветерандарға рәхмәт йөҙөнән. Шишмә районында Солтан Хәйҙәровҡа Еңеүҙең 80 йыллығы хөрмәтенә юбилей миҙалы һәм почетлы гражданин исеме тапшырылды.
Юбилей миҙалына Новотроицк ауылынан Риза Вәлиев та эйә булды. Һуғыш башланғанда уға 13 йәш кенә була.

Хәйбулла районында «Быуындар хәтере» тип Еңеү фестиваленең беренсе туры уҙҙы

Хәйбулла районында Бөйөк Еңеүҙең 80 йыллығы уңайынан «Быуындар хәтере» тип Еңеү фестиваленең беренсе туры уҙҙы. Фестивалдә Хәйбулла районының барлыҡ ауыл советы биләмәләре ҡатнашты. Маҡан, Федоровка, Таналыҡ, Сиҙәм ауыл советы биләмәләренең үҙешмәкәр артистары башҡарыуында һуғыш темаһына арналған йыр, бейеү, тамашалар күрһәтелде.

Бөгөн «Спартак» менән «Салауат Юлаев» командалары араһындағы серияла дүртенсе уйын үтә

Һуңғы осрашыуҙа дәғүәселәр 4-2 иҫәбе менән еңеү яулап серияла алға сыҡты. Был көндө юлаевсыларҙан уңышҡа Шелдон Репмал менән Егор Сучков өлгәште. Илдең баш ҡалаһындағы уйынды Башҡортостан юлдаш телеканалында ҡарарға мөмкин. Тура трансляция төнгө сәғәт 10-сы 20 минутта башлана.

Ринат Рамаҙановҡа — Ҡоролтай миҙалы

«Әй йола» төркөмө йырсыһы Ринат Рамаҙановҡа Бөтә донъя башҡорттары ҡоролтайының «Ал да, нур сәс халҡыңа» миҙалын тапшырғандар.
Шулай уҡ уға үҙенсәлекле сувенир бүләк иткәндәр.